Tou Ako Pea Mo Akoʼi Ki Te Hahaʼi Te ʼu Pelesepeto Fakaʼatua

“Koia, e ke fakaʼako te tahi kaiga, kae e mole ke akoʼi ia koe totonu!”—Loma 2:21.

1, 2. Koteā te ʼu tupuʼaga ke koutou fia ako ai te Tohi-Tapu?

ʼE LAHI te ʼu tupuʼaga ke koutou ako ai te Folafola ʼa te ʼAtua. ʼE lagi koutou fia ʼiloʼi te ʼu meʼa ʼaē ʼe tuʼu ai—ʼo ʼuhiga mo te hahaʼi, te ʼu meʼa neʼe hoko, te ʼu fenua, pea mo te tahi ʼu meʼa. ʼE koutou fia ʼiloʼi te ʼu akonaki moʼoni, ʼaē ʼe mole ʼalutahi mo te ʼu akonaki ʼo te lotu hala, ohage ko te Tahitolu peʼe ko te ʼifeli. (Soane 8:32) ʼE koutou toe fia ʼiloʼi lelei age ia Sehova, ke koutou faʼifaʼitaki lelei kia te ia pea ke koutou haʼele ʼi ʼona muʼa ʼi te faitotonu.—1 Hau 15:4, 5.

² Ko te tupuʼaga maʼuhiga ke koutou ako te Folafola ʼa te ʼAtua, ke feala hakotou akoʼi te hahaʼi—ia nātou ʼe koutou ʼoʼofa ai, mo tokotou ʼu feʼilo, pea mo nātou ʼaē ʼe mole koutou feʼiloʼiʼaki mo nātou. ʼE mole ko he faʼahi ʼe filifili e te kau Kilisitiano moʼoni ke nātou fai peʼe kailoa. Neʼe ʼui fēnei e Sesu ki tana kau tisipulo: “Koutou olo o fakahoko he u tisipulo i te atu puleaga, . . . koutou fakaʼako natou ki te taupau o meafuape nee au fakatotonu kia koutou.”—Mateo 28:19, 20.

3, 4. He koʼe ʼe maʼuhiga ke koutou akoʼi te hahaʼi ohage ko tona fakatotonu e Sesu?

³ Ko te ako ʼo te Tohi-Tapu ʼaki te loto ʼaē ke koutou akoʼi te hahaʼi, ʼe ko he meʼa maʼuhiga pea ʼe koutou maʼu ai he fiafia heʼegata. Ko te faiako ʼe ko he gāue ʼe fakaʼapaʼapaʼi talu mai fualoa. ʼE ʼui fēnei e te Encyclopédie Encarta: “ ʼI te kau Sutea, tokolahi te hahaʼi lalahi neʼe nātou faka ʼuhiga te kau faiako ko he kau takitaki ki te hāofaki, pea neʼe nātou fakaloto mālohiʼi te fānau ke lahi age tanatou fakaʼapaʼapa ki tanatou kau faiako ʼi tanatou fakaʼapaʼapa ki tanatou ʼu mātuʼa.” ʼE ko he meʼa maʼuhiga tāfito maʼa te kau Kilisitiano tanatou ako te Tohi-Tapu pea mo nātou akoʼi leva ki te hahaʼi.

⁴ “ ʼE tokolahi te hahaʼi ʼe nātou fili te gāue faiako ʼi he tahi age gāue. Ko te teitei 48 miliona tagata mo fafine ʼi te malamanei ʼe ko he kau faiako.” (The World Book Encyclopedia) ʼE maʼua ki te faiako ke ina akoʼi te ʼatamai ʼo te kau tūpulaga, pea ʼe malave kia nātou ʼi te ʼu taʼu ki muli age. ʼE lahi age te fua lelei mokā koutou fakalogo ki te fakatotonu ʼa Sesu ke koutou akoʼi te hahaʼi; ʼe feala ke malave kia nātou ki he ʼu temi ʼe heʼegata. Neʼe fakahā lelei e te ʼapositolo ko Paulo te faʼahi ʼaia, ʼi tana uga fēnei ia Timoteo: “Tokaga kia koe pea mo tau faiʼakonaki, kataki i ai. Koteuhi i tau fai aia, e ke haofaki anai ia koe, ia koe pea mo natou e fakalogo kia te koe.” (1 Timoteo 4:16) Ei, ʼe pipiki ki takotou faiako te hāofaki ʼo te hahaʼi.

5. He koʼe ʼe maʼuhiga age te ako faka Kilisitiano?

⁵ Ko takotou ako pea mo takotou akoʼi te hahaʼi ʼe fakagafua pea mo takitaki e te Matapuna ʼaē ʼe lahi tokotahi, te Tuʼi ʼAliki ʼo te ʼatulaulau. Ko te faʼahi ʼaia ʼe ina hikihiki ai te ako ʼaia ʼi te ako ʼaē ʼe fai e te mālama, tatau aipe peʼe akoʼi ai te ʼu faʼahi tāfito, te poto ki he gāue, peʼe ko te faʼahi faka tōketā. ʼI te ako faka Kilisitiano, ʼe akoʼi he tahi ke ina faʼifaʼitakiʼi lelei te ʼAlo ʼo te ʼAtua, ia Kilisito Sesu, pea ke ina akoʼi te hahaʼi ke nātou fai feiā mo nātou.—Soane 15:10.

He Koʼe ʼe Tonu Ke Kita Ako?

6, 7. (a) He koʼe ʼe tonu ke kita akoʼi muʼa ia kita? (b) He koʼe ko te kau Sutea ʼo te ʼuluaki sēkulō neʼe mole ko he ʼu hahaʼi faiako?

⁶ He koʼe ʼe tonu muʼa ke kita akoʼi ia kita? ʼE mole feala ke tou akoʼi lelei te hahaʼi mo kapau neʼe mole ʼuluaki akoʼi muʼa tatou. Neʼe fakahā lelei e Paulo te faʼahi ʼaia ʼi tana ʼu palalau poto ʼaē neʼe ina fai ki te kau Sutea ʼo te temi ʼaia, kae ʼe ko he logo ʼe maʼuhiga ʼaupito ki te kau Kilisitiano ia ʼaho nei. Neʼe fehuʼi fēnei e Paulo: “Koia, e ke fakaʼako te tahi kaiga, kae e mole ke akoʼi ia koe totonu! Ko koe ae e ke ako ke aua te kaihaa, kae e ke kaihaa! E ke lau ke aua te tono, kae e ke tono! Ko koe ae e ke fehia ki te u taulaʼatua, kae e ke kaihaa te u falelotu! Ia koe e ke fiameamea i te lao, kae e ke maumaui te lao a te Atua.”—Loma 2:21-23.

⁷ ʼAki te ʼu palalau ʼaia, neʼe talanoa ia Paulo ki te ʼu aga kovi e lua, ʼaē neʼe talanoa lelei kiai te ʼu Folafola e Hogofulu: ʼAua te kaihaʼa, pea ʼaua te tono. (Ekesote 20:14, 15) Ko ʼihi Sutea ʼi te temi ʼo Paulo neʼe nātou fialahi he neʼe nātou maʼu te Lao ʼa te ʼAtua. ‘Neʼe akoʼi kia nātou te lao, pea neʼe nātou tui ko nātou ko he ʼu tagata takitaki ʼo te hahaʼi kivi pea ko he ʼu mālama kia nātou ʼe nonofo ʼi te fakapōʼuli, pea ko he ʼu tagata faiako maʼa nātou liliki.’ (Loma 2:17-20) Kae ko ʼihi neʼe malualoi he neʼe nātou fai fakafūfū te kaihaʼa peʼe ko te tono. Neʼe fakalainoaʼi e te aga ʼaia ia te Lao pea mo Tona Matapuna ʼaē ʼe nofo ʼi selo. ʼE koutou fakatokagaʼi neʼe mole feala ke nātou akoʼi te hahaʼi; ʼi tona ʼuhiga moʼoni, neʼe mole nātou akoʼi pe la ia nātou totonu.

8. Neʼe lagi kaihaʼa feafeaʼi te ʼu fale lotu e ʼihi kau Sutea ʼi te temi ʼo Paulo?

⁸ Neʼe talanoa ia Paulo ki te kaihaʼa ʼo te ʼu fale lotu. Neʼe fai moʼoni koa e ʼihi kau Sutea te faʼahi ʼaia? Neʼe koteā ʼaē neʼe manatu kiai ia Paulo? ʼI tona fakahagatonu, ʼe mole lahi te ʼu talanoa neʼe fai ʼo ʼuhiga mo te faʼahi ʼaia, koia ʼe mole feala ke tou ʼiloʼi papau pe neʼe kaihaʼa feafeaʼi e ʼihi kau Sutea te ʼu fale lotu. Ki muʼa atu, ko te sikalaipe ʼo te kolo ʼo Efeso neʼe ina ʼui ko te ʼu kaumeʼa ʼo Paulo neʼe mole ko he kau ‘kaihaʼa ʼo te fale lotu,’ ʼo hā ʼaki mai ko ʼihi hahaʼi neʼe lagi nātou manatu neʼe fai e te kau Sutea te aga ʼaia. (Gaue 19:29-37) Neʼe nātou fakaʼaogaʼi koa peʼe nātou fakatau koa te ʼu koloā maʼuhiga ʼo te ʼu fale lotu pagani, ʼaē neʼe maumauʼi e te ʼu foʼi tau peʼe ko te kau Sutea ʼaē neʼe tauhi fakavale ki tanatou lotu? Ohage ko tona ʼui e te Lao ʼa te ʼAtua, ko te aulo pea mo te siliva ʼo te ʼu tamapua neʼe tonu ke maumauʼi kae mole fakaʼaogaʼi. (Teutalonome 7:25)a Koia neʼe lagi talanoa ia Paulo ki te kau Sutea ʼaē neʼe mole nātou tokagaʼi te fakatotonu ʼa te ʼAtua, pea neʼe nātou fakaʼaogaʼi peʼe nātou maʼu paʼaga ʼaki te ʼu fakatātā ʼo te ʼu fale lotu pagani.

9. Koteā te ʼu aga neʼe fai ʼi te fale lotu ʼo Selusalemi, neʼe hage pe ko he kaihaʼa ʼo te fale lotu?

⁹ Kae neʼe toe talanoa ia Josèphe ʼo ʼuhiga mo te meʼa neʼe hoko ʼi Loma ʼuhi ko te kau Sutea e toko fā, pea ko tonatou takitaki neʼe ko te tagata faiako ʼo te Lao. Ko te toko fā ʼaia neʼe nātou fakalotoʼi te fafine Loma, neʼe tafoki ki te lotu Sutea, ke ina ʼavage kia nātou te aulo pea mo te tahi ʼu meʼa ʼofa maʼuhiga neʼe momoli ki te fale lotu ʼo Selusalemi. Neʼe ʼavage e te fafine te ʼu koloā ʼaia, pea neʼe nātou fakaʼaogaʼi maʼa nātou—ohage ko hanatou kaihaʼa te fale lotu.b Neʼe toe kaihaʼa e ʼihi te fale lotu ʼa te ʼAtua he neʼe nātou fai he ʼu mōlaga ʼaki he ʼu sakilifisio kovi, pea mo nātou faifakatau ʼaki he loto mānumānu ʼi te ʼu malaʼe ʼo te fale lotu, ʼo nātou fakaliliu ai te fale lotu ko “he ana o te kau kaihaa.”—Mateo 21:12, 13; Malakia 1:12-14; 3:8, 9.

Tou Akoʼi Te ʼu Pelesepeto Fakaʼatua

10. Koteā te manatu ʼe tonu ke tou tokagaʼi tāfito ʼi te ʼu palalau ʼa Paulo ʼaē ʼe tuʼu ia Loma 2:21-23?

¹⁰ Tatau aipe pe neʼe fai ʼi te ʼuluaki sēkulō te ʼu aga ʼaē neʼe talanoa kiai ia Paulo, ohage ko te kaihaʼa, te tono, te kaihaʼa ʼi te ʼu fale lotu, kae tou tokagaʼi te faʼahi tāfito ʼo tana ʼu palalau. Neʼe ina ʼui fēnei: “Koia, e ke fakaʼako te tahi kaiga, kae e mole ke akoʼi ia koe totonu!” ʼE lelei ke tou tokagaʼi ko te ʼu faʼifaʼitaki ʼaē neʼe talanoa kiai ia Paulo neʼe ʼi ai tonatou pipikiga mo te ʼu pelesepeto fakaʼatua. Neʼe mole talanoa e te ʼapositolo ki he ʼu akonaki ʼi te Tohi-Tapu pea mo te hisitolia faka Tohi-Tapu. Ko te akoʼi ʼo kita pea mo te akoʼi ʼo te hahaʼi ʼaē neʼe talanoa kiai Paulo, ʼe ʼi ai tona pikipikiga mo te ʼu pelesepeto fakaʼatua.

11. ʼI takotou ako te Folafola ʼa te ʼAtua, he koʼe ʼe tonu ke koutou tokagaʼi te ʼu pelesepeto fakaʼatua?

¹¹ ʼE tou mulimuli ki te tokoni ʼo Loma 2:21-23, mo kapau ʼe tou ako ʼi te Folafola ʼa te ʼAtua te ʼu pelesepeto fakaʼatua, mo tou mulimuli ki te meʼa ʼaē ʼe tou ako, pea mo akoʼi leva ki ʼihi ke nātou fai te faʼahi ʼaia. Koia ka koutou ako te Tohi-Tapu, koutou tokagaʼi te ʼu lekula ʼa Sehova, ʼaē ʼe fakahā mai ai te ʼu pelesepeto fakaʼatua moʼoni. Koutou metitasio ki te ʼu tokoni pea mo te ʼu ako ʼe koutou maʼu ʼi te Tohi-Tapu. Pea ʼaki he lotomālohi koutou maʼuliʼi te ʼu meʼa ʼaē neʼe koutou ako. Pea ʼe tonu anai ke koutou lototoʼa pea mo loto mālohi ʼi takotou fai te faʼahi ʼaia. ʼE faigafua ki he ʼu hahaʼi agahala, hanatou faka lākatonuʼi he ʼaluʼaga neʼe tonu ai pe neʼe maʼua ai ke nātou maumauʼi te ʼu pelesepeto fakaʼatua. Ko te kau Sutea ʼaē neʼe talanoa kiai ia Paulo, neʼe lagi nātou māhani ʼi te ʼu manatu feiā moʼo faka lākatonuʼi tanatou ʼu aga ʼaē ʼe kovi pea mo kākāʼi te hahaʼi. Kae ʼe fakahā mai e te ʼu palalau ʼa Paulo, ʼe mole he ʼaluʼaga ʼe tonu ai ke tou meʼa noaʼi te ʼu pelesepeto fakaʼatua.

12. ʼE malave feafeaʼi te aga ʼaē ʼe lelei pea mo te aga ʼaē ʼe kovi kia Sehova ʼAtua, pea he koʼe ʼe ʼaoga ke tou manatuʼi te faʼahi ʼaia?

¹² Neʼe faka maʼuhigaʼi e te ʼapositolo te tupuʼaga tāfito ʼaē ke koutou ako pea mo maʼuliʼi te ʼu pelesepeto fakaʼatua ʼaē ʼe maʼu ʼi te Tohi-Tapu. Ko te aga kovi ʼa te kau Sutea neʼe ko he moamoagaʼi ʼo Sehova: “Ia koe e ke fiameamea i te lao, kae e ke maumaui te lao a te Atua. Koia, o hage ko tona tohi: Uhi ko koe e moamoagaʼi te huafa o te Atua i te hahai pagani.” (Loma 2:23, 24) ʼE toe feiā ia ʼaho nei, kapau ʼe mole tou tokagaʼi te ʼu pelesepeto fakaʼatua, pea ʼe tou fakalainoaʼi te Matapuna ʼo te ʼu pelesepeto ʼaia. Kae kapau ʼe tou mulimuli fakalelei ki te ʼu lekula ʼa te ʼAtua, pea ʼe hikihiki anai ia ia, pea mo fakaʼapaʼapaʼi. (Isaia 52:5; Esekiele 36:20) Ko takotou ʼiloʼi te faʼahi ʼaia ʼe ina fakaloto mālohiʼi koutou, mo kapau ʼe hoko kia koutou he ʼu fakahala peʼe ko he ʼu ʼaluʼaga ʼe feala ke faigafua ai hakotou meʼa noaʼi te ʼu pelesepeto fakaʼatua. ʼE ʼi ai te tahi ako ʼe tou toe tāʼofi ʼi te ʼu palalau ʼa Paulo. Kua koutou ʼiloʼi ʼe malave takotou aga ki te ʼAtua, koia ka koutou akoʼi te hahaʼi, pea koutou tokoni kia nātou ke nātou mahino peʼe malave feafeaʼi anai kia Sehova tanatou maʼuliʼi te ʼu lekula ʼo te ʼu pelesepeto fakaʼatua ʼaē ʼe nātou ako. Ko te ʼu pelesepeto fakaʼatua ʼe mole nātou foaki pe te fiafia pea mo puipui ai he tahi. ʼE toe malave ki Ia ʼaē neʼe ina fakatuʼutuʼu pea mo fakaloto mālohiʼi ke muliʼi te ʼu pelesepeto ʼaia.—Pesalemo 74:10; Sakopo 3:17.

13. (a) ʼE tokoni feafeaʼi mai kia tatou te Tohi-Tapu ʼo ʼuhiga mo te ʼu pelesepeto fakaʼatua? (b) Koutou tuku mai te manatu tāfito ʼo te tokoni ʼaē ia 1 Tesalonika 4:3-7.

¹³ Ko te ʼu pelesepeto fakaʼatua ʼe toe malave ki te hahaʼi. ʼE koutou mahino kiai ʼaki te ʼu faʼifaʼitaki ʼi te Folafola ʼa te ʼAtua, ʼaē ʼe hā ai te maʼuhiga ʼo te maʼuliʼi ʼo te ʼu pelesepeto fakaʼatua, pea mo tona ʼu fua mokā ʼe mole tokagaʼi te ʼu lekula ʼaia. (Senesi 39:1-9, 21; Sosue 7:1-25) ʼE koutou lava maʼu mo te ʼu tokoni lelei ʼo ʼuhiga mo te ʼu pelesepeto fakaʼatua ʼi te tokoni ʼaenī: “Ko te meʼa ʼaē ʼe loto ki ai te ʼAtua, ko tokotou maʼoniʼoni, ke koutou fakamamaʼo mai te folonikasio; ke koutou tahi poto ʼi te taupau ʼo tona ipu ʼi te maʼoniʼoni pea mo te fakaʼapaʼapa, ka mole ʼi te holi ki te felāveʼi fakasino ʼaē ʼe ʼiloga mai ai te mānumānu ohage ko tona fai ʼi te ʼu puleʼaga ʼaenā ʼaē ʼe mole nātou ʼiloʼi te ʼAtua. Ke ʼaua naʼa ʼi ai he tahi ʼi te faʼahi ʼaia ʼe ina fai he meʼa ke kovi ki tona tēhina, . . . he neʼe pāui tatou e te ʼAtua, ke mole fakagafua te heʼe maʼa, kae ʼo ʼuhiga mo te fakamaʼoniʼoni.”—1 Tesalonika 4:3-7, MN.

14. Koteā te ʼu fehuʼi ʼe feala ke koutou fai ʼo ʼuhiga mo te tokoni ʼaē ia 1 Tesalonika 4:3-7?

¹⁴ ʼE tou mahino fuli ʼi te ʼu vaega ʼaenī, ko te ʼu felāveʼi fakasino heʼeʼaoga ʼe nātou maumauʼi te lao ʼo ʼuhiga mo te ʼu pelesepeto fakaʼatua. Kae ʼe feala ke loloto age takotou mahino ki te vaega ʼaia. Ko ʼihi vaega ʼe feala ke lahi age takotou ako pea mo tona metitasioʼi, heʼe koutou maʼu ai anai he mahino lahi ki te ʼu vaega ʼaia. Ohage la, ʼe feala ke koutou fakakaukauʼi te faka ʼuhiga ʼo te ʼu palalau ʼa Paulo, ka folonikasio he tahi, pea ʼe “ina fai he meʼa ke kovi ki tona tēhina pea mo fakatupu kovi ki te ʼu fealagia ʼaē ʼe ina maʼu.” Koteā te ʼu fealagia ʼaia, pea ko takotou mahino kiai ʼe tokoni feafeaʼi anai kia koutou ke koutou tokaga ʼo taupau te ʼu pelesepeto fakaʼatua? ʼAki te ʼu fua ʼo takotou ʼu kumi, ʼe lava feafeaʼi hakotou akoʼi te hahaʼi pea mo tokoni kia nātou ke nātou fakaʼapaʼapa ki te ʼAtua?

Koutou Ako Ke Feala Hakotou Akoʼi Te Hahaʼi

15. Koteā ʼaē ʼe feala ke koutou fakaʼaogaʼi ʼi takotou ako takitokotahi?

¹⁵ ʼE maʼu e te kau Fakamoʼoni ʼa Sehova he ʼu tohi ʼe nātou fakaʼaogaʼi moʼo kumi he ʼu fehuʼi neʼe lagaʼi, ke nātou ako ia nātou totonu pea mo akoʼi ki te hahaʼi. ʼE ʼi ai te tohi ʼe maʼu ʼi te ʼu lea kehekehe, ʼe ko te Index des publications de la Société Watch Tower. Kapau ʼe ʼi ai hakotou tohi feiā, pea koutou fakaʼaogaʼi moʼo kumi he ʼu manatu ʼi te ʼu tohi faka Tohi-Tapu ʼa te kau Fakamoʼoni ʼa Sehova. ʼE feala ke koutou fai he ʼu kumi ʼo mulimuli ki he kupu peʼe ki te lisi ʼo te ʼu vaega faka Tohi-Tapu. Ko te tahi meʼa gāue ʼe maʼu e te kau Fakamoʼoni ʼa Sehova ʼi te ʼu lea kehekehe ʼe ko te Watchtower Library. Ko te polokalama olotinatea ʼaia ʼo te CD-ROM ʼe maʼu ai te ʼu tuʼuga tohi. ʼE feala ai ki he tahi ke ina fai he ʼu kumi ʼo ʼuhiga mo he ʼu kupu tāfito peʼe ko he fakamahino ʼo he ʼu vaega. Kapau ʼe koutou maʼu te ʼu meʼa gāue ʼaia, pea koutou fakaʼaogaʼi tuʼumaʼu ʼi takotou ako te Folafola ʼa te ʼAtua, ke koutou akoʼi ai ki ʼihi.

16, 17. (a) ʼE tou lava maʼu ʼifea he ʼu fakamahino ʼo ʼuhiga mo te ʼu fealagia ʼaē ʼe talanoa kiai ia 1 Tesalonika 4:6? (b) Koteā te ʼu fealagia ʼa ʼihi ʼe maumauʼi e te folonikasio?

¹⁶ Tou toʼo te faʼifaʼitaki ʼaē ʼe tuʼu ʼi ʼoluga, ia 1 Tesalonika 4:3-7. ʼE ʼi ai te ʼu fehuʼi ʼo ʼuhiga mo te ʼu fealagia ʼaē ʼe maʼu e he tahi. Koteā te ʼu fealagia ʼaia? Pea koteā ʼaē ʼe feala ke fakatupu kovi ki te ʼu fealagia ʼaia? ʼAki te ʼu meʼa gāue ʼaē neʼe tou talanoa kiai, ʼe lagi koutou maʼu anai he ʼu tuʼuga fakamahino ʼo te ʼu vaega ʼaia, ʼo ʼuhiga mo te ʼu fealagia ʼaē ʼe maʼu e he tahi, ʼaē neʼe talanoa kiai Paulo. ʼE feala hakotou lau te ʼu manatu ʼaia ʼi te tohi Étude perspicace des Écritures, Tohi 1 pasina 921, mo te tohi La paix et la sécurité véritables : comment est-ce possible ? ʼi te pasina 145, mo Te Tule Leʼo Fakafalani ʼo te ʼaho 15 ʼo Novepeli 1989, ʼi te pasina 31.

¹⁷ ʼI takotou hoko atu takotou ako, ʼe koutou sio anai ko te ʼu tohi ʼaia ʼe nātou fakahā te moʼoni ʼo te ʼu palalau ʼa Paulo. Ko he tahi ʼe fai folonikasio ʼe agahala ki te ʼAtua pea ʼe feala ke mahaki ai. (1 Kolonito 6:18, 19; Hepeleo 13:4) Ko te tagata ʼaē ʼe fai folonikasio ʼe ina pulihi te ʼu fealagia ʼaē ʼe maʼu e te fafine ʼaē ʼe agahala mo ia. ʼE mole kei taupau e te fafine tona ʼuhiga maʼa pea mo he leʼo ʼo loto ʼe lelei. Kapau kei selipatea, pea ʼe pulihi e te tagata te fealagia ʼa te taʼahine ke nofo taupoʼou ʼo aʼu ki tona ʼohoana, pea mo te fealagia ʼa te tagata ka ʼohoana mo ia ke ʼohoana mo he taʼahine kei taupoʼou. ʼE fakaloto mamahi ai ki te ʼu mātuʼa ʼa te taʼahine, pea mo tona ʼohoana mo kapau ko he fafine kua ʼohoana. ʼE toe pulihi e te tagata agahala ʼaia te ʼuhiga maʼa ʼaē neʼe maʼu e tona famili. Kapau ʼe ko he tēhina ʼi te kokelekasio, pea ʼaki tana aga ʼaia ʼe ina ʼulihi anai te kokelekasio, pea mo fakatupu kovi kiai.—1 Kolonito 5:1.

18. ʼE lava fua lelei feafeaʼi kia koutou te ako ʼo te Tohi-Tapu ʼo ʼuhiga mo te aga faka Kilisitiano ʼaē ʼe lelei?

¹⁸ Ko te ʼu fakamahino ʼaia ʼo ʼuhiga mo te ʼu fealagia ʼaē ʼe maʼu e he tahi, ʼe mole tokoni koa la kia koutou ke koutou mahino ki te faka ʼuhiga loloto ʼo te vaega ʼaia? Ko te fai feiā ʼo te ako ʼe mahino ia ʼe ʼaoga ʼaupito. Ka koutou hoko atu, pea ʼe koutou haga akoʼi ia koutou. ʼE tuputupu ai takotou mahino ki te moʼoni pea mo te mālohi ʼo te logo ʼa te ʼAtua. ʼE fakaloto mālohiʼi ai takotou fia taupau te ʼu pelesepeto fakaʼatua, tatau aipe peʼe koteā he ʼu faʼahiga fakahala ʼe feala ke hoko. Pea koutou fakakaukauʼi age muʼa te lelei ʼo takotou faiako! Ohage la, ʼi takotou akoʼi ki te hahaʼi te moʼoni ʼo te Tohi-Tapu, ʼe feala ke koutou fakamahino lelei ia 1 Tesalonika 4:3-7, ʼo faigafua ai hanatou mahino pea mo hanatou leleiʼia te ʼu pelesepeto fakaʼatua. Koia ko takotou ako ʼe feala ke tokoni kia koutou pea mo te tokolahi ke nātou fakaʼapaʼapa ki te ʼAtua. Pea neʼe tou talanoa pe ʼi henī ki he faʼifaʼitaki e tahi, te tohi ʼa Paulo ki te kau Tesalonika. ʼE ʼi ai te tahi ʼu faʼahi ʼo te ʼu pelesepeto fakaʼatua, pea mo te tahi ʼu faʼifaʼitaki ʼi te Tohi-Tapu pea mo te ʼu tokoni ʼe koutou maʼu ai he ʼu pelesepeto, ʼe feala ke koutou ako, mo mulimuli kiai pea mo akoʼi ki te hahaʼi.

19. He koʼe ʼe maʼuhiga ke koutou taupau te aga faka Kilisitiano ʼaē ʼe tonu ke fai?

¹⁹ ʼE mahino ia ʼe ko he aga fakapotopoto te taupau ʼo te ʼu pelesepeto fakaʼatua ʼaia. ʼE ʼui ia Sakopo 3:17 ko “te poto mai oluga,” mai ia Sehova totonu, “uluaki: e maʼa.” ʼE ʼasi lelei mai ai ʼe tonu ke kita mulimuli ki te ʼu lekula ʼa te ʼAtua ʼo ʼuhiga mo te ʼu aga ʼaē ʼe tonu ke fai. ʼI tona ʼuhiga moʼoni, ʼe fakamaʼua e Sehova kia nātou ʼaē ʼe nātou fakafofoga ia ia moʼo akoʼi te Tohi-Tapu, ke nātou tuku he ʼu faʼifaʼitaki lelei ʼi “te agamaʼa.” (1 Timoteo 4:12) Ko te maʼuli ʼa te ʼu ʼuluaki tisipulo ohage ko Paulo pea mo Timoteo, neʼe fakamoʼoni ki te faʼahi ʼaia; neʼe mole nā fai he ʼu aga heʼeʼaoga, pea neʼe tohi fēnei e Paulo: “Ko te feauaki mo te agauli fuape mo te manumanu, e mole tonu ke mau ia koutou, e mole tuha mo te kaigalotu. Aua te fai o te u leakovi, mo te u lea fakavale, pe ko te fe’gutuʼaki.”—Efeso 5:3, 4.

20, 21. He koʼe ʼe koutou manatu tahi mo te meʼa ʼaē neʼe tohi e te ʼapositolo ko Soane, ʼaē ʼe tuʼu ia 1 Soane 5:3?

²⁰ Ko te ʼu pelesepeto ʼa te Folafola ʼa te ʼAtua ʼe matala lelei pea mo mahino gafua, pea ʼe mole mamafa hatatou mulimuli kiai. Neʼe fakamoʼoni kiai ia Soane, te ʼapositolo ʼaē neʼe maʼuli fualoa. ʼAki te ʼu meʼa ʼaē neʼe sio kiai ʼi te ʼu lauʼi hogofulu taʼu ʼo tona maʼuli, neʼe ina ʼiloʼi ʼe mole fakatupu mamahi te mulimuli ki te ʼu pelesepeto fakaʼatua. Kailoa ia, kae neʼe ko he meʼa maʼuhiga, mo fua lelei, pea mo fakafiafia. Neʼe fakahā lelei e Soane te faʼahi ʼaia, ʼi tana tohi fēnei: “Koʼeni te ʼofa ki te ʼAtua: ke tou taupau tana ʼu fakatotonu. Pea ko tana ʼu fakatotonu ʼe mole mamafa kia tatou.”—1 Soane 5:3, New English Translation.

²¹ Kae koutou tokagaʼi, ʼe mole ʼui mai e Soane ko tatatou fakalogo ki te ʼAtua ʼaki te aga faka Kilisitiano ʼe ko te meʼa lelei ʼaia, ʼuhi pe heʼe tou hāo ai mai he ʼu fihifihia, pea mo te ʼu fua kovi ʼo te ʼu aga heʼeʼaoga. ʼE ina fakahā mai te tupuʼaga moʼoni ʼo te fakalogo ki te ʼAtua, ʼo ina ʼuluaki tala mai ʼe ko he fakahā ʼaia ʼo totatou ʼofa kia Sehova ʼAtua, pea ʼe ko he fealagia ke tou fakahā ʼe tou ʼofa kia te ia. ʼE moʼoni, ke feala hatatou ako pea mo akoʼi ki te hahaʼi ke nātou ʼofa ki te ʼAtua, ʼe tonu ke tou tali pea mo maʼuliʼi tana ʼu lekula māʼoluga. Ei, ko tona faka ʼuhiga ke ako pea ke akoʼi ki te hahaʼi te ʼu pelesepeto fakaʼatua.

[Kiʼi nota]

ʼE Kei Koutou Manatuʼi Koa?

• He koʼe ʼe tonu ke tou akoʼi muʼa ia tatou ʼi muʼa ʼo hatatou akoʼi te hahaʼi?

• Koteā te ʼu fua ʼo tatatou aga kia Sehova?

• Ko te ʼu fealagia ʼo ai ʼaē ʼe lava pulihi e te tagata fai folonikasio?

• Koteā ʼaē ʼe koutou fia fai moʼo mulimuli ki te ʼu aga maʼa faka Kilisitiano?

[Paki ʼo te pasina 22]

“Ko tana ʼu fakatotonu ʼe mole mamafa maʼa tatou”