Koutou Aga Fakapotopoto — Kua Ōvi Mai Te Fakaʼosi
“Ko te fakaʼosi ʼo te ʼu meʼa fuli pe kua ōvi mai. Koia koutou aga fakapotopoto pea mo koutou tokakaga ki te ʼu faikole.” — 1 Petelo 4:7.
1. a) Koteā te meʼa fakaloto mamahi neʼe hoko ki te tagata takitaki lotu pea mo tana kau tisipulo? b) ʼUhi ko ʼihi ʼamanaki neʼe mole hoko, koteā te ʼu fehuʼi ʼe feala ke malaga?
“NEʼE ʼau maʼu te pāui mai te ʼAtua lolotoga te faikole fakaʼosi ʼo te afiafi. Neʼe ina ʼui ko te toko 116 000 ʼe nātou hake anai ki selo pea ko te toko 3,7 miliona hahaʼi tui ʼaē kua mamate ʼe avahi anai ʼonatou fale maka pea ʼe nātou hake anai ki selo.” Neʼe ko te ʼui ʼaia ʼa te Pule ʼo te Kautahi ki te ʼu ʼAho Ka Haʼu ʼi te uhu ʼo te ʼaho 28 ʼo ʼoketopeli ʼo te taʼu 1992, te ʼaho ʼaē neʼe nātou fakakikite ko te ʼaho ʼo te huʼi maʼua. Kae, ʼi te fakalaka ʼo te ʼaho 29 ʼo ʼoketopeli, neʼe mole he tahi neʼe hake ki selo, pea neʼe mole he fale maka ʼo he mate neʼe ava. Mole ʼui ke toʼo fakavilivili nātou ki selo, ko te hahaʼi tui ki te ʼaho fakamāu ʼaia ʼi Kole neʼe nātou sisio ki te ʼaho ʼaia ohage ko he ʼaho noa pe. Ko te tuʼakoi ʼo te ʼaho ʼo te fakamāu neʼe hoko mai pea neʼe fakalaka ia, kae ko nātou ʼaē neʼe nātou lau te ʼaho ʼaia neʼe mole nātou lotovaivai nātou. Koteā te meʼa ʼe tonu ke fai e te kau kilisitiano? ʼE tonu koa ke tuku tanatou tui ki te fakaōvi fakavilivili mai ʼo te fakaʼosi?
2. Ko ai ʼaē neʼe palalau ki te kau ʼapositolo ʼo ʼuhiga mo te ʼaho ʼo te fakamāu ʼi he temi ka haʼu, pea ko te ʼu ʼaluʼaga fea ʼaē neʼe nātou ʼiloʼi ai te potu ʼaia?
2 Moʼo tali ki te faʼahi ʼaia, tou fakamanatu muʼa te lakaga ʼaē neʼe palalau ʼāteaina ai pe ia Sesu mo tana kau tisipulo. ʼI ai, ʼi te tisitilike ʼo Sesalea ʼo Filipe, ʼi te faʼahi tokelau-hahake ʼo te tai ʼo Kalilea, ʼi te moʼuga ʼo Helemone ʼaē ʼe agaaga fakaofoofo, neʼe nātou logo ai ki tana palalau fakahagatonu age ʼe matehi anai (Mateo 16:21). Ko ʼihi palalau malū neʼe tonu ke hoa mai ki ai. ʼI tana ʼosi fakamahino age te ʼuhiga tisipulo ʼe ko te maʼuli ʼo he faʼahiga maʼuli faka sakilifisio, neʼe fakatokaga fēnei e Sesu: “Ko te Foha ʼo te tagata ʼe tonu ke haʼu ʼi te kolōlia ʼo tana Tāmai, mo tana kau ʼaselo, pea ʼe ina totogi anai ki te tagata takitokotahi ʼo mulimuli pe ki tana aga.” (Mateo 16:27). Ko Sesu neʼe palalau ki hana haʼu ʼi he temi ka haʼu. Kae, ʼi te lakaga ʼaia, ʼe liliu mai anai ʼi tona ʼuhiga Tuʼi Fakamāu. ʼE fakalogo anai ki te faʼahiga tagata ʼaē ka ina maʼu peʼe agatonu kia te ia peʼe kailoa. Ko te fakamāu ʼa Sesu ʼe fakatafito anai ki te aga, kae mole ina tokagaʼi anai te ʼu koloā fakamālama peʼe ina maʼu peʼe kailoa. Ki te faʼahi ʼaia ʼe tonu ke nonofo maʼu tana kau tisipulo (Mateo 16:25, 26). Koia, ko Sesu Kilisito totonu ʼaē neʼe talanoa ki tana kau tisipulo ke nātou kumi tona kolōlia ʼaē ka haʼu pea mo tana fakamāu.
3. Neʼe feafeaʼi te fakahāhā lelei e Sesu te moʼoni ʼo tana haʼu ʼi he temi ka haʼu?
3 Ko te meʼa ʼaē ka ʼui fakamuli e Sesu ʼe fakahāhā lelei ai te moʼoni ʼo tana haʼu ʼi he temi. Neʼe ina ʼui ʼi he ʼaluʼaga faka pule: “ ʼE ʼau tala moʼoni atu kia koutou: ko ʼihi ia nātou ʼaenī ʼe tutuʼu ʼi henī ʼe mole nātou tomuʼa mamate anai ka heʼeki nātou mamata muʼa ki te Foha ʼo te tagata ʼe haʼu ʼi tona Puleʼaga.” (Mateo 16:28). Ko te ʼu palalau ʼaia neʼe hoko hili te ʼaho e ono. Ko te meʼa fakapulagia ʼo te liliu ia Sesu ʼo faikehe ʼe fakaofo ki te kau tisipulo ʼaē neʼe maʼuli tahi mo ia. ʼE nātou sisio nei ki te fofoga ʼo Sesu kua gigila ohage ko te laʼā pea ko tona ʼu mutuʼi meʼa kua gigila ʼo hihina. Ko te liliu ʼa Sesu ʼo faikehe neʼe ko he hā fakatomuʼa ki te kolōlia pea mo te Puleʼaga ʼo Kilisito. ʼE ko he fakamoʼoni fakaloto mālohi ʼo te ʼu lea faka polofeta ʼo ʼuhiga mo te Puleʼaga! ʼE ko he meʼa fakaloto mālohi ia ki tana kau tisipulo ke nātou nonofo fakapotopoto! — 2 Petelo 1:16-19.
Te tupuʼaga ʼo te maʼuhiga ʼo te aga fakapotopoto
4. He koʼe koa ʼe tonu ke nonofo tokaga ʼi te faʼahi fakalaumālie ia te kau kilisitiano ki tana haʼu?
4 Mole heʼeki maʼu he taʼu, ʼe tou maʼu ia Sesu ʼe heka ʼi te moʼuga ʼo te ʼu Oliva, ʼe toe fai palalau tefua mo tana kau tisipulo. ʼI tanatou mamata ki te kolo ʼo Selusalemi, ʼe fakamatalatala e Sesu te fakaʼiloga ʼo tana ʼafio ʼi te temi ka haʼu pea mo ina fakatokaga age fēnei: “Koutou nofo fakaonoono, heʼe mole koutou ʼiloʼi pe ko te ʼaho fea ʼaē ʼe haʼu ai tokotou ʼAliki.” ʼE tonu ke nātou nonofo tokaga tuʼumaʼu koteʼuhi ʼe mole ʼiloʼi te temi ʼaē ka haʼu ai. ʼE tonu ke nātou tokalelei tuʼumaʼu ki te potu ʼaia. — Mateo 24:42.
5. ʼE feafeaʼi he fealagia ke fakahāhā lelei te ʼaoga ʼo te nofo tokaga?
5 ʼO ʼuhiga mo te ʼaluʼaga ʼo tana haʼu, ʼe hage te ʼAliki ko he pule. ʼE ina toe ʼui fēnei: “Kae ke koutou ʼiloʼi te meʼa ʼaenī: kapau ʼe ʼiloʼi e te pule ʼo te ʼapi pe ko te lakaga leʼo fea ʼaē ʼe tonu ke haʼu ai te tagata kaihaʼa, pea ʼe nofo ʼalaʼala anai ia pea ʼe mole ina tuku anai ke hūfi tona ʼapi.” (Mateo 24:43). Ko te tagata kaihaʼa ʼe mole ina fakaʼiloʼilo ki te pule ʼo te ʼapi te temi ʼaē ka haʼu ai; ko te meʼa tāfito ʼe fakaʼaogaʼi e te tagata kaihaʼa ko te haʼu fakapuna’maʼuli. Koia, ko te pule ʼo te ʼapi ʼe tonu ke nofo tokaga tuʼumaʼu. Kae, ki te kilisitiano ʼaē ʼe agatonu, ko tana nofo tokaga ʼaē ʼe mole hifo ʼi he temi ʼe tupu mai he manavasiʼi fakamataku. Kailoa ia, ko tana nofo tokaga ʼe tupu mai tana fakatalitali ʼaki he holi mamahi ki te haʼu ʼa Kilisito ʼi te kolōlia ʼo takitaki kia taʼu e afe ʼo te tokalelei.
6. He koʼe koa ʼe tonu ke tou aga fakapotopoto?
6 Logope te nofo tokaga ʼa te hahaʼi fuli pe, ʼe mole feala ki he tahi ke ina ʼiloʼi fakatomuʼa te ʼaho tonu ʼe haʼu ai. ʼE ʼui fēnei e Sesu: “Koia ke toe feiā foki mo koutou ke koutou nofo teuteu, heʼe ko te Foha ʼo te tagata ʼe haʼu ʼi te hola ʼe mole koutou manatu ki ai.” (Mateo 24:44). Koia ʼe ʼaoga te aga fakapotopoto. Kapau ʼe manatu he kilisitiano ki he faʼahiga ʼaho pe, ʼe mole haʼu ai anai ia Kilisito, ʼe lagi ko te ʼaho ʼaia ʼe haʼu ai! ʼE moʼoni, ko te kau kilisitiano ʼo te temi ʼāfea ʼaē neʼe manatu lelei pea mo agatonu neʼe nātou faiga fakamalotoloto ke nātou fakakikite te temi ʼe hoko ai anai te fakaʼosi. Koia, ko te fakatokaga ʼa Sesu neʼe aʼu ʼo moʼoni ʼi te temi fuli pe. “Pea ki te ʼaho ʼaia mo te hola ʼaia, ʼe mole he tahi ʼe ina ʼiloʼi, pe ko te kau ʼaselo ʼo te lagi pe ko te ʼAlo, kae gata pe ki te Tāmai.” — Mateo 24:36.
7. Ko te liliu ko he ʼu tisipulo ʼa Kilisito, ʼe tonu ke feafeaʼi totatou maʼuli?
7 Koia, koteā tatatou manatu fakaʼosi? Ko te liliu ko he ʼu tisipulo ʼa Kilisito, ʼe tonu ke tou maʼuli mo tui tuʼumaʼu ko te fakaʼosi ʼo te ʼu faʼahiga meʼa ʼo te tuʼu agakovi ʼaenī kua ōvi mai.
8. Neʼe koteā te fakaʼiloga ʼo te kau kilisitiano talu mai te kamataʼaga ʼo te tui faka kilisitiano?
8 Ko te taʼi aga ʼaia neʼe ko he fakaʼiloga ʼo te kau kilisitiano, ohage ko tana fakamoʼoni e te kau tagata hisitolia ʼo te mālama pea mo te kau tagata fai sivi ʼo te Tohi-Tapu. Ohage la, ko nātou ʼaē neʼe nātou fai te tohi (The Translator’s New Testament), ʼi te tuʼuʼaga ʼo te ʼu kupu mo ʼonatou ʼuhiga, ʼe tohi fēnei ʼi te kupu “ ʼAho”: “Ko te kau kilisitiano ʼo te ʼu temi ʼo te T[auhi] F[oʼou] neʼe nātou maʼuli ʼi te fakatalitali ki te ʼAho (ʼaē ko te temi) ʼaē ʼe pulihi ai anai te mālama ʼaenī mo ʼona ʼu kovi pea mo agakovi pea ʼe liliu anai ia Sesu ki te kele ʼo fakamāu te hahaʼi, pea mo fakatuʼu te taʼiake foʼou ʼo te tokalelei pea mo kamata tona ʼuhiga ʼAliki ki te malamanei katoa.” ʼE ʼui fēnei e te encyclopédie (Encyclopædia Britannica): “Ko te mafola ʼo te tui faka kilisitiano ʼi te malamanei ʼe ʼi ai tona pikipiki totonu mo te fakatalitali faka kilisitiano ki te temi fakaʼosi, ko he ʼamanaki moʼoni ia ʼo he toe liliu mai ʼa Kilisito. Ko te fakatalitali ʼa te kilisitiano ki te temi fakaʼosi neʼe mole heʼeki tupu mai ia ʼi he faiga noa pe ki te haʼu ʼo te Puleʼaga ʼo te ʼAtua.”
Koteā te faka ʼuhiga ʼo te aga fakapotopoto
9. ʼE logope ko ʼihi ʼamanaki ʼa Petelo ʼo ʼuhiga mo te Mesia neʼe mole lākatonu, he koʼe koa neʼe feala tana nofo falala?
9 Hili taʼu e 30 ʼi te fai palalau ʼāteaina ʼa Sesu mo tana kau tisipulo ʼaē ʼe nātou vāhaʼa lelei, ko te ʼapositolo ko Petelo neʼe mole fiu ia ʼi te fakatalitali ki te temi fakaʼosi ʼaē kua fakaōvi mai. Logope ko te meʼa ʼaē neʼe fakatalitali kiai ia ia mo tana ʼu kaugā tisipulo neʼe mole ko ia totonu, neʼe haga falala aipe ia ko te ʼofa pea mo te mālohi ʼo Sehova ʼe fakamoʼoni ʼaki te fakahoko moʼoni anai tanatou ʼu ʼamanaki (Luka 19:11; 24:21; Gāue 1:6; 2 Petelo 3:9, 10). ʼE ina fakamatala te puani ʼe logo tuʼumaʼu kiai ʼi te ʼu tohi faka keleka ʼi tana ʼui fēnei: “Ko te fakaʼosi ʼo te ʼu meʼa fuli pe kua ōvi mai.” Koia neʼe ina fakatokaga fēnei ki tana ʼu kaugā fagona kilisitiano: “Koia koutou aga fakapotopoto pea mo koutou tokakaga ki te ʼu faikole.” — 1 Petelo 4:7.
10. a) Koteā te faka ʼuhiga ʼo te aga fakapotopoto? b) Koteā ʼaē ʼe fakapipiki ʼo ʼuhiga mo te potu ʼaia ʼi tanatou ʼu felogoi ʼe tāu mo te finegalo ʼa te ʼAtua?
10 Ko te “aga fakapotopoto” ʼe mole faka ʼuhiga ki te manatu ʼaē ʼe maʼu e te mālama ʼaē ko te ʼatamai. ʼE ʼui fēnei e Sehova: “ ʼE ʼau molehi anai te poto ʼo te kau popoto pea mo te ʼatamai ʼo te kau ʼatamai, ʼe ʼau liaki anai.” (1 Kolonito 1:19). Ko te kupuʼi palalau ʼaē ʼe fakaʼaogaʼi e Petelo ʼe feala pe ke faka ʼuhiga “ko te mālama ʼo te ʼatamai”. Ko te faʼahiga mālama fakalaumālie ʼaia ʼe fakapipiki ki tatatou tauhi. Koia, ʼi tatatou tāʼofi maʼu te ʼatamai, ʼe tou sio ai ki te ʼu meʼa ʼi te ʼu felogoi ʼaē ʼe tāu mo te finegalo ʼo Sehova; ʼe tou mahino ai ki te ʼu meʼa ʼaē ʼe maʼuhiga pea mo ʼaē ʼe mole maʼuhiga (Mateo 6:33, 34). ʼI totatou haga ki te fakaʼosi ʼaē kua ōvi mai, ʼe mole tou nofo hohaʼa leva; ʼe mole tou meʼa noaʼi foki te temi ʼaenī ʼe tou lolotoga maʼuli ai (Vakaʼi ia Mateo 24:37-39). ʼE taki tatou e te fakamamalie pea mo te fakapotopoto ʼi te fakakaukau, ʼi te fakatuʼutuʼu, pea mo te aga, ʼaē ʼe tou ʼuluaki fakahā ki te ʼAtua (“nofo tokaga ʼi te ʼu faikole”) pea ki totatou kāiga leva (“ko te feʼofa mamahi ʼaki”). — 1 Petelo 4:7, 8.
11. a) Koteā te faka ʼuhiga ʼo te “fakafoʼou ʼi te mālohi ʼaē ʼe ina fakamaliu [totatou] ʼatamai”? b) ʼE feafeaʼi ki he mālohi faka ʼatamai foʼou hana tokoniʼi tatou ke tou fai he ʼu tonu ʼe lelei?
11 Ko te aga fakapotopoto ʼe fakapikipiki ki ai te “fakafoʼou [ia tatou] ʼi te mālohi ʼaē ʼe ina fakamaliu [totatou] ʼatamai”. (Efesi 4:23.) Neʼe koteā te tupuʼaga ʼo te fakafoʼou? ʼUhi ko tatatou maʼu te heʼe haohaoa pea mo tatatou maʼuli ʼi te mālama agahala, ko totatou ʼatamai ʼe puleʼi e te holi ʼaē ʼe fakafeagai ki te ʼu meʼa fakalaumālie. Ko te mālohi ʼaia ʼe ina ʼeke tuʼumaʼu te ʼu manatu pea mo te ʼu holi ki te ʼu koloā pea mo te tahi manatu pe kia kita totonu. Koia, ka liliu he tahi ko he kilisitiano, ʼe ʼaoga kiai he mālohi foʼou, peʼe ko he aga faka ʼatamai mālohi, ʼe ina ʼeke anai ia ia ki te ʼaluʼaga totonu, ki te ʼaluʼaga fakalaumālie, ki tana tali ʼo he faʼahiga maʼuli faka sakilifisio. Koia, ka hage la, ko he fili ʼo he faʼahiga akonaki, ʼo he gāue, ʼo he fakafiafia, ʼo he gaoʼi, ʼo he faʼahiga teu, peʼe ko he faʼahiga meʼa pe, ko te ʼuluaki aga ʼe tonu ke ina fai ko te vakaʼi te faʼahi ʼaia ʼi he fakasiosio fakalaumālie kae mole ko he fakasiosio ʼi te kakano, ʼi te manatu pe ʼaē kia kita. Ko te faʼahiga aga faka ʼatamai foʼou ʼaia ʼe ina faka faigafua age te fai ʼo he tonu ʼaki te aga fakapotopoto pea mo te ʼiloʼi papau ʼaē te kua ōvi mai ʼo te fakaʼosi.
12. ʼE feafeaʼi he fealagia ke tou nonofo “mālohi ʼi te tui”?
12 Ko te aga fakapotopoto ʼe faka ʼuhiga foki ʼe tou maʼu te faʼahiga maʼuli haohaoa fakalaumālie lelei. ʼE feafeaʼi he fealagia ke tou nonofo “mālohi ʼi te tui”? (Tito 2:2.) ʼE tonu ke tou fafaga totatou ʼatamai ʼaki te faʼahiga meʼa kai ʼaē ʼe tonu (Selemia 3:15). Ko he kai tuʼumaʼu ki te Folafola ʼa te ʼAtua ʼo te moʼoni ʼaē ʼe lagolago e te gāue ʼo tona laumālie maʼoniʼoni ʼe ina tokoniʼi tatou ke tou taupau tatatou aga fakapotopoto ʼi te faʼahi fakalaumālie. Koia, ko he fai tuʼumaʼu ʼo te ako takitokotahi, ohage pe ko te gāue faka mafola, mo te faikole, pea mo te fakatahi faka kilisitiano, ʼe ko he meʼa maʼuhiga.
ʼE feafeaʼi te hāofaki tatou e te aga fakapotopoto
13. ʼE feafeaʼi he hāofaki tatou e te aga fakapotopoto mai te fai ʼo he hāla noa pe?
13 Ko te aga fakapotopoto ʼe feala ke ina hāofaki tatou mai te fai ʼo he hāla fakavale ʼe feala ke fakatupu ʼaki he puli ia tatou te maʼuli heʼegata. ʼE feafeaʼi koa te fealagia ʼo te hoko ʼo te potu ʼaia? ʼE palalau te ʼapositolo ko Paulo ki te “lao ʼo [te] ʼatamai”. Ki he tahi ʼe mālohi ʼi te tui, ko te lao ʼaia ʼe taki e te meʼa ʼe fakafiafia ai, ʼe fakahigoa ko “te lao ʼa te ʼAtua”. ʼE moʼoni, ko te “lao ʼo te agahala” ʼe fihi mo te lao ʼo te ʼatamai. Kae, ʼe feala ke mālo te kilisitiano ʼaki te tokoni ʼa Sehova. — Loma 7:21-25.
14, 15. a) Ko te ʼu mālohi fea e lua ʼe fihi ke nā puleʼi te ʼatamai? b) ʼE feafeaʼi he fealagia ke tou mālo ʼi te fihi ʼo te ʼatamai?
14 Ko Paulo ʼe hoko atu tana fakaʼiloga keheʼi te ʼatamai ʼaē ʼe puleʼi e te kakano agahala, ʼaē ʼe fakatafito ki te faʼahiga maʼuli faʼitaliha, mai te ʼatamai ʼaē ʼe puleʼi e te laumālie ʼa te ʼAtua, ʼaē ʼe fakatafito ki te faʼahiga maʼuli faka sakilifisio ki te gāue ʼaē kia Sehova. ʼE tohi fēnei e Paulo ia Loma 8:5-7: “Ko nātou ʼaē ʼe nātou logo tahi mo te kakano ʼe nātou holi ki te ʼu meʼa ʼaē ʼo te kakano, kae ko nātou ʼaē ʼe nātou logo tahi mo te laumālie, ki te ʼu meʼa ʼaē ʼo te laumālie. Koteʼuhi ko te holi ʼo te kakano ko tona faka ʼuhiga ko te mate, kae ko te holi ʼo te laumālie ko tona faka ʼuhiga ko te maʼuli pea mo te tokalelei; koteʼuhi ko te holi ʼo te kakano ʼe faka ʼuhiga ʼe mole kaumeʼa mo te ʼAtua koteʼuhi ʼe mole fakalogo ia ki te lao ʼa te ʼAtua pea ʼe tatau aipe ʼe mole pe feala ia.”
15 Ko Paulo, ʼi te vaega 11, ʼe ina fakamahino peʼe feafeaʼi te mālo ʼo te ʼatamai, ʼi te ʼaluʼaga ʼo tana felogoi mo te laumālie, ʼi te tau: “Kapau, ʼi te temi nei ko te laumālie ʼo ia ʼaē neʼe ina fakatuʼuake ia Sesu mai te kau mate ʼe nofo ia koutou, ko ia ʼaē neʼe ina fakatuʼuake ia Kilisito Sesu mai te kau mate ʼe ina toe foaki anai te maʼuli ki ʼakotou ʼu sino mate ʼaki tona laumālie ʼaē ʼe nofo ia koutou.”
16. Ko te ʼu kākā fea ʼaē ʼe hāofaki mai ai tatou e te aga fakapotopoto?
16 Koia, ʼuhi ko tatatou aga fakapotopoto, ʼe mole kākāʼi anai tatou e te ʼu meʼa fakalalata ʼo te mālama ʼaenī, ʼaē ʼe fakaʼiloga ʼaki te faʼifaʼitaliha ʼi te ʼu faʼahiga fakafiafia kehekehe, ʼi te ʼu meʼa fakasino, pea mo te māmio kovi ʼi te ʼu felāveʼi fakasino. Ko totatou fakapotopoto ʼe ina ʼui mai anai ke tou “hola mai te folonikasio” pea mo tou hola mai tona ʼu ikuʼaga mamafa (1 Kolonito 6:18). Ko tatatou aga fakapotopoto ʼe ina ʼeke anai tatou ke tou faka takimuʼa te ʼu meʼa ʼo te Puleʼaga pea ʼe tou taupau anai totatou fakakaukau mokā ʼe fakahalaʼi tatou e he ʼu foaki gāue ʼaē ʼe feala ke fakatupu vaivai ki tatatou felogoi mo Sehova.
17. Neʼe fakahā feafeaʼi e te tuagaʼane pionie te aga fakapotopoto ʼi tana tāu mo te ʼu maʼua faka paʼaga?
17 Ohage la, ʼi te koga fenua ʼi te potu Toga-Hahake ʼo Asia, ʼe ʼi ai te tuagaʼane kei finemui neʼe ina faka takimuʼa te ʼu meʼa ʼo te Puleʼaga ʼi tona ʼatamai. Neʼe ina fakatuputupu ia ia te ʼofa ki te gāue pionie. ʼI te fenua ʼaia, ʼe lahi te ʼu gāue ʼe fakamaʼua ke gāue ia ʼaho e ono peʼe fitu ʼo ʼaho katoa. ʼI tana ʼosi maʼu tona pepa ʼi te univelesitē, ko tana tāmai, ʼaē mole ko he Fakamoʼoni ʼa Sehova, neʼe ina ʼamanaki ʼe maʼu paʼaga lahi anai tona ʼofafine maʼa te famili. Kae ʼuhi neʼe holi mamahi ke pionie, neʼe ina maʼu te gāue ʼe kogaʼi ʼaho pea neʼe kamata tana gāue pionie. Ko te meʼa ʼaia neʼe fakatupu ʼita ki tana tāmai, ʼaē neʼe ina fakamatakuʼi ia ia ʼe ina laku anai tana ʼu meʼa ki te ala. ʼUhi ko te gaoʼi paʼaga, neʼe lahi ʼaupito tona ʼu maʼua, pea neʼe ina ʼamanaki ʼe huʼi anai e tona ʼofafine. Ko tona kiʼi tuagaʼane neʼe lolotoga ako ʼi te univelesitē, pea ʼuhi ko te ʼu maʼua, neʼe mole ʼi ai he falā moʼo totogi ʼo tana ako. Ko tona kiʼi tuagaʼane neʼe ina fakapapau age kapau ʼe tokoni age, ʼe tokaga anai ki te famili mokā maʼu anai hana gāue. Neʼe lotolotolua tana fakakaukau ʼi tona ʼofa ʼaē ki tona kiʼi tokolua pea mo tona ʼofa ʼaē ki tana gāue pionie. ʼI tana ʼosi fakakaukau lelei ki te faʼahi ʼaia, neʼe ina fakatotonu ke hoko atu tana pionie pea mo kumi he tahi gāue. Ko te tali ki tana ʼu faikole, neʼe ina maʼu te gāue lelei ʼo mole gata pe te fealagia ʼaē tana tokoni ki tona famili pea mo tona kiʼi tokolua ʼi te faʼahi ʼo te paʼaga kae neʼe toe feala pe foki ke hoko ʼatu te meʼa neʼe ʼuluaki ʼofa ai, te gāue pionie.
Tou kumi te tokoni ʼa Sehova mo taupau maʼu ʼo te aga fakapotopoto
18. a) He koʼe koa ʼe feala ke lotovaivai ʼihi? b) Ko te ʼu koga tohi fea ʼe feala ke fakaloto mālohiʼi ia nātou ʼaē ʼe nātou lotomamahi?
18 Ko ʼihi ʼu tisipulo ʼa Kilisito ʼe feala pe ke nātou faigataʼaʼia te taupau tanatou aga fakapotopoto. ʼE feala pe ke hifo tanatou faʼa kātaki koteʼuhi ko te fakaʼosi ʼo te ʼu faʼahiga meʼa ʼo te tuʼu ʼaenī ʼe loaloaga ʼi te meʼa neʼe nātou ʼamanaki kiai. ʼE feala pe ke nātou lotovaivai ʼo ʼuhiga mo te potu ʼaia. Kae, ko te fakaʼosi ʼe hoko anai ia. Ko Sehova ʼe ina fakapapau te faʼahi ʼaia (Tito 1:2). Pea koia ʼe hoko moʼoni anai te Palatiso fakakelekele ʼaē neʼe ina fakapapau. Ko Sehova ʼe ina fakamoʼoni te faʼahi ʼaia (Fakahā 21:1-5). Mokā hoko mai anai te mālama foʼou, ʼe ʼi ai anai “he fuʼu ʼakau ʼo te maʼuli” kia nātou fuli ʼaē neʼe nātou taupau tanatou aga fakapotopoto. — Tāʼaga Lea 13:12.
19. ʼE feafeaʼi he fealagia ke taupau te aga fakapotopoto?
19 ʼE feafeaʼi koa he fealagia ke tou taupau te aga fakapotopoto? Tou kumi te tokoni ʼa Sehova (Pesalemo 54:4). Tou nonofo ōvi ia te Ia. ʼE tou fakafiafia ʼi te holi ʼaē e Sehova ki totatou felogoi lelei! ʼE tohi fēnei e te tisipulo ko Sake: “Koutou fakaōvi ki te ʼAtua, pea ʼe fakaōvi atu anai kia koutou.” (Sake 4:8). ʼE ʼui fēnei e Paulo: “Koutou fakafiafia tuʼumaʼu ʼi te ʼAliki. ʼE ʼau toe liuga atu: ke koutou fakafiafia! Ke ʼiloa e te tagata fuli takotou agapoto! Kua ōvi mai te ʼAliki. ʼAua naʼa koutou tuʼaniaʼi he meʼa, kae ia meʼa fuli, ʼaki te faikole pea mo te ʼu fakakolekole ʼaki he ʼu fakafetaʼi, koutou fakahā takotou ʼu kole ki te ʼAtua; pea ko te tokalelei ʼa te ʼAtua, ʼaē ʼe māʼoluga age ʼi te ʼu manatu fuli, ʼe ina taupau anai tokotou ʼu loto pea mo ʼakotou ʼu fealagia fakakaukau ʼaki ia Kilisito Sesu.” (Filipe 4:4-7). Pea ka hage ʼe mamafa fau te ʼamo ʼo te ʼu kavega ʼo te ʼu faʼahiga meʼa ʼo te tuʼu ʼaenī ʼe lolotoga puli, tou tuku kia Sehova, pea ko ia totonu, ʼe ina lagolago anai tatou. — Pesalemo 55:22.
20. Ko te aga fea ʼe tonu ke tou haga fai, ohage ko tona fakahā ia 1 Timoteo 4:10?
20 ʼIo, ko te fakaʼosi kua ōvi mai, koia tou aga fakapotopoto! Neʼe ko he tokoni lelei ʼi te ʼu taʼu e 1 900 kua hili; ʼi te temi nei ʼe ko he tokoni maʼuhiga. Tou haga fakaʼaogaʼi totatou ʼu fealagia fakakaukau moʼo fakavikiviki ʼo Sehova ʼi tana haga taki haohaoa tatou ki tona mālama foʼou. — 1 Timoteo 4:10.
ʼE feafeaʼi anai hakotou tali?
◻ Koteā te aga fakapotopoto?
◻ He koʼe koa ʼe maʼuhiga ʼaupito te aga fakapotopoto?
◻ ʼE feafeaʼi he fealagia ke fakafoʼou tatou ʼi te mālohi ʼaē ʼe ina fakamaliu totatou ʼatamai?
◻ Ko te tau hoholo fea ʼaē ʼe tonu ke tou tauʼi ʼi totatou ʼatamai?
◻ ʼE feafeaʼi hatatou taupau ʼo te aga fakapotopoto?
[Paki ʼo te pasina 15]
Ko te fakaōviōvi ki te ʼAtua ʼi te faikole ʼe ina tokoniʼi tatou ke tou taupau te aga fakapotopoto.
[Paki ʼo te pasina 17]
ʼUhi ko te aga fakapotopoto, ʼe mole kākāʼi anai tatou e te ʼu meʼa fakalalata ʼo te mālama ʼaenī.