ʼE Maʼuhiga Koa Kia Koutou Te Moʼoni?
“E koutou iloi anai te mooni, pea e fakaateaina anai koutou e te mooni.”—Soane 8:32.
1. He koʼe neʼe mole tatau te ʼu manatu ʼa Pilato pea mo Sesu ʼo ʼuhiga mo te kupu “mooni”?
“KOTEA ia te mooni?” ʼI te fehuʼi ʼaia ʼa Pilato, neʼe mole ina fia ʼiloʼi te ʼuhiga totonu ʼo te moʼoni. Kae neʼe ʼui fēnei e Sesu: “Ko te mea aeni, nee au tupu mai ai pea nee au haele mai ai ki te malama-nei, ke au fakamooni ki te mooni.” (Soane 18:37, 38) Neʼe talanoa Sesu ki te moʼoni fakaʼatua.
Te Aga ʼa Te Mālama ʼo ʼUhiga Mo Te Moʼoni
2. Koteā te ʼu palalau neʼe fai e Sesu ʼe hā ai te maʼuhiga ʼo te moʼoni?
2 Neʼe ʼui fēnei e Paulo: “E mole mau te tui e te tagata fuli.” (2 Tesalonika 3:2) ʼE toe feiā ʼo ʼuhiga mo te moʼoni. Ko te tokolahi ʼe nātou maʼu te fealagia ʼaē ke nātou ʼiloʼi te moʼoni ʼaē ʼe fakatafito ki te Tohi-Tapu, kae ʼe nātou fakafisi fakahagatonu kiai. Kae ʼe maʼuhiga ʼaupito te moʼoni ʼaia! Neʼe ʼui fēnei e Sesu: “E koutou iloi anai te mooni, pea e fakaateaina anai koutou e te mooni.”—Soane 8:32.
3. Koteā te fakatokaga ʼaē ʼe tonu ke tou manatuʼi ʼo ʼuhiga mo te ʼu akonaki kākā?
3 Neʼe ʼui e te ʼapositolo ko Paulo ko te moʼoni ʼe mole maʼu ʼi te ʼu filosofia pea mo te ʼu talatisio faka tagata. (Kolose 2:8) ʼI tona fakahagatonu, ko te ʼu akonaki ʼaia ʼe ko he ʼu akonaki fakakākā. Neʼe fakatokagaʼi e Paulo ki te kau Kilisitiano ʼo Efeso, kapau ʼe nātou tui kiai, pea ʼe nātou hage anai ko he ʼu kiʼi toe liliki ʼi te faʼahi fakalaumālie “ ʼe fetafeʼaki ʼi te ʼu fuga vai . . . e te matagi ʼo te ʼu akonaki fuli pe, ʼaki te kākā ʼa te tagata, ʼi tanatou faiva ʼaē ʼi te faʼufaʼu ʼo te kākā.” (Efeso 4:14, MN ) Ia ʼaho nei, ko “te kākā ʼa te tagata” ʼe mafola ʼaki te ʼu logo ʼaē ʼe tala e nātou ʼaē ʼe fakafeagai ki te moʼoni fakaʼatua. Ko te ʼu logo ʼaia, ʼe fai moʼo kākāʼi te tui ʼa te hahaʼi, mo tanatou ʼu manatu pea mo te ʼu meʼa ʼaē ʼe nātou fai. Tahi ʼaē meʼa, ko te ʼu logo ʼaia ʼe nātou fetogi te moʼoni ʼaki ni ʼu loi pea nātou tala ko te ʼu loi ʼaia ʼe ko te moʼoni. Kapau ʼe tou fia maʼu te moʼoni logola te ʼu fakaneke kākā ʼaia, pea ʼe tonu ke tou vakaʼi fakalelei te Tohi-Tapu.
Te Kau Kilisitiano Pea Mo Te Mālama ʼAenī
4. Ko ai ʼaē ʼe feala ke ina maʼu te moʼoni, pea koteā te maʼua ʼo nātou ʼaē ʼe nātou tali te moʼoni?
4 ʼO ʼuhiga mo nātou ʼaē neʼe liliu ko tana ʼu tisipulo, neʼe faikole fēnei ia Sesu Kilisito kia Sehova: “Fakamaʼoniʼoniʼi ia nātou ʼaki te moʼoni; ko tau folafola ʼe moʼoni.” (Soane 17:17, MN ) Ko nātou ʼaia neʼe fakamaʼoniʼoniʼi, pe neʼe tuku keheʼi, ke nātou tauhi kia Sehova pea mo fakahā tona huafa pea mo tona Puleʼaga. (Mateo 6:9, 10; 24:14) Logola ʼe mole tali e te hahaʼi fuli, kae ko te moʼoni ʼa Sehova ʼe feala ke maʼu e te hahaʼi fuli pe, ohage ko he meʼa ʼofa kia nātou fuli ʼaē ʼe nātou kumi, mai te ʼu fenua, mo te ʼu lanu, pea mo te agaʼi fenua fuli pe. Neʼe ʼui fēnei e te ʼapositolo ko Petelo: “Kua mahino mai kia te au, e mole fakakehekehei e te Atua he tahi. Kae i te puleaga fuape, ko he tahipe e teki kia te ia mo gaue i te susitisia, e ina tali leleiʼi iaʼia.”—Gaue 10:34, 35.
5. He koʼe ʼe fakatagaʼi te kau Kilisitiano?
5 ʼE faka mafola e te kau Kilisitiano te moʼoni ʼa te Tohi-Tapu ki te hahaʼi, kae ʼe mole tali lelei nātou ʼi te ʼu potu fuli. Neʼe fakatokagaʼi fēnei e Sesu: “E natou tukuʼage anai koutou ki te fakataga, e tamatei anai koutou pea e fehia anai te atu puleaga ia koutou koteuhi ko toku huafa.” (Mateo 24:9) ʼO ʼuhiga mo te vaega ʼaia, neʼe tohi fēnei e te tagata takitaki lotu Ilelani ko John R. Cotter, ʼi te taʼu 1817: “Neʼe mole loto fakafetaʼi te hahaʼi ki te faiga [ʼa te kau Kilisitiano] ke nātou fetogi te maʼuli ʼa te hahaʼi ʼaki tanatou fai faka mafola, kae neʼe nātou fehihiʼa pea mo fakatagaʼi ai te kau tisipulo he neʼe nātou fakahā te ʼu aga kovi ʼa te hahaʼi.” Ko te hahaʼi fai fakataga ʼaia neʼe mole nātou “tali te ʼofa ki te moʼoni ke hāofaki ai nātou.” Koia, neʼe “tuku e te ʼAtua ke fakahalaʼi nātou ke nātou tui ki te loi, koteʼuhi ke fakamāuʼi ia nātou fuape he neʼe mole nātou tui ki te moʼoni, kae neʼe nātou leleiʼia te heʼe faitotonu.”—2 Tesalonika 2:10-12, MN.
6. Koteā te ʼu holi ʼaē ʼe mole tonu ke maʼu e he Kilisitiano?
6 ʼE tokoni fēnei te ʼapositolo ko Soane ki te kau Kilisitiano ʼaē ʼe maʼuʼuli ʼi te mālama agamālohi ʼaenī: “Aua [takotou] ofa i te malama-nei, mo te u mea i te malama-nei. . . . Ko meafuape e mau i te malama-nei, te holi a te kakano mo te holi a te mata pea mo te fiaha i te u koloa, e mole haù ia mai te Tamai, kae e haù mai te malama-nei.” (1 Soane 2:15, 16) Neʼe ʼui fakahagatonu e Soane “ko meafuape.” Koia ʼe tonu ai ke mole tou holi mālohi ki he meʼa ʼe foaki mai e te mālama ʼaenī ʼe feala ke ina fakahēʼi ai tatou mai te moʼoni. Kapau ʼe tou tokagaʼi te tokoni ʼa Soane pea ʼe malave lahi anai ki totatou maʼuli. ʼO feafeaʼi?
7. Ko te ʼiloʼi ʼo te moʼoni, ʼe ina fakaloto mālohi feafeaʼi te loto ʼo te hahaʼi faitotonu?
7 Lolotoga te taʼu 2001, neʼe fai e te kau Fakamoʼoni ʼa Sehova ʼi te māhina fuli te ʼu ako Tohi-Tapu e fā miliona nimageau afe, ʼo nātou akoʼi ki te hahaʼi takitokotahi peʼe ko he ʼu kūtuga te ʼu fakamaʼua ʼa te ʼAtua ke nātou maʼu ai te maʼuli. Koia, ko hahaʼi e toko 263 431 neʼe papitema. Neʼe liliu te mālama ʼo te moʼoni ko he meʼa maʼuhiga ki te ʼu tisipulo foʼou ʼaia, pea neʼe nātou fehiʼa ki te ʼu fakatahi ʼaē ʼe kovi pea mo heʼeʼaoga, mo te ʼu aga ʼaē ʼe fakalainoaʼi ai te ʼAtua pea kua mafola te faʼahi ʼaia ʼi te mālama ʼaenī. Talu tanatou papitema, neʼe nātou haga mulimuli ki te ʼu lekula ʼaē ʼe fakatuʼu e Sehova ki te kau Kilisitiano fuli. (Efeso 5:5) ʼE maʼuhiga koa kia koutou te moʼoni?
ʼE Tokaga Sehova Kia Tatou
8. ʼE tali feafeaʼi e Sehova te foaki ʼo totatou maʼuli kia te ia, pea he koʼe ʼe fakapotopoto ke tou ‘ ʼuluaki kumi muʼa te puleʼaga’?
8 Logola tatatou agahala, kae ʼi tana manavaʼofa ʼe tali e Sehova ke tou foaki totatou maʼuli kia te ia, ohage ʼe fia falele ifo ke tou fakaōvi kia te ia. ʼE ina akoʼi ai tatou ke tou hikihiki tatatou ʼu fakatuʼutuʼu pea mo te ʼu meʼa ʼaē ʼe tou holi kiai. (Pesalemo 113:6-8) Pea ʼe fakagafua mai e Sehova ke tou maʼu he ʼu felogoi lelei mo ia, pea ʼe ina fakapapau mai ʼe tokaga anai kia tatou mo kapau ʼe tou “haga kumi muʼa te puleʼaga pea mo tona faitotonu.” Kapau ʼe tou fai te meʼa ʼaia pea mo tou mālohi ʼi te faʼahi fakalaumālie, pea ʼe ina fakapapau fēnei mai: “ ʼE toe foaki atu anai mo te ʼu meʼa fuli ʼaia kia koutou.”—Mateo 6:33, MN.
9. Ko ai “te kaugana agatonu mo fakapotopoto,” pea ʼi tana fakaʼaogaʼi “te kaugana” ʼaia, ʼe tokaga feafeaʼi Sehova kia tatou?
9 Neʼe filifili e Sesu Kilisito tana toko 12 kau ʼapositolo pea ina fakatuʼu te tafitoʼaga ʼo te kokelekasio ʼa te kau Kilisitiano fakanofo ʼaē neʼe fakahigoa ki muli age, ko “te Iselaele a te Atua.” (Kalate 6:16; Apokalipesi 21:9, 14) Ki muli age, neʼe ʼui ko “te [“kokelekasio,” MN ] o te Atua mauli, ko te pou mo te tafito o te mooni.” (1 Timoteo 3:15) Neʼe fakahā lelei e Sesu ko nātou ʼaia ʼo te kokelekasio ʼe nātou faʼufaʼu “te kaugana agatonu mo fakapotopoto” pea mo “te tagata tauhi ʼapi agatonu.” Neʼe ʼui e Sesu ko te kaugana agatonu ʼaia, ʼe tonu anai ke ina foaki ki te kau Kilisitiano “tonatou ʼinasi meʼa kai ʼi tona temi totonu.” (Mateo 24:3, 45-47; Luka 12:42, MN ) Kapau ʼe mole hatatou meʼa kai pea ʼe tou mamate. ʼO toe feiā pe, kapau ʼe mole foaki mai te meʼa kai fakalaumālie, pea ʼe tou vaivavai pea mo mamate ʼi te faʼahi fakalaumālie. Koia ko te fakatuʼu ʼo “te kaugana agatonu mo fakapotopoto” ʼe ko te tahi fakamoʼoni ʼaia ko Sehova ʼe tokaga kia tatou. ʼOfa pe ke maʼuhiga tuʼumaʼu kia tatou te meʼa kai fakalaumālie ʼaē ʼe fai maʼa tatou e “te kaugana” ʼaia.—Mateo 5:3.
10. He koʼe ʼe maʼuhiga ʼaupito ke tou kau tuʼumaʼu ki te ʼu fono?
10 ʼI tatatou ako takitokotahi ʼe tou kai ai te meʼa kai fakalaumālie ʼaia. Pea ʼe tonu foki ke tou fakatahi mo te tahi kau Kilisitiano pea mo tou kau ki te ʼu fono. ʼE kei koutou manatuʼi lelei koa pe koteā ʼaē neʼe koutou kai ia māhina e ono ki mua atu, peʼe ʼi te ʼu vāhaʼa e ono ʼaē kua hili? ʼE mole lagi kei koutou manatuʼi. Kae ko te ʼu meʼa ʼaē ʼe koutou kai ʼe ina foaki atu te ʼu meʼa ʼaē ʼe ʼaoga kia koutou ke koutou mālolohi ai. Pea neʼe lagi koutou kai te meʼa kai ʼaia talu mai ai. ʼE toe tatau ʼo ʼuhiga mo te meʼa kai fakalaumālie ʼaē ʼe tou maʼu ʼi tatatou ʼu fono faka Kilisitiano. ʼE mole lagi kei tou manatuʼi lelei te ʼu meʼa ʼaē neʼe tou logo ʼi te ʼu fono. Pea ʼe lagi kua tuʼa lahi te fakahā mai ʼo he manatu kua tou ʼiloʼi. Kae ʼe maʼuhiga te meʼa kai fakalaumālie ʼaia ki totatou maʼuli. ʼI te ʼu fono, ʼe foaki tuʼumaʼu mai ʼi tona temi totonu te meʼa kai fakalaumālie lelei.
11. Koteā totatou maʼua mokā tou kau ki te ʼu fono?
11 ʼE ʼi ai totatou maʼua mokā tou kau ki te ʼu fono. Neʼe fai te tokoni ki te kau Kilisitiano ke nātou ‘fefakaloto mālohiʼaki,’ ke nātou feʼugaʼaki ʼi te kokelekasio ki “te ofa pea mo te u gaue lelei.” Ko tatatou teuteu ʼaē ke tou kau pea mo tali ʼi te ʼu fono fuli, ʼe mālohi ai tatatou tui pea ʼe fakaloto mālohi ai te kokelekasio. (Hepeleo 10:23-25) Ohage ko te ʼu kiʼi toe ʼaē ʼe feala ke nātou faigataʼa ʼo ʼuhiga mo te meʼa kai, ko ʼihi ʼe lagi tonu ke fakaloto mālohi tuʼumaʼu ke nātou kai ki te meʼa kai fakalaumālie. (Efeso 4:13) ʼE ko he agaʼofa ke tou foaki te taʼi fakaloto mālohi ʼaia, ke feala hanatou liliu ko he ʼu Kilisitiano kua fakapotopoto, pea neʼe tohi fēnei e te ʼapositolo ko Paulo ʼo ʼuhiga mo nātou ʼaia: “Ko te meakai fefeka maʼa te hahai lalahi, kia natou e natou akoi onatou ulugaʼaga ki te iloi o te kehekehe o te lelei pea mo te kovi.”—Hepeleo 5:14.
Tou Tokaga Kia Tatou ʼi Te Faʼahi Fakalaumālie
12. Ko ai ʼaē ʼe maʼua tāfito ke tokaga kia tatou ke tou haga nofo ʼi te moʼoni? Koutou fakamahino.
12 Ko totatou ʼohoana peʼe ko tatatou ʼu mātuʼa ʼe feala ke nātou fakaloto mālohiʼi tatou ke tou haʼele ʼi te ala ʼo te moʼoni. Pea ko te kau tagata ʼāfea ʼo te kokelekasio ʼe feala ke nātou takitaki tatou heʼe tou kau ki te faga ōvi ʼaē ʼe nātou tokakaga kiai. (Gaue 20:28) Kae ko ai ʼaē ʼe ina maʼu tāfito te maʼua ʼaia mo kapau ʼe kita fia haga haʼele ʼi te ala ʼo te maʼuli ʼaē ʼe fakatafito ki te moʼoni? ʼI tona fakahagatonu, ʼe ko te maʼua ʼo tatou takitokotahi. Pea ʼe moʼoni te faʼahi ʼaia ʼi te ʼu temi lelei pea mo te ʼu temi faigataʼa. Koʼeni tona faʼifaʼitaki.
13, 14. Ohage ko tona fakatātā e te meʼa neʼe hoko ki te kiʼi ōvi, ʼe lava feafeaʼi hatatou maʼu te tokoni fakalaumālie ʼaē ʼe ʼaoga kia tatou?
13 ʼI Ekosi, ko te ʼu kiʼi ōvi neʼe lolotoga kakai pea ko te tahi ia nātou neʼe hēʼia ʼi te faʼahi moʼuga pea neʼe tō ki te luo loloto. Neʼe mole lavea, kae neʼe mataku ʼaupito pea neʼe mole feala hana kake ake mai te luo. Pea neʼe kamata tagi. Neʼe logo kiai tana faʼe, pea neʼe toe tagi mo ia ʼo aʼu ki te haʼu ʼa te tagata tauhi ōvi pea ina toʼo ake te kiʼi ōvi ʼaia.
14 Koutou tokagaʼi te ʼu meʼa neʼe hoko. Neʼe tagi te kiʼi ōvi ke tokoni age kiai, neʼe logo kiai tana faʼe pea neʼe toe tagi mo ia, pea neʼe tokoni fakavilivili te tagata tauhi ōvi moʼo hāofaki te kiʼi ōvi. Kapau ʼe lava ʼiloʼi e te kiʼi ōvi pea mo tana faʼe te tuʼutāmaki pea mo foimo kole tokoni, pea ʼe mole tonu koa la ke tou fai feiā mo tatou mokā tou tō ʼi te faʼahi fakalaumālie peʼe tou tau mo he ʼu tuʼutāmaki mai te mālama ʼa Satana? (Sakopo 5:14, 15; 1 Petelo 5:8) ʼE tonu ke tou kole tokoni, tāfito mo kapau ʼe mole heʼeki tou mālolohi heʼe kei tou tūpulaga peʼe tou foʼofoʼou ʼi te moʼoni.
ʼE Fakafiafia Te Mulimuli Ki Te Takitaki ʼa Te ʼAtua
15. Neʼe feafeaʼi te loto ʼa te fafine ʼi tana kamata kau ki te ʼu fono?
15 Koutou tokagaʼi te maʼuhiga ʼo te mahino ki te Tohi-Tapu pea mo te tokalelei ʼo te manatu ʼo te hahaʼi ʼaē ʼe tauhi ki te ʼAtua moʼoni. Ko te fafine taʼu 70 neʼe kau ki te lotu Katolika ʼi Pilitania ʼi tona maʼuli katoa, neʼe ina tali ke ina ako te Tohi-Tapu mo te Fakamoʼoni ʼa Sehova. Neʼe ina ʼiloʼi ai ko te huafa ʼo te ʼAtua ko Sehova pea neʼe “Ameni” ʼi te ʼu faikole ʼaē neʼe fai ʼi te Fale ʼo te Puleʼaga. Neʼe ina ʼui fēnei: “ ʼE mole akoʼi mai ko te ʼAtua ʼe mamaʼo ia tatou, kae ʼe nofo mo tatou ohage ko hotatou kaumeʼa lelei. Neʼe heʼeki ʼau logoʼi he meʼa feiā ʼi muʼa atu.” ʼE mahino ia ʼe mole galoʼi anai e te fafine ʼaia te ʼuluaki malave ʼo te moʼoni kia ia. ʼOfa pe ke feiā mo tatou, ke mole galo kia tatou te maʼuhiga ʼo te moʼoni ʼi te temi ʼaē neʼe tou tali ai.
16. (a) Koteā ʼaē ʼe feala ke hoko mo kapau ʼe tou tokaga tāfito ke tou maʼu paʼaga? (b) ʼE tou lava maʼu feafeaʼi te fiafia moʼoni?
16 Tokolahi ʼe nātou manatu kapau ʼe lahi tanatou paʼaga pea ʼe nātou fiafia anai. Kae kapau ʼe tou tokakaga pe ʼi totatou maʼuli ke tou maʼu he paʼaga lahi, pea ʼe “hoha ai [totatou] ʼatamai.” (1 Timoteo 6:10, Phillips ) Koutou tokagaʼi peʼe ko te tokofia ʼe nātou totogi te ʼu tikite loteli, peʼe nātou puli paʼaga ʼi te ʼu kasino, peʼe nātou sivisivi te hake peʼe ko te hifo ʼo te mālohi ʼa te paʼaga, ʼi tanatou fakaʼamu ʼaē ke nātou maʼu he toe paʼaga lahi. Ko te tokosiʼi ʼe nātou maʼu te paʼaga ʼaē ʼe nātou fakaʼamu kiai. Pea ʼi te agamāhani, māʼiape la mo nātou ʼaē ʼe nātou maʼu paʼaga, ʼe nātou tokagaʼi ʼe mole nātou maʼu ai te fiafia. Kae ko te fiafia ʼaē ʼe tologa ʼe tou maʼu mo kapau ʼe tou fai te finegalo ʼo Sehova, ʼo tou gāue mo te kokelekasio ʼaki te takitaki ʼa te laumālie maʼoniʼoni ʼa Sehova pea mo te tokoni ʼo tana kau ʼaselo. (Pesalemo 1:1-3; 84:4, 5; 89:15) Ka tou fai te faʼahi ʼaia, pea ʼe feala ke tou maʼu ai he ʼu tapuakina. ʼE maʼuhiga ʼaupito koa kia koutou te moʼoni, ke koutou maʼu ai he ʼu tapuakina ʼi tokotou maʼuli?
17. Koteā ʼaē neʼe hā ʼaki te aga ʼa te ʼapositolo ko Petelo, ʼi tana nofo ʼi te ʼapi ʼa Simone, te tagata tufuga kiliʼi manu?
17 Tou tokagaʼi te meʼa ʼaenī neʼe hoko ki te ʼapositolo ko Petelo. ʼI te taʼu 36 ʼo totatou temi, neʼe folau faka misionea ki te Mafa ʼo Salone. Neʼe ʼai tana kiʼi tuʼu ʼi Lita, ʼo ina fakamālōlō ai ia Ainea te tagata neʼe palalisia, pea neʼe ʼalu leva ki te ʼuafu ʼo Sopa. Neʼe ina fakatuʼuake ai ia Tolokasi. ʼE ʼui fēnei mai ia Gaue 9:43: “Nee nofo Petelo i Sopa i he temi fualoa i te api o he tagata ko Simone, nee ko he tufuga kiliʼimanu.” Ko te ʼu palalau nounou ʼaia ʼe nātou fakahā mai te mole fakapalatahi ʼa Petelo ʼi tana fai faka mafola ki te hahaʼi ʼo te kolo ʼaia. ʼO feafeaʼi? ʼE tohi fēnei e te tagata sivi Tohi-Tapu ko Frederic W. Farrar: “Neʼe mole feala ki he tagata neʼe mulimuli lelei ki te Lao [ʼa Moisese] ʼaē neʼe ʼave gutu, ke nofo ʼi te loto fale ʼa te tagata tufuga kiliʼi manu. Ko tana fāfā ʼi te ʼaho fuli ki te ʼu kiliʼi manu pea mo te ʼu sino mate ʼa te ʼu manu kehekehe ʼuhi ko te gāue ʼaia, pea mo te ʼu meʼa gāue ʼaē neʼe fakaʼaoga kiai, neʼe ko he meʼa heʼe maʼa pea mo fakalialia kia mata ʼo nātou ʼaē neʼe mulimuli fakalelei ki te Lao.” Logola ko te ʼapi ʼo Simone ʼaē neʼe tuʼu “i te matatai” neʼe mole ōvi age ki tana fale gāue, kae ʼe ʼui e Farrar neʼe fai e Simone ‘he gāue ʼe fakalialia kia mata ʼo te hahaʼi pea neʼe mole fakaʼapaʼapaʼi ia nātou fuli ʼaē neʼe nātou fai te gāue ʼaia.’—Gaue 10:6.
18, 19. (a) He koʼe neʼe punamaʼuli Petelo ʼi te meʼa ʼaē neʼe hā kia ia? (b) Koteā te pilivilesio lahi neʼe maʼu e Petelo?
18 Ko Petelo, ʼaē neʼe mole fakapalatahi, neʼe ina tali te ʼofa ʼo Simone, pea ʼi te ʼapi ʼaia neʼe tuku age e te ʼAtua he ʼu fakatonutonu. Neʼe sio ki he ʼu manu heʼe maʼa ʼi te lao faka Sutea pea neʼe fakatotonu age ke ina kai. Neʼe fakafisi kiai ia Petelo, he neʼe mole heʼeki ina “kai he mea e tapu mo uli.” Kae neʼe ʼui age tuʼa tolu kia ia: “Ko mea ae kua fakamaʼa e te Atua, aua tau fakaʼulihi.” ʼE mahino ia neʼe “felakilua aki . . . Petelo, pe kotea ape te uhiga o te mea nee sio ki ai.”—Gaue 10:5-17; 11:7-10.
19 Neʼe mole ʼiloʼi e Petelo ʼi te ʼu ʼaho ki muʼa atu, ʼi Sesalea, ʼe mamaʼo atu ia kilometa e 30, neʼe ʼi ai te meʼa neʼe hā ki te tagata Senitile ko Kolonelio. Neʼe fakatotonu e te ʼaselo ʼa Sehova kia Kolonelio ke ina fekauʼi he ʼu kaugana ke nātou kumi ia Petelo ki te ʼapi ʼo Simone, te tagata tufuga kiliʼi manu. Neʼe fekauʼi e Kolonelio tana ʼu kaugana ki te ʼapi ʼo Simone, pea neʼe toe liliu Petelo mo nātou ki Sesalea. Neʼe faka mafola ai kia Kolonelio pea mo tona famili pea mo tona ʼu kaumeʼa. Neʼe nātou liliu ai ko te ʼu ʼuluaki Senitile neʼe mole silikosisioʼi ʼaē neʼe nātou maʼu te laumālie maʼoniʼoni, ʼo nātou liliu ko he kau maʼu tofiʼa ʼo te Puleʼaga. Logola neʼe ko he ʼu tagata neʼe mole silikosisio, kae ko nātou fuli ʼaē neʼe fakalogo ki te ʼu palalau ʼa Petelo neʼe nātou papitema. Neʼe feala ai ki te hahaʼi ʼo te ʼu puleʼaga, ʼaē neʼe nātou heʼe maʼa kia mata ʼo te kau Sutea, ke nātou liliu ko he ʼu hahaʼi ʼo te kokelekasio faka Kilisitiano. (Gaue 10:1-48; 11:18) Neʼe ko he pilivilesio lahi ʼaupito ʼaia maʼa Petelo, he neʼe maʼuhiga kia ia te moʼoni pea neʼe mulimuli ai ki te takitaki ʼa Sehova pea neʼe gāue ʼaki te tui.
20. Koteā te tokoni fakaʼatua ʼe foaki mai mokā tou fakamuʼamuʼa te moʼoni ʼi totatou maʼuli?
20 ʼE fai mai e Paulo te tokoni ʼaenī: “ ʼAki tatatou tala te moʼoni pea ʼaki te ʼofa, tou tuputupu ia meʼa fuli ia ia ʼaē ko te ʼulu, ia Kilisito.” (Efeso 4:15, MN ) Ei, ʼe foaki mai anai e te moʼoni he toe fiafia lahi ʼi te temi nei, mo kapau ʼe tou fakamuʼamuʼa te moʼoni ʼi totatou maʼuli pea mo tou tuku ke takitaki tatatou haʼele e Sehova ʼaki tona laumālie maʼoniʼoni. Pea tou toe manatuʼi te lagolago mai kia tatou ʼa te kau ʼaselo maʼoniʼoni ʼi tatatou gāue ʼaē ko te tala ʼo te logo lelei. (Apokalipesi 14:6, 7; 22:6) ʼE ko he pilivilesio lahi tatatou maʼu te tokoni ʼaia ʼi te gāue ʼaē neʼe fakatotonu mai e Sehova ke tou fai! Ko tatatou nofo agatonu ʼe ina taki anai tatou ke tou vikiʼi ia Sehova, te ʼAtua ʼo te moʼoni, ʼi he ʼu temi heʼegata. ʼE ʼi ai koa he meʼa ʼe maʼuhiga age ʼi te faʼahi ʼaia?—Soane 17:3.
Koteā ʼAē Neʼe Tou Ako?
• He koʼe ʼe tokolahi te hahaʼi ʼe mole nātou tali ia te moʼoni?
• ʼE tonu ke faka ʼuhiga feafeaʼi e te kau Kilisitiano ia te ʼu meʼa ʼo te mālama ʼa Satana?
• ʼE tonu ke feafeaʼi kia tatou ia te ʼu fono, pea koteā tona tupuʼaga?
• Koteā te maʼua ʼe tou tahi maʼu ke tou tokakaga ai kia tatou ʼi te faʼahi fakalaumālie?
[Mape ʼo te pasina 18]
TAI LAHI
Sesalea
MAFA ʼO SALONE
Sopa
Lita
Selusalemi
[Paki]
Neʼe mulimuli Petelo ki te takitaki fakaʼatua pea neʼe lahi tana ʼu tapuakina
[Haʼuʼaga ʼo te paki]
Map: Mountain High Maps® Copyright © 1997 Digital Wisdom, Inc.
[Paki ʼo te pasina 13]
Neʼe fakamoʼoni ia Sesu ki te moʼoni
[Paki ʼo te pasina 15]
Ohage ko te meʼa kai fakasino, ʼe maʼuhiga te meʼa kai fakalaumālie ke tou maʼuli lelei