Tou Taupau Lelei Te ʼAho ʼo Sehova ʼi Totatou ʼAtamai
“ ʼI te ʼu ʼaho fakaʼosi ʼe ʼōmai anai te hahaʼi vāvā.”—2 Petelo 3:3.
1. Koteā te manatu maʼuhiga ʼaē neʼe maʼu e te tēhina ʼo totatou temi?
NEʼE tohi fēnei e te tēhina fai faka mafola temi katoa talu mai ia taʼu e 66: “Neʼe ʼau logoʼi tuʼumaʼu ʼi toku loto ʼe tonu ke ʼau gāue. ʼE ʼau manatu tuʼumaʼu kua ōvi ʼaupito mai ia Halamaketone. (Fakahā 16:14, 16) Ohage ko taku tāmai, pea mo te matuʼa ʼo taku tāmai ʼi muʼa atu, neʼe ʼau faʼu toku maʼuli ʼo mulimuli ki te tokoni ʼa te ʼapositolo [ko Petelo], ‘koutou taupau lelei ʼi tokotou ʼatamai te hoko mai ʼo te ʼaho ʼo Sehova.’ Neʼe ʼau faka ʼuhiga tuʼumaʼu te fakapapau ʼaia ʼo ʼuhiga mo te mālama foʼou ʼe ko ‘he moʼoni logope la ʼe mole tou sio kiai.’ ”—2 Petelo 3:11, 12; Hepeleo 11:1; Isaia 11:6-9; Fakahā 21:3, 4.
2. Koteā tona faka ʼuhiga ʼo te ʼui ʼaē ke tou taupau lelei ʼi totatou ʼatamai te ʼaho ʼo Sehova?
2 Ko te kupuʼi palalau ʼaenī ʼa Petelo “taupau lelei ʼi tokotou ʼatamai” te ʼaho ʼo Sehova, ko tona faka ʼuhiga ʼaē, ʼi totatou ʼatamai, ʼe mole tou lotolotolua ʼo ʼuhiga mo te ʼaho ʼaia. ʼE mole tonu ke galo kia tatou, kua ōvi mai te ʼaho ʼaē ka maumauʼi ai anai e Sehova te tuʼu ʼo te ʼu faʼahiga meʼa ʼaenī, ʼaē ko te kamataʼaga ʼaia ʼo tana fakahoko tana fakapapau ʼo ʼuhiga mo he mālama foʼou. ʼE tonu ke moʼoni kia tatou te ʼaho ʼaia, ʼo feala ke tou sio lelei kiai, ohage ʼe tuʼu tuʼumaʼu ʼi ʼotatou muʼa. Neʼe moʼoni te ʼaho ʼaia ki te kau polofeta ʼa te ʼAtua ʼi te temi muʼa, pea neʼe nātou tautau palalau ʼo ʼuhiga mo te ʼaho ʼaia ʼo nātou ʼui kua ōvi mai.—Isaia 13:6; Soele 1:15; 2:1; Opatia 15; Sofonia 1:7, 14.
3. Koteā ʼaē neʼe ina uga ia Petelo ke ina fai he tokoni ʼo ʼuhiga mo te ʼaho ʼo Sehova?
3 He koʼe ʼe uga tatou e Petelo ke tou faka ʼuhiga te ʼaho ʼo Sehova ohage ko he ʼaho ʼe feala ke hoko mai “ ʼi te ʼaho pe ʼaē ka hoa mai”? ʼE mahino ia he neʼe kamata vāʼi e ʼihi te manatu ʼo ʼuhiga mo te fakapapau ʼaē ki te ʼi henī ʼa Kilisito, te temi ʼaē ka tauteaʼi ai anai te hahaʼi agakovi. (2 Petelo 3:3, 4) Koia, ʼi te kapite 3 ʼo tana lua tohi, ʼaē ka tou vakaʼi anai ʼi te temi nei, ʼe fai ai e Petelo te ʼu tali ki te ʼu tukugakoviʼi ʼaē ʼe fai e te hahaʼi vāvā ʼaia.
Ko He Kole Agaʼofa Ke Nātou Manatuʼi
4. Koteā ʼaē ʼe loto e Petelo ke tou manatuʼi?
4 ʼE hā te ʼofa ʼo Petelo ki tona ʼu tēhina he neʼe palalau kia nātou ʼi te kapite ʼaia, ʼo ina ʼui kia nātou ko te “kau ʼofaina.” ʼI tana kole ʼaē kia nātou ʼaki he agaʼofa ke ʼaua naʼa nātou galoʼi te meʼa ʼaē neʼe akoʼi age kia nātou, ʼe kamata fēnei e Petelo: “Kau ʼofaina, . . . ʼe ʼau fakaʼalaʼala tokotou ʼu fealagia fakakaukau ʼaki he fakamanatu, koteʼuhi ke koutou manatuʼi te ʼu tala ʼaē neʼe fai ʼi muʼa atu e te kau polofeta maʼoniʼoni pea mo te fakatotonu ʼa te ʼAliki, pea mo Fakamaʼuli, ʼaē neʼe tala atu e takotou ʼu ʼapositolo.”—2 Petelo 3:1, 2, 8, 14, 17; Suta 17.
5. Koteā ʼaē neʼe ʼui e ʼihi ʼu polofeta ʼo ʼuhiga mo te ʼaho ʼo Sehova?
5 Koteā “te ʼu tala ʼaē neʼe fai ʼi muʼa atu e te kau polofeta maʼoniʼoni,” ʼaē ʼe uga e Petelo ke manatuʼi e nātou ʼaē ʼe nātou lau tana tohi? Ko te ʼu tala ʼaē ʼo ʼuhiga mo te ʼi henī ʼa Kilisito ʼi te mālohi ʼo te Puleʼaga, pea ʼo ʼuhiga mo te fakamāu ʼo te hahaʼi ʼaē ʼe mole pipiki ki te ʼAtua. Neʼe kua fakatokagaʼi ʼi muʼa atu e Petelo te ʼu tala ʼaia. (2 Petelo 1:16-19; 2:3-10) ʼE talanoa ia Suta kia Enoke, ʼaē neʼe ko te ʼuluaki fakamatala ʼo he polofeta neʼe ina fakatokagaʼi te fakamāu ʼaē ka fakahoko e te ʼAtua ki te hahaʼi agakovi. (Suta 14, 15) Ko ʼihi ʼu polofeta neʼe nātou hoa kia Enoke, pea ʼe mole loto e Petelo ke galo kia tatou te ʼu meʼa ʼaē neʼe nātou tohi.—Isaia 66:15, 16; Sofonia 1:15-18; Sakalia 14:6-9.
6. Koteā te ʼu meʼa ʼaē neʼe ʼui e Kilisito pea mo tana ʼu ʼapositolo ʼe fakamālamaʼi ai tatou ʼo ʼuhiga mo te ʼaho ʼo Sehova?
6 Tahi ʼaē meʼa, ʼe ʼui e Petelo kia nātou ʼaē ʼe nātou lau tana tohi ke nātou manatuʼi “te fakatotonu ʼa te ʼAliki, pea mo Fakamaʼuli.” ʼE kau ki te fakatotonu ʼa Sesu te tokoni ʼaenī: “Ke koutou tokaga kia koutou totonu, talia naʼa mamafa tokotou ʼu loto . . . pea mo fokifā pe kua hoko fakapunamaʼuli mai kia koutou te ʼaho ʼaia ohage ko he hele.” “Koutou haga lamalama, pea ke koutou nonofo ʼalaʼala, heʼe mole koutou ʼiloʼi pe ko ʼafea te temi ʼaē kua fakakatofa.” (Luka 21:34-36; Maleko 13:33) ʼE toe uga tatou e Petelo ke tou tokagaʼi te ʼu palalau ʼa te kau ʼapositolo. Ohage la, neʼe tohi fēnei e te ʼapositolo ko Paulo: “Ko te ʼaho ʼo Sehova ʼe haʼu moʼoni ia ohage ko he tagata kaihaʼa ʼi te pōʼuli. Koia, ʼaua naʼa tou momoe ohage ko ʼihi, kae ke tou nonofo ʼaʼala pea mo tou aga fakapotopoto.”—1 Tesalonika 5:2, 6.
Te ʼu Meʼa ʼAē ʼe Holi Kiai Te Hahaʼi Vāvā
7, 8. (a) Ko te ʼu faʼahiga tagata feafeaʼi ʼaē ʼe nātou manukinukiʼi te ʼu fakatokaga ʼa te ʼAtua? (b) Koteā ʼaē ʼe ʼui e te ʼu hahaʼi vāvā?
7 Ohage ko tona fakahā ʼi muʼa atu, neʼe fai e Petelo te fakatokaga koteʼuhi neʼe kua kamata vāʼi e ihi te ʼu fakatokaga ʼaia, ohage ko te vāʼi ʼo te kau polofeta ʼa Sehova e te kau Iselaelite ʼo te temi muʼa. (2 Fakamatala 36:16) ʼE fakamahino fēnei e Petelo: “Heʼe koutou ʼiloʼi muʼa te meʼa ʼaenī: ʼi te ʼu ʼaho fakaʼosi ʼe ʼōmai anai te hahaʼi vāvā pea mo tanatou manuki, ʼo nātou haʼele ʼo mulimuli pe ki tonatou ʼu holi.” (2 Petelo 3:3) ʼE ʼui e Suta ʼe holi te hahaʼi vāvā ʼaia “ki he ʼu meʼa ʼe mole pipiki ki te ʼAtua.” ʼE ina fakahigoaʼi nātou ko he ʼu “tagata ʼe nātou agaʼi manu, [pea] ʼe mole nātou leleiʼia te ʼu meʼa fakalaumālie.”—Suta 17-19.
8 Ko te hahaʼi faiakonaki loi ʼaē neʼe ʼui e Petelo ʼe nātou “kumi te kakano ʼaki te holi ʼaē ke nātou ʼulihi,” ʼe mahino papau ia ʼe nātou kau ki te kau hahaʼi vāvā ʼaia ʼaē ʼe mole nātou leleiʼia te ʼu meʼa fakalaumālie. (2 Petelo 2:1, 10, 14) ʼAki he aga manukinuki, ʼe nātou fehuʼi fēnei ki te kau Kilisitiano agatonu: “ ʼE ʼifea koa te fakapapau ʼo tana ʼi henī? Heʼe talu mai te ʼaho ʼaē neʼe momoe ai tatatou ʼu kui [ʼi te mate] ko meʼa fuli pe ʼe hoko atu ohage pe ko te kamataʼaga ʼo te fakatupu.”—2 Petelo 3:4.
9. (a) He koʼe koa ʼe faiga e te hahaʼi vāvā ke nātou pulihi te maʼuhiga ʼo te temi, ʼaē ʼe fakahā ʼi te Folafola ʼa te ʼAtua? (b) He koʼe ʼe ko he puipui kia tatou, ke tou taupau lelei ʼi totatou ʼatamai te ʼaho ʼo Sehova?
9 He koʼe koa ʼe ko he manatu fakavale ʼaia? Koteā te tupuʼaga ʼo tanatou ʼui ʼe mole hoko anai ʼi he temi te ʼi henī ʼa Kilisito, pea neʼe mole heʼeki kau te ʼAtua ki te ʼu meʼa ʼa te tagata pea ʼe mole ina fai anai ʼi he temi? ʼI tanatou pulihi te maʼuhiga ʼo te temi, ʼaē ʼe fakahā ʼi te Folafola ʼa te ʼAtua, ko te kau hahaʼi vāvā ʼaia pea mo agaʼi manu ʼe nātou faigaʼi ke māʼumoea te hahaʼi ʼi te faʼahi fakalaumālie, pea ke nātou liliu ai ko he ʼu hahaʼi ʼe faigafua tonatou fakahalaʼi ʼaki te manatu pe ʼaē kia nātou. ʼE ko he fakaloto mālohi lahi kia tatou ia ʼaho nei ke tou nonofo ʼalaʼala ʼi te faʼahi fakalaumālie! Tou taupau lelei ʼi totatou ʼatamai te ʼaho ʼo Sehova, pea mo tou manatuʼi tuʼumaʼu ʼe sio mai kia tatou! ʼE uga ai anai tatou ke tou tauhi fakamalotoloto kia Sehova pea mo tou taupau te maʼa ʼo tatatou aga.—Pesalemo 11:4; Isaia 29:15; Esekiele 8:12; 12:27; Sofonia 1:12.
ʼE Nātou Agatuʼu Pea Mo Agakovi
10. ʼE fakamoʼoni feafeaʼi e Petelo ʼe faihala te hahaʼi vāvā?
10 ʼE mole ʼiloʼi e te hahaʼi vāvā ʼaia te faʼahi maʼuhiga. ʼE mole nātou fia ʼiloʼi te faʼahi ʼaia pea ʼe nātou faiga ke galoʼi e ʼihi te meʼa ʼaia. Koteā tona tupuʼaga? Ke faigafua age tanatou fakahalaʼi te hahaʼi. ʼE tohi fēnei e Petelo: “Koteʼuhi, ʼo mulimuli ki tonatou holi, ʼe mole nātou ʼiloʼi te faʼahi ʼaenī.” Te faʼahi fea? “Neʼe ʼi ai te lagi talu mai muʼa, mo te kele neʼe tuʼu ʼi te fuga vai pea ʼi te lotolotoiga ʼo te vai, ʼaki te folafola ʼa te ʼAtua; pea ʼaki te ʼu meʼa ʼaia neʼe fakaʼauha ai te mālama ʼo te temi ʼaia, ʼi te temi ʼaē neʼe lōfia ai ʼi te vai.” (2 Petelo 3:5, 6) ʼIo, neʼe molehi e Sehova ʼi te kele te hahaʼi agakovi lolotoga te Tulivio ʼi te temi ʼo Noe, pea ʼe ko he faʼahi neʼe toe faka maʼuhigaʼi foki e Sesu. (Mateo 24:37-39; Luka 17:26, 27; 2 Petelo 2:5) Koia, ʼo mole tatau mo te ʼu meʼa ʼaē ʼe ʼui e te hahaʼi vāvā, ko meʼa fuli ʼe mole haga hoko atu “ohage ko te kamataʼaga ʼo te fakatupu.”
11. Koteā te ʼu ʼamanaki neʼe maʼu fakatomuʼa e te kau ʼuluaki Kilisitiano neʼe tupu ai tonatou manukinukiʼi?
11 Neʼe lagi manukinukiʼi e te hahaʼi vāvā te kau Kilisitiano agatonu, he neʼe mole hoko tanatou ʼu ʼamanaki. ʼO mole fualoa ʼi muʼa ʼo te mate ʼa Sesu, ko tana ʼu tisipulo neʼe nātou “manatu ʼe hā anai te puleʼaga ʼo te ʼAtua ʼi te moʼi temi pe ʼaia.” Hili tona fakatuʼuake, neʼe nātou fehuʼi age peʼe fakatuʼu anai te Puleʼaga ʼi te temi pe ʼaia. Pea lagi teitei taʼu e hogofulu ʼi muʼa ʼo te tohi e Petelo tana lua tohi, neʼe “hoha” ʼihi ʼaki “he lea” peʼe ko “he tohi,” neʼe ʼui ʼe haʼu mai ia Paulo peʼe mai tana ʼu kaugā gāue, pea “ ʼe ʼui ai kua hoko mai te ʼaho ʼo Sehova.” (Luka 19:11; 2 Tesalonika 2:2; Gāue 1:6) Kae neʼe mole hala te ʼu ʼamanaki ʼaia ʼa te kau tisipulo ʼa Sesu, kae neʼe mole ko te temi ʼaia ʼaē neʼe tonu ke hoko ai te ʼu ʼamanaki ʼaia. ʼE hoko mai anai te ʼaho ʼo Sehova!
ʼE Feala Ke Tou Falala Ki Te Folafola ʼa Te ʼAtua
12. Neʼe fakamoʼoni feafeaʼi e te Folafola ʼa te ʼAtua ʼe feala ke tou falala ki tana ʼu lea faka polofeta ʼo ʼuhiga mo “te ʼaho ʼo Sehova”?
12 Ohage ko tona ʼui ʼi muʼa atu, ko te kau polofeta ʼi muʼa ʼo te temi faka Kilisitiano neʼe nātou fakatokagaʼi tuʼumaʼu te kua ōvi mai ʼo te ʼaho lagavaka ʼo Sehova. Neʼe hoko te “ ʼaho ʼo Sehova” ʼi he potu veliveli ʼo te kele, ʼi te taʼu 607 ʼi muʼa ʼo totatou temi, ʼi te fakahoko e Sehova tana lagavaka ki tana hahaʼi talagataʼa. (Sofonia 1:14-18) Ki muli age, ko ʼihi ʼu puleʼaga, ʼo kau ai ia Papiloni pea mo Esipito, neʼe hoko kia nātou te “ ʼaho [ʼaia] ʼo Sehova” ʼe tatau. (Isaia 13:6-9; Selemia 46:1-10; Opatia 15) Neʼe toe fakakikite mo te fakaʼosi ʼo te tuʼu ʼo te ʼu faʼahiga meʼa faka Sutea ʼo te ʼuluaki sēkulō, pea neʼe hoko ʼi te temi ʼaē neʼe maumauʼi ai e te ʼu kautau Loma ia Sutea ʼi te taʼu 70 ʼo totatou temi. (Luka 19:41-44; 1 Petelo 4:7) Kae ʼe talanoa ia Petelo ki te “ ʼaho ʼo Sehova” ʼaē ka hoko ʼi te temi ka haʼu, ʼe ko he ʼaho ʼe mālohi age anai ʼi te Tulivio ʼaē neʼe tō ki te malamanei katoa!
13. Koteā te faʼifaʼitaki ʼi te hisitolia ʼe ina fakahā mai ʼe hoko moʼoni anai te fakaʼosi ʼo te tuʼu ʼo te ʼu faʼahiga meʼa ʼaenī?
13 ʼI te kamata fakamatala e Petelo te fakaʼauha ʼaē ka hoko, ʼe ina ʼui fēnei: “Kae ʼaki te folafola pe ʼaia.” Ki muʼa atu neʼe ina ʼui “ ʼaki te folafola ʼa te ʼAtua,” ko te kele ʼi muʼa ʼo te Tulivio neʼe tuʼu “ ʼi te fuga vai pea ʼi te lotolotoiga ʼo te vai.” Neʼe feala ʼaki te ʼu meʼa ʼaia, ʼaē ʼe fakamatala e te Tohi-Tapu ʼo ʼuhiga mo te temi ʼo te fakatupu, ke hoko te Tulivio ʼi te temi ʼaē neʼe fakatotonu ai e te ʼAtua, peʼe ʼaki tana folafola, ke hoko te lōfia. ʼE toe hoko fēnei atu e Petelo: “ ʼAki te folafola pe ʼaia [ʼa te ʼAtua] kua tānaki te lagi mo te kele ʼo te temi ʼaenī ki te afi pea mo tāʼofi ki te ʼaho ʼo te fakamāu pea mo te fakaʼauha ʼo te hahaʼi ʼaē ʼe mole pipiki ki te ʼAtua.” (2 Petelo 3:5-7; Senesi 1:6-8) ʼE ko te folafola ʼaia ʼa Sehova ʼaē ʼe feala ke tou falala kiai! ʼE ina pulihi anai “te ʼu lagi mo te kele”—te tuʼu ʼo te ʼu faʼahiga meʼa ʼaenī—ʼi te hāūhāū lahi ʼo tona ʼaho lahi! (Sofonia 3:8) Kae ko ʼafea ʼaē ka hoko ai?
ʼE Tou Loto Ke Hoko Mai Te Fakaʼosi
14. He koʼe ʼe feala ke tou falala ʼe tou maʼuʼuli nei ʼi “te ʼu ʼaho fakaʼosi”?
14 Neʼe fia ʼiloʼi e te ʼu tisipulo ʼa Sesu peʼe hoko ʼafea te fakaʼosi, koia neʼe nātou fehuʼi fēnei ai kia te ia: “Koteā anai te fakaʼiloga ʼo tau ʼi henī pea mo te fakaʼosi ʼo te tuʼu ʼo te ʼu faʼahiga meʼa ʼaenī?” ʼE hā mai ia neʼe nātou fehuʼi pe ko ʼafea te fakaʼosi ʼo te tuʼu faka Sutea, kae ko te tali ʼaē neʼe fai e Sesu neʼe ʼuluaki faka ʼuhiga ki te fakaʼauha ʼaē ka hoko anai ki te ‘kele mo te lagi’ ʼo te temi ʼaenī. Neʼe fakakikite e Sesu te ʼu meʼa ohage ko te ʼu tau lalahi, mo te ʼu hoge, mo te ʼu mafuike, mo te ʼu mahaki, pea mo te fakapō. (Mateo 24:3-14; Luka 21:5-36) Talu mai te taʼu 1914, neʼe tou sio ki te fakahoko ʼo te fakaʼiloga ʼaē neʼe foaki e Sesu ʼo ʼuhiga mo “te fakaʼosi ʼo te tuʼu ʼo te ʼu faʼahiga meʼa ʼaenī,” pea mo te ʼu fakaʼiloga ʼaē neʼe talanoa kiai ia Paulo ʼo ʼuhiga mo “te ʼu ʼaho fakamuli.” (2 Timoteo 3:1-5) ʼE mahino ia, ʼe hā lelei mai te fakamoʼoni ʼaē ʼe tou maʼuʼuli nei ʼi te temi ʼo te fakaʼosi ʼo te tuʼu ʼo te ʼu faʼahiga meʼa ʼaenī!
15. Koteā ʼaē neʼe fia ʼiloʼi e te kau Kilisitiano logope la te fakatokaga ʼa Sesu?
15 Neʼe fia ʼiloʼi e te kau Fakamoʼoni ʼa Sehova pe ko ʼafea ʼaē ka hoko ai anai te ʼaho ʼo Sehova. ʼI tanatou holi ʼaupito ʼaē ke nātou ʼiloʼi te ʼaho ʼaia, neʼe nātou faiga ʼi ʼihi temi ke nātou lau peʼe hoko anai ʼafea. Kae ʼi tanatou fai te meʼa ʼaia neʼe mole nātou fakatokagaʼi, ohage ko te kau ʼuluaki tisipulo ʼa Sesu, te palalau ʼaē neʼe fai e tonatou Pule, ʼaē ʼe “mole [tou] ʼiloʼi pe ko ʼafea te temi ʼaē kua fakakatofa.” (Maleko 13:32, 33) Neʼe manukinukiʼi e te hahaʼi vāvā te kau Kilisitiano agatonu ʼuhi ko tanatou ʼu ʼamanaki fakatomuʼa ʼaia. (2 Petelo 3:3, 4) Kae ʼe fakamoʼoni mai e Petelo, ʼe hoko mai anai te ʼaho ʼo Sehova, ʼo mulimuli ki Tana kaletalio.
ʼE Maʼua Ke Tou Maʼu Te Manatu ʼa Sehova
16. Koteā te tokoni ʼaē ʼe tou tokakaga fakapotopoto kiai?
16 ʼE maʼua ke tou maʼu te manatu ʼa Sehova ʼo ʼuhiga mo te temi, ohage ko tona fakamanatuʼi mai e Petelo ʼi te temi nei kia tatou: “Kae ko te meʼa ʼaenī, ʼe mole tonu ke galo kia koutou, ʼu fānau ʼofaina: ko te ʼaho e tahi kia Sehova ʼe hage ko taʼu e afe, pea ko taʼu e afe ʼe hage he ʼaho e tahi.” Ka fakatatau kiai, pea ʼe nounou totatou temi maʼuli, ʼaē ʼe aʼu ki te 70 peʼe 80 taʼu! (2 Petelo 3:8; Pesalemo 90:4, 10) Koia kapau ʼe hage ʼe tuai te fakahoko ʼo te ʼu fakapapau ʼa te ʼAtua, ʼe maʼua ke tou tali te tokoni ʼaenī ʼa te polofeta ʼa te ʼAtua: “Tatau aipe peʼe tuai [te temi ʼaē kua fakakatofa], koutou haga talitali kiai; heʼe hoko moʼoni anai ia. ʼE mole tauhala anai ia.”—Hapakuke 2:3.
17. Tatau aipe peʼe tonu ke loaloaga atu te ʼu ʼaho fakamuli, koteā ʼaē ʼe feala ke tou falala kiai?
17 He koʼe koa ʼe loaloaga atu te ʼu ʼaho fakamuli ʼo te tuʼu ʼaenī? Heʼe ʼi ai tona tupuʼaga maʼuhiga, ohage ko tona ʼui fēnei e Petelo: “ ʼE mole tuai te fakapapau ʼa Sehova, ohage ko te lau ʼa ʼihi ʼe tuai, kae ʼe kātaki ʼo ʼuhiga mo koutou, heʼe mole loto ia ke mate niʼihi, kae ke tafoki te tagata fuli pe ʼo fakahemala.” (2 Petelo 3:9) ʼE tokaga ia Sehova ki te ʼu meʼa ʼaē ʼe lelei ʼaupito maʼa te hahaʼi fuli. ʼE tuʼania ki te maʼuli ʼo te hahaʼi, ohage ko tona ʼui fēnei: “ ʼE mole ʼau leleiʼia te mate ʼo te tagata agakovi, kae ke ʼau sio ki he tahi ʼe agakovi ʼe tafoki mai tona ala pea ke maʼuli.” (Esekiele 33:11) Koia ʼe feala ke tou falala ʼe hoko mai anai te fakaʼosi ʼi tona temi totonu moʼo fakahoko te fakatuʼutuʼu ʼo totatou Tupuʼaga ʼaē ʼe poto pea mo ʼofa!
Koteā ʼAē Ka Puli Anai?
18, 19. (a) He koʼe ʼe fakaʼauha moʼoni anai e Sehova te tuʼu ʼo te ʼu faʼahi meʼa ʼaenī? (b) ʼE fakamatala feafeaʼi e Petelo te fakaʼosi ʼo te tuʼu ʼaenī, pea koteā ʼaē ka fakaʼauha moʼoni anai?
18 Mai tona ʼaluʼaga ʼaē ʼe ʼofa moʼoni ia Sehova kia nātou ʼaē ʼe nātou tauhi kia te ia, koia ʼe ina fakaʼauha anai ia nātou fuli ʼaē ʼe nātou fakamamahiʼi tana hahaʼi. (Pesalemo 37:9-11, 29) Ohage ko te meʼa ʼaē neʼe ʼui e Paulo ki muʼa atu, neʼe ʼui e Petelo ʼe hoko mai anai te fakaʼauha ʼi he temi ʼe mole tou ʼamanaki kiai, pea neʼe ina tohi fēnei: “Ko te ʼaho ʼo Sehova ʼe haʼu anai ohage ko he tagata kaihaʼa, pea ʼi te ʼaho ʼaia ko te ʼu lagi ʼe puli anai ʼi he logoaʼa, kae ko te ʼu meʼa ʼaē kua kakaha ʼe mavetevete anai, pea ko te kele pea mo te ʼu gāue ʼaē ʼe fai ʼi ai ʼe hā anai ia.” (2 Petelo 3:10; 1 Tesalonika 5:2) Ko te lagi pea mo te kele moʼoni neʼe mole molehi ʼi te Tulivio, pea ʼe mole molehi anai ʼi te ʼaho ʼo Sehova. Kae koteā koa ʼaē ka “puli,” peʼe tonu ke fakaʼauha?
19 ʼE fakagata anai te ʼu puleʼaga fakatagata ʼaē neʼe nātou puleʼi te malamanei ohage ko “he ʼu lagi,” ʼo toe feiā anai mo te “kele,” peʼe ko te sosiete fakatagata ʼaē ʼe mole pipiki ki te ʼAtua. Ko te “logoaʼa” ʼe lagi ina fakahā mai te fakamole vave ʼo te lagi. Ko “te ʼu meʼa” ʼaē ʼe nātou faʼufaʼu te sosiete fakatagata ia ʼaho nei ʼe “mavetevete” anai, peʼe fakaʼauha. Pea ko te “kele,” ʼo kau ai mo “te ʼu gāue ʼaē ʼe fai ʼi ai ʼe hā anai ia.” ʼE fakahā lelei anai e Sehova te ʼu gāue kovi ʼa te tagata ʼi tana fakahoko te fakaʼosi ʼaē ʼe tau mo feʼauga ki te tuʼu faka malamanei katoa ʼaenī.
Koutou Tokaga Lelei Ki Takotou ʼAmanaki
20. ʼE tonu ke lave feafeaʼi ki totatou maʼuli tatatou ʼiloʼi te ʼu meʼa ʼaē ka hoko ʼi te temi ka haʼu?
20 Mai tona ʼaluʼaga ʼaē kua ōvi mai te temi ʼaē ka hoko ai te ʼu meʼa fakamataku ʼaia, ʼe ʼui e Petelo ʼe tonu ke tou fai “he ʼu aga fakamaʼoniʼoni pea mo te ʼu gāue ʼaē ʼe fakaʼiloga ʼaki ai te pipiki ki te ʼAtua, ʼo talitali pea mo ʼaua naʼa galo [kia tatou] te hoko mai ʼo te ʼaho ʼo Sehova, ʼaia ʼe tupu ai anai te mavetevete ʼo te ʼu lagi ʼaē kua ulo pea ʼe huhuʼa anai te ʼu meʼa ʼaē kua kakaha ʼaupito.” ʼE mole he lākilua ʼo ʼuhiga mo te faʼahi ʼaia! “ ʼE tupu ai anai te mavetevete ʼo te ʼu lagi ʼaē kua ulo pea ʼe huhuʼa anai te ʼu meʼa ʼaē kua kakaha ʼaupito!” (2 Petelo 3:11, 12) Mai tona ʼaluʼaga ʼaē ko te ʼu meʼa ʼaia ʼe feala ke hoko ʼapogipogi, pea ʼe tonu anai ke lave ki te ʼu meʼa fuli ʼaē ʼe tou fai pea mo tatatou ʼu fakatuʼutuʼu.
21. Koteā ʼaē ka ina fetogi anai te lagi mo te kele ʼo te temi ʼaenī?
21 ʼI te temi ʼaenī, ʼe ʼui fēnei mai e Petelo te ʼu meʼa ʼaē ka nātou fetogi anai te tuʼu ʼāfea: “Kae ohage ko tana fakapapau, ʼe tou talitali ki he lagi foʼou mo he kele foʼou, ʼe maʼu ai anai te faitotonu.” (2 Petelo 3:13; Isaia 65:17) ʼI meʼa fakaloto fīmālie leva! ʼE faʼufaʼu anai te puleʼaga “foʼou” e Kilisito pea mo tana toko 144 000 kaugā hau ʼi te “lagi,” pea ko te hahaʼi ʼaē ka hāo ʼi te fakaʼosi ʼo te mālama ʼaenī ʼe nātou faʼufaʼu anai te “kele foʼou.”—1 Soane 2:17; Fakahā 5:9, 10; 14:1, 3.
Koutou Haga Gāue Pea Mo Koutou Taupau Te Aga ʼAē ʼe Maʼa
22. (a) Koteā ʼaē ka tokoni anai kia tatou ke ʼaua naʼa tou fakatupu he mele pe ko he meʼa ʼe heʼemaʼa ʼi te faʼahi fakalaumālie? (b) Koteā te meʼa fakatupu tuʼutāmaki ʼaē ʼe fakatokagaʼi mai e Petelo?
22 ʼE hoko atu fēnei e Petelo: “Koia, ʼu ʼofaina, ʼi takotou talitali ki te ʼu meʼa ʼaia, koutou faiga ke ina maʼu mai koutou, ʼe koutou heʼe mele mo maʼa mo maʼuli ʼi te tokalelei. Koutou lau te kātaki fualoa ʼo totatou ʼAliki ko he fakamaʼuli ʼo tatou.” ʼI tatatou talitali ʼaia pea mo tatatou faka ʼuhiga te lagi tuai ʼo te ʼaho ʼo Sehova ohage ko he fakahā ʼaia ʼo te kātaki ʼa te ʼAtua, ʼe tokoni anai kia tatou ke ʼaua naʼa tou fakatupu he mele peʼe ko he meʼa heʼemaʼa ʼi te faʼahi fakalaumālie. Kae ʼe ʼi ai te meʼa fakatupu tuʼutāmaki! ʼE fakatokagaʼi mai e Petelo, ʼi te ʼu tohi ʼo “totatou tēhina ʼofaina ko Paulo . . . ʼe ʼi ai he ʼu meʼa ʼe faigataʼa te mahino kiai, ʼaē ʼe fakamahino hala e te hahaʼi vavale ʼaē neʼe mole ako, ʼo nātou fai feiā ki te toe ʼo te Tohi-Tapu, ke fakaʼauha ai nātou.”—2 Petelo 3:14-16.
23. Koteā te tokoni fakaʼosi ʼa Petelo?
23 ʼE mahino papau ia neʼe fakamahino hala e te hahaʼi faiakonaki loi te ʼu tohi ʼa Paulo ʼo ʼuhiga mo te ʼofa makehe ʼa te ʼAtua, ʼo nātou fakaʼaogaʼi moʼo takuʼaki tanatou ʼu aga ʼaē ʼe kovi. Neʼe lagi manatuʼi e Petelo te faʼahi ʼaia ʼi tana tohi tana tokoni ʼaenī: “Koia, kia koutou kau ʼofaina, ʼi takotou kua ʼiloʼi fakatomuʼa te faʼahi ʼaia, koutou tokakaga ke ʼaua naʼa nātou taki koutou ke koutou hēhē mo te hahaʼi ʼaē ʼe nātou agatuʼu ki te lao, pea mo līaki takotou tutuʼu mālohi.” ʼE ina fakaʼosi tana tohi, ʼo ina ʼui fēnei: “Ke hoko atu takotou tuputupu ʼi te ʼofa makehe pea mo te ʼatamai mālama ʼo totatou ʼAliki pea mo Fakamaʼuli ko Sesu Kilisito.”—2 Petelo 3:17, 18.
24. Koteā te aga ʼaē ʼe tonu ke maʼu e te kau kaugana fuli ʼa Sehova?
24 ʼE mahino papau ia, ʼe loto e Petelo ke ina fakaloto mālohiʼi tona ʼu tēhina. ʼE ina loto ia ke nātou maʼu fuli te aga ʼaē neʼe fakahā e te Fakamoʼoni kua taʼu 82, ʼaē neʼe tou talanoa kiai ʼi te kamata. ʼE ʼui fēnei e te tēhina ʼaia: “ ʼE ʼau faʼu toku maʼuli ʼo mulimuli ki te tokoni ʼa te ʼapositolo, ke tou ‘taupau lelei ʼi totatou ʼatamai te hoko mai ʼo te ʼaho ʼo Sehova.’ Neʼe ʼau faka ʼuhiga tuʼumaʼu te fakapapau ʼaē ʼo ʼuhiga mo te mālama foʼou ʼe ko ‘he moʼoni logope la ʼe mole tou sio kiai.’ ” Tou fakaʼamu ke tou fai feiā mo tatou ʼi totatou maʼuli.
ʼE Koutou Tali Feafeaʼi Anai?
◻ Koteā te faka ʼuhiga ʼo te ʼui ʼaē ke tou “taupau lelei ʼi [totatou] ʼatamai” te ʼaho ʼo Sehova?
◻ Koteā ʼaē ʼe mole fia ʼiloʼi e te hahaʼi vāvā, pea koteā tona tupuʼaga?
◻ Koteā te tupuʼaga ʼo te manukinukiʼi e te hahaʼi vāvā te kau Kilisitiano agatonu?
◻ Koteā te manatu ʼaē ʼe tonu ke tou taupau?
[Paki ʼo te pasina 23]
Koutou taupau lelei ʼi tokotou ʼatamai te ʼaho ʼo Sehova . . .
[Paki ʼo te pasina 24]
. . . pea mo te mālama foʼou ʼaē ka hoa kiai