Ke Hoko Atu ʼAu Faiga

ʼI tau ako te tohi ʼaeni, neʼe lahi te ʼu faʼahi neʼe ke ako ʼo ʼuhiga mo Sehova. Pea ʼe mahino ia, neʼe lahi tou ʼofa kia te ia ʼo ke foaki ai tou maʼuli kia te ia pea mo papitema. Kapau ʼe mole koia, ʼe lagi ke fakatuʼutuʼu anai ke hoki ke fai ki ʼamuli. Kae ʼe mole gata pe ʼau faiga ʼi te ʼaho ʼae neʼe ke papitema ai. ʼE feala tau fakaovi tuʼumaʼu kia Sehova ʼi tou maʼuli katoa. ʼO feafeaʼi?

1. He koʼe ʼe tonu ke ke haga fakamalohiʼi ʼau felogoi lelei mo Sehova?

ʼE tonu ke hoko atu ʼatatou faiga moʼo fakamalohiʼi ʼatatou felogoi mo Sehova. Kotea tona tupuʼaga? “Ke ʼaua naʼa tou tafea.” (Hepeleo 2:1) Kotea ʼe tokoni mai ke tou nofo agatonu kia Sehova? ʼE ko tatatou maʼumaʼua ʼi te gaue faifakamafola pea mo kumi ʼihi atu aluʼaga ke lahi age tatatou tauhi ki te ʼAtua. (Lau ia Filipe 3:16.) Ka tou tauhi kia Sehova, ʼe ko te faʼahiga maʼuli ʼaia ʼe lelei tukupau.—Pesalemo 84:10.

2. Kotea te tahi aluʼaga ʼe tonu ke ke haga fai?

Logo la kua ʼosi tau ako, kae ʼe kei hoko atu pe tau fai he ʼu fetogi ʼi tou ʼuhiga Kilisitiano. ʼE ui ʼi te Tohi-Tapu ʼe tonu ke tou “kofuʼi ia te ʼulugaaga foʼou.” (Efeso 4:23, 24) Ka ke haga ako te Folafola ʼa te ʼAtua pea mo kau ki te ʼu fono, ʼe lahi age anai te ʼu faʼahi ʼe ke ako ʼo ʼuhiga mo Sehova mo ʼona kalitate. Faiga pe ʼe feafeaʼi hau faʼifaʼitakiʼi lelei ia tona ʼuluagaaga. Ke hoko atu tau fai ia fetogi fuli ʼi tou maʼuli moʼo fakafiafiaʼi ia Sehova.

3. ʼE tokoni feafeaʼi atu anai ia Sehova ke ke tuputupu?

ʼE ui fenei ʼi te Tohi-Tapu: “Ko te ʼAtua . . . ʼe ina fakakatoa anai e ia totonu takotou akoako. ʼE ina fakalotomalohiʼi anai koutou, ʼe tokoni atu anai ke kotou nonofo agatonu, pea mo ina fakatuʼu malohi anai koutou.” (1 Petelo 5:10) ʼE fakahalaʼi ia tatou fuli ke tou fai ni meʼa ʼe kovi. Kae ʼe foaki mai pe e Sehova te malohi ke tou lava tekeʼi te faʼahi ʼaia. (Pesalemo 139:23, 24) ʼE ina fakapapau mai ʼe ina foaki mai te holi mo te malohi ʼae ke tou tauhi agatonu kia te ia.—Lau ia Filipe 2:13.

TA FAKALOLOTO

4. Felogoi tuʼumaʼu mo tou Kaumeʼa lelei

ʼE tokoni atu anai te faikole mo tau ako te Tohi-Tapu ke ke kaumeʼa mo Sehova. ʼE tokoni feafeaʼi atu te ʼu aluʼaga ʼaia ke ke fakaovi lahi age kia te ia?

Lau ia Pesalemo 62:8, pea fai te fehuʼi ʼaeni:

• ʼE feafeaʼi hau hikihiki ʼau faikole moʼo fakamalohiʼi ʼau felogoi lelei mo Sehova?

Lau ia Pesalemo 1:2 mo te nota, pea fai te fehuʼi ʼaeni:

• E feafeaʼi hau hikihiki tau faʼahiga lau te Tohi-Tapu moʼo fakamalohiʼi ʼau felogoi mo Sehova?

Kotea ʼe feala ke ke fai ke lahi age tau leleiʼia tau ako tokotahi? Kapau ʼe ke fia maʼu he ʼu tokoni ki ai, vakaʼi te ʼATA VITEO, pea fai te ʼu fehuʼi ʼae ʼe hoa mai.

ʼATA VITEO: ʼE Feafeaʼi Hau Hikihiki Tau Ako Tokotahi? (5:22)

• Kotea he ʼu tokoni ʼe feala hau mulimuli ki ai?

• Kotea te ʼu manatu tafito ʼe ke fia ako anai?

5. Fai hau ʼu fakatuʼutuʼu fakalaumalie

ʼE ke haga tuputupu anai mo kapau ʼe ke fai hau ʼu fakatuʼutuʼu. Vakaʼi te ʼATA VITEO, pea fai te fehuʼi ʼae ʼe hoa mai.

ʼATA VITEO: Te Maʼuli ʼAe ʼe Lelei Tokotahi (3:31)

• Kotea te ʼu lelei neʼe maʼu e Cameron ʼi tana fai he ʼu fakatuʼutuʼu fakalaumalie?

ʼE mole feala ke tou olo fuli ʼo faifakamafola ʼi he tahi age fenua. Kae ʼe feala ke tou fai he ʼu fakatuʼutuʼu ʼe tou lava fakahoko. Lau ia Taʼaga Lea 21:5, pea mo fakakaukauʼi he ʼu fakatuʼutuʼu ʼe feala ke ke fai . . .

• ʼi te kokelekasio.

• ʼi te faifakamafola.

ʼE tokoni feafeaʼi atu te pelesepeto ʼaeni ke ke lava fakahoko ʼau fakatuʼutuʼu?

Te ʼu fakatuʼutuʼu ʼe feala ke ke fakahoko

• Hikihiki ʼau faʼahiga faikole.

• Lau te Tohi-Tapu katoa.

• Ke ke iloʼi lelei ia natou ʼo tau kokelekasio.

• Kamata mo fai hau ako Tohi-Tapu.

• Ke ke pionie vaeluaʼi temi peʼe katoa.

• Kapau ko koe ko he tehina, faiga ke ke liliu ko he tagata faifekau fakaminisitelio.

MANATU TAFITO

Ke ke haga fakamalohiʼi ʼau felogoi lelei mo Sehova pea mo fai haʼu fakatuʼutuʼu fakalaumalie. Pea ʼe ke maʼuli fiafia anai ʼo heʼe gata.

Fehuʼi Fakamanatu

• He koʼe ʼe ke tui papau ʼe tokoni atu anai ia Sehova ke ke tauhi agatonu kia te ia?

• ʼE feafeaʼi hau fakamalohiʼi ʼau felogoi lelei mo Sehova?

• He koʼe ʼe ke tuputupu anai moka ke fai hau ʼu fakatuʼutuʼu fakalaumalie?

TE TAHI ʼU MANATU

Kotea ʼae ʼe maʼuhiga age kia Sehova ʼe ko tau fai he meʼa fakaofoofo peʼe ko tau nofo agatonu kia te ia?

Tou Agatonu Ohage Ko Apalahamo (9:20)

ʼE feala ki he kaugana agatonu ʼa Sehova ke puli tona fiafia. Kotea ʼe feala ke ina fai ke ina toe maʼu?

Toe Maʼu Te Fiafia ʼi Tau Ako Mo Metitasio (5:25)

ʼE feafeaʼi hau fai hau ʼu fakatuʼutuʼu fakalaumalie pea mo lava fakahoko?

“Fakaʼaogaʼi He ʼu Fakatuʼutuʼu Fakalaumālie Moʼo Faka Kolōliaʼi Tou Tupuʼaga” (Ko Te Tule Leʼo ʼaho 15 ʼo Sulio 2004)

He koʼe ʼe maʼuhiga ke tou liliu ko he Kilisitiano kua fakapotopoto? Pea ʼe feafeaʼi hatatou kakusia ia te faʼahi ʼaia?

“Tou Hiki Atu Ki Te Kātoa ʼo Te ʼUhigaʼi Tagata—‘Ko Te ʼAho Lahi ʼo Sehova Kua Ovi Mai’” (Ko Te Tule Leʼo ʼaho 1 ʼo Maio 2009)