ʼE Maʼuli Te Folafola ʼa Sehova
Ko He ʼu Puani ʼAoga ʼo Te Tohi ʼo Fakahā—ʼUluaki Koga
ʼI TANA ʼaunofo ʼi te motu ʼo Patemosi, neʼe foaki ki te ʼapositolo matuʼa ko Soane ia te ʼu meʼa ʼaē neʼe hā e 16. ʼI te ʼu meʼa ʼaē neʼe hā kiā Soane, neʼe sio ia ki te ʼu gāue ʼaē kā fakahoko anai e Sehova ʼAtua pea mo Sesu Kilisito lolotoga ia te ʼaho ʼo te ʼAliki—ko te temi ʼaia ʼe kamata mai, ʼi te fakatuʼu ʼo te Puleʼaga ʼo te ʼAtua ʼi te taʼu 1914 ʼo aʼu ki te fakaʼosi ʼo te ʼAfio ʼa Kilisito Iā Taʼu e Afe. Ko te tohi ʼo Fakahā, ʼaē neʼe tohi e Soane ʼi te teitei taʼu 96 ʼo totatou temi, ʼe ko he fakamatala fakatalakitupua ʼo te ʼu meʼa ʼaia ʼaē neʼe hā.
Tou vakaʼi age muʼa ia te ʼu puani ʼaoga ʼo Fakahā 1:1–12:17, ʼe talanoa ai ki te ʼu ʼuluaki meʼa e fitu ʼaē neʼe hā kiā Soane. Ko te ʼu meʼa ʼaia ʼaē neʼe hā ʼe maʼuhiga kiā tātou, koteʼuhi ʼe pipiki ki te ʼu meʼa ʼe lolotoga hoko nei ʼi te mālamanei pea ʼe natou fakahā mai peʼe koteā ia te gāue ʼaē kā vave fai anai e Sehova ʼi te kā haʼu. Ko nātou ʼaē ʼe natou lau ʼaki te tui ia te fakamatala ʼo te ʼu meʼa ʼaia ʼaē neʼe hā, ʼe mahino ia ʼe natou lotofīmālie ai anai pea mo lotomālohi ai anai.—Hep. 4:12.
KO “TE ʼAKENO” ʼE INA ʼAVAHI IA TE ʼU MEʼA FAKAMAʼU E ONO ʼI TE ʼU MEʼA FAKAMAʼU E FITU
ʼUluaki, ʼe sio ia Soane ki te kolōlia ʼo Sesu Kilisito pea ʼe foaki age ki ai ia te ʼu logo ʼe tonu ke ina ‘tohi ki he takaiga tohi pea mo momoli ki te ʼu kōkelekāsio e fitu.’ (Fakh. 1:10, 11) Pea hoko atu kiai, ʼe sio ki te hekaʼaga fakahau ʼi te lagi. ʼI te nima mataʼu ʼo Ia ʼaē ʼe heka ʼi te hekaʼaga fakahau, ʼe ina puke te takaiga tohi kua fakamaʼu ʼaki ia te ʼu meʼa fakamaʼu e fitu. Ko ia ʼaē ʼe “tāu mo feʼauga ke ina ʼavahi ia te takaiga tohi” ʼe ko “te Laione ʼo te telepī ʼo Suta” peʼe ko “te ʼakeno . . . ʼe ʼi ai tona ʼu tala e fitu pea mo tona ʼu mata e fitu.”—Fakh. 4:2; 5:1, 2, 5, 6.
ʼE fakahā ʼi te tolu meʼa ʼaē neʼe hā, ia te meʼa neʼe hoko ʼi te temi ʼaē neʼe ʼavahi takitahi ai e “te ʼAkeno” ia te ʼu meʼa fakamaʼu e ono. ʼI te ʼavahi ʼo te ono meʼa fakamaʼu, ʼe hoko ia te mafuike lahi pea mo te ʼaho lahi ʼo te hauhau. (Fakh. 6:1, 12, 17) Kae ko te meʼa ʼaē neʼe hā ʼaē ʼe hoa kiai, ʼe ina fakahā ko ‘ ʼāselo e toko fā ʼe natou puke maʼu ia te ʼu matagi e fā ʼo te kele’ ʼo aʼu ki te fakaʼiloga kātoa ʼo te toko 144 000. Neʼe sio ki “te toe hahaʼi tokolahi” neʼe mole fakaʼiloga, ʼe natou “tutuʼu iā muʼa ʼo te hekaʼaga fakahau pea iā muʼa ʼo te ʼAkeno.”—Fakh. 7:1, 9.
Te ʼu Tali Ki Te ʼu Fehuʼi Fakatohi-tapu:
1:4; 3:1; 4:5; 5:6—Koteā ʼaē ʼe fakahā ʼaki ia te kupusiga palalau “te ʼu laumālie e fitu”?ʼE fakaʼuhiga ia te nūmelo fitu ki te kātoa ʼo he meʼa fakaʼatua. Koia, ko te logo ʼaē ki “te ʼu kōkelekāsio e fitu” ʼe fakaʼuhiga tāfito ki te hahaʼi fuli ʼo te ʼAtua ʼaē ʼe fakatahitahi ʼi te ʼu kōkelekāsio e 100 000 tupu ʼi te kele kātoa. (Fakh. 1:11, 20) Mai tona ʼaluʼaga ʼaē, ʼe foaki ia te laumālie māʼoniʼoni ʼo mulimuli pē ki te meʼa ʼaē ʼe loto kiai ia te ʼAtua, ko te kupusiga palalau “te ʼu laumālie e fitu” ʼe fakaʼuhiga ki te kātoa ʼo te gāue ʼa te laumālie māʼoniʼoni moʼo foaki ia te fakamahino pea mo te ʼu tapuakina kiā nātou ʼaē ʼe natou tōkakaga ki te lea fakapolofetā. Ko te tohi ʼo Fakahā ʼe hagē ʼe mulimuli ki te fakahoahoa ʼo te ʼu meʼa e fitu ʼaē neʼe hā. ʼE fakaʼuhiga ʼi henī ia te nūmelo fitu ki he meʼa ʼe kātoa, pea ʼe mahino ia ko te tohi ʼe talanoa ‘ki te ʼikuʼaga’ peʼe ki te kātoa ʼo “te meʼa fakalilo taputapu ʼa te ʼAtua.”—Fakh. 10:7.
1:8, 17—Ko ai ʼaē ʼe fakaʼuhiga ki ai ia te ʼu higoa fakatuʼulaga ko “te ʼAlefa mo te Omeka” pea mo “te ʼUluaki pea mo te Fakamuli”? Ko te higoa fakatuʼulaga “te ʼAlefa mo te Omeka” ʼe fakaʼuhiga kiā Sehova, ʼo fakahā lelei ai neʼe mole he tahi age ʼAtua māfimāfi ʼi muʼa atu ʼo ia, pea ki muli mai ʼe mole ʼi ai anai he tahi ʼAtua. Ko ia “te kamataʼaga pea mo te fakaʼosi.” (Fakh. 21:6; 22:13) Logolā ko Sehova ʼe fakaʼuhiga iā Fakahā 22:13, ko “te ʼuluaki pea mo te fakamuli,” ko tona fakaʼuhiga ʼe mole he tahi ʼi muʼa atu peʼe ki muli mai ʼo ia, kae ʼi te kāpite ʼuluaki ʼo Fakahā ʼe fakahā mai ko te higoa fakatuʼulaga “te ʼUluaki pea mo te Fakamuli” ʼe fakaʼuhiga kiā Sesu Kilisito. Neʼe ko ia te ʼuluaki tagata ʼaē neʼe fakatuʼuake ki he maʼuli fakalaumālie tuputupua pea ʼe ko ia tokotahi pē ʼaē neʼe fakatuʼuake e Sehova totonu.—Kol. 1:18.
2:7—Koteā ia “te palatiso ʼo te ʼAtua”? Mai tona ʼaluʼaga ʼaē ʼe fai te ʼu palalau ʼaia ki te kau Kilisitiano fakanofo, koia ʼe lagi fakaʼuhiga ʼi henī ia te palatiso ki he palatiso ʼi selō—te ʼafioʼaga ʼo te ʼAtua totonu. ʼE fakapale anai ia te kau Kilisitiano fakanofo agatonu ʼaki tanatou kai “ki te fuʼu ʼakau ʼo te maʼuli.” ʼE natou maʼu anai ia te maʼuli tuputupua.—1 Ko. 15:35.
3:7—Ko te temi fea ʼaē neʼe maʼu ai e Sesu ia “te kalavī ʼa Tavite,” pea neʼe ina fakaʼaogaʼi feafeaʼi ia te kalavī ʼaia? ʼI tona papitema ʼi te taʼu 29 ʼo totatou temi, neʼe liliu ia Sesu ko te Hau Fakanofo ʼo te hōloga ʼo Tavite. Kae neʼe hoki maʼu pē e Sesu ia te kalavī ʼa Tavite ʼi te taʼu 33 ʼo totatou temi, ʼi te temi ʼaē neʼe hiki ai ki te tuʼulaga māʼoluga ʼi te toʼomataʼu ʼo te ʼAtua ʼi selō. ʼI te temi ʼaia neʼe ina maʼu ia te ʼu fealagia fuli ʼo ʼuhiga mo te Puleʼaga ʼo Tavite. Talu mai ai, neʼe fakaʼaogaʼi e Sesu ia te kalavī moʼo ʼavahi ia he ʼu fealagia pea mo he ʼu pilivilēsio ʼe pipiki ki te Puleʼaga. ʼI te taʼu 1919, neʼe tuku e Sesu ia “te kalavī ʼo te ʼapi ʼo Tavite” ki “te tagata kaugana agatonu mo poto” ʼaki tana fakanofo ia te kaugana ʼaia “ki ʼona koloa fuli.”—Isa. 22:22; Mat. 24:45, 47.
3:12—Koteā te “huafa foʼou” ʼo Sesu? Ko te higoa ʼaia ʼe fakaʼuhiga ki te tuʼulaga foʼou pea mo te ʼu pilivilēsio foʼou ʼo Sesu. (Filp. 2:9-11) Mai tona ʼaluʼaga ʼaē ʼe mole he tahi ʼi tuʼa atu ʼo Sesu ʼe ina ʼiloʼi ia te higoa ʼaia, koia ʼe ina tohi ai ia te higoa ʼaia ki tona ʼu tehina agatonu ʼi selō, ʼo ina fakafealagia kiā nātou ke natou felōgoi lelei mo ia. (Fakh. 19:12) ʼE ina toe foaki age kiā nātou tona ʼu pilivilēsio.
Te ʼu Puani ʼe Tou Lava Tāʼofi:
1:3. ʼUhi “kua ovi mai te temi ʼaē kua fakakatofa [te temi ʼo te fakahoko ʼo te ʼu fakamāu ʼa te ʼAtua ki te mālama ʼa Satana],” kua maʼuhiga tāfito ʼi te temi nei ke tou mahino ki te logo ʼo te tohi ʼo Fakahā pea mo lagolago kiai.
3:17, 18. Ke tou koloaʼia ʼi te faʼahi fakalaumālie, ʼe tonu ke tou totogi mai iā Sesu ia te “ ʼaulo ʼaē neʼe fakamaʼa ʼi te afi.” Ko tona fakaʼuhiga, ʼe tonu ke tou faiga ke tou koloaʼia ʼi te ʼu gāue lelei. (1 Tim. 6:17-19) ʼE toe ʼaoga foki ke tou kofuʼi ia te “ ʼu kofu tuʼa hina,” ʼaē ʼe tou fakahā ai ko tātou ko te ʼu tisipulo ʼa Kilisito, pea mo fakaʼaogaʼi ia te “meʼa tuluʼi mata” ʼaē ko te ʼu tokoni ʼe tā ʼi te ʼu Tule Leʼo, ke feala hatatou maʼu ia te fakasiosio poto ʼi te faʼahi fakalaumālie.—Fakh. 19:8.
7:13, 14. Ko te ʼu tagata ʼāfea e toko 24 ʼe natou fakatā ia te toko 144 000 ʼi tonatou ʼu tuʼulaga fakakolōlia ʼi selō, ʼaē kā natou gāue ai anai ko ni ʼu hau pea mo pelepitelō. Neʼe fakatā nātou e te kau pelepitelō ʼo te Iselaele ʼāfea, ʼaē neʼe vaheʼi e te Hau ko Tavite kiā kalasi e 24. Ko te tahi tagata ʼāfea ʼe ina fakahā kiā Soane pe ko ai ia te toe hahaʼi tokolahi. Koia, neʼe lagi kamata ia te fakatuʼuake ʼo te kau Kilisitiano fakanofo ʼi muʼa ʼo te taʼu 1935. He koʼē ʼe tou ʼui fēia? Koteʼuhi ʼi te taʼu ʼaia, neʼe fakahā ki te ʼu kaugana fakanofo ʼa te ʼAtua ʼaē ʼi te kele pe ko ai moʼoni ia te toe hahaʼi tokolahi.—Luka 22:28-30; Fakh. 4:4; 7:9.
KO TE ʼAVAHI ʼO TE FITU MEʼA FAKAMAʼU ʼE IKU KI TE PUPUHI ʼO TE ʼU PUHI FAKATAGI E FITU
ʼE ʼavahi e te ʼAkeno ia te fitu meʼa fakamaʼu. ʼE foaki age ki te ʼu ʼāselo e toko 7 ia te ʼu puhi fakatagi e fitu. Ko te toko ono ʼi te ʼu ʼāselo ʼaia e natou pupuhi tanatou ʼu puhi fakatagi, ʼo natou kalagaʼi ia te ʼu logo fakamāu ki “te vahe tolu” ʼo te mālamanei, ʼaē ko te Keletiate. (Fakh. 8:1, 2, 7-12; 9:15, 18) Ko te meʼa ʼaia ʼe sio kiai Soane ʼi te fitu meʼa ʼaē neʼe hā. ʼI tana kau ki te meʼa ʼaē neʼe hā neʼe hoa mai, ʼe kai e Soane ia te kiʼi takaiga tohi pea mo ina fua ia te sagatualio ʼo te fale lotu. ʼI te ʼosi pupuhi ʼo te fitu puhi fakatagi, ʼe kalaga fēnei ia te ʼu leʼo: “Ko te puleʼaga ʼo te mālamanei kua liliu ia ko te puleʼaga ʼo totatou ʼAliki pea mo tona Kilisito.”—Fakh. 10:10; 11:1, 15.
Ko te fitu meʼa ʼaē neʼe hā, ʼe ina toe fakamahino ia te ʼu palalau ʼaē neʼe kua talanoa kiai ia te koga tohi ʼo Fakahā 11:15, 17. Neʼe hā ia te fakaʼiloga lahi ʼi te lagi. Ko te fafine ʼi selō ʼe ina fānauʼi ia te tama, te tamasiʼi tagata. Kua kapu ifo te Tēvolo mai te lagi. ʼI tona ʼita lahi ki te fafine ʼaē ʼi selō, ʼe ʼalu ia “ ʼo tauʼi te toe ʼo tona hōloga.”—Fakh. 12:1, 5, 9, 17.
Te ʼu Tali Ki Te ʼu Fehuʼi Fakatohi-tapu:
8:1-5—He koʼē neʼe gogona ia te lagi, pea koteā ʼaē neʼe lī ifo ki te kele ki muli age? Neʼe hoko ia te gogona fakatātā ʼi te lagi ke feala ki “te ʼu faikole ʼa te kau māʼoniʼoni” ʼaē ʼi te kele ke logoʼi. Neʼe hoko ia te faʼahi ʼaia ʼi te fakaʼosi ʼo te ʼuluaki tau fakamālamanei. Neʼe mole hake ki selō ia te kau Kilisitiano fakanofo ʼi te fakaʼosi ʼo te Temi ʼo te kau Senitile, ohagē ko te fakaʼamu ʼa te tokolahi iā nātou. Neʼe natou felāveʼi mo te ʼu temi fihifihia lolotoga te tau. Koia ʼi te temi ʼaia neʼe natou faikole fakamālotoloto ai ke takitaki nātou. Moʼo tali ki tanatou ʼu faikole, neʼe lī ifo e te ʼāselo ki te kele ia te afi fakatātā moʼo fakalotomālohiʼi ia te kau Kilisitiano fakanofo ke lahi age tanatou ʼu gāue ʼi te faʼahi fakalaumālie. Logolā ia tanatou tokosiʼi, kae neʼe natou kamata fai ia te gāue fai fakamafola ʼi te kele kātoa ʼo ʼuhiga mo te Puleʼaga ʼo te ʼAtua, ʼo natou fakamū ai ia te afi ʼi te Keletiate. Neʼe tala ia te ʼu fakatokaga mālohi mai te Tohi-Tapu, neʼe fakahā ia te ʼu moʼoni Fakatohi-tapu, pea neʼe fakatupu ai he gatūtū ʼo te ʼu tafitoʼaga ʼo te ʼu lotu hala ohagē ko he ʼu falefata neʼe luluʼi e he mafuike.
8:6-12; 9:1, 13; 11:15—Ko te temi fea ʼaē neʼe ʼamanaki ai ia te ʼu ʼāselo e toko fitu ke natou pupuhi tanatou ʼu puhi fakatagi, pea ko te temi fea ʼaē neʼe hoko ai, pea neʼe hoko feafeaʼi? Ko te ʼamanaki pupuhi ʼo te ʼu puhi fakatagi e fitu ʼe kau kiai ia te takitaki ʼaē neʼe foaki moʼo toe fakamālohiʼi ia nātou ʼaē ʼo te kalasi ʼo Soane ʼaē ʼi te kele talu mai te taʼu 1919 ki te taʼu 1922. Ko te kau Kilisitiano fakanofo ʼaē neʼe natou toe maʼumaʼua ai ke natou toe fakatuʼutuʼu ia te gāue fakaminisitelio pea mo toe laga he ʼu fale tā tohi. (Fakh. 12:13, 14) Ko te tatagi ʼo te ʼu puhi fakatagi ʼe natou fakatātā ia te fakamafola lototoʼa ʼo te ʼu fakamāu ʼa Sehova ki te mālama ʼa Satana e te hahaʼi ʼa te ʼAtua ʼaki te takitaki ʼa te kau ʼāselo. Tou fakatokagaʼi, neʼe kamata ia te tatagi ʼaia ʼo te ʼu puhi fakatagi mai te fakatahi lahi ʼaē neʼe fai ʼi Cedar Point, Ohio ʼi te taʼu 1922 ʼo aʼu ki te toe mamahi lahi.
8:13; 9:12; 11:14—Neʼe feafeaʼi ia te pupuhi e te ʼu puhi fakatagi fakamuli e tolu ia te “ ʼu malaʼia”? Ko te fakatatagi ʼo te ʼu ʼuluaki puhi fakatagi e fā ʼe ko te ʼu fakahāhā ʼaia ia te mate fakalaumālie ʼo te Keletiate, kae ko te ʼu puhi fakatagi fakamuli e tolu ʼe ko te ʼu malaʼia ʼaē kā hoko ai te ʼu meʼa maʼuhiga. Ko te nima puhi fakatagi ʼe fakapipiki ki te fakaʼāteaina ʼo te hahaʼi ʼa te ʼAtua ʼi te taʼu 1919 mai “te vanu” ʼo tanatou mate fakalaumālie pea ki tanatou fai fagonogono mālohi, ʼaē neʼe liliu ohagē ko he tautea fakatupu mamahi ki te Keletiate. (Fakh. 9:1) Ko te ono puhi fakatagi ʼe fakaʼuhiga ki te laga tau ʼa te ʼu kautau heka hōsi ʼaē ʼe lahi tokotahi ʼi te hisitolia ʼo te tagata pea mo te fai fakamafola fakamālamanei ʼaē neʼe kamata ʼi te taʼu 1922. Ko te puhi fakatagi fakamuli ʼe fakaʼuhiga ki te tupu ʼo te Puleʼaga Fakamēsia.
Te ʼu Puani ʼe Tou Lava Tāʼofi:
9:10, 19. Ko te ʼu fakamatala Fakatohi-tapu ʼaē ʼe tāu ke tou falala kiai ʼi te ʼu tohi ʼa “te tagata kaugana agatonu mo poto” ʼe maʼu ai ia te ʼu logo mālohi. (Mat. 24:45) ʼE tatau ia te logo ʼaia mo te ʼu hiku ʼo te ʼu heʼe ʼaē ʼe ʼi ai tonatou “ ʼu foto ohagē ko te ʼu sekolopio” pea mo te ʼu hōsi ʼa te ʼu kautau heka hōsi, ʼaē ʼe “hagē tonatou ʼu hiku ko ni gata.” Koteā tona tupuʼaga? Heʼe ko te ʼu tohi Fakatohi-tapu ʼaia ʼe natou fakatokaga ʼo ʼuhiga mo te “ ʼaho ʼo te lagavaka [ʼo Sehova].” (Isa. 61:2) Ke tou lototoʼa pea mo faʼafai ʼi te tufa ʼo te ʼu tohi ʼaia.
9:20, 21. Tokolahi ia te hahaʼi agavaivai ʼe natou māʼuʼuli ʼi te ʼu puleʼaga ʼe ʼui ʼe mole nātou Kilisitiano, neʼe natou tali lelei ia te logo lelei ʼaē ʼe tou fakamafola. Kae ʼe mole tou ʼamanaki ʼe tafoki mai anai ia he toe hahaʼi tokolahi ʼi tuʼa atu ʼo te hahaʼi ʼaē ʼe maluʼi e te Keletiate, ʼaē ʼe fakaʼuhiga ki “te toe ʼo te hahaʼi.” Kae ʼe tou faʼa kātaki aipē ʼi te minisitelio.
12:15, 16. Ko “te kele”—te ʼu meʼa ʼaē ʼi te tuʼu ʼa Satana, peʼe ko te kau takitaki ʼi te ʼu fenua kehekehe— ʼe ina puipui ia te ʼāteaina ʼo te tauhi. ʼO kamata ʼi te ʼu taʼu 1940, ko te kau takitaki ʼaia neʼe natou “folo ia te vaitafe [ʼo te fakataga] ʼaē neʼe luaʼi e te talakone mai tona gutu.” Kā fakatotonu e Sehova ke ina fai ia te faʼahi ʼaia, pea ʼe feala ke ina uga ia te kau takitaki ʼo te puleʼaga ke natou fakahoko ia tona finegalo. Koia ʼe ʼui tonu ai iā Tāʼaga Lea 21:1: “Ko te loto ʼo he hau ʼe ko he ʼu kiʼi vai ʼi te nima ʼo Sehova. ʼI te ʼu potu fuli pē ʼaē ʼe ina loto ke tafe ai, ʼe ina fakatafe ai.” ʼE ko he faʼahi ʼe tonu anai ke ina fakalotomālohiʼi tatatou tui ʼaē ki te ʼAtua.