ʼE Kei Feala Koa Te Akoʼi ʼo Te Aga ʼAē ʼe Lelei Ki Te ʼu Fānau?
“ ʼE TOU maʼuʼuli ʼi te temi nei ʼi he sosiete ʼe faigataʼa, ʼe fefioʼaki ai te ʼu agaʼi fenua kehekehe, pea ʼe mole kei maʼu he fakatuʼutuʼu e tahi ʼo ʼuhiga mo te aga ʼaē ʼe tonu ke fai,” ko te ʼui ʼaia ʼo Robert Glossop ʼo te Institut Vanier ki te Famili, ʼi Ottawa, Kanata. Koteā tona fua? ʼE ʼui fēnei e te tānaki, ʼi te sulunale The Toronto Star: “Ko te faitama ʼo te kau taʼahine ʼaē kei finemui, mo te agamālohi ʼo te kau tūpulaga pea mo te fakamate, ko te ʼu meʼa fuli ʼaia ʼe tuputupu.”
ʼE mole hoko pe te fihifihia ʼaia ʼi te Potu Tokelau ʼo Amelika. Ko Bill Damon, te pule ʼo te Fale ʼo te Développement Humain, ʼi te Univelesitē Brown ʼi Rhode Island, ʼi Amelika, neʼe ina vakavakaʼi te ʼu fihifihia ʼaia ʼi Pilitania, pea mo te tahi ʼu fenua ʼo te Eulopa, pea mo Ositalalia, mo Iselaele, pea mo Saponia. Neʼe ina fakahā te mole kei feala ʼaē ke takitaki te kau tūpulaga e te lotu, mo te ʼu faleako, pea mo te tahi ʼu kautahi. ʼI tana manatu, ko tatatou agaʼi fenua “ ʼe mole tokaga ia ki te ʼu meʼa ʼaē ʼe ʼaoga ki te kau tūpulaga moʼo faʼufaʼu tonatou agaaga pea mo tonatou poto.” ʼI tana talanoa ʼo ʼuhiga mo te kau popoto ʼi te faʼahi ʼo te ako ʼo te tamaliki, ʼaē ʼe nātou akoʼi ko “te akonaki ʼe fakatupu lotolotolua ki te maʼuli lelei ʼo te fānau,” ʼe ʼui e Damon ko te faʼahi ʼaia ʼe ko “he faʼahiga fai moʼo taupau ʼo he ʼu fānau logogataʼa pea mo talagataʼa.”
Koteā ʼaē ʼe ʼaoga ki te kau tūpulaga ia ʼaho nei? ʼE ʼaoga tuʼumaʼu kia nātou he ako ʼe fonu ʼi te ʼofa, ʼe ina fakatonutonuʼi te ʼatamai pea mo te loto. ʼE kehekehe te kau tūpulaga, pea ʼe ʼaoga kia nātou he ʼu faʼahiga akonaki kehekehe. ʼI te agamāhani, kapau ʼe fai ʼaki te ʼofa, pea ʼe feala ke fai te akonaki ʼaki he uga ʼo te tamasiʼi ke fakakaukau. Ko te tupuʼaga la ʼaia ʼo te ʼui fēnei mai ia Tāʼaga Lea 8:33 ke “[tou] fakalogo ki te akonaki.” Kae ko ʼihi ʼe mole “fakatonutonuʼi ʼaki pe he ʼu palalau.” Kia nātou, ʼe lagi ʼaoga anai ke fai te fakatūʼa ʼaē ʼe ʼaoga kiai, ʼuhi ko tanatou talagataʼa, kae ʼe fai ʼaki he fakapotopoto. (Tāʼaga Lea 17:10; 23:13, 14; 29:19) ʼI tana foaki ia te tokoni ʼaia, ʼe mahino ia ʼe mole tali e te Tohi-Tapu te ʼu tā ʼaē ʼe fai ʼaki te ʼita, pe ko te tā fakavale ʼo te fānau, heʼe feala ke nātou lāvevea ai pea mo lotomamahi ai. (Tāʼaga Lea 16:32) Kae ʼe tonu ke mahino ki te fānau te tupuʼaga ʼo tonatou akonakiʼi pea mo nātou logoʼi ʼe ʼofa moʼoni tanatou ʼu mātuʼa kia nātou.—Vakaʼi ia Hepeleo 12:6, 11.
Ko te ʼu tokoni ʼaoga ʼaia mo loloto ʼa te Tohi-Tapu, ʼe fakahā lelei ʼi te tohi Le secret du bonheur familial.