Tafitoʼaga ʼo Te Kaupepa Ako Te Maʼuli Fakakilisitiano Mo Te Faifakamafola
VAHAʼA ʼO TE ʼAHO 1-7 ʼO APELILI
TE ʼU KOLOA ʼO TE TOHI-TAPU | 1 KOLONITO 7-9
“Te Nofo Selipatea ʼe Ko He Meʼa ʼOfa”
(1 Kolonito 7:32) ʼEi, ʼe au loto ke kotou ʼateaina mai te ʼu tuʼania. Ko te tagata ʼae ʼe mole hona ʼohoana, ʼe tuʼania ia ki te ʼu meʼa ʼa te ʼAliki, pe ʼe lava feafeaʼi hana maʼu ia te ʼofa ʼo te ʼAliki.
Kotou Fakaʼaogaʼi Lelei Tokotou Temi Selipatea
3 ʼI te agamāhani, ko he tahi ʼe selipatea ʼe lahi age tona temi ki te fai ʼaē ʼo tana ʼu gāue pea mo ʼāteaina age ʼi he tahi kua ʼohoana. (1 Ko. 7:32-35) Ko te ʼu fealagia makehe ʼaia ʼe ina maʼu, ʼe lagi feala ai kiā ia ke lahi age ia tana fai fakamafola ʼi te minisitelio, ke ina fakahā tona ʼofa ki ʼihi atu, pea ke lahi age mo tana fakaovi ʼaē kiā Sehova. Koia ko ʼihi Kilisitiano neʼe natou mahino pea mo fakamaʼuhigaʼi te ʼu fealagia ʼaia ʼo te nofo selipatea, pea neʼe natou fakatotonu ke natou ‘tali’ te faʼahiga maʼuli ʼaia, lagi lolotoga ni ʼu taʼu. Lagi ko ʼihi neʼe mole natou ʼamanaki ke natou māʼuʼuli tokotahi, kae ʼi te kua fetogi leva ʼo te ʼaluʼaga ʼo tonatou maʼuli, neʼe natou toe vakavakaʼi ʼi te faikole ia tonatou maʼuli pea mo natou mahino ai, ʼaki te tokoni ʼa Sehova, ʼe toe feala pē mo nātou ke natou fakatotonu ʼi ʼonatou loto ke natou nonofo selipatea. Koia kiā nātou ʼaia neʼe liliu te ʼu fetogi ʼo tonatou maʼuli ko he faigamālie ke natou nonofo selipatea.—1 Kol. 7:37, 38.
(1 Kolonito 7:33, 34) Kaʼe ko te tagata ʼae kua ʼohoana, ʼe tuʼania ia ki te ʼu meʼa ʼo te malamanei, pe ʼe lava feafeaʼi hana maʼu ia te ʼofa ʼo tona ʼohoana, 34 koia kua vaelua tana fakakaukau. Pea ko te fafine ʼae ʼe mole hona ʼohoana, ʼo feia mo te taʼahine, ʼe nā tuʼania ki te ʼu meʼa ʼa te ʼAliki, ke feala hanā maʼoniʼoni ʼi ʼonā sino pea mo ʼonā ʼatamai. Kaʼe ko te fafine ʼae kua ʼohoana, ʼe tuʼania ia ki te ʼu meʼa ʼo te malamanei, pe ʼe lava feafeaʼi hana maʼu ia te ʼofa ʼo tona ʼohoana.
Ko He ʼu Puani ʼAoga ʼo Te ʼu Tohi Ki Te Kau Kolonito
7:33, 34—Koteā te fakaʼuhiga ʼo “te ʼu meʼa ʼo te mālama” ʼaē ʼe hoha kiai te tagata ʼohoana peʼe ko te fafine ʼohoana? Neʼe talanoa ia Paulo ki te ʼu ʼaluʼaga māhani ʼo te maʼuli ʼaē ʼe tonu ke hoha kiai te kau Kilisitiano ʼohoana. ʼE kau kiai te meʼa kai, mo te ʼu mutuʼi meʼa, pea mo he ʼapi, kae ʼe mole kau kiai te ʼu meʼa kovi ʼo te mālamanei, ʼaē ʼe feholaki mai ai te kau Kilisitiano.—1 Soa. 2:15-17.
(1 Kolonito 7:37, 38) Kaʼe kapau ʼe fakatotonu e he tahi ʼi tona loto ke mole ʼohoana pea mo ina taupau maʼu te tonu ʼaia, he ʼe mole ina logoʼi he fia ʼohoana pea mo ina lava puleʼi ʼona holi, ʼe lelei anai tana tonu. 38 Koia, ko ʼae ʼe ʼohoana ʼe ina fai he tonu ʼe lelei, kaʼe ko ʼae ʼe mole ʼohoana ʼe ina fai he tonu ʼe lelei age.
Ko Te Nofo Selipatea ʼe Ko He Fealagia ʼAia Ki He Selevisi ʼe Mole Fakalelu
14 Ko te Kilisitiano selipatea ʼaē ʼe ina fakaʼaogaʼi tona ʼaluʼaga ʼaia moʼo kumi ʼo te ʼu meʼa ʼo te mālama, ʼe mole “lelei age” tana fai ʼi he ʼu Kilisitiano kua ʼohoana. ʼE nofo selipatea ia, mole “ ʼuhi ko te puleʼaga,” kae maʼa ia totonu pe. (Mateo 19:12) Ko te tagata pe ko te fafine ʼaē ʼe mole heʼeki ʼohoana, ʼe tonu ke “tuʼania ia ki te ʼu meʼa ʼo te ʼAliki,” ke tuʼania “peʼe lava feafeaʼi hana maʼu te ʼofa ʼo te ʼAliki,” pea mo “tauhi tuʼumaʼu ki te ʼAliki, ʼo mole fakalelu.” Ko tona faka ʼuhiga, ke tokaga katoa ʼo tauhi kia Sehova pea mo Sesu Kilisito. Kapau ʼe fai feiā e te ʼu tagata pea mo te ʼu fafine Kilisitiano ʼaē ʼe mole heʼeki ʼohoana, pea ʼe feala leva ke tou ʼui ʼe “lelei age” tanatou fai ʼi te kau Kilisitiano ʼaē kua ʼohoana.
Kumi Te ʼu Koloa ʼi Te Tohi-Tapu
(1 Kolonito 7:11) Kaʼe kapau ʼe mavae, ke nofo tokotahi peʼe ke toe fakatokatoka mo tona ʼohoana. Pea ʼe mole tonu ki te tagata ke mavae mai tona ʼohoana.
Te Manatu ʼa Te Tohi-Tapu ʼo ʼUhiga Mo Te Māvete Pea Mo Te Tahi Nofo ʼa He Taumātuʼa
Kā hoko ni ʼu ʼaluʼaga faigataʼa ʼaupitō, pea ʼe fai e ʼihi Kilisitiano te tonu ʼaē ke nā tahi nofo peʼe ke māvete mo tona ʼohoana logolā neʼe mole he tahi iā nāua neʼe fai folonikāsio. ʼI te ʼaluʼaga ʼaia, ʼe ʼui fakalelei mai ʼi te Tohi-Tapu ʼo ʼuhiga mo ia ʼaē ʼe mavae “ke mole ʼohoana peʼe ke toe fakatokatoka [mo tona ʼohoana].” (1 Kolonito 7:11) ʼE mole heʼeki ʼāteaina ia te Kilisitiano ʼaia ke fakatahi mo he tahi ʼaki te fakatuʼutuʼu ʼaē ke toe ʼohoana mo ia. (Mateo 5:32) Tou vakaʼi age he ʼu ʼaluʼaga faigataʼa ʼaupitō, ʼe feala ai ki he taumātuʼa ke nā tahi nofo.
• Kapau ʼe mole tokaga ia te tagata ʼohoana ʼo taupau ia te maʼuli fakasino ʼo tona fāmili. ʼE lagi maʼuli fakaʼofaʼofa he fāmili, ʼe mole ina maʼu ia te ʼu meʼa tāfito ʼaē ʼe ʼaoga ki te maʼuli, koteʼuhi ʼe mole fai e te tagata ʼohoana ia tona maʼua ʼaē ke tokaga ki te maʼuli fakasino ʼo tona fāmili, logolā tana lava fai ia te faʼahi ʼaia. ʼE ʼui fēnei ʼi te Tohi-Tapu: “Kapau ʼe mole tokaga he tahi . . . [kiā] nātou ʼo tona loto fale, ʼe kua fakafisi ia ki te tui pea ʼe kovi age ia ʼi he tagata ʼe mole tui.” (1 Timoteo 5:8) Kapau ko te faʼahiga tagata ʼaia ʼe mole ina fetogi tana aga, pea ʼe fai anai e te fafine ʼohoana te tonu ʼaē ke nā tahi nofo ke puipui ai tona maʼuli pea mo te maʼuli ʼo tana fānau. ʼE mahino ia, ʼe tonu ke tōkakaga fakalelei te kau tagata ʼāfea ʼo te kōkelekāsio mokā ʼe fakahā age ʼe mole fia taupau e he tehina ia te maʼuli fakasino ʼo tona fāmili. Kapau ʼe mole fia taupau e he tahi te maʼuli fakasino ʼo tona fāmili pea ʼe feala ke fakamavae ia ia ʼi te kōkelekāsio.
• Kapau ʼe agamālohi. Ko he tahi ʼe agamālohi, ʼe feala ke ina fai he meʼa ʼe fakatupu tuʼutāmaki ai ki te maʼuli ʼo tona ʼohoana. Kapau ko ia ʼaē ʼe agamālohi ʼe ko he Kilisitiano, pea ʼe tonu ki te ʼu tagata ʼāfea ke natou kumikumi fakalelei peʼe moʼoni te faʼahi ʼaia peʼe kailoa. Kapau ʼe hoko ʼita kovi he tahi peʼe agamālohi, pea ʼe ko he ʼu tupuʼaga ʼe feala ai ke fakamavae he tahi ʼi te kōkelekāsio.—Kalate 5:19-21.
• Kapau ʼe tuʼutāmaki ia te maʼuli fakalaumālie. Ko he tahi ʼe lagi faiga tuʼumaʼu ke ina tāʼofi tona ʼohoana ke ʼaua naʼa hoko atu tana kau ki te tauhi moʼoni peʼe ina faigaʼi fakamālohi ke fakafeagai ia tona ʼohoana ki te ʼu fakatotonu ʼa te ʼAtua. Kiā ia ʼaē ʼe ʼi te ʼaluʼaga tuʼutāmakiʼia ʼaia ko te lagi meʼa pē ʼe tahi ʼe tonu ke ina fai moʼo “fakalogo ki te ʼAtua, ohagē ko he fakalogo ki he pule, ʼi he fakalogo ia ki te tagata” ke nā tahi nofo.—Gāue 5:29.
(1 Kolonito 7:36) Kaʼe kapau ʼe manatu e he tahi ʼe ina fai he aga ʼe kovi ʼuhi ko tana mole ʼohoana, pea kapau kua fakalaka ʼi tona temi tupulaga, koʼeni te faʼahi ʼe tonu ke ina fai: Ke ʼohoana mo kapau ʼe loto ki ai, ʼe mole agahala ia.
ʼE Koutou Lava Nonofo Maʼa ʼi He Mālama Heʼe maʼa
Koia ʼe mole tonu ai ki te kau tūpulaga ke nātou foimo ʼohoana, mokā nātou kamata logoʼi tonatou ʼu holi ki te ʼu felāveʼi fakasino. Ko te ʼohoana ʼe ko he meʼa ʼe tonu ke tologa, pea ʼe maʼua ke kita aga fakapotopoto moʼo fakahoko te taʼi maʼua ʼaia. (Senesi 2:24) ʼE lelei age hakita talitali ke “fakalaka te mātala ʼo [tokita] temi tūpulaga”—te temi ʼaē ʼe mālohi ai tokita ʼu holi ki te ʼu felāveʼi fakasino pea ʼe feala ai ke nātou fakatupu kovi ki te ʼu tonu ʼaē ka kita fai. (1 Kolonito 7:36, MN) Pea ʼe ko he agavale pea ʼe ko he agahala ki he tahi kua lahi, ke fia ʼohoana ke ina fai he ʼu felāveʼi fakasino heʼeʼaoga, ʼuhi pe heʼe mole ina maʼu he tahi ke nā ʼohoana!
VAHAʼA ʼO TE ʼAHO 8-14 ʼO APELILI
TE ʼU KOLOA ʼO TE TOHI-TAPU | 1 KOLONITO 10-13
“ ʼE Agatonu Ia Sehova”
(1 Kolonito 10:13) Ko te ʼu fakahala ʼae ʼe hoko kia koutou ʼe toe hoko foki ki te hahaʼi fuli. Kaʼe ʼe agatonu te ʼAtua, pea ʼe mole ina tuku anai ke fakahalaʼi koutou ʼo fakalaka age ʼi te meʼa ʼae ʼe kotou lavaʼi, kaʼe ka hoko mai te fakahala, ʼe ina toe teuteuʼi foki anai he faigamalie ke kotou hao ai, ke feala ai hakotou ʼutakiʼi.
Te ’u Fehuʼi ʼa Te Kau Lautohi
Neʼe tohi e te apositolo ko Paulo, ʻ ʼe mole tuku anai e Sehova ke fakahalaʼi koutou ʼo fakalaka age ʼi te meʼa ʼae ʼe kotou lavaʼi.’ (1 Kolonito 10:13) Ko tona fakaʼuhiga koa, ʼe fakatuʼutuʼu fakatomuʼa e Sehova pe kotea ʼae ʼe feala ke tou ʼutakiʼi pea ʼe hoki ina filifili leva te ʼu ʼahiʼahi ʼae ka tou tauʼi anai?
▪ Kapau ʼe moʼoni te faʼahi ʼaia, pea tou fakakaukauʼi muʼa pe ʼe malave feafeaʼi ki totatou maʼuli. Tou toʼo he faʼifaʼitaki: Ko he foha ʼo he tehina neʼe fakamate pea neʼe lotomamahi ai te tehina. Neʼe lagi ina feʼekeʼaki pe neʼe sio fakatomuʼa ia Sehova ki te aluʼaga ʼaia, pea ina fakatotonu leva ʼe lavaʼi anai e naua taumatuʼa ia te malaʼia ʼaia. Pea ʼi te malama ʼaeni, ko te tokolahi ia tatou ʼe tou tau anai mo he ʼu malaʼia. Koia, ʼe tonu koa ke tou tui ʼe puleʼi e Sehova ia meʼa fuli ʼae ʼe hoko ʼi totatou maʼuli?
ʼAki tatatou vakaʼi ia 1 Kolonito 10:13, ʼe tou mahino ai anai ʼe mole lagolago ia te Tohi-Tapu ki te manatu ʼae ko Sehova ʼe ina iloʼi fakatomuʼa pe kotea ʼae ʼe feala ke tou ʼutakiʼi pea ʼe hoki ina filifili leva te ʼu ʼahiʼahi ʼae ka tou tauʼi anai. He koʼe ʼe feala ke tou ui te faʼahi ʼaia? Tou vakaʼi age muʼa ia tupuʼaga ʼe fa.
ʼUluaki, neʼe foaki e Sehova ki te tagata ia te loto faʼitaliha, te ʼateaina ʼo te toʼo ʼo he ʼu tonu. ʼE ina loto ke tou toʼo ʼatatou tonu. (Tetelonome 30:19, 20; Sosue 24:15) Kapau ʼe tou toʼo he tonu ʼe fiafia ai ia Sehova, ʼe tou falala ʼe ina takitaki anai tatou. (Taaga Lea 16:9) Kaʼe ka tou toʼo he ʼu tonu ʼe mole lelei, ʼe tou utu anai ʼona fua kovi. (Kalate 6:7) Koia, kapau la neʼe filifili e Sehova ia te ʼu ʼahiʼahi ʼae ka tou tauʼi anai, ʼe tou maʼu moʼoni koa ia te loto faʼitaliha?
Lua, ʼe mole puipui tatou e Sehova mai “te ʼu aluʼaga fakafokifa.” (Tagata Tanaki 9:11, MN) ʼE feala pe ke hoko he tuʼutamaki ki he tahi, he ʼe fakalaka ʼi he koga meʼa ʼe hoko ai he aluʼaga fakafokifa. Neʼe talanoa pe la ia Sesu ki te tuʼutamaki ʼae neʼe mamate ai te toko 18 hahaʼi, he neʼe holo ifo te tule kia natou. Pea neʼe ina fakaha fakalelei, neʼe mole natou mamate ʼuhi ko te ʼAtua. (Luka 13:1-5) Koia, ʼe mole fakapotopoto hatatou manatu ʼe fakatuʼutuʼu fakatomuʼa e te ʼAtua pe ko ai ʼae ka hao peʼe mate ʼi he tuʼutamaki.
Tolu, ʼe tonu ke tou tahi nofo agatonu kia Sehova. Neʼe ui e Satana ʼe tauhi pe te ʼu kaugana ʼa Sehova kia te ia, ʼuhi ko te ʼu tapuakina ʼae ʼe Ina foaki kia natou. Pea neʼe toe lau e Satana ʼe mole tou nonofo agatonu anai kia Sehova mo kapau ʼe tou felaveʼi mo he ʼu ʼahiʼahi. (Sopo 1:9-11; 2:4; Fakaha 12:10) Kapau la ʼe puipui tatou e Sehova mai he ʼu ʼahiʼahi, ʼe hage leva neʼe moʼoni ia Satana.
Fa, neʼe mole filifili e Sehova ke ina iloʼi fakatomuʼa ia meʼa fuli ʼae ka hoko anai kia tatou. ʼE moʼoni, ʼe feala ke iloʼi e Sehova pe kotea ʼae ka hoko ʼi te ka haʼu mo ka na pau la neʼe loto ki ai. (Esaia 46:10) Kaʼe ʼe fakaha mai ʼi te Tohi-Tapu neʼe mole filifili e te ʼAtua ke ina iloʼi fakatomuʼa te ʼu meʼa fuli. (Senesi 18:20, 21; 22:12) Ko Sehova ʼe ʼofa pea mo faitotonu, koia ʼae ʼe ina tuku ai ke tou fai ʼateaina pe ʼatatou tonu.—Tetelonome 32:4; 2 Kolonito 3:17.
Kaʼe kotea ʼae neʼe fia fakamahino e Paulo ʼi tana ui ʼae ko Sehova “ ʼe mole ina tuku anai ke fakahalaʼi koutou ʼo fakalaka age ʼi te meʼa ʼae ʼe kotou lavaʼi”? ʼI heni, neʼe fakamatalatala e Paulo te meʼa ʼae ʼe fai e Sehova lolotoga he ʼu ʼahiʼahi, kaʼe mole ʼi muʼa ʼo tonatou hoko mai. (Vakaʼi te kiʼi nota.) Kapau ʼe tou falala kia Sehova, pea ʼe tokoni mai anai ʼi te ʼu ʼahiʼahi fuli ʼae ʼe hoko ʼi totatou maʼuli. (Pesalemo 55:23) Tou vakaʼi ʼi te temi nei te ʼu tupuʼaga ʼe lua ʼae neʼe feala ai ke ui e Paulo ia te faʼahi ʼaia.
Te ʼuluaki tupuʼaga: Ko te ʼu ʼahiʼahi ʼae ʼe tou fakalaka ai, ʼe toe hoko foki ki “te hahaʼi fuli.” ʼUhi ʼae he kei tou maʼuʼuli ʼi te malama ʼa Satana, ʼe tou felaveʼi fuli pe mo he ʼu faigataʼaʼia pea mo he ʼu tuʼutamaki. Kaʼe kapau ʼe tou falala kia Sehova, ʼe tou ʼutakiʼi te ʼu ʼahiʼahi ʼaia pea mo tou nonofo agatonu. (1 Petelo 5:8, 9) ʼI te ʼu ʼuluaki vaega ʼo 1 Kolonito kapite 10, neʼe talanoa ai ia Paulo ʼo ʼuhiga mo ʼihi ʼahiʼahi neʼe fakalaka ai te kau Iselaele ʼi te toafa. (1 Kolonito 10:6-11) Ko natou ʼae neʼe falala kia Sehova, neʼe feala ke natou katakiʼi te ʼu ʼahiʼahi ʼaia. Kaʼe ko ʼihi kau Iselaele neʼe natou talagataʼa kia Sehova. Neʼe mole natou nonofo agatonu koteʼuhi neʼe mole natou falala kia te ia.
Te lua tupuʼaga: “ ʼE agatonu te ʼAtua.” Kotea tona fakaʼuhiga? Ka tou fakakaukauʼi ia te faʼahiga tokaga ʼae ʼa Sehova ki ʼana kaugana ʼi te hoholo ʼo te hisitolia, ʼe tou mahino ai, ʼe tokoni kia “natou ae e ofa kia ia, mo tauhi ana folafola.” (Tetelonome 7:9) Pea ʼe tou toe ako ai foki, ʼe fakahoko tuʼumaʼu e Sehova ʼana fakapapau. (Sosue 23:14) Koia ʼe tou tui papau, (1) ko Sehova ʼe mole ina fakagafua anai ke tou tau mo he ʼahiʼahi ʼe mole tou lavaʼi, pea (2) ʼe ina teuteuʼi anai maʼa tatou ia “he faigamalie” ke tou hao ai.
ʼE teuteuʼi feafeaʼi anai e Sehova ia “he faigamalie” maʼa natou ʼae ʼe falala kia te ia? ʼE moʼoni, ʼe feala pe hana pulihi ia te ʼahiʼahi. Kaʼe tou manatuʼi, neʼe ui e Paulo ʻʼe teuteuʼi anai e Sehova he faigamalie, ke feala ai hatatou ʼutakiʼi’ te ʼahiʼahi. Koia, ʼe teuteuʼi tuʼumaʼu e Sehova ia he faigamalie maʼa tatou ʼaki tana fakamalohiʼi tatou ke feala ai hatatou nonofo agatonu. Tou vakaʼi pe ʼe ina teuteuʼi feafeaʼi ʼihi faigamalie.
▪ Ko Sehova ʼe ina “fakafimalieʼi tatou ʼi ʼotatou ʼahiʼahi fuli.” (2 Kolonito 1:3, 4) ʼE ina fakafimalieʼi totatou ʼatamai, mo totatou loto pea mo te ʼu meʼa ʼae ʼe tou logoʼi ʼaki te Tohi-Tapu, mo tona laumalie maʼoniʼoni pea mo tana tagata faifekau agatonu.—Mateo 24:45; Soane 14:16, nota; Loma 15:4.
▪ ʼE feala ke fakaʼaogaʼi e Sehova ia tona laumalie maʼoniʼoni moʼo takitaki ʼo tatou. (Soane 14:26) ʼE feala ke tokoni mai te laumalie maʼoniʼoni ke tou manatuʼi te ʼu fakamatala Fakatohi-tapu pea mo te ʼu pelesepeto ke tou toʼo ai he ʼu tonu fakapotopoto.
▪ ʼE feala ke fakaʼaogaʼi e Sehova ʼana ʼaselo ke tokoni mai kia tatou.—Hepeleo 1:14.
▪ ʼE feala ke fakaʼaogaʼi e Sehova ʼotatou tehina mo tuagaʼane ke tokoni mai kia tatou. Pea ʼaki ʼanatou palalau mo te ʼu meʼa ʼae ʼe natou fai, ʼe feala ke natou fakalotomalohiʼi tatou.—Kolose 4:11.
Koia, kotea ʼae neʼe tou ako mai te ʼu palalau ʼa Paulo ia 1 Kolonito 10:13? Ko Sehova ʼe mole ina filifili te ʼu ʼahiʼahi ʼae ka tou fakalaka ai. Kaʼe ʼe tou tui papau, ʼe feala ke tou ʼutakiʼi te ʼu ʼahiʼahi fuli mo kapau ʼe tou falala kia Sehova. Pea ʼe tou iloʼi ʼe teuteuʼi tuʼumaʼu anai e Sehova ia he faigamalie maʼa tatou ke feala ai hatatou nonofo agatonu kia te ia.
(1 Kolonito 10:13) Ko te ʼu fakahala ʼae ʼe hoko kia koutou ʼe toe hoko foki ki te hahaʼi fuli. Kaʼe ʼe agatonu te ʼAtua, pea ʼe mole ina tuku anai ke fakahalaʼi koutou ʼo fakalaka age ʼi te meʼa ʼae ʼe kotou lavaʼi, kaʼe ka hoko mai te fakahala, ʼe ina toe teuteuʼi foki anai he faigamalie ke kotou hao ai, ke feala ai hakotou ʼutakiʼi.
(1 Kolonito 10:13) Ko te ʼu fakahala ʼae ʼe hoko kia koutou ʼe toe hoko foki ki te hahaʼi fuli. Kaʼe ʼe agatonu te ʼAtua, pea ʼe mole ina tuku anai ke fakahalaʼi koutou ʼo fakalaka age ʼi te meʼa ʼae ʼe kotou lavaʼi, kaʼe ka hoko mai te fakahala, ʼe ina toe teuteuʼi foki anai he faigamalie ke kotou hao ai, ke feala ai hakotou ʼutakiʼi.
Kumi Te ʼu Koloa ʼi Te Tohi-Tapu
(1 Kolonito 10:8) Pea ʼaua naʼa tou fai he ʼu felaveʼi fakasino heʼe ʼaoga ohage ko tona fai e ʼihi ia natou, ʼo mamate ai te toko 23 000 ʼi te ʼaho pe ʼe tahi.
Te ʼu Fehuʼi ʼa Te Kau Lautohi
He koʼe ʼe ʼui ia 1 Kolonito 10:8 neʼe matehi te toko 23 000 kau Iselaele ʼi te ʼaho pe e tahi ʼuhi ko tanatou fai folonikasio, kae ia Faka au 25:9 ʼe ʼui ai neʼe ko te toko 24 000?
ʼE lahi te ʼu faʼahi ʼe tonu ke tou tokagaʼi moʼo fakamahino te kehekehe ʼo te ʼu vaega ʼaia e lua. Ko te fakamahino ʼaē ʼe faigafua ʼe ko te ʼui ʼaē neʼe lagi lau ko hahaʼi e 23 000 ki te 24 000 ʼaē neʼe mamate.
Tou vakaʼi te tahi fakamahino. Neʼe fakamatala e te ʼapositolo ko Paulo te hisitolia ʼo te kau Iselaele ʼi Sitime, ohage ko he fakatokaga ki te kau Kilisitiano ʼo Kolonito. Ko Kolonito neʼe ko te kolo neʼe ʼiloa ʼuhi ko tona maʼuli heʼeʼaoga. Neʼe ina tohi fēnei: “ ʼAua naʼa tou fai te folonikasio, ohage ko ʼihi ia nātou ʼaē neʼe fai folonikasio, pea neʼe mamate ai te toko ʼuafulu-ma-tolu afe ʼi te ʼaho pe e tahi.” ʼI tana fakakeheʼi ia nātou ʼaē neʼe matehi e Sehova ʼuhi ko tanatou fai folonikasio, neʼe talanoa ai Paulo ki te toko 23 000.—1 Kolonito 10:8, MN.
Kae ia Faka au kapite 25, ʼe ʼui ai ko “Iselaele neʼe pipiki kia Paale ʼo Peole, pea kamata kakaha ai te ʼita ʼo Sehova ki Iselaele.” Pea neʼe fakatotonu e Sehova kia Moisese ke matehi “te ʼu pule fuli ʼo te hahaʼi.” Neʼe fakatotonu e Moisese ki te kau tuʼi fakamāu ke nātou fakahoko te fakatotonu ʼaia. Ki muli age, “neʼe gata te tautea” ʼi te temi ʼaē neʼe matehi ai e Fineasi te tagata Iselaele ʼaē neʼe ina ʼaumai te fafine Moapite ki te nofoʼaga. ʼE fakaʼosi fēnei te fakamatala: “Ko nātou fuli ʼaē neʼe mamate ʼi te tautea neʼe faka aʼu ki te toko ʼuafulu-ma-fā afe.”—Faka au 25:1-9.
ʼI te kau mate ʼaia ʼo te tohi ʼo Faka au, ʼe mahino ia neʼe ko “te ʼu pule ʼo te hahaʼi” ʼaē neʼe matehi e te kau tuʼi fakamāu pea mo nātou ʼaē neʼe matehi e Sehova totonu. Lagi ko te toko afe ʼo te kau pule ʼaia neʼe matehi e te kau tuʼi fakamāu, ʼo fakakatoa ai ko te toko 24 000. Tatau aipe pe neʼe fai te folonikasio e te ʼu pule ʼaia peʼe ko te kau takitaki ʼaia, pe neʼe nātou kau ki te ʼu fakafiafia pe neʼe nātou tali ia nātou ʼaē neʼe nātou fai te ʼu meʼa ʼaia, kae neʼe nātou agahala ʼi tanatou “pipiki kia Paale ʼo Peole.”
ʼO ʼuhiga mo te kupu “pipiki,” ʼe fakamahino fēnei e te tohi faka Tohi-Tapu, ʼe faka ʼuhiga te kupu ki “te pipiki ʼa he tahi ki he tahi age.” Ko te kau Iselaele neʼe ko te hahaʼi neʼe kua nātou foaki tonatou maʼuli kia Sehova. Kae ʼi tanatou “pipiki kia Paale ʼo Peole,” neʼe nātou maumauʼi ai tanatou ʼu felogoi mo te ʼAtua. Hili teitei taʼu e 700 ki muli age, ʼaki te polofeta ko Osea, neʼe ʼui fēnei e Sehova ʼo ʼuhiga mo te kau Iselaele: “Neʼe nātou ʼolo kia Paale ʼo Peole, neʼe nātou foaki tonatou maʼuli ki te meʼa fakaufiufi, pea neʼe nātou liliu ko he meʼa fakalialia ohage ko te meʼa ʼaē neʼe nātou manako ki ai.” (Osea 9:10) Ko nātou fuli ʼaē neʼe nātou fai te meʼa ʼaia neʼe tonu ke tauteaʼi ia nātou e te ʼAtua. Koia neʼe fakamanatuʼi ai e Moisese ki te ʼu foha ʼo Iselaele: “Neʼe koutou sio mata ki te meʼa ʼaē neʼe fai e Sehova ʼo ʼuhiga mo Paale ʼo Peole, ko te tagata fuli pe ʼaē neʼe mulimuli kia Paale ʼo Peole, neʼe ko nātou ʼaē neʼe fakaʼauha e Sehova tokotou ʼAtua ʼi te lotolotoiga ʼo koutou.”—Teutalonome 4:3.
(1 Kolonito 11:5, 6) Ko te fafine ʼae ʼe faikole peʼe faifakakikite kaʼe ʼe mole ina pulouʼi tona ʼulu, ʼe fakaufiufi ia ki tona pule, he ʼe hage pe ko he fafine neʼe tele tona ʼulu. 6 Koteʼuhi kapau ʼe mole pulouʼi e he fafine tona ʼulu, pea ʼe tonu ke kosi tona lauʼulu. Kaʼe kapau ʼe fakaufiufi ki he fafine te kosi peʼe ko te tele ʼo tona ʼulu, pea ʼe tonu ke ina pulouʼi tona ʼulu.
(1 Kolonito 11:10) Koia la ʼae, ʼe tonu ai ke ʼai e te fafine ki tona ʼulu he fakailoga ʼo tana fakalogo, ʼuhi ko te kau ʼaselo.
w15-F 15/2 30
Te ʼu Fehuʼi ʼa Te Kau Lautohi
ʼE tonu koa ki he tuagaʼane ke ina pulouʼi tona ʼulu moka ʼe ina taki he ako Tohi-Tapu, kae ʼi ai he tehina peʼe ko he kaugā fagona tagata?
▪ ʼI te alatike “Te ʼu fehuʼi ʼa te kau lautohi” ʼi Te Tule Leʼo ʼo te ʼaho 15 ʼo Sulio 2002, ʼe ui ai ʼe tonu ki he tuagaʼane ke ina pulouʼi tona ʼulu moka ʼe ina fai he ako Tohi-Tapu mo kapau ʼe ʼi ai he tehina peʼe ko he kaugā fagona tagata. Neʼe matou toe vakaʼi te fakatuʼutuʼu ʼaia pea mo fai he kiʼi fetogi.
Kapau ʼe kau he tehina ki he ako kae ko te tuagaʼane ʼae ʼe ina fai te ako, ʼe tonu ki te tuagaʼane ʼaia ke ina pulouʼi tona ʼulu. ʼI tana fai feia, ʼe ina fakaha ai tana fakaʼapaʼapa ki te ʼuhiga pule ʼae neʼe fakatuʼutuʼu e Sehova ʼi te kokelekasio, he ʼe fakahoko e te tuagaʼane he gaue neʼe tonu ke fai e he tehina. (1 Ko. 11:5, 6, 10). ʼE feala pe ki te tuagaʼane ke ina kole ki te tehina ke ina taki te ako mo kapau ʼe tuha mo ia ke ina fai pea mo kapau ʼe ina lavaʼi.
Kapau ʼe kau he kau fagona tagata ki te ako, ʼe mole ko tona ʼohoana, ʼe mole ʼi ai he tupuʼaga Fakatohi-tapu ke fakamaʼua ki te tuagaʼane ʼaia ke ina pulouʼi tona ʼulu. Kae ʼi te aluʼaga ʼaeni, ko ʼihi tuagaʼane ʼe natou pulouʼi pe ʼonatou ʼulu, ʼuhi ko ʼonatou leʼo ʼo loto.
VAHAʼA ʼO TE ʼAHO 22-28 ʼO APELILI
TE ʼU KOLOA ʼO TE TOHI-TAPU | 1 KOLONITO 14-16
“ ʼE Liliu Anai Te ʼAtua Ko ‘Meʼa Fuli Maʼa Te Hahaʼi Fuli’ ”
(1 Kolonito 15:24, 25) Pea ʼi te fakaʼosi, ʼe ina fakatoʼo age anai te Puleʼaga ki tona ʼAtua pea mo Tamai, ʼi tana kua ʼosi pulihi te ʼu puleʼaga fuli, mo te ʼu pule fuli pea mo te ʼu malohi fuli. 25 Koteʼuhi ʼe tonu ke ʼafio ʼo kaku ki te tuku e te ʼAtua ʼona fili fuli ki ʼona lalo vaʼe.
“Ko Te Mate ʼe Tonu Ke Fakaʼauha”
10 “Te fakaʼosi,” ʼe ko te fakaʼosi ʼo te ʼAfio ʼa Kilisito ia Taʼu e Afe, mokā fakatoʼo anai e Sesu, ʼaki he agavaivai pea mo he agatonu, te Puleʼaga ki tona ʼAtua pea mo Tāmai. (Fakahā 20:4) ʼE hoko anai te fakatuʼutuʼu ʼa te ʼAtua ke ina “toe fakatahiʼi ia meʼa fuli ia Kilisito.” (Efesi 1:9, 10) Kae ʼe ʼuluaki maumauʼi anai e Kilisito “te ʼu puleʼaga fuli pea mo te pule fuli pea mo te mālohi fuli,” ʼaē ʼe fakafeagai ki te Pule Faʼitaliha ʼa te ʼAtua. ʼE mole gata ʼaki pe te fakaʼauha ʼaē ka hoko ʼi Halamaketone. (Fakahā 16:16; 19:11-21) ʼE ʼui fēnei e Paulo: “ ʼE tonu ke pule [ia Kilisito] ʼi tona ʼuhiga hau, ʼo aʼu ki te temi ʼaē ka tuku ai e te ʼAtua tona ʼu fili ki ʼona lalo vaʼe. ʼI tona ʼuhiga fili fakaʼosi, ko te mate ʼe tonu ke fakaʼauha.” (1 Kolonito 15:25, 26) Ei, ʼe pulihi anai te ʼu meʼa fuli ʼaē ʼe pipiki ki te agahala pea mo te mate ʼaē ʼe haʼu mai ia Atama. Koia, moʼo fakahoko te faʼahi ʼaia, ʼe faka gaʼasi anai e te ʼAtua te ʼu “falemaka fakamanatu” ʼi tana toe fakamaʼuli te kau mate.—Soane 5:28.
(1 Kolonito 15:26) Pea ko te fili fakamuli, ia te mate, ʼe pulihi anai ia.
ʼE Fakahoko e Te Puleʼaga Te Finegalo ʼo Te ʼAtua ʼi Te Kele
21 Kaʼe ʼe feafeaʼi ʼo ʼuhiga mo te mate, te faʼahi ʼae ʼe hoko ki he tahi ʼe agahala moka mahaki? ʼE ko totatou “fili fakamuli” ʼaia, pea ʼe mole hotatou malohi moka hoko mai. (1 Ko. 15:26) Kaʼe ʼe feala koa ke malo ia Sehova ʼi te mate? ʼE feala ke tou tokagaʼi te fakakikite ʼaeni ʼa Esaia: “E ina folo anai te mate o talu osi, pea e holoholoi anai e te Aliki, [ia Sehova], te u loimata ia mata fuli.” (Esa. 25:8) Fakakaukauʼi age muʼa ia te temi ʼae ʼe mole toe ʼi ai anai ni ʼavaifo, ni tanuma pea mo te fetagihi ʼa te hahaʼi lotomamahi. Kaʼe ʼe fetagihi anai te hahaʼi ʼi te fiafia he ʼe fakahoko e Sehova tana fakapapau fakatalakitupua ʼae ko te fakatuʼuake ʼo te kau mate. (Lau ia Esaia 26:19.) ʼE pulihi anai ia te ʼu mamahi fuli ʼae neʼe tupu mai te mate.
(1 Kolonito 15:27, 28) Koteʼuhi ko te ʼAtua “neʼe ina tuku ia meʼa fuli ki ʼona lalo vaʼe.” Kaʼe ʼi te ui ʼae “neʼe ina tuku ia meʼa fuli ki ʼona lalo vaʼe,” ʼe mahino ia ʼe mole kau ai ia Ia ʼae neʼe ina tuku age ia meʼa fuli kia te ia. 28 Kaʼe ka ʼosi tuku age anai ia meʼa fuli kia te ia, pea ʼe fakalogo anai te ʼAlo kia Ia ʼae neʼe ina tuku age ia meʼa fuli, ke liliu ai te ʼAtua ko meʼa fuli maʼa te hahaʼi fuli.
Te Tokalelei Iā Taʼu e Afe ʼo Talu Ai!
17 ʼE mole he tahi fakamatala ʼo te maʼuli ʼi te hili ʼo te ʼu taʼu e afe, ʼe lelei age ʼi te ʼu palalau ʼaenī: “Ke katoa [peʼe ke ʼafio kātoa] te Atua i te u mea fuli.” Koteā tona fakaʼuhiga? Kotou manatuʼi, ʼi Eteni, ʼi te temi ʼaē neʼe kau ai ia Atama mo Eva ki te fāmili tokalelei ʼo Sehova, neʼe ko Sehova totonu, te Tuʼi ʼo te ʼAtulaulau, ʼaē neʼe ina puleʼi ʼana fakatupu, ʼi te lagi pea mo te kele. Neʼe feala ke natou felōgoi mo Sehova, mo tauhi kiā te ia pea mo maʼu te ʼu tapuakina mai iā ia. Neʼe “katoa [peʼe ʼafio kātoa] te Atua i te u mea fuli.”
Kumi Te ʼu Koloa ʼi Te Tohi-Tapu
(1 Kolonito 14:34, 35) ke fakalogologo te hahaʼi fafine ʼi te ʼu kokelekasio, koteʼuhi ʼe mole fakagafua age kia natou ke natou palalau. Kaʼe ke natou fakalogo ki te tagata, ohage ko tona toe fakaha foki ʼi te Lao. 35 Kapau ʼe natou fia iloʼi he meʼa, ke natou fakalavelave ki ʼonatou ʼohoana ʼi ʼonatou ʼapi, koteʼuhi ʼe ko he meʼa fakaufiufi ki he fafine hana palalau ʼi te kokelekasio.
w12 1/10 9, ʼa takai
Neʼe Tapuʼi Koa e Te ʼApositolo Ko Paulo Ke Palalau Te Hahaʼi Fafine?
Neʼe tohi fēnei e te ʼapositolo ko Paulo: “Ke fakalologo te u fafine i te u fakatahi.” (Ko mātou ʼaē neʼe matou fetogi tona faʼahiga tohi; 1 Kolonito 14:34) Koteā tona fakaʼuhiga? Neʼe ina ʼui koa neʼe mole natou faʼa popoto? Kailoa ia, he neʼe tautau talanoa pē lā ki te faiako lelei ʼa te hahaʼi fafine. (2 Timoteo 1:5; Tito 2:3-5) ʼI tana tohi ki te kau Kolinito, neʼe tokoni ai e Paulo ki te hahaʼi fafine ʼo toe fēia pē mo nātou ʼaē neʼe poto ʼi te ʼu lea kehekehe pea mo fai fakakikite, ke natou “fakalologo” mokā lolotoga palalau he tahi age tehina. (1 Kolonito 14:26-30, 33) Neʼe lagi fiafia ʼihi fafine Kilisitiano ʼuhi ko tanatou tui foʼou koia ʼaē neʼe natou tāʼofi ai ia ia ʼaē neʼe palalau moʼona fakafehufehuʼi, he neʼe ko te agamāhani ia ʼi te potu ʼaia ʼo te mālamanei. Moʼo tekeʼi te taʼi maveuveu ʼaia, neʼe fakalotomālohiʼi ai e Paulo ia nātou ke natou fai “fehui ki onatou ohoana i onatou api.”—1 Kolonito 14:35.
(1 Kolonito 15:53) Koteʼuhi ko te sino ʼae ʼe pala ʼe tonu ke fetogi ʼaki he sino ʼe heʼe pala, pea ko te sino ʼae ʼe mate ʼe tonu ke fetogi ʼaki he sino ʼe maʼuli tuputupua.
it-1-F 1180
He sino heʼe pala
Ko te fakatuʼuake ʼo Sesu ʼe tatau mo ʼona kaugā hau, koteʼuhi ʼe mole gata pe ki te maʼuli tuputupua kae ʼe natou toe maʼu he sino heʼe pala. Neʼe natou maʼuʼuli mo tauhi agatonu pea mo mamate ʼi he sino ʼe feala ke pala kae ʼe natou maʼu leva he sino heʼe pala. Pea ko te aluʼaga ʼaia ʼae ʼe fakamahino lelei e te apositolo ko Paulo ia 1 Kolonito 15:42-54. Koia ko te maʼuli tuputupua ʼe fakaʼuhiga ki te agaaga ʼo tonatou maʼuli ʼae ʼe heʼe gata mole feala ke mate ʼi he temi. Kae ko he sino ʼe heʼe pala ʼe fakaʼuhiga ki te sino ʼae neʼe foaki age e te ʼAtua, ʼae ʼe mole pala mo vaivai pea mo mate anai. Koia, ko te ʼAtua ʼae ʼe ina foaki te fealagia ke natou maʼuʼuli faʼitaliha, mole kei ʼaoga he ʼu meʼa ki tonatou maʼuli ohage la ko ʼihi fakatupu ʼa te ʼAtua ʼae ʼe fakakakano peʼe laumalie. Pea ʼe falala malohi te ʼAtua kia natou. Kae, ko te faʼahiga maʼuli faʼitaliha ʼaia mo tuputupua ʼe mole fakaʼuhiga mole kei fakalogo leva natou ki te ʼAtua. Kailoa. Ohage pe ko tonatou pule ko Kilisito Sesu, ʼe tonu ke natou muliʼi te finegalo mo te ʼu fakatotonu ʼa tanatou Tamai.—1Ko 15:23-28; vakaʼi maʼuli tuputupua; maʼuli.
VAHAʼA ʼO TE ʼAHO 29 ʼO APELILI–5 ʼO MAIO
TE ʼU KOLOA ʼO TE TOHI-TAPU | 2 KOLONITO 1-3
“Sehova—‘Te ʼAtua ʼAe ʼe Ina Fakafimalieʼi Te Hahaʼi ʼi Te ʼu Faʼahiga Aluʼaga Kehekeheʼ ”
(2 Kolonito 1:3) Ke vikiʼi te ʼAtua mo Tamai ʼo totatou ʼAliki ko Sesu Kilisito, te Tamai ʼo te ʼu manavaʼofa pea mo te ʼAtua ʼae ʼe ina fakafimalieʼi te hahaʼi ʼi te ʼu faʼahiga aluʼaga kehekehe,
“Kotou Fetagihi Mo Natou ʼAe ʼe Fetagihi”
4 Neʼe toe lotomamahi foki mo tatatou Tamai ʼofa ʼi te mamate ʼo natou ʼae neʼe ʼofa mamahi ai. Ohage la ko Apalahamo, mo Isaake, mo Sakopo, mo Moisese pea mo te Hau ko Tavite. (Numelo 12:6-8; Mateo 22:31, 32; Gaue 13:22) ʼE fakaha mai ʼi te Tohi-Tapu, ʼe fakaʼamu ia Sehova ke hoko mai la te ʼaho ʼae ka ina fakatuʼuake ai te ʼu tagata agatonu ʼaia. (Sopo 14:14, 15) ʼI te temi ʼaia, ʼe natou maʼuʼuli malolo pea mo fiafia anai. Neʼe toe lotomamahi foki ia Sehova ʼi te mate ʼo tona ʼAlo ʼofaina. ʼE ui ʼi te Tohi-Tapu neʼe ʼofa tafito te ʼAtua ia Sesu. (Taʼaga Lea 8:22, 30, MN) Pea ʼe mole feala ia ke tou fakafuafua te lotomamahi ʼae neʼe logoʼi e Sehova ʼi tana sio ifo ki te mate fakaʼofaʼofa ʼo tona ʼAlo.—Soane 5:20; 10:17.
(2 Kolonito 1:4) mo ina fakafimalieʼi tatou ʼi ʼotatou ʼahiʼahi fuli ke feala ai ke tou fakafimalieʼi ʼihi ʼi ʼonatou ʼahiʼahi kehekehe ʼaki te fakafimalie ʼae ʼe tou maʼu mai te ʼAtua.
“Kotou Fetagihi Mo Natou ʼAe ʼe Fetagihi”
14 ʼI ʼihi temi ʼe mole tou iloʼi pe ʼe kotea ʼae ka tou ui ki he tahi ʼe lotomamahi. Kaʼe ʼe ui ʼi te Tohi-Tapu “ko te ʼalelo ʼo te kau popoto ʼe ina fakamalolo ia.” (Taʼaga Lea 12:18, MN) Ko te tokolahi neʼe natou maʼu ʼi te kaupepa lahi Mokā Mate He Tahi ʼe Tou ʼOfa Mamahi Ai ia he ʼu palalau fakalotofimalie ke natou vaevae mo ʼihi. (Vakaʼi te kiʼi nota.) Kaʼe ʼi ʼihi temi, ko te meʼa ʼae ʼe lelei tafito ke tou fai ko tatatou “fetagihi mo natou ʼae ʼe fetagihi.” (Loma 12:15) Ko te tuagaʼane ʼe higoa ko Gaby ʼae kua mate tona ʼohoana, ʼe ina ui, ʼi ʼihi temi ʼe ina fakaha te ʼu meʼa ʼae ʼe ina logoʼi ʼaki pe ia tana tagi. Pea ʼe ina toe ui fenei: “Ko te tupuʼaga la ʼaia ʼo taku lotofimalie moka fetagihi ʼoku kaumeʼa pea mo au. He ʼe ʼi te ʼu lakaga ʼaia, ʼe mole au lotomamahi tokotahi ai.”
Kumi Te ʼu Koloa ʼi Te Tohi-Tapu
(2 Kolonito 1:22) Neʼe ina fakailoga tatou, pea mo ina foaki mai ki ʼotatou loto te fakamoʼoni ʼo te meʼa ʼae ka hoko, ʼae ko te laumalie maʼoniʼoni.
w16-F.04 32
Te ʼu Fehuʼi ʼa Te Kau Lautohi
Kotea te fakailoga mo te fakamoʼoni ʼae neʼe foaki e te ʼAtua ki te kau Kilisitiano fakanofo takitokotahi?—2 Ko. 1:21, 22; nota.
▪ Te fakamoʼoni: ʼE ui ʼi te tohi, ko te kupu Fakakeleka ʼae neʼe fakaliliu ko “fakamoʼoni” ia 2 Kolonito 1:22 neʼe ko he kupu neʼe fakaʼaogaʼi ki te ʼu aluʼaga fakasusitisia peʼe fakakoloa. ʼE fakaʼuhiga ki te ʼuluaki vaega fala ʼae ʼe huʼi fakatomuʼa moʼo taʼofi ʼo he meʼa ʼe toʼo pea ʼe ko he fakamoʼoni tukupau ʼaia kua maʼu. ʼO ʼuhiga mo te kau fakanofo, ko te totogi katoa peʼe ko tonatou fakapale ʼae ʼe ui ia 2 Kolonito 5:1-5, ʼe ko tonatou maʼu he sino heʼe pala ki te maʼuli ʼi selo. ʼE natou toe maʼu foki te maʼuli tuputupua.—1 Ko. 15:48-54.
ʼI te lea Fakakeleka ʼo te temi nei, ʼe ʼi ai te tahi kupu tatau ʼe fakaʼuhiga ki he mama ʼe fakamoʼoni ki he tokolua ʼe nā ʼamanaki ʼohoana. Pea ko te faʼifaʼitaki ʼaia ʼe ina fakata ia natou ʼae ka liliu anai ko te fafine ʼohoana ʼo Kilisito.—2 Ko. 11:2; Fkha. 21:2, 9.
▪ Te fakailoga: ʼI te temi ʼafea, neʼe fakaʼaogaʼi te fakailoga moʼo fakamoʼoni he meʼa ʼe ʼaʼana, he meʼa ʼe moʼoni peʼe moʼo maʼu he fakagafua. ʼO ʼuhiga mo te kau fakanofo, neʼe “fakailoga” natou ʼaki te laumalie maʼoniʼoni ʼo fakamoʼoni ai ko natou ʼe ʼa te ʼAtua. (Efe. 1:13, 14) Kae ko te fakailoga ʼo he fakanofo, ʼe hoki moʼoni anai ʼi he temi pe ʼi muʼa ʼo tona mate agatonu peʼe ʼi muʼa ʼo te hoko ʼo te mamahi lahi.—Efe. 4:30; Fkha. 7:2-4.
(2 Kolonito 2:14-16) Kaʼe ʼe tou fakafetaʼi ki te ʼAtua ʼae ʼe ina taki fakatahi tatou mo Kilisito ohage ko he kau solia ʼe liliu malo mai te tau, pea ʼe mafola te magoni ʼo te ʼatamai malama ʼo ʼuhiga mo ia ʼi te potu fuli. 15 Maʼa te ʼAtua ko tatou ko he ʼaele magoni ʼo te logo ʼo ʼuhiga mo Kilisito kia natou ʼae ʼe ʼi te ala ki te haofaki pea mo natou ʼae ʼe ʼi te ala ki te fakaʼauha. 16 Kia natou ʼae ʼe ʼi te ala ki te fakaʼauha ʼe ko he ʼaele ʼo te mate ki te mate, pea kia natou ʼae ʼe ʼi te ala ki te haofaki ʼe ko he ʼaele magoni ʼo te maʼuli ki te maʼuli. Ko ai koa ʼae ʼe ina lavaʼi te gaue ʼaia?
w10-F 1/8 23
Kua Kotou Ilo’i Koa?
Neʼe manatu kitea te apositolo ko Paulo ʼi tana talanoa ki “he kau solia ʼe liliu malo mai te tau”?
▪ Neʼe tohi fenei e Paulo: “ ’E ‘taki fakatahi tatou e te ʼAtua’ mo Kilisito ohage ko he kau solia ʼe liliu malo mai te tau, pea ʼe mafola te magoni ʼo te ʼatamai malama ʼo ʼuhiga mo ia ʼi te potu fuli. Maʼa te ʼAtua ko tatou ko he ʼaele magoni ʼo te logo ʼo ʼuhiga mo Kilisito kia natou ʼae ʼe ʼi te ala ki te haofaki pea mo natou ʼae ʼe ʼi te ala ki te fakaʼauha. Kia natou ʼae ʼe ʼi te ala ki te fakaʼauha ʼe ko he ʼaele ʼo te mate ki te mate, pea kia natou ʼae ʼe ʼi te ala ki te haofaki ʼe ko he ʼaele magoni ʼo te maʼuli ki te maʼuli.”—2 Kolonito 2:14-16.
Neʼe manatuʼi e te apositolo te agaʼi fenua Loma, neʼe ko he polosesio neʼe fai ʼo ʼuhiga mo he senelale neʼe malo ʼi te ʼu fili ʼo te Puleʼaga Loma. ʼI te ʼu ʼaho lahi ʼaia, neʼe natou fakahaha ai te ʼu meʼa ʼae neʼe natou maʼu mai te tau pea mo te kau pilisoni ʼo te tau. Neʼe ʼave ni vitulo moʼo sakilifisioʼi kae neʼe lolotoga vikiʼi e te hahaʼi te senelale mo tana kau solia. ʼI te ʼosi ʼo te polosesio, neʼe fai ni sakilifisio pea neʼe lahi te matehi ʼo te kau pilisoni.
ʼO ʼuhiga mo te fakata ʼae ko te “ ʼaele magoni ʼo te logo ʼo ʼuhiga mo Kilisito,” ʼe ui ʼi te tohi The International Standard Bible Encyclopedia, ʼe fakaʼuhiga ki te maʼuli peʼe ko te mate ki ʼihi. Pea neʼe haʼu mai te agaʼi fenua Loma ʼae neʼe tutu te iseso ʼi te ʼala ʼo te polosesio. Ko te magoni ʼo te iseso neʼe fakamanatuʼi ki te kautau tanatou malo kae ki te kau pilisoni tanatou ʼamanaki mate.