Ko Te Fiafia ʼa Sehova ʼe Ko Totatou Tule Mālohi
“Ko te ʼaho ʼaia ʼe maʼoniʼoni ki totatou ʼAliki, pea ʼaua naʼa koutou lotomamahi, heʼe ko te fiafia ʼa Sehova ʼe ko tokotou tule mālohi.”—Nehemia 8:10.
1, 2. (a) Koteā te faka ʼuhiga ʼo te tule mālohi? (b) Neʼe feafeaʼi te fakahā e Tavite neʼe nono ia ia Sehova?
KO SEHOVA ʼe ko te tule mālohi ʼe mole maʼu hona fakatatau. Pea ʼe koteā te faka ʼuhiga ʼo he tule mālohi? ʼE ko he tuʼulaga mālohi, ʼe ko he koga meʼa tokalelei peʼe ko he hāofakiʼaga. ʼI te Iselaele ʼāfea ko Tavite neʼe ina faka ʼuhigaʼi ia te ʼAtua ko tona tule mālohi. Ohage la, koutou fakatokagaʼi te hiva ʼaē neʼe fai e Tavite ki te Māʼoluga “ ʼi te ʼu ʼaho ʼaē neʼe hāofaki ai ia ia e Sehova mai te ʼalofi nima ʼo tona ʼu fili fuli pea mo te nima ʼo Saulo,” te hau ʼo Iselaele.—Pesalemo 18, ʼe tohi ʼi ʼoluga.
2 Neʼe kamata e Tavite te hiva matalelei ʼaia ʼaki te ʼu kupu ʼaenī: “ ʼE ʼau ʼofa anai kia te koe, Ê Sehova toku mālohi! Ko Sehova ʼe ko toku Maka, pea mo toku tule mālohi, pea ʼe ko Ia ʼaē ʼe ina foaki mai ke ʼau hāo. Ko toku ʼAtua ʼe ko toku mata maka. ʼE ʼau nono anai ia te ia, ko taku meʼa tali tau, pea ko toku tala moʼo hāofaki, toku holaʼaga.” (Pesalemo 18:1, 2) ʼAki te lauhala e te Hau ko Saulo ko Tavite ʼe fakafeagai ki te ʼu lao pea ʼaki tana faiga ʼaē ke ina maʼu ia Tavite, neʼe nono Tavite ia Sehova, ohage pe ko he tahi ʼe feala ke lele ki he koga meʼa mālohi ke hāo mai te tuʼutāmaki.
3. He koʼe koa ko te kau Sutea ʼo te ʼaho ʼo Esitalasi neʼe nātou maʼu te “fiafia lahi”?
3 Ko te fiafia ʼaē ʼe foaki e Sehova ʼe ko he tule mālohi ia maʼa nātou ʼaē ʼe haʼele agatonu ʼi tona ala, ʼo mole feala hona holoʼi. (Tāʼaga Lea 2:6-8; 10:29) ʼIo moʼo maʼu te fiafia ʼaē ʼe foaki e te ʼAtua, ko te hahaʼi ʼe tonu ke nātou fai te finegalo ʼo te ʼAtua. ʼO ʼuhiga mo te faʼahi ʼaia, koutou fakatokagaʼi age te meʼa ʼaē neʼe hoko ʼi Selusalemi ʼi te 468 ʼi muʼa ʼo totatou temi. Ko te tagata hiki tohi ko Esitalasi pea mo ʼihi neʼe nātou fakahā te ʼatamai ʼaki he lau pea mo he fakamahino lelei ʼo te Lao. Koia ko te hahaʼi neʼe fakaloto mālohiʼi fēnei: “Koutou ʼolo, koutou kai te ʼu meʼa gako pea mo koutou ʼinu te ʼu meʼa malie, pea ke koutou fakamomoli kia ia ʼaē neʼe mole teuteuʼi hana meʼa he ʼu vahe; heʼe ko te ʼaho ʼaia ʼe maʼoniʼoni ki totatou ʼAliki, pea ʼaua naʼa koutou lotomamahi, heʼe ko te fiafia ʼa Sehova ʼe ko tokotou tule mālohi ʼaia.” Neʼe maʼu te “fiafia lahi” e te kau Sutea ʼuhi ko tanatou maʼuliʼi te ʼu lao ʼaē neʼe nātou mālama kiai pea mo tanatou fai te ʼAho Lahi fakafiafia ʼo te ʼu Fale Lau. (Nehemia 8:1-12) Ko nātou ʼaē ʼe ia nātou ‘te fiafia ʼa Sehova ohage ko honatou tule mālohi’ ʼe fakamāʼopoʼopo fakalelei nātou ki tana tauhi pea mo tana gāue. ʼUhi ko te fiafia ʼa Sehova neʼe ko tonatou tule mālohi, ʼe tonu anai ke tou ʼamanaki ko te hahaʼi ʼa te ʼAtua ia ʼaho nei ʼe tonu ke nātou fiafia. Koia, koteā he faʼahiga tupuʼaga ke tou fiafia ai ʼi te temi nei?
“Ke Ke Fiafia Pe”
4. Koteā te tahi matapuna fakaofoofo ki te fiafia ʼa te hahaʼi ʼa Sehova?
4 Ko te tupuʼaga fakaofoofo ke tou fiafia ai, ʼe ko te fakatuʼutuʼu ʼaē ʼe fai e Sehova moʼo fakatahiʼi tana hahaʼi. Ko te ʼu fakatahi ʼa te kau Fakamoʼoni ʼa Sehova ʼe nātou foaki te fiafia kia nātou ia ʼaho nei, ohage ko te ʼu ʼaho lalahi ʼi te taʼu fuli ʼaē neʼe fai e te kau Iselaelite neʼe fakatupu fiafia ki tonatou ʼu loto. Neʼe ʼui fēnei age ki te hahaʼi ʼo Iselaele: “Lolotoga ʼaho e fitu ʼe fai anai te lafeti [ʼo te ʼu fale lau] maʼa Sehova tou ʼAtua, ʼi te koga meʼa ʼaē ʼe fili anai e Sehova, he ko Sehova tou ʼAtua, ʼe ina tapuakina anai koe ia meʼa fuli ʼo tau ʼu gāue pea mo te gāue fuli pe ʼo tou nima, pea ʼe tonu anai ke ke fiafia pe.” (Teutalonome 16:13-15) Ei, ko te ʼAtua neʼe loto ke “[nātou] fiafia pe.” Ko te meʼa pe ʼaia ʼe toe moʼoni ʼo ʼuhiga mo te kau Kilisitiano, koia ʼaē neʼe fakaloto mālohiʼi ai e te ʼapositolo ko Paulo te ʼu kaugā fagona, ʼo fēnei: “Koutou fakafiafia tuʼumaʼu ʼi te ʼAliki. ʼE ʼau toe liuga atu: ke koutou fakafiafia!”—Filipe 4:4.
5. (a) Koteā te faka ʼuhiga ʼo te fiafia, pea e feafeaʼi tona maʼu e te kau Kilisitiano? (b) ʼE lava feafeaʼi ke tou maʼu te fiafia logope la te ʼu faigataʼaʼia?
5 Mai tona ʼaluʼaga ʼaē ko Sehova ʼe loto ke tou fiafia, ʼe ina foaki mai te fiafia ko he fua ʼaia ʼe kau ki te ʼu fua ʼo tona laumālie maʼoniʼoni. (Kalate 5:22, 23) Pea koteā te faka ʼuhiga ʼo te fiafia? ʼE ko te loto fīmālie ʼaē ʼe tupu mai te fakatalitali peʼe ko te maʼu ʼo he meʼa ʼe lelei pea mo matalelei. Ko te fiafia ʼe ko te ʼaluʼaga ʼo te manuʼia moʼoni, ʼo toe feiā pe mo te fakafiafia. Ko te fua ʼaia ʼo te laumālie maʼoniʼoni ʼo te ʼAtua ʼe tokoni kia tatou ʼi te ʼu faigataʼaʼia. “ ʼUhi ko te fiafia ʼaē neʼe fakapapau age kia te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua.” (Hepeleo 12:2) Neʼe tohi e te tisipulo ko Sake, ʼo fēnei: “Koutou faka ʼuhigaʼi ko he fiafia katoa, toku ʼu tēhina, mokā ʼe koutou felāveʼi mo he ʼu fakataga kehekehe, ke koutou ʼiloʼi ko te maʼuhiga ʼo takotou tui ʼaē kua ʼahiʼahiʼi ʼe ina fakatupu te faʼa kātaki.” Kae e feafeaʼi mo kapau ʼe mole tou ʼiloʼi pe koteā te meʼa ʼe tonu ke tou fai ʼo ʼuhiga mo he faʼahiga faigataʼaʼia? ʼE feala ʼi te temi ʼaia ke tou kole ʼaki he loto falala, ke ina foaki mai te poto kia tatou moʼo tauʼi te faigataʼaʼia ʼaia. ʼAki te gāue tahi mo te poto ʼaē mai selo, ʼe ina faka fealagia ai ke tou fakatokatoka te ʼu fihifihia peʼe ke tou ʼutaki ni ʼu faigataʼaʼia ʼo mole feala ai ke puli ia tatou te fiafia ʼa Sehova.—Sake 1:2-8.
6. E feafeaʼi te pipiki ʼo te fiafia ki te tauhi moʼoni?
6 Ko te fiafia ʼaē ʼe foaki e Sehova, ʼe ina fakamālohiʼi tatou, ke tou fakahaʼele te tauhi moʼoni. Neʼe ko te meʼa ʼaia neʼe hoko ʼi te ʼu ʼaho ʼo Nehemia pea mo Esitalasi. ʼI te temi ʼaia ko te kau Sutea ʼaē neʼe ia nātou te fiafia ʼo Sehova ohage ko honatou tule mālohi, neʼe ko he meʼa fakaloto mālohi kia nātou, ke nātou haga tokaga ki te ʼu meʼa ʼaē ʼe ʼaoga ki te tauhi moʼoni. Pea ʼaki tanatou fakahaʼele ʼaē ʼo te tauhi ʼa Sehova, neʼe tuputupu aipe tanatou fiafia. ʼO toe feiā pe mo te temi nei. ʼI totatou ʼuhiga kau atolasio ʼa Sehova, ʼe ʼi ai te fakatafitoʼaga ke tou fakafiafia lahi. Tou vakaʼi age nei he tahi age ʼu tupuʼaga ke tou fiafia ai.
Ko Te Felogoi Mo Te ʼAtua ʼAki Ia Kilisito
7. ʼO ʼuhiga mo Sehova, koteā te tupuʼaga ke fiafia ai te kau Kilisitiano?
7 Ko tatou ʼāteaina pe ʼe tou maʼu te fiafia makehe, ʼuhi ko tatatou ʼu felogoi lelei ʼaē mo Sehova. ʼI muʼa ʼo tatatou liliu ko he kau Kilisitiano, neʼe tou kau ʼi te sosiete fakatagata heʼe faitotonu ‘ ʼe fakapōʼuli te ʼatamai pea mo mamaʼo ʼi te maʼuli ʼaē ʼa te ʼAtua.’ (Efesi 4:18) ʼE ko he meʼa fakafiafia foki tatatou mole kei mamaʼo ia Sehova! ʼE moʼoni, ke tou maʼu tona ʼofa, ʼe tonu ke tou fai ni ʼu faiga ki te faʼahi ʼaia. ʼE tonu “ke koutou nonofo ʼi te tui, ʼo tutuʼu lelei ʼi te tafitoʼaga pea mo mālolohi pea mo ʼaua naʼa koutou mavae kehe ʼi te logo lelei ʼaē neʼe koutou fagono kiai.” (Kolose 1:21-23) ʼE feala ke tou fakafiafia ʼi te haga ʼa Sehova ʼo taki tatou ki tona ʼAlo, ʼo mulimuli pe ki te ʼu palalau ʼaenī ʼa Sesu: “ ʼE mole lava ki he tagata ke haʼu kia te ʼau gata pe mokā ko te Tāmai, ʼaē neʼe ina fekauʼi mai ʼau, ʼe ina taki mai kia te ia.” (Soane 6:44) Kapau ʼe tou leleiʼia ʼaupito totatou vāhaʼa mo te ʼAtua ʼaki ia Kilisito, ʼe tou tokakaga anai ke ʼaua naʼa maumauʼi e he meʼa te faʼahi ʼaia.
8. Neʼe feafeaʼi te lagolago ʼa Sesu ki totatou ʼuhiga fakalaumālie?
8 Ko te fakamolemole ʼo te ʼu agahala ʼaki te tui ʼaē ki te sakilifisio faitotogi ʼa Sesu, ʼe ko he tupuʼaga lahi ʼaia ke tou fiafia, koteʼuhi ʼe faka fealagia e te meʼa ʼaia tatatou felogoi mo te ʼAtua. ʼAki te talagataʼa ʼa Atama, ʼaē ko totatou kui, neʼe ina tuku hōlofa te agahala ki te malamanei katoa. Kae, ko te ʼapositolo ko Paulo neʼe ina fakamahinohino fēnei: “Ko te ʼAtua ʼe ina fakahā totonu mai tona ʼofa kia tatou ʼi te faʼahi ʼaenī ʼaē ko Kilisito neʼe mate maʼa tatou ka kei tou agahala.” Neʼe toe tohi e Paulo, ʼo fēnei: “Koia la ʼaē, ʼuhi ko te hala e tahi, neʼe ko te tautea neʼe tō ki te faʼahiga tagata kehekehe, ʼo toe feiā aipe ʼaki pe te fakatonuhia e tahi, ʼo ʼuhiga mo te faʼahiga tagata kehekehe ʼaē neʼe tala ai nātou ʼe nātou totonu ʼo ʼuhiga mo te maʼuli. ʼIo, ʼo toe feiā aipe, ʼaki te talagataʼa ʼa te tagata e tahi tokolahi neʼe tō ki te agahala, ʼo toe feiā aipe ʼaki te talagafua e tahi tokolahi neʼe liliu ko ni kau faitotonu.” (Loma 5:8, 18, 19) ʼE ko he meʼa fakafiafia te haga ʼa Sehova ʼAtua ʼo foaki te totogi maʼa te hākoga ʼo Atama, ke ina maʼu te ʼu taʼi fakatuʼutuʼu manavaʼofa ʼaia!
Ko Te ʼĀteaina Faka Lotu Pea Mo Te Faka Mālamagia
9. He koʼe ʼe tou fiafia ʼi te ʼaluʼaga ʼo te lotu?
9 Ko te ʼāteaina mai te Papiloni Lahi, te puleʼaga faka malamanei ʼo te lotu hala, ʼe ko he tahi tupuʼaga ʼaia ke tou fakafiafia ai. ʼE ko te moʼoni fakaʼatua ʼaē neʼe ina faka ʼāteaina tatou. (Soane 8:32) Pea ko te ʼāteaina mai te paomutu faka lotu ʼaia ko tona faka ʼuhiga ʼe mole tou kau ki tana ʼu agahala, ki tona ʼu malaʼia, pea mo te fakaʼauha ʼaē ka tō kia te ia. (Fakahā 18:1-8) ʼE mole he kovi ia ʼo takita hola kehe mai te ʼu meʼa fuli ʼaia!
10. Koteā te faka mālamagia ʼe tou maʼu ʼi totatou ʼuhiga hahaʼi ʼa Sehova?
10 Ko te mālama ki te Folafola ʼa te ʼAtua pea mo tona maʼuliʼi, ʼe ko he ʼu tupuʼaga ʼaia ʼo he fakafiafia lahi. ʼAki te ʼāteaina ʼi te fakahala ʼa te lotu hala, ʼe tou fakafiafia ʼi tatatou maʼu te fakasiosio fakalaumālie ʼe liliu māmālie pe ʼo mālama, neʼe foaki mai e tatatou Tāmai ʼe ʼi selo ʼaki “te tagata kaugana agatonu mo poto.” (Mateo 24:45-47) ʼI te hahaʼi fuli ʼaē ʼe maʼuʼuli ʼi te kele, ʼe gata pe kia nātou ʼaē ʼe kua foaki katoa tonatou maʼuli kia Sehova ʼe nātou maʼu tona laumālie maʼoniʼoni pea mo te mahino lelei ʼaē ki tana Folafola pea mo tona finegalo. Ohage pe ko te ʼui ʼa Paulo: “Heʼe ko tatou ʼaē neʼe fakahā kiai e te ʼAtua ʼaki tona laumālie, heʼe ko te laumālie ʼe ina sivisivi ia meʼa fuli pe, tatau aipe mo te ʼu meʼa loloto ʼa te ʼAtua.” (1 Kolonito 2:9, 10) ʼE tonu ke tou fakafetaʼi pea mo fakafiafia ʼo ʼuhiga mo tatatou maʼu te mālama ʼaē ʼe ʼāʼāsili age pe tatatou mahino kiai ohage ko tona fakahā ʼi te ʼu palalau ʼaē ia Tāʼaga Lea 4:18: “Kae ko te ala ʼo te kau faitotonu ʼe hage ko te mālama ʼo te ʼaho ʼaē ʼe mafaofao māmālie ʼo aʼu ki te katoa ʼo te mālama ʼo te ʼaho.”
Te ʼAmanaki ʼo ʼUhiga Mo Te Puleʼaga Pea Mo Te Maʼuli Heʼegata
11. Neʼe feafeaʼi te faka mafola ʼo te ʼamanaki fiafia ʼo ʼuhiga mo te Puleʼaga ki niʼihi age?
11 ʼE tou toe fiafia foki ʼuhi ko tatatou ʼamanaki ʼaē ki te Puleʼaga. (Mateo 6:9, 10) ʼI totatou ʼuhiga kau Fakamoʼoni ʼa Sehova, neʼe tou faka mafola ʼi te temi fualoa ko te Puleʼaga ʼo te ʼAtua ʼe ko te falalaʼaga pe ʼaia e tahi ʼa te malamanei katoa. Ohage la, koutou fakatokagaʼi te taʼu 1931, ʼi te temi ʼaē neʼe tou toʼo ai te higoa ʼaē ko te kau Fakamoʼoni ʼa Sehova, neʼe tali fakafiafia te higoa ʼaia ʼi te ʼu fakatahi e 51 ʼi te malamanei katoa. (Isaia 43:10-12) Ko te tonu ʼaia pea mo te fakatahi maʼuhiga ʼaē neʼe fai e J. F. Rutherford (neʼe ko te pelesita ʼo te Sosiete Watch Tower ʼi te temi ʼaia) neʼe tā ʼi te kaupepa (The Kingdom, the Hope of the World). ʼO kau ki te fakatahi ʼaia, te tahi tonu neʼe fai, ʼe ina tukugakoviʼi te Keletiate ʼuhi ko tana aga faka ʼapositasia pea mo tana meʼa noaʼi te tokoni ʼa Sehova. Neʼe ina toe ʼui pe foki fēnei: “Ko te falalaʼaga ʼo te malamanei ʼe ko te puleʼaga ʼo te ʼAtua, pea ʼe mole ʼi ai he tahi age falalaʼaga.” ʼI te ʼu kiʼi māhina pe, ko te kau Fakamoʼoni ʼa Sehova neʼe nātou tufa ʼi te ʼu kaupepa ʼaia te ʼu kaupepa e nima miliona tupu ʼi te ʼu potu fuli ʼo te kele. Talu mai ai neʼe mātou fakahā tuʼumaʼu aipe ʼe ko te Puleʼaga pe te falalaʼaga ʼo te malamanei.
12. Koteā te ʼu ʼamanaki fakafiafia ʼi te faʼahi ʼo te maʼuli ʼe foaki kia nātou ʼaē ʼe kaugana kia Sehova?
12 ʼE tou toe fakafiafia pe foki ʼi te ʼamanaki ʼaē ki te maʼuli heʼegata ʼi te pule ʼa te Puleʼaga. Ko te “kiʼi faga ōvi,” te kau Kilisitiano fakanofo ʼe nātou maʼu te falalaʼaga fakafiafia ʼi te lagi. Neʼe tohi e te ʼapositolo ko Petelo, ʼo fēnei: “Ke tapuaki te ʼAtua pea mo Tāmai ʼo totatou ʼAliki ko Sesu Kilisito, ʼuhi ko tona manavaʼofa ʼe lahi, neʼe ina tuku mai kia tatou te toe tupu, ki he ʼamanaki maʼuli, ʼaki te toe fakatuʼuake ʼa Sesu Kilisito mai te ʼu mate, ki he tōfiga heʼe popo, imakulata. Ko te tōfiga ʼaia ʼe tuku maʼa koutou ʼi te lagi.” (Luka 12:32; 1 Petelo 1:3, 4) Ia ʼaho nei, tokolahi te kau Fakamoʼoni ʼa Sehova ʼe nātou fakatalitali ʼaki he loto fiafia te maʼuli heʼegata ʼaē ʼi te Palatiso ʼi te pule ʼa te Puleʼaga. (Luka 23:43; Soane 17:3) ʼE mole he tahi age hahaʼi ʼi te kele ʼe ʼi ai hanatou meʼa ke fakatatau mo ʼatatou ʼu ʼamanaki fakafiafia. ʼI ʼaoga foki, ke tou faka maʼuhigaʼi lelei te ʼu ʼamanaki ʼaia!
Ko Te ʼOfa Fakatautehina ʼe Tapuakina
13. ʼE tonu anai ke feafeaʼi tatatou manatu ʼo ʼuhiga mo totatou ʼofa fakatautehina?
13 Ko te kau ʼaē ki te ʼofa fakatautehina faka malamanei ʼaē pe ʼe leleiʼia tokotahi e te ʼAtua, ʼe ko he tahi ʼaia matapuna ʼo te fiafia lahi. Meʼa lelei foki, ʼe tou maʼu te ʼu kaumeʼa pe ʼaē ʼe lelei age ʼi te kele. ʼE tokaga tonu ia Sehova ʼAtua ki totatou ʼu ʼaho pea neʼe ʼui maʼana: “Pea ʼe ʼau faka galulu anai te ʼu puleʼaga fuli, pea ʼe tonu anai ke hū ia te ʼu meʼa ʼaē ʼe manakoʼia ʼo te ʼu puleʼaga fuli; pea ʼe ʼau fakafonu anai te ʼapi ʼaenī ʼaki te kolōlia.” (Asea 2:7) ʼE moʼoni, ko te ʼu Kilisitiano fuli ʼe mole nātou haohaoa. Kae, ko Sehova totonu ʼaē neʼe ʼaumai te ʼu faʼahiga hahaʼi ʼaia kia te ia ʼaki ia Sesu Kilisito. (Soane 14:6) ʼAki te haga ʼa Sehova ʼo taki mai kia ia totonu te hahaʼi ʼaē ʼe ina ʼui ʼe matalelei, ko totatou fiafia ʼe mahu anai mo kapau ʼe tou fakahā te ʼofa fakatautehina kia nātou, ʼo faka maʼuhigaʼi ʼaupito ia nātou, ʼo kaugā gāue mo nātou ʼi te ʼu gāue fakalaumālie, ʼo tokoni kia nātou ʼo ʼuhiga mo te ʼu ʼahiʼahiʼi ʼaē ʼe tau mo nātou, pea mo faikole maʼa nātou.
14. Koteā te fakaloto mālohi ʼe feala ke tou maʼu mai ia 1 Petelo 5:5-11?
14 ʼE lagolago anai ki tatatou fakafiafia te ʼu meʼa fuli ʼaia. ʼIo, ko te fiafia ʼa Sehova ʼaē ʼe ko te tule mālohi ʼo totatou ʼofa fakatautehina ʼi te faʼahi fakalaumālie ʼi te kele katoa. Ei, ko tatou fuli ʼe tou tau mo te ʼu fakataga pea mo ʼihi age ʼu faigataʼaʼia. Kae ko te ʼu meʼa ʼaia ʼe tonu ke nātou fakatahiʼi tatou pea mo foaki mai kia tatou te maʼuhiga ʼo te logo tahi ʼaē ʼe ko he koga ia ʼo te kautahi moʼoni ʼa te ʼAtua ʼi te kele. Ohage ko te meʼa neʼe ʼui e Petelo, ʼe tonu ke tou agavaivai ʼi te nima mālohi ʼo te ʼAtua, ʼo vevete totatou ʼu tuʼania fuli kia te ia, ʼaki te ʼiloʼi ʼaē ʼe tokaga kia tatou. ʼE tonu ke tou nofo tokaga heʼe lamalama e te Tevolo ke ina kai tatou, kae ʼe mole tou tokotahi ʼi te temi ʼaia, koia ʼe toe ʼui fēnei e Petelo: “Kae ke koutou tekeʼi fakamālohi ia ia ʼaki te tui, heʼe koutou ʼiloʼi ko te ʼu mamahi ʼaia ʼe hoko ki te famili katoa ʼo tokotou ʼu tēhina ʼi te malamanei.” Pea ki te faʼahi ʼaia, ko te ʼofa fakatautehina faka malamanei ʼe mole puli anai ʼi he temi, heʼe tou maʼu te fakapapau ʼaenī ‘ka kua ʼosi leva tatatou mamahi ʼaē ʼi te kiʼi temi siʼipe, ko te ʼAtua ʼo te ʼofa makehe fuli pe, ʼaē neʼe ina pāui tatou ki tona kolōlia heʼegata ʼo fakatahi mo Kilisito, ʼe ina fakakatoa anai tatatou akoako, ʼe ina fakaloto mālohiʼi anai ia tatou, ʼe ina fakatuʼu mālohi anai ia tatou.’ (1 Petelo 5:5-11) Koutou fakakaukau age muʼa. Ko tatatou feʼofaniʼaki fakatautehina ʼe hoholo anai ʼo heʼegata!
ʼE ʼi Ai Te Faka ʼUhiga ʼo Te Maʼuli
15. He koʼe koa ʼe feala ke ʼui ko te kau Fakamoʼoni ʼa Sehova ʼe ʼi ai te ʼuhiga ʼo tonatou maʼuli?
15 Ko te fiafia ʼe ʼatatou ʼi te mālama tokakovi ʼaenī, koteʼuhi ʼe ʼi ai te faka ʼuhiga ʼo totatou maʼuli. Neʼe foaki mai kia tatou te minisitelio ke tou fiafia pea mo ʼihi. (Loma 10:10) ʼE mahino ia ʼe ko he pilivilesio fakafiafia ke tou liliu ko ni kaugā fagona ʼa te ʼAtua. ʼO ʼuhiga mo te faʼahi ʼaia, neʼe ʼui fēnei e Paulo: “Ko ai koa ia Apolosi? Pea ko ai koa ia Paulo? Ko te ʼu minisi neʼe feala ai ke koutou tui, ʼio, ohage ko tona foaki e te ʼAliki kia nāua takitokotahi. Ko ʼau neʼe ʼau to, ko Apolosi neʼe ina fakavai, kae ko te ʼAtua ʼaē neʼe ina fakatuputupu; koia ʼe mole ko ʼaē ʼe ina to ʼaē ʼe ʼi ai hona ʼuhiga, pe ko ʼaē ʼe ina fakavai, kae ko te ʼAtua ʼaē ʼe ina fakatuputupu. Heʼe ko tatou ko te kau kaugā gāue ʼa te ʼAtua. Ko koutou ko te gāueʼaga ʼa te ʼAtua,—te gāueʼaga ʼe gāueʼi,—te fale ʼo te ʼAtua.”—1 Kolonito 3:5-9.
16, 17. Koteā te ʼu faʼifaʼitaki ʼe feala ke fakahā ʼaki ai ʼe maʼu e te hahaʼi ʼa Sehova te faka ʼuhiga fiafia ʼo te maʼuli?
16 ʼE lahi te ʼu faʼifaʼitaki ʼe feala ke fakahā ʼaki ai, ko te kaugana ʼaē kia Sehova ʼaki te agatonu ʼe ina faka ʼuhiga te maʼuli, ʼo ina fakafonu tatou ʼaki te fiafia. ʼE hā lelei ʼi te taʼi palalau ʼaenī: “Neʼe ʼau mamata ki te Fale ʼo te Puleʼaga neʼe fonu ai te hahaʼi [ko te ʼaho neʼe avahi ai] pea neʼe kau ai toku ʼu kāiga ʼi te ʼaho ʼaia, pea mo ʼau pea mo toku ʼohoana pea mo tamā ʼu tamaliki e tolu pea mo tonatou ʼu ʼohoana. . . . Ko toku maʼuli pea mo toku ʼohoana neʼe ko he maʼuli fiafia pea mo ʼaoga ʼi te kaugana ʼaē ki te ʼAtua.”
17 ʼE toe fakaloto mālohi pe foki te ʼiloʼi ʼaē ʼe feala ki he tahi ke ina maʼu he faka ʼuhiga fiafia ʼo te maʼuli ʼi tana kaugana ʼaē kia Sehova ʼi te temi fuli pe. Ohage la, neʼe ako e te fafine te moʼoni ʼo te Tohi-Tapu ʼi te kilinike, pea neʼe papitema ʼi tona taʼu 102 ʼo liliu ai ko te Fakamoʼoni ʼa Sehova. Pea neʼe kua ʼi ai te faka ʼuhiga fiafia ʼo tona maʼuli ʼi tona ʼu taʼu fakaʼosi, ke ‘manavasiʼi ki te ʼAtua moʼoni pea mo taupau tana ʼu fakatotonu.’—Tagata Tānaki 12:13.
Ko Te Tule Mālohi ʼe Mole Feala Ke Holoʼi
18. Koteā te meʼa ʼe feala ke fai moʼo tekeʼi te lotovaivai pea mo fakatuputupu ia tatou te fiafia?
18 Ko te fiafia ʼa Sehova ʼe ko he tule mālohi ki ʼaē ʼe nofo agatonu, ʼo mole feala ke holoʼi. Kae, ko te maʼu ʼo te fiafia ʼaia ʼe mole faka ʼuhiga ʼaki leva ʼe mole tau anai mo tatou ni ʼu mamahi ohage ko nātou ʼaē neʼe ʼui age ki ai e Sesu ʼi Setesemane, ʼo fēnei: “Kua lotomamahi ʼaupito toku nefesi, ʼio, ʼo kaku ki te mate.” (Maleko 14:32-34) Ko te lotovaivai ʼe feala pe ke hoko, ʼo tupu mai tatatou faiga pe ʼaē ki ni ʼu fakatuʼutuʼu ʼe ʼaoga pe kia tatou. Koia tou fetogi totatou faʼahiga maʼuli. Kapau ʼe kua siʼisiʼi tatatou fiafia ʼuhi ʼe tou ʼutaki he ʼu maʼua faka Kilisitiano ʼe mamafa, e lagi feala ke tou fai ni ʼu fetogi ke fakamaʼamaʼa ai totatou lotomamahi pea ke tou toe maʼu tatatou fiafia. Pea tahi ʼaē, ʼe tapuakina anai tatou e Sehova ʼaki te fiafia mo kapau ʼe tou faiga ke ina leleiʼia tatou ʼaki hatatou tekeʼi mālohi te ʼu holi ʼo te kakano agahala, te mālama agakovi, pea mo te Tevolo.—Kalate 5:24; 6:14; Sake 4:7.
19. ʼE tonu ke feafeaʼi tatatou faka ʼuhigaʼi te ʼu pilivilesio ʼaē ʼe tou maʼu ʼi te kautahi ʼa te ʼAtua?
19 ʼAki te ʼu tupuʼaga ʼaē neʼe kua tou ʼosi talanoa kiai, pea mo ʼihi age, ʼe tou maʼu te fiafia lahi. ʼO mole lauʼia peʼe tou kau ki te kau fai faka mafola peʼe tou kau ki he faʼahiga selevisi faka pionie katoa, ko tatou fuli ʼe feala pe ke lahi te ʼu gāue ʼaē ke tou fai ʼi te ʼAliki, pea ʼe mahino papau ia ko te meʼa ʼaia ʼe lagolago anai ki totatou fiafia. (1 Kolonito 15:58) Pea koteā pe he ʼu pilivilesio ʼe tou maʼu ʼi te kautahi ʼa Sehova, tou haga foaki he tauhi taputapu ki totatou ʼAtua ʼofa pea mo fiafia ʼo fai ʼaki he loto fiafia.—1 Timoteo 1:11.
20. Koteā totatou toe pilivilesio lahi age, pea koteā ʼaē ʼe feala ke tou mahino papau kiai?
20 ʼE tou maʼu te ʼu tupuʼaga tāfito ke tou fakafiafia ʼi te pilivilesio ʼaē ʼe toʼo te huafa lahi ʼo Sehova, ko hana kau Fakamoʼoni. ʼE moʼoni, ʼe tou heʼe haohaoa pea ʼe tou tau mo te ʼu faigataʼaʼia, kae ʼe tou haga taupau maʼu ʼi totatou ʼatamai te ʼu tapuakina taulekaleka ʼi totatou ʼuhiga kau Fakamoʼoni ʼa Sehova. Pea ke tou manatuʼi, ko tatatou Tāmai ʼe ʼi selo ʼe mole ina līaki anai tatou ʼi he lakaga. ʼE feala ke tou ʼiloʼi papau ʼe tapuakina tuʼumaʼu anai tatou mo kapau ko te fiafia ʼa Sehova ʼe ko totatou tule mālohi.
ʼE Feafeaʼi Anai Hakotou Tali?
◻ Koteā “te fiafia ʼa Sehova”?
◻ E feafeaʼi te maʼu e te kau Kilisitiano te fiafia moʼoni?
◻ Koteā te ʼu tupuʼaga ʼaē ʼo te fiafia ʼa te kau Fakamoʼoni ʼa Sehova?
◻ He koʼe ko te fiafia ʼa Sehova ʼe ko he tule mālohi ʼe mole feala ke holoʼi?