“He Tuluʼi Mata Moʼo Tuluʼi ʼOu Mata”

NEʼE fakatoʼo te faitoʼo ʼaia e Sesu Kilisito ki te kokelekasio faka Kilisitiano ʼo te ʼuluaki sēkulō ʼaē neʼe tuʼu ʼi Laotisea, ʼi Asie Mineure.

Neʼe ʼui fēnei e Sesu: “Totogi . . . he tuluʼi mata moʼo tuluʼi ʼou mata ke feala hau sio.” Neʼe mole ko he faitoʼo ki he mahaki mata fakasino, kae neʼe ko te kivi fakalaumālie. Neʼe kua muliʼi e te kau Kilisitiano ʼo Laotisea te faʼahiga maʼuli ʼo te kolo mahu koloā ʼaē neʼe nātou maʼuʼuli ai, pea neʼe mole kei nātou tokakaga ki te ʼu meʼa fakalaumālie ʼaē neʼe ʼaoga moʼoni kia nātou.

ʼI tana talanoa ki te meʼa ʼaē neʼe tupu ai tonatou kivi ʼaia, neʼe ʼui fēnei e Sesu: “ ʼE ke ʼui: ‘ ʼE ʼau koloaʼia pea kua ʼau maʼu te ʼu koloā, ʼe mole kei ʼaoga he meʼa kia ʼau,’ kae ʼe mole ke ʼiloʼi koe ʼe ke pukofekofe, mo fakaʼofaʼofa pea mo masiva, mo kivi pea mo telefua.” Logope ʼe mole nātou mahino ki te potu ʼaia, kae neʼe ʼaoga kia nātou ʼo te kokelekasio “he tuluʼi mata” ʼaē neʼe feala ke nātou maʼu ʼaki pe tanatou fakalogo ki te ako pea mo te akonaki ʼa Sesu Kilisito. Neʼe ʼui fēnei e Sesu: “Totogi mai ia te ʼau.”—Apokalipesi 3:17, 18, MN.

Ohage ko te meʼa ʼaē neʼe hoko kia nātou ʼo te kokelekasio ʼo Laotisea, ʼe toe ʼaoga pe foki ki te kau Kilisitiano ʼo te temi nei ke nātou tokakaga naʼa fakahēʼi nātou, ʼo fai fakakākā peʼe ʼi hona faʼahiga fai ʼe mole nātou mahino kiai, ʼi te potu ʼe nātou maʼuʼuli ai ʼaē ʼe lahi te faka maʼuhigaʼi ʼo te ʼu koloā pea mo te ʼu fakafiafia. ʼI te tokoni ʼaenī, ʼe tuʼu ai te faitoʼo ʼo ʼuhiga mo te taupau lelei ʼo te sio fakalaumālie: “Totogi mai ia [Sesu] . . . he tuluʼi mata moʼo tuluʼi ʼou mata ke feala hau sio.”

ʼE maʼuhiga ke tou tokagaʼi, ʼe tonu ke totogi te “tuluʼi mata” ʼaia. ʼE ʼi ai te totogi ʼo te faʼahi ʼaia. ʼE fakamaʼua he temi ki te ako pea mo te metitasio ki te Folafola ʼa te ʼAtua. ʼE fakamoʼoni mai e te tagata fai pesalemo, ko te Folafola ʼaia “ ʼe maʼa, pea ʼe ina fakagigila te ʼu mata [fakalaumālie].”—Pesalemo 19:8.