Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
VAHAʼA ʼO TE ʼAHO 4-10 ʼO TESEPELI
TE ʼU KOLOA ʼO TE TOHI-TAPU | SOFONI 1–AKESEO 2
“Kotou Kumi Ia Sehova ʼi Muʼa ʼo Te ʼAho ʼo Tona Hauhau”
(Sofoni 2:2, 3) I mua o te fakahoko o te fakatotonu, pea mo te fakalaka o te aho aia o hage ko te penui fulumeto, ia mua o te to o te hauhau kakaha o te Eteleno kia koutou, ia mua o te to o te aho o te hauhau o te Eteleno kia koutou! 3 Koutou kumi te Eteleno, koutou fuli, kau agamalu o te fenua, ae e natou fai ana fakatotonu! Koutou kumi te faitotonu, koutou kumi te fakamalalo! Lagi e fakamauli anai koutou i te aho o te hauhau o te Eteleno.
Kotou Kumi Ia Sehova ʼi Muʼa ʼo Te ʼAho ʼo Tona Hauhau
5 ʼE feala ke koutou ʼui fēnei: ‘Kua ʼau foaki toku maʼuli kia Sehova, ko ʼau ko te kaugana ʼa te ʼAtua kua papitema, ko he Fakamoʼoni ʼa Sehova. ’E mole he’eki ’au fai koa la te ’u meʼa ʼaē ’e fakama’ua mai?’ ’I tona ʼuhiga mo’oni, ’e mole gata pe ki tatatou foaki ʼo totatou maʼuli kia Sehova. Ko Iselaele neʼe ko he puleʼaga kua foaki ki te ʼAtua, kae ʼi te temi ʼo Sofonia neʼe mole kei nātou fakaʼapaʼapa ki tanatou kua foaki ʼo tonatou maʼuli kia Sehova. Koia, neʼe līaki te puleʼaga ki muli age. Ko te ‘kumi ʼo Sehova’ ia ʼaho nei ko tona faka ʼuhiga ke tou maʼu pea mo taupau he ʼu felogoi lelei mo ia, ʼo tou gāue tahi mo tana kautahi ʼaē ʼi te kele. Ko tona faka ʼuhiga ke tou ʼiloʼi te manatu ʼa te ʼAtua pea mo te ʼu meʼa ʼaē ʼe loto kiai. ʼE tou kumi ia Sehova mokā tou ako fakalelei tana Folafola, mo tou metitasioʼi, pea mo maʼuliʼi tana ʼu tokoni. Kapau ʼe tou toe kumi te takitaki ʼa Sehova ʼi te faikole pea mo fakalogo ki te takitaki ʼo tona laumālie maʼoniʼoni, pea ʼe loloto anai tatatou ʼu felogoi mo ia, pea ʼe uga ai anai tatou ke tou tauhi kia te ia ‘ ʼaki totatou loto katoa, mo totatou nefesi katoa, pea mo totatou mālohi katoa.’—Teutalonome 6:5; Kalate 5:22-25; Filipe 4:6, 7; Apokalipesi 4:11.
6 Ko te lua puani ʼaē ʼe tuʼu ia Sofonia 2:3, ke tou “kumi te faitotonu.” Tokolahi ia tatou neʼe tou fai he ʼu fetogi lahi ke feala hatatou papitema, kae ʼe tonu ke tou lagolago tuʼumaʼu ʼi totatou maʼuli ki te ʼu lekula faitotonu ʼa te ʼAtua. Ko ʼihi ʼaē neʼe nātou kamata lelei te faʼahi ʼaia, neʼe nātou tuku ke ʼulihi nātou e te ʼu aga heʼemaʼa ʼo te mālama. ʼE mole faigafua te kumi ʼo te faitotonu, he ko te hahaʼi tokolahi ʼe nātou manatu ʼe ko he meʼa noa te ʼu felāveʼi fakasino heʼeʼaoga, mo te loi pea mo te tahi ʼu agahala. Kae ko tatatou lotomālohi ʼaē ke tou fakafiafia ia Sehova, ʼe feala ke ina tāʼofi tatatou fia kaumeʼa pea mo tatatou fia faifaitahi mo te mālama. Neʼe mole kei maʼu e Suta te ʼofa ʼa te ʼAtua he neʼe ina faʼifaʼitakiʼi te ʼu puleʼaga pagani ʼi ʼona ʼu tafa. ʼAua naʼa tou faʼifaʼitakiʼi te mālama, kae ke tou liliu ko he ʼu “faifaitaki o te Atua,” ʼo tou “kofu ki te tagata foou nee fakatupu o fai ki te Atua i te susitisia mo te maonioni o te mooni.”—Efeso 4:24; 5:1.
7 Ko te tolu puani ʼaē ʼe tuʼu ia Sofonia 2:3, kapau ʼe tou loto ke fufū tatou ʼi te ʼaho ʼo te hāūhāū ʼo Sehova, pea ʼe tonu ke tou “kumi te agavaivai.” ʼI te ʼaho fuli pe, ʼe tou felāveʼi mo ni hahaʼi tagata, mo fafine, pea mo he kau tūpulaga ʼe mole agavaivai. ’I tanatou manatu, ’e ko he mele mokā kita agamālū. ’E nātou ʼui ’e kita vaivai mo kapau ʼe kita fakalogo ki he tahi. ʼE nātou aga fefeka, mo manatu pe kia nātou, mo nātou faiga ke tuʼu tanatou tonu, ’o nātou tui ko te ’u meʼa ʼaē ’e tonu ke nātou fai pea mo te ʼu meʼa ’aē ’e nātou leleiʼia, ’e tonu ke tali e te hahaʼi tatau aipe pe koteā anai tona ʼu fua. ʼI meʼa kovi leva mo kapau ʼe tou maʼu te ʼu aga ʼaia! ’I te temi ʼaenī ʼe tonu ke tou “kumi te agavaivai.” ’O feafea’i? ’O tou fakalogo ki te ʼAtua, mo tou tali ’aki he agavaivai ke ina fakatonutonuʼi tatou pea mo tou mulimuli ki tona finegalo.
Kumi Te ʼu Koloa ʼi Te Tohi-Tapu
(Sofoni 1:8) I te aho o te sakilifisio a te Eteleno, e au tauteai anai te u aliki mo te u foha o te hau, pea mo natou fuli ae e natou kofu ki ni kofu matapule.
Ko He ʼu Puani ʼAoga ʼo Te ʼu Tohi ʼa Naume, Mo Hapakuke, Pea Mo Sofonia
1:8. Ko ʼihi ʼi te temi ʼo Sofonia neʼe natou kumi ke tali nātou e te ʼu puleʼaga ʼi ʼonatou tafaʼaki, ʼo natou “ ʼai te ʼu kofu ʼo te kau matāpule.” Iā ʼaho nei, ʼe mole ko he aga fakapotopoto anai ki te ʼu ’atolasio ʼa Sehova mo kapau ʼe natou faiga ke natou mulimuli ki te mālamanei ʼo natou fai te aga ʼaia!
(Akeseo 2:9) E lahi age anai te kololia o te fale fakamuli aeni i te kololia o te uluaki fale, e ui e te Eteleno o te atu fua tau; pea ko te kogamea aeni e au tuku ai anai te tokalelei, e ui e te Eteleno o te atu fua tau.
Ko He ʼu Puani ʼAoga ʼo Te ʼu Tohi ʼa Akeseo Mo Sakalia
2:9—Ko te ʼu faʼahi fea ʼaē ʼe feala ai ki ‘te kolōlia ʼo te fale fakamuli ke liliu ʼo lahi age [ʼi te kolōlia ʼo] te fale ʼāfea’? ʼE feala ke tou talanoa kiā faʼahi e tolu: te temi fualoa ʼaē neʼe tuʼu ai te fale lotu, te faiakonaki ai ʼo te Tagata Faiako ʼaē ʼe lahi tokotahi, pea mo nātou ʼaē neʼe hū kiai moʼo tauhi kiā Sehova. Logolā neʼe tuʼu te fale lotu faka kolōlia ʼa Salomone iā taʼu e 420, mai te taʼu 1027 ʼi muʼa ʼo totatou temi ʼo aʼu ki te taʼu 607 ʼi muʼa ʼo totatou temi, ko te “fale fakamuli” neʼe tuʼu iā taʼu e 580 tupu, mai te fakaʼosi ʼo tana laga ʼi te taʼu 515 ʼi muʼa ʼo totatou temi ʼo aʼu ki tona fakaʼauha ʼi te taʼu 70 ʼo totatou temi. Tahi ʼaē meʼa, ko te Mēsia, ia Sesu Kilisito, neʼe faiakonaki ʼi te “fale fakamuli,” pea neʼe kaugamālie age te hahaʼi ʼaē neʼe hū kiai ʼi te fale “ ʼāfea” moʼo tauhi ki te ʼAtua.—Gāue 2:1-11.
Lau ʼo Te Tohi-Tapu
(Akeseo 2:1-14) I te aho uafulu ma tahi o te mahina fitu, nee fakaha leva te folafola a te Eteleno ia Akeseo, te polofeta, o ui: 2 Palalau kia Solopapele, foha o Saletiele, te kovana o Suta, mo Sosue, foha o Sotesatake, te tagata faisakilifisio lahi, pea mo te toega o te hahai, o ui kia natou: 3 Pe e i ai he tahi ia koutou ae kei mauli nee sio ki te fale aeni i tona kololia uluaki? Pea kotea te mea kua kotou sio ki ai i te aho nei? I tana tuu aeni, pe e mole hage ia ia kia koutou ko he mea noa? 4 I te temi nei ke ke lotomalohi, Solopapele! E folafola te Eteleno. Ke ke lotomalohi, Sosue, foha o Sotesatake, pule faisakilifisio! Ke ke lotomalohi hahai katoa o te fenua! E ui e te Eteleno. Pea ke koutou gaue! Koteuhi e au nofo mo koutou. 5 E au agatonu ki te hai ae nee au fai mo koutou i te aho ae nee koutou mavae ai mai Esipito, pea e nofo toku Laumalie i lotomalie o koutou; aua naa kotou matataku! 6 Koteuhi e folafola te Eteleno o te atu fua tau: Kei toe pe he kii temi siisii, pea e au luui anai te atu lagi mo te kele, te tai mo te kele magemage. 7 E au luui anai te atu puleaga fuli; e aumai anai te u koloa o te atu puleaga fuli, pea e au fakafonu anai ki te kololia te fale aeni, e ui e te Eteleno. 8 A aku te paaga, pea a aku te aulo, e ui e te Eteleno o te atu fua tau. 9 E lahi age anai te kololia o te fale fakamuli aeni i te kololia o te uluaki fale, e ui e te Eteleno o te atu fua tau; pea ko te kogamea aeni e au tuku ai anai te tokalelei, e ui e te Eteleno o te atu fua tau. 10 I te aho uafulu ma fa o te mahina hiva, i te lua tau o Taliusi, nee fakaha leva te folafola a te Eteleno ia Akeseo, te polofeta, o ui: 11 E folafola te Eteleno o te atu fua tau: Fai ki te kau faisakilifisio te fehui aeni o uhiga mo te lao: 12 Kapau e ave anai e he tahi i te tapatapa o tona kofu he inasi kua fakatapui, pea e lave anai tona kofu ki he pane, mo ni meakai, mo he vino, mo he lolo, pee ko he tahi age meakai, pe e liliu anai te u mea aia o maonioni? Pea nee tali leva te kau faisakilifisio: Kailoa! 13 Pea nee ui leva Akeseo: Kapau kua uli he tagata o tupu ko he mate, pea e ina fafa ki te u mea fuli aia, pe e uli anai te u mea aia? Nee tali leva te kau faisakilifisio: Ei, e natou uli anai. 14 Pea nee toe palalau leva ia Akeseo, o ui: Ko te aluaga aia o te hahai aeni, ko te aluaga aia o te puleaga aeni i oku mua, e ui e te Eteleno, ko te aluaga aia o te u gaue fuli o onatou nima; ko te mea ae e natou momoli mai kia au e uli.
VAHAʼA ʼO TE ʼAHO 11-17 ʼO TESEPELI
TE ʼU KOLOA ʼO TE TOHI-TAPU | SAKALIA 1-8
“Kotou Puke Te Kofu ʼo Te Tagata Sutea”
(Sakalia 8:20-22) E folafola te Eteleno o te atu fua tau, o ui: E toe omai anai ni hahai kaugamalie mo ni ihi ae nee nonofo i ni kolo kehekehe. 21 E olo anai ni hahai o he tahi kolo ki he tahi ake kolo, o ui: Tou olo o faikole ki te Eteleno pea mo kumi te Eteleno o te atu fua tau! E matou olo anai foki. 22 Pea e omai anai ni hahai kaugamalie mo ni puleaga kaugamalie o kumi te Eteleno o te atu fua tau i Selusalemi mo faikole ki te Eteleno.
“ ʼI Te Temi Nei Ko Koutou Ko Te Hahaʼi ʼa Te ʼAtua”
14 Kua fualoa ki ai, neʼe fakakikite e te kau polofeta ʼe tokolahi anai ia natou ʼe natou fia tauhi mo tana hahaʼi kia Sehova ʼi te ʼu temi fakaʼosi ʼaeni. Neʼe fakakikite fenei e Esaia: “E olo anai ki ai ni hahai toko lahi pea e natou ui anai: ‘Koutou omai, pea ke tou hahake fakatahi ki te mouga o [Sehova], ki te fale o te Atua o Sakopo, o tupu ke ina ako mai kia tatou ona ala, pea ke tou haele i ona ala liliki.’ Koteuhi e hau anai mai Sione te lao, pea mai Selusalemi te folafola a [Sehova].” (Esaia 2:2,3) Neʼe fakakikite e Sakalia “e omai anai ni hahai kaugamalie mo ni puleaga kaugamalie o kumi [Sehova] o te atu fua tau i Selusalemi mo faikole [kia Sehova].” Ko te kutuga ʼaia ʼe ʼomai anai “mai te u lea kehekehe fuli o te atu puleaga.” ʼE natou tauhi anai ki te ʼAtua ʼi te lotolotoiga ʼo te Iselaele fakalaumalie pea ʼe ina ui fenei: “E matou olo anai mo [koutou], koteuhi kua matou iloi e nofo te Atua mo koutou.”—Sakalia 8:20-23.
(Sakalia 8:23) Koia e folafola te Eteleno o te atu fua tau, o ui: I te u aho aia, e too anai e ni tagata e toko hogofulu mai te u lea kehekehe fuli o te atu puleaga he tagata Sutea e toko tahi i te tapatapa o tona kofu, o ui: E matou olo anai mo koe, koteuhi kua matou iloi e nofo te Atua mo koutou.
“E Matou Fia Olo Mo Koutou”
4 Kapau ʼe mole feala ke iloʼi te ʼu higoa fuli ʼo te kau fakanofo ʼae ʼe kei maʼuʼuli ʼi te kele, ʼe “olo” feafeaʼi anai te tahi ʼu ovi mo natou? ʼE ui ʼi te Tohi-Tapu ko te ʼu “tagata ʼe toko hogofulu,” “ ʼe natou puke anai te tapaʼi kofu ʼo te tagata Sutea, ʼo natou ui fenei: ‘ ʼE matou fia olo mo koutou, koteʼuhi neʼe matou logo ko te ʼAtua ʼe nofo mo koutou.’ ” ʼE moʼoni, ʼe talanoa te vaega ki te tagata Sutea ʼe tokotahi, kaʼe ʼi te ui ʼae “koutou,” ʼe fakaʼuhiga ia ki he tokolahi. Koia ko te tagata Sutea ʼe mole fakaʼuhiga pe ki te tokotahi, kaʼe ʼe ina fakata te kiʼi kutuga ʼo te kau fakanofo fuli. ʼE iloʼi te aluʼaga ʼaia e te tahi ʼu ovi pea ʼe natou tauhi fakatahi mo te kiʼi kutuga ʼaia kia Sehova. ʼE mole ʼaoga ke natou iloʼi te ʼu higoa fuli ʼo te kau fakanofo. Pea ʼe mole ʼaoga ke natou muliʼi te kau fakanofo takitokotahi. Koteʼuhi ko totatou Takitaki, ko Sesu pea ʼe ui ʼi te Tohi-Tapu ʼe tonu ke tou muliʼi ia ia tokotahi pe.—Mat 23:10.
ʼE Natou “Haga Muliʼi Te ʼAkeno”
14 ʼE fakaʼuhiga e Sesu Kilisito ia te lagolago agatonu ʼaē ʼe foaki ki tona ʼu tehina ohagē ko he lagolago ʼe fai age kiā te ia. (Lau ia Mateo 25:40.) Kae ʼe feafeaʼi kiā nātou ʼaē ʼe natou maʼu ia te ʼamanaki ʼaē ke natou māʼuʼuli ʼi te kele, ia hanatou lava lagolago ki te ʼu tehina ʼo Kilisito ʼaē neʼe fakanofo ʼaki te laumālie māʼoniʼoni? ʼE natou fai tāfito ia te faʼahi ʼaia ʼaki tanatou tokoni ʼaē kiā nātou ʼi te fakamafola ʼo te logo lelei ʼo te Puleʼaga. (Mat. 24:14; Soa. 14:12) ʼE hifohifo ia te kaugamālie ʼo te kau fakanofo ʼi te ʼu taʼu e hogofulu ʼaenī kua hili, kae kua tuputupu ake ia te kaugamālie ʼo te tahi ʼu ovi. ʼI te temi ʼaē ʼe kau ai ki te gāue fai fakamafola ia nātou ʼaē ʼe ʼamanaki māʼuʼuli ʼi te kele, pea mo natou gāue ko he kau fai fakamafola ʼo te evaselio temi kātoa mokā natou fealagia, ʼe natou lagolago kiā nātou ʼaē neʼe fakanofo ʼaki te laumālie māʼoniʼoni, ʼi te fakahoko ʼo te gāue ʼaē ko te fai ʼo he ʼu tisipulo. (Mat. 28:19,20) ʼAua naʼa galo kiā tātou ia te ʼu faigamālie ʼaē ke tou lagolago ki te gāue ʼaia ʼaki hatatou foaki ia he ʼu meʼa ʼofa fakapaʼaga ʼi he ʼu ʼaluʼaga kehekehe.
Kumi Te ʼu Koloa ʼi Te Tohi-Tapu
(Sakalia 5:6-11) Nee au tali leva: Kotea? Pea nee ina ui mai leva: Ko te kulo aena. Pea nee ina toe ui leva: Ko te kulo aena kua tanaki ai te u agahala o te fenua katoa. 7 Pea koeni, nee malaga ake leva he potu pulu mamafa ae nee tapunu aki ai te kulo, pea nee au sio leva ki he fafine ae nee lala i lotomalie o te kulo. 8 Pea nee ui mai leva e te aselo kia au: Ko te agakovi aia. Pea nee ina humuki leva te fafine ki te loto kulo, pea nee ina si leva ki te gutu o te kulo te potu pulu mamafa. 9 Nee au hiki ake leva oku mata, pea nee au sio leva: Koeni, nee ha mai leva ni fafine e toko lua ae nee felelei i te matagi. Koteuhi nee i ai ni ona pakakau o hage ko te u pakakau o te motuku. Nee na too leva te kulo o ave ki te vaha o te kele mo te lagi. 10 Nee au ui leva ki te aselo ae nee palalau mai kia au: E na ave leva ki fea te kulo? 11 Nee ina tali mai leva kia au: E na olo o fakatuu he fale kia ia i te fenua o Sinea; pea ka osi anai ia ia, e na hili anai te kulo ki tona tuuaga.
ʼE Malave Feafeaʼi Kia Koe Te ʼu Aluʼaga ʼAe Neʼe Ha Kia Sakalia?
18 Neʼe toe fakamanatuʼi e te aluʼaga ʼaia ki te kau Sutea, neʼe tonu foki ke natou toe taupau ke maʼa ia tanatou tauhi. Pea ʼe mole toe feala anai ke nofo te agakovi ʼi te lotolotoiga ʼo te hahaʼi ʼa te ʼAtua. Ia ʼaho nei, neʼe taki mai tatou e Sehova ki tana kautahi maʼa, ʼae ʼe tou logoʼi ai ia te ʼofa pea mo totatou puipui. Koia, tou faigaʼi takitokotahi ke tou taupau ke maʼa ia tana kautahi. ʼE mole tonu ke toe maʼu te agakovi ʼi te lotolotoiga ʼo te hahaʼi ʼa Sehova.
(Sakalia 6:1) Nee au toe hiki ake leva oku mata,o sio, pea koeni, nee ulu leva ni saliote e fa mai te vaha o te u mouga e lua; pea ko te u mouga ko ni mouga sila.
ʼE Haofaki Koe e Te ʼu Saliote Pea Mo Te Kolona Fakahau
7 ʼI te Tohi-Tapu, ko te ʼu moʼuga ʼe feala ke fakaʼuhiga ki te ʼu puleʼaga. ʼE hage te ʼu moʼuga ʼae neʼe sio ki ai ia Sakalia ko te ʼu moʼuga ʼe lua ʼae ʼe talanoa ki ai te lea fakapolofeta ʼa Taniela. ʼE fakaʼuhiga te tahi ʼi te ʼu moʼuga ʼaia ki te pule faʼitaliha ʼa Sehova pea mo tana pule ki te heʼe gata. Pea ʼe fakaʼuhiga te tahi ki te Puleʼaga Fakamesia mo tona Hau ko Sesu. (Taniela 2:35, 45) Talu mai te taʼu 1914, ʼi te temi ʼae neʼe kamata ʼafio ai ia Sesu, ʼe maʼu e te ʼu moʼuga ʼaia ʼe lua ia he gaue makehe ʼi te fakahoko ʼo te finegalo ʼo te ʼAtua ʼi te kele.
8 He koʼe ʼe kapa ia te ʼu moʼuga? Ko te kapa ʼe maʼuhiga ʼaupito pea ʼe gigila. Koia, neʼe ui ai e Sehova ki te kau Iselaele ke natou laga te tapenakulo ʼaki te kapa, ʼo toe feia ki te fale lotu ʼi Selusalemi ki muli age. (Ekesote 27:1-3; 1 Hau 7:13-16) Ko te kapa ʼo te ʼu moʼuga ʼaia ʼe ina fakaha te lelei tukupau ʼo te pule faʼitaliha ʼa Sehova pea mo te Puleʼaga Fakamesia, ʼae ka ina ʼaumai anai te maʼuli fimalie mo he ʼu tapuakina.
Lau ʼo Te Tohi-Tapu
(Sakalia 8:14-23) Koteuhi e folafola te Eteleno o te atu fua tau, o ui: Nee au manatu ke tuku koutou ki te malaia, o tupu ko akoutou tamai ae nee natou fakatupu toku hauhau, pea ke aua naa au toe maliu mai taku manatu aia, 15 kae i te aho nei, kua au fakakaukau ke au fai he mea lelei ki Selusalemi mo te fale o Suta. Aua naa koutou matataku! 16 E folafola te Eteleno, o ui: Koeni te mea ae e tonu ke koutou fai: Koutou tahi fakaha te mooni ki tona oloi; koutou fakamaau o mulimuli ki te mooni, ke mau te tokalelei; 17 aua naa mau e he tahi i tona loto he manatu kovi ki tona oloi, pea ke aua naa koutou fakamooni loi, koteuhi e au fakalialia ki te u mea fuli aena. 18 Nee fakaha leva te folafola a te Eteleno o te atu fua tau kia au, o ui: 19 E folafola te Eteleno o te atu fua tau, o ui: E liliu anai te sesunio o te fa mahina, mo te sesunio o te fitu mahina, pea mo te sesunio o te hogofulu mahina ki te fale o Suta ko ni aho lalahi mo ni aho fiafia, ko ni aho fonu i te fiafia mo ni fakafiafia. Kae ke koutou ofa ki te mooni mo te tokalelei. 20 E folafola te Eteleno o te atu fua tau, o ui: E toe omai anai ni hahai kaugamalie mo ni ihi ae nee nonofo i ni kolo kehekehe. 21 E olo anai ni hahai o he tahi kolo ki he tahi ake kolo, o ui: Tou olo o faikole ki te Eteleno pea mo kumi te Eteleno o te atu fua tau! E matou olo anai foki. 22 Pea e omai anai ni hahai kaugamalie mo ni puleaga kaugamalie o kumi te Eteleno o te atu fua tau i Selusalemi mo faikole ki te Eteleno. 23 Koia e folafola te Eteleno o te atu fua tau, o ui: I te u aho aia, e too anai e ni tagata e toko hogofulu mai te u lea kehekehe fuli o te atu puleaga he tagata Sutea e toko tahi i te tapatapa o tona kofu, o ui: E matou olo anai mo koe, koteuhi kua matou iloi e nofo te Atua mo koutou.
VAHAʼA ʼO TE ʼAHO 18-24 ʼO TESEPELI
TE ʼU KOLOA ʼO TE TOHI-TAPU | SAKALIA 9-14
“Tou Nonofo ʼi Te Mafa ʼo Te ʼu Moʼuga”
(Sakalia 14:3, 4) E ha anai te Eteleno, pea e ina taui anai te u puleaga aena, o hage ko tana tau i te aho o te hokoga. 4 E tuu anai ona vae i te aho aia ki te mouga o Oliveto, ae e hagahaga ki Selusalemi, i te potu esite. E mafaa anai te mouga o Oliveto i lotomalie, mai te potu esite ki te potu uesite, pea e tuu anai he vaevaeliua lahi i ai: E holomuli anai he tahi vaelua o te mouga ki te potu noleto, pea ko he tahi vaelua ki te potu saute.
Tou Nonofo ʼi Te Mafa ʼo Sehova ʼAe ʼe Puipui Ai Tatou
10 Ohage ko tona ui ʼi te lea fakapolofeta, ʼi te mafaʼa ʼi lotomalie ʼo te moʼuga ʼo Oliveto, te tahi koga ki te noleto pea ko te tahi koga ki te saute, neʼe tuʼu te ʼu vaʼe ʼo Sehova ʼi te ʼu moʼuga ʼaia ʼe lua. ʼI te mafaʼa ʼaia, neʼe tupu ai “he [“mafa,” MN] lahi” ʼi te ʼu lalo vaʼe ʼo Sehova. Kotea te mafa ʼaia? ʼE ina fakata ia te puipui ʼa te ʼAtua. Ohage pe ko te puipui ʼa te hahaʼi ʼi he mafa ʼi te lotomalie ʼo he ʼu moʼuga, ʼo toe feia aipe ʼe puipui te ʼu kaugana ʼa Sehova e tana pule faʼitaliha pea mo te puleʼaga ʼo tona ʼAlo. ʼE mole fakagafua anai e Sehova ke molehi ʼi he ʼaho te tauhi maʼa. Ko ʼanafea ʼae neʼe mafaʼa ai te moʼuga ʼo Oliveto? Neʼe hoko ʼi te taʼu 1914, ʼi te kamata pule ʼa Sesu ʼi selo. ʼE toe ui ʼi te lea fakapolofeta ʼe feholaki anai te hahaʼi ʼa Sehova ki te mafa lahi ʼaia. Neʼe kamata ʼanafea te faʼahi ʼaia?
(Sakalia 14:5) E koutou feholaki anai i te vaevaeliva o oku mouga, koteuhi e alu anai te vaevaeliva o te u mouga o kaku ki Ateseli; e koutou feholaki anai o hage ko takotou feholaki i mua o te mafuike, i te temi o Osiasi, hau o Suta. Pea e hau anai te Eteleno, toku Atua, mo ana kau sagato fuli.
Tou Nonofo ʼi Te Mafa ʼo Sehova ʼAe ʼe Puipui Ai Tatou
13 Kapau ʼe tou haga nonofo agatonu kia Sehova, pea ʼe tou nonofo ai ʼi te mafa ʼo Sehova ʼae ʼe puipui ai tatou. ʼE mole fakagafua anai e Sehova mo tona ʼAlo ki he tahi pe ko he meʼa ke ina toʼo tatou mai tanā puipui. (Soa. 10:28, 29) ʼE foaki mai e Sehova te tokoni ʼae ʼe ʼaoga kia tatou ke tou agatonu ai ki tana pule faʼitaliha pea mo te puleʼaga ʼo tona ʼAlo. ʼE toe ʼaoga lahi anai kia tatou tana tokoni lolotoga te mamahi lahi ʼae ka vave hoko mai. Ko ia ʼe maʼuhiga ʼaupito, tafitō ʼi te temi nei, ke tou nonofo ʼi te mafa ʼo Sehova ʼae ʼe puipui ai tatou.
(Sakalia 14:6, 7) I te aho aia, e mole i ai anai he malama; e i ai anai he momoko lahi mo he aisi. 7 E toko tahi anai te aho aia, pea e iloi ia ia e te Eteleno toko tahi, e mole aho anai ia ia pee pouli. Kae e ha anai te malama i te afiafi.
(Sakalia 14:12) Koeni te malaia ae e taai anai ki ai e te Eteleno te hahai fuli ae nee tau leva ki Selusalemi. E pala anai onatou sino kae kei natou tutuu i onatou vae, pea e maluluku anai i te pala onatou mata i onatou pokoi mata, pea e to anai i te pala tonatou alelo i tonatou gutu.
(Sakalia 14:15) E toe taai foki e te malaia te u hosi, mo te u mule , mo te u kamelo, mo te u asino, pea mo te u manu fuli ae e mau anai i te u nofoaga solia: E tatau te malaia aena mo te malaia ake ae.
Tou Nonofo ʼi Te Mafa ʼo Sehova ʼAe ʼe Puipui Ai Tatou
15 ʼI te ʼaho ʼae ʼe tauʼi ai e Sehova ʼona fili, kotea ʼae ka hoko anai kia natou ʼae ʼe mole puipui e te ʼAtua? ʼE ui ʼi te lea fakapolofeta ʼe mole natou maʼu anai “he malama.” Ko tona fakaʼuhiga ʼe mole natou maʼu anai te ʼofa ʼo te ʼAtua. ʼE hoko atu te lea fakapolofeta ʼo ui ko “te u hosi, mo te u mule, mo te u kamelo, mo te u asino, pea mo te u manu fuli” ʼe liliu anai ʼo “aisi.” Ko tona fakaʼuhiga ko te ʼu mahafu tau fuli ʼe mole kei ʼi ai anai honatou ʼaoga. ʼE ui e Sakalia ʼe tautea anai e Sehova ʼona fili ʼaki he “malaia,” pe ko he mahaki. Ko ʼonatou mata pea mo ʼalelo ʼe “pala” anai. ʼE mole tou iloʼi pe fakaʼuhiga ki he mahaki moʼoni. Kaʼe tou iloʼi ʼe mole feala anai ke natou fai mai he meʼa ʼe kovi pe lau kovi ki te ʼAtua. (Sakl. 14:6, 7, 12, 15) Ko “te u hau o te kele, pea mo anatou fua tau” ʼe natou lagolago fuli anai kia Satana. Kaʼe tatau aipe te potu ʼo te kele ʼae ʼe natou nonofo ai, ʼe fakaʼauha anai natou. (Apk. 19:19-21) “Ko natou ae e tamatei anai e [Sehova] i te aho aia e tanaki anai mai ae potu ki ae potu o te kele.”—Sel. 25:32, 33.
Kumi Te ʼu Koloa ʼi Te Tohi-Tapu
(Sakalia 12:3) I te aho aia, e au fakaliliu anai ia Selusalemi ko he maka mamafa ki te u hahai fuli; ko natou fuli ae e natou hiki anai ia ia e lavevea anai; pea e fakatahi anai te atu puleaga fuli o te kele kia ia.
br1-WA 2007 p. 24-25 pal. 9-10
ʼE Mole Mālo Anai Te ʼu Mahafu Tau ʼAē Neʼe Faʼu Moʼo Fakafeagai Kiā Koutou
9 ʼE fakahā ʼi te lea faka polofetā ʼo Sakalia ia te tupuʼaga ʼo te fakafeagai ʼa te ʼu puleʼaga ki te kau Kilisitiano moʼoni. Kotou tokagaʼi peʼe koteā ʼaē ʼe ʼui iā Sakalia 12:3: “ ʼE hoko moʼoni anai ʼi te ʼaho ʼaia, ʼe au fakaliliu anai ia Selusalemi ko he maka mamafa maʼa te ʼu hahaʼi fuli pē.” Ko te Selusalemi fea ʼaē ʼe talanoa kiai ia te lea faka polofetā ʼaia? Ko te lea faka polofetā ʼa Sakalia ʼo ʼuhiga mo Selusalemi, ʼe faka ʼuhiga ki te “Selusalemi ʼaē ʼe ʼi selō,” ia te Puleʼaga ʼaē ʼi selō ʼaē neʼe pāui kiai ia te kau Kilisitiano fakanofo. (Hepeleo 12:22) Ko te tokosiʼi ʼi te kau maʼu tōfiga ʼaia ʼo te Puleʼaga Faka Mēsia ʼe kei māʼuʼuli ʼi te kele. ʼAki tonatou ʼu kaumeʼa, te “tahi ʼu ovi,” ʼe natou uga ia te hahaʼi ke natou fakalogo ki te Puleʼaga ʼo te ʼAtua ʼi te kei maʼu ʼo te temi. (Soane 10:16; Fakahā 11:15) Neʼe feafeaʼi ia te ʼu puleʼaga ʼi te fakaafe ʼaia? ʼE lagolago feafeaʼi ia Sehova ki tana kau ʼatolasio moʼoni iā ʼaho nei? Moʼo tali kiai, tou vakaʼi age muʼa ia te faka ʼuhiga ʼo te kāpite 12 ʼo Sakalia. ʼI tatatou fai ʼaia, ʼe tou lava tui papau ai ‘ ʼe mole he mahafu ʼe mālo anai’ ʼi te kau fakanofo ʼa te ʼAtua pea mo tonatou ʼu kaumeʼa ʼaē kua foaki tonatou maʼuli ki te ʼAtua.
10 ʼE fakahā iā Sakalia 12:3 ko te ʼu puleʼaga ʼe natou “lavelavea anai.” ʼE hoko feafeaʼi te faʼahi ʼaia? Neʼe fakatotonu e te ʼAtua ke faka mafola ia te logo lelei ʼo te Puleʼaga. ʼE maʼuhiga ki te kau Fakamoʼoni ʼa Sehova ia te maʼua ʼaē ke natou fai faka mafola. Kae ko te tala ʼaē ko te Puleʼaga ʼe ko te ʼamanaki pē ʼaia e tahi maʼa te mālamanei, kua liliu ia ko “he maka mamafa” maʼa te ʼu puleʼaga. ʼE natou faiga ke natou toʼo kehe te foʼi maka ʼaia ʼaki ia te ʼu fakafeagai ʼaē ʼe natou fai ki te kau fai faka mafola ʼo te Puleʼaga. ʼI tanatou fai ʼaia, neʼe “lavelavea” ia te ʼu puleʼaga fakafeagai ʼaia. Neʼe toe fua kovi ki tonatou matagafua ʼo natou lainoa ai, he neʼe mole natou lava fakahoko tanatou fakatuʼutuʼu. Neʼe mole feala ke natou fakagata ia te palalau ʼa te kau ʼatolasio moʼoni, ʼaē ʼe maʼuhiga kiā nātou ia te pilivilēsio ʼaē ke natou tala ia te “logo lelei heʼegata” ʼo te Puleʼaga Faka Mēsia ʼa te ʼAtua ʼi muʼa ʼo te fakaʼosi ʼo te tuʼu ʼaenī. (Fakahā 14:6) ʼI tana sio ki te gaohi koviʼi ʼa te ʼu kaugana ʼa Sehova, neʼe ʼui fēnei e te tagata leʼo pilisoni ʼi te tahi fenua ʼi Afelika: ‘ ʼE ko he puli temi takotou faiga ʼaē ke kotou fakatagaʼi ia te hahaʼi ʼaia. ʼE mole natou fakafisi anai ki tanatou tui, pea ʼe natou haga tuputupu pē anai.’
(Sakalia 12:7) E uluaki haofaki anai e te Eteleno te u falela o Suta, o tupu ke aua naa malaga ki oluga o Suta Te kololia o te fale o Tavite, Te kololia o te hahai o Selusalemi.
br1-WA 2007 p. 27 pal. 13
ʼE Mole Mālo Anai Te ʼu Mahafu Tau ʼAē Neʼe Faʼu Moʼo Fakafeagai Kiā Koutou
13 Lau ia Sakalia 12:7, 8. ʼI te Iselaele ʼo te temi muʼa, neʼe ʼasi lelei ia te ʼu falelā ʼi te fenua, ʼaē neʼe fakaʼaogaʼi ʼi ʼihi te temi e te ʼu tagata tauhi ovi pea mo te hahaʼi gāue kele. Neʼe ko te hahaʼi ʼaia ʼaē neʼe ʼuluaki tauʼi e te ʼu puleʼaga fili, mokā natou tauʼi ia te kolo ʼo Selusalemi, pea neʼe ʼaoga ke puipui nātou. Ko te kupuʼi palalau “te ʼu falelā ʼo Suta,” ʼe fakahā ai ko te toe ʼo te kau fakanofo ʼi totatou temi ʼe natou nonofo ʼi he koga meʼa ʼe lauʼātea, peʼe mole natou nonofo ʼi he ʼu kolo mālolohi. ʼE natou lagolago ʼaki he lototoʼa ki te ʼu gāue ʼo te Puleʼaga Faka Mēsia. Ko Sehova ʼo te ʼatu kautau ʼe ina “ ʼuluaki haofaki muʼa ia te ʼu falelā ʼo Suta,” heʼe ko nātou ʼaē ʼe ʼohofi fakahagatonu e Satana.
Lau ʼo Te Tohi-Tapu
(Sakalia 12:1-14) Folafola kikite, folafola ate Eteleno ki Iselaele. Koeni e folafola te Eteleno, ae nee ina folahi te atu lagi pea nee ina fakatafito te kele, ae nee ina fau te laumalie o te tagata ia ia. 2 Koeni, e au fakaliliu anai ia Selusalemi ko he ipu fakatupu ulu vale ki te u hahai fuli i ona tafatafa, pea kia Suta foki i te aho o te taui o Selusalemi. 3 I te aho aia, e au fakaliliu anai ia Selusalemi ko he maka mamafa ki te u hahai fuli; ko natou fuli ae e natou hiki anai ia ia e lavevea anai; pea e fakatahi anai te atu puleaga fuli o te kele kia ia. 4 I te aho aia, e ui e te Eteleno, e au taai anai te u hosi fuli aki te ulu vale. Pea mo natou ae e heheka i te u hosi aki te vale. Kae e au avahi anai oku mata ki te fale o Suta, i te aho ae e au taai anai ki te kivi te u hosi fuli a te u hahai. 5 E ui anai e te u pule o Suta i onatou loto: E mau anai te malohi o te hahai o Selusalemi i te Eteleno o te atu fua tau, tonatou Atua. 6 I te aho aia, e au fakaliliu anai te u pule o Suta ke hage ko he mata afi kakaha i loto o he tuuga fafie, pee ko he taume ulo i he tuuga otaota; e natou kai anai i te fahai matau mo te fahai hema te u hahai fuli ae e natou takatakai natou, pea e nofo anai ia Selusalemi i tona nofoaga, i Selusalemi. 7 E uluaki haofaki anai e te Eteleno te u falela o Suta, o tupu ke aua naa malaga ki oluga o Suta Te kololia o te fale o Tavite, Te kololia o te hahai o Selusalemi. 8 I te aho aia, e puipui anai e te Eteleno te hahai o Selusalemi, pea ko ia ae e gaegae ia natou e hage anai ko Tavite i te aho aia; e hage anai te fale o Tavite ko te Atua, Pee ko te aselo a te Eteleno i onatou mua. 9 I te aho aia, e au maumaui anai te atu puleaga fuli ae e omai anai o tau ki Selusalemi. 10 Pea e au liligi anai ki te fale o Tavite pea mo te hahai o Selusalemi he laumalie o te ofa pea mo te tagi, pea e natou haga anai onatou mata kia au, ae nee natou hokai aki te tao. E natou tagi mamahi anai kia ia o hage ko te tagi ki he foha ulu toko tahi, e natou tagi mamahi anai kia ia o hage ko te tagi ki he foha uluaki. 11 I te aho aia, e lahi anai te tagi laulau i Selusalemi, o hage ko te tagi laulau kia Atatilimoni i te vaevaeliua o Mekito. 12 E tagi anai i te fenua katoa, i te famili taki tahi: Te famili o te fale o Tavite, kehe te tagata, pea kehe te fafine; te famili o te fale o Natane, kehe te tagata, pea kehe te fafine; 13 Te famili o te fale o Levi, kehe te tagata, pea kehe te fafine; te famili o Simei, kehe te tagata, pea kehe te fafine; 14 Mo te u famili fuli ake ae, te famili taki tahi, kehe te tagata, pea kehe te fafine.
VAHAʼA ʼO TE ʼAHO 25-31 ʼO TESEPELI
TE ʼU KOLOA ʼO TE TOHI-TAPU | MALAKIA 1-4
“ ʼE Leleiʼia Koa e Sehova Tokolua Maʼuli Fakataumatuʼa?”
(Malakia 2:13, 14) Koeni foki te tahi mea ae e kotou fai: E kotou uufi te aletale o te Eteleno aki te u loimata, aki te u tagi mo te u lauga, o tupu e mole kei tokaga ia ia ki te u molaga, pea e mole kei ina tali he mea mai okotou nima. 14 Pea e koutou ui: Kotea tona tupuaga?. . . O tupu nee ke fakapapau ia mua o te Eteleno ke ke agatonu ki te fafine ae nee ohoana mo koe i tou temi tupulaga. Ko tou hoa aia, ae nee ke filifili totonu, kae koeni kua ke siaki ia ia.
jd-F p. 125-126 pal. 4-5
Kotou Gaue Ke Fiafia Ia Sehova ’i Takotou Maʼuli Fakafamili
4 ʼI te nima sekulo I.M.T.S, ʼi te temi ʼo Malakia, tokolahi te kau Sutea neʼe natou mavete mo ʼonatou ʼohoana. Neʼe ui fenei age e Malakia kia natou: ‘Nee ke fakapapau ia mua o te Eteleno ke ke agatonu ki te fafine ae nee ohoana mo koe i tou temi tupulaga, kae koeni kua ke siaki ia ia.’ Koia, ʼuhi ko te aga kaka ʼo te ʼu tagata ʼohoana, neʼe ‘uufi ai te aletale o te Eteleno aki te u tagi mo te u lauga’ ʼo te ʼu fafine ʼohoana. Pea neʼe tali gafua pe e te ʼu pelepitelo agakaka te toe agakovi ʼaia.—Malakia 2:13, 14.
5 Kotea te manatu ʼa Sehova ʼo ʼuhiga mo te mole fakaʼapaʼapaʼi ʼo te nofo ʼohoana ʼi te temi ʼo Malakia? Neʼe tohi fenei e Malakia: “Heʼe fehiʼa ia ki te mavete, ko te ui ʼaia ʼa Sehova, te ʼAtua ʼo Iselaele”. Pea ‘e mole fetogi’ ia. (Malakia 2:16; 3:6, MN) ʼE kotou tokagaʼi koa pe kotea ʼae ʼe ui ʼi te ʼu vaega ʼaeni? Kua fualoa te fehiʼa ʼa te ʼAtua ki te mavete ʼohoana. (Senesi 2:18, 24) Pea ʼe kei fakafeagai pe ki ai ia ʼaho nei. Ko ʼihi ʼe natou mavete mo ʼonatou ʼohoana ʼuhi pe heʼe mole natou fiafia mo natou. Kapau ʼe kaka ʼonatou loto, pea ʼe sio pe anai ki ai ia Sehova. (Selemia 17:9, 10) ʼE ina iloʼi anai te ’u tupuʼaga fakakaka ʼo takita fia mavete. ʼEi, “ko meʼa fuli ʼe telefua pea mo ha kia mata ʼo ia ʼae ʼe ina fakamauʼi anai tatou ʼo mulimuli ki ʼatatou gaue.”—Hepeleo 4:13.
(Malakia 2:15, 16) Nee mole fai te mea aia e he tahi, mo kana nee i ai hona kii poto. Ko te toko tahi nee ina fai ia ia, pea kotea tona tupuaga? Koteuhi nee ina kumi te hakoga ae nee fakapapau e te Atua kia ia. Koia koutou tokaga pe kia koutou totonu, pea ke aua naa agatuu he tahi ki te ohoana o tona temi tupulaga! 16 Koteuhi e au fehia ki te kapu o te ohoana, e ui e te Eteleno, te Atua o Iselaele, pea mo ae e ina uufi ki te agamalohi tona kofu, e ui e te Eteleno o te atu fua tau: Koutou tokaga ki okotou laumalie, pea ke aua naa koutou agatuu!
ʼE Fehiʼa Ia Sehova Ki Te Aga Fakakākā
19 Kae ʼe ʼi ai te faʼahi lelei neʼe talanoa kiai ia Malakia, he neʼe ina ʼui ko ʼihi tagata ʼohoana neʼe mole nātou aga fakakākā ki tonatou ʼohoana. Neʼe ‘nātou maʼu te toe ʼo te laumālie maʼoniʼoni ʼa te ʼAtua.’ (Vaega 15) Meʼa fakafiafia foki heʼe ʼi te kautahi ʼa te ʼAtua, ʼe lahi ʼaupito te ʼu tagata ʼe nātou ‘faka maʼuhigaʼi tonatou ʼohoana.’ (1 Petelo 3:7) ʼE mole nātou tā peʼe tauveleʼi tonatou ʼohoana, peʼe fakakinauʼi nātou ke nātou fai he ʼu aga fakalialia ʼi te ʼu felāveʼi fakasino, pea ʼe mole nātou fakalainoaʼi tonatou ʼohoana ʼo nātou manako ki he tahi ʼu fafine, peʼe nātou sioʼi he ʼu paki peʼe ko he ʼu ʼata ʼe fai ai he ʼu felāveʼi fakasino. ʼE toe fiafia te kautahi ʼa Sehova heʼe ʼi ai te ʼu fafine ʼohoana Kilisitiano agatonu, ʼe nātou fakalogo tuʼumaʼu ki te ʼAtua pea mo tana ʼu lao. ʼE ʼiloʼi e te ʼu tagata pea mo te ʼu fafine fuli ʼaia te ʼu meʼa ʼaē ʼe fehiʼa kiai te ʼAtua, pea ʼe mulimuli kiai tanatou manatu pea mo tanatou aga. Tou haga faʼifaʼitakiʼi ia nātou, ‘ ʼo tou fakalogo ki te ʼAtua ohage ko he pule’ pea ʼe ina foaki lahi mai anai tona laumālie maʼoniʼoni.—Gaue 5:29.
Kumi Te ʼu Koloa ʼi Te Tohi-Tapu
(Malakia 1:10) Ko ai ae ia koutou e ina mapunui anai te u matapa, ke aua naa kotou tutu noa te afi i oluga o toku aletale? E mole pe au mau he fiafia e tahi ia koutou, e ui e te Eteleno o te atu fua tau, pea e mole lelei kia au te u molaga o okotou nima.
br1-WA 2007 p. 29 pal. 1
Ko He ʼu Puani ʼAoga ʼo Te Tohi ʼa Malakia
1:10. Neʼe mole leleiʼia e Sehova ia te ʼu mōlaga ʼa te kau pelepitelō loto mānumānu ʼaia, ʼaē neʼe natou fakamaʼua ke totogi nātou, logolā neʼe ko he ʼu kihiʼi gāue ʼaē neʼe natou fai, ohagē ko te pupunu ʼo te ʼu matapā peʼe ko te tutu ʼo te ʼu afi ʼo te ʼaletale. ʼE maʼuhiga ʼi te ʼu gāue ʼaē ʼe tou fai ʼi te tauhi, ohagē lā ko tatatou minisitelio, ke tou fai ʼaki he loto kātoa maʼa te ʼAtua pea mo totatou tatau, kae ke ʼaua naʼa tou fai ke totogi ai tātou!—Mateo 22:37-39; 2 Kolonito 11:7.
(Malakia 3:1) Koeni, e au fekaui leva taku tagata avelogo; E ina teuteui anai te ala i oku mua. Pea fokifa pe e ulu leva ki tona fale tapu te Aliki ae e kotou kumi; pea ko te tagata avelogo o te hai ae e koutou holi ki ai, koeni, e hau ia ia, e ui e te Eteleno o te atu fua tau.
“Koeni, e Au Fakatahi Mo Koutou i Te Aho Fuli”
5 ʼI ni taʼu ʼe lauʼi teau ʼi muʼa ʼo te fai e Sesu te lea fakatata ʼo te fulumeto mo te vao kovi, neʼe takitaki e Sehova tana polofeta ko Malakia ke ina fakakikite te ʼu aluʼaga ʼe tuʼu ʼi te lea fakatata ʼa Sesu. (Lau ia Malakia 3:1-4.) Neʼe ko Soane Patita te tagata ʼave logo ʼae neʼe ina teuteuʼi te ala. (Mat. 11:10, 11) ʼI te haʼu ʼa Soane Patita ʼi te taʼu 29 H.T.S., neʼe kamata ai te temi ʼo te fakamau ʼo te puleʼaga ʼo Iselaele. Neʼe ko Sesu te lua tagata ʼave logo. Neʼe ina fakamaʼa tuʼa lua te fale lotu ʼi Selusalemi, ʼuluaki ʼi te kamata ʼo tana minisitelio pea lua ʼi tona fakaʼosi. (Mat. 21:12, 13; Soa. 2:14-17) Koia, neʼe maʼua ke fakalaka he temi ke fakahoko ai e Sesu tana gaue fakamaʼa.
6 Kotea te fakahoko ʼe lahi age ʼo te lea fakapolofeta ʼa Malakia? ʼI ni taʼu ʼi muʼa ʼo te taʼu 1914, ko C. T. Russell pea mo ʼona kaumeʼa neʼe natou fai te gaue ʼe tatau mo ʼae ʼo Soane Patita. Neʼe kau ki te gaue maʼuhiga ʼaia te toe fakaha ʼo te ʼu moʼoni ʼae ʼe tuʼu ʼi te Tohi-Tapu. Ko te Kau Ako ʼo Te Tohi-Tapu neʼe natou akoʼi te fakaʼuhiga moʼoni ʼo te sakilifisio faitotogi ʼa Kilisito, mo fakaha te loi ʼo te ʼifeli, pea mo natou tala neʼe ʼosi te Temi ʼo Te Kau Senitile ʼi te taʼu 1914. Kaʼe neʼe kei tokolahi pe te ʼu kutuga lotu neʼe natou ui ko ni tisipulo ʼa Kilisito. Koia, neʼe tonu ke tali ki te fehuʼi maʼuhiga ʼaeni: Ko ai koa te fulumeto ia natou ʼaia? Moʼo tali ki ai, neʼe kamata ʼaʼahi e Sesu te fale lotu fakalaumalie ʼi te taʼu 1914. Neʼe maʼua ke fakalaka he temi ke fakahoko ai te ʼaʼahi ʼaia mo te gaue fakamaʼa, mai te taʼu 1914 ki te kamata ʼo te taʼu 1919.
Lau ʼo Te Tohi-Tapu
(Malakia 1:1-10) Folafola a te Eteleno ki Iselaele ia Malakia. 2 Nee au ofa kia koutou, e ui e te Eteleno. Kae e koutou ui: Kotea te mea ae nee ke ofa ai kia matou? Pe e mole ko te tehina o Esau ko Sakopo? E ui e te Eteleno. Kae nee au ofa kia Sakopo, 3 Pea nee au mau he fehia kia Esau, nee au fakaliliu ona mouga ko he potu lavaki, nee au tuku tona tofiga ki te u kuli vao o te toafa. 4 Kapau e ui e Etome: Kua matou maumau, e matou toe lagai anai te u maumau! Koia e folafola ai te Eteleno o te atu fua tau: Ke natou fakatuu! E au holoi anai, pea e fakahigoa anai natou ko te fenua o te agakovi, hahai ae e itaita ki ai te Eteleno o heegata. 5 E sio anai ki ai okotou mata, pea e koutou ui anai: E lahi te Eteleno o fakalaka i te u tuakoi o Iselaele! 6 E fakaapaapa he foha ki tana tamai, pea mo he tagata faifekau ki tona pule. Kapau e au tamai, kofea te fakaapaapa ae e tonu ke fai mai kia au? Kapau e au pule, kofea te mataku ae e tonu ke mau kia au? E ui e te Eteleno o te atu fua tau kia koutou, kau faisakilifisio, ae e kotou fakanoai toku huafa, pea e kotou ui: Kotea te mea ae nee matou fakanoai ai tou huafa? 7 E kotou momoli i toku aletale ni meakai uli, pea e koutou ui: Kotea te mea ae nee matou fakanoai ai ia koe? O tupu nee kotou ui: E noa te laupapa o te Eteleno! 8 Ka kotou momoli he failaulau aki he manu kivi, pe e mole kovi? Ka kotou momoli he manu ketu pee maimoa, pe e mole kovi? Ke ke momoli ia ia ki tou kovana! Pe e ina tali lelei anai ia koe, pe e ina tuku anai kia koe he mea lelei? E ui e te Eteleno. 9 Kotou kole ki te Atua i te temi nei, ke ofa atu ia ia kia koutou! O tupu ko koutou ae e hau mai ai te mea aia: Pe e ina tali lelei anai koutou? E ui e te Eteleno o te atu fua tau. 10 Ko ai ae ia koutou e ina mapunui anai te u matapa, ke aua naa kotou tutu noa te afi i oluga o toku aletale? E mole pe au mau he fiafia e tahi ia koutou, e ui e te Eteleno o te atu fua tau, pea e mole lelei kia au te u molaga o okotou nima.