‘ ʼE Mole Feala Ke Tuku Tatatou Palalau’
1 ʼE takitaki lelei e Sesu te gāue fai faka mafola. (Mat. 28:20; Mko. 13:10) Logola kua teitei toko ono miliona kau fai faka mafola ʼe nātou gāue ia fenua e 234, kae ʼe mole tonu ke tou manatu kua ʼosi tatatou fai fagonogono. ‘ ʼE mole feala ke tuku tatatou palalau’ ki te ʼu meʼa ʼaē neʼe tou ako, mo kapau ʼe mole heʼeki ʼui mai e te ʼAtua kua ʼosi te gāue.—Gaue 4:20.
2 Tou Falala Ki Te Laumālie ʼo Te ʼAtua: ʼE fakatupu e Satana te ʼu faigataʼaʼia lahi moʼo fakaloto vaivai ʼo tatou. (Apk. 12:17) Tahi ʼaē meʼa, ʼe lahi tatatou ʼu fihifihia ʼuhi ko totatou kakano agahala. Ko te ʼu meʼa ʼaia ʼe feala ke nātou fakamaliu kehe tatou mai te gāue maʼuhiga ʼaupito ʼaē ko te faka mafola. Kae kapau ʼe tou falala kia Sehova, pea ʼe tokoni mai anai tona laumālie ke tou kātakiʼi te ʼu fihifihia kehekehe.
3 ʼI te temi ʼaē neʼe fakatagaʼi kovi ai te kokelekasio faka Kilisitiano ʼo te ʼuluaki sēkulō, neʼe faikole te ʼu tēhina ki te ʼAtua ke tokoni age kia nātou, ke nātou haga tala tana folafola ʼaki he lototoʼa. Neʼe tali e Sehova ki tanatou faikole, ʼo ina foaki age kia nātou tona laumālie, mo he loto faʼafai pea mo he lotomālohi moʼo haga fai tanatou fai faka mafola. Pea neʼe feala ai ke nātou hoko atu tanatou tala te logo lelei ʼaki he lototoʼa.—Gaue 4:29, 31; 5:42.
4 ʼAua Naʼa Tou Tuʼania Mokā Tali Koviʼi Tatou: ʼE feala ke fakatupu lotovaivai kia tatou te manatu ʼa te hahaʼi, pea mo te ʼu laukovi ʼaē ʼe fai mai kia tatou. Kae tou manatuʼi te ʼu palalau lototoʼa ʼaē neʼe fai e Petelo pea mo te kau ʼapositolo ki te Sanetualio, ʼaē ʼe tou maʼu ia Gaue 5:29-32. Ohage ko te meʼa ʼaē neʼe ʼui e Kamaliele, te tagata faiako ʼo te Lao, ʼe mole feala ke maumauʼi te gāue ʼa te ʼAtua. Ko te gāue lahi ʼaia ʼe mole fakahoko ʼaki totatou mālohi, kae ʼe lagolago kiai te ʼAtua, pea ʼe ko ia tokotahi ʼaē ʼe feala ke ina fakaiku lelei!—Sakl. 4:6.
5 Koia, ʼi te ʼaho fuli tou haga kolekole kia Sehova ke ina tuku mai tona laumālie moʼo tokoni kia tatou, ke tou faʼafai moʼo kalagaʼi te logo lelei. Tou fakaʼamu ke tou ʼui ohage ko Selemia, ko te logo ʼo te Puleʼaga ʼe hage ko he afi kakaha ʼi ʼotatou hui. (Sel. 20:9) Ei, ʼe mole feala ke tou nonofo fakalogologo!