Kua Feala Te Fakatuʼuake ʼo Te Kau Mate ʼAki Te Totogi

ʼI te ʼAho Fakamanatu, ʼe tou maʼu ai te faigamalie ke tou iloʼi te ʼu tapuakina ʼe feala ke tou maʼu ʼaki te sakilifisio ʼo Sesu, ohage la ko te fakatuʼuake ʼo te kau mate. Neʼe mole he temi neʼe loto e Sehova ke mate te tagata. Koia ʼae ka mate he tahi neʼe tou ʼofa mamahi ai, ʼe ko he kafo ki te tagata. (1Ko 15:26) Neʼe lotomamahi ia Sesu ʼi tana sio ki te fetagihi ʼo ʼana tisipulo ʼi te mate ʼo Lasalo. (Soa 11:33-35) ʼUhi ʼae ko Sesu ko he fakata haohaoa ʼaia ʼo tana Tamai, ʼe tou tui papau ai ko Sehova ʼe toe lotomamahi ʼi tana sio ifo ki ʼotatou mamahi moka mate he tahi ʼe tou ʼoʼofa mamahi ai. (Soa 14:7) ʼE fakaʼamu ia Sehova ki te temi ʼae ka ina fakatuʼuake anai ʼana kaugana, ʼo toe feia pe mo tatou.—Sopo 14:14, 15.

Ko Sehova ko te ʼAtua ʼo te tokalelei. Koia, ʼe tou tui ai ʼe ina fakatuʼutuʼu lelei anai te fakatuʼuake ʼo te kau mate. (1Ko 14:33, 40) ʼE mole tou toe fai ʼavaifo anai kaʼe ʼe tou fakatalitali anai natou ʼae ka fakatuʼuake. ʼE ke metitasio koa ki te fakatuʼuake ʼo te kau mate, tafitō la ʼi te ʼu temi ʼae ʼe ke mamahi ai? (2Ko 4:17, 18) ʼE ke lotofakafetaʼi koa kia Sehova ʼi tana foaki te totogi pea mo fakaha mai ʼi te Tohi-Tapu ʼe ina fakatuʼuake anai te kau mate?—Kol 3:15.

• Ko ai ʼi ʼou kaumeʼa mo ʼou famili kua ke fakaʼamu ke ke toe sio ki ai?

• Ko ai te ʼu tagata mo te ʼu fafine ʼo te Tohi-Tapu ʼe ke fia felaveʼi mo faipalalau mo ia?