Tou Tokoni Ki Te Hahaʼi Ke Nātou Ako Te ʼu Fakamaʼua ʼa Te ʼAtua

“Neʼe tuku mai kia te ʼau te maʼua. Ei, malaʼia kia te ʼau mo kapau ʼe mole ʼau tala te logo lelei!”​—1 Kolonito 9⁠:16.

1, 2. (a) Koteā te gāue koga lua ʼaē ʼe fakamaʼua mai e Sehova kia tatou ke tou kau kiai? (b) Koteā ʼaē ʼe tonu ke ako e te hahaʼi fakamalotoloto ke nātou liliu ai ko he ʼu hahaʼi fakalogo ʼo te Puleʼaga ʼo te ʼAtua?

ʼE ʼI AI te logo ʼa Sehova maʼa te malamanei. ʼE ʼi ai tana Puleʼaga, pea ʼe ina loto ke logo kiai te hahaʼi ʼi te ʼu potu fuli pe ʼo te kele! ʼI te temi ʼaē kua tou ako ai te logo lelei ʼaia, ʼe fakamaʼua mai e te ʼAtua ke tou vaevae te logo ʼaia ki te hahaʼi. ʼE ko te gāue ʼaia ʼe koga lua. ʼUluaki, ʼe tonu ke tou tala te logo lelei ʼo te Puleʼaga ʼo te ʼAtua. ʼI tana lea faka polofeta ʼo ʼuhiga mo “te fakaʼosi ʼo te tuʼu ʼo te ʼu faʼahiga meʼa ʼaenī,” neʼe ʼui fēnei e Sesu: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.”​—Mateo 24:​3, 14.

² Ko te lua koga ʼo te gāue ʼaia ʼe ko te akoʼi ʼo nātou ʼaē ʼe nātou tali lelei te logo ʼo te Puleʼaga. ʼI tana ʼosi fakatuʼuake, neʼe ʼui fēnei e Sesu ki te tokolahi ʼo tana ʼu tisipulo: “Koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou. Pea koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 28:19, 20) Ko te ʼu ‘meʼa ʼaē neʼe fakatotonu e Kilisito’ ʼe mole haʼu ia mai ia te ia; neʼe ina akoʼi te hahaʼi ke nātou mulimuli ki te ʼu fakatotonu ʼa te ʼAtua, pe ko te ʼu meʼa ʼaē ʼe ina fakamaʼua kia nātou. (Soane 14:23, 24; 15:10) Koia, ko te akoʼi ʼo te hahaʼi ke nātou ‘mulimuli ki te ʼu meʼa ʼaē neʼe fakatotonu age e Kilisito,’ ʼe kau kiai te tokoni ʼaē kia nātou ke nātou ako te ʼu meʼa ʼaē ʼe fakamaʼua e te ʼAtua. Ko te hahaʼi ʼaē ʼe fakamalotoloto ʼe tonu ke nātou fakahoko te ʼu fakamaʼua ʼa te ʼAtua ke feala hanatou liliu ko he ʼu hahaʼi fakalogo ʼo tona Puleʼaga.

3. Koteā te Puleʼaga ʼo te ʼAtua, pea koteā ʼaē ka ina fakahoko anai, ʼaē ʼe tupu ai te ʼui ʼaē ko te logo ʼo te Puleʼaga ʼe ko he logo lelei?

³ Koteā te Puleʼaga ʼo te ʼAtua? Pea koteā te meʼa ʼaē ka ina fakahoko, ʼaē ʼe ʼui ai, ko te logo ʼo te Puleʼaga ʼe ko he logo lelei? Ko te Puleʼaga ʼo te ʼAtua ʼe ko he puleʼaga ʼe tuʼu ʼi selo. ʼE maʼuhiga te puleʼaga ʼaia ki te loto ʼa Sehova, heʼe ina fakaʼaogaʼi anai moʼo tāpuhā ʼo tona huafa, moʼo fakamaʼa mai te ʼu manuki fuli pe. ʼE fakaʼaogaʼi anai e Sehova te Puleʼaga mo fakahoko tona finegalo ʼi te kele ohage ko tana fai ʼi selo. Ko te tupuʼaga la ʼaia ʼo te akoʼi ʼo tatou e Sesu ke tou faikole ke hoko mai te Puleʼaga ʼo te ʼAtua, pea mo ina uga tatou ke tou fakamuʼamuʼa te Puleʼaga ʼaia ʼi totatou maʼuli. (Mateo 6:​9, 10, 33) Kua koutou mahino koa pe koʼe ʼe maʼuhiga ʼaupito kia Sehova ke tou akoʼi te hahaʼi ʼo ʼuhiga mo tona Puleʼaga?

Ko He Meʼa Faigataʼa Kae Mole Ko He Kavega

4. Ko he faʼahiga fakatā feafeaʼi ʼaē ʼe feala ke tou fakaʼaogaʼi moʼo fakahā ko tatatou maʼua ʼaē ke tou fai faka mafola ʼe mole ko he kavega ia?

⁴ ʼE ko he kavega mamafa koa te faka mafola ʼo te logo lelei ʼaia? Kailoa ia! Koʼeni tona fakatā: ʼE ko he maʼua ki te tāmai ke tokaga ki te maʼuli fakasino ʼo tona famili. Kapau ʼe mole ina fakahoko te faʼahi ʼaia, pea ʼe tatau anai ia ki hana fakafisi ki te tui. Neʼe tohi fēnei e te ʼapositolo ko Paulo: “ ʼIo, kapau ʼe mole tokaga he tahi ki tona ʼu kāiga, kae tāfito ia nātou ʼo tona loto fale, ʼe kua fakafisi ia ki te tui pea ʼe kovi age ia ʼi he tagata ʼe mole tui.” (1 Timoteo 5:8) Kae ko te maʼua ʼaia ʼe ko he kavega mamafa koa ki te tagata Kilisitiano? Kailoa, heʼe kapau ʼe ʼofa ki tona famili, pea ʼe ina fia foaki anai te ʼu meʼa ʼaē ʼe ʼaoga kia nātou.

5. Logope la ko te fai faka mafola pea mo te fai ʼo ni ʼu tisipulo ʼe ko he maʼua, he koʼe ʼe tonu ke tou fiafia ʼi te kau ki te ʼu gāue ʼaia?

⁵ ʼO toe feiā pe, ko te gāue fai faka mafola pea mo te fai ʼo he ʼu tisipulo ʼe ko he fakatotonu, ko he fakamaʼua, pea ʼe fakalogo kiai totatou maʼuli. Neʼe fakahā fēnei e Paulo te faʼahi ʼaia: “Neʼe tuku mai kia te ʼau te maʼua. Ei, malaʼia kia te ʼau mo kapau ʼe mole ʼau tala te logo lelei!” (1 Kolonito 9:​16; vakaʼi ia Esekiele 33:​7-9.) Kae, ko te meʼa ʼaē ʼe ina uga tatou ki te fai faka mafola ʼe ko te ʼofa, kae mole ko he gāue ʼe tou fai feiā pe. ʼUluaki ʼe tou ʼofa ki te ʼAtua, kae ʼe tou toe ʼofa foki ki totatou ʼu kāiga, pea ʼe mahino kia tatou ʼe maʼuhiga ke nātou logo ki te logo lelei. (Mateo 22:37-​39) ʼE ina foaki kia nātou te ʼamanaki ʼaenī ki te temi ka haʼu. ʼE fakatonutonuʼi anai e te Puleʼaga ʼa te ʼAtua te ʼu meʼa heʼe faitotonu, mo ina pulihi te ʼu mamahi fuli, pea mo ina fakatuʼu anai te tokalelei pea mo te logo tahi​—pea ko te ʼu meʼa fuli ʼaia, ʼe ko te ʼu tapuakina ʼo heʼegata ʼo nātou ʼaē ka fakalogo ki tana pule faitotonu. ʼE mole tou fiafia koa la, ʼi te vaevae ia te logo lelei ʼaia mo te hahaʼi?​—Pesalemo 110:3.

6. He koʼe ko te fai faka mafola pea mo te gāue ʼaē ko te fai ʼo ni ʼu tisipulo ʼe ko he meʼa faigataʼa?

⁶ Kae, ko te gāue fai faka mafola pea mo te fai ʼo ni ʼu tisipulo ʼe ko he meʼa faigataʼa. ʼE mole tatau te hahaʼi. ʼE mole tatau te ʼu meʼa ʼaē ʼe leleiʼia e te hahaʼi fuli pea ʼe mole tatau tanatou ʼu fealagia takitokotahi. Ko ʼihi neʼe nātou ako lelei, kae ko ʼihi neʼe mole faʼa lelei tanatou ako. Ko te lautohi​—ʼi te temi muʼa, neʼe ko he meʼa neʼe leleiʼia e te hahaʼi—​kae ʼi te temi nei ʼe ko he meʼa kua fehiʼa kiai te hahaʼi. ʼI te ʼu fenua ʼaē ʼe lahi ai te hahaʼi poto lautohi, ʼe tuputupu ai te fihifihia ʼaē ko tanatou fehiʼa ki te lautohi. Koia, ʼe lava feafeaʼi hatatou tokoni ki te hahaʼi ʼo te ʼu fenua kehekehe pea ki te hahaʼi ʼaē ʼe kehekehe te ʼu meʼa ʼaē ʼe nātou leleiʼia, ke nātou ako te ʼu meʼa ʼaē ʼe fakamaʼua mai e te ʼAtua?​—Vakaʼi ia 1 Kolonito 9:​20-​23.

ʼE Tou Maʼu Ia Meʼa Fuli ʼAē ʼe ʼAoga Moʼo Tokoni Ki Te Hahaʼi

7. Koteā te ʼu meʼa ʼaē neʼe foaki mai kia tatou e “te tagata kaugana agatonu mo poto” moʼo tokoni ki te hahaʼi ke nātou ako te ʼu meʼa ʼaē ʼe fakamaʼua mai e te ʼAtua?

⁷ ʼE faigafua te fakahoko ʼo he meʼa ʼe faigataʼa tona fai, mo kapau ʼe tou maʼu te ʼu meʼa gāue fuli ʼaē ʼe ʼaoga moʼo fai ʼo te faʼahi ʼaia. Ia ʼaho nei, ko te meʼa gāue ʼaē ʼe ʼaoga moʼo fakahoko ʼo he faʼahiga gāue, ʼe lagi fetogi anai ʼapogipogi he kua fetogi te ʼu meʼa ʼaē ʼe ʼaoga ki te hahaʼi. ʼE toe feiā mo tatatou gāue ʼaē ko te tala ʼo te logo ʼo ʼuhiga mo te Puleʼaga ʼo te ʼAtua. Lolotoga te ʼu taʼu, ʼe foaki mai e te “tagata kaugana agatonu mo poto” kia tatou te ʼu meʼa gāue ʼaē ʼe ʼaoga tonu ki te gāue, te ʼu tohi ʼaē neʼe fai tāfito moʼo fakaʼaogaʼi ʼi te fai ʼo te ʼu ako Tohi-Tapu ʼi te ʼu ʼapi. (Mateo 24:45) ʼE tou maʼu ia meʼa fuli ʼaē ʼe ʼaoga moʼo tokoni ki te hahaʼi ʼo “te ʼu fenua fuli pea mo te ʼu telepi fuli pea . . . mo te ʼu lea fuli” ke nātou ako te ʼu fakamaʼua ʼa te ʼAtua. (Fakahā 7:9) ʼI ʼihi temi, neʼe foaki mai kia tatou te ʼu meʼa gāue foʼou moʼo mulimuli ki te ʼu fetogi ʼaē ʼe hoko ʼi te minisitelio. Tou vakaʼi te ʼu faʼifaʼitaki.

8. (a) Koteā te gāue ʼaē neʼe fakahoko e te tohi “ Que Dieu soit reconnu pour vrai ! ” moʼo fakahaʼele ki muʼa te ako ʼo te Tohi-Tapu? (b) Ko te tohi fea ʼaē neʼe foaki mai ʼi te taʼu 1968 ʼo ʼuhiga mo te ako ʼo te Tohi-Tapu, pea neʼe koteā te fakatuʼutuʼu tāfito ʼa te tohi ʼaia? (c) Neʼe tokoni feafeaʼi te tohi Vérité ki te gāue ʼaē ko te fai ʼo ni ʼu tisipulo?

⁸ Talu mai te taʼu 1946 ki te taʼu 1968, neʼe fakaʼaogaʼi te tohi “ Que Dieu soit reconnu pour vrai ! ” ohage ko he meʼa gāue mālohi moʼo akoʼi ʼo te Tohi-Tapu, pea ko te ʼu tohi e 19 250 000 tupu neʼe tā ia lea e 54. Ko te tohi La vérité qui conduit à la vie éternelle ʼaē neʼe tā ʼi te taʼu 1968, neʼe fakaʼaogaʼi lelei lolotoga te ʼu taʼu ʼi te ako Tohi-Tapu mo te hahaʼi ʼaē neʼe nātou fia ʼiloʼi te moʼoni. ʼI muʼa atu, neʼe ko he meʼa māhani te ako ʼa ʼihi mo te kau Fakamoʼoni ʼa Sehova lolotoga te ʼu taʼu, kae mole nātou papitema. Kae ko te meʼa gāue ʼaia neʼe fakaʼaogaʼi moʼo fakahā ʼe ʼi ai te meʼa ʼe tonu ke fai e ia ʼaē ʼe ako, moʼo fakaloto mālohiʼi ia ia ke ina maʼuliʼi te ʼu meʼa ʼaē ʼe ina ako. Neʼe koteā tona fua? ʼE ʼui fēnei e te tohi Les Témoins de Jéhovah : Prédicateurs du Royaume de Dieu: “Lolotoga te ʼu taʼu gāue e tolu ʼaē neʼe kamata ʼi te ʼaho 1 ʼo Sepetepeli 1968, pea fakaʼosi ʼi te ʼaho 31 ʼo ʼAukusito 1971, ko te toko 434 906 hahaʼi neʼe papitema, ʼo tuʼa lua age tona kaugamālie ʼi te ʼu papitema ʼaē neʼe fai lolotoga te ʼu ʼuluaki taʼu e tolu ki muʼa atu!” Talu mai te temi ʼaē neʼe tā ai te tohi Vérité, ko te lahi ʼo tona tufa​—ko tohi e 107 000 000 tupu ia lea e 117.

9. Koteā ʼaē ʼe makehe ai te tohi E Feala Keke Mauli O Heegata Ite Palatiso Ite Kele, pea neʼe fua feafeaʼi ki te ʼu kaugā fai faka mafola?

⁹ ʼI te taʼu 1982 neʼe liliu te tohi E Feala Keke Mauli O Heegata Ite Palatiso Ite Kele, ko te tohi tāfito ʼaia ʼaē neʼe fakaʼaogaʼi moʼo fai ʼo te ʼu ako Tohi-Tapu. ʼE maʼu ʼi te tohi ʼaia te ʼu paki e 150 tupu, ʼe pikipiki kiai te ʼu fakamahino lelei ʼe nātou faka maʼuhigaʼi ai te manatu tāfito ʼaē ʼe fia fakahā e te ʼu paki. Neʼe ʼui fēnei e te alatike ʼo Te Minisitelio ʼo Te Puleʼaga ʼo Tesepeli 1982: “Lolotoga te ʼu taʼu e 20 ʼaē neʼe mātou fakaʼaogaʼi tāfito ai te tohi Que Dieu soit reconnu pour vrai ! ʼi te ʼu ako Tohi-Tapu (talu mai te taʼu 1946 ʼo aʼu ki te vaelua ʼo te ʼu taʼu 1960,) neʼe maʼu ai te ʼu kaugā fai faka mafola foʼou ʼo te Puleʼaga, e 1 000 000. Neʼe toe maʼu te tahi ʼu kaugā fai faka mafola foʼou e 1 000 000, ʼi te temi ʼaē neʼe fakaʼaogaʼi tāfito ai te tohi La vérité qui conduit à la vie éternelle, ʼaē neʼe fakahā ʼi te taʼu 1968. ʼI te fakaʼaogaʼi ʼo tatatou tohi ako foʼou, E Feala Keke Mauli O Heegata Ite Palatiso Ite Kele, ʼe tou sisio anai koa ki he tuputupu feiā ʼo te ʼu kaugā fai faka mafola? ʼE mahino papau ia ʼe hoko anai, mo kapau ʼe ko te finegalo ʼaia ʼa Sehova!” ʼE mahino ia neʼe ko te finegalo ʼaia ʼa Sehova, koteʼuhi talu mai te taʼu 1982 ki te taʼu 1995, ko hahaʼi e 2 700 000 tupu ʼaē neʼe hilifaki ki te ʼu kaugā fai faka mafola!

10. Ko te tohi foʼou fea ʼaē neʼe foaki mai ʼi te taʼu 1995, pea he koʼe ʼe tonu anai ke ina faka fealagia ki te kau ako Tohi-Tapu ke nātou tuputupu vave ʼi te faʼahi fakalaumālie?

¹⁰ Neʼe ʼui fēnei e Sesu: “Ko te taʼukai ʼe lahi, kaʼe tokosiʼi te kau gāue.” (Mateo 9:​37) ʼE moʼoni ko te taʼukai e lahi. ʼE kei lahi te gāue ʼaē ʼe tonu ke fai. ʼI te tahi ʼu fenua, ʼe tohi ʼi te lisi te higoa ʼa te hahaʼi ʼaē ʼe fakatalitali ke fai hanatou ako Tohi-Tapu. Koia, ʼaki te fakatuʼutuʼu ʼaē ke faka mafola fakavilivili te ʼatamai mālama ʼo ʼuhiga mo te ʼAtua, ʼi te taʼu 1995 neʼe tā e “te tagata kaugana agatonu mo poto” te tohi foʼou, ko te tohi ʼe ko ʼona pasina e 192 pea ko tona kupu tāfito ʼe ko Te ʼAtamai Mālama ʼAē ʼe Ina Taki Ki Te Maʼuli Heʼegata. Ko te tohi maʼuhiga ʼaia ʼe mole lahi tana talanoa ki te ʼu akonaki hala. ʼE ina fakahā te lelei ʼo te ʼu moʼoni faka Tohi-Tapu. ʼE mātou fakaʼamu ʼe ina faka fealagia anai ke tuputupu vave te kau ako ʼo te Tohi-Tapu ʼi te faʼahi fakalaumālie. Kua ʼosi fakaʼaogaʼi te tohi Te ʼAtamai Mālama ʼi te gāue fai faka mafola, pea ko tohi e 45 500 000 ʼaē neʼe fakaliliu ia lea e 125, pea ʼe fakaliliu nei ʼi te tahi ʼu lea e 21.

11. Ko te kaupepa lelei fea ʼaē neʼe foaki mai moʼo tokoni ki te ako ʼo te hahaʼi ʼaē ʼe mole popoto ʼi te faitohi pea mo lautohi peʼe ko nātou ʼaē ʼe mole lautohi lelei, pea koteā ʼaē ʼe hā ai neʼe tokoni ʼaupito te kaupepa ʼaia ki totatou polokalama ako ʼaē ʼe fai ʼi te malamanei katoa?

¹¹ ʼI ʼihi temi, neʼe foaki e ‘te tagata kaugana agatonu’ te ʼu tohi neʼe ʼi ai tona ʼaoga tāfito ki he ʼu faʼahiga hahaʼi. Ohage la, e feafeaʼi ki te hahaʼi ʼaē ʼe lagi ʼaoga kia nātou he tokoni ʼuhi ko te ʼu meʼa ʼaē neʼe akoʼi kia nātou pea mo tanatou lotu ʼi te temi muʼa? ʼE lava feafeaʼi hatatou tokoni kia nātou ke nātou ako te ʼu meʼa ʼaē ʼe fakamaʼua mai e te ʼAtua? ʼI te taʼu 1982, neʼe tou maʼu te meʼa ʼaē neʼe ʼaoga tonu kia tatou​—te kaupepa lahi ʼaē ko ʼona pasina e 32, ko tona kupu tāfito Fiafia Kite Mauli Heegata Ite Kele. Ko te kaupepa ʼaia ʼaē ʼe lahi tona ʼu paki, neʼe ko he kaupepa neʼe ʼaoga lelei moʼo akoʼi ia nātou ʼaē ʼe mole popoto ʼi te faitohi pea mo te lautohi, pe ko nātou ʼaē ʼe mole lautohi lelei. ʼE faigafua ʼaupito tana fakahā ia te ʼu akonaki maʼuhiga ʼo te Tohi-Tapu, pea ʼe faigafua te mahino kiai. Talu mai te temi ʼaē neʼe tā ai te kaupepa Mauli Heegata, neʼe tokoni ʼaupito te kaupepa ʼaia ki tatatou polokalama ako ʼaē ʼe fai ʼi te malamanei katoa. Ko kaupepa e 105 100 000 tupu neʼe tā ia lea e 239, ʼo liliu ai te kaupepa ʼaia ko te kaupepa ʼaē neʼe lahi tokotahi tona fakaliliu ʼi ʼihi age tohi ʼaē neʼe tā e te Sosiete Watch Tower!

12, 13. (a) Talu mai te taʼu 1990, ko te meʼa gāue foʼou fea ʼaē neʼe foaki mai e ‘te tagata kaugana agatonu’ moʼo faka mafola ki ni hahaʼi ʼe kaugamālie age? (b) ʼE feala ke tou fakaʼaogaʼi feafeaʼi te ʼu foʼi fime viteo ʼo te Sosiete ʼi tatatou minisitelio? (c) Ko te kaupepa foʼou fea ʼaē neʼe hoki foaki mai moʼo tokoni ki tatatou gāue ʼaē ko te fai ʼo ni ʼu tisipulo?

¹² ʼO hilifaki ki te ʼu tohi ʼaē neʼe tā, ʼo kamata mai te taʼu 1990, neʼe foaki mai e ‘te tagata kaugana agatonu’ kia tatou te meʼa faiako, ʼe ko he faʼahiga fai foʼou ʼaia moʼo faka mafola ki he hahaʼi ʼe kaugamālie age​—ko te ʼu foʼi fime viteo. ʼI te māhina ʼo ʼOketopeli ʼo te taʼu ʼaia, neʼe fai te foʼi fime viteo ʼe minuta 55, Les Témoins de Jéhovah ​—⁠ Un nom, une organisation, ko te ʼuluaki foʼi fime viteo ʼaia ʼaē neʼe fai e te Sosiete Watch Tower. Ko te ʼu meʼa matalelei ʼaē ʼe fakahā ʼi te foʼi fime ʼaia, ʼaē kua maʼu ia lea e 35, ʼe ina fakahā te kautahi ʼi te malamanei katoa ʼo te hahaʼi fakamalotoloto ʼa Sehova, ʼe nātou fakahoko te fakatotonu ʼa Sesu ʼaē ko te tala ʼo te logo lelei ʼi te kele katoa. ʼE tou fakaʼaoga tāfito te foʼi fime viteo ʼaia moʼo tokoni ki tatatou gāue ʼaē ko te fai ʼo ni ʼu tisipulo. Neʼe fakaʼaogaʼi atu aipe e te ʼu kaugā fai faka mafola ʼo te Puleʼaga te meʼa gāue foʼou ʼaia ʼi te gāue fai faka mafola. Ko ʼihi neʼe nātou ʼave te meʼa gāue ʼaia ʼi tanatou ʼu kato, ʼo nātou fakahā peʼe nātou foaki faka temi kia nātou ʼaē ʼe nātou fia sioʼi. ʼO mole fualoa ʼi te ʼosi fai ʼo te foʼi fime ʼaia, neʼe tohi fēnei e te tagata taupau feʼaluʼaki: “Kua kau te ʼu fime viteo ki te ʼu meʼa ʼaē ʼe fakaʼaogaʼi ʼi te 21 sēkulō moʼo fakalave te moʼoni ki te ʼu ʼatamai mo te ʼu loto ʼo te lauʼi miliona hahaʼi, koia ʼe mātou fakaʼamu ke mole gata ʼaki pe te foʼi fime ʼaia, kae ke fai e te Sosiete he tahi ʼu foʼi fime moʼo fakahoko te gāue ʼa te Puleʼaga ʼi te malamanei.” ʼI tona fakahagatonu, neʼe fai te tahi ʼu foʼi fime viteo, ʼo kau kiai te ʼu ʼata e tolu ʼo te foʼi fime La Bible : des réalités et des prophéties pea mo te foʼi fime La fermeté des Témoins de Jéhovah face à la persécution nazie. Kapau ʼe koutou maʼu te ʼu foʼi fime ʼaia ʼo te Sosiete ʼi takotou lea, ʼe kua koutou fakaʼaogaʼi koa ʼi takotou fai faka mafola?a

¹³ Mole heʼeki faʼa fualoa, ko te meʼa gāue foʼou, te kaupepa lahi Koteā ʼAē ʼe Fakamaʼua Mai e Te ʼAtua Kia Tatou? neʼe foaki moʼo tokoni ki tatatou gāue ʼaē ko te fai ʼo ni ʼu tisipulo. He koʼe neʼe tā te kaupepa ʼaia? E feafeaʼi hatatou fakaʼaogaʼi te kaupepa ʼaia?

Tou Vakaʼi Te Meʼa Gāue Foʼou

14, 15. Neʼe fai tāfito ki te faʼahiga hahaʼi feafeaʼi te kaupepa Fakamaʼua, pea koteā ʼaē ʼe tou maʼu ʼi te kaupepa ʼaia?

¹⁴ Ko te kaupepa foʼou ʼaē ko tona kupu tāfito Koteā ʼAē ʼe Fakamaʼua Mai e Te ʼAtua Kia Tatou? ʼe ʼaoga ki te hahaʼi ʼaē kua nātou tui ki te ʼAtua pea mo nātou fakaʼapaʼapa ki te Tohi-Tapu. Ko te kau tagata taupau feʼoloʼaki pea mo te kau misionea ʼaē neʼe ako ʼi Kalaate ʼaē kua fualoa tanatou ʼi te selevisi ʼi te ʼu fenua ʼaē ʼe tuputupu ʼi te faʼahi fakakoloa, ko nātou ʼaia neʼe nātou tokoni ki te teuteuʼi ʼo te kaupepa ʼaia. ʼE maʼu ai he ako ʼe fakamahino lelei, ʼe talanoa ki te ʼu akonaki tāfito ʼo te Tohi-Tapu. Ko te ʼu kupu ʼaē ʼe fakaʼaogaʼi ʼe faigafua pea ʼe fakahagatonu. Kae ʼe mole faigafua fau leva. ʼE mole ina fakahā pe ia te “huʼa pipi,” kae ʼe ina toe fakahā foki mo te “meʼa kai mālohi” ʼo te Folafola ʼa te ʼAtua, ʼi hona ʼaluʼaga ʼe faigafua ai ki te hahaʼi ke nātou mahino kiai.​—Hepeleo 5:​12-​14.

¹⁵ ʼI te ʼu taʼu pe ʼaenī kua hili, neʼe kole e te ʼu kaugā fai faka mafola ʼo te Puleʼaga ʼo te ʼu fenua kehekehe he tohi feiā. Ohage la, neʼe tohi fēnei e te filiale ʼo te Sosiete Watch Tower ʼi Papouasie Nouvelle-Guinée: “ ʼE mole kei ʼiloʼi e te hahaʼi pe koteā te ʼu akonaki faka lotu ʼaē ʼe moʼoni. ʼE ʼaoga ke fakamahino lelei age kia nātou ia te moʼoni, pea mo lagolago kiai he ʼu vaega faka Tohi-Tapu ʼe feala ke nātou kumi ʼi tanatou ʼu Tohi-Tapu. ʼE tonu ke fakahā lelei age kia nātou te ʼu meʼa ʼaē ʼe fakamaʼua e te ʼAtua ki te kau Kilisitiano moʼoni, pea mo fakahā te ʼu agaʼi fenua pea mo te ʼu aga ʼaē ʼe mole ina tali.” Ko te kaupepa Fakamaʼua ʼe ko te meʼa ʼaia ʼaē ʼe ʼaoga kia tatou moʼo tokoni ki te hahaʼi ʼaia ke nātou ako te ʼu meʼa ʼaē ʼe fakamaʼua mai e te ʼAtua.

16. (a) Ko ai tāfito ia nātou ʼaē ʼe feala ke ʼaoga ki ai te ʼu fakamahino faigafua ʼaē ʼe tuʼu ʼi te kaupepa foʼou ʼaia? (b) ʼE feala ke ʼaoga feafeaʼi te kaupepa Fakamaʼua kia nātou ʼaē ʼo tokotou telituale?

¹⁶ ʼE koutou fakaʼaogaʼi feafeaʼi anai te meʼa gāue foʼou ʼaia? ʼUluaki, ʼe feala hatatou fakaʼaogaʼi moʼo akoʼi ʼo te hahaʼi ʼaē ʼe mole poto lelei ʼi te lautohi, peʼe ko nātou ʼaē ʼe mole nātou leleiʼia te lautohi.b ʼE lagi maʼu anai e te hahaʼi ʼaia he ʼu fua lelei ʼaki te ʼu fakamahino faigafua ʼaē ʼe tuʼu ʼi te kaupepa ʼaia. ʼI tanatou ʼosi vakaʼi te kaupepa ʼaē neʼe tā, neʼe tohi fēnei e te ʼu filiale ʼo te Sosiete te meʼa ʼaē ʼe hoa mai: “ ʼE ʼaoga lelei anai te kaupepa ʼaia ʼi te ʼu fenua ʼaē ʼe mole lahi ai te lautohi ʼa te hahaʼi.” (Pelesile) “ ʼE ʼi ai te ʼu hahaʼi ʼe ʼōmai mai te tahi ʼu fenua ʼe mole nātou lautohi ʼi tanatou lea, pea ʼe mole faigafua maʼa nātou tanatou lau ʼi te Fakafalani. Ko te kaupepa ʼaenī ʼe lagi fakaʼaogaʼi anai ohage ko he tokoni ʼi tatatou ako mo te ʼu hahaʼi ʼaia.” (Falani) ʼE feala koa hakotou fakakaukauʼi te hahaʼi ʼo takotou telituale ʼaē ʼe feala ke ʼaoga anai kia nātou te kaupepa Fakamaʼua?

17. ʼE feala ke fakaʼaogaʼi feafeaʼi te kaupepa foʼou ʼaia ʼi te ʼu fenua kehekehe, pea koteā tona tupuʼaga?

¹⁷ Lua, ʼe lahi te ʼu fenua, ʼe feala ke fakaʼaogaʼi ai te kaupepa moʼo kamata ʼo he ʼu ako Tohi-Tapu mo te hahaʼi ʼaē ʼe nātou manavasiʼi ki te ʼAtua, tatau aipe pe neʼe feafeaʼi tanatou ako. ʼE mahino ia, ʼe tonu ke tou faiga ke tou kamata he ʼu ako ʼaki te tohi Te ʼAtamai Mālama ʼAē ʼe Ina Taki Ki Te Maʼuli Heʼegata. Kae ʼi te tahi ʼu ʼaluʼaga, ʼe lagi faigafua age te kamata ʼo he ako ʼi te kaupepa lahi ʼaia. Kapau kua fealagia, pea ʼe tonu anai ke fai te ako ʼaki te tohi ʼAtamai Mālama, te tohi tāfito ʼaia ʼaē ʼe tonu ke tou fai ʼaki te ʼu ako. ʼO ʼuhiga mo te fakaʼaogaʼi ʼaia ʼo te kaupepa Fakamaʼua, neʼe tohi fēnei e te ʼu filiale ʼo te Sosiete: “Ko te kamata ʼo he ʼu ako Tohi-Tapu ʼe faigataʼa, pea ʼe lahi age te ʼu fealagia ʼaē ke kamata he ʼu ako mokā kamata e te ʼu kaugā fai faka mafola ʼaki te kaupepa lahi ʼaia.” (Siamani) “Ko te kaupepa lahi ʼaia ʼe ʼaoga tāfito anai moʼo kamata ʼo he ʼu ako Tohi-Tapu foʼou, pea hoko atu ai leva ʼaki te tohi ʼAtamai Mālama.” (Italia) “Logope la ʼe lelei te ako ʼa te kau Saponia, tokolahi ia nātou ʼe mole lahi te ʼu meʼa ʼaē ʼe nātou ʼiloʼi ʼo ʼuhiga mo te Tohi-Tapu pea mo tana ʼu akonaki tāfito. Koia ʼe tokoni anai te kaupepa ʼaia moʼo hoko atu ʼaki te tohi ʼo te ʼAtamai Mālama.”​—Saponia.

18. Koteā ʼaē ʼe tonu ke tou manatuʼi ʼo ʼuhiga mo te ʼu meʼa ʼaē ʼe fakamaʼua mai e te ʼAtua?

¹⁸ Ko te ʼu filiale ʼo te Sosiete ʼi te malamanei katoa neʼe nātou kole te kaupepa lahi ʼaia, pea neʼe tali ke fakaliliu te kaupepa ʼaia ia lea e 221. ʼE mātou fakaʼamu ke liliu te kaupepa foʼou ʼaia ko he meʼa maʼuhiga moʼo tokoni kia tatou ke tou tokoni ki te hahaʼi ke nātou ako te ʼu meʼa ʼaē ʼe fakamaʼua e Sehova kia nātou. Kia tatou, tou manatuʼi ko te fakahoko ʼo te ʼu fakamaʼua ʼa te ʼAtua, ohage ko te fakatotonu ʼaē ke tou fai faka mafola pea mo fai ʼo ni ʼu tisipulo, ʼe ina foaki mai kia tatou te fealagia ʼaē ke tou fakahā kia Sehova te lahi ʼo tatatou ʼofa kia te ia. Ei, ko te ʼu meʼa ʼaē ʼe fakamaʼua mai e te ʼAtua kia tatou, ʼe mole ko he kavega mamafa ia. ʼE ko te meʼa ia ʼaē ʼe lelei tāfito ke tou mulimuli kiai ʼi totatou maʼuli!​—Pesalemo 19:​7-​11.

[Nota ʼi te lalo pasina]

ʼE Feala Koa Hakotou Fakamahino?

◻ Koteā te gāue koga lua ʼaē ʼe fakamaʼua mai e Sehova ke tou kau kiai?

◻ He koʼe koa ko totatou maʼua ʼaē ko te faka mafola pea mo te fai ʼo ni ʼu tisipulo ʼe mole ko he kavega mamafa ia?

◻ Koteā te ʼu meʼa gāue ʼaē neʼe foaki mai e “te tagata kaugana agatonu mo poto,” ke tou fakaʼaogaʼi ʼi te gāue fai faka mafola pea mo te fai ʼo ni ʼu tisipulo?

◻ Neʼe fai tāfito te kaupepa Fakamaʼua ki te faʼahiga hahaʼi feafeaʼi, pea ʼe lava feafeaʼi hatatou fakaʼaogaʼi te kaupepa ʼaia ʼi totatou minisitelio?

[Paki ʼo te pasina 24]

Ko tatatou gāue fai faka mafola pea mo te fai ʼo ni ʼu tisipulo, ʼe mole ko he kavega mamafa ia

[Paki ʼo te pasina 26]

“Que Dieu soit reconnu pour vrai !” (1946, neʼe toe fakafoʼou ʼi te taʼu 1952): ko tohi e 19 250 000 ia lea e 54

“La vérité qui conduit à la vie éternelle” (1968): ko tohi e 107 000 000 ia lea e 117 (ʼE ko te tohi Fakafalani ʼaē ʼe tuʼu ʼi te paki)

“E Feala Keke Mauli O Heegata Ite Palatiso Ite Kele” (1982): ko tohi e 80 900 000 ia lea e 130 (ʼE ko te tohi Faka Lusia ʼaē ʼe tuʼu ʼi te paki)

“Te ʼAtamai Mālama ʼAē ʼe Ina Taki Ki Te Maʼuli Heʼegata” (1995): Ko tohi e 45 500 000 ia lea e 125 (ʼE ko te tohi Faka Siamani ʼaē ʼe tuʼu ʼi te paki)