ʼAua Naʼa Tou Fiu!

“ ʼAua naʼa tou fiu ʼi te fai ʼo te meʼa ʼaē ʼe lelei, heʼe tou utu anai ʼi tona temi totonu, mo kapau ʼe mole tou fiu.”—Kalate 6:9.

1, 2. (a) E feafeaʼi te ʼohofi ʼa te laione? (b) Ko ai ia nātou ʼaē ʼe fia kai tāfito e te Tevolo?

ʼE LAHI te ʼu faʼahiga fai ʼa te laione moʼo ʼohofiʼi ʼo te manu ʼaē ka ina kai. ʼI ʼihi temi ʼe ina ʼohofiʼi te manu ʼaia ʼi te ʼu luo vai peʼe ina ʼohofiʼi ʼi te ʼu ala foufou ʼaē ʼe ʼalu māhani ai. ʼE ʼui e te tohi Portraits in the Wild, ʼi ʼihi temi, ko te laione ʼe ina “fakaʼaogaʼi te temi faigamālie—ohage la, ʼe ina ʼohofi te kiʼi hōsi vao ʼaē ʼe lolotoga moe.”

² ʼE fakamahino fēnei e te ʼapositolo ko Petelo, ko tatatou “fili, te Tevolo, ʼe hage ko he laione ʼe gugulu, ʼe feʼaluʼaki ke ina kai he tahi.” (1 Petelo 5:8) ʼI tana ʼiloʼi ʼaē kua nounou tona temi, ʼe faiga mālohi e Satana ke mole tauhi te hahaʼi kia Sehova. Kae, ko te ‘laione ʼaia ʼaē ʼe gugulu,’ ʼe ina tokagaʼi tāfito ia nātou ʼaē ʼe feala ke ina kai ʼi te lotolotoiga ʼo te kau kaugana ʼa Sehova. (Fakahā 12:12, 17) Ko tana ʼu faʼahiga ʼohofi ʼo te hahaʼi ʼe tatau mo te laione mokā ina ʼohofi he manu. ʼO feafeaʼi?

3, 4. (a) Koteā te ʼu faʼahiga fai ʼe fakaʼaogaʼi e Satana ke ina kai te ʼu kaugana ʼa Sehova? (b) Koteʼuhi ko te ʼu “temi maʼuhiga pea mo faigataʼa ʼaupito” ʼaenī, koteā te ʼu fehuʼi ʼaē ʼe malaga?

³ ʼI ʼihi temi, ʼe ʼahiʼahiʼi e Satana te ʼu hele—ohage la ko te fakataga pea mo te fakafeagai, ʼe ko tana faiga ʼaia ke tuku tatatou agatonu pea mo tuku tatatou tauhi kia Sehova. (2 Timoteo 3:12) Kae, ohage ko he laione, ʼi ʼihi temi, ʼe fakaʼaogaʼi e te Tevolo te ʼu temi faigamālie. ʼE talitali ke tou lotovaivai pea mo gaʼegaʼe, pea ʼe ina faiga ai leva ke ina fakaʼaogaʼi te ʼaluʼaga ʼaia ʼaē kua tou vaivai ai ke tou līaki tatatou ʼu faiga. Kae ʼaua naʼa tou tuku ke ina maʼu gafua tatou!

⁴ Tahi ʼaē meʼa, ʼe tou maʼuʼuli ʼi te ʼu temi faigataʼa ʼaupito ʼo te hisitolia katoa ʼo te tagata. ʼI te ʼu “temi maʼuhiga ʼaupito pea mo faigataʼa” ʼaenī, tokolahi ia tatou ʼe nātou lotovaivai pea mo lotohoha ʼi ʼihi lakaga. (2 Timoteo 3:1) Koia, ʼe lava feafeaʼi koa ke ʼaua naʼa lahi fau tatatou gaʼegaʼe, ʼo tou liliu ai ko he meʼa kai ʼe maʼu gafua e te Tevolo? Ei, ʼe lava feafeaʼi koa hatatou mulimuli ki te tokoni fakaʼatua ʼaē neʼe tohi fēnei e Paulo: “ ʼAua naʼa tou fiu ʼi te fai ʼo te meʼa ʼaē ʼe lelei, heʼe tou utu anai ʼi tona temi totonu, mo kapau ʼe mole tou fiu”?—Kalate 6:9.

Mokā Faka Lotomamahi Tatou e ʼIhi

5. Koteā ʼaē neʼe tupu ai te gaʼegaʼe ʼa Tavite, kae koteā ʼaē neʼe mole ina fai?

⁵ ʼI te ʼu temi faka Tohi-Tapu, māʼia mo te ʼu kaugana ʼaē neʼe lahi tanatou agatonu ki te ʼAtua, ʼi ʼihi temi neʼe nātou lotovaivai ai. Neʼe tohi fēnei e te tagata fai pesalemo ko Tavite: “Kua ʼau gaʼegaʼe ʼuhi ko taku lāuga. ʼI te po katoa ʼe ʼau fakavikuviku toku moeʼaga, ʼaki toku ʼu loʼimata ʼe ʼau fakapala toku hekaʼaga moe. Kua gaʼegaʼe toku mata ʼuhi ko toku mamahi.” He koʼe neʼe lotomamahi feiā ia Tavite? Neʼe ina fakamahino fēnei: “ ʼUhi ko nātou fuli ʼaē ʼe fakafeagai mai kia te ʼau.” Ko te ʼu fakafeagai ʼaē neʼe fai e ʼihi, neʼe tupu ai te tagi loʼimata ʼa Tavite ʼi tona lotomamahi. Kae neʼe mole lītuʼa ia Tavite kia Sehova ʼuhi ko te ʼu meʼa ʼaē neʼe fai age e te hahaʼi kia ia.—Pesalemo 6:6-9.

6. (a) ʼE lava feafeaʼi ke lave kia tatou te ʼu palalau peʼe ko te ʼu aga ʼa niʼihi? (b) E feafeaʼi te liliu ʼa ʼihi ko he meʼa ʼe feala ke kai gafua e te Tevolo?

⁶ ʼO toe feiā pe, e lagi feala ke tou lotomamahi ʼaupito ʼuhi ko te ʼu palalau peʼe ko te ʼu aga ʼa ʼihi. ʼE ʼui fēnei e Tāʼaga Lea 12:18: “ ʼE ʼi ai ia ia ʼaē ʼe palalau vale ohage ko he tā ʼaki he heletā.” Kapau ʼe ko he tēhina peʼe ko he tuagaʼane ʼaē ʼe palalau vale, e lagi feala ke loloto te ʼu lavea ʼaē ka ina fakatupu, ohage ko he lavea neʼe fakatupu e he heletā. Ko te ʼuhiga ʼo te tagata ʼe feala ke ʼita, ʼo lagi taupau he loto ʼita. ʼE ʼiloga lelei te faʼahi ʼaia mokā ʼe tou manatu neʼe mole gaohi lelei tatou pe neʼe mole gaohi tatou ʼaki he aga ʼe tāu mo tatou. E lagi mata faigataʼa kia tatou hatatou palalau kia ia ʼaē ʼe tou lotomamahi ki ai; ʼi ʼihi temi e lagi tou fai he ʼu meʼa ke mole tou fetaulaki mo ia ʼaia. ʼI te kua lahi ʼo tonatou lotomamahi, ko ʼihi neʼe nātou fiu pea neʼe mole kei nātou kau ki te ʼu fono faka Kilisitiano. Meʼa fakaʼofaʼofa foki, koteʼuhi ʼi tanatou fai te meʼa ʼaia, ʼe nātou “tuku he faigamālie ki te Tevolo” ke ina fakaʼaogaʼi nātou ohage ko he meʼa ʼe faigafua hana kai.—Efesi 4:27.

7. (a) ʼE lava feafeaʼi hatatou tauʼi te ʼu fakatuʼutuʼu ʼa te Tevolo mokā tou lotomamahi peʼe lave kovi kia tatou te ʼu aga ʼa ʼihi? (b) He koʼe ʼe tonu ke tou līaki te loto ʼita?

⁷ ʼE lava feafeaʼi hatatou tauʼi te ʼu fakatuʼutuʼu ʼa te Tevolo, mokā tou lotomamahi peʼe lave kovi kia tatou te ʼu aga ʼa ʼihi? ʼE mole tonu ke tou taupau he loto ʼita. Kae ʼe tonu ke tou faiga ke tou tokalelei mo ʼotatou ʼu tēhina pea kapau ko he meʼa ʼe feala, tou foimo fakatokatoka tatatou ʼu fihifihia. (Efesi 4:26) ʼE fakaloto mālohiʼi tatou e Kolose 3:13 ʼo fēnei: “Koutou haga . . . fefakamolemoleʼaki ʼaki he lotolelei, mo kapau ʼe ʼi ai he tahi ʼe ina koviʼia he meʼa ʼa he tahi age.” ʼE ʼaoga tāfito te loto fakamolemole mokā ʼe fakamoʼoni e ia ʼaē neʼe ina fakatupu te lotomamahi ki tana lākahala, pea mo fakahemala moʼoni. (Vakaʼi ia Pesalemo 32:3-5 mo Tāʼaga Lea 28:13.) Kae, ko te meʼa ʼaia ʼe tokoni kia tatou ke tou manatuʼi ko te loto fakamolemole ʼe mole faka ʼuhiga ʼe tou fakalaka peʼe tou meʼa noaʼi te ʼu hala ʼaē neʼe fai e ʼihi. Ko te faka ʼuhiga ʼo te loto fakamolemole ko te mole taupau ʼo he loto ʼita. Ko te loto ʼita ʼe ko he kavega mamafa. ʼE feala ke fakatupu kovi ki tatatou ʼu fakakaukau, pea mo pulihi tatatou fiafia. Tahi ʼaē meʼa ʼe feala ke fua kovi ki totatou maʼuli fakasino. Kae ko te loto fakamolemole, mo kapau ʼe ʼaoga te faʼahi ʼaia, ʼe fua manuʼia kia tatou. Tou fakaʼamu, ohage ko Tavite, ke mole tou fiu ʼi he temi pea ke ʼaua naʼa tou mavae mai ia Sehova, ʼuhi ko he ʼu palalau peʼe ko he ʼu aga neʼe fai e ʼihi hahaʼi kia tatou!

Ka Tou Fai He Hala

8. (a) ʼI ʼihi temi, he koʼe ʼe tukugakoviʼi e ʼihi ia nātou totonu? (b) Koteā te tuʼutāmaki ʼe feala ke hoko mo kapau ʼe tou tukugakoviʼi fau ia tatou totonu, ʼo tupu ai hatatou fiu?

⁸ ʼE ʼui fēnei ia Sake 3:2: “ ʼE lahi te ʼu lakaga ʼe tou tūkia fuli ai.” Ka tou fai he hala, ʼe ko he meʼa māhani tatatou tukugakoviʼi ia tatou. (Pesalemo 38:3-8) Ko tatatou tukugakoviʼi ʼo tatou, ʼe feala ke mālohi tāfito mo kapau ʼe tou tauʼi hotatou vaivaiʼaga pea mo tou felāveʼi mo he ʼu temi faigataʼa.a ʼE fakamahino fēnei e te tuagaʼane neʼe ina tauʼi te ʼu faʼahiga fihifihia feiā: “Neʼe kua ʼau fia mate, ʼi taku mole ʼiloʼi ʼaē pe neʼe ʼau fai he hala ʼe feala ke fakamolemole peʼe kailoa. Neʼe kua tonu ke ʼau fakagata taku gāue kia Sehova koteʼuhi neʼe lagi mole kei ʼi ai he ʼamanaki kia ʼau.” Kapau ʼe lahi tatatou tukugakoviʼi ʼo tatou, ʼo tupu ai hatatou fiu ʼi te gāue kia Sehova, ʼe tou faka fealagia ki te Tevolo ke ina tauʼi tatou—pea ʼe ina foimo fakaʼaogaʼi te fealagia ʼaia! (2 Kolonito 2:5-7, 11) ʼE lagi ʼaoga anai ke tou maʼu he sio fakapotopoto ʼo ʼuhiga mo te hala ʼaē neʼe tou fai.

9. He koʼe ʼe tonu ke tou falala ki te loto manavaʼofa ʼa te ʼAtua?

⁹ ʼI te temi ʼaē ʼe tou lākahala ai, ʼe lelei ke tou fakafuafua lelei tatatou tukugakoviʼi ʼo tatou. Kae, ʼi ʼihi temi, ʼe feala ke tukugakoviʼi tuʼumaʼu e he Kilisitiano ia ia totonu, ʼi tana manatu ʼaē ʼe mole fakamolemole anai e te ʼAtua te aga ʼaē neʼe ina fai. Kae ʼe fakaloto fīmālieʼi tatou e te Tohi-Tapu ʼo ina ʼui fēnei: “Kapau ʼe tou vete tatatou ʼu agahala, pea ʼe agatonu ia mo faitotonu ke ina fakamolemole tatatou ʼu agahala pea mo fakamaʼa tatou mai te heʼe faitotonu fuli pe.” (1 Soane 1:9) ʼE feala koa ke tou ʼui papau ʼe mole fakamolemole anai e te ʼAtua te aga ʼaē neʼe tou fai? Koutou manatuʼi ʼe ʼui e Sehova ʼi tana Folafola ko ia “ ʼe fakamolemole gafua.” (Pesalemo 86:5; 130:3, 4) Mai tona ʼaluʼaga ʼaē ʼe mole feala ke loi, ʼe ina fakamolemole mai anai kia tatou ohage ko tana fakapapau mai ʼi tana Folafola, mo kapau ʼe tou fakaōvi kia te ia ʼaki he loto fakahemala.—Tito 1:2.

10. Koteā te tokoni fakaloto fīmālie ʼaē neʼe fai e Te Tule Leʼo ʼāfea ʼo ʼuhiga mo te tauʼi ʼo he vaivaiʼaga ʼo te kakano?

¹⁰ Koteā ʼaē ʼe tonu ke koutou fai mo kapau ʼe koutou tauʼi he vaivaiʼaga pea mo koutou toe tō ki te hala ʼaia? ʼAua naʼa koutou fiu! Kapau ʼe koutou toe tō ki te hala ʼaia, ʼe mole faka ʼuhiga leva ʼe mole he ʼuhiga ʼo takotou ʼu faiga ʼaē neʼe kua koutou fai ki muʼa atu. Ko Te Tule Leʼo (fakapilitānia) ʼo te ʼaho 15 ʼo Sūnio 1954, neʼe ina foaki te tokoni fakaloto fīmālie ʼaenī: “ ʼE feala ʼi ʼihi temi ke tou tūkia pea mo tō tuʼa lahi ki he agamāhani ʼe kovi, neʼe kua pipiki mālohi ki totatou maʼuli ʼāfea. . . . ʼAua naʼa koutou lotovaivai. ʼAua naʼa koutou manatu kua koutou fai he agahala ʼe mole feala hona fakamolemole. ʼE ko te manatu ʼaia ʼaē ʼe loto e Satana ke koutou maʼu. Kapau ʼe koutou tukugakoviʼi koutou pea mo koutou lotomamahi, ʼe fakahā ai neʼe mole heʼeki mamafa te agahala ʼaē neʼe koutou fai. ʼAua naʼa koutou fiu ʼi te maliu ki te ʼAtua, ʼaki he agavaivai pea mo fai fakamalotoloto, ʼo koutou faiga ke fakamolemole te ʼAtua kia koutou, ke ina fakamaʼa koutou pea mo tokoni kia koutou. Koutou fakaōvi kia te ia ohage ko te fakaōvi ʼa he kiʼi tamasiʼi ki tana tāmai ʼi te temi ʼaē ʼe lotomamahi ai, tatau aipe peʼe kua tuʼa fia takotou fai te agahala ʼaia, pea ʼe foaki atu anai e Sehova he tokoni, ʼaki he loto manavaʼofa, ʼuhi ko tana agalelei makehe pea, kapau ʼe koutou fakahemala moʼoni, ʼe ina foaki atu anai he leʼo ʼo loto ʼe maʼa.”

Mokā Tou Logoʼi ʼe Mole Feʼauga Te Meʼa ʼAē ʼe Tou Fai

11. (a) ʼE tonu ke tou manatu feafeaʼi ʼo ʼuhiga mo tatatou kau ʼaē ki te gāue fai faka mafola ʼo te Puleʼaga? (b) Koteā te ʼu meʼa ʼe tonu ke tauʼi e te kau Kilisitiano ʼi tonatou loto ʼo ʼuhiga mo tonatou minisitelio?

¹¹ Ko te gāue fai faka mafola ʼe ko he koga maʼuhiga ʼaia ʼi te maʼuli ʼo he Kilisitiano, pea ko te kau ki te gāue ʼaia ʼe fakatupu fiafia. (Pesalemo 40:8) Kae ko ʼihi Kilisitiano ʼe nātou tukugakoviʼi ia nātou totonu ʼi te mole feala ʼaē ke lahi age te ʼu meʼa ʼaē ʼe nātou fai ʼi te minisitelio. Ko te taʼi tukugakoviʼi ʼaia ʼo tatou, ʼe feala ke ina pulihi totatou fiafia pea mo feala ai ke tou fiu, ʼo tou manatu ai ko Sehova ʼe mole ina feʼaugaʼia te ʼu meʼa ʼaē ʼe tou fai. Tou fakatokagaʼi muʼa te ʼu fihifihia ʼaē neʼe tauʼi e ʼihi.

Neʼe tohi fēnei e te tuagaʼane ko ʼanā tamaliki e toko tolu mo tona ʼohoana: “ ʼE koutou ʼiloʼi koa te toe temi ʼaē ʼe fakaʼaogaʼi e ia ʼaē ʼe masiva? ʼE ʼau taupau lelei te falā ʼaē ʼe ʼau maʼu. Ko tona faka ʼuhiga ʼe ʼau kumi te ʼu fale ʼaē ʼe fakatau ai te ʼu meʼa ʼaē kua ʼosi fakaʼaogaʼi, te ʼu fale koloā ʼaē ʼe mole totogi kovi, peʼe ʼau fai tui. Ko te hola katoa peʼe lua ʼi te vāhaʼa fuli ʼe ʼau kumi te ʼu kiʼi pepa ʼaē ʼe fakahā ai te ʼu meʼa ʼaē ʼe mole totogi kovi—ʼe ʼau sipi te ʼu kiʼi pepa ʼaia, mo ʼau tānaki ki he puha, pea mo ʼau fakaʼaogaʼi te ʼu kiʼi pepa ʼaia. ʼI ʼihi temi, ʼe lahi taku tukugakoviʼi ʼo ʼau totonu ʼi taku fai te ʼu meʼa ʼaia, ʼi taku manatu ʼaē ʼe tonu ke ʼau fakaʼaogaʼi te temi ʼaia ki te gāue fai faka mafola.”

Neʼe ʼui fēnei e te tuagaʼane ko tana ʼu tamaliki e toko fā pea ko tona ʼohoana ʼe mole ko he Kilisitiano: “Neʼe ʼau manatu e lagi mole feʼauga taku ʼofa moʼoni ʼaē kia Sehova. Koia neʼe ʼau faiga fakamalotoloto ʼi taku tauhi ʼaē kia Sehova. Neʼe ʼau faiga moʼoni, kae neʼe mole ʼau feʼaugaʼia te meʼa ʼaē neʼe ʼau fai. Neʼe mole lahi fau taku manatu ʼaē kia ʼau, kae neʼe mole feala ke ʼau tui ʼe tali e Sehova taku tauhi ʼaē kia ia.”

Neʼe ʼui fēnei e te tuagaʼane neʼe manatu kua tonu ke tuku tana selevisi pionie: “Neʼe mole kei ʼau lavaʼi te tali ʼo te manatu ʼaē neʼe mole ʼau fakahoko taku fakapapau ʼaē ke ʼau tauhi kia Sehova ʼi te temi katoa. ʼE mole feala hakotou ʼiloʼi te lotomamahi ʼaupito ʼaē neʼe tau mo ʼau! ʼI te temi nei, ʼe ʼau tagi mokā ʼe ʼau manatuʼi te faʼahi ʼaia.”

12. He koʼe ʼe tukugakoviʼi e ʼihi kau Kilisitiano ia nātou totonu ʼi te ʼu meʼa ʼaē ʼe feala ke nātou fai ʼi te minisitelio?

¹² ʼE tou loto fuli ke tou tauhi kia Sehova ʼaki totatou ʼu fealagia katoa. (Pesalemo 86:12) Kae koteā te tupuʼaga ʼo te tukugakoviʼi fau e ʼihi ia nātou totonu mokā ʼe mole feala ke lahi age tanatou gāue ʼaē kia Sehova? Ko ʼihi, ʼe nātou feiā heʼe lagi nātou manatu ʼe mole tāu mo nātou te faʼahi ʼaia, ʼuhi ko he ʼu meʼa kovi neʼe nātou fai ʼi tonatou maʼuli. ʼI te tahi faʼahi, e lagi tou tukugakoviʼi ia tatou, heʼe mole tou mahino lelei ki te meʼa ʼaē ʼe loto e Sehova ke tou fai. Neʼe ʼui fēnei e te tuagaʼane: “Neʼe ʼau manatu logope peʼe koutou gāue kinakina ʼo aʼu ki tokotou gataʼaga, ʼe hage pe ia neʼe mole koutou fai he meʼa.” Koia, neʼe fakatuʼutuʼu ai e te tuagaʼane ke ina muliʼi he ʼu lekula māʼoluga—pea ko te meʼa ʼaē neʼe hoko, neʼe toe ʼāsili age tana tukugakoviʼi ia ia totonu ʼi tana mole lavaʼi ʼaē te mulimuli ki te ʼu lekula ʼaia.

13. Koteā ʼaē ʼe loto e Sehova ke tou fai?

¹³ Koteā ʼaē ʼe loto e Sehova ke tou fai? ʼE loto e Sehova ke tou tauhi kia ia ʼaki totatou nefesi katoa, ʼo mulimuli pe ki totatou ʼu fealagia. (Kolose 3:23) Kae, ʼe ʼi ai te kehekehe lahi ʼi te meʼa ʼaē ʼe tou loto ke tou fai pea mo te meʼa ʼaē ʼe feala moʼoni ke tou fai. E lagi feala ke faka tuʼakoi tatatou ʼu gāue ʼi he ʼu faʼahiga ʼaluʼaga, lagi kua kita matuʼa peʼe finematuʼa, kua vaivai tokita sino, peʼe ko he ʼu maʼua faka famili. Kae, mokā tou fai te ʼu meʼa fuli ʼaē ʼe feala ke tou fai, ʼe feala ke tou tui papau ʼe tou fai tatatou tauhi kia Sehova ʼaki totatou nefesi katoa—ʼo mole lahi age peʼe veliveli age te ʼu meʼa ʼaē ʼe tou fai ʼaki totatou nefesi katoa, ʼi he tahi age ʼe gāue katoa ʼi te minisitelio heʼe mālohi pea ʼe feala tana fai te faʼahi ʼaia.—Mateo 13:18-23.

14. Koteā ʼaē ʼe feala ke koutou fai mo kapau ʼe ʼaoga kia koutou he tokoni ke koutou ʼiloʼi ai te meʼa ʼaē ʼe feala moʼoni ke koutou fai?

¹⁴ Koia, ʼe lava feafeaʼi hakotou ʼiloʼi te meʼa ʼaē ʼe feala moʼoni ke koutou fai? ʼE tonu ke koutou palalau ki te faʼahi ʼaia mo hokotou kaumeʼa Kilisitiano ʼe koutou falala ki ai pea kua fotufotuʼa, lagi ko he tagata ʼāfea pe ko he tuagaʼane kua māhani ki te ʼu meʼa ʼo te maʼuli, ʼe ina ʼiloʼi tokotou ʼu fealagia, tokotou ʼu tuʼakoi, pea mo tokotou ʼu maʼua faka famili. (Tāʼaga Lea 15:22) Koutou manatuʼi ʼe mole fakafuafua e te ʼAtua tokotou ʼuhiga, ʼo mulimuli ki te ʼu meʼa ʼaē ʼe koutou fai ʼi te minisitelio. Ko te kau kaugana fuli ʼa Sehova ʼe nātou maʼuhiga kia ia. (Asea 2:7; Malakia 3:16, 17) Ko te ʼu meʼa ʼaē ʼe koutou fai ʼi te gāue fai faka mafola, ʼe feala ke lahi age peʼe veliveli age ʼi te ʼu meʼa ʼaē ʼe fai e niʼihi, kae kapau ko te meʼa ʼaia ʼaē ʼe feala ke koutou fai, ʼe fiafia ia Sehova, pea ʼe mole ʼaoga hakotou tukugakoviʼi ia koutou totonu.—Kalate 6:4.

Mokā ʼe Lahi Fau Te ʼu Meʼa ʼAē ʼe Fakamaʼua Mai

15. Koteā te ʼu meʼa ʼaē ʼe fakamaʼua ki te kau tagata ʼāfea ke nātou fai ʼi te kokelekasio?

¹⁵ Neʼe ʼui fēnei e Sesu: “Ko ia ʼaē neʼe foaki lahi ki ai, ʼe fakamaʼua lahi anai kia te ia.” (Luka 12:48) ʼE mahino papau ʼe ‘fakamaʼua lahi’ kia nātou ʼaē ko te ʼu tagata ʼāfea ʼi te kokelekasio. Ohage ko Paulo, ʼe nātou gāue maʼa te kokelekasio. (2 Kolonito 12:15) ʼE tonu ke nātou teuteuʼi te ʼu akonaki, ke nātou fai te ʼu ʼaʼahi faka tauhi ōvi, ke nātou fakatokatoka te ʼu fihifihia ʼaē ʼe hoko ʼi te kokelekasio—ʼo nātou fai te ʼu meʼa fuli ʼaia, ka mole nātou līaki noa tonatou ʼu famili. (1 Timoteo 3:4, 5) ʼE toe maʼumaʼua ʼihi ʼu tagata ʼāfea ʼi tanatou tokoni ki te laga ʼo te ʼu Fale ʼo te Puleʼaga, ʼi tanatou gāue ʼi te ʼu Komite ʼaē ʼe faka felogoi mo te Lopitali, pea mo tanatou ʼu gāue ʼi te ʼu fakatahi lalahi. ʼE lava feafeaʼi ki te kau tagata ʼaia ʼaē ʼe gāue kinakina pea mo fakamalotoloto, ke mole nātou gaʼegaʼe ʼi te ʼamo ʼo te ʼu maʼua ʼaia?

16. (a) Koteā te tokoni ʼaoga neʼe foaki e Setelo kia Moisese? (b) Koteā te kalitate ʼe tonu anai ke maʼu e he tagata ʼāfea moʼo vaevae ʼo te ʼu maʼua ʼaē ʼe feala ke fai e ʼihi tēhina?

¹⁶ ʼI te temi ʼaē neʼe kua gaʼegaʼe ai Moisese, te tagata fiamālalo pea mo agavaivai, ʼuhi ko tana ʼamo te ʼu fihifihia ʼo niʼihi, neʼe foaki age e te tāmai ʼo tona ʼohoana, ko Setelo, te puleʼaki lelei: neʼe ina ʼui age ke ina vaevae tona ʼu maʼua mo niʼihi ʼu tagata popoto. (Ekesote 18:17-26; Faka au 12:3) ʼE ʼui fēnei ia Tāʼaga Lea 11:2: “Ko te poto ʼe maʼu e nātou ʼaē ʼe fiamālalo.” Ko te faka ʼuhiga ʼo te fiamālalo ko takotou ʼiloʼi pea mo koutou tali tokotou ʼu tuʼakoi. Ko he tahi ʼe fiamālalo ʼe mole lotolotolua ʼi te foaki ʼo he ʼu gāue ki niʼihi, peʼe tuʼania naʼa mole kei feala hana takitaki ʼi tana vaevae te ʼu maʼua ʼaia mo te tahi ʼu tagata popoto.b (Faka au 11:16, 17, 26-29) Kailoa, kae ʼe loto ia ke tokoni kia nātou ke nātou tuputupu.—1 Timoteo 4:15.

17. (a) ʼE lava feafeaʼi ki te kokelekasio ke nātou fakamaʼamaʼa te kavega ʼo te kau tagata ʼāfea? (b) Koteā te ʼu sakilifisio ʼaē ʼe fai e te ʼu ʼohoana ʼo te kau tagata ʼāfea, pea e feafeaʼi hatatou fakahā kia nātou ʼe mole tou meʼa noaʼi te ʼu sakilifisio ʼaia ʼaē ʼe nātou fai?

¹⁷ ʼE feala kia nātou ʼo te kokelekasio ke nātou fakamaʼamaʼa te kavega ʼo te kau tagata ʼāfea. ʼI tanatou mahino ʼaē ʼe tonu ki te kau tagata ʼāfea ke nātou tokakaga ki tonatou famili, ʼe mole fai anai e ʼihi he ʼu kole ʼe mole fakapotopoto ʼo ʼuhiga mo te temi pea mo te tokaga ʼa te kau tagata ʼāfea kia nātou. ʼE nātou manatuʼi anai te ʼu sakilifisio ʼaē ʼe fai ʼaki he lotolelei e te ʼu ʼohoana ʼo te kau tagata ʼāfea, koteʼuhi ʼe nātou tali ke fakaʼaogaʼi e tonatou ʼu ʼohoana maʼa te kokelekasio, te temi ʼaē ʼe tonu ke nātou nonofo ai mo tonatou famili. Neʼe fakamahino fēnei e te faʼe ko ʼana tamaliki e toko tolu pea ko tona ʼohoana ko te tagata ʼāfea: “ ʼE mole ʼau meo ʼau ki te ʼu maʼua ʼaē ʼe ʼau lotolelei ke ʼau fai ʼi toku loto fale, heʼe ʼau loto ki toku ʼohoana ke ina fai tona ʼu maʼua ʼi tona ʼuhiga tagata ʼāfea. ʼE ʼau ʼiloʼi ʼe lahi te ʼu tapuakina ʼe foaki mai e Sehova ki tomatou famili ʼuhi ko tana gāue ʼaia, pea ʼe mole ʼau meo ʼau ʼo ʼuhiga mo te temi pea mo te mālohi ʼaē ʼe ina fakaʼaogaʼi ki te kokelekasio. Kae ʼi tona ʼuhiga moʼoni, ʼe tonu ke lahi taku gāue ʼi te ʼōloto pea ke lahi taku tokaga ki tamā fānau, koteʼuhi ʼe maʼumaʼua toku ʼohoana.” ʼI meʼa faka lotomamahi foki, heʼe ʼui e te tuagaʼane ʼaia, ko ʼihi, ʼe mole nātou mahino nātou ki te ʼu gāue lahi ʼaia ʼaē ʼe ina fai, kae ʼe nātou valoki nātou ia ia ʼo nātou ʼui fēnei, “He koʼe ʼe mole ke pionie koe?” (Tāʼaga Lea 12:18) ʼE lelei age hatatou vikiviki niʼihi ʼo ʼuhiga mo te ʼu meʼa ʼaē ʼe nātou fai, kae ke ʼaua naʼa tou valoki ia nātou ʼo ʼuhiga mo te ʼu meʼa ʼaē ʼe mole feala ke nātou fai!—Tāʼaga Lea 16:24; 25:11.

Koteʼuhi Mole Heʼeki Hoko Te Fakaʼosi

18, 19. (a) He koʼe ʼe mole ko he temi ʼaenī ke tou tuku ai tatatou lele ki te maʼuli heʼegata? (b) Koteā te tokoni ʼaē neʼe fai e te ʼapositolo ko Paulo ʼi tona temi totonu, ki te kau Kilisitiano ʼaē ʼi Selusalemi?

¹⁸ Ka ʼiloʼi e te tagata lele kua ōvi ki te fakaʼosi ʼo he lele loaloaga, ʼe ina haga fai. E lagi kua gaʼegaʼe tona sino—kua hela, kua velahia, pea kua magemage tona sino—kae ʼi te kua ōvi ki te fakaʼosi, ʼe mole tonu ke ina tuku tana lele. ʼO toe feiā pe, ʼi totatou ʼuhiga Kilisitiano ʼe tou kau ki te lele ʼaē ki te maʼuli, pea ʼe kua tou ōvi ʼaupito ki te laini ʼo te fakaʼosi ʼo te lele. ʼE mole ko te temi ʼaenī ke tou tuku ai tatatou lele!—Vakaʼi ia 1 Kolonito 9:24; Filipe 2:16; 3:13, 14.

¹⁹ Neʼe tau te kau Kilisitiano ʼo te ʼuluaki sēkulō mo te ʼaluʼaga feiā. Lagi ʼi te taʼu 61 ʼo totatou temi, neʼe faitohi te ʼapositolo ko Paulo ki te kau Kilisitiano ʼo Selusalemi. Kua nounou te temi—ko te “taʼiake” agakovi, te tuʼu ʼo te ʼu faʼahiga meʼa ʼo te kau Sutea ʼaposita, neʼe ʼamanaki ke “puli.” Neʼe maʼua tāfito ki te kau Kilisitiano ʼaē ʼi Selusalemi, ke nātou nonofo tokaga pea mo agatonu; neʼe tonu ke nātou feholaki mai te kolo ʼi te temi ʼaē neʼe nātou sisio ai ki te ʼatakai ʼo te kolo ʼaki he ʼu kautau neʼe faka ʼapitaki-tau. (Luka 21:20-24, 32) Koia, ʼi tona temi totonu, neʼe fai e Paulo te tokoni fakaʼatua ʼaenī: ‘ ʼAua naʼa koutou fiu pea mo koutou gaʼegaʼe ʼi tokotou ʼu nefesi.’ (Hepeleo 12:3) ʼE fakaʼaogaʼi ʼi henī e te ʼapositolo ko Paulo te ʼu kupu e lua: te kupu “fiu” (kaʹmno) pea mo te kupu “gaʼegaʼe” (e·klyʹo·mai). Ohage ko te ʼui ʼa te tagata ʼe fakaliliu Tohi-Tohi, ko te ʼu kupu faka Keleka ʼaia ʼe “fakaʼaogaʼi e Aristote ʼo ʼuhiga mo te hahaʼi lele ʼaē kua gaʼegaʼe pea mo nātou fetokaʼi ʼi tanatou kua ʼosi fakalaka ʼi te laini ʼo te fakaʼosi. Ko nātou ʼaē neʼe nātou lau [te tohi ʼa Paulo] neʼe kei nātou kau ʼi te lele ʼaia. Neʼe mole tonu ke tuku tanatou lele kae heʼeki ʼosi. Neʼe mole tonu ke nātou fakagafua ke nātou vaivavai pea mo nātou toka ʼi te gaʼegaʼe. Koia ʼe toe ʼaoga ke tou faʼa kātaki ʼi te temi ʼaē ʼe tou tau ai mo te ʼu mamahi.”

20. He koʼe ʼe ʼaoga kia tatou ʼi te temi ʼaenī te tokoni ʼaē neʼe fai e Paulo?

²⁰ ʼE ʼaoga te tokoni ʼa Paulo kia tatou ʼi te temi ʼaenī! ʼI tatatou felāveʼi mo te ʼu faigataʼaʼia ʼaē ʼe ʼāʼāsili tuputupu, ʼe feala ʼi ʼihi lakaga ke tou hage ko te kau tagata lele ʼaē kua vaivavai, pea mo nātou fetokaʼi. Kae ʼi tatatou kua fakaōvi ki te laini ʼo te fakaʼosi, ʼe mole tonu ke tou fiu! (2 Fakamatala 29:11) Ko te faʼahi ʼaia ʼaē ʼe loto kiai e totatou Fili, te “laione [ʼaē] ʼe gugulu.” Kae meʼa lelei foki, neʼe fai e Sehova te ʼu fakatuʼutuʼu ke ina foaki “te mālohi ki ʼaē ʼe vaivai.” (Isaia 40:29) ʼE tou palalau anai ʼi te alatike ʼaē ka hoa mai pe koteā te ʼu fakatuʼutuʼu ʼaia, pea koteā tonatou ʼaoga kia tatou.

[Nota ʼi te lalo pasina]

Koteā Takotou Tali?

◻ Koteā ʼaē ʼe tonu ke tou fai ke ʼaua naʼa tou fiu ʼi te tauhi kia Sehova, mokā tou lotomamahi peʼe lave kovi kia tatou te ʼu aga ʼa ʼihi?

◻ Koteā te manatu fakapotopoto ʼo ʼuhiga mo te tukugakoviʼi ʼo tatou totonu, ʼe ina taupau anai tatou ke ʼaua naʼa tou fiu ʼi te tauhi ʼaē kia Sehova?

◻ Koteā ʼaē ʼe loto e Sehova ke tou fai?

◻ ʼE lava feafeaʼi ki te kalitate ʼaē ko te fiamālalo ke tokoni ki te kau tagata ʼāfea ke ʼaua naʼa nātou gaʼegaʼe?

◻ He koʼe ʼe ʼaoga kia tatou ʼi te temi ʼaenī, te tokoni ʼaē neʼe fai e Paulo ia Hepeleo 12:3?