ʼAua Naʼa Koutou Liliu Ko He ʼu Hahaʼi Fagono Loto Galogalo
“Koutou liliu ko he ʼu hahaʼi ʼe nātou maʼuliʼi te folafola, kae mole ko he ʼu hahaʼi ʼe nātou fagono pe kiai, ʼo koutou kākāʼi pe ia koutou totonu ʼaki he ʼu fakakaukau hala.”—Sakopo 1:22, MN.
1. Koteā te ʼu milakulo ʼaē neʼe maʼu e te hahaʼi ʼo Iselaele ia te pilivilesio ʼaē ke nātou mamata kiai?
ʼE MOʼONI te ʼui ʼaē “ ʼe mole galo anai” te ʼu milakulo ʼaē neʼe fakahoko e Sehova ʼi Esipito. Neʼe fakaofoofo moʼoni te ʼu Tautea fuli ʼaē e Hogofulu. Neʼe hoa ki te ʼu meʼa lalahi ʼaia te faka ʼāteaina fakaofoofo ʼa te hahaʼi ʼo Iselaele ʼi te ʼu vai ʼo te Tai Kula ʼaē neʼe vaheʼi lua. (Teutalonome 34:10-12) Kanapaula neʼe koutou mamata ki te ʼu meʼa ʼaia, pea ʼe mahino ia ʼe mole galo anai kia koutou ia Ia ʼaē neʼe ina fai te ʼu meʼa ʼaia. Kae neʼe hiva fēnei e te tagata fai pesalemo: “Neʼe galo [ki te kau Iselaele] te ʼAtua tonatou Fakamaʼuli, ia Ia ʼaē neʼe ina fai te ʼu meʼa lalahi ʼi Esipito, te ʼu gāue fakaofoofo ʼi te fenua ʼo Hame, te ʼu meʼa fakamanavahe ʼi te Tai Kula.”—Pesalemo 106:21, 22.
2. Koteā ʼaē ʼe ina fakahā mai neʼe mole fualoa te loto fakafetaʼi ʼa Iselaele ʼo ʼuhiga mo te ʼu gāue mālohi ʼa te ʼAtua?
2 ʼI tanatou ʼosi fakalaka ʼi te Tai Kula, ko te kau Iselaele neʼe nātou “kamata manavasiʼi kia Sehova pea mo tui kia Sehova.” (Ekesote 14:31) Neʼe fakatahi te ʼu tagata ʼo Iselaele mo Moisese ʼi te hiva ʼaē kia Sehova ia te hiva ʼo te mālo, pea ko Miliame pea mo te tahi ʼu fafine neʼe nātou tā nafa pea mo memeʼe. (Ekesote 15:1, 20) Ei, neʼe ōfo te hahaʼi ʼa te ʼAtua ʼi te ʼu gāue mālohi ʼa Sehova. Kae neʼe mole fualoa tanatou loto fakafetaʼi ʼaia kia te Ia ʼaē neʼe ina fakahoko te ʼu gāue ʼaia. Mole fualoa, pea ko te aga ʼa te tokolahi neʼe kua hage ia kua galo kia nātou te ʼu meʼa fuli ʼaia. Neʼe nātou muhumuhu pea mo meo kia Sehova. Ko ʼihi neʼe nātou tauhi ki te ʼu tamapua pea mo fai he ʼu felāveʼi fakasino heʼeʼaoga.—Faka au 14:27; 25:1-9.
Te ʼu ʼAluʼaga ʼAē ʼe Feala Ke Tou Liliu Ai ʼo Loto Galogalo
3. ʼUhi ko totatou ʼuhiga agahala, koteā ʼaē ʼe feala ke galo kia tatou?
3 ʼE faigataʼa te mahino ki te maʼuli galo ʼaia ʼa te kau Iselaele. Kae ʼe feala pe ke hoko te meʼa ʼaia kia tatou. ʼE moʼoni, neʼe mole tou sio mata ki he ʼu milakulo ʼa te ʼAtua. Kae ʼi tatatou ʼu felogoi mo te ʼAtua, neʼe lagi hoko moʼoni kia tatou he ʼu ʼaluʼaga ʼe mole galo anai kia tatou. Ko ʼihi ia tatou ʼe lagi nātou manatuʼi te temi ʼaē neʼe nātou tali ai te moʼoni ʼa te Tohi-Tapu. Neʼe lagi tou toe fiafia ʼi tatatou faikole moʼo fakahā kia Sehova tatatou foaki totatou maʼuli kia te ia pea mo totatou papitema ʼo tou liliu ai ko he ʼu Kilisitiano moʼoni. Neʼe logoʼi e te tokolahi ia tatou te tokoni ʼa Sehova ʼi he lakaga ʼo totatou maʼuli. (Pesalemo 118:15) Pea tāfito, ʼaki te mate faka sakilifisio ʼo te ʼAlo totonu ʼo te ʼAtua, ia Sesu Kilisito, neʼe tou maʼu te ʼamanaki ʼo te hāofaki. (Soane 3:16) Kae ʼuhi ko totatou ʼuhiga agahala, ka tou tauʼi he ʼu holi ʼe kovi pea mo te ʼu tuʼania ʼo te maʼuli, ʼe feala ke galo gafua kia tatou te ʼu meʼa lelei ʼaē neʼe fai e Sehova maʼa tatou.
4, 5. (a) Neʼe fakatokaga feafeaʼi e Sakopo te tuʼutāmaki ʼaē ko te liliu ko he ʼu hahaʼi fagono loto galogalo? (b) ʼE tou lava faka ʼuhiga feafeaʼi te lea fakatātā ʼo te tagata pea mo te sioʼata kia tatou totonu?
4 ʼI tana faitohi ki tona ʼu kaumeʼa Kilisitiano, ko te tēhina ʼo Sesu ko Sakopo neʼe ina fakatokaga kia nātou ia te tuʼutāmaki ʼaē naʼa nātou liliu ko he ʼu hahaʼi fagono loto galogalo. Neʼe ina tohi fēnei: “Koutou liliu ko he ʼu hahaʼi ʼe nātou maʼuliʼi te folafola, kae mole ko he ʼu hahaʼi ʼe nātou fagono pe kiai, ʼo koutou kākāʼi pe ia koutou totonu ʼaki he ʼu fakakaukau hala. Kapau ʼe fagono he tahi ki te folafola kae mole ko he tahi ʼe ina maʼuliʼi, ʼe hage ia ko he tagata ʼe ina fakasiosio tona fofoga ʼi he sioʼata. Heʼe fakasiosio pe ia, pea ʼalu pea galo atu aipe tona faʼahiga tagata.” (Sakopo 1:22-24, MN ) Koteā te faka ʼuhiga ʼo te ʼu palalau ʼaia ʼo Sakopo?
5 Ka tou ʼala ake ʼi te uhu, ʼi te agamāhani ʼe tou fakasiosio ʼi te sioʼata moʼo fetogi te ʼu meʼa ʼaē ʼe ʼaoga ʼi totatou fofoga. Pea ka tou fai te ʼu gāue kehekehe pea mo tokaga totatou ʼatamai ki he tahi ʼu meʼa, ʼe mole kei tou manatuʼi te ʼu meʼa ʼaē neʼe tou sio ʼi te sioʼata. ʼE feala ke toe hoko te faʼahi ʼaia ʼi te faʼahi fakalaumālie. Ka tou sio ki te Folafola ʼa te ʼAtua, ʼe feala ke tou fakatatau totatou ʼaluʼaga pea mo te meʼa ʼaē ʼe loto kiai Sehova. Pea ʼe tou sio ai ki totatou ʼu vaivaiʼaga. Ko te ʼatamai mālama ʼaia ʼe tonu ke ina uga tatou ke tou fai he ʼu fetogi ʼi totatou ʼulugaaga. Kae ʼi tatatou fakahoko tatatou ʼu gāue pea ka tou felāveʼi mo he ʼu fihifihia, ʼe faigafua tatatou mole kei manatu fakalaumālie. (Mateo 5:3; Luka 21:34) ʼE hage ia kua galo kia tatou te ʼu meʼa ʼofa ʼaē ʼe fai e te ʼAtua kia tatou. Kapau ʼe hoko te faʼahi ʼaia, pea ʼe faigafua hatatou tō ki te agahala.
6. Koteā te ʼu vaega faka Tohi-Tapu ka tou vakaʼi anai ʼe tokoni mai ke mole galo kia tatou te folafola ʼa Sehova?
6 ʼI tana ʼuluaki tohi ki te kau Kolonito, ʼe talanoa te ʼapositolo ko Paulo ki te kau Iselaele loto galogalo ʼi te toafa. Neʼe ʼaoga te ʼu palalau ʼa Paulo ki te kau Kilisitiano ʼo te ʼuluaki sēkulō, koia kapau ʼe tou vakaʼi te ʼu meʼa ʼaē neʼe ina tohi pea ʼe tokoni mai anai ke mole galo kia tatou te folafola ʼa Sehova. Koia, tou vakaʼi te ʼu vaega ʼo 1 Kolonito 10:1-12.
Tou Fehiʼa Ki Te ʼu Holi ʼo Te Mālama
7. Koteā te ʼu fakamoʼoni ʼo te ʼofa ʼa Sehova neʼe fakahā ki te kau Iselaele?
7 Ko te meʼa ʼaē ʼe ʼui e Paulo ʼo ʼuhiga mo te kau Iselaele ʼe ko he fakatokaga ʼaia ki te kau Kilisitiano. ʼE ʼuluaki tohi fēnei e Paulo: “ ʼE mole ʼau loto ke ʼaua naʼa koutou ʼiloʼi ʼu tēhina, ko tatatou ʼu kui neʼe nātou haʼele ʼi te malumalu ʼo te ʼao, pea neʼe nātou fakalaka fuli ʼi te tai, pea neʼe papitemaʼi ia nātou fuli ia Moisese ʼaki ia te ʼao pea mo te tai.” (1 Kolonito 10:1-4, MN ) Ko te hahaʼi ʼo Iselaele ʼi te temi ʼo Moisese neʼe nātou sio ki te fakahā ʼo te mālohi ʼa te ʼAtua, ʼo kau kiai te ʼao faka milakulo ʼa te ʼAtua ʼaē neʼe ina taki nātou ʼi te uhu pea mo tokoni kia nātou ke nātou fakalaka ʼi te Tai Kula. (Ekesote 13:21; 14:21, 22) Ei, neʼe fakahā lelei ai te ʼofa ʼa Sehova ki te kau Iselaele ʼaia.
8. Neʼe koteā te ʼu fua kovi ʼo te loto galogalo ʼa te kau Iselaele ʼi te faʼahi fakalaumālie?
8 ʼE toe ʼui fēnei e Paulo: “Kae ki te tokolahi ʼo nātou neʼe mole leleiʼia e te ʼAtua, he neʼe matehi nātou ʼi te toafa.” (1 Kolonito 10:5, MN ) Meʼa fakaʼofaʼofa foki! Tokolahi ʼi te kau Iselaele ʼaē neʼe mavae mai Esipito neʼe mole nātou lava hū ki te Kele ʼo Te Fakapapau. Neʼe mole leleiʼia nātou e te ʼAtua ʼuhi ko tanatou tuigataʼa, koia neʼe nātou mamate ai ʼi te toafa. (Hepeleo 3:16-19) Koteā ʼaē ʼe tou lava tāʼofi mai te faʼahi ʼaia? ʼE ʼui fēnei e Paulo: “Ko te ʼu meʼa ʼaia kua liliu maʼa tatou ko he ʼu faʼifaʼitaki, ke ʼaua naʼa tou liliu ko he ʼu hahaʼi ʼe holi ki te ʼu meʼa ʼaē ʼe kovi, ohage ko tanatou holi ʼaē kiai.”—1 Kolonito 10:6, MN.
9. Koteā ʼaē neʼe foaki e Sehova ki tana hahaʼi, pea neʼe tali feafeaʼi e te kau Iselaele?
9 Logola tanatou nonofo ʼi te toafa, kae neʼe feala pe ki te kau Iselaele ke nātou tokakaga ki te ʼu meʼa fakalaumālie. Neʼe nātou kau ki te fuakava mo Sehova pea mo nātou liliu ko he puleʼaga kua foaki tonatou maʼuli kia te ia. Tahi ʼaē meʼa, neʼe foaki kia nātou te kalasi ʼo te kau pelepitelo, mo he tapenakulo moʼo fakahoko tāfito ai tanatou tauhi, pea mo he fakatuʼutuʼu moʼo momoli he ʼu sakilifisio kia Sehova. Neʼe mole nātou fiafia ʼi te ʼu meʼa ʼofa fakalaumālie ʼaia, kae neʼe nātou liliu ʼo meo ʼo ʼuhiga mo te ʼu meʼa ʼaē neʼe foaki age e te ʼAtua kia nātou.—Faka au 11:4-6.
10. He koʼe ʼe tonu ke tou manatuʼi tuʼumaʼu te ʼAtua?
10 ʼO mole hage ko te kau Iselaele ʼi te toafa, ʼe leleiʼia e Sehova tana hahaʼi ia ʼaho nei. Kae ʼe maʼuhiga ʼaupito kia tatou takitokotahi ke tou manatuʼi tuʼumaʼu te ʼAtua. Kapau ʼe tou fai te faʼahi ʼaia pea ʼe feala anai ke tou līaki te ʼu holi ʼo te kakano ʼaē ʼe feala ke nenefu ai tatatou sio fakalaumālie. ʼE tonu ke tou lotomālohi ʼo “līaki te heʼe aga faka lotu pea mo te ʼu holi ʼo te mālama, pea mo tou maʼuli fakapotopoto pea mo agatonu, pea mo tou pipiki ki te ʼAtua ʼi te lotolotoiga ʼo te tuʼu ʼo te ʼu faʼahiga meʼa ʼaenī.” (Tito 2:12, MN ) Kapau ʼe ʼi ai ʼihi ia tatou kua nātou kau ki te kokelekasio talu mai tanatou kei liliki, pea ʼe mole tonu ʼi he temi ke nātou manatu ʼe nātou hala ʼi he meʼa ʼe lelei. Kae kapau la ʼe tou maʼu he ʼu manatu feiā, pea ʼe lelei ke tou manatuʼi Sehova pea mo te ʼu tapuakina fakaofoofo ʼaē ka ina tuku mai kia tatou.—Hepeleo 12:2, 3.
Tou Fakalogo Katoa Kia Sehova
11, 12. ʼE lava liliu feafeaʼi he tahi ʼo tauhi tamapua logola ʼe mole tauhi ki he ʼu fakatātā?
11 ʼE toe foaki mai kia tatou e Paulo te tahi fakatokaga ʼi tana tohi fēnei: “Pea ʼaua naʼa koutou liliu ko he kau tauhi tamapua ohage ko tona fai e ʼihi ia nātou ʼaia; ohage ko te meʼa ʼaē neʼe tohi: ‘Neʼe nonofo ki lalo te hahaʼi ʼo kakai pea mo ʼiʼinu pea neʼe nātou tutuʼu ake ke nātou fakafiafia.’ ” (1 Kolonito 10:7, MN ) ʼE talanoa Paulo ki te temi ʼaē neʼe lava fakalotoʼi ai e te kau Iselaele ia Alone ke ina faʼu he pipi aulo. (Ekesote 32:1-4) Logola ʼe mole tou liliu anai ʼo tauhi fakahagatonu ki he ʼu fakatātā, kae ʼe feala ke tou liliu ʼo tauhi tamapua mo kapau ʼe tou fakamuʼamuʼa totatou ʼu holi fakasino ʼi tatatou tauhi kia Sehova ʼaki totatou nefesi katoa.—Kolose 3:5.
12 ʼI te tahi lakaga, neʼe tohi e Paulo ʼo ʼuhiga mo ʼihi neʼe nātou tokakaga tāfito ki te ʼu koloā kae mole nātou tokakaga ki te ʼu meʼa fakalaumālie. ʼO ʼuhiga mo nātou ʼaē ʼe “haʼele ohage ko ni ʼu fili ʼo te pou fakamamahi ʼo Kilisito,” neʼe ina tohi fēnei: “Ko tonatou fakaʼosi ʼe ko te fakaʼauha, pea ko tonatou ʼatua ko tonatou fatu.” (Filipe 3:18, 19, MN ) Neʼe mole nātou tauhi ki he fakatātā neʼe togi. Neʼe nātou tauhi ki tonatou holi ʼaē ki te ʼu koloā. ʼE moʼoni, ko te ʼu holi fuli ʼe mole kovi. Neʼe fakatupu tatou e Sehova ʼaki he ʼu holi pea mo te fealagia ʼaē ke tou fakafiafia. Kae ko nātou ʼaē ʼe nātou fakamuʼamuʼa te kumi ʼo te ʼu meʼa ʼaē ʼe nātou leleiʼia kae mole ko tanatou felogoi mo te ʼAtua ʼe nātou liliu ko he ʼu hahaʼi tauhi tamapua.—2 Timoteo 3:1-5.
13. Koteā te ako ʼe feala ke tou tāʼofi mai te fakamatala ʼo te pipi aulo?
13 ʼI tanatou ʼosi mavae mai Esipito, neʼe faʼu e te kau Iselaele te pipi aulo ʼo nātou tauhi kiai. ʼO hilifaki ki te fakatokaga ki te tauhi tamapua, ʼe toe ʼi ai te tahi faʼahi ke tou tāʼofi ʼi te fakamatala ʼaia. Neʼe talagataʼa te kau Iselaele ki te takitaki ʼaē neʼe haʼu tonu mai ia Sehova. (Ekesote 20:4-6) Kae neʼe mole nātou loto ke tuku tanatou tauhi ki tanatou ʼAtua, ko Sehova. Neʼe nātou fai sakilifisio ki te pipi ukamea pea neʼe nātou fakahigoaʼi te ʼaho ʼaia ko “he ʼaho fakafiafia kia Sehova.” Kae neʼe nātou kākāʼi pe ia nātou ʼi tanatou manatu ʼaē ʼe mole tokagaʼi anai e te ʼAtua tanatou talagataʼa. Neʼe ko te agapauʼu ʼaia kia Sehova, pea neʼe ʼita lahi ai.—Ekesote 32:5, 7-10; Pesalemo 106:19, 20.
14, 15. (a) He koʼe neʼe mole maʼu e te kau Iselaele he takuʼaki ki tanatou liliu ko he ʼu hahaʼi fagono loto galogalo? (b) Kapau ʼe tou loto moʼoni ke ʼaua naʼa tou liliu ko he ʼu hahaʼi fagono loto galogalo, koteā anai ka tou fai ʼo ʼuhiga mo te ʼu fakatotonu ʼa Sehova?
14 ʼE mole lagi kau anai he tahi ʼi te kau Fakamoʼoni ʼa Sehova ki te lotu hala. Kae logope la tanatou nonofo ʼi te kokelekasio, ʼe feala ʼi te tahi ʼu faʼahi ke fakafisi ʼihi ki te takitaki ʼa Sehova. Neʼe mole he takuʼaki ʼa te hahaʼi ʼo Iselaele ki tanatou liliu ʼaē ko he ʼu hahaʼi fagono loto galogalo. Neʼe nātou logo ki te ʼu Fakatotonu e Hogofulu pea mo te foaki ʼaē kia nātou e Moisese te fakatotonu ʼaenī ʼa te ʼAtua: “ ʼE mole tonu ke koutou faʼu, ʼi ʼoku tafa, he ʼu ʼatua siliva, pea ʼe mole tonu ke koutou faʼu he ʼu ʼatua aulo maʼa koutou.” (Ekesote 20:18, 19, 22, 23) Kae neʼe tauhi pe ia te kau Iselaele ki te pipi aulo.
15 ʼE mole feala mo tatou ke tou maʼu he takuʼaki mo kapau ʼe tou liliu ko he ʼu hahaʼi fagono loto galogalo. ʼI te Tohi-Tapu, ʼe tou maʼu te takitaki ʼa te ʼAtua ʼo ʼuhiga mo te ʼatu ʼu faʼahi ʼo totatou maʼuli. Ohage la, ʼe tapuʼi fakalelei e te Folafola ʼa Sehova te aga ʼaē ko te kole maʼua kae mole toe huʼi te maʼua ʼaia. (Pesalemo 37:21) ʼE fakatotonu ki te fānau ke nātou fakalogo ki tanatou ʼu mātuʼa, pea ʼe kole ki te ʼu tāmai ke nātou taupau tanatou fānau ʼi te “malama o te Aliki.” (Efeso 6:1-4) ʼE fakatotonu ki te kau Kilisitiano selipatea ke nātou ʼohoana “i te Aliki pe,” pea ʼe ʼui fēnei ki te kau Kilisitiano kua ʼohoana: “Ke faka maʼuhigaʼi e te hahaʼi fuli te nofo ʼohoana pea ke ʼaua naʼa ʼulihi te moeʼaga faka taumatuʼa, heʼe fakamāuʼi anai e te ʼAtua te kau fai folonikasio pea mo te kau tono.” (1 Kolonito 7:39; Hepeleo 13:4, MN ) Kapau ʼe tou loto moʼoni ke ʼaua naʼa tou liliu ko he ʼu hahaʼi fagono loto galogalo, pea ʼe tou tokakaga lelei anai ki te ʼu tokoni ʼaenī pea mo ʼihi atu mai te ʼAtua pea mo tou maʼuliʼi.
16. Neʼe koteā te ʼu fua kovi ʼo te tauhi ʼaē ki te pipi aulo?
16 Neʼe mole tali e Sehova te faiga ʼa te kau Iselaele ke nātou tauhi kia te ia ʼaki tanatou ʼu fakatuʼutuʼu ʼa nātou totonu. Ko te toko 3 000 neʼe fakaʼauha, lagi tupu tāfito ko tanatou agatuʼu ʼi tanatou tauhi ki te pipi aulo. Neʼe toe tauteaʼi e Sehova te tahi kau agahala. (Ekesote 32:28, 35) ʼE ko he ako ʼaia kia nātou ʼaē ʼe nātou lau te Folafola ʼa te ʼAtua kae nātou filifili pe e nātou totonu te meʼa ʼaē ʼe nātou fia fakalogo kiai!
“Koutou Hola Mai Te Folonikasio”
17. Koteā ʼaē ʼe talanoa kiai ia 1 Kolonito 10:8?
17 Ko te tahi faʼahi ʼe feala ke taki ai e te ʼu holi ʼo te kakano ke galo kia tatou te ʼu meʼa fakalaumālie, ʼe hā ʼi te ʼu palalau ʼaenī ʼa Paulo: “ ʼAua naʼa tou fai te folonikasio, ohage ko ʼihi ia nātou ʼaē neʼe fai folonikasio, pea neʼe mamate te toko ʼuafulu-ma-tolu afe ʼi te ʼaho pe e tahi.” (1 Kolonito 10:8, MN ) ʼI henī ʼe talanoa ia Paulo ki te meʼa ʼaē neʼe hoko ʼi te Mafa ʼo Moape ʼi te fakaʼosi ʼo te ʼu taʼu e 40 ʼaē neʼe haʼele ai Iselaele ʼi te toafa. Neʼe mole heʼeki faʼa fualoa, neʼe tokoni Sehova ki te kau Iselaele ʼi tanatou ʼohofi te ʼu fenua esite ʼo te Solotane, kae neʼe galo leva ki te tokolahi ia te faʼahi ʼaia pea neʼe mole nātou loto fakafetaʼi. ʼI tanatou ʼamanaki hū ki te Kele ʼo Te Fakapapau, neʼe nātou fai te ʼu felāveʼi fakasino heʼeʼaoga pea mo te tauhi ʼuli ʼaē kia Paale ʼo Peole. Ko te toko 24 000 neʼe fakaʼauha, neʼe ko te toko 1 000 ia nātou ʼaia neʼe nātou taki ʼihi ke nātou agahala.—Faka au 25:9.
18. Koteā te faʼahiga aga ʼe feala ke iku ki he ʼu felāveʼi fakasino heʼeʼaoga?
18 ʼE ʼiloʼi ia ʼaho nei te hahaʼi ʼa Sehova ʼuhi ko tanatou ʼu pelesepeto māʼoluga ʼo ʼuhiga mo te aga ʼaē ʼe tonu ke fai. Kae ʼi tonatou fakahalaʼi ki te ʼu felāveʼi fakasino heʼeʼaoga, neʼe mole kei manatuʼi e ʼihi kau Kilisitiano ia te ʼAtua pea mo tana ʼu pelesepeto. Neʼe nātou liliu ko he ʼu hahaʼi fagono loto galogalo. ʼI te kamata ʼo tonatou fakahalaʼi, neʼe mole nātou manatu ke nātou fai folonikasio. Neʼe lagi ko hanatou fia ʼiloʼi meʼa fuli ʼo nātou sioʼi he ʼu paki heʼeʼaoga, peʼe nātou fakagafua he ʼu aga ʼe mole lelei peʼe nātou lafi, peʼe nātou fakatahi mo he ʼu hahaʼi ʼe mole lelei tanatou aga. Ko te ʼu meʼa fuli ʼaia neʼe nātou taki te kau Kilisitiano ke nātou agahala.—1 Kolonito 15:33; Sakopo 4:4.
19. Ko te vaega faka Tohi-Tapu fea ʼaē ʼe tokoni mai kia tatou ke tou “feholaki mai te folonikasio”?
19 Kapau ʼe fakaneke tatou ke tou fai he aga heʼeʼaoga, pea ʼe tonu ke tou manatuʼi tuʼumaʼu ia Sehova. ʼE tonu ke tou mulimuli ki te ʼu fakamanatu ʼi tana Folafola. (Pesalemo 119:1, 2) ʼI totatou ʼuhiga Kilisitiano, tokolahi ia tatou ʼe nātou faiga ʼaupito ke nātou maʼa ʼi tanatou ʼu aga, kae ke feala hatatou fai te meʼa ʼaē ʼe totonu kia mata ʼo te ʼAtua ʼe tonu ke hoko atu tatatou ʼu faiga. (1 Kolonito 9:27) Ki te kau Kilisitiano ʼi Loma, neʼe tohi fēnei e Paulo: “Io, kua iloi tautou talagafua e te hahai fuape; koia, e au fakafiafia o uhiga mo koutou, pea e au fakaamu ke koutou popoto ki te mea e lelei pea mo maʼa o uhiga mo te mea e kovi.” (Loma 16:19) Ohage pe ko te toko 24 000 kau Iselaele ʼaē neʼe fakaʼauha he neʼe nātou agahala, kua vave fakamāuʼi e Sehova te kau fai folonikasio pea mo te kau agahala. (Efeso 5:3-6) ʼAua naʼa tou liliu ko he ʼu hahaʼi fagono loto galogalo, kae ʼe tonu ke tou haga “feholaki mai te folonikasio.”—1 Kolonito 6:18, MN.
Tou Leleiʼia Tuʼumaʼu Te ʼu Meʼa ʼAē ʼe Foaki Mai e Sehova
20. Neʼe ʼahiʼahiʼi feafeaʼi e te kau Iselaele ia Sehova, pea neʼe koteā tona fua?
20 Tokolahi te kau Kilisitiano ʼe mole nātou fai he ʼu felāveʼi fakasino heʼeʼaoga. Kae ʼe tonu ke tou tokakaga ke ʼaua naʼa tou fai he meʼa ʼe feala ke tou liliu ai ʼo muhumuhu tuʼumaʼu, heʼe feala ke mole kei leleiʼia ai tatou e te ʼAtua. ʼE tokoni fēnei mai kia tatou Paulo: “Pea ʼaua naʼa tou ʼahiʼahiʼi foki mo tatou ia Sehova, ohage ko tona ʼahiʼahiʼi e ʼihi ia nātou ʼaia, pea mamate ai ʼi te ʼu gata. Pea ʼaua naʼa koutou muhumuhu mo koutou ohage ko te muhumuhu ʼa ʼihi ia nātou, pea nātou mamate ai ʼi te tagata fakaʼauha.” (1 Kolonito 10:9, 10, MN ) Neʼe muhumuhu te kau Iselaele kia Moisese pea mo Alone, ei, māʼia mo te ʼAtua totonu neʼe nātou meo kia te ia ʼo ʼuhiga mo te mane ʼaē neʼe foaki faka milakulo age kia nātou. (Faka au 16:41; 21:5) Neʼe veliveli age koa te ʼita ʼa Sehova ʼi tanatou muhumuhu ʼaia ʼi tanatou fai folonikasio? ʼE fakahā mai e te Tohi-Tapu tokolahi te kau muhumuhu neʼe mamate ʼi te ʼu gata. (Faka au 21:6) ʼI muʼa atu, neʼe fakaʼauha te toko 14 700 hahaʼi neʼe muhumuhu. (Faka au 16:49) Koia ʼaua naʼa tou ʼahiʼahiʼi te faʼa kātaki ʼa Sehova ʼo tou meʼa noaʼi te ʼu meʼa ʼaē ʼe ina foaki mai.
21. (a) Koteā te tokoni fakaʼatua ʼaē neʼe tohi e Paulo? (b) Ohage ko tona ʼui ia Sakopo 1:25, ʼe lava feafeaʼi hatatou fiafia moʼoni?
21 ʼI tana tohi ki te ʼu kaumeʼa Kilisitiano, ʼe fakaʼosi e Paulo tana ʼu fakatokaga ʼaki te tokoni ʼaenī: “Kae ko te ʼu meʼa ʼaia neʼe hoko kia nātou ohage he ʼu faʼifaʼitaki, pea neʼe tohi ia moʼo fakatokagaʼi ʼo tatou, ia tatou ʼaē kua hoko mai ki ai ia te fakaʼosi ʼo te ʼu tuʼu ʼo te ʼu faʼahiga meʼa ʼaenī. Koia, ko ʼaē ʼe manatu ʼe tuʼu ke tokaga ia naʼa tō.” (1 Kolonito 10:11, 12, MN ) Ohage ko te kau Iselaele, ʼe lahi tatatou tapuakina e Sehova. Kae ʼofa pe ke mole tou hage ko nātou, ʼo loto galogalo pea mo puli tatatou loto fakafetaʼi ki te ʼu meʼa lelei ʼaē ʼe fai e te ʼAtua maʼa tatou. Ka lahi fau totatou ʼu tuʼania ki te maʼuli, pea tou fakakaukauʼi te ʼu fakapapau fakaofoofo ʼaē ʼe tou maʼu ʼi tana Folafola. ʼOfa pe ke tou manatuʼi tatatou ʼu felogoi maʼuhiga mo Sehova pea mo tou haga fakahoko te gāue fai faka mafola ʼo te Puleʼaga ʼaē neʼe tuku mai ke tou fai. (Mateo 24:14; 28:19, 20) ʼE mahino ia ʼe tou maʼu ai te fiafia moʼoni, heʼe fakapapau fēnei mai e te Tohi-Tapu: “Ko ia ʼaē ʼe loloto tana fakasiosio ki te lao haohaoa ʼaē ʼo te ʼāteaina, pea mo haga nofo ai, ʼe fiafia anai te tagata ʼaia ʼi hona maʼuliʼi, koteʼuhi kua liliu ia, mole ko he tagata fagono ʼe loto galogalo, kae ko he tahi ʼe ina fai te gāue.”—Sakopo 1:25, MN.
ʼE Koutou Tali Feafeaʼi Anai?
• Ko te ʼu ʼaluʼaga fea ʼaē ʼe feala ke tou liliu ai ko he ʼu hahaʼi fagono loto galogalo?
• He koʼe ʼe maʼuhiga ʼaupito ke tou fakalogo katoa ki te ʼAtua?
• E feafeaʼi hatatou “feholaki mai te folonikasio”?
• ʼE tonu ke feafeaʼi totatou loto ʼo ʼuhiga mo te ʼu meʼa ʼaē ʼe foaki mai e Sehova?
[Paki ʼo te pasina 15]
Neʼe galo ki te kau Iselaele te ʼu gāue lalahi ʼaē neʼe fai e Sehova maʼa nātou
[Paki ʼo te pasina 16]
ʼE loto moʼoni te hahaʼi ʼa Sehova ke nātou taupau te ʼu pelesepeto māʼoluga ʼo te aga ʼaē ʼe tonu ke fai