‘Kotou Laga Ia Koutou Ki Takotou Tui Māʼoniʼoni ʼAupitō’

1, 2. Ko te gāue fea ʼaē ʼe kotou kau kiai, pea he koʼē ʼe maʼuhiga ke lelei ia te fai ʼo takotou gāue?

ʼE KE gāue kinakina ki te laga ʼo te fale. Kua fuafualoa tau kua fai ia te gāue ʼaia pea ʼe kei hoholo atu pē anai te fai ʼo te gāue ʼaia. Talu mai te kamata ʼo te gāue, neʼe ʼi ai te ʼu faigataʼaʼia kae neʼe ke leleiʼia pē tau gāue ʼaia. Tatau aipē peʼe koteā ʼaē ʼe feala ke hoko, kae ʼe ke fakatotonu ke mole ke tuku tau gāue peʼe ke fakatuatuai kiai, heʼe fakalogo tou maʼuli pea mo tou kā haʼu ki te lelei ʼo tau gāue. Koteā tona tupuʼaga? Heʼe ko te fale ʼaē ʼe ke lolotoga laga ʼe ko koe totonu!

² Neʼe fakahā lelei e te tisipulo ko Suta ia te gāue ʼaia ʼaē ʼe tou fai kiā tātou totonu. ʼI tana fakalotomālohiʼi ʼaē ia te kau Kilisitiano ke natou “haga nonofo ʼi te ʼofa ʼo te ʼAtua,” neʼe ina toe fakahā ʼi te vaega ʼaia ia te faʼahi tāfito ʼaē kā tokoni mai anai ke tou fai ia te faʼahi ʼaia: “ ʼI takotou laga ia koutou ki takotou tui māʼoniʼoni ʼaupitō.” (Suta 20, 21) Ko te ʼu faʼahi fea ʼaē ʼe feala ke kotou fai moʼo lagalaga ai ia koutou, pea ke mālohi age takotou tui ke feala ai anai hakotou nonofo ʼi te ʼofa ʼo te ʼAtua? Tou vakaʼi age muʼa faʼahi e tolu ʼo te gāue fakalaumālie ʼaē ʼe tonu ke kotou fai kiā koutou ʼi te faʼahi fakalaumālie.

TOU HAGA LAGA TATATOU TUI KI TE ʼU FAKATOTONU FAITOTONU ʼA SEHOVA

3-5. (a) ʼE loto ia Satana ke ina kākāʼi feafeaʼi takotou manatu ʼo ʼuhiga mo te ʼu fakatotonu ʼa Sehova? (b) ʼE tonu ke feafeaʼi tatatou manatu ʼo ʼuhiga mo te ʼu fakatotonu ʼa te ʼAtua, pea ʼe tonu ke malave feafeaʼi ki tokotou loto? Kotou tuku mai he faʼifaʼitaki.

³ ʼUluaki, ʼe tonu ke tou fakamālohiʼi ia tatatou tui ʼaē ki te lao ʼa te ʼAtua. ʼI takotou lolotoga ako ia te tohi ʼaenī, neʼe lahi te ʼu fakatotonu faitotonu ʼa Sehova neʼe kotou vakaʼi ai ʼo ʼuhiga mo te aga. Koteā takotou manatu ki te ʼu fakatotonu ʼaia? ʼE loto ia Satana ke ina kākāʼi koutou ke kotou manatu ko te ʼu lao, mo te ʼu pelesepeto, pea mo te ʼu lēkula ʼa Sehova ʼe faigataʼa fau pea mo fefeka. ʼE ina fakaʼaogaʼi ia te hele ʼaia heʼe kua ina ʼiloʼi tona fua talu mai te meʼa ʼaē neʼe hoko ʼi Eteni. (Senesi 3:1-6) ʼE ina lava kākāʼi anai koa mo koutou ʼaki te hele ʼaia? ʼE fakalogo tāfito anai ia te faʼahi ʼaia ki te faʼahiga manatu ʼaē kā kotou maʼu.

⁴ Tou toʼo he faʼifaʼitaki: Kā kotou haʼele ʼi he ʼōloto matalelei, pea ʼe kotou fakatokagaʼi ia te ʼā lahi mo māʼoluga ʼe ina tāʼofi te hū ʼaē ki te tahi faʼahi ʼo te ʼōloto ʼaia. Ko te vao matuʼa ʼi te tuʼa atu ʼo te ʼā ʼe hagē ʼe matalelei ʼaupitō. Pea ʼi te kamata, ʼe lagi ʼi takotou manatu ʼe gaohaʼa ia te ʼā ʼaia ki takotou haʼele faʼifaʼitaliha ʼaia. Kae ʼi takotou fakasiosio leva ʼaē mai te ʼā ki te vao matuʼa, ʼe kotou sio ki te laione fekai ʼe ina tuli ia te manu ʼi te tahi faʼahi. ʼI te temi leva ʼaia, kua kotou mahino ai ki te ʼaoga ʼaē ʼo te fai ʼo te ʼā ʼaia: Neʼe fai moʼo puipui ʼo koutou. ʼI te temi nei, ʼe ʼi ai koa he manu fekai ʼe ina lolotoga tuli koutou? ʼE fakatokagaʼi fēnei mai ʼi te Folafola ʼa te ʼAtua: “Kotou nonofo ʼalaʼala, kotou nonofo tōkakaga. Ko tokotou fili, ia te Tēvolo, ʼe feʼaluʼaki ohagē ko he laione ʼe gugulu, ʼo ina kumi ke ina kai he tahi.”—1 Petelo 5:8.

⁵ Ko Satana ʼe ko he manu fekai. Pea ko Sehova ʼi tana mole loto ʼaē ke kai tātou e Satana, neʼe ina fai he ʼu lao moʼo puipui ʼo tātou mai te ʼu tuʼuga “agakākā” ʼa te ʼāselo agakovi ʼaia. (Efesi 6:11) Koia ʼi te temi fuli pē ʼaē ʼe tou metitāsioʼi ai te ʼu lao ʼa te ʼAtua, pea ʼe tou sio ai anai ki te ʼu lao ohagē ko he fakatuʼutuʼu ʼofa ʼo tatatou Tamai ʼaē ʼe ʼi selō. Kā tou fakaʼuhiga fēia ia te ʼu lao ʼa te ʼAtua, pea ʼe tou maʼu ai anai ia te tokalelei pea mo te fiafia. Neʼe tohi fēnei e te tisipulo ko Sake: “Ko ia ʼaē ʼe sio loloto ki te lao haohaoa ʼo te ʼāteaina, pea mo haga nofo ai . . . ʼe fiafia anai ʼi tana maʼuliʼi.”—Sake 1:25.

6. Koteā te fakatuʼutuʼu lelei moʼo fakamālohiʼi ai tatatou tui ʼaē ki te ʼu lao pea mo te ʼu pelesepeto faitotonu ʼa te ʼAtua? Kotou tuku mai he faʼifaʼitaki.

⁶ Ko te fakatuʼutuʼu lelei pē ʼaē ke fakamālohiʼi ai tatatou tui ʼaē ki te ʼAtua Fai Lao pea mo te fakapotopoto ʼo tana ʼu lao, ʼe ko hatatou mulimuli ki tana ʼu fakatotonu. Ohagē lā, ʼi “te lao ʼa Kilisito” ʼe ʼi ai ia te fakatotonu ʼaē ʼa Sesu ke akoʼi ki te hahaʼi ia “te ʼu meʼa fuli pē ʼaē neʼe [ina] fakatotonu [mai].” (Kalate 6:2; Mateo 28:19, 20) ʼE toe fakalogo fakalelei ia te kau Kilisitiano ki te fakatotonu ʼaē ke natou haga fakatahitahi ki te tauhi pea mo maʼu he ʼu fakakaugā fakalotomālohi. (Hepeleo 10:24, 25) ʼI te ʼu fakatotonu ʼa te ʼAtua ʼe toe kau ai mo te tokoni ʼaē ke tou faikole tuʼumaʼu kiā Sehova ʼaki totatou loto kātoa. (Mateo 6:5-8; 1 Tesalonika 5:17) Kā tou maʼuliʼi ia te ʼu fakatotonu ʼaia, pea ʼe tou mahino lelei ai ki te ʼofa moʼoni ʼaē ʼo te ʼAtua kiā tātou ʼaki te ʼu fakatotonu ʼaia. Kapau ʼe tou fakalogo kiai, pea ʼe tou maʼu ai te fiafia mo te tokalelei ʼaē ʼe mole tou maʼu anai ʼi he tahi age faʼahi ʼo te mālama maveuveu ʼaenī. Kapau ʼe kotou metitāsioʼi tona ʼu fua lelei ʼaē kiā koutou takitokotahi ʼi takotou maʼuliʼi ʼaē ia te ʼu lao ʼa te ʼAtua, pea ʼe mole tuputupu ai anai koa ia te mālohi ʼo takotou tui?

7, 8. ʼE fakalotofīmālieʼi feafeaʼi e te Folafola ʼa te ʼAtua ia nātou ʼaē ʼe tuʼania naʼa mole feala hanatou haga taupau tuʼumaʼu tanatou faitotonu?

⁷ ʼI ʼihi temi, ʼe tuʼaniaʼi e ʼihi naʼa faigataʼa fau kiā nātou ia tanatou mulimuli tuʼumaʼu ʼaē ki te ʼu lao ʼa Sehova. ʼE natou mātataku naʼa mole feala ke natou nonofo agatonu. Kapau ʼe kotou manatu fēia, kotou manatuʼi ia te ʼu palalau ʼaenī: “Ko au, Sehova, ko au tou ʼAtua, ia Ia ʼaē ʼe ina akoʼi koe ke ʼaoga kiā te koe, ia Ia ʼaē ʼe ina taki koe ʼi te ala ʼaē ʼe tonu ke ke haʼele ai. Ke fēia age lā ʼe ke tokagaʼi moʼoni taku ʼu fakatotonu. Ko tou tokalelei ʼe liliu anai ohagē ko he vaitafe, pea ko tau faitotonu ʼe liliu anai ohagē ko te ʼu peau ʼo te tai.” (Isaia 48:17, 18) Neʼe kua kotou toʼo koa ia hokotou temi ke kotou fakakaukauʼi ai ia te fakalotofīmālie ʼo te ʼu palalau ʼaenī?

⁸ ʼE fakamanatuʼi mai e Sehova ʼi te ʼu vaega ʼaia, kapau ʼe tou fakalogo age kiā te ia, pea ʼe fua lelei pē anai kiā tātou. ʼE ina fakapapauʼi mai ia te ʼu tapuakina ʼe lua mo kapau ʼe tou fakalogo. ʼUluaki, ʼe hagē anai totatou tokalelei ko he vaitafe ʼe tokalelei, mo tafe pea ʼe mole maha ia. Lua, ʼe hagē anai tatatou faitotonu ko te ʼu peau ʼo te tai. Kapau ʼe kotou tutuʼu ʼi te mataʼone ʼo he matātai pea mo kotou sio ki te ʼu peau, ʼe mahino ia ʼi takotou manatu ʼe kotou ʼiloʼi ko he faʼahi ʼe fēia tuʼumaʼu pē ia. ʼE kotou ʼiloʼi ko te ʼu peau ʼe fasi mai pē ʼi te temi fuli ki te mataʼone ʼaia ʼi te ʼu taʼu ʼaē kā haʼu. ʼE ʼui e Sehova ko takotou faitotonu, ia tokotou faʼahiga maʼuli faitotonu, ʼe ina fakatatau ki te faʼahi ʼaia. Kapau ʼe kotou faiga ke kotou nonofo agatonu kiā te ia, pea ʼe mole ina liʼaki anai koutou ʼi he temi! (Pesalemo 55:22) Ko te ʼu fakapapau fakalotofīmālie ʼaia ʼe mole natou fakamālohiʼi ai koa lā takotou tui ʼaē kiā Sehova pea mo tana ʼu fakatotonu faitotonu?

“TOU HIKI ATU KI TE KĀTOA ʼO TE ʼUHIGAʼI TAGATA”

9, 10. (a) He koʼē ʼe ko he fakatuʼutuʼu lelei maʼa te kau Kilisitiano hanatou aʼu ki te kātoa ʼo te ʼuhigaʼi tagata? (b) Kapau ʼe tou manatu fakalaumālie pea ʼe tokoni feafeaʼi mai ke tou fiafia?

⁹ Ko te lua faʼahi ʼo takotou gāue ʼaē ʼe kotou fai kiā koutou totonu, ʼe hā mai ʼi te ʼu palalau ʼaenī neʼe tohi ʼaki te takitaki ʼa te ʼAtua: “Tou hiki atu ki te kātoa ʼo te ʼuhigaʼi tagata.” (Hepeleo 6:1) Ko he fakatuʼutuʼu lelei ki he Kilisitiano ia hana hiki ki te kātoa ʼo te ʼuhigaʼi tagata. ʼO mole hagē ko he faiga ʼa he tahi ke ina maʼu ia te ʼuhiga haohaoa, ʼaē ʼi te temi nei ʼe mole heʼeki feala ke aʼu kiai he tahi, kae ko te faiga ʼaē ki te kātoa ʼo te ʼuhigaʼi tagata ʼe ko he fakatuʼutuʼu ia ʼe lavaʼi e te tagata. Tahi ʼaē meʼa, ʼe maʼu e te kau Kilisitiano ia he fiafia ʼe lahi age ʼi tanatou tauhi ʼaē kiā Sehova mokā natou aʼu ki te kātoa ʼo te ʼuhigaʼi tagata. Koteā tona tupuʼaga?

¹⁰ Ko he Kilisitiano kua kātoa ʼi tona ʼuhigaʼi tagata ʼe manatu ia ohagē ko Sehova. (Soane 4:23) Neʼe tohi fēnei e Paulo: “Ko nātou ʼaē ʼe natou mulimuli ki te kakano ʼe natou manatu ki te ʼu meʼa ʼo te kakano, kae ko nātou ʼaē ʼe natou mulimuli ki te laumālie, ʼe natou manatu ki te ʼu meʼa ʼo te laumālie.” (Loma 8:5) ʼE mole lahi ia te fiafia ʼo ia ʼaē ʼe manatu fakatagata, heʼe manatu pē ia kiā ia totonu, ʼo mole sio mamaʼo ia, pea ʼe tokaga tāfito ia ki te ʼu koloa fakakelekele. Ko ia ʼaē ʼe manatu fakalaumālie, ʼe fiafia ia, heʼe tokaga tāfito pē ia kiā Sehova, “te ʼAtua fiafia.” (1 Timoteo 1:11) Ko ia ʼaē ʼe manatu fakalaumālie ʼe holi ke ina fakafiafia ia Sehova pea ʼe fiafia ia, logolā ia tana tau ʼaē mo ni ʼu faigataʼaʼia. Koteā tona tupuʼaga? Heʼe ʼi te ʼu ʼahiʼahi ʼe tou maʼu ai ia he ʼu faigamālie ke tou fakamoʼoni ko Satana ʼe gutuloi pea ʼe tou ako ai ia te nofo agatonu, ʼo fiafia ai tatatou Tamai ʼaē ʼe ʼi selō.—Tāʼaga Lea 27:11; Sake 1:2, 3.

11, 12. (a) Koteā ʼaē neʼe ʼui e Paulo ʼo ʼuhiga mo “te ʼu fealagia fakakaukau” ʼo he Kilisitiano, pea koteā te fakaʼuhiga ʼo te kupu “akoako”? (b) Koteā te akoako ʼe tonu ke fai ki te sino ke liliu ʼo mālohi?

¹¹ ʼE hoki tou maʼu ia he manatu fakalaumālie pea mo aʼu ki te kātoa ʼo te ʼuhigaʼi tagata mo kapau ʼe tou akoako. Tou vakaʼi ia te vaega ʼaenī: “Ko te meʼa kai fefeka ʼe ʼa nātou ʼaē kua kātoa tonatou ʼuhigaʼi tagata, ʼa nātou ʼaē, ʼaki tanatou fakaʼaogaʼi, kua natou maʼu te ʼu fealagia fakakaukau kua akoako ke natou ʼiloʼi ai te meʼa ʼaē ʼe lelei pea mo te meʼa ʼaē ʼe kovi.” (Hepeleo 5:14) ʼI te ʼui ʼaē e Paulo kua “akoako” totatou ʼu fealagia fakakaukau, neʼe ina fakaʼaogaʼi ia te kupu Fakakeleka neʼe fakaʼaogaʼi ʼi te ʼu fale gaoʼi ʼo te ʼuluaki sēkulō ʼi Keleka, heʼe feala ke fakaliliu fēnei: ‘Akoako ohagē ko he tagata faigaoʼi.’ ʼI te temi nei tou vakaʼi age muʼa ia te fakaʼuhiga ʼo te taʼi akoako ʼaia.

¹² ʼI tatatou tutupu ake, neʼe mole akoako totatou sino. Ohagē lā, ko he kiʼi toe kei meamea ʼe mole heʼeki poto lelei ʼi te fakaʼaogaʼi ʼo tona ʼu nima pea mo tona ʼu vaʼe. Koia, ʼe lagi ina fetāʼaki anai tona ʼu nima, pea mo tā tona fofoga, ʼo feala ai pē kiā ia totonu ke punamaʼuli pea mo mamahi ai. Kae ʼaki te temi, ʼi tana kua ʼiloʼi leva ia te ʼu koga ʼo tona sino, kua poto ia ʼi tona fakaʼaogaʼi. ʼE kamata totolo te kiʼi toe, ʼosi ʼaia pea haʼele, ki muli age leva ʼi tana kua lahi kua lele ia.a ʼE feafeaʼi ki he tahi ʼe faigaoʼi? Kā kotou sisio ki te tagata faigaoʼi ʼaia ʼe hopo pea mo takaminomino faigafua ʼi te ʼaele, ʼe mahino ia kiā koutou neʼe akoako e te tagata ʼaia tona sino ʼi he temi loaloaga. Neʼe mole hoko maʼu e te tagata faigaoʼi ia tona faiva ʼaia, kae ʼe mahino ia neʼe ina fakaʼaogaʼi ki te faʼahi ʼaia ia he temi fualoa. ʼE ʼui ʼi te Tohi-Tapu ʼo ʼuhiga mo te akoako ʼaia ʼo te sino “ ʼe ʼaoga veliveli pē.” ʼE maʼuhiga age ia te akoako ʼo totatou ʼu fealagia fakakaukau fakalaumālie!—1 Timoteo 4:8.

13. ʼE tou lava akoako feafeaʼi ia totatou ʼu fealagia fakakaukau?

¹³ ʼI te tohi ʼaenī, neʼe lahi tatatou palalau ʼo ʼuhiga mo te ʼu meʼa ʼaē kā tokoni atu ke kotou akoako tokotou ʼu fealagia fakakaukau ke feala ai hakotou nonofo agatonu kiā Sehova ohagē ko he tahi ʼe manatu ki te ʼu faʼahi fakalaumālie. Kotou vakavakaʼi ʼi te faikole ia te ʼu pelesepeto pea mo te ʼu lao fakaʼatua mokā kotou fai he ʼu tonu ʼi tokotou maʼuli. ʼI te ʼu tonu fuli ʼaē kā kotou fai, kotou fai ia te ʼu fehuʼi ʼaenī kiā koutou totonu: ‘Ko te lao peʼe ko te pelesepeto fea ʼi te Tohi-Tapu ʼaē ʼe fakaʼuhiga kiai ia te faʼahi ʼaenī? ʼE feafeaʼi anai haku fakaʼaogaʼi ʼi toku maʼuli? Koteā te aga ʼaē kā fiafia ai taku Tamai ʼaē ʼe ʼi selō?’ (Tāʼaga Lea 3:5, 6; Sake 1:5) Ko te ʼu tonu fuli ʼaē kā kotou fai fēia, ʼe ina akoako anai ki muli age tokotou ʼu fealagia fakakaukau. Ko te akoako ʼaia ʼe tokoni atu anai ke kotou liliu ʼo kātoa ʼi tokotou ʼuhigaʼi tagata fakalaumālie pea mo kotou taupau ia te faʼahi ʼaia.

14. Koteā ʼaē ʼe tonu ke tou fia kai kiai ke tou tuputupu ʼi te faʼahi fakalaumālie, kae koteā ʼaē ʼe tonu ke tou tōkakaga kiai?

¹⁴ Tatau aipē pe kua aʼu he tahi ki te kātoa ʼo te ʼuhigaʼi tagata, kae ʼe tonu ke tuputupu tuʼumaʼu pē ʼi te faʼahi fakalaumālie. ʼE fakalogo ia te tuputupu fakasino ʼa he tahi ki tana kai. Koia neʼe tohi fēnei e Paulo: “Ko te meʼa kai fefeka ʼe ʼa nātou ʼaē kua kātoa tonatou ʼuhigaʼi tagata.” Ko te faʼahi maʼuhiga ʼaē ke mālohi ai takotou tui, ke kotou haga kai ki te meʼa kai fakalaumālie fefeka. Kā kotou maʼuliʼi fakalelei ia te ʼu meʼa ʼaē ʼe kotou ako, ʼe ko te poto ʼaia, pea ʼe ʼui fēnei ʼi te Tohi-Tapu: “Ko te poto ʼe ko te meʼa ʼaē ʼe maʼuhiga tāfito.” Koia ʼe ʼaoga ai ke tou fakatuputupu iā tātou ia te fia kai ʼaē ki te ʼu moʼoni maʼuhiga ʼaē ʼe foaki mai e tatatou Tamai. (Tāʼaga Lea 4:5-7; 1 Petelo 2:2) ʼE mahino ia, tatau aipē peʼe tou tuputupu ʼi te ʼatamai mālama pea mo te poto fakaʼatua kae ʼe mole tonu ke tou gata ai peʼe tou fialahi ai. Tou sivisivi tuʼumaʼu ia tātou ke ʼaua naʼa aka pea mo tuputupu ʼi totatou loto ia te fialahi peʼe ko ʼihi atu ʼu vaivaiʼaga. Neʼe tohi fēnei e Paulo: “Kotou haga ʼahiʼahiʼi ia koutou ke kotou ʼiloʼi peʼe kotou nonofo ʼi te tui, kotou sivisivi tuʼumaʼu peʼe koteā tokotou ʼuhiga totonu.”—2 Kolonito 13:5.

15. He koʼē ʼe maʼuhiga ia te ʼofa ke tou tuputupu ʼi te faʼahi fakalaumālie?

¹⁵ Kua lagi ʼosi pē ia te laga ʼo te fale, kae ʼe kei ʼi ai pē te ʼu kihiʼi gāue ke fai. Ko te taupau ʼaē ʼo te ʼapi ke lelei pea mo te ʼu faʼahi ke toe gaohi ʼe ko he ʼu gāue maʼuhiga, pea ʼe lagi tonu ke toe fakalahi age te fale ʼuhi heʼe kua fetogi te ʼaluʼaga. Koteā ʼaē ʼe ʼaoga ke tou fai ke tou kātoa ʼi totatou ʼuhigaʼi tagata pea mo puipui ia totatou maʼuli fakalaumālie? Ko te meʼa tāfito ʼaē ʼe tonu ke tou maʼu ʼe ko te ʼofa. ʼE tonu ke tuputupu aipē ia totatou ʼofa ʼaē kiā Sehova pea mo totatou ʼu tehina mo tuagaʼane. Kapau ʼe mole tou maʼu ia te ʼofa, pea ʼe mole ʼi ai anai he ʼuhiga ʼo te toe ʼatamai mālama ʼaē ʼe tou maʼu pea mo te ʼu gāue fuli ʼaē ʼe tou fai. (1 Kolonito 13:1-3) ʼAki te ʼofa, ʼe feala ke tou aʼu ki te kātoa ʼo te ʼuhigaʼi tagata Kilisitiano pea mo tou haga tuputupu ʼi te faʼahi fakalaumālie.

TOU TAUPAU MAʼU IA TE FALALA ʼAĒ ʼE FOAKI MAI E SEHOVA

16. Ko te faʼahiga fakakaukau fea ʼaē ʼe loto e Satana ke maʼu e te hahaʼi, pea koteā ʼaē ʼe foaki mai e Sehova ke tou lava tauʼi ai?

¹⁶ Tou vakaʼi age muʼa ia te tahi age faʼahi ʼi te gāue ʼaē ʼe kotou fai. Ke feala hakotou lagaʼi ake ia koutou ke kotou liliu ko he tisipulo moʼoni ʼa Kilisito, ʼe tonu ke kotou tōkakaga ki takotou faʼahiga fakakaukau. Ko Satana, te pule ʼo te mālamanei, ʼe faiva ia ʼi te fakaliliu ʼo te hahaʼi ke natou maʼu he ʼu fakakaukau ʼe mole lelei, ʼo natou lotovaivai, ʼo mole kei natou loto falala, pea mo heʼe ʼamanaki. (Efesi 2:2) Ohagē pē ko te popo ʼo te ʼu papa ʼo te fale, ʼe fakatupu tuʼutāmaki ki he Kilisitiano ia te taʼi fakakaukau ʼaia. Kae meʼa fakafiafia, heʼe foaki mai e Sehova ia te meʼa maʼuhiga ke tou lava tauʼi ai ia te ʼu fakakaukau ʼaia, ʼe ko te falala.

17. Koteā te fakatā ʼaē ʼe fakaʼaogaʼi ʼi te Folafola ʼa te ʼAtua moʼo fakahā ia te maʼuhiga ʼo te falala?

¹⁷ ʼE tohi ʼi te Tohi-Tapu ia te ʼu koga kehekehe ʼo te teu tau fakalaumālie ʼaē ʼe ʼaoga kiā tātou moʼo tauʼi ia Satana pea mo te mālamanei. Ko he koga maʼuhiga ʼo te teu tau ʼe ko te puloga, “te falala ki te maʼuli.” (1 Tesalonika 5:8) ʼI te temi muʼa neʼe ina ʼiloʼi e he tagata sōlia ʼe mate anai ʼi te tau mo kapau ʼe mole hona puloga. Neʼe faʼu ia te puloga ʼaki te ukamea pea neʼe tui ʼi loto ia he moʼi kie peʼe ko he kapa, ʼo puipui ai te ʼulu mai te ʼu tuʼuga meʼa ʼaē neʼe lī ifo, ʼo mole lavea ai te tagata sōlia. Ohagē ko te puipui ʼaē e te puloga ia te ʼulu, ʼe toe fēia ki te falala ʼe feala ke ina puipui ia tokotou ʼatamai.

18, 19. Koteā te faʼifaʼitaki ʼaē neʼe tuku mai e Sesu ʼi tana taupau tana falala, pea ʼe tou lava faʼifaʼitakiʼi feafeaʼi ia ia?

¹⁸ Neʼe tuku e Sesu ia te faʼifaʼitaki tāfito ʼo ʼuhiga mo te taupau ʼo te falala. Kotou manatuʼi ia te ʼu mamahi ʼaē neʼe ina kātakiʼi ʼi te pō fakaʼosi ʼo tona maʼuli ʼi te kele. Neʼe ko tona kaumeʼa lelei ʼaē neʼe ina lavakiʼi ia ia ke tupu ai hana maʼu ʼo hana falā. Neʼe fakafisi tona tahi kaumeʼa kiā te ia. Ko ʼihi atu neʼe natou liʼaki ia ia pea mo feholaki. Ko te hahaʼi ʼo tona kolo totonu neʼe fakafeagai kiā te ia, ʼo natou kalagaʼi ke matehi ia ia ki he pou fakamamahi e te kau sōlia Loma. ʼE mahino ia neʼe tauʼi e Sesu ia te ʼu ʼahiʼahi lahi ʼe lagi mole hoko anai kiā tātou ʼi he temi. Koteā ʼaē neʼe tokoni kiā te ia? ʼE tali fēnei ia Hepeleo 12:2: “ ʼUhi ko te fiafia ʼaē neʼe fakapapauʼi age kiā te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua.” Neʼe tokagaʼi tuʼumaʼu pē e Sesu ia “te fiafia ʼaē neʼe fakapapauʼi age kiā te ia.”

¹⁹ Koteā te fiafia ʼaē neʼe fakapapauʼi age kiā Sesu? Neʼe mahino kiā ia kapau ʼe ina kātakiʼi te ʼu mamahi ʼaia, pea ʼe lagolago ai anai ki te tapuhā ʼo te huafa taputapu ʼo Sehova. ʼE ina foaki ai anai ia he toe fakamoʼoni lahi, ko Satana ʼe gutuloi. Neʼe mole ʼi ai he tahi age falalaʼaga neʼe feala ai kiā Sesu ke fakafiafia ʼaupitō ai! Neʼe ina toe ʼiloʼi foki ʼe fakapale lahi anai e Sehova tana nofo agatonu ʼaia, ʼi te temi taulekaleka ʼaē kā toe fakatahi ai anai mo tana Tamai. Neʼe manatuʼi e Sesu ia te falala fakafiafia ʼaia ʼi te ʼu temi faigataʼa ʼaupitō ʼaia. ʼE tonu mo tātou ke tou fai fēia. ʼE tou falala mo tātou ki te fiafia ʼaia kā tou maʼu anai. Ko Sehova ʼe ina fakamaʼuhigaʼi ia tātou takitokotahi ʼaki te pilivilēsio ʼaē ke tou lagolago ki te tapuhā ʼo tona huafa lahi. ʼE tou fakamoʼoni ko Satana ʼe gutuloi mo kapau ʼe tou fakahā ko Sehova ʼe ko totatou Tuʼi pea mo tou nonofo maʼu ʼi te ʼofa ʼo tatatou Tamai, logolā ia te ʼu faigataʼaʼia pea mo te ʼu fakahala ʼaē ʼe feala ke hoko mai kiā tātou.

20. Koteā ʼaē kā tokoni atu ke kotou taupau he manatu ʼe lelei pea mo he loto falala?

²⁰ ʼE mole loto pē ia Sehova ke ina fakapale tana kau kaugana agatonu, ʼe fakaʼamu ia ke ina fai te faʼahi ʼaia. (Isaia 30:18; Malakia 3:10) ʼE fiafia ʼi te foaki ki tana kau kaugana te ʼu meʼa lelei ʼaē ʼe holi kiai tonatou loto. (Pesalemo 37:4) Koia kotou taupau maʼu ia te falala ʼaē kā ʼamanaki hoko. ʼAua naʼa kotou maʼu ia te fakakaukau kovi pea mo hala ʼo te mālama ʼa Satana. Kapau ʼe kotou logoʼi ko te laumālie ʼo te mālamanei ʼe hū māmālie ki tokotou ʼatamai peʼe ki tokotou loto, kotou faikole fakamālotoloto kiā Sehova ke ina foaki atu ia “te tokalelei ʼa te ʼAtua, ʼaē ʼe māʼoluga ake ʼi te ʼu manatu fuli.” Ko te ʼAtua ʼaia ʼaē ʼe ina foaki ia te tokalelei ʼe ina taupau anai tokotou loto pea mo tokotou ʼatamai.—Filipe 4:6, 7.

21, 22. (a) Ko te ʼamanaki fakakolōlia fea ʼaē ʼe fakaʼamu kiai “te toe hahaʼi tokolahi”? (b) Ko te faʼahi fea ʼo te falala ʼa te Kilisitiano ʼaē ʼe fakaʼuhiga tāfito kiā koutou, pea koteā ʼaē ʼe kotou fakatotonu ke kotou fai?

²¹ Ko he toe falala fakafiafia ʼaia ʼaē ʼe tonu ke kotou fakakaukau kiai! Kapau ʼe kotou kau ki “te toe hahaʼi tokolahi,” ʼaē ʼe “ ʼomai [anai] mai te mamahi lahi,” kotou fakakaukauʼi age muʼa ia te maʼuli ʼaē kua vave pē hakotou maʼu. (Fakahā 7:9, 14) ʼI te pulihi ʼo Satana pea mo tana kau temonio, ʼe kotou logoʼi anai ia he fīmālie ʼe heʼeki kotou logoʼi ʼi totatou temi. ʼE ʼi ai koa he tahi iā tātou neʼe hao mai te fakaneke kovi ʼa Satana? ʼE kei hoko atu pē ia te fakaneke ʼaia, kae ʼi te kā haʼu ʼe ko he toe fiafia lahi anai hatatou gāue ʼi te takitaki ʼa Sesu pea mo tana toko 144 000 kau kaugā hau ki te fakaliliu ʼo te kele ko he palatiso! ʼE tou fiafia lahi ʼi hatatou ʼamanaki sio ki te pulihi ʼo te mahaki fuli pea mo te māʼimoa fuli, mo hatatou tali ia nātou ʼaē neʼe tou ʼoʼofa ai mokā fakatuʼuake anai, pea mo tou māʼuʼuli anai ohagē ko tona fakatuʼutuʼu e te ʼAtua. ʼI tatatou fakaʼau ki te ʼuhiga haohaoa, kua tou fakaovi anai ki te fakapale ʼe lahi age anai, ia te fakapapau ʼaē ʼe fakahā mai iā Loma 8:21: “Te ʼāteaina fakakolōlia ʼo te fānau ʼa te ʼAtua.”

²² ʼE loto ia Sehova ke kotou maʼu he ʼāteaina ʼe lahi age. ʼE fakalogo takotou maʼu ia te ʼāteaina ʼaia ki takotou fakalogo. ʼE mole tuha koa lā ke kotou faiga lahi ʼi te temi nei ke kotou fakalogo kiā Sehova ʼi te ʼaho fuli? Koia kotou laga ia koutou ki takotou tui māʼoniʼoni ʼaupitō, ke feala hakotou nonofo ʼi te ʼofa ʼo te ʼAtua ki te heʼegata!