Ko Te Faʼahiga Tagata Fea ʼAe ʼe Tonu Ke Kotou Hoko Ki Ai?

1, 2. Kotea ʼae ʼe ʼaoga kia tatou ke tou maʼu ai te ʼofa ʼo te ʼAtua?

TOKOLAHI ʼe natou fia iloʼi pe kotea te manatu ʼa ʼihi ʼo ʼuhiga mo natou. Kaʼe ʼi totatou ʼuhiga Kilisitiano, ʼe ko te manatu ʼa Sehova ʼo ʼuhiga mo tatou ʼae ʼe maʼuhiga age. ʼE ko ia ʼae ʼe lahi tokotahi ʼi te ʼatulaulau, pea ʼe ko “te matapuna o te mauli.”—Pes. 36:10.

² ʼE fakamahino e te apositolo ko Petelo pe kotea ʼae ʼe ʼaoga kia tatou ke tou maʼu ai te ʼofa ʼo Sehova. ʼE ina ui fenei: “Mai tona ʼuhiga ʼae ʼe tonu ki te ʼu meʼa fuli ʼaia ke mavetevete, ko te ʼu faʼahiga tagata feafeaʼi anai ia koutou ʼi te aga maʼoniʼoni pea mo te ʼu gaue ʼae ʼe fakaʼiloga ʼaki takotou pipiki ki te ʼAtua.” (2 Pet. 3:11, MN) ʼE maʼoniʼoni ʼatatou “aga” mo kapau ʼe tou maʼa ʼi te ʼu faʼahi fuli ʼo totatou maʼuli. ʼE kau ki ai ʼatatou manatu, tatatou aga pea mo tatatou tauhi ki te ʼAtua. Pea ʼe toe ʼaoga ke tou fai “te ʼu gaue ʼae ʼe fakaʼiloga ʼaki [tatatou] pipiki ki te ʼAtua” heʼe tou ʼofa lahi mo fakaʼapaʼapa ki te ʼAtua. Koia ʼe maʼuhiga ki te ʼAtua tatatou aga mo te ʼu meʼa ʼae ʼe tou logoʼi ʼo ʼuhiga mo ia. Ko Sehova ʼe ina “ahiahii [peʼe sivisivi] te u loto,” koia ʼe ina iloʼi ai pe maʼoniʼoni ʼatatou aga pea mo tou tauhi ʼateaina pe kia te ia.—1 Klk. 29:17.

3. Kotea te ʼu fehuʼi ʼe tonu ke tou fai?

³ Ko Satana te Tevolo ʼe mole ina loto ke tou maʼu te ʼofa ʼo te ʼAtua. ʼI tona fakahagatonu, ʼe faiga malohi ia ke tou liakī tatatou fakakaumeʼa ʼae mo Sehova. ʼE fakaʼaogaʼi tuʼumaʼu e Satana te ʼu loi moʼo kakā ʼi ʼo tatou ke tou tuku tatatou tauhi kia Sehova. (Soa. 8:44; 2 Ko. 11:13-15) Koia ʼe tonu ai ke tou fai te ʼu fehuʼi ʼaeni: “ ʼE kakā ʼi feafeaʼi e Satana ia te hahaʼi? Kotea ʼae ʼe au lava fai moʼo puipui taku fakakaumeʼa ʼae mo Sehova?”

ʼE KAKĀ ʼI FEAFEAʼI E SATANA IA TE HAHAʼI?

4. Kotea ʼae ʼe faiga ke fai e Satana moʼo maumauʼi tatatou fakakaumeʼa mo te ʼAtua? Pea kotea tona tupuʼaga?

⁴ Neʼe tohi fenei e te tisipulo ko Sakopo: “E fakahalai te tagata moka kua taki ia mo fakaholoholoi ia e tona holi totonu. Pea ka faitama te holi, e ina fanaui te agahala; pea ka katoa te agahala, e ina fanaui te mate.” (Sakp. 1:14, 15) Moʼo maumauʼi tatatou fakakaumeʼa mo te ʼAtua, ʼe faiga e Satana ke kakusia ki totatou loto, heʼe tupu mai ai ʼotatou holi.

5, 6. (1) ʼE faigaʼi feafeaʼi e Satana ke ina kakā ʼi totatou loto? (2) Kotea te ʼu meʼa ʼe tolu ʼe fakaʼaogaʼi e Satana moʼo fakatupu ni holi ʼe kovi ʼi totatou loto? Pea ʼaki te temi kua feafeaʼi tana fakaʼaogaʼi te ʼu meʼa ʼaia?

⁵ ʼE faigaʼi feafeaʼi e Satana ke ina kakā ʼi totatou loto? ʼE ui fenei ʼi te Tohi-Tapu: “E malolo te malamanei katoa i te malohi o te kovi.” (1 Soa. 5:19) ʼE kau ki te ʼu kakā ʼa Satana ia “te u mea ae e mau i te malamanei.” (Lau ia 1 Soane 2:15, 16.) Lolotoga ni lau ʼi afe taʼu, neʼe faʼufaʼu lelei e te Tevolo ia te malama ʼaeni moʼo kakā ʼi te hahaʼi. Pea ʼuhi ʼe tou maʼuʼuli ʼi te malama ʼaeni, koia ʼe ʼaoga ai ke tou puipui ia tatou mai ʼana kakā.—Soa. 17:15.

⁶ ʼE faigaʼi e Satana ke ina fakatupu ni holi ʼe kovi ʼi totatou loto. Moʼo fai te faʼahi ʼaia, ʼe ina fakaʼaogaʼi te ʼu meʼa ʼaeni ʼe tolu “e mau i te malamanei” ʼae ʼe talanoa ki ai te apositolo ko Soane: (1) “te u holi o te kakano,” (2) “te manumanu o te u mata,” pea (3) “te fiamealahi o te mauli.” Neʼe fakaʼaogaʼi e Satana te ʼu meʼa ʼaia ʼe tolu moʼo fakahalaʼi ʼo Sesu ʼi te toafa. Kua fakaʼaogaʼi e Satana te ʼu kakā ʼaia talu mai ni taʼu, koia ʼae kua liliu ai ʼo faiva ʼi tona fakaʼaogaʼi, pea ʼe ina iloʼi lelei te kakā ʼae ʼe tonu ke ina fakaʼaogaʼi ki he tahi pe. Kaʼe ʼi muʼa ʼo tatatou iloʼi pe feafeaʼi te puipui ʼo tatou, tou vakaʼi pe neʼe lava kakā ʼi feafeaʼi e te Tevolo ia Eva, kaʼe neʼe mole ina lava kakā ʼi te ʼAlo ʼo te ʼAtua.

“TE U HOLI O TE KAKANO”

7. Neʼe fakaʼaogaʼi feafeaʼi e Satana “te u holi o te kakano” moʼo fakahalaʼi ia Eva?

⁷ ʼE ʼaoga ki te tagata fuli he meʼa kai ke haga maʼuli. Neʼe fakatupu e te Tupuʼaga te kele ke mahu ai te meʼa kai. ʼE lagi faiga e Satana ke ina fakaʼaogaʼi tatatou fia kai moʼo fakahalaʼi ʼo tatou ke tou fai he meʼa ʼe mole leleiʼia e te ʼAtua. Tou vakaʼi pe neʼe feafeaʼi tana fai te faʼahi ʼaia kia Eva. (Lau ia Senesi 3:1-6.) Neʼe ui age e Satana kia Eva ʼe mole mate anai mo kapau ʼe ina kai ki te fua ʼi ʼakau ʼo “te akau o te iloilo o te lelei mo te kovi.” Neʼe ina ui age kapau ʼe ina kai ki ai, pea ʼe hage anai ko te ʼAtua. (Sen. 2:9) Neʼe fia ui e te Tevolo kapau ʼe loto e Eva ke haga maʼuli, pea ʼe mole ʼaoga hana fakalogo ki te ʼAtua. Kaʼe neʼe ko te toe loi ia! ʼI te ʼosi fakahu e te Tevolo te manatu ʼaia ki tona ʼatamai, neʼe tonu kia Eva ke ina fai he tonu: Ke ina liakī te manatu ʼaia, peʼe ke ina haga fakakaukauʼi pea mo fakagafua ke tuputupu tana holi ʼae ki te fua ʼi ʼakau. Logo la neʼe feala pe hana kai ki te ʼu fua ʼi ʼakau ʼo te tahi ʼu fuʼu ʼakau, kaʼe neʼe ina filifili ke haga manatu ki te fuʼu ʼakau ʼae ʼi te lotomalie ʼo te ʼoloto. Pea neʼe ina kai leva te fua ʼi ʼakau. Neʼe fakatupu e Satana ia ia he holi ki he meʼa neʼe tapuʼi age e tona Tupuʼaga.

8. Neʼe fakaʼaogaʼi feafeaʼi e Satana “te u holi o te kakano” moʼo fakahalaʼi ia Sesu? He ko ʼe neʼe mole he fua ʼo te fakahala ʼaia ʼa Satana?

⁸ Neʼe faigaʼi e Satana ke ina toe fakaʼaogaʼi te kakā ʼaia kia Sesu. ʼI te temi ʼae neʼe nofo ai Sesu ʼi te toafa pea neʼe mole kai lolotoga ʼaho ʼe 40 mo po ʼe 40, neʼe faigaʼi ai e Satana ke ina fakahalaʼi ia ia ʼaki tana fakaʼaogaʼi tana fia kai. Neʼe ui fenei e Satana: “Kapau ko te Alo ia koe o te Atua, fakatotonu ki te foi maka aeni ke liliu ia ia ko he pane.” (Luka 4:1-3) Neʼe tonu ke fai e Sesu he tonu: Ke mole ina fakaʼaogaʼi tona malohi moʼo fakafimalieʼi tana fia kai, peʼe ke ina fakaʼaogaʼi. Neʼe iloʼi e Sesu ʼe mole tonu ke ina fakaʼaogaʼi tona malohi maʼa ia. Logo la tana fia kai, kaʼe kia te ia ko tana fakakaumeʼa mo te ʼAtua ʼae neʼe maʼuhiga age ʼi te meʼa kai. Koia neʼe ina tali fenei age: “E tuu i te tohi: E mole mauli anai te tagata ki te pane pe, kae ki te u folafola fuli ae e hau mai te gutu o te Atua.”—Mat. 4:4.

“TE MANUMANU O TE U MATA”

9. Kotea “te manumanu o te u mata”? Neʼe fakaʼaogaʼi feafeaʼi e Satana te kakā ʼaia kia Eva?

⁹ Ko te tahi kakā ʼa Satana ʼae neʼe talanoa ki ai ia Soane, ʼe ko “te manumanu o te u mata.” ʼE feala ke kamata holi he tahi ki he meʼa ʼaki pe tana sio. Neʼe fakaʼaogaʼi e Satana te holi ʼaia moʼo kakā ʼi ia Eva pea neʼe ina ui fenei: “E ava anai [ʼou] mata.” ʼI te haga sioʼi e Eva ia te fua ʼi ʼakau, neʼe toe ʼasili ai mo tana holi ki ai. Neʼe sio leva ia Eva ko te fuʼu ʼakau neʼe “matalelei ki te mata.”

10. Neʼe fakaʼaogaʼi feafeaʼi e Satana “te manumanu o te u mata” moʼo fakahalaʼi ʼo Sesu? Pea neʼe kotea te tali ʼa Sesu?

¹⁰ Neʼe fakaʼaogaʼi feafeaʼi e Satana “te manumanu o te u mata” moʼo fakahalaʼi ʼo Sesu? Neʼe “fakaha [e Satana] kia ia i he temi e tahi te u puleaga fuli o te kele, pea nee ina ui leva kia ia: E au foaki atu anai kia koe te mafimafi katoa aena, pea mo te kololia o te u puleaga aena.” (Luka 4:5, 6) Neʼe mole sio moʼoni ia Sesu ki te atu puleʼaga ʼo te kele, kaʼe neʼe ko he ʼata pe ia ʼo te kololia ʼo te ʼu puleʼaga ʼaia. Neʼe lagi manatu Satana ʼe holi anai ia Sesu ki te ʼu meʼa ʼae neʼe sio ki ai. Koia neʼe ina ui fenei kia Sesu: “Kapau e ke atolasio mai kia au, e ke mau anai ia ia katoa.” (Luka 4:7) Neʼe mole loto tuʼa tahi e Sesu ke liliu ko te faʼahiga tagata ʼae ʼe loto ki ai Satana. Koia neʼe ina tali fenei atu aipe: “E kua tohi: E ke atolasio anai [kia Sehova], tou Atua, pea e ke tauhi anai kia ia toko tahi.”—Luka 4:8.

“TE FIAMEALAHI O TE MAULI”

11. Neʼe feafeaʼi te kakā ʼi ʼo Eva e Satana?

¹¹ Moʼo fakaʼosi, ʼe talanoa Soane ki “te fiamealahi o te mauli.” ʼI te temi ʼae neʼe kei toko lua ai ia Atama mo Eva ʼi te kele, neʼe mole feala ke nā fakahaha ki he tahi age te ʼu meʼa ʼae neʼe nā maʼu. Kaʼe neʼe nā liliu ʼo fiameʼalahi. Neʼe loto e Satana ke tui ia Eva ʼe ʼi ai te meʼa fakaofoofo ʼe tuha ke ina maʼu kaʼe neʼe fufu age e te ʼAtua. Neʼe ui age e te Tevolo ki ai kapau ʼe ina kai ki “te akau o te iloilo o te lelei mo te kovi” pea ʼe “tatau anai mo te Atua, o [ina] iloi anai te lelei mo te kovi.” (Sen. 2:17; 3:5) Neʼe loto e Satana ke manatu ia Eva ʼe mole ʼaoga ia Sehova ki tona maʼuli. Neʼe ko te fiameʼalahi ʼae neʼe lagi tupu ai te tui ʼa Eva ki te loi ʼaia. Neʼe ina kai te fua ʼi ʼakau ʼae neʼe tapuʼi age pea neʼe manatu ia ʼe mole mate anai. Kaʼe neʼe faihala ʼosi ia.

12. Neʼe toe faigaʼi feafeaʼi e Satana ke ina fakahalaʼi ia Sesu? Pea neʼe kotea te tali ʼa Sesu?

¹² Kaʼe ʼo mole hage ko Eva, ko Sesu neʼe ina tuku he faʼifaʼitaki lelei ʼo ʼuhiga mo te agavaivai! Neʼe faigaʼi e Satana ke ina fakahalaʼi ia Sesu ke ina fai he meʼa ke tokagaʼi ia ia pea mo ʼahiʼahiʼi te ʼAtua. Kaʼe neʼe fakafisi ki ai Sesu he neʼe ko he aga fiameʼalahi ia! Koia neʼe fakahagatonu mo mahino lelei tana tali ʼaeni: “Kua fakaha: Aua pe naa ke ahiahii anai [ia Sehova], tou Atua.”—Lau ia Luka 4:9-12.

ʼE TOU LAVA PUIPUI FEAFEAʼI TATATOU FAKAKAUMEʼA MO SEHOVA?

13, 14. ʼE faigaʼi feafeaʼi e Satana ke ina kakā ʼi tatou ia ʼaho nei?

¹³ Ia ʼaho nei, ʼe toe fakaʼaogaʼi pe e Satana te ʼu kakā ʼae neʼe ina fakaʼaogaʼi kia Eva mo Sesu. ʼE ina fakaʼaogaʼi “te u holi o te kakano” moʼo fakahalaʼi te hahaʼi ke natou fai he aga heʼe ʼaoga peʼe ke natou kai mo inu fakavale. ʼE ina fakaʼaogaʼi “te manumanu o te u mata” moʼo fakahalaʼi te hahaʼi ke natou sioʼi ni pakī peʼe ko ni ata ʼe ʼasi ai te ʼu felaveʼi fakasino heʼe ʼaoga, tafitō ʼi te Neti. Pea ʼe ina fakaʼaogaʼi te holi ʼae ko “te fiamealahi o te mauli” moʼo fakahalaʼi te hahaʼi ke natou liliu ʼo fiameʼalahi, mo fia maʼu tuʼulaga, mo fia logona pea mo tanaki honatou ʼu koloa.

¹⁴ ʼE fakaʼaogaʼi e Satana “te u mea ae e mau i te malamanei” ohage pe ko te fakaʼaogaʼi e he tagata tautai ia he mounu. ʼE hage ki te ʼu ika ʼe lelei te mounu, kaʼe ʼi loto ʼe ʼi ai te mataʼū. ʼO toe feia, ʼe fakaʼaogaʼi e Satana ni meʼa ʼe hage ʼe ʼaoga kia tatou, ke tou fia talagataʼa ai ki te ʼu lao ʼa te ʼAtua. ʼE loto e Satana ke tou tui ko tatatou tokaga ki te ʼu meʼa ʼae ʼe ʼaoga kia tatou pea mo maʼuli fimalie, ʼe maʼuhiga age ia ʼi tatatou fai te finegalo ʼo te ʼAtua. ʼE kakā ʼi anai koa koutou e Satana?

15. Ohage pe ko Sesu, ʼe tou lava tekeʼi feafeaʼi totatou kakā ʼi e Satana?

¹⁵ Neʼe lava kakā ʼi e Satana ia Eva, kaʼe neʼe mole ina lava kakā ʼi ia Sesu. ʼI te temi fuli pe ʼae neʼe faigaʼi ai e Satana ke ina kakā ʼi ia ia, neʼe fakaʼaogaʼi e Sesu te Tohi-Tapu pea mo ina tali fenei: “E kua tohi,” peʼe “Kua fakaha.” Kapau ʼe tou ako fakalelei te Tohi-Tapu, pea ʼe tou iloʼi lelei anai te ʼu vaega, ʼo feala ai hatatou manatuʼi ni vaega ʼe tokoni mai anai moka fakahalaʼi tatou. (Pes. 1:1, 2) Ko tatatou manatuʼi te ʼu faʼifaʼitaki ʼo te ʼu kaugana agatonu ʼa te ʼAtua, ʼe feala ke tokoni mai ke tou nofo agatonu, ohage pe ko natou. (Loma 15:4) Pea ko tatatou fakaʼapaʼapa lahi kia Sehova, ko tona fakaʼuhiga, ke tou ʼofa ki te ʼu meʼa ʼae ʼe ʼofa ai mo fehiʼa ki te ʼu meʼa ʼae ʼe fehiʼa ai, ʼe puipui anai tatou.—Pes. 97:10.

16, 17. Ko tatatou fakaʼaogaʼi totatou “ ʼatamai,” kotea tona fua ki te faʼahiga tagata ʼae ʼe tou hoko ki ai?

¹⁶ ʼE fakalotomalohiʼi tatou e te apositolo ko Paulo ke tou fakaʼaogaʼi totatou “ ʼatamai” ke tou liliu ko te faʼahiga tagata ʼae ʼe ina maʼu te manatu ʼa Sehova, kaʼe mole ʼa te malama. (Loma 12:1, 2, MN) ʼE fakamanatuʼi mai e Paulo ʼe tonu ke tou tokakaga fakalelei ki ʼatatou manatu. Neʼe ina ui fenei: “E [tou] holoi ki lalo te u fakakaukau mo te u mea maoluga fuli ae e malaga ake ki te iloi o te Atua, pea e [tou] pilisonii te u manatu fuli o aumai natou ki te fakalogo kia Kilisito.” (2 Ko. 10:5) Ko ʼatatou manatu ʼe ʼi ai ʼona fua ki te faʼahiga tagata ʼae ʼe tou hoko ki ai. Koia ʼe tonu ai ke tou faiga tuʼumaʼu ke tou manatu ki te ʼu meʼa ʼae ʼe leleiʼia e te ʼAtua.—Filp. 4:8.

¹⁷ Kapau ʼe tou loto ke tou maʼoniʼoni, pea ʼe tonu ke tou tekeʼi te ʼu manatu mo te ʼu holi ʼae ʼe kovi. ʼE tonu ke tou ʼoʼofa kia Sehova ʼaki “he loto e maa.” (1 Tim. 1:5) Kaʼe ko te loto ʼe kakā, pea ʼe lagi mole tou iloʼi pe la ia te malave lahi ʼo “te u mea ae e mau i te malamanei” kia tatou. (Sel. 17:9) Koia ʼe maʼuhiga ai ke tou mulimuli ki te tokoni ʼaeni ʼa Paulo: “Kotou fakasiosio kia koutou totonu, ke iloi pe e koutou nofo i te tui; koutou ahiahii koutou totonu.” Ka tou ako te Tohi-Tapu, pea ʼe tonu ke tou fai kia tatou te fehuʼi ʼaeni: “ ʼE leleiʼia koa e te ʼAtua ʼaku manatu mo ʼaku holi?”—2 Ko. 13:5.

18, 19. He ko ʼe ʼe tonu ke tou gaue malohi ke tou liliu ko te faʼahiga tagata ʼae ʼe loto ki ai Sehova?

¹⁸ Ko te tahi faʼahi ʼae ʼe feala ke tokoni mai ke tou tekeʼi “te u mea ae e mau i te malamanei,” ʼe ko tatatou manatuʼi te ʼu palalau ʼaeni ʼa Soane: “E puli te malamanei, mo ona holi foki; kae e nofo o heegata ae e ina fai te finegalo o te Atua.” (1 Soa. 2:17) Ko te malama ʼa Satana ʼe hage ia ʼe tuʼu anai ʼo talu ai, kaʼe ʼe ʼi ai pe anai tona fakaʼosiʼaga. Kapau ʼe tou manatuʼi kua vave pulihi pe te ʼu meʼa fuli ʼo te malama ʼaeni, pea ʼe tokoni mai ke mole lava kakā ʼi tatou e Satana.

¹⁹ Neʼe tohi e te apositolo ko Petelo ʼe tonu ke tou liliu ko te faʼahiga tagata ʼae ʼe leleiʼia e te ʼAtua, ʼo tou “talitali pea [tou] gaue ke hoko vave te aho o te Atua, aho ae e maumaui ai anai e te afi te atu lagi, pea e osiosi ai anai te u mea o te lagi i te tutu e te u ulo o te afi!” (2 Pet. 3:12) Kua vave hoko mai pe te ʼaho ʼaia, pea ʼe fakaʼauha anai e Sehova te malama katoa ʼa Satana. Kaʼe ʼi muʼa ʼo te hoko ʼo te ʼaho ʼaia, ʼe haga fakaʼaogaʼi pe anai e Satana “te u mea ae e mau i te malamanei,” moʼo fakahalaʼi ʼo tatou, ohage pe ko tana fakahalaʼi ia Eva mo Sesu. ʼE mole tonu ke tou hage ko Eva ʼo tou faiga ke tou fakafimalie ʼotatou holi, heʼe fakaʼuhiga ai ko Satana ko totatou ʼatua. ʼE ʼaoga ke tou hage ko Sesu ʼo tou tekeʼi te ʼu fakahala ʼaia, maʼia pe faiga Satana ke hage te ʼu meʼa ʼaia ʼe lelei kia tatou. Tou tahi gaue malohi fuli ke tou liliu ko te faʼahiga tagata ʼae ʼe loto ki ai Sehova.