“Te Evaselio” ʼi Te Tohi ʼo Apokalipesi

“Nee au mamata ki he tahi aselo nee lele i te lotomalie o te lagi. Nee ina too he Evaselio heegata ke fagonogono kia natou e nofo i te kelekele.”​—Apokalipesi 14:⁠6.

1. Logope la ʼe tui te kau Fakamoʼoni ʼa Sehova ʼe haʼu te tohi ʼo Apokalipesi mai te ʼAtua, kae he koʼe ʼe mole ko he “magaʼi lotu ʼe ina fakakikite he ʼu meʼa fakamataku”?

KO TE kau Fakamoʼoni ʼa Sehova ʼe mole ko he “magaʼi lotu ʼe ina fakakikite he ʼu meʼa fakamataku” peʼe ko he “lotu ʼe ina tala te fakamāu fakamuli,” ohage ko tona ʼui e te hahaʼi. Kae ʼe nātou tui ko te tohi ʼo Apokalipesi, peʼe ko te tohi ʼo te Fakahā, ʼe kau ʼi te Folafola ʼaē ʼe haʼu mai te ʼAtua. ʼE moʼoni, ʼe tou maʼu ʼi te tohi ʼo Apokalipesi te ʼu logo ʼo ʼuhiga mo te fakamāu ʼo te kau agakovi. Kae ʼi tanatou fai faka mafola ki te hahaʼi, ʼe talanoa tāfito te kau kaugana ʼa te ʼAtua ki te ʼamanaki taulekaleka ʼaē ʼe tuʼu ʼi te Tohi-Tapu, ʼo feiā mo te ʼamanaki ʼaē ʼe tuʼu ʼi te tohi ʼo Apokalipesi, peʼe ko te Fakahā. Ei, ʼe mole nātou hilifaki peʼe nātou molehi he meʼa ʼi te ʼu folafola faka polofeta ʼaē ʼe maʼu ai.​—Apokalipesi 22⁠:​18, 19.

Te Kau Fagonogono ʼo Te Evaselio

2. Koteā te ʼu vaega faka Tohi-Tapu ʼaē ʼe fakaʼaogaʼi māhani e te kau Fakamoʼoni ʼa Sehova ʼi tanatou gāue fai faka mafola?

² Ko te vaega faka Tohi-Tapu ʼaē ʼe fakaʼaogaʼi māhani moʼo fakamoʼoni ki te gāue fai faka mafola ʼa te kau Fakamoʼoni ʼa Sehova, ʼe ko te ʼu palalau ʼaenī neʼe fai e Sesu: “Ka fagonogono anai te Logolelei aeni o te Puleaga ki te kelekele katoa, ko he fakamooni ki te hahai pagani fuape pea e hoko anai mo te fakaosi.” (Mateo 24:​14) Koteā koa “te Logolelei aeni o te Puleaga”? Tokolahi te kau Fakamoʼoni ʼe nātou tali anai ki te fehuʼi ʼaia, ʼo nātou fakahā te ʼu kapite 20 pea mo 21 ʼo Apokalipesi, ʼaē ʼe talanoa ki te ʼAfio ʼa Kilisito ia Taʼu e Afe mo tona Puleʼaga, pea mo te sosiete fakatagata, ʼaē “e mole toe mau [ai] anai” te mate, te putu, pea mo te mamahi.​—Apokalipesi 20:6; 21:​1, 4.

3. Ko te minisitelio ʼa te kau Fakamoʼoni ʼa Sehova ʼe tatau mo te gāue fea?

³ ʼI tonatou ʼuhiga kau fagonogono ʼo te evaselio ʼaia, ko te kau Fakamoʼoni ʼa Sehova ʼe ko te ʼu fakahoko lea moʼoni ʼo te kau ʼave logo fakatātā ʼaē ʼi selo, ʼaē ʼe toe fakahā mo tanatou gāue ʼi te tohi ʼo Apokalipesi. “Nee au mamata ki he tahi aselo nee lele i te lotomalie o te lagi. Nee ina too he Evaselio heegata ke fagonogono kia natou e nofo i te kelekele, ki te u puleaga, mo te u hako, mo te u lea pea mo te hahai fuape.” (Apokalipesi 14:⁠6) ʼE kau ki te “Evaselio heegata” ia te tala ʼaē ko “te puleagahau [peʼe ko te pule] o te malama-nei” kua “fakalaka . . . ki totatou Aliki pea mo tana Kilisito” pea kua hoko mai “te temi” ʼa Sehova ke ina “maumauʼi . . . natou e natou maumauʼi te kelekele.” (Apokalipesi 11:​15, 17, 18) ʼE mole koa la ko he logo lelei ʼaia?

Te Meʼa ʼAē ʼe Fakahā Mai e Te Tohi ʼo Apokalipesi

4. (a) Koteā te ʼu moʼoni tāfito ʼaē ʼe fakahā lelei ʼi te ʼuluaki kapite ʼo te tohi ʼo Apokalipesi? (b) Koteā ʼaē ʼe fakamaʼua kia nātou ʼaē ʼe nātou fia maʼu te ʼu tapuakina ʼo te logo lelei?

⁴ Ko te ʼuluaki kapite ʼo te tohi ʼo Apokalipesi, ʼe fakahā ai ʼo ʼuhiga mo Sehova ʼe ko “te Alefa mo te Omeka, . . . iaʼia ae e afio, pea nee afio, pea e haele mai, te Mafimafi.” ʼE ʼui ai ʼo ʼuhiga mo tona ʼAlo, ia Sesu Kilisito, ko “te Fakamooni agatonu,” “te Alapoʼou mai te mate,” pea ʼe ko “te Pule o te u hau o te kelekele.” ʼE toe ʼui ʼi te kapite ʼaia ʼo ʼuhiga mo Sesu, ʼe ko “ia ae e ofa ia tatou pea nee ina haofaki tatou mai atatou agahala aki tona taataa.” (Apokalipesi 1:⁠5, 8) Koia, ʼi te kamata, ʼe fakahā e te tohi ʼo Apokalipesi te ʼu moʼoni tāfito ʼaē ʼe feala ai ke tou maʼu te maʼuli. Ko “natou e nofo i te kelekele” ʼe nātou maʼu anai te ʼu lelei ʼo te logo lelei ʼaia, mo kapau ʼe nātou tali te pule faʼifaʼitaliha ʼa Sehova, mo nātou tui ki te taʼataʼa ʼaē neʼe liligi e Sesu, pea mo nātou tui kua fakatuʼuake e Sehova ia Kilisito pea ʼi te temi nei, ʼe ko te Hau ʼaē neʼe fakanofo e te ʼAtua ke pule ki te kele.​—Pesalemo 2:​6-8.

5. ʼI te kapite 2 pea mo te kapite 3 ʼo Apokalipesi, koteā te gāue ʼaē ʼe fai e Kilisito?

⁵ Ko te ʼu kapite e lua ʼaē ʼe hoa kiai ʼe nā fakahā mai ko Kilisito Sesu ʼe ko te Tagata Taupau agaʼofa ʼaē ʼe nofo ʼi Selo, ʼe ina taupau te ʼu kokelekasio ʼo tana kau tisipulo ʼaē ʼi te kele. ʼI te takaiga tohi ʼaē neʼe foaki ki te ʼu kokelekasio Kilisitiano ʼe toko fitu ʼaē neʼe fili ʼi te Asia Veliveli ʼo te ʼuluaki sēkulō ʼo totatou temi, ʼe tuʼu ai te ʼu fakaloto mālohi pea mo te ʼu tokoni mālohi ʼe kei ʼaoga ʼi temi nei. ʼI te agamāhani, ʼe kamata te ʼu logo ʼaē neʼe momoli ki te ʼu kokelekasio ʼaki te ʼu kupu ʼaenī: “E au iloi te u mea e ke fai” peʼe “E au iloi tou mamahi.” (Apokalipesi 2:​2, 9) Ei, neʼe ʼiloʼi lelei e Kilisito te ʼu meʼa ʼaē neʼe hoko ʼi te ʼu kokelekasio ʼo tana kau tisipulo. Neʼe ina vikiʼi ʼihi ʼuhi ko tanatou ʼofa, mo tanatou gāue kinakina ʼi te minisitelio, mo tanatou faʼa kātaki, pea mo tanatou agatonu ki tona huafa pea mo tana folafola. Neʼe ina fakatonutonuʼi ʼihi he neʼe kua momoko tanatou ʼofa kia Sehova pea mo tona ʼAlo, pea neʼe nātou fai te ʼu aga heʼeʼaoga, ko te tauhi tamapua, pea mo te ʼapositasia.

6. Koteā ʼaē ʼe mahino kiai te hahaʼi ʼaki te meʼa ʼaē ʼe hā ʼi te kapite 4?

⁶ ʼI te kapite 4 ʼe hā fakaofoofo ai te hekaʼaga faka hau ʼa Sehova ʼAtua ʼi selo. Neʼe hā ai te kolōlia ʼo te ʼafio ʼa Sehova pea mo te agaaga ʼo te faʼufaʼu ʼo te puleʼaga ʼi selo ʼaē ka ina fakaʼaogaʼi. Ko te ʼu hau kua fakanofo, ʼaē ʼe ʼatakai e tonatou ʼu hekaʼaga hau ia te hekaʼaga hau tāfito ʼo te ʼatulaulau, ʼe nātou fakalogo kia Sehova pea mo nātou kalaga fēnei: “E ke taau, Aliki tomatou Atua, ke ke tali te kololia, mo te fakaapaapa pea mo te mafimafi, koteuhi nee ke fakatupu ia meafuape, pea nee ke finegalo ke natou mauli pea nee fakatupu ai natou.”​—Apokalipesi 4:⁠11.

7. (a) Koteā ʼaē ʼe fakatotonu e te ʼaselo ke fai e te hahaʼi ʼi te kele? (b) Koteā te tahi fakatuʼutuʼu tāfito ʼo tatatou gāue ʼaē ko te akoʼi ʼo te hahaʼi?

⁷ ʼE ʼi ai koa hona faka ʼuhiga ki te hahaʼi ia ʼaho nei? Ei. Kapau ʼe nātou fia maʼuʼuli ʼo fakalogo ki te Puleʼaga ʼaē ka fakatuʼu lolotoga taʼu e afe, pea ʼe tonu ke nātou fakalogo ki te meʼa ʼaenī ʼe kalagaʼi e te “aselo nee lele i te lotomalie o te lagi”: “Koutou tuania te Atua, koutou foaki kia te ia te kololia, koteuhi kua hoko mai te hola o tana fakamau.” (Apokalipesi 14:​6, 7) Ko te tahi fakatuʼutuʼu tāfito ʼaē ʼe fai e te kau Fakamoʼoni ʼa Sehova moʼo akoʼi te Tohi-Tapu ki te hahaʼi, ʼe ko te tokoni kia “natou e nofo i te kelekele” ke nātou ʼiloʼi pea mo tauhi kia Sehova, mo nātou tui ko ia te Tupuʼaga, pea ke nātou fia fakalogo ki tona pule faʼifaʼitaliha faitotonu.

ʼE Tāu Te Akeno Mo Te Fakaʼapaʼapa

8. (a) Koteā ʼaē ʼe ʼui e te ʼu kapite 5 pea mo 6 ʼo ʼuhiga mo Kilisito? (b) Koteā ʼaē ʼe feala ke akoʼi e te hahaʼi fuli ʼaē ʼe fakalogo ki te logo lelei ʼaia ʼo te meʼa ʼaē neʼe hā?

⁸ Ko te ʼu kapite ʼaē ʼe hoa kiai, te 5 mo te 6, ʼe fakahā ai ko Sesu Kilisito ko he Akeno ʼe tāu mo ia ke ina avahi te takaiga tohi ʼaē ʼe fakamaʼu ʼaki te ʼu meʼa fakamaʼu e fitu, pea ʼe tohi ai ʼi loto ʼaki he ʼu palalau fakatātā te ʼu meʼa ʼaē ʼe tonu ke hoko ʼi totatou temi. (Vakaʼi ia Soane 1:​29.) ʼE ʼui fēnei e te ʼu leʼo ʼi selo ki te Akeno fakatātā ʼaia: “E taau mo koe ke ke too te tohi pea mo veteki te u fakailoga, koteuhi nee tamatei koe pea nee ke haofaki, o uhiga mo te Atua, aki tou taataa, he hahai mai te u hako, mo te u lea, mo te u hahai kehekehe, pea mai te atu puleaga fuape. Pea nee ke gaohi natou o uhiga mo totatou Atua, he puleagahau mo he u pelepitelo, pea e natou pule anai i te kelekele.” (Apokalipesi 5:​9, 10) ʼE akoʼi mai e te meʼa ʼaia neʼe hā, ʼaki te taʼataʼa ʼaē neʼe liligi e Kilisito, ʼe fakatahi anai mo ia te ʼu hahaʼi mai te ʼu potu kehekehe pea ʼe nātou “pule anai i te kelekele.” (Vakaʼi ia Apokalipesi 1:​5, 6.) Ki muli age, ʼe fakahā mai ʼi te tohi ʼo Apokalipesi peʼe nātou tokofia.

9. Koteā te fakamatala ʼaē ʼe fai ʼo ʼuhiga mo Kilisito ʼi te kapite 6?

⁹ ʼI te tahi meʼa neʼe hā, ʼe ina fakahā mai ko Kilisito, ʼe ʼi ai tona kolona pea ʼe heka ʼi te hōsi hina, ʼe hū “fakatoà [ki tuʼa] ke tau malo.” Meʼa fakafiafia foki, heʼe mālo anai ʼi tana tau ki te ʼu meʼa kovi ʼaē ʼe fakatātā e te ʼu tagata heka hōsi e toko tolu ʼo te Apokalipesi, pea ʼi tanatou lele mālohi ʼaia ʼi te ʼu hōsi, ʼe hoko ai te tau, mo te hoge, pea mo te mate ʼi te malamanei talu mai te taʼu maʼuhiga ʼo te taʼu 1914. (Apokalipesi 6:​1-8) Ko te gāue makehe ʼaia ʼaē ʼe fai e Kilisito, te Akeno ʼa te ʼAtua, moʼo hāofaki te malamanei pea moʼo fakahoko te ʼu fakatuʼutuʼu taulekaleka ʼa Sehova, ʼe ko he faʼahi tāfito ʼaia ʼe talanoa kiai te kau Fakamoʼoni ʼa Sehova ʼi tanatou ʼu ako Tohi-Tapu.

10. (a) Koteā te manatu maʼuhiga ʼaē ʼe tou maʼu ʼi te kapite 7? (b) Koteā ʼaē neʼe ʼui e Kilisito ʼo ʼuhiga mo nātou ʼaē ʼe fakatoʼo ki ai te Puleʼaga?

¹⁰ ʼE maʼu te ʼu logo lelei ʼi te kapite 7. ʼE ko te tohi pe ʼo Apokalipesi ʼaē ʼe fakahā mai peʼe tokofia ia nātou ʼaē ʼe fakahigoaʼi e Sesu ko te “kiʼi fagaovi” ʼaē ʼe fakatoʼo ki ai te Puleʼaga e te Tāmai ʼo te Akeno. (Luka 12:32; 22:​28-​30) ʼE fakaʼiloga ia nātou ʼaia e Sehova ʼAtua ʼaki tona laumālie. (2 Kolonito 1:​21, 22) ʼE fakamoʼoni fēnei e te ʼapositolo ko Soane, ʼaē neʼe fakahā age kiai te Apokalipesi: “Nee au logo ki te kaugamalie o natou nee fakailoga: Ko te toko teau fagofulu-mafa afe nee fakailoga.” (Apokalipesi 7:⁠4) ʼI te tahi kapite, ʼe fakamoʼoni ai ko te kaugamālie ʼaia ʼe faka ʼuhiga kia nātou fuli ʼaē “nee fakamauli mai te kelekele” ke nātou kaugā hau mo te Akeno ʼi te Moʼuga ʼo Sione ʼaē ʼi selo. (Apokalipesi 14:​1-4) ʼE mole fakamahino lelei e te ʼu ʼēkelesia ʼo te Keletiate te faka ʼuhiga ʼo te kaugamālie ʼaia, kae ʼe lelei hatatou fakatokagaʼi te ʼui fēnei ʼa te tagata sivi Tohi-Tapu ko E. W. Bullinger: “ ʼE fia fakahā lelei mai ʼi te kapite ʼaia, ʼe ʼi ai te kaugamālie ʼe tou ʼiloʼi peʼe nātou tokofia, kae ko te tahi kaugamālie ʼe mole tou ʼiloʼi peʼe nātou tokofia.”

11. (a) Koteā te logo lelei ʼaē ʼe tou maʼu ʼi te kapite 7? (b) Koteā te ʼu ʼamanaki ʼaē ʼe maʼu e te “hahai kaugamalie”?

¹¹ Ko ai te kaugamālie ʼaē neʼe ʼui e Bullinger ʼe mole tou ʼiloʼi peʼe nātou tokofia? ʼI te vaega 9, neʼe tohi fēnei e te ʼapositolo ko Soane: “Hili te mea aia, nee au mamata ki he hahai kaugamalie, nee mole he tahi nee ina malau, mai te atu puleaga, mo te u hako, mo te u lanu, pea mo te u lea fuape.” (Apokalipesi 7:⁠9) Ko ai ʼaē ʼe nātou faʼufaʼu te hahaʼi kaugamālie ʼaia, koteā ʼaē ʼe nātou fai ʼi te temi nei ia muʼa ʼo te ʼAtua, pea koteā ʼaē ka hoko kia nātou ʼi te ka haʼu? Ko te tali ʼaē ʼe fai e te tohi Apokalipesi ʼe ko he logo lelei kia nātou ʼaē ʼe nonofo ʼi te kele. ʼE tou lau fēnei: “Ko natou aeni nee omai mai te [“mamahi,” MN] lahi. Nee natou fo onatou kofu mo fakahihina i te taataa o te Akeno.” ʼI tanatou tui ʼaē ki te taʼataʼa ʼaē neʼe liligi e Kilisito, ʼe puipui anai nātou ʼi “te mamahi lahi.” Ko Kilisito “e ina taki anai natou ki te u matapuna vai mauli. Pea e holoholoʼi anai e te Atua ia loimata fuape i onatou fofoga.” (Apokalipesi 7:​14-​17) Ei, ko te lauʼi miliona hahaʼi ʼaē ʼe maʼuʼuli ʼi te temi nei, ʼe feala ke nātou kau ʼi te toe hahaʼi tokolahi ʼaē ka hāo ʼi te fakaʼosi ʼo te tuʼu ʼo te ʼu faʼahiga meʼa agakovi ʼaenī. ʼI tonatou ʼuhiga hahaʼi fakalogo ki te Hau ko Sesu Kilisito ʼi tana Pule ia Taʼu e Afe, ʼe ina takitaki anai nātou ke nātou maʼu te maʼuli heʼegata ʼi te kele. ʼE mole koa la ko he logo lelei ʼaia?

“E Mooni Mo Totonu Ana u Fakamau”

12, 13. (a) Koteā ʼaē ʼe tohi ʼi te kapite 8 ʼo aʼu ki te kapite 19? (b) He koʼe ʼe mole tonu ke matataku te hahaʼi agatonu ʼo ʼuhiga mo te ʼu lea faka polofeta ʼaia?

¹² Ko te ʼu kapite 8 ki te 19 ʼaē ʼe tupu tāfito ai te ʼui ʼo ʼuhiga mo te tohi ʼo Apokalipesi, peʼe ko te Fakahā, ʼe ko he tohi ʼe ina fakakikite he ʼu meʼa fakamataku. ʼE tuʼu ai te ʼu logo fakamataku ʼo ʼuhiga mo te faifakamāu (neʼe fakatātā e te ʼu pupuhi fakatagi, mo te ʼu malaʼia, mo te ʼu ipu ʼo te hāūhāū ʼa te ʼAtua) ʼaē neʼe fakahoko ki te ʼu faʼahi kehekehe ʼo te tuʼu ʼo te ʼu faʼahiga meʼa ʼa Satana. ʼE ʼuluaki fakahoko anai te ʼu fakamāu ʼaia ki te lotu hala (“Papilone te Lahi”), pea hoki hoko leva ki te tuʼu faka politike ʼaē ʼe mole tui ki te ʼAtua, ʼaē ʼe fakatātā e te ʼu manu fekai.​—Apokalipesi 13:​1, 2; 17:​5-7, 15, 16.a

¹³ ʼE fakamatala e te ʼu kapite ʼaia te fakamaʼa ʼo selo, ʼi te lī ifo ʼa Satana mo tana kau temonio ki te kele. ʼE ko te tupuʼaga pe ʼaia e tahi ʼo te maʼuli mamahi ʼo te kele katoa talu mai te taʼu 1914, he neʼe mole heʼeki hoko he meʼa feiā ʼi muʼa atu. (Apokalipesi 12:​7-​12) ʼE toe fakamatala ai, ʼaki he ʼu palalau fakatātā, te fakaʼauha ʼo te tuʼu fakakelekele ʼa Satana. (Apokalipesi 19:​19-​21) ʼE tonu koa ki te hahaʼi agatonu ke nātou matataku ʼi te ʼu meʼa fakamataku ʼaia? Kailoa, heʼe ʼi te fakahoko ʼo te ʼu fakamāu ʼa te ʼAtua, ʼe kalaga fēnei te tahi selo: “Alleluia! Ko te mauliʼaga, mo te kololia pea mo te mafimafi e maʼa tatatou Atua. Koteuhi e mooni mo totonu ana u fakamau.”​—Apokalipesi 19:​1, 2.

14, 15. (a) ʼE fakagata feafeaʼi anai te tuʼu agakovi ʼaenī ʼaki te faitotonu? (b) He koʼe ko te tohi ʼo Apokalipesi ʼe ko he tohi fakafiafia ki te hahaʼi agatonu?

¹⁴ ʼE hoki fakatuʼu anai e Sehova he tuʼu faitotonu, ʼi tana ʼosi pulihi ʼi te kele ia nātou ʼaē ʼe nātou maumauʼi. (Apokalipesi 11:​17, 18; 19:​11-​16; 20:​1, 2) Kae ʼe mole he tagata peʼe ko he puleʼaga faka politike ʼe fakagafua kiai peʼe ina lava fakahoko te faʼahi ʼaia. Ko Sehova tokotahi pe pea mo tana Hau mo Tuʼi Fakamāu ʼaē neʼe ina fili, ia Kilisito Sesu, ʼe feala ke nā fai te faʼahi ʼaia ʼaki te faitotonu.​—2 Tesalonika 1:​6-9.

¹⁵ Ohage ko tona fakahā lelei mai e te tohi ʼo Apokalipesi, ʼe fakatuʼutuʼu e Sehova ke ina pulihi te tuʼu agakovi ʼaenī. ʼE ko he meʼa fakafiafia ʼaia ki te hahaʼi ʼaē “ ʼe nātou toʼetoʼe pea mo lotomamahi ʼo ʼuhiga mo te ʼu meʼa fakalialia fuli ʼaē ʼe hoko.” (Esekiele 9:⁠4) ʼE mahino ai kia nātou, ʼe tonu ke nātou fakalogo ki te pāui ʼaē ʼe fai e te ʼaselo ʼaē ʼe ina tala te logo lelei: “Koutou tuania te Atua . . . koteuhi kua hoko mai te hola o tana fakamau. Koutou atolasio ki te Tupuaga o te lagi, mo te kelekele.” (Apokalipesi 14:⁠7) Tou fakaʼamu ke atolasio pea mo tauhi fakatahi te hahaʼi ʼaia kia Sehova, mo tana ʼu Fakamoʼoni, “ia natou e natou taupau te u fekau a te Atua pea mo taupau te fakamooni a Sesu.”​—Apokalipesi 12:17.

Te Pule Faka Kolōlia Ia Taʼu e Afe

16. (a) He koʼe neʼe līaki e te ʼu ʼēkelesia ʼo te Keletiate te ʼamanaki ʼaē ki te ʼu Taʼu e Afe? (b) He koʼe ʼe faka tui e te kau Fakamoʼoni ʼa Sehova ʼe fakahoko anai te faikole faʼifaʼitaki?

¹⁶ ʼI te ʼu kapite 20 ki te 22 ʼo te tohi ʼo Apokalipesi, ʼe maʼu ai te tafitoʼaga faka Tohi-Tapu ʼo te ʼamanaki ʼaē ki te ʼu taʼu e afe. ʼE ko te koga pe ʼaia e tahi ʼi te Tohi-Tapu ʼaē ʼe talanoa fakahagatonu ki he ʼu taʼu e afe, pea ʼe iku anai ki he fiafia heʼegata ʼi selo pea mo te kele. Neʼe līaki e te ʼu ʼēkelesia ʼo te Keletiate te ʼamanaki ʼaē ki te ʼu Taʼu e Afe. ʼE akoʼi e te ʼēkelesia ʼe ʼolo te kau agatonu ki selo pea ʼolo te kau agakovi ki ʼifeli, kae ʼe mole talanoa ia ki he palatiso ʼi te kele. Ko te faikole faʼifaʼitaki ʼaē ʼe tou kole ai ki te ʼAtua “ke fakahoko [tona] finegalo ʼi te kele ohage ko selo,” ʼe mole kei ʼi ai hona faka ʼuhiga maʼa te hahaʼi ʼo te Keletiate. (Mateo 6:​10, New International Version) Kae ʼe mole feiā ki te kau Fakamoʼoni ʼa Sehova. ʼE nātou tui mālohi neʼe mole fakatupu “noa” e Sehova te kele, kae neʼe ina fakatupu “ke nofoʼi.” (Isaia 45:​12, 18) Koia, ʼe ʼalutahi te lea faka polofeta ʼāfea, mo te faikole faʼifaʼitaki, pea mo te ʼamanaki ʼaē ʼe tuʼu ʼi te Apokalipesi ʼo ʼuhiga mo te ʼu Taʼu e Afe. ʼI te ʼu Taʼu e Afe ʼaē ka Hau ai Kilisito, ʼe ina fakahoko anai te finegalo ʼa Sehova ʼi te kele, ohage ko selo.

17. Koteā ʼaē ʼe ina fakahā mai ko “te u taù e afe” ʼe ko he ʼu taʼu moʼoni?

¹⁷ ʼE maʼu tuʼa ono te kupu “taù e afe” ʼi te ʼu ʼuluaki vaega e fitu ʼo te kapite 20 ʼo Apokalipesi. ʼE lelei hatatou fakatokagaʼi, ʼi muʼa ʼo te kupu ʼaia ʼe fakaʼaogaʼi tuʼa lua te kupu “te u,” (pea fakaʼaogaʼi tuʼa fā te kupu ʼaia ʼi tatatou Tohi-Tapu Les Saintes Écritures — Traduction du monde nouveau) ʼo hā ʼaki mai ʼe faka ʼuhiga ki he ʼu taʼu moʼoni e afe, kae mole faka ʼuhiga ki he temi loaloaga ʼe mole ʼiloʼi tona tuʼakoi, ohage ko tona fia fakamahino mai e te hahaʼi sivi Tohi-Tapu ʼo te Keletiate. Koteā anai ʼaē ka hoko ʼi te ʼu Taʼu e Afe? ʼUluaki, ʼe pilisoniʼi Satana lolotoga te temi katoa ʼaia. (Apokalipesi 20:​1-3; vakaʼi ia Hepeleo 2:​14.) ʼE ko he logo lelei ʼaia!

18. (a) He koʼe ʼe feala ke tou ʼui ko te ʼu Taʼu e Afe ko he “aho” faifakamāu? (b) Koteā ʼaē ka hoko anai ʼi te fakaʼosi ʼo te ʼu taʼu e afe?

¹⁸ Mai tona ʼuhiga ʼaē ʼe foaki “te fakamau” kia nātou ʼaē “e natou pule anai fakatahi mo [Kilisito] lolotoga taù e afe,” koia ʼi tona fakahagatonu, ko te temi ʼaia ʼe ko te “aho” fakamāu ʼe loaloaga ia taʼu e afe. (Apokalipesi 20:​4, 6; vakaʼi ia Gaue 17:31; 2 Petelo 3:⁠8.) Ko te kau mamate ʼe fakatuʼuake anai, pea ʼo fakatahi mo nātou ʼaē ka hāo ʼi “te mamahi lahi,” ʼe fakamāuʼi anai nātou ʼi te faitotonu, ʼo mulimuli ki tanatou ʼu gāue ʼaē ʼe nātou fai lolotoga te temi ʼaia. (Apokalipesi 20:​12, 13) ʼI te fakaʼosi ʼo te ʼu taʼu e afe, ʼe tuku faka temi anai ia Satana ke ina fai he ʼahiʼahi fakamuli ki te hahaʼi, pea ki muli age, ko ia mo tana kau temonio, pea mo te hahaʼi agatuʼu ʼe fakaʼauha anai nātou ʼo talu ai. (Apokalipesi 20:​7-​10) Ko te hahaʼi ʼaē ka nātou mālo ʼi te ʼahiʼahi ʼaia, ʼe tohi anai ʼo talu ai tonatou ʼu higoa ʼi “te tohi o te mauli,” pea ʼe nātou maʼu anai he maʼuli fiafia heʼegata, ʼo tauhi pea mo atolasio kia Sehova ʼi te palatiso ʼi te kele.​—Apokalipesi 20:​14, 15; Pesalemo 37:​9, 29; Isaia 66:​22, 23.

19. (a) He koʼe ʼe feala ke tou tui papau ʼe hoko moʼoni anai te ʼu fakapapau taulekaleka ʼaē ʼe tuʼu ʼi te tohi ʼo Apokalipesi? (b) Koteā ʼaē ka tou vakaʼi anai ʼi te alatike ʼaē ka hoa mai?

¹⁹ ʼE ko te ʼu logo lelei ʼaia ʼaē ʼe tuʼu ʼi te tohi ʼo Apokalipesi. ʼE mole ko he ʼu fakapapau ʼe mole fakahoko anai, ohage ko tona fai e te tagata. He neʼe tohi fēnei e te ʼapositolo ko Soane: “Nee lea iaʼia e afio i te afioʼaga: ‘Koeni, e au fai ia mea foou fuape.’ Pea nee ui maʼana: ‘Tohi: Ko te u folafola aeni e pauga mo mooni.’ ” (Apokalipesi 21:5) Koteā ʼaē ʼe tonu ke tou fai ke tou sio ki te fakahoko ʼo te ʼu logo lelei ʼaia? ʼE tuʼu ʼi te tohi ʼo Apokalipesi he ʼu tokoni kia nātou ʼaē ʼe nātou fia fakafiafia te ʼAtua. Kapau ʼe tou mulimuli ki te ʼu tokoni ʼaia, pea ʼe tou maʼu anai he fiafia lahi, ʼi te temi nei pea ʼi te ka haʼu, ohage ko te meʼa ʼaē ka tou vakaʼi ʼi te alatike ʼaē ka hoa mai.

[Nota ʼi te lalo pasina]

Te ʼu Puani ʼo Te Fakamanatu

◻ Koteā te ʼu moʼoni maʼuhiga ʼaē ʼe tou maʼu ʼi te kapite 4 ki te kapite 6 ʼo te tohi ʼo Apokalipesi, pea ʼe ko he koga tāfito koa ʼaia ʼo te logo lelei?

◻ Koteā te logo lelei ʼaē ʼe tou maʼu ʼi te kapite 7 ʼo Apokalipesi?

◻ He koʼe ʼe mole tonu ke matataku te hahaʼi agatonu ki te ʼu logo ʼo ʼuhiga mo te faifakamāu ʼi te tohi ʼo Apokalipesi?

◻ He koʼe ko te ʼu Taʼu e Afe ʼe ko he “aho” anai ʼo te fakamāu?

[Paki ʼo te pasina 10]

Ko te Hau ko Sesu Kilisito ʼe ina pulihi anai ʼi te kele te tau, mo te hoge, pea mo te mate