KOUTOU sio kia Moisese ʼe hola mai Esipito. ʼE koutou sio koa ki te ʼu tagata ʼaē ʼe nā tuli ia Moisese? ʼE koutou ʼiloʼi koa pe koʼe ʼe nā fia matehi ia Moisese? Tou vakaʼi peʼe feala tatatou ʼiloʼi tona tupuʼaga.

Neʼe lahi ake ia Moisese ʼi te ʼapi ʼo Falaone, te pule ʼo Esipito. Neʼe liliu ia ko te tagata poto pea mo lahi ʼaupito. Neʼe ʼiloʼi e Moisese ʼe mole ko ia ko he tagata Esipito, heʼe ko tana ʼu mātuʼa ko te ʼu kaugana Iselaelite.

ʼI te tahi ʼaho, ʼi tona taʼu 40, neʼe fakatuʼutuʼu e Moisese ke ʼalu ʼo sio peʼe feafeaʼi te gaohi ʼo tana hahaʼi. Neʼe fakaʼofaʼofa ʼosi tonatou gaohi koviʼi. Neʼe sio ia ki te tagata Esipito ʼe ina haha te tagata Iselaelite. Neʼe sio ia Moisese ʼe mole he tahi ʼi te ʼu tafaʼaki, pea neʼe ina tāʼi te tagata Esipito, ʼo mate ai te tagata ʼaia. Pea neʼe tanu e Moisese te tagata ʼi te ʼone.

ʼI te ʼaho ake, neʼe toe ʼalu ia Moisese ʼo fakasiosio tana hahaʼi. ʼI tana manatu ʼe feala anai hana tokoni kia nātou ke nātou mavae mai tonatou maʼuli popūla. Kae neʼe sio ia ki te ʼu tagata Iselaelite e toko lua ʼe nā fuhu, pea neʼe ʼui e Moisese kia ia ʼaē neʼe ina fakatupu te kovi: ‘He koʼe ʼe ke tā tou tēhina?’

Neʼe ʼui age e te tagata: ‘Ko ai ʼaē neʼe ina fakanofo koe ke ke puleʼi pea mo fakamāuʼi ia mātou? ʼE ke fia matehi ʼau ohage ko tau matehi ia te tagata Esipito?’

ʼI te temi ʼaia neʼe kua mataku ia Moisese. Neʼe mahino ai kia ia kua ʼiloʼi te meʼa ʼaē neʼe ina fai ki te tagata Esipito. ʼO feiā pe la mo Falaone neʼe kua logo ki te faʼahi ʼaia, pea kua ina fekauʼi te ʼu tagata ke ʼolo ʼo matehi ia Moisese. Koʼena la te tupuʼaga ʼo te hola ʼa Moisese mai Esipito.

ʼI te mavae ʼa Moisese ʼi Esipito, neʼe ʼalu ia ki te fenua ko Matiane. Neʼe felāveʼi ai mo te famili ʼo Setelo, pea neʼe ʼohoana ai mo tona ʼofafine ʼe higoa ko Sipola. Neʼe liliu ia Moisese ko te tagata tauhi ōvi pea neʼe tokaga lelei ki te ʼu ōvi ʼa Setelo. Neʼe nofo ia ʼi Matiane ia taʼu e 40. Ko tona taʼu 80 ʼaenī. Pea ʼi te tahi ʼaho, neʼe hoko te meʼa fakaofoofo kia Moisese ʼi tana lolotoga taupau te ʼu ōvi ʼa Setelo, ʼo fetogi ai te maʼuli katoa ʼo Moisese. Koutou fuli age te pasina, pea koutou vakaʼi ai pe koteā te meʼa fakaofoofo ʼaia.

NEʼE ʼalu ia Moisese ki te moʼuga ko Holepe ʼo kumi he vao moʼo fafaga ʼo tana ʼu ōvi. ʼI tana tau atu kiai neʼe sio ia ki te kiʼi fuʼu ʼakau ʼe ulo, kae neʼe mole ʼosiʼosi ia ʼi te ulo ʼo te afi!

Neʼe manatu fēnei ia Moisese: ‘ ʼI meʼa faikehe leva. ʼE ʼau fakaōvi anai kiai ke feala haku sio lelei.’ ʼI tana hoho atu, neʼe ʼui fēnei e te leʼo mai te kiʼi fuʼu ʼakau: ‘ ʼAua naʼa ke fakaōvi mai. Huʼi ʼou sūlie, koteʼuhi ʼe ke tuʼu nei ʼi te kele taputapu.’ Ko te ʼAtua ʼaē neʼe palalau kia ia ʼaki te ʼaselo, koia neʼe pūlouʼi ai e Moisese tona fofoga.

Neʼe ʼui age e te ʼAtua: ‘Neʼe ʼau sio ki te mamahi ʼo taku hahaʼi ʼi Esipito. Koia ʼe ʼau teuteu nei ke ʼau faka ʼāteaina ia nātou, pea ko koe ʼaē ka ʼau fekauʼi moʼo hāofaki ʼo taku hahaʼi mai Esipito.’ Neʼe teuteu ia Sehova ke ina taki mai tana hahaʼi ki te fenua matalelei ko Kanaane.

Kae neʼe ʼui e Moisese: ‘Ko ʼau ko te meʼa noa. ʼE feafeaʼi anai haku fai te meʼa ʼaia? Kae kapau ʼe ʼau ʼalu ʼo fai te meʼa ʼaia, ʼe ʼui mai anai e te kau Iselaelite, “Ko ai ʼaē neʼe ina fekauʼi mai koe?” Pea koteā anai te meʼa ʼaē ʼe tonu ke ʼau ʼui?’

Neʼe tali age e te ʼAtua, ‘Koʼeni te meʼa ʼaē ka ke ʼui: “Ko SEHOVA te ʼAtua ʼo Apalahamo, te ʼAtua ʼo Isaake pea mo te ʼAtua ʼo Sakopo neʼe ina fekauʼi mai ʼau kia koutou.” ’ Pea toe ʼui age e Sehova: ‘Koʼena toku higoa ke talu ai.’

Pea ʼui age e Moisese: ‘Kae kapau ʼe mole nātou tui ki taku ʼui age ʼaē ko koe ʼaē neʼe ke fekauʼi ʼau?’

Pea fehuʼi age e te ʼAtua: ‘Koteā ʼaē ʼe ke puke ʼi tou nima?’

Neʼe tali age e Moisese: ‘Ko te tokotoko.’

Pea ʼui age e te ʼAtua: ‘Lī ki lalo.’ Pea ʼi tana fai te meʼa ʼaia, neʼe liliu ai te tokotoko ko he gata. Pea neʼe toe fakahā age e Sehova te tahi milakulo kia Moisese. Neʼe ina ʼui age: ‘ ʼAi tou nima ki tou kofu.’ Neʼe fai e Moisese te meʼa ʼaia, pea ʼi tana toʼo ake tona nima, neʼe kua hihina ohage he nive! Neʼe hage tona nima kua kilia. Ki muli age neʼe foaki age e Sehova kia Moisese te mālohi moʼo fai ʼo te tolu milakulo. Pea ina ʼui age: ‘ ʼI te temi ʼaē ka ke fai ai anai te ʼu milakulo ʼaia ʼe tui ai anai te kau Iselaelite neʼe ʼau fekauʼi koe.’

ʼI te liliu ʼa Moisese ki tona ʼapi, neʼe ina ʼui age kia Setelo: ‘Fakalelei mai kae ʼau ʼalu muʼa ki toku ʼu kāiga ʼi Esipito, ʼo fakasiosio peʼe kua nātou feafeaʼi.’ Pea neʼe tauʼinē ia Setelo kia Moisese, pea neʼe fagona ai ia Moisese ki Esipito.