ʼE ʼAoga He Tagata Moʼo Tokoni Ki Te Malamanei

NEʼE ʼui e te tagata neʼe fialahi pea mo agamālohi ʼi muʼa atu: ‘Neʼe ʼau fai fakataga mo pauʼu ʼi te temi muʼa.’ Neʼe ko he tagata neʼe leakovi pea neʼe ina gaohi koviʼi te kau tisipulo ʼa Sesu Kilisito ʼaē neʼe nātou manavasiʼi ki te ʼAtua. Kae neʼe ina toe ʼui fēnei ʼaki he loto fakafetaʼi: “Nee au tali te manavaofa.” Meʼa fakapunamaʼuli, he neʼe liliu te tagata aga fefeka ʼaia ko te ʼapositolo Kilisitiano ko Paulo.​—⁠1 Timoteo 1:​12-​16; Gaue 9:​1-​19.

Neʼe mole tou fai fuli te ʼu meʼa ʼaē neʼe fai e Paulo. Kae ʼe tou ʼiloʼi ʼe faigataʼa hatatou mulimuli katoa ki te ʼu lekula ʼa te ʼAtua. Koteā tona tupuʼaga? Koteʼuhi “kua [tou] agahala fuli mo hala i te kololia o te Atua.” (Loma 3⁠:23) Tahi ʼaē meʼa, ʼe feala ke tou loto taʼomia heʼe lagi tou manatu ʼe tou kovi fau pea ʼe mole feala ai ke manavaʼofa te ʼAtua kia tatou. ʼI tana fakakaukauʼi tona ʼu holi kovi, neʼe kalaga fēnei ia Paulo: “Tagata fakaofaofa ko au! Pe ko ai ae e ina haofaki anai au mai te sino aeni o te mate?” Pea neʼe ina tali tonu fēnei: “Fakafetai ki te Atua ia Sesu Kilisito totatou Aliki!”​—⁠Loma 7⁠:​24, 25.

ʼE lava feafeaʼi ki te Tupuʼaga faitotonu ke felogoi mo te hahaʼi agahala? (Pesalemo 5⁠:⁠4) Koutou fakatokagaʼi te meʼa ʼaē neʼe ʼui e Paulo: “Fakafetai ki te Atua ia Sesu Kilisito totatou Aliki.” Neʼe ʼui fēnei e te tahi tagata neʼe manavaʼofa ki ai te ʼAtua: “Kapau ʼe agahala he tahi, pea ʼe ʼi ai totatou tokoni ia tafa ʼo te Tāmai, ko Sesu Kilisito, ko te faitotonu. Ko ia ko te sakilifisio faifakalelei ki tatatou ʼu agahala, pea ʼe mole gata ʼaki pe tatatou ʼu agahala, kae ʼe toe kau ai mo te ʼu agahala ʼo te malamanei katoa.”​—⁠1 Soane 2⁠:​1, 2, MN.

He koʼe ʼe fakahigoaʼi ia Sesu Kilisito ko he “tokoni ia tafa ʼo te Tāmai”? Pea koteā te faka ʼuhiga ʼo te ʼui ʼaē ko Sesu ʼe ko “te sakilifisio faifakalelei” ki te ʼu agahala?

He Koʼe ʼe ʼAoga Ke Tokoni Mai He Tahi Kia Tatou

Neʼe haʼu ia Sesu ki te kele moʼo “foaki tona mauli moʼo totogi aki o te tokolahi.” (Mateo 20⁠:28) Ko he totogi ʼe fai moʼo faka ʼāteaina he tahi peʼe fai moʼo vevete he meʼa. Ko te kupu faka Hepeleo ʼaē ʼe fakaliliu ʼaki te kupu “totogi,” ʼe faka ʼuhiga ki te ʼuʼufi pe ko te fakalelei ʼo ʼuhiga mo te ʼu agahala. (Pesalemo 78⁠:38) Ko te kupu faka Keleka, ohage ko te kupu ʼaē ʼe maʼu ia Mateo 20⁠:​28, neʼe fakaʼaogaʼi tāfito ʼo ʼuhiga mo te totogi ʼaē neʼe fai moʼo faka ʼāteaina te hahaʼi pilisoni ʼo te tau pe ko te kau sinifu. Moʼo mulimuli ki te faitotonu, ʼe foaki he meʼa moʼo fetogi ʼaki he tahi meʼa ʼe tatau tonā maʼuhiga.

Kua maʼuli popūla te hahaʼi ʼuhi ko te agatuʼu ʼa te ʼuluaki tagata ki te ʼAtua. Ohage ko tona hā ʼi te kapite 3 ʼo Senesi, ko te tagata haohaoa ʼaia ko Atama, neʼe ina fili ke talagataʼa kia Sehova ʼAtua. ʼI tana fai te faʼahi ʼaia, neʼe ina fakatau ia ia totonu pea mo tona hōloga ʼaē neʼe heʼeki tupu, ke nātou kaugana ki te agahala pea mo te mate. Neʼe līaki ai e Atama, maʼa ia pea mo tona hōloga fuli, te meʼa ʼofa ʼaē ko te maʼuli haohaoa.​—⁠Loma 5⁠:​12, 18, 19; 7:​14.

ʼI te Iselaele ʼāfea, neʼe fakatuʼutuʼu e te ʼAtua te ʼu sakilifisio manu moʼo fakamolemole peʼe ʼuʼufi te ʼu agahala ʼo te hahaʼi. (Levitike 1⁠:4; 4:​20, 35) ʼI tona fakahagatonu, ko te maʼuli ʼo te manu ʼaē neʼe sakilifisioʼi, neʼe ina fetogi te maʼuli ʼo ia ʼaē neʼe agahala. (Levitike 17⁠:11) Koia neʼe feala ai ke ʼui ko “te ʼaho ʼo te faifakalelei” ʼe ko te “ ʼaho ʼo te ʼu totogi.”​—⁠ Levitike 23⁠:​26-​28.

Kae mai tona ʼuhiga ʼaē ʼe mālalo te ʼu manu ʼi te tagata, koia neʼe “mole mo feala ke too [katoa] te u agahala e te toto o te u vitulo mo te u tao.” (Hepeleo 10:​1-4) Ke feala ki he sakilifisio ke ina fakamolemole peʼe ina molehi te ʼu agahala ʼo talu ai, neʼe tonu ke tatau tona maʼuhiga mo te meʼa ʼaē neʼe pulihi e Atama. ʼO mulimuli ki te pelesepeto ʼo te faitotonu, neʼe tonu ki te tagata haohaoa (ia Sesu Kilisito) ke ina fetogi te meʼa ʼaē neʼe pulihi e te tahi tagata haohaoa (ia Atama). Neʼe feala pe ki te maʼuli haohaoa ke ina totogi te hōloga ʼo Atama mai tonatou ʼuhiga kaugana ʼaē neʼe fakatau kiai e tonatou ʼuluaki tāmai. Neʼe tonu ke foaki ‘he nefesi ki te nefesi’ moʼo mulimuli ki te faitotonu moʼoni.​—⁠Ekesote 21⁠:​23-25.

ʼI te temi ʼaē neʼe agahala ai ia Atama pea neʼe fakatūʼa ki te mate, ko tona hōloga ʼaē neʼe mole heʼeki tupu, neʼe kei nofo ʼi tona kogaloto ʼo mate mo ia. Ko te tagata haohaoa ko Sesu, “te Atama muli,” neʼe mole fia maʼu fānau. (1 Kolonito 15⁠:45) ʼI tana mate faka sakilifisio ʼi tona ʼuhiga tagata haohaoa, neʼe kei nofo ʼi tona kogaloto tona hōloga ʼaē neʼe heʼeki tupu. Koia, ʼe feala pe ke tou ʼui, neʼe mate mo ia te hōloga ʼaē neʼe feala ke ina fānauʼi. Ko te famili heʼe haohaoa ʼo Atama ʼaē neʼe tonu ke mate, neʼe liliu ko te famili totonu ʼo Sesu. Neʼe ina līaki te fealagia ʼaē ke ina maʼu hona famili. ʼI tana sakilifisioʼi tona maʼuli haohaoa, neʼe toe totogi e Sesu te hōloga fuli ʼo Atama, ʼo nātou liliu ai ko Tona famili pea neʼe liliu mo Ia ko tonatou “Tāmai Heʼegata.”​—⁠Isaia 9⁠:​6, 7.

Ko te sakilifisio faitotogi ʼa Sesu neʼe ina faka fealagia ki te hahaʼi ke nātou maʼu te manavaʼofa ʼa te ʼAtua pea mo te maʼuli heʼegata. Koia neʼe tohi fēnei e te ʼapositolo ko Paulo: “Koteuhi ko te u totogi o te agahala e ko te mate, kae ko te meaofa o te Atua e ko te mauli heegata ia Kilisito Sesu totatou Aliki.” (Loma 6⁠:23) Koia ʼe tou fia vikiʼi ia Sehova ʼuhi ko te ʼofa pea mo te manavaʼofa ʼaē neʼe ina fakahā ʼi tana fai te totogi, logope la neʼe ko he meʼa fakatupu mamahi ʼaupito kia ia pea mo tona ʼAlo ʼofaina. (Soane 3⁠:16) Pea neʼe fakahoko lelei e Sesu tana gāue “tokoni ia tafa o te Atua” ʼi tona fakatuʼuake ki te maʼuli ʼi selo, pea ina fakahā ai te maʼuhiga ʼo tana sakilifisio faitotogi ki te ʼAtua.a (Hepeleo 9:​11, 12, 24; 1 Petelo 3:​18) Kae koteā ʼaē ʼe fai e Sesu Kilisito ʼi selo moʼo tokoni kia tatou?

[Nota ʼi te lalo pasina]

[Paki ʼo te pasina 4]

Ko te hōloga ʼo Atama neʼe totogi ʼaki te maʼuli fakatagata haohaoa ʼa Sesu