ʼE Tokoni Mai Ia Sesu Kilisito
ʼI TANA kei maʼuli ʼi te kele, neʼe fai e Sesu Kilisito he ʼu meʼa taulekaleka moʼo tokoni ki te hahaʼi. Koia neʼe ʼui ai e te tagata neʼe sio ki te ʼu meʼa ʼaia, ʼi tana ʼosi talanoa ki te tuʼuga meʼa ʼaē neʼe hoko ʼi te maʼuli ʼo Sesu: “Pea nee lahiʼage ihi mea nee fai e Sesu, kapau nee tohi ia meafuape aia, e au manatu au e mole hao i te malama-nei te fua tohi nee hiki ai ia meafuape aia.” (Soane 21:25) Mai tona ʼuhiga ʼaē neʼe lahi te ʼu meʼa ʼaē neʼe fai e Sesu ʼi te kele, koia ʼe feala ai ke tou fai te fehuʼi ʼaenī: ‘ ʼE lava feafeaʼi hana tokoni kia tatou ʼi selo? ʼE tou lava maʼu koa ʼi te temi nei te manavaʼofa ʼa Sesu?’
Ko te tali ʼe fakaloto fīmālie pea mo fakaloto māfana. ʼE ʼui mai e te Tohi-Tapu, neʼe hū ia Kilisito “ki Selo totonu ke ha ia i te lakaga nei ia mua o te Atua o uhiga mo tatou.” (Hepeleo 9:24) Koteā ʼaē neʼe ina fai ai maʼa tatou? ʼE fakamahino mai e te ʼapositolo ko Paulo: “Nee mole ko te toto o te u tao mo ae o te u vitulo, kae aki tona taataa totonu [ʼo Kilisito] nee ina hufi te sagatualio [“ki Selo totonu”] tuà tahi o talu ai, nee ina mau ai te ateaina heegata.”—Hepeleo 9:12; 1 Soane 2:2.
ʼE ko he logo lelei ʼaupito ʼaia! Ko te gāue taulekaleka ʼa Sesu ki te hahaʼi neʼe mole fakagata ʼaki tana hake ki selo, kae neʼe ko he fealagia ʼaia ke ina hoko atu te gāue ʼaia. ʼE feala te faʼahi ʼaia ʼuhi ko te ʼofa makehe ʼo te ʼAtua pea mo tana fakanofo Sesu ko te “faifekau”—ko he pelepitelo lahi—“i te toomatau o te afioʼaga o te Mafimafi i te u lagi.”—Hepeleo 8:1, 2.
“Ko He Faifekau”
Koia ʼi selo ʼe gāue anai Sesu ko te faifekau ʼo te hahaʼi fuli. ʼE ina fai anai he gāue ʼe tatau mo te gāue ʼaē neʼe fai e te pelepitelo lahi ʼo Iselaele maʼa te kau atolasio ʼo te ʼAtua ʼi te temi muʼa. Neʼe koteā te gāue ʼaia? ʼE fakamahino mai e Paulo: “Ko te pelepitelo lahi fuape e fakanofo o uhiga mo te momoli o te u molaga, pea mo te u sakilifisio; koia e maua [kia Sesu Kilisito ʼaē kua hake ki selo] ke ina mau hana mea ke ina momoli.”—Hepeleo 8:3.
Ko Sesu neʼe ʼi ai te meʼa ke ina momoli pea neʼe maʼuhiga age ʼi te mōlaga ʼaē neʼe fai e te pelepitelo lahi ʼo te temi muʼa. “Kapau ko te toto o te u tao mo ae o te u vitulo” neʼe feala ke fakamaʼa ʼaki te Iselaele ʼāfea ʼi te faʼahi fakalaumālie, pea “e feafeai anai te mauhiga kehe o te taataa o Kilisito, iaʼia ae, i te Laumalie heegata, nee ina momoli iaʼia ko he vikitima hee mele ki te Atua, e ina fakamaa ai otatou loto mai te u gaue mate koteuhi ke tou tauhi ki te Atua mauli.”—Hepeleo 9:13, 14.
Tahi ʼaē meʼa, ko Sesu ʼe ko te faifekau makehe koteʼuhi neʼe tuku kia ia te maʼuli tuputupua. ʼI te Iselaele ʼāfea, “nee kaugamalie natou nee hoko o pelepitelo, koteuhi nee fakagata e te mate tanatou hoko atu.” Kaeā Sesu? Neʼe tohi fēnei e Paulo: “E ina mau [“tona ʼuhiga pelepitelo,” MN] o fai ai. Pea koia, e ina mafai te haofaki i te temi fuape ia natou e fakaovi ki te Atua aki iaia, koteuhi e mauli tuumau o hufaki natou.” (Hepeleo 7:23-25; Loma 6:9) Ei, ʼe ʼi ai totatou faifekau ʼi te toʼomataʼu ʼo te ʼAtua ʼi selo, ‘e mauli tuumau o hufaki tatou.’ Koutou fakakaukauʼi age muʼa pe koteā tona faka ʼuhiga kia tatou ia ʼaho nei!
ʼI te nofo ʼa Sesu ʼi te kele, neʼe ʼōmai te hahaʼi tokolahi kia ia ke tokoni age kia nātou, pea ʼi ʼihi temi neʼe nātou fai te ʼu folau loaloaga ke nātou maʼu te tokoni ʼaia. (Mateo 4:24, 25) ʼI selo, ʼe feala ki te hahaʼi ʼo te ʼu puleʼaga fuli ke nātou felogoi mo Sesu. Mai te potu māʼoluga ʼaia, ʼe ina hoko tuʼumaʼu atu tana gāue faifekau.
E Feafeaʼi Te ʼUhiga Pelepitelo Lahi ʼa Sesu?
Ko te fakamatala ʼaē ʼe fai e te ʼu Evaselio ʼo ʼuhiga mo Sesu Kilisito, ʼe ina fakahā lelei mai ʼe fia tokoni ki te hahaʼi pea ʼe manavaʼofa. Neʼe ko he tagata loto faka sakilifisio! Tuʼa lahi, neʼe fakaleluʼi ia ia ʼi tana lolotoga mālōlō mo tana kau tisipulo. Neʼe mole manatu ai Sesu, neʼe kaihaʼa e te hahaʼi tona temi mālōlō, kailoa, kae “nee fonu i te ofa” ki te hahaʼi ʼaē neʼe nātou kumi tokoni. Logope la neʼe gaʼegaʼe ia Sesu, mo fia kai pea mo fia ʼinu, kae “neʼe ina tali fakaleleiʼi ia nātou” pea neʼe ina tuku tana kai moʼo tokoni ki te kau agahala fakamalotoloto.—Maleko 6:31-34; Luka 9:11-17, MN; Soane 4:4-6, 31-34.
ʼI tana ʼofa kia nātou, neʼe fai e Sesu he ʼu fakatuʼutuʼu ʼaoga moʼo foaki ki te hahaʼi te ʼu meʼa ʼaē ʼe ʼaoga kia nātou ʼi te faʼahi fakasino, mo fakalaumālie pea mo te ʼu meʼa ʼaē neʼe nātou logoʼi ʼi tonatou loto. (Mateo 9:35-38; Maleko 6:35-44) Tahi ʼaē meʼa, neʼe ina akoʼi age kia nātou peʼe nātou lava maʼu feafeaʼi te fīmālie heʼegata. (Soane 4:7-30, 39-42) Ohage la neʼe ina fai te fakaafe lelei ʼaenī: “Ke omai kia te au, ia natou fuape e mamahi pea mo natou e mafasia i te fua kavega, pea e au fakafimalieʼi anai koutou. Koutou ai kia koutou taku fakagutu pea koutou ako maia te au. Koteuhi, i toku loto, e au agamalu mo agavaivai, pea e koutou mau anai te fimalie ki outou laumalie.”—Mateo 11:28, 29.
Neʼe lahi ʼaupito te ʼofa ʼa Sesu ki te hahaʼi, ʼo tupu ai la tana foaki tona maʼuli moʼo totogi ʼaki te hahaʼi agahala. (Loma 5:6-8) ʼO ʼuhiga mo te faʼahi ʼaia, neʼe fai e te ʼapositolo ko Paulo te ʼu palalau ʼaenī: “[Ko Sehova ʼAtua] iaʼia ae nee mole ina fakahao tona Alo totonu, kae nee ina tukuʼage ia o uhiga mo tatou fuli, o feafeai, pe mole ina foaki mai anai te meafuape kia tatou aki iaʼia? . . . E ko Kilisito Sesu ae nee puluhia, pea e lakaʼage, kua tuuake ia, e ko ia ae e afio i te toomatau o te Atua, pea e ko ia ae e ina hufaki tatou.”—Loma 8:32-34.
Ko He Pelepitelo Lahi ʼe Lotomahino
ʼI tona maʼuli tagata, neʼe ʼiloʼi ai e Sesu te fia kai, mo te fia ʼinu, mo te gaʼegaʼe, te lotohoha, te mamahi pea mo te mate. Ko te lotohoha pea mo te ʼu ʼahiʼahi ʼaē neʼe ina kātakiʼi neʼe teuteuʼi ia ia ke Pelepitelo Lahi ki te hahaʼi ʼaē ʼe nātou maʼuli mamahi. Neʼe tohi fēnei e Paulo: “Nee tonu ke liliu [Sesu] o hage ko ona tehina i te aluaga fuape, koteuhi ke nofo ko he pelepitelo-lahi manavaofa mo agatonu i te tauhi ki te Atua, pea mo fai he hu o uhiga mo te agahala a te hahai. Koteuhi nee tali mamahi iaʼia i tona ahiahi, ke feala ai kia te ia tana tokoni kia natou ae e ahiahiʼi.”—Hepeleo 2:17, 18; 13:8.
Neʼe fakahā e Sesu, ʼe tāu mo ia ke tokoni ki te hahaʼi ke nātou fakaōvi ki te ʼAtua pea neʼe lotolelei ki te faʼahi ʼaia. Kae ko tona faka ʼuhiga koa ʼe tonu ke ina fakalotoʼi he ʼAtua ʼe aga fefeka mo heʼe manavaʼofa ʼe mole fia fakamolemole ki te hahaʼi? Kailoa, heʼe ʼui mai e te Tohi-Tapu: ‘Ko Sehova ʼe agalelei pea mo fakamolemole gafua.’ ʼE ina toe ʼui fēnei: “Kapau e tou kofesio atatou agahala, e agatonu ia mo faitotonu, e ina fakamolemole anai atatou agahala pea e ina fakamaʼa anai tatou mai atatou hala fuape.” (Pesalemo 86:5; 1 Soane 1:9) ʼI tona fakahagatonu, ʼi te ʼu palalau agalelei ʼa Sesu pea mo tana ʼu aga, neʼe hā te manavaʼofa ʼo tana Tāmai, mo tana fia fakamolemole pea mo tona ʼofa.—Soane 5:19; 8:28; 14:9, 10.
ʼE fakaloto fīmālieʼi feafeaʼi e Sesu te kau agahala ʼaē ʼe loto fakahemala? ʼE tokoni kia nātou ke nātou fiafia pea mo fīmālie ʼi tanatou ʼu faiga ʼaē ke leleiʼia nātou e te ʼAtua. ʼI tana tohi ki te kau Kilisitiano fakanofo, neʼe fakanounou fēnei e Paulo te ʼaluʼaga ʼaia: “Koia, i te mau o he Pelepitelo-Lahi maoluga nee fakalaka i te u lagi, ia Sesu, te Alo o te Atua, tou taofi malohi ai te tui. Io, e mole tou mau he Pelepitelo-lahi e mole ina fealagia te tali mamahi mo tatou i otatou vaivai, iaʼia nee fakahalai i te aluaga fuape o hage ko tatou, kae nee mole agahala. Koia, tou fakaovi mo te falala ki te afioʼaga o te kalasia, ke tou tali te manavaofa pea tou mau te kalasia o he tokoni i tona temi [totonu].”—Hepeleo 4:14-16.
“He Tokoni i Tona Temi [Totonu]”
Kae koteā ʼaē ʼe feala ke tou fai mokā hoko mai kia tatou he ʼu faigataʼaʼia ʼe tou logoʼi ʼe mole tou lava tauʼi, ohage ko he mahaki kovi, peʼe tou loto taʼomia he neʼe tou fai he agahala, peʼe tou lotovaivai pea mo lotohoha? ʼE feala ke tou fakaʼaogaʼi te fakatuʼutuʼu ʼaē neʼe tau fakaʼaogaʼi e Sesu totonu—te pilivilesio maʼuhiga ʼo te faikole. Ohage la, ʼi te po ʼi muʼa ʼo tana sakilifisioʼi tona maʼuli maʼa tatou, “nee asili faikole ia, nee liliu leva tona kakava o toto pea nee tafekalu ifo ia te ia ki te kele.” (Luka 22:44) Ei, ʼe ʼiloʼi e Sesu pe koteā ʼaē ʼe kita logoʼi ʼi tokita loto mokā kita faikole mamahi ki te ʼAtua. “Nee ina momoli te u kole mo te u tagi, fakatahi mo tana keke leo lahi pea mo ona loimata, kia Ia nee feala tana haofaki iaʼia mai te mate; pea nee tali ia uhi ko tana fakalogo.”—Hepeleo 5:7.
ʼE ʼiloʼi e Sesu, ʼe maʼuhiga ʼaupito ki te hahaʼi ke “tali” nātou pea ke fakaloto mālohiʼi nātou. (Luka 22:43) Tahi ʼaē meʼa, neʼe ina fai te fakapapau ʼaenī: “Ko he meape e koutou kole ki te Tamai i toku huafa, e ina foaki atu anai. . . . Koutou kole pea e koutou mau anai, ke katoa toutou fiafia.” (Soane 16:23, 24) Koia ʼe feala ke tou faikole ki te ʼAtua pea mo tou tui papau, ʼe ina tuku anai tona ʼAlo ke ina fakaʼaogaʼi tona ʼuhiga pule pea mo tana sakilifisio faitotogi maʼa tatou.—Mateo 28:18.
Tou tui papau, ʼi tona tuʼulaga ʼaē ʼi selo ʼe foaki anai e Sesu te tokoni ʼaē ʼe tau mo feʼauga ʼi tona temi totonu. Ohage la, kapau neʼe tou agahala kae ʼe tou fakahemala moʼoni, ʼe feala ke tou loto fīmālie ʼi tatatou ʼiloʼi ʼaē “ ʼe ʼi ai totatou tokoni ia tafa ʼo te Tāmai, ko Sesu Kilisito, ko te faitotonu.” (1 Soane 2:1, 2, MN) Ko totatou Tokoni pea mo Ia ʼaē ʼe ina fakaloto fīmālieʼi tatou, ʼe tagi anai maʼa tatou ke tali totatou faikole, kapau ʼe tou fai ʼi tona huafa pea mo ʼalutahi mo te Tohi-Tapu.—Soane 14:13, 14; 1 Soane 5:14, 15.
Tou Fakahā Tatatou Loto Fakafetaʼi Ki Te Tokoni ʼa Kilisito
ʼE mole tonu ke gata ʼaki pe tatatou kole ki te ʼAtua ʼaki te huafa ʼo tona ʼAlo. ʼAki te maʼuhiga ʼo tona sakilifisio faitotogi, “ko Kilisito ʼaki he totogi” kua liliu ko ia “ae nee ina huʼi” te malamanei katoa. (Kalate 3:13, MN; 4:5; 2 Petelo 2:1) ʼE feala ke tou fakahā tatatou fakafetaʼi kia meʼa fuli ʼaē ʼe fai e Sesu maʼa tatou, ʼo tou tali tana pule kia tatou pea mo tou tali fakafiafia tana fakaafe ʼaenī: “Kapau e i ai he tahi e fia haù o mulimuli mai ia te au, ke fakafisi kia te ia totonu, ke ina too tona [“pou fakamamahi,” MN] i te aho fuape pea ke mulimuli mai ia te au.” (Luka 9:23) Ko te ‘fakafisi kia kita totonu’ ʼe mole ko te ʼui pe ʼaē ʼe kita tali ke pule he tahi kehe kia kita. He “nee puluhia ia [Kilisito] o uhiga mo te tagata fuape koteuhi ke aua naa mauli te hahai mauli kia natou’pe, kae kia ia ae nee puluhia . . . o uhiga mo natou.” (2 Kolonito 5:14, 15) Koia ko tatatou fakafetaʼi ki te totogi ʼe malave ki tatatou manatu, tatatou ʼu fakatuʼutuʼu pea mo totatou faʼahiga maʼuli. Ko tatatou huʼi maʼua heʼegata kia “Kilisito Sesu [ʼaē] nee ina tukuʼage iaʼia o uhiga mo tatou,” ʼe tonu ke ina uga tatou ke toe ʼāsili age tatatou ʼiloʼi ia ia pea mo tana Tāmai ʼofa ko Sehova ʼAtua. ʼE toe tonu foki ke tou fia tuputupu ʼi te tui, ke tou mulimuli ki te ʼu lekula lelei ʼo te ʼAtua, pea ke tou “faʼafai i te u gaue lelei.”—Tito 2:13, 14; Soane 17:3.
Ko te kokelekasio faka Kilisitiano ʼe ko te fakatuʼutuʼu ʼaē ʼe fakaʼaogaʼi moʼo foaki mai te meʼa kai fakalaumālie, mo te fakaloto mālohi pea mo te takitaki ʼi tona temi totonu. (Mateo 24:45-47; Hepeleo 10:21-25) Ohage la, kapau ʼe mahaki ʼihi ʼi te faʼahi fakalaumālie, pea ʼe feala ke nātou “pāui te ʼu tagata ʼāfea ʼo te kokelekasio.” Pea ʼe toe fai e Sake te fakapapau ʼaenī: “Pea ko te faikole ʼo te tui ʼe ina faitoʼo anai ia ia ʼaē ʼe mamahi, pea ʼe fakatuʼu anai ia ia e Sehova. Koia ʼaē, kapau neʼe ina fai he ʼu agahala, pea ʼe fakamolemole age anai kia ia.”—Sakopo 5:13-15, MN.
Koʼeni te faʼifaʼitaki: Ko te tagata pilisoni ʼi Afelika Saute, neʼe faitohi ki te tagata ʼāfea ʼo he kokelekasio moʼo fakahā tana fakafetaʼi ki “te kau Fakamoʼoni fuli ʼa Sehova ʼaē ʼe nātou fakahoko te gāue lelei ʼaē neʼe kamata e Sesu Kilisito moʼo tokoni ki te hahaʼi ke nātou maʼu te Puleʼaga ʼo te ʼAtua.” Pea neʼe ina toe tohi fēnei: “Neʼe ʼau fiafia ʼaupito ʼi tau faitohi mai. Ko tau tuʼania ʼo ʼuhiga mo taku hāofaki fakalaumālie neʼe malave ʼaupito ki toku loto. Ko te tupuʼaga la ʼaia ʼo taku fakalogo ki te pāui mai ʼa Sehova ʼAtua ke ʼau fakahemala. Ia taʼu e 27 neʼe ʼau tūkia pea mo hēʼia ʼi te ala fakapōʼuli ʼo te agahala, te aga fakakākā, te ʼu māmio kovi, te ʼu aga heʼeʼaoga pea mo te ʼu lotu hala. ʼI taku ʼosi feʼiloʼiʼaki mo te kau Fakamoʼoni ʼa Sehova, neʼe mahino ai kia ʼau kua ʼau maʼu te ala—te ala totonu, pea ʼe tonu ke ʼau mulimuli kiai.”
ʼE Toe Lahi Anai Te Tokoni ʼAē Ka Fai Mai Kia Tatou ʼi Te Ka Haʼu
Ko te ʼāsili kovi ʼo te ʼu ʼaluʼaga ʼo te malamanei, ʼe ko te fakamoʼoni ʼaia ʼe tou maʼuʼuli ʼi te temi maʼuhiga ʼi muʼa ʼo te hoko mai ʼo te “mamahi lahi.” ʼI te temi nei, ko te toe hahaʼi tokolahi ʼe nātou ʼōmai mai te ʼu puleʼaga fuli pe, mo te ʼu telepi fuli pe, mo te lanu fuli pe pea mo te ʼu lea fuli pe, pea ʼe nātou ‘fo onatou kofu mo fakahihina i te taataa o te Akeno.’ (Apokalipesi 7:9, 13, 14; 2 Timoteo 3:1-5) ʼI tanatou tui ki te sakilifisio faitotogi ʼa Sesu, ʼe fakamolemole ai tanatou ʼu agahala pea ʼe tokoni ai kia nātou ke nātou felogoi mo te ʼAtua—ʼo nātou liliu ai ko tona ʼu kaumeʼa.—Sakopo 2:23.
Ko te Akeno ia Sesu Kilisito, “e ina taki anai natou ki te u matapuna vai mauli. Pea e holoholoʼi anai e te Atua ia loimata fuape i onatou fofoga.” (Apokalipesi 7:17) ʼE fakahoko katoa ai anai e Kilisito tana ʼu maʼua ʼi tona ʼuhiga Pelepitelo Lahi. ʼE tokoni anai ki te ʼu kaumeʼa fuli ʼo te ʼAtua ke nātou maʼu te ʼu fua lelei ʼo te ʼu “matapuna vai mauli”—ʼi te faʼahi fakalaumālie, mo te faʼahi fakasino, mo te faʼahi fakaʼatamai pea mo te loto. ʼE hoko katoa anai te meʼa ʼaē neʼe kamata e Sesu ʼi te taʼu 33 ʼo totatou temi pea neʼe ina hoko atu ʼi selo ki muli mai.
Koia tou loto fakafetaʼi tuʼumaʼu ki te ʼu meʼa ʼaē neʼe fai e te ʼAtua pea mo Kilisito maʼa tatou ki muʼa atu pea mo te temi nei. Neʼe fai e te ʼapositolo ko Paulo te fakaloto mālohi ʼaenī: “Koutou fakafiafia tuumau i te Aliki. . . . Aua naa koutou tuania i he mea, kae i te meafuape aki te faikole mo te lauga fakatahi mo te u fakafetai, koutou fakaha ki te Atua autou u kole. Pea ko te tokalelei o te Atua aia e fakalaka i te atamai fuape, e ina malui anai outou loto mo autou fakakaukau ia Kilisito Sesu.”—Filipe 4:4, 6, 7.
ʼE ʼi ai te meʼa ʼe feala ke koutou fai moʼo fakamoʼoni ki takotou fakafetaʼi kia Sesu Kilisito, totatou Tokoni ʼi selo. ʼI te ʼosi tō ʼo te laʼā ʼi te Feliafā, ʼaho 19 ʼo ʼApelili, 2000, ko te kau Fakamoʼoni ʼa Sehova ʼo te malamanei katoa ʼe nātou fakatahi anai moʼo fai te Fakamanatu ʼo te mate ʼo Kilisito. (Luka 22:19) ʼE ko he faigamālie ʼaia moʼo fakatuputupu takotou loto fakafetaʼi ki te sakilifisio faitotogi ʼa Kilisito. ʼE fakaafe atu koutou ke koutou ʼōmai ki te ʼaho ʼaia heʼe fakamahino ai anai kia koutou, te fakatuʼutuʼu taulekaleka ʼa te ʼAtua ʼaē neʼe ina fai ʼaki ia Kilisito moʼo hāofaki ʼo tatou, pea ʼe koutou maʼu ai anai he ʼu fua heʼegata. Koutou fakalavelave ki te kau Fakamoʼoni ʼa Sehova ʼo tokotou kolo te faʼahi pea mo te hola ʼaē ka fai ai te toʼotoʼoga makehe ʼaia.
[Paki ʼo te pasina 7]
ʼE ʼiloʼi e Sesu pe koteā ʼaē ʼe kita logoʼi ʼi tokita loto mokā kita faikole mālohi ki te ʼAtua
[Paki ʼo te pasina 8]
ʼE tokoni mai anai ia Kilisito ke tou tauʼi te ʼu fihifihia ʼaē ʼe mole feala ke tou tauʼi tokotahi
[Paki ʼo te pasina 9]
ʼE fakaʼaogaʼi e Kilisito te kau tagata ʼāfea moʼo tokoni mai kia tatou