Kapite 24

Te Tupuʼaga ʼo Te Haʼu ʼa Sesu Ki Te Kele

ʼI KAPENAUME mo tana ʼu tisipulo ʼaē e fā, neʼe lahi te ʼu meʼa neʼe fai e Sesu ʼi te ʼaho ʼaia, pea ʼi te afiafi ʼaia, neʼe ʼaumai e te hahaʼi ʼo te kolo tanatou ʼu mahaki fuli kia te ia ke ina fakamālōlō ia nātou. Neʼe mole maʼu hona kiʼi temi ke nofo tokotahi ai muʼa.

ʼI te ʼala uhu ake, ʼi te uhu ʼosi. Ka kei hegihegi, neʼe tuʼu ia Sesu ʼo ʼalu tokotahi. Neʼe ʼalu ki te koga meʼa lāvaki ʼe feala ai hana faikole ki tana Tāmai. Kae neʼe mole fualoa tana nofo tokotahi; heʼe, ʼi te sio ʼaē ʼa Petelo pea mo ʼihi atu kua puli ia Sesu, pea nātou ʼolo ai ʼo kumi.

ʼI tanatou maʼu ia Sesu, neʼe ʼui age e Petelo: “ ʼE kumi koe e te hahaʼi fuli.” Neʼe loto te hahaʼi ʼo Kapenaume ke nofo ia Sesu mo nātou. Neʼe nātou leleiʼia moʼoni te ʼu meʼa ʼaē neʼe ina fai maʼa nātou. Kae ko te tāfito koa ʼo te haʼu ʼa Sesu ki te kele, neʼe ko he fai pe koa ia ʼo he ʼu fakamālōlō faka milakulo ohage ko te ʼu milakulo ʼaia? Koteā tana lea ʼo ʼuhiga mo te faʼahi ʼaia?

Neʼe fakahā e te tahi ʼi te ʼu Evaselio, ko tana tali age ʼaenī ki tana ʼu tisipulo: “Tou ʼolo ki he tahi potu, ki te ʼu kolo ʼe ōvi mai, koteʼuhi ke ʼau toe fai faka mafola ai, heʼe ko te tupuʼaga ʼaia ʼo taku haʼu.” Logope te fakakinau ʼa te hahaʼi ke nofo mo nātou, neʼe fakamahino age e Sesu: “ ʼE tonu ke ʼau toe faka mafola te logo lelei ʼo te puleʼaga ʼo te ʼAtua ki ʼihi kolo, heʼe ko te tupuʼaga ʼaia ʼo taku haʼu ki tuʼa.”

ʼIo, neʼe haʼu ia Sesu ki te kele ko tona tupuʼaga tāfito ʼaenī ko te faka mafola ʼo te Puleʼaga ʼaē ka ina faka lākatonuʼi anai te huafa ʼo tana Tāmai pea mo pulihi ʼosi te ʼu mamahi ʼe tau mo te malamanei. Kae, moʼo fakamoʼoni foki neʼe fekauʼi mai e te ʼAtua, neʼe ina fai ai te ʼu fakamālōlō faka milakulo. ʼI te ʼu sēkulō ki muʼa atu, neʼe toe fai foki e Moisese te ʼu milakulo moʼo fakamoʼoni ko ia ko te tagata faifekau ʼa te ʼAtua.

ʼI te mavae ʼa Sesu ʼi Kapenaume ke ʼalu ʼo fai faka mafola ʼi ʼihi ʼatu kolo, ko tana ʼu tisipulo ʼaē e fā, ia Petelo pea mo tona tēhina ko Atelea mo Soane pea mo tona tēhina ko Sake, neʼe nātou ʼolo mo ia. E lagi koutou manatuʼi ko te vāhaʼa ʼaē kua hili neʼe fakaafe ia nātou e Sesu ke nātou liliu ko tana ʼu ʼuluaki tagata kaugā gāue pea mo kaugā fagona.

Kia Sesu pea mo tana ʼu tisipulo e fā, ko tanatou fai faka mafola ʼaē ʼi Kalilea neʼe lava lelei ia. Ko te talanoa ʼo ʼuhiga mo tana ʼu gāue neʼe aʼu ki te ʼu faʼahi fuli ʼo Silia. Neʼe tokolahi ʼaupito te ʼu hahaʼi neʼe ʼōmai mai Kalilea, mai Sutea pea mo te tahi ʼatu kauvai ʼo Solotane ʼo muli ia Sesu pea mo tana ʼu tisipulo. Maleko 1:35-39; Luka 4:42, 43; Mateo 4:23-25; Ekesote 4:1-9, 30, 31.

▪ Koteā te meʼa ʼaē neʼe fai e Sesu ka kei hegihegi, ʼi te ʼala uhu ake ʼo tana gāue ʼaho katoa ʼi Kapenaume?

▪ Koteā ʼaē neʼe fekauʼi mai ai ia Sesu ki te kele, pea koteā te tupuʼaga ʼo tana fai te ʼu milakulo?

▪ Ko ai koa ʼaē neʼe muli ia Sesu ʼi tana fai faka mafola ʼi Kalilea, pea koteā te fua ʼo te gāue ʼaia?