E Feafeaʼi Tokotou Higoa?

ʼI TE Tohi-Tapu, ko te kupu “higoa” ʼe tau faka ʼuhiga ki tokita matagafua. Ohage la, neʼe tohi fēnei e te Hau poto ko Salomone: “Ko tokita higoa ʼe maʼuhiga age ia ʼi he lolo magoni, pea ʼe lelei age tokita ʼaho mate ʼi te ʼaho ʼaē ʼe kita tupu ai.” (Tagata Tānaki 7:1; vakaʼi ia Tāʼaga Lea 22:1.) ʼO mulimuli ki te ʼu palalau ʼa Salomone, ʼe mole kita tupu ʼaki he higoa kua lelei. Kae ʼaki te temi, ʼi te lolotoga ʼo tokita maʼuli, ʼe liliu ai te higoa ʼaia ʼo matalelei ʼaki tona matagafua. Ka tou logo ki tokita higoa, pea ʼe tou manatuʼi atu aipe tokita ʼu kalitate, peʼe kita loto fia foaki peʼe kita manatu pe kia kita, mo agaʼofa peʼe aga fefeka, mo agavaivai peʼe fialahi, mo faitotonu peʼe agakovi.

Ohage la ko Tavite. Lolotoga tana nofo hau, neʼe mālohi pea neʼe ina taupau maʼu tana agatonu. Kae neʼe toe fakamoʼoni foki ki tana ʼu hala pea neʼe fakahemala ki tana ʼu agahala mamafa. Koia la ʼaē, neʼe ʼui ai e te polofeta ʼa Sehova, ko Tavite neʼe “ko he tagata neʼe ina fakafiafia [te] loto [ʼa te ʼAtua].” (1 Samuele 13:14) Neʼe kua leleiʼia e te ʼAtua te higoa ʼo te tūpulaga ko Tavite.

Neʼe kehe ʼaupito te aga ʼa te Hau Sutea ko Solame ʼaē neʼe mole lelei tona higoa. Neʼe ina fakahēʼi tana hahaʼi mai te tauhi ʼaē kia Sehova, pea neʼe ina matehi tona ʼu tēhina e toko ono pea mo te ʼu tama ʼaliki ʼo Suta. Moʼo fakaʼosi, neʼe tauteaʼi e Sehova ia Solame ʼaki te mahaki fakatupu mamahi ʼo iku ai ki tona mate. ʼE ʼui e te Tohi-Tapu, ko Solame “neʼe mavae ka mole ʼofa ki ai he tahi,” peʼe ohage ko tona ʼui e te Tohi-Tapu Today’s English Version, “neʼe mole he tahi neʼe mamahi ʼi tana mate.”​—2 Fakamatala 21:20.

ʼE hā ʼaki mai te maʼuli ʼo Tavite pea mo Solame, ʼe moʼoni te tāʼaga lea ʼaenī ʼa te Tohi-Tapu: “Ko te suvenia ʼo te faitotonu ʼe tau mo he tapuakina, kae ko te higoa ʼo te agakovi ʼe popo anai ia.” (Tāʼaga Lea 10:7) Koia ʼe tonu ai kia tatou fuli ke tou fakatokagaʼi te fehuʼi ʼaenī, ‘E feafeaʼi toku higoa ia muʼa ʼo te ʼAtua pea mo toku kāiga?’