ʼE Tokaga Te ʼu Tēhina Taupau ʼo Te ʼu Ako Tohi Ki Te Hahaʼi Takitokotahi
1 ʼE fakatuʼutuʼu te Ako Tohi ʼo te kokelekasio ke “foaki he tokaga ʼe lahi age ki te tuputupu fakalaumālie ʼa te hahaʼi takitokotahi . . . ʼE hā ʼaki ai te lotoʼofa ʼo Sehova pea mo tona loto tokaga ki tana hahaʼi.” (om, pasina 75; Isa. 40:11) ʼE maʼuhiga te gāue ʼaē ʼe fai e te tēhina taupau ʼo te ako tohi moʼo foaki te tokaga ʼaia ki te hahaʼi takitokotahi.
2 ʼI Te Ako Tohi: Mai tona ʼaluʼaga ʼaē neʼe fakatuʼutuʼu ke mole hahaʼi te ʼu ako tohi, ʼe feala ai ki te tēhina taupau ʼo te ako tohi ke feʼiloʼiʼaki lelei mo nātou ʼo tona ako tohi. (Taag. 27:23) ʼI te agamāhani, ʼe feala ke fai palalau mo nātou ʼi muʼa peʼe ʼi te hili ʼo te ako ʼi te vāhaʼa fuli. Hili te māhina, kua lagi fai palalau mo te teitei hahaʼi fuli ʼo tona ako tohi. ʼE tokoni te faʼahi ʼaia kia nātou ʼo te ako tohi ke mole nātou matataku ʼi te fakaōvi kia ia ʼi te ʼu temi faigataʼaʼia, peʼe nātou ʼolo ki ai mokā ʼaoga ke fakaloto mālohiʼi nātou.—Isa. 32:2.
3 Ko te tēhina taupau ʼo te ako tohi ʼe ina faigaʼi ke ina fakaloto mālohiʼi te hahaʼi fuli ʼo tona ako tohi ke nātou fai he ʼu tali ʼi te ako. ʼE feala ke ina fai te faʼahi ʼaia, mo kapau ʼe agalelei pea mo agamālū ʼi tana fai te ako. (1 Tes. 2:7, 8) ʼE ina kumi he ʼu faʼahiga fai ke nātou kau fuli ki te fai palalau, ʼo feiā mo te kau tūpulaga. Kapau ʼe ufiufi ʼihi ʼi te tali, ʼe feala ke tokoni kia nātou takitokotahi, ʼo ina fakatuʼutuʼu fakatomuʼa ke nātou lau he vaega peʼe nātou tali ʼi he palakalafe. Peʼe feala ke ina fakahā age kia nātou peʼe feafeaʼi hanatou tali ʼaki tanatou ʼu palalau ʼa nātou totonu.
4 Kapau ko ia ʼaē ʼe tokoni ki te tēhina taupau ʼo te ako tohi ʼe ko he tēhina faifekau faka minisitelio, pea ʼe fakatuʼutuʼu e te tēhina taupau ke ina fai te ako tohi tuʼa tahi ʼi te ʼu māhina fuli e lua. ʼE feala ai ki te tēhina taupau ke ina sivisivi te tēhina faifekau pea mo foaki ki ai he ʼu tokoni ʼaoga. ʼE ko he fakatuʼutuʼu lelei ʼaia moʼo tokoni ki te ʼu tēhina ke nātou hikihiki tanatou poto ʼi te faiako!—Tito 1:9.
5 ʼI Te Fai Faka Mafola: ʼE kau ʼi te ʼu maʼua tāfito ʼo te tēhina taupau ʼo te ako tohi, te maʼua ʼaē ke ina foaki te faʼifaʼitaki ʼi te faka mafola ʼo te logo lelei. (Fkau. 27:16, 17) ʼE ina fai he ʼu fakatuʼutuʼu ʼaoga ki te fai faka mafola ʼo tana ako tohi, pea mo ina faiga ke tokoni kia nātou fuli ke nātou fiafia ʼi tanatou minisitelio. (Ef. 4:11, 12) Moʼo fakahoko te faʼahi ʼaia, ʼe tonu ke ina fakatuʼutuʼu ke fai faka mafola mo nātou takitokotahi ʼo tona ako tohi. ʼE toe gāue mo te tēhina taupau ki te gāue ke fai he ʼu fakatuʼutuʼu maʼa nātou ʼe nātou loto ke hikihiki he faʼahiga fai ʼo tanatou minisitelio, ke feala ki he tēhina peʼe ko he tuagaʼane kua māhani ʼi te fai faka mafola ke tokoni kia nātou ʼaia.
6 Ko He Tagata Tauhi Ōvi ʼOfa: ʼE tokaga te ʼu tēhina taupau ʼo te ako tohi kia nātou ʼaē ʼe mole feala ke lahi age tanatou kau ki te gāue fai faka mafola, ʼuhi ko tonatou ʼu ʼaluʼaga takitokotahi. ʼO ʼuhiga mo nātou ʼaē ʼe mole feala ke lahi tanatou gāue ʼuhi kua matutuʼa peʼe kua faigataʼa tanatou haʼele, pea mo nātou ʼaē ʼe mahahaki kovi peʼe lāvevea, ʼe tonu ke ina ʼiloʼi papau peʼe kua mahino kia nātou te fakatuʼutuʼu ʼaē ʼe feala ke nātou tohi ʼi tanatou pepa gāue te ʼu minuta e 15 neʼe nātou fai, mo kapau neʼe mole nātou fai he hola katoa ʼi te māhina. (ʼE vakaʼi e te Komite Gāue ʼo Te Kokelekasio ia nātou ʼaē ʼe feala ke ʼaoga ki ai te faʼahi ʼaia.) ʼI tana ako tohi, ʼe toe tokaga foki kia nātou ʼaē ʼe mole kei fai faka mafola, ʼo ina faiga ke tokoni kia nātou ke nātou toe gāue fakatahi mo te kokelekasio.—Luka 15:4-7.
7 ʼE tou loto fakafetaʼi ʼaupito ki te tokaga ʼofa ʼaia ʼe fakahā e te ʼu tēhina taupau ʼo te ako tohi! Ko tanatou tokaga ʼaia kia tatou takitokotahi ʼe tokoni mai ke “tou aʼu fuli ki te logo tahi ʼi te tui . . . , ki te katoa ʼo te ʼuhigaʼi tagata, ki te fakafuafua ʼo te ʼaluʼaga ʼo te katoa ʼa Kilisito.”—Ef. 4:13, MN.