Koutou Fakatalitali!
“ ʼE ʼau fia fakatalitali ki te ʼAtua ʼo toku hāofaki. ʼE logo mai anai toku ʼAtua kia te ʼau.”—Mikea 7:7.
1, 2. (a) Koteā te aga kovi ʼaē neʼe fakatupu tuʼutāmaki ki te kau Iselaele ʼi te toafa? (b) Koteā ʼaē ʼe feala ke hoko ki he Kilisitiano ʼe mole ina maʼu te aga ʼaē ʼe lelei?
ʼE LAHI te ʼu meʼa ʼo te maʼuli ʼe feala pe ke faka ʼuhigaʼi lelei peʼe faka ʼuhigaʼi kovi, ʼo fakalogo pe ki tatatou aga. ʼI te temi ʼaē neʼe nonofo ai te kau Iselaele ʼi te toafa, neʼe foaki faka milakulo age kia nātou te mane. Neʼe lagi nātou fakatokagaʼi te kele toafa ʼaē neʼe nātou nonofo ai, pea mo tonu ai ke nātou fakafetaʼi fakamalotoloto kia Sehova ʼi tana fafaga ia nātou. Neʼe tonu ke nātou maʼu he aga ʼe lelei ki te potu ʼaia. Kae, neʼe nātou manatuʼi te ʼu meʼa kehekehe ʼaē neʼe nātou maʼu ʼi Esipito pea nātou meo ai ko te mane ʼe mole lelei. Neʼe kovi tanatou aga ʼaia!—Faka au 11:4-6.
2 ʼO toe feiā pe, ia ʼaho nei ʼe feala ʼaki te aga ʼa he Kilisitiano ke faka ʼuhiga he ʼu meʼa ohage ko he ʼu meʼa lelei pe ko he ʼu meʼa kovi. Kapau ʼe mole ina maʼu te aga ʼaē ʼe lelei, pea ʼe feala pe ke puli gafua te fiafia ʼa he Kilisitiano, pea ʼe feala pe ke tuʼutāmaki ai koteʼuhi, ohage ko te ʼui e Nehemia: “Ko te fiafia ʼa Sehova ʼe ko [tatatou] tule mālohi.” (Nehemia 8:10) Ko he aga ʼe lelei pea mo fakafiafia ʼe tokoni mai ke tou nonofo mālolohi, pea mo ina fakatuputupu te tokalelei pea mo te logo tahi ʼi te kokelekasio.—Loma 15:13; Filipe 1:25.
3. Neʼe tokoni feafeaʼi te aga ʼaē ʼe lelei kia Selemia, lolotoga te ʼu temi faigataʼa?
3 Neʼe fakahā e Selemia he aga ʼe lelei logope neʼe maʼuli ʼi he ʼu temi faigataʼa. Māʼia mo te temi ʼaē neʼe ina faka mafola ai te ʼu meʼa fakalialia ʼo te ʼu fakaʼauha ʼo Selusalemi ʼi te taʼu 607 ʼi muʼa ʼo totatou temi, neʼe ina faka ʼuhiga lelei te ʼu potu ʼaia. Neʼe mole galoʼi e Sehova ia Iselaele pea neʼe hāo ai te hahaʼi. Neʼe tohi fēnei e Selemia ʼi te tohi ʼo te ʼu Tagilāulau: “ ʼUhi ko te ʼu gāue lotoʼofa ʼa Sehova ʼaē neʼe mole mātou mamate ai, koteʼuhi ʼe moʼoni ʼe mole gata anai tona ʼu manavaʼofa. ʼE nātou foʼou ʼi te uhu fuli. Ko tau agatonu ʼe mahu ia.” (Tagilāulau 3:22, 23) ʼI te hisitolia katoa, ʼi te ʼu temi ʼaē neʼe faigataʼa ʼaupito ai, neʼe faigaʼi aipe e te kau kaugana ʼa te ʼAtua ke nātou taupau he aga ʼe lelei pea mo fakafiafia.—2 Kolonito 7:4; 1 Tesalonika 1:6; Sakopo 1:2.
4. Neʼe koteā te aga ʼaē neʼe taupau e Sesu, pea neʼe tokoni feafeaʼi ki ai?
4 Hili te ʼu taʼu e onogeau ki te temi ʼo Selemia, neʼe tokoni kia Sesu tana aga ʼaē ʼe lelei ke ina kātakiʼi. ʼE tou lau fēnei: “ ʼUhi ko te fiafia ʼaē neʼe fakapapauʼi age kia te ia, neʼe ina kātakiʼi te pou fakamamahi, ʼo ina meʼa noaʼi te ufiufi, pea heka ia ʼi te toʼomataʼu ʼo te hekaʼaga hau ʼo te ʼAtua.” (Hepeleo 12:2, MN ) Logo aipe he faʼahiga fakafeagai peʼe ko he faʼahiga fakataga ʼaē neʼe fai kia Sesu—māʼia mo te mamahi ʼi he pou fakamamahi—neʼe ina manatuʼi aipe “te fiafia ʼaē neʼe fakapapauʼi age kia te ia.” Ko te fiafia ʼaia, neʼe ko te pilivilesio ʼaē ke ina fakahoko te lagavaka ʼo ʼuhiga mo te pule faʼifaʼitaliha ʼa Sehova pea mo te tāpuhā ʼo tona huafa, ʼo feiā aipe mo te fakatuʼutuʼu ʼaē ke ina foaki he ʼu tapuakina lahi ki te hahaʼi fakalogo ʼi te temi ka haʼu.
Tou Fakatalitali
5. Koteā he ʼaluʼaga ʼe tokoni mai anai te fakatalitali ke tou maʼu te faʼahiga sio ʼaē ʼe lelei ʼo ʼuhiga mo te ʼu meʼa?
5 Kapau ʼe tou maʼuliʼi te faʼahiga aga ʼaē neʼe maʼu e Sesu, pea ʼe mole puli anai ia tatou te fiafia ʼa Sehova, tatau aipe peʼe mole hoko tuʼumaʼu te ʼu meʼa ohage ko tatatou fakaʼamu peʼe mole hoko ʼi te temi ʼaē neʼe tou ʼamanaki kiai. Neʼe ʼui fēnei e te polofeta ko Mikea: “Kae kia ʼau, ʼe ko Sehova ʼaē ka ʼau lamalama. ʼE ʼau fia nofo ʼo fakatalitali ki te ʼAtua ʼo toku hāofaki.” (Mikea 7:7; Tagilāulau 3:21) Mo tatou foki, ʼe feala ke tou fakatalitali. ʼO feafeaʼi? ʼE lahi tona faʼahiga fai. Ohage la, ʼe lagi tou manatu ko he tēhina ʼe ina maʼu he tuʼulaga neʼe ina fai he hala, pea ʼe ʼaoga ke foimo fakatonutonuʼi ia ia. Ko te fakatalitali ʼe ina faka fealagia anai kia tatou ke tou manatu fēnei, ‘Neʼe hala moʼoni koa, peʼe ʼau faihala? Kapau neʼe hala te tēhina ʼaia, pea lagi ʼe fakagafua anai e Sehova ke hoko he ʼu ʼaluʼaga, koteʼuhi maʼa ia ʼe fetogi anai te aga ʼa te tagata ʼaia, pea ʼe mole ʼaoga anai hona fakatonutonuʼi faka fefeka?’
6. ʼE tokoni feafeaʼi anai te fakatalitali ki he tahi ki tana tauʼi hona fihifihia?
6 ʼE feala pe ke ʼaoga tatatou fakatalitali mokā tou hoha ʼi hatatou fihifihia peʼe tou lolotoga tauʼi he vaivaiʼaga. Ohage la kapau ʼe tou kole kia Sehova ke tokoni mai, kae ʼe hoko atu pe te fihifihia. Koteā te tonu? ʼE tonu ke tou haga fai ʼo mulimuli ki tatatou ʼu fealagia, te fakatokatoka ʼo te fihifihia pea mo tou tui ki te ʼu palalau ʼaenī ʼa Sesu: “Ke koutou haga kole, pea ʼe foaki atu anai kia koutou; ke koutou haga kumi, pea ʼe koutou maʼu anai; ke koutou haga fisifisi pea ʼe avahi atu anai kia koutou.” (Luka 11:9, MN ) Koutou haga faikole, pea mo fakatalitali kia Sehova. ʼI tona temi totonu, pea ohage ko te meʼa ʼaē ʼe loto kiai, ʼe tali atu anai e Sehova ki takotou ʼu faikole.—1 Tesalonika 5:17.
7. ʼE tokoni feafeaʼi anai te fakatalitali ki tatatou faʼahiga sio ki te fakamahinohino māmālie ʼo te Tohi-Tapu?
7 ʼAki te hoko ʼo te ʼu lea faka polofeta ʼa te Tohi-Tapu, ʼe tāsilo ai tatatou mahino ki te Tohi-Tapu. Kae ʼi ʼihi temi, ʼe lagi tou manatu ai ʼe tuai te foaki mai ʼo he faʼahiga fakamahino. Kapau ʼe mole hoko mai ʼi te temi ʼaē neʼe tou fakaʼamu kiai, pea ʼe tou fia fakatalitali anai koa? Koutou manatuʼi, neʼe fakafuafua e Sehova ʼe lelei te fakahāhā māmālie “te lilo taputapu ʼo Kilisito” ʼi he temi lolotoga taʼu e 4 000. (Efeso 3:3-6, MN ) ʼE ʼi ai koa he tupuʼaga ke mole tou faʼa kātaki ai? ʼE tou lotolotolua koa neʼe fakanofo he “kaugana agatonu mo fakapotopoto” moʼo foaki ki te hahaʼi ʼa Sehova ‘tanatou meʼa kai ʼi tona temi totonu’? (Mateo 24:45) He koʼe koa ʼe tou pulihi anai tatatou fiafia faka lotu, ʼuhi pe heʼe mole tou mahino katoa kia meʼa fuli? Tou manatuʼi, ʼe ko Sehova ʼaē ʼe ina fili tonu te temi pea mo te faʼahiga fakahā ʼo tana ʼu ‘meʼa fakalilo.’—Amosi 3:7.
8. Neʼe ʼaoga feafeaʼi ki te tokolahi te kātaki fualoa ʼa Sehova?
8 ʼE feala pe ke lotovaivai ʼihi, koteʼuhi maʼa nātou kua hili he ʼu taʼu mo tanatou gāue agatonu, pea ʼe lagi mole nātou maʼuʼuli anai ke nātou sisio ki “te ʼaho lahi pea mo fakamanavahe ʼo Sehova.” (Soele 2:30, 31) Kae ʼe feala pe ke nātou lotomālohi mo kapau ʼe nātou sisio ki te ʼaoga ʼo te faʼahi ʼaia. Neʼe tokoni fēnei ia Petelo: “Koutou faka ʼuhiga te kātaki fualoa ʼo totatou ʼAliki ko he fakamaʼuli ʼo tatou.” (2 Petelo 3:15, MN ) Neʼe faka fealagia e te kātaki fualoa ʼa Sehova ki he tahi ʼu miliona hahaʼi faitotonu ke nātou ako te moʼoni. ʼE mole koa la matalelei te faʼahi ʼaia? Pea tahi ʼaē meʼa, ʼaki te kātaki fualoa ʼa Sehova, ʼe lahi ai totatou temi ke tou “haga gāue ki [totatou] hāofaki ʼaki te manavasiʼi pea mo te tekelili.”—Filipe 2:12; 2 Petelo 3:11, 12, MN.
9. Kapau ʼe mole tou lava gāue lahi maʼa Sehova, pea ʼe lava tokoni feafeaʼi mai te fakatalitali ke tou kātakiʼi te ʼaluʼaga ʼaia?
9 Ko te fakatalitali ʼe tokoni kia tatou ke ʼaua naʼa tou lotovaivai mokā tāʼofi tatatou gāue ki te Puleʼaga e he fakafeagai, peʼe ko te mahaki, peʼe ko te kua liliu ʼo matuʼa, peʼe ko ʼihi atu fihifihia. ʼE fakaʼamu e Sehova ke tou tauhi kia te ia ʼaki he loto katoa. (Loma 12:1) Kae ko te ʼAlo ʼo te ʼAtua, ʼaē ʼe “fakaʼofaʼofa kia ia ʼaē ʼe veliveli pea mo ʼaē ʼe masiva,” ʼe mole ina fakamaʼua mai ke tou foaki he ʼu meʼa ʼe fakalaka ʼi te ʼu meʼa ʼaē ʼe tou fealagia; pea ʼe toe feiā pe mo Sehova. (Pesalemo 72:13) Koia, ʼe fakaloto mālohiʼi tatou ke tou fai te meʼa ʼaē ʼe tou lavaʼi, ʼo tou fakatalitali ʼaki he lotoʼutaki ke fetogi te ʼu ʼaluʼaga—ʼi te tuʼu ʼo te ʼu faʼahiga meʼa ʼaenī peʼe ʼi te tuʼu ka haʼu. Koutou manatuʼi te potu ʼaenī: “ ʼE mole heʼe agatonu te ʼAtua ke ina galoʼi takotou gāue pea mo te ʼofa ʼaē neʼe koutou fakahā ʼo ʼuhiga mo tona huafa, ʼi takotou tauhi te kau maʼoniʼoni pea ʼe kei hoko atu pe takotou tauhi kia nātou.”—Hepeleo 6:10, MN.
10. Koteā te aga ʼaē ʼe tou lava tekeʼi mo kapau ʼe tou poto ʼi te fakatalitali? Koutou fakamahino.
10 Ko te fakatalitali ʼe toe tokoni aipe foki kia tatou ke ʼaua naʼa tou fiameʼalahi. Ko ʼihi neʼe nātou liliu ko te kau ʼaposita he neʼe mole kei nātou fia fakatalitali. ʼI tanatou sio, neʼe lagi tonu ke fai he ʼu fetogi ʼi te ʼu fakamahinohino faka Tohi-Tapu peʼe ʼi te ʼu fakatuʼutuʼu ʼo te kautahi. Kae, neʼe galo kia nātou ko te laumālie ʼo Sehova ʼaē ʼe ina takitaki te tagata kaugana agatonu mo poto ke ina fai he ʼu fetogi ʼi Tona temi totonu, kae ʼe mole hoko ʼi te temi ʼaē ʼe lagi tou fakaʼamu ke hoko ai. Pea ko te ʼu fetogi ʼe tonu ke ʼalutahi mo te finegalo ʼa Sehova, kae mole ko te ʼu manatu ia ʼa tatou. ʼE tuku e te kau ʼaposita ke fakahehema tanatou ʼu fakakaukau e te fiameʼalahi pea mo fakatupu tūkia kia nātou. Kae kapau neʼe nātou maʼu te faʼahiga manatu ʼa Kilisito, neʼe lagi feala pe ke nātou taupau tanatou fiafia pea mo nonofo ʼi te hahaʼi ʼa Sehova.—Filipe 2:5-8.
11. E feafeaʼi hatatou fakaʼaogaʼi lelei te temi ʼaē ʼe tou fakatalitali ai, ʼo tou mulimuli ki te ʼu faʼifaʼitaki fea?
11 ʼE mahino ia, ko te haga fakatalitali ʼe mole faka ʼuhiga ia ke tou fakapikopiko peʼe mole tou fai he meʼa. ʼE ʼi ai te ʼu meʼa ʼe tonu ke tou fai. Ohage la, ʼe tonu ke tou maʼumaʼua ʼo ako takitokotahi te Tohi-Tapu, pea mo tou fakahā ai tatatou fia fai ki te ʼu meʼa fakalaumālie, ohage ko te meʼa ʼaē neʼe fai e te kau polofeta agatonu pea mo te kau ʼaselo. ʼO ʼuhiga mo te potu ʼaia, ʼe ʼui fēnei e Petelo: “E ko te haofaki aeni, nee fekumi mo fakasiosio e te kau polofeta . . . ko mea aia nee fakaamuʼage te kau aselo ke natou fakasiosio.” (1 Petelo 1:10-12) ʼE maʼua ke kita ako takitokotahi, pea ʼe toe maʼua foki ke kita kau tuʼumaʼu ki te ʼu fono, pea mo kita fakaōvi ki te ʼAtua ʼi te faikole. (Sakopo 4:8) Ko nātou ʼaē ʼe nātou ʼiloʼi te ʼaoga kia nātou ʼo te ʼu meʼa fakalaumālie, ʼo nātou toʼo te meʼa kai fakalaumālie pea mo fakatahi mo ʼonatou ʼu tēhina Kilisitiano, ʼe nātou fakahā ai ʼe nātou maʼu te aga ʼa Kilisito.—Mateo 5:3.
Tou Maʼu He Manatu Fakapotopoto
12. (a) Ko te ʼāteaina fea ʼaē neʼe faiga kiai ia Atama mo Eva? (b) Koteā tona fua ki te malamanei te tonu ʼaē neʼe fai e Atama mo Eva?
12 ʼI te fakatupu e te ʼAtua te ʼuluaki taumatuʼa, neʼe maʼu ʼāteaina pe e ia te fealagia ʼaē ke ina fakatuʼu te meʼa ʼaē ʼe lelei pea mo te meʼa ʼaē ʼe kovi. (Senesi 2:16, 17) Neʼe mole kei fia fai ia Atama mo Eva ki te takitaki ʼa te ʼAtua, pea neʼe iku ai ki te mālama ʼaē ʼe tou sio kiai ʼi te temi nei. Neʼe ʼui fēnei e te ʼapositolo ko Paulo: “Aki he tagata e tahi nee hu mai te agahala ki te malama-nei pea aki te agahala ia te mate, pea nee ausia e te mate te tagata fuape: pea tahi, kua agahala fuli.” (Loma 5:12) Neʼe fakahā tonu e te ʼu taʼu e ono afe ʼo te hisitolia ʼo te tagata talu mai te temi ʼo Atama, ʼe moʼoni te ʼu palalau ʼaenī ʼa Selemia: “ ʼE ʼau ʼiloʼi pe, Ê Sehova, ko te tagata kelekele ʼe mole ʼa ia tona ala. ʼE mole ʼa te tagata ʼaē ʼe haʼele te takitaki ʼo tana haʼele.” (Selemia 10:23) Ko te fakamoʼoni ki te ʼu palalau ʼa Selemia ʼe mole faka ʼuhiga leva ʼe mole lava fai he meʼa lelei. Kae ʼe tou ʼiloʼi totatou ʼuhiga. ʼE tou mahino ai, ʼi te sēkulō fuli ʼaenī ‘neʼe puleʼi e te tagata te tagata ki tona malaʼia,’ tupu pe he neʼe līaki e te tagata te pule ʼa te ʼAtua.—Tagata Tānaki 8:9.
13. Koteā te manatu fakapotopoto ʼaē ʼe maʼu e te kau Fakamoʼoni ʼa Sehova ʼo ʼuhiga mo te ʼu meʼa ʼe lava fai e te tagata?
13 ʼI tanatou sio ki te ʼaluʼaga ʼo te tagata, ʼe mahino ki te kau Fakamoʼoni ʼa Sehova, ʼe ʼi ai te ʼu tuʼakoi ki te ʼu meʼa ʼaē ʼe ina lava fakahoko ʼi te tuʼu ʼo te ʼu faʼahiga meʼa ʼaenī. Ko he aga ʼe lelei ʼe lava tokoni mai ke tou taupau tatatou fiafia, kae ʼe mole ko te puleʼaki ʼaia ki te ʼu meʼa fuli. ʼI te kamataʼaga ʼo te ʼu taʼu 1950, neʼe tā e te tagata takitaki lotu Amelika tana tohi neʼe lahi tona toʼo e te hahaʼi, ko tona kupu tāfito The Power of Positive Thinking (Te Mālohi ʼo Te Manatu Lelei) Neʼe ʼui e te tohi ʼaia ʼe lahi te ʼu fihifihia ʼe feala hakita mālo ai, mo kapau ʼe tou fai puleʼaki kiai ʼaki he aga ʼe lelei. ʼE mahino ko he meʼa lelei hakita maʼu te manatu ʼaē ʼe lelei. Kae ʼe fakahā e te ʼu meʼa ʼaē ʼe hoko ʼi te maʼuli, ko he ʼatamai, mo he faiva, mo he puleʼaki fakakoloa, pea mo he tahi ʼatu ʼu meʼa, ʼe nātou tāʼofi te ʼu meʼa ʼaē ʼe tou lava fakahoko. Pea ʼi te malamanei katoa, ʼe faigataʼa fau te ʼu fihifihia ke fakatokatoka e te tagata—tatau aipe peʼe lelei tana manatu.
14. ʼE maʼu koa e te kau Fakamoʼoni ʼa Sehova he faʼahiga manatu ʼe kovi? Koutou fakamahino.
14 ʼUhi ko tanatou palalau fakahagatonu ki te ʼu faʼahi ʼaia, ʼe tautau ʼui ai ʼo ʼuhiga mo te kau Fakamoʼoni ʼa Sehova ʼe nātou maʼu he ʼu faʼahiga manatu ʼe mole lelei. Kae ʼe nātou fia palalau ki te hahaʼi ʼo ʼuhiga mo te puleʼaki pe e Tahi ʼaē ʼe feala ke ina hikihiki ʼo talu ai te maʼuli ʼo te tagata. ʼI te faʼahi ʼaia, ʼe nātou toe mulimuli ai pe foki ki te faʼahiga manatu ʼa Kilisito. (Loma 15:2) ʼE nātou maʼumaʼua ʼi te tokoni ki te hahaʼi ke nātou maʼu he ʼu felogoi lelei mo te ʼAtua. ʼE nātou ʼiloʼi ʼaki te temi, ʼe fua lelei anai te faʼahi ʼaia.—Mateo 28:19, 20; 1 Timoteo 4:16.
15. ʼE hikihiki feafeaʼi e te gāue ʼa te kau Fakamoʼoni ʼa Sehova te faʼahiga maʼuli ʼo te hahaʼi?
15 ʼE ʼiloʼi lelei e te kau Fakamoʼoni ʼa Sehova te ʼu fihifihi faka sosiale ʼaē ʼe hoko ʼi ʼonatou tafaʼaki—tāfito te ʼu aga heʼeʼaoga ʼaē ʼe mole ʼalutahi mo te Tohi-Tapu. ʼI muʼa ʼo te liliu ʼa he tahi ʼe lotolelei ko he Fakamoʼoni ʼa Sehova, ʼe ina fai muʼa te ʼu fetogi, ʼi te agamāhani ʼe faiga mālohi ke ina līaki te ʼu aga ʼaē ʼe ina fai māhani kae ʼe fehiʼa kiai te ʼAtua. (1 Kolonito 6:9-11) Koia, neʼe tokoni te kau Fakamoʼoni ʼa Sehova ki te hahaʼi ʼaē ʼe nātou tali lelei ke nātou lava līaki te konahia, te toloke, te ʼu aga heʼeʼaoga, pea mo te gaoʼi paʼaga. Ko te ʼu hahaʼi ʼaia ʼaē kua fetogi, neʼe nātou ako te tokakaga ki tonatou ʼu famili, ʼo nātou fakahoko fakalelei ʼonatou ʼu maʼua. (1 Timoteo 5:8) Ka tokoniʼi feiā he ʼu tagata pea mo he ʼu famili, pea ʼe maʼamaʼa ifo te ʼu fihifihia ʼo te fenua—ʼe mole kei lahi te hahaʼi toloke, mo te ʼu agamālohi ʼaē ʼe hoko ʼi te ʼu loto fale, pea mo ʼihi ʼatu ʼu meʼa. ʼI tanatou liliu ko he ʼu hahaʼi ʼe nātou mulimuli lelei ki te lao pea mo tanatou tokoni ki te hahaʼi ke nātou hikihiki tonatou maʼuli, ʼe fakasiʼisiʼi ai e te kau Fakamoʼoni ʼa Sehova te kavega ʼa te ʼu kautahi ʼaē ko tanatou gāue ko te kumi puleʼaki ki te ʼu fihifihia faka sosiale.
16. He koʼe koa ʼe mole kau te kau Fakamoʼoni ʼa Sehova ki te ʼu fakatuʼutuʼu fakamālama ʼo ʼuhiga mo te ʼu fetogi?
16 Neʼe fetogi koa e te kau Fakamoʼoni ʼa Sehova te faʼahiga aga ʼo te malamanei? ʼI te ʼu taʼu e hogofulu kua ʼosi, ko te hahaʼi ʼo te kau Fakamoʼoni ʼaē neʼe tuputupu ake mai te tokosiʼi ʼaē ko te toko 3 800 000 ʼo teitei kaku ki te toko 6 000 000. Ko te tuputupu ʼe teitei 2 200 000, pea ko te tokolahi ia nātou neʼe nātou lītuʼa ki tanatou ʼu aga heʼe faitotonu ʼi te temi ʼaē neʼe nātou liliu ai ko te kau Kilisitiano. Ei, tokolahi te hahaʼi kua nātou hikihiki tonatou maʼuli! ʼE moʼoni, ʼe veliveli ʼaupito te tuputupu ʼaia mokā fakatatau ki te tuputupu ʼo te hahaʼi ʼi te malamanei ʼi te temi pe ʼaia—ko te toko 875 000 000! ʼE fiafia ʼaupito te kau Fakamoʼoni ʼa Sehova ʼi te tokoni ki te hahaʼi ʼaē ʼe nātou lotolelei kiai, logope la ʼe mahino kia nātou ʼe tokosiʼi te hahaʼi ʼi te malamanei ʼaē ka nātou fili anai te ala ʼo te maʼuli. (Mateo 7:13, 14) ʼE fakatalitali te kau Fakamoʼoni ke hoko lelei te ʼu fetogi faka malamanei ʼaē ʼe lava fakahoko e te ʼAtua tokotahi pe, kae ʼe mole nātou kau ki te ʼu fakatuʼutuʼu fakamālama ʼo ʼuhiga mo te ʼu fetogi ʼaē ʼe kamata lelei, pea ʼi te agamāhani ʼe fakaʼosiʼosi kovi ʼaki he ʼu fakahemala peʼe iku ki he ʼu agamālohi.—2 Petelo 3:13.
17. Neʼe tokoni feafeaʼi ia Sesu ki te hahaʼi, kae koteā ʼaē neʼe mole ina fai?
17 ʼO mulimuli ki te potu ʼaia, ʼe fakahā e te kau Fakamoʼoni ʼa Sehova he falala kia Sehova ohage ko tona fakahā e Sesu ʼi te temi ʼaē neʼe nofo ai ʼi te kele. ʼI te ʼuluaki sēkulō, neʼe fakahoko e Sesu te ʼu fakamālōlō faka milakulo. (Luka 6:17-19) Neʼe ina fakatuʼu mo te kau mate. (Luka 7:11-15; 8:49-56) Kae neʼe mole ina pulihi te faigataʼaʼia ʼaē ko te mahaki peʼe ko te mate. Neʼe ina ʼiloʼi neʼe mole heʼeki hoko mai te temi ʼaē neʼe fakakatofa e te ʼAtua ki te potu ʼaia. ʼAki te ʼu fealagia tauʼaluga ʼo tona ʼuhiga tagata haohaoa, neʼe lagi feala pe ke ina fakatokatoka he ʼu fihifihia lahi ʼi te faʼahi faka politike peʼe faka sosiale. Neʼe ʼi ai te ʼu hahaʼi ʼo tona temi neʼe nātou fia fakanofo ia ia ki he tuʼulaga māʼoluga, ke ina fakahoko te ʼu potu ʼaia, kae neʼe fakafisi ia kiai. ʼE tou lau fēnei: “I te mamata te hahai ki te fakailoga aia nee ina fai, nee natou lau: ‘E ko ia mooni aeni te Polofeta e tonu ke haele mai ki te malama-nei.’ Nee iloi e Sesu, e natou amanaki oloʼage o puke ia ke natou fakanofo hau, pea nee toe hake ia ki te mouga tokotahi.”—Soane 6:14, 15.
18. (a) Neʼe feafeaʼi te fakahā tuʼumaʼu e Sesu te aga fakatalitali? (b) Neʼe fetogi feafeaʼi te gāue ʼa Sesu talu mai te taʼu 1914?
18 Neʼe mole fia kau Sesu ki he ʼu meʼa faka politike peʼe ko he ʼu meʼa faka sosiale, koteʼuhi neʼe ina ʼiloʼi neʼe mole heʼeki hoko mai kia ia te temi ke ina maʼu te mālohi faka hau, pea mo te fakamālōlō ʼo te hahaʼi fuli ʼi te potu fuli. Māʼia mo tana hake ʼaē ki selo ʼo liliu ai ko he laumālie tuputupua, neʼe fakatalitali aipe ki te temi ʼaē kua fakakatofa e Sehova ke ina fakahoko ai tana gāue. (Pesalemo 110:1; Gaue 2:34, 35) Kae talu mai te temi ʼaē neʼe fakanofo hau ai ʼi te Puleʼaga ʼo te ʼAtua ʼi te taʼu 1914, kua “hū fakatoʼa ia ki tuʼa pea mo fakaʼosi tana mālo.” (Apokalipesi 6:2; 12:10, MN ) Koia, ʼaki he loto fakafetaʼi ʼe tonu ke tou fakalogo ki tona ʼuhiga hau, ʼo mole hage ko nātou ʼaē ʼe nātou lau ko nātou ko te kau Kilisitiano, kae ʼe mole nātou fia tokagaʼi te ʼu akonaki faka Tohi-Tapu ʼo ʼuhiga mo te Puleʼaga!
Te Fakatalitali—ʼE Fakatupu Fītaʼa Peʼe Fakatupu Fiafia?
19. Ko te temi fea ʼaē ʼe ʼui ai ko te fakatalitali ʼe fakatupu ‘mahaki ki te loto,’ pea ʼe ko te temi fea ʼaē ʼe liliu ai ko he meʼa fakafiafia?
19 Neʼe ʼiloʼi e Salomone ʼe feala ke fakatupu fītaʼa te fakatalitali. Neʼe ina tohi fēnei: “ ʼE mahaki te loto, mokā ʼe mole hoko vave te meʼa ʼaē ʼe fakatalitali kiai.” (Tāʼaga Lea 13:12) ʼE mahino ia, kapau ʼe fakaʼamu he tahi ki te ʼu meʼa ʼaē ʼe fakatalitali kiai kae ʼe mole hona tafitoʼaga, pea ʼe feala pe ke mahaki tona loto ʼi te lotomamahi. Kae ko te fakatalitali ki he ʼu ʼaluʼaga fakafiafia—lagi ko he fai ʼohoana, peʼe ko te tupu ʼo he tamasiʼi, peʼe ko he fakatahi mo he ʼu hahaʼi ʼe tou ʼoʼofa ai—ʼe feala pe ke lahi ai hatatou fiafia fakatomuʼa, kae mole heʼeki hoko mai te ʼu faʼahi ʼaia. ʼE lesili lahi te fiafia ʼaia mo kapau ʼe tou fakaʼaogaʼi fakalelei te temi ʼaē ʼe kei toe, ʼo tou fai he ʼu teuteu ki te ʼaluʼaga ʼaia.
20. (a) Koteā te ʼu fakatuʼutuʼu ʼaē ʼe tou fakatalitali ʼaki he loto falala ke tou sisio kiai? (b) E feafeaʼi hatatou maʼu te fiafia ʼi tatatou fakatalitali ke hoko te ʼu fakatuʼutuʼu ʼa Sehova?
20 Mokā ʼe tou falala katoa ko te ʼu fakatalitali ʼaia ʼe hoko anai—tatau aipe peʼe mole tou ʼiloʼi pe ko te temi fea ʼaē ka hoko ai—‘ ʼe mole mahaki anai totatou loto’ lolotoga te temi fakatalitali ʼaia. ʼE ʼiloʼi ia e te kau tauhi agatonu ʼa te ʼAtua kua ōvi mai te ʼu Taʼu e Afe ʼaē ka ʼAfio ai ia Kilisito. ʼE nātou falala ʼe nātou sisio anai ki te fakagata ʼo te mate pea mo te mahaki. ʼAki he fiafia fakatomuʼa, ʼe nātou fakatalitali ki te temi ʼaē ka nātou tali anai te lauʼi miliale hahaʼi ʼaē ka tutuʼu ake mai te mate, ʼaē ʼe kau ki ai te kau mate ʼaē neʼe nātou ʼoʼofa ai. (Apokalipesi 20:1-3, 6; 21:3, 4) ʼI te ʼu temi faigataʼa ʼaenī ʼo te lakilisi faka ekolosike, ʼe nātou fakafiafia heʼe nātou ʼiloʼi ʼe nātou sio moʼoni anai ki te fakatuʼutuʼu ʼo te Palatiso ʼi te kele. (Isaia 35:1, 2, 7) ʼE ko he aga fakapotopoto ke tou fakaʼaogaʼi fakalelei te temi ʼaē ʼe tou fakatalitali ai moʼo “fakalahi tuʼumaʼu ai tatatou ʼu gāue ʼi te ʼAliki”! (1 Kolonito 15:58, MN ) Tou kātaki ʼo fakaʼaogaʼi te meʼa kai fakalaumālie. Tou fakatuputupu he ʼu felogoi lelei mo Sehova. Tou kumi te hahaʼi ʼaē ʼe nātou fia tauhi fakamalotoloto kia Sehova. Tou fakaloto mālohiʼi totatou ʼu kau fagona ʼi te tui. Tou fakaʼaogaʼi te ʼu faigamālie fuli ʼo te temi ʼaē ʼe kei tuku mai e Sehova. Koia ko te fakatalitali kia Sehova ʼe mole fakatupu ‘mahaki anai ki tokotou loto’ ʼi he temi. Kae ʼe koutou fonu anai ʼi te fiafia!
ʼE Feala Hakotou Fakamahino?
• Neʼe fakahā feafeaʼi e Sesu te aga fakatalitali?
• Ko te ʼaluʼaga fea ʼaē ʼe tonu ai ki te kau Kilisitiano ke nātou fakatalitali?
• He koʼe koa ʼe fiafia te kau Fakamoʼoni ʼa Sehova ʼi te fakatalitali kia Sehova?
• ʼE lava liliu feafeaʼi te fakatalitali kia Sehova ko he meʼa fakatupu fiafia?
[Paki ʼo te pasina 12]
Neʼe faʼa kātaki ia Sesu ʼuhi ko te fiafia ʼaē neʼe fakapapauʼi age kia te ia
[Paki ʼo te pasina 13]
Tatau aipe peʼe kua fualoa hatatou gāue, kae ʼe feala pe hatatou taupau totatou fiafia
[Paki ʼo te pasina 15]
Ko te ʼu lauʼi miliona hahaʼi neʼe nātou hikihiki tonatou maʼuli ʼi tanatou liliu ko he kau Fakamoʼoni ʼa Sehova