ʼE Feala Koa Hakotou Kau Ki Te Minisitelio ʼi Te ʼu ʼAhotapu?
1. Koteā te ako ʼe tou tāʼofi mai te ʼu gāue neʼe fai e Paulo mo tona ʼu tehina ʼi te kolo ʼo Filipe?
1 Neʼe ko te Sāpato, ko he ʼaho neʼe mālōlō ai te kau Sutea e tokolahi ʼi te kolo ʼo Filipe. Neʼe ʼaʼahi e Paulo pea mo tona ʼu tehina te kolo ʼaia ʼi tanatou tahi folau fakamisionea. ʼE mahino ia, neʼe mole valokiʼi nātou e he tahi mo kanapau lā, ʼi te ʼaho ʼaia, neʼe natou mālōlō muʼa mo nātou mai tanatou minisitelio. Kae neʼe natou ʼiloʼi neʼe fakatahitahi te kau Sutea ʼo faikole ʼi tuʼa atu ʼo te kolo, koia neʼe ko he faigamālie ʼaia ke natou fai fakamafola kiā nātou. ʼE mahino ia neʼe fiafia lahi ia Paulo mo tona ʼu tehina, ʼi te fakalogo ʼaē ʼa Litia mo tona loto fale kātoa, pea mo natou papitema! (Gāue 16:13-15) Mai tona ʼaluʼaga ʼaē, iā ʼaho nei ʼe mālōlō te tokolahi ʼi te ʼAhotapu, he koʼē koa ʼe mole tou fakaʼaogaʼi te faigamālie ʼaia moʼo fai fakamafola kiā nātou?
2. Koteā te ʼu fihifihia ʼaē neʼe tauʼi e te hahaʼi ʼa Sehova ke feala ai hanatou fakamafola faʼifaʼitaliha ʼi te ʼAhotapu?
2 Te Fihi ʼo ʼUhiga Mo Te Fai Fakamafola ʼAē ʼi Te ʼAhotapu: ʼI te taʼu 1927, neʼe fakalotomālohiʼi te hahaʼi ʼa Sehova ke natou fakaʼaogaʼi he temi ʼi te ʼu ʼAhotapu fuli ki te minisitelio. Neʼe iku atu aipē ki te fakafeagai. Tokolahi te ʼu tehina mo tuagaʼane neʼe puke nātou ʼi Amelika he neʼe ʼui neʼe natou maumauʼi te ʼu lao ʼo ʼuhiga mo te Sāpato ʼaē ʼo te ʼAhotapu, mo natou fakatupu maveuveu ʼi te ʼaho ʼaia, pea mo natou fakatau te ʼu tohi kae mole heʼeki fakagafua age. Kae neʼe mole tuku e te hahaʼi ʼa Sehova ia tanatou fai fakamafola. ʼI te ʼu taʼu 1930, neʼe natou fakatuʼutuʼu ‘he kau fai fakamafola fakakūtuga,’ ke feala ai ki te kau fai fakamafola ʼo te ʼu kōkelekāsio ʼo te kolo ke natou fakatahitahi moʼo fai fakamafola ʼi he telituale. ʼI ʼihi temi mokā puke te kau fai fakamafola, pea ʼi tonatou kaugamālie fau neʼe mole feala ki te ʼu pule ke natou puke fuli ia nātou. ʼE kotou loto fakafetaʼi moʼoni koa ki te ʼu sākilifisio ʼaia neʼe fai e te ʼu tehina ʼaia, ke feala ai hatatou fai fakamafola faʼifaʼitaliha ʼi te ʼu ʼAhotapu?
3. He koʼē ko te ʼAhotapu ʼe ko he ʼaho lelei ʼaia ki te minisitelio?
3 Ko He ʼAho Lelei Ke Kita Fai Fakamafola Ai: Tokolahi ʼi te ʼAhotapu ʼe natou nonofo ʼi ʼonatou loto fale. Pea ʼi te agamāhani ʼe mole he meʼa ʼe natou hoha kiai. ʼI te ʼaho ʼaia ʼe fia fai palalau ʼihi hahaʼi lotu ʼo ʼuhiga mo te ʼAtua. Kapau ʼe tou fono ʼi te ʼAhotapu, pea kua tou tokalelei ki te fai fakamafola, kaeā lā mokā tou fakatuʼutuʼu ke tou kau ki te minisitelio ʼi muʼa ʼo te fai ʼo te fono peʼe mokā hili te fono? Kapau ʼe ʼaoga, ʼe feala ke kotou teuteuʼi hakotou kiʼi kasikutu ke toʼo ʼo ʼave mo koutou.
4. Koteā te fiafia ʼe feala ke tou logoʼi mo kapau ʼe tou fakaʼaogaʼi he temi ʼi te ʼAhotapu ke tou kau ai ki te minisitelio?
4 Kapau ʼe tou fakaʼaogaʼi he temi ʼi te ʼAhotapu ke tou kau ai ki te minisitelio, pea ʼe kei tou maʼu pē anai he temi ke tou mālōlō ai. Pea ʼe tou fiafia anai ʼi tatatou mālōlō ʼaia he neʼe tou kau ki te tauhi taputapu. (Taag. 19:23) ʼE lagi feala pē ke tou fiafia ʼi tatatou maʼu he tahi ohagē ko te fafine ko Litia!