KUA hili taʼu e lua, pea ʼe kei nofo pe ia Sosefo ʼi te fale pilisoni. Neʼe mole kei manatuʼi ia ia e te tagata ʼaē ʼe tokaga ki te meʼa ʼinu. Pea ʼi te tahi po neʼe fai e Falaone te ʼu moemisi makehe e lua, pea neʼe ina fia ʼiloʼi pe koteā tona faka ʼuhiga. ʼE koutou sio koa ki ai ʼi te paki? ʼI te uhu ake neʼe pāuiʼi e Falaone tana ʼu tagata popoto pea ina fakamatala age kia nātou te ʼu meʼa ʼaē neʼe sio kiai ʼi tana moemisi. Kae neʼe mole feala ke nātou fakamahinohino age te faka ʼuhiga ʼo tana ʼu moemisi.

Neʼe manatuʼi ai leva e te tagata ʼaē ʼe tokaga ki te meʼa ʼinu ia Sosefo. Neʼe ʼui maʼana kia Falaone: ‘ ʼI taku nofo ʼaē ʼi te fale pilisoni, neʼe ʼi ai te tagata ʼe feala ke ina fakamahinohino te faka ʼuhiga ʼo te ʼu moemisi.’ Pea neʼe fakamavae e Falaone ia Sosefo mai te fale pilisoni.

Neʼe fakahā age e Falaone tana ʼu moemisi kia Sosefo: ‘Neʼe ʼau sio ki te ʼu pipi sino lelei mo matalelei e fitu. Pea neʼe ʼau sio ki te ʼu pipi sino kovi ʼaupito e fitu. Pea ko te ʼu pipi ʼaē ʼe sino kovi neʼe nātou kai te ʼu pipi sino lelei.

‘ ʼI te lua moemisi neʼe ʼau sio ki te ʼu maga e fitu ʼe fua lelei pea mo momoho, pea ʼe nātou homo ʼi te vaʼa pe e tahi. Pea neʼe ʼau sio ki te ʼu maga e fitu kua moamoa. Pea koʼeni te ʼu maga ʼaē kua moamoa neʼe nātou folo te ʼu maga e fitu ʼaē ʼe lelei.’

Neʼe ʼui fēnei e Sosefo kia Falaone: ‘ ʼE tatau pe te faka ʼuhiga ʼo te ʼu moemisi ʼaia e lua. Ko te ʼu pipi sino lelei pea mo te ʼu maga lelei ʼaē e fitu ʼe nātou fakatātā te ʼu taʼu e fitu, pea ko te ʼu pipi e fitu ʼaē ʼe sino kovi pea mo te ʼu maga e fitu ʼaē kua moamoa, ʼe nātou fakatātā te tahi ʼu taʼu e fitu. ʼE ʼi ai anai te ʼu taʼu e fitu ʼe mahu ai te meʼa kai ʼi Esipito. ʼOsi ʼaia pea ʼe ʼi ai anai mo te ʼu taʼu e fitu ʼe hoge ai.’

Pea neʼe ʼui fēnei e Sosefo kia Falaone: ‘Fili he tagata poto pea ke fakatotonu ki ai ke ina tānaki te meʼa kai lolotoga te ʼu taʼu lelei ʼaē e fitu. Pea ʼe mole pakupaku anai te hahaʼi lolotoga te ʼu taʼu e fitu ʼaē ka hoko ai te hoge.’

Neʼe leleiʼia e Falaone te manatu ʼaia. Pea neʼe ina fili ia Sosefo ke ina tānaki te meʼa kai pea ke ina tuku ki te ʼu faleoko. Neʼe liliu ia Sosefo ko te tagata maʼuhiga ʼo Esipito ʼo hoa atu kia Falaone.

Hili kiai taʼu e valu, ʼi te lolotoga ʼo te hoge, neʼe sio ia Sosefo ki te ʼu tagata ʼe ʼōmai. ʼE koutou ʼiloʼi pe ko ai te ʼu tagata ʼaia? Ko tona ʼu tēhina ʼaē e toko 10! Neʼe fekauʼi mai e tanatou tāmai ko Sakopo ke nātou ʼōmai ki Esipito, koteʼuhi he kua kamata hoge ia Kanaane. Neʼe ʼiloʼi e Sosefo ko tona ʼu tēhina, kae neʼe mole nātou ʼiloʼi ia ia. ʼE koutou ʼiloʼi pe koteā tona tupuʼaga? Koteʼuhi kua matuʼa ia Sosefo, pea kua kehe tona ʼu mutuʼi meʼa.

ʼO toe manatuʼi ai e Sosefo te temi ʼaē neʼe kei tamasiʼi ai pea mo tana moemisi ʼaē ʼe ʼōmai tona ʼu tēhina ʼo tulolo ʼi ʼona muʼa. ʼE kei koutou manatuʼi koa la te faʼahi ʼaia? Koia neʼe mahino ai kia Sosefo, ʼe ko te ʼAtua ʼaē neʼe ina fekauʼi mai ia ia ki Esipito, pea ʼe ʼi ai tona tupuʼaga maʼuhiga. ʼI takotou manatu koteā ʼapē te meʼa ʼaē ka fai e Sosefo? Tou vakaʼi te faʼahi ʼaia.

NEʼE fia ʼiloʼi e Sosefo peʼe kei agakovi pea mo agamālohi tona ʼu tēhina ʼaē e toko 10. Koia neʼe ina ʼui fēnei: ‘Ko koutou ko te ʼu malomu. ʼE koutou ʼōmai ʼo vakaʼi te ʼu faʼahi ʼaē ʼe vaivai ai tomatou fenua.’

Pea nātou ʼui fēnei: ‘Kailoa, ʼe mole ko mātou ko he ʼu malomu. Ko mātou ko te ʼu tagata aga fakahagatonu. Ko mātou ko te fale tautēhina. Neʼe mātou toko 12. Kae ʼe ʼi ai tomatou tēhina e tahi kua mate, pea ko tomatou tēhina veliveli ʼe nofo ʼi fale mo tamatou tāmai.’

Neʼe ʼui age e Sosefo ʼe mole tui ki te meʼa ʼaē ʼe nātou tala age. Neʼe ina tāʼofi tona tēhina ʼaē ʼe higoa ko Simeone, kae neʼe ina tuku ia nātou ʼaē ke nātou toʼo te meʼa kai pea ke nātou ʼolo ki tonatou ʼapi. Kae neʼe ina ʼui age kia nātou: ‘ ʼI takotou toe liliu mai, koutou ʼōmai mo tokotou tēhina veliveli.’

ʼI tanatou liliu ki Kanaane, neʼe fakamatala e te fale tautēhina ʼaia kia Sakopo, tanatou tāmai, te ʼu meʼa fuli ʼaē neʼe hoko. Neʼe lotomamahi ʼaupito ia Sakopo, ʼo kalaga fēnei: ‘ ʼE mole kei ʼi henī ia Sosefo, pea ʼi te temi nei ʼe mole kei ʼi henī mo Simeone. ʼE mole ʼau fakagafua atu anai ke koutou ʼave toku foha veliveli ko Pesamino.’ Kae ʼi te kua veliveli ʼo tanatou meʼa kai, neʼe tuku e Sakopo ia Pesamino ke ʼalu mo nātou ki Esipito, ke nātou ʼaumai hanatou meʼa kai.

Pea neʼe sio ia Sosefo ki te ʼōmai ʼo tona ʼu tēhina. Neʼe fiafia ʼaupito ʼi tana sio ki tona tēhina veliveli ʼaē ko Pesamino. ʼIo, neʼe mole ʼiloʼi pe la e he tahi ia nātou ʼe ko Sosefo te tagata maʼuhiga ʼaia. Pea neʼe fai e Sosefo te meʼa moʼo ʼahiʼahiʼi ʼo tona ʼu tēhina e toko 10.

Neʼe ina ʼui age ki tana ʼu tagata faifekau ke nātou fakafonu tanatou ʼu taga meʼa kai. Pea tahi ʼaē meʼa, neʼe ina fafaʼo ki te taga ʼa Pesamino tona ipu siliva fakaʼeteʼete, kae mole nātou ʼiloʼi. ʼI te hili pe ʼo tanatou mavae atu, pea neʼe fekau e Sosefo tana ʼu tagata faifekau ke nātou tuli ia nātou. ʼI tanatou maʼu atu, neʼe ʼui age e te ʼu tagata faifekau: ‘He koʼe neʼe koutou kaihaʼa te ipu siliva ʼo tomatou pule?’

Pea ʼui e te fale tautēhina: ‘Neʼe mole mātou kaihaʼa tona ipu. Kapau ʼe koutou maʼu te ipu ʼaia ʼi he taga ʼa he tahi ia mātou, pea ʼe tonu ke matehi ia ia.’

Pea neʼe kumi e te ʼu tagata faifekau ʼi te ʼu taga fuli, pea neʼe nātou maʼu te ipu ʼi te taga ʼa Pesamino, ohage pe ko takotou sio kiai ʼi te paki. Neʼe ʼui e te ʼu tagata faifekau: ‘Ko koutou ʼe feala hakotou ʼolo, kae ʼe mātou ʼolo mo Pesamino.’ Koteā anai te meʼa ka fai e te fale tautēhina ʼaia e toko 10?

Neʼe nātou toe liliu fuli mo Pesamino ki te fale ʼo Sosefo. Neʼe ʼui age e Sosefo ki tona ʼu tēhina: ‘ ʼE feala takotou ʼolo ki tokotou ʼapi, kae ʼe tonu ke nofo ia Pesamino ʼi henī ʼo kaugana kia te ʼau.’

Pea neʼe palalau ia Suta ʼo ina ʼui fēnei: ‘Kapau ʼe ʼau liliu ki toku ʼapi kae puli ia te tamasiʼi tagata, pea ʼe mate anai taku tāmai koteʼuhi ʼe ʼofa mamahi ki ai. Koia, ke ke tāʼofi ʼau ke ʼau kaugana kia te koe, kae ke tuku te tamasiʼi ke liliu ki tomatou ʼapi.’

Neʼe mahino ai kia Sosefo kua fetogi tona ʼu tēhina. ʼE mole kei nātou agakovi pea mo agamālohi ki he tahi. Tou vakaʼi te meʼa ʼaē ka fai e Sosefo.