Kapite 19

Neʼe Fai Akonaki Ia Sesu Ki Te Fafine Samalitana

ʼE NĀTOU ʼolo ʼi Sutea ki Kalilea, neʼe fou ia Sesu pea mo tana kau tisipulo ʼi te tisitilike ʼo Samalia. ʼI tanatou kua gaʼegaʼe ʼi tanatou fagona, neʼe nātou tutuʼu ʼi te temi ʼo te fetapā ʼo mālōlō ia tafa ʼo te vai keli, ʼe ōvi ki te kolo ko Sisale. Ko te vai keli ʼaia neʼe keli ʼi te ʼu sēkulō ki muʼa atu e Sakopo, pea ʼe kei tuʼu aipe ʼi te temi ʼaenī ʼo ōvi ki te kolo foʼou ʼo te temi ʼaenī ko Naplouse.

ʼI te lolotoga ʼo te mālōlō ʼa Sesu ʼi te potu ʼaia, neʼe ʼolo tana kau tisipulo ki te kolo ʼo toʼo meʼa kai. Pea haʼu te fafine Samalitana, ko te ʼutu vai, pea lea age ia Sesu ki ai: “Mai he meʼa ke ʼau ʼinu.”

ʼI te agamāhani, neʼe mole felogoi tahi te kau Sutea mo te kau Samalitana ʼuhi ko tanatou ʼu femanatu kovi ʼaki. Neʼe punamaʼuli te fafine ʼaia, pea ina fehuʼi age: “He koʼe ko koe ʼaenā, ko te Sutea, ʼe ke kole mai kia ʼau hau meʼa ʼinu, kia ʼau ʼaenī ko te fafine samalitana? ”

Neʼe tali age e Sesu: “Ka na neʼe ke (...) ʼiloʼi la pe ko ai ia ia ʼaē ʼe ina ʼui atu kia koe: ‘Mai he meʼa ke ʼau ʼinu’, ka na ʼaua la ʼe ko koe nei ia ʼaē ʼe ke kole age kia te ia, pea ʼe ina haga ʼo ʼavatu te vai maʼuli.”

“ ʼAliki, ko te ʼui age ʼaia e te fafine, ʼe mole pe la ʼi ai hau pākete moʼo ōhu vai, pea ko te vai keli ʼe loloto. ʼE ke maʼu maifea te vai maʼuli ʼaia? ʼE ke lahi ake koa la koe ʼi tamatou tāmai ko Sakopo, ʼaē neʼe ina foaki kia mātou te vai keli pea mo ʼinu ai ia ia totonu, pea mo tona ʼu foha pea mo ʼana faga manu? ”

“Ko ʼaē ʼe ʼinu ki te vai nei, ko te ʼui age ʼaia ʼa Sesu, ʼe toe fia ʼinu anai ia. Ko ʼaē ka ʼinu anai ki te vai ʼaē ka ʼau foaki age anai ki ai ʼe mole toe fia ʼinu anai ia, kae ko te vai ʼaē ka ʼau foaki anai ki ai ʼe liliu anai ia te ia ko he matapuna vai ʼe puna moʼo foaki ʼo te maʼuli heʼegata.”

“ ʼAliki, foaki mai kia te ʼau te vai ʼaia, ko te kole age ʼaia ʼa te fafine, ke ʼaua na ʼau toe fia ʼinu pea mo ʼaua taku toe haʼu tuʼumaʼu ki henī ʼo ʼutu vai.”

Pea ʼui age ai leva e Sesu ki ai: “ ʼAlu ʼo pāuiʼi tou ʼohoana pea ke toe haʼu ki henī.”

“ ʼE mole hoku ʼohoana”, ko tana tali age ʼaia.

Neʼe fakamoʼoni ia Sesu ki tana ʼu palalau, ʼo ina ʼui age: “ ʼE ke tonu ʼi tau ʼui ʼaē: ‘ ʼE mole hoku ʼohoana’. He neʼe kua ke maʼu ʼou ʼohoana e nima, pea ko te tagata ʼaē ʼe nofo nei mo koe ʼe mole ko hou ʼohoana.”

“ ʼAliki, ʼe ʼau sio ʼe ke polofeta”, ko te ʼui age ʼaia ʼa te fafine, ʼi tana kua ōfo. Pea ʼi tana fakahā tona manako ki te ʼu meʼa fakalaumālie, neʼe ina fakatokagaʼi age ko te kau Samalitana “neʼe nātou atolasio ʼi te moʼuga ʼaenī [ko Kelisime, ʼe mole tuʼu mamaʼo mo te potu ʼaē ʼe fai palalau ai]”. “Kae ko koutou [te kau Sutea], ko tana ʼui age ʼaia, ʼe koutou ʼui ko te potu ʼaē ʼe tonu ke fai ai te atolasio ko Selusalemi.”

Kae, ʼe mole ko te potu ʼaē ʼe tou atolasio ai ʼaē ʼe maʼuhiga, ko tona fakahā age ʼaia e Sesu. “ ʼE haʼu te hola, pea ʼe ko te temi ʼaenī, ʼaē ka atolasio ai anai te kau atolasio moʼoni ki te Tāmai ʼaki te laumālie pea mo te moʼoni, heʼe, ko te Tāmai ʼe ina kumi moʼoni te taʼi kau atolasio ʼaia. Ko te ʼAtua ʼe Laumālie, pea ko nātou ʼaē ʼe atolasio kia te ia ʼe tonu ke nātou atolasio kia te ia ʼaki te laumālie pea mo te moʼoni.”

Neʼe lave ʼaupito te ʼu palalau ki te fafine. “ ʼE ʼau ʼiloʼi ko te Mesia ʼe haʼu, — ia ia ʼaē ʼe higoa ko Kilisito, ko tana ʼui ʼaia. Ka haʼu anai, pea ʼe ina fakahā fakahagatonu mai anai kia tatou ia meʼa fuli pe.”

“Ko ʼau ʼaenī ʼe palalau atu, ko ʼau ia ia”, ko te ʼui age ʼaia ʼa Sesu. Koteā leva takotou ʼui kiai? Ki te fafine Samalitana ʼaia, ʼaē neʼe haʼu ʼo ʼutu vai ʼi te temi ʼo te fetapā, ko hana lagi faiga ʼapē ke ʼaua naʼa felāveʼi mo te hahaʼi fafine ʼo te kolo ʼaē ʼe fehihiʼa kia ia ʼuhi ko tona faʼahiga maʼuli, neʼe fai e Sesu ki te fafine Samalitana ʼaia te faka maʼuhiga lahi ʼaupito. Neʼe ina fakahā fakahagatonu age ki ai te ʼu meʼa ʼaē neʼe mole heʼeki ina fakahā fakahagatonu age ki he tahi. Koteā tona ʼu fua ka hoko ai?

Tokolahi te kau Samalitana ʼe tui

ʼI tanatou liliu mai Sisale mo te meʼa kai, neʼe maʼu mai e te kau tisipulo ia Sesu ʼi te vai keli ʼo Sakopo, ʼi te faʼahi pe ʼaē neʼe nofo ai kae nātou ʼolo ʼo kumi meʼa kai, ʼe fai palalau mo te fafine Samalitana. ʼI te kaku mai ʼa te ʼu tisipulo, neʼe tuku e te fafine tana meʼa ʼutu vai, pea ʼalu ia ki te kolo.

ʼI tana fiafia ʼi te meʼa ʼaē neʼe fakahā age e Sesu kia ia neʼe ʼalu ia ʼo tala age ki te hahaʼi tagata ʼo te kolo: “Koutou ʼōmai ʼo sisio ki te tagata neʼe ina tala mai te ʼu meʼa fuli ʼaē neʼe ʼau fai.” ʼOsi ʼaia, pea ina fai age te fehuʼi ke tupu ai hanatou fia ʼiloʼi: “ ʼE mole ʼapē la ko Kilisito?” Neʼe hoko te manatu ʼaia: he neʼe ʼosi pe pea nātou ʼolo ʼo vakaʼi pe koteā.

Lolotoga te temi ʼaia, neʼe faiga te kau tisipulo ke kai e Sesu te meʼa kai ʼaē neʼe nātou ʼolo ʼo kumi mai te loto kolo. Kae koʼeni tana tali age: “ ʼE ʼi ai taku meʼa ke ʼau kai ko te meʼa kai ʼe mole koutou ʼiloʼi.”

“Neʼe kua ʼi ai ʼapē koa he tahi ia kua haʼu ʼo ʼaumai hana meʼa kai?” ko te fehufehuʼi ʼaki ʼaia ʼa te kau tisipulo. Neʼe fakamahino age e Sesu kia nātou: “Ko taku meʼa kai ko te fai ʼo te finegalo ʼo ia ʼaē neʼe ina fekauʼi mai ʼau pea mo fakaʼosi tana gāue. ʼE mole koa la koutou ʼui: ʼE kei toe pe māhina e fā, pea hoko mai te tānaki ʼo te taʼukai?” Pea ʼi tana fakatokagaʼi ia nātou ki te tānaki ʼo te taʼukai fakalaumālie, neʼe ina toe ʼui age: “Hiki ake ʼokoutou mata pea ke koutou sisio ki te ʼu gāueʼaga: kua hihina ia ki te tānaki ʼo te taʼukai. Pea kua maʼu e te tagata tānaki taʼukai tona totogi pea ʼe ina tānaki ni ʼu fua ki te maʼuli heʼegata, ke fakafiafia fakatahi ai te tagata tūtū pulapula pea mo te tagata tānaki taʼukai.”

E lagi kua sio ia Sesu ki te fua maʼuhiga ʼo tana felogoi mo te fafine Samalitana: neʼe tokolahi ia nātou neʼe tui kia Sesu ʼuhi ko te fakamatala ʼaē neʼe fai kia nātou e te fafine. Neʼe ina fakamoʼoni fēnei age ki te ʼu hahaʼi ʼo te kolo: “Neʼe ina tala mai te ʼu meʼa fuli ʼaē neʼe ʼau fai.” Koia ʼi te ʼōmai ʼa te hahaʼi tagata ʼo Sisale kia Sesu ʼi te vai keli, neʼe nātou kole age ki ai ke nofo muʼa mo nātou ʼo fakamahino age he tahi ʼu meʼa. Neʼe tali e Sesu te fakaafe ʼaia pea neʼe nofo ia mo nātou ʼo ʼaho lua.

ʼI te fakalogo ʼa te kau Samalitana kia Sesu, neʼe tokolahi ia nātou neʼe nātou tui kia te ia. Koia neʼe nātou ʼui age ai ki te fafine: “ ʼE mole kei gata ʼaki pe tau ʼu palalau ʼaē ʼe mātou tui ai, heʼe kua mātou logo totonu kia te ia pea kua mātou ʼiloʼi ko te tagata nei ʼe ko te fakamaʼuli moʼoni ʼo te malamanei.” ʼE tuku mai kia tatou e te fafine Samalitana ʼaia te faʼifaʼitaki lelei ʼo ʼuhiga mo te fai faka mafola ʼaē kia Kilisito, ʼo ina uga te loto fia ʼiloʼi ʼo te hahaʼi ke nātou faiga ke lahi age hanatou ʼiloʼi te ʼu meʼa.

Koutou manatuʼi ko te ʼu meʼa ʼaenī neʼe hoko fakatomuʼa ia māhina e fā ʼi muʼa atu ʼo te tānaki ʼo te taʼukai — e lagi ko te taʼukai ʼo te olose, ʼaē ʼi Palesitina ʼe tānaki ʼi te fasiga taʼu mātala ʼo te taʼu. ʼE feala ke tou ʼui ai ko te ʼu meʼa ʼaia neʼe hoko ʼi novepeli peʼe ko tesepeli. ʼO mahino ai kia tatou neʼe nofo ia Sesu mo tana kau tisipulo ia lagi māhina e valu ʼi Sutea ʼi te ʼosi ʼo te Pāsikate ʼo te taʼu 30, ʼo fai akonaki pea mo fai papitema ai. Ko te temi leva ʼaē, ʼe nātou toe liliu ai ki tonatou fenua, ki Kalilea. Koteā te meʼa ka hoko kia nātou ʼi ai? Soane 4:3-43.

▪ He koʼe neʼe punamaʼuli te fafine Samalitana ʼi te palalau age ʼaē ʼa Sesu?

▪ Koteā te ʼui age ʼa Sesu ʼo ʼuhiga mo te vai maʼuli pea mo te potu ʼaē ʼe tonu ke fai ai te atolasio?

▪ Neʼe feafeaʼi te fakahā age e Sesu pe ko ai ia ia, pea koteā ʼaē ʼe fakaofoofo ai te fakahā ʼaia?

▪ Koteā te fakamatala ʼaē neʼe fai e te fafine Samalitana, pea neʼe koteā tona fua?

▪ Koteā te faka felogoi ʼo te meʼa kai ʼa Sesu pea mo te tānaki ʼo te taʼukai?

▪ ʼE feala feafeaʼi hatatou ʼiloʼi te fualoa ʼo te minisitelio ʼo Sesu ʼi Sutea ʼi te hili ʼo te Pāsikate ʼo te taʼu 30?