Talu tanatou tau fagona mai Seliko, neʼe nonofo ia Sesu mo ʼana tisipulo ʼi Petania ia po ʼe tolu. ʼI te Monite ʼaho 10 ʼo Nisani, ʼi te kei uhuuhu, neʼe natou olo ai leva ki Selusalemi. Neʼe fia kai ia Sesu. Koia, ʼi tana sio ki he fuʼu fiku, neʼe fakaovi ki ai. Neʼe fua koa?

Neʼe ko te fakaʼosi ʼaia ʼo te mahina ʼo Malesio, kaʼe ko te taʼukai ʼo te ʼu fiku neʼe ko te mahina ʼo Sunio. Kaʼe neʼe kua failau te fuʼu fiku. Koia neʼe manatu ai Sesu neʼe kua ʼi ai mo ʼona fua. Kaʼe neʼe mole ina maʼu pe la he foʼi fiku. Neʼe faihala ʼuhi ko te kua failau ʼo te fuʼu fiku. Neʼe ui fenei leva e Sesu: “Ke ʼaua naʼa toe kai he tahi ki tou fua.” (Maleko 11:14) Neʼe moamoa atu aipe te fuʼu fiku. Pea ʼi te uhu ake neʼe fakamahino e Sesu te fakaʼuhiga ʼo te meʼa ʼaia neʼe ina fai.

Mole fualoa, pea tau atu ia Sesu mo ʼana tisipulo ki Selusalemi. Neʼe alu ki te fale lotu, ʼae neʼe ina vakavakaʼi ʼi te ʼanafi, ʼi te hili hoʼata. Kaʼe ʼi tana alu leva ʼaeni ki ai, neʼe mole ina vakavakaʼi pe. Neʼe ina fai he meʼa neʼe tatau mo te meʼa ʼae neʼe ina fai kua hili ki ai taʼu ʼe tolu, ʼi te Pasikate ʼo te taʼu 30 H.T.S. (Soane 2:14-16) Neʼe kapu e Sesu ki tuʼa ia “natou ʼae neʼe faifakatau pea mo totogi ni koloa ʼi te fale lotu.” Neʼe ina tokatokahi mo “te ʼu laupapa ʼo te hahaʼi fetogi paʼaga pea mo te ʼu hekaʼaga ʼo natou ʼae neʼe fakatau lupe.” (Maleko 11:15) Pea neʼe mole ina tuku he tahi ke alu mo hana meʼa ki he tahi faʼahi ʼo te kolo, ke ina tuʼusi age ʼi te malaʼe ʼo te fale lotu.

He koʼe neʼe kapu e Sesu te hahaʼi fetogi paʼaga pea mo te hahaʼi ʼae neʼe natou fakatau te ʼu manu ʼi te fale lotu? Neʼe ina ui fenei: “ ʼE mole tohi koa la ‘ ʼE fakahigoa anai toku ʼapi ko he fale faikole maʼa te ʼu puleʼaga fuli’? Kaʼe neʼe kotou fakaliliu koutou ko he fale ʼo te kau kaihaʼa.” (Maleko 11:17) Neʼe ina ui ko te ʼu tagata ʼaia neʼe ko he kau kaihaʼa, koteʼuhi neʼe totogi kovi ʼaupito te ʼu manu ʼae neʼe tonu ke totogi e te hahaʼi moʼo fai he ʼu sakilifisio. Kia Sesu, neʼe ko he agakaka ia.

ʼE mahino papau ia, ko te kau pelepitelo pule, mo te kau sekelipa pea mo te kau takitaki ʼo te hahaʼi neʼe natou logo ki te meʼa ʼae neʼe fai e Sesu, pea neʼe lahi age tanatou faiga ke natou matehi ia ia. Kaʼe neʼe ʼi ai te faigataʼaʼia. Neʼe mole natou iloʼi pe ʼe feafeaʼi te matehi ʼo Sesu, koteʼuhi neʼe kaugā malie te hahaʼi ʼae neʼe fagono kia te ia.

Neʼe mole gata pe ki te hahaʼi ʼae neʼe tutupu Sutea ʼae neʼe ʼomai ki te Pasikate, kaʼe neʼe toe kau ki ai mo he kau poloselite, natou ʼae neʼe tafoki ki te lotu Sutea. Ia natou ʼaia, neʼe ʼi ai ʼihi Keleka neʼe ʼomai ʼo atolasio ʼi te ʼaho lahi. Neʼe natou olo kia Filipo, lagi ʼuhi ko tona higoa Fakakeleka, pea neʼe natou kole age ke natou felaveʼi mo Sesu. Neʼe mole faʼa iloʼi e Filipo pe ʼe lelei anai hanatou felaveʼi mo Sesu, koia neʼe ina fakaha ai kia Atelea. Pea neʼe nā olo toko lua ʼo fakaha age kia Sesu, ʼae neʼe lagi kei nofo ʼi te fale lotu.

Neʼe iloʼi e Sesu neʼe kei toe pe ni kiʼi ʼaho pea ʼe mate anai. Koia neʼe mole ko he temi ʼaia ke ina tali ki te ʼu fehuʼi ʼa te hahaʼi peʼe ke iloa ia ia. Neʼe ina tali age ki te ʼu apositolo ʼe toko lua ʼaki he lea fakatata, ʼo ina ui fenei age: “Kua hoko mai ia te hola ʼae ke fakakololiaʼi ai te Foha ʼo te tagata. ʼE au tala moʼoni atu kia koulua, kapau ʼe mole to te tegaʼi fulumeto ki te kele pea mo mate, ʼe ko he tegaʼi fulumeto pe ia ʼe tahi. Kaʼe kapau ʼe mate, pea ʼe fua anai ia ʼo lahi.”—Soane 12:23, 24.

Ko he tegaʼi fulumeto ʼe tahi ʼe hage ia ʼe mole faʼa maʼuhiga. Kaʼe kapau ʼe nunusi, peʼe “mate” te tegaʼi fulumeto, pea ʼe feala leva ke homo pea mo tuputupu ʼo fua ia ʼo lahi. ʼO toe feia, ko Sesu tokotahi pe ʼae neʼe haohaoa. Kaʼe, ʼaki tana nofo agatonu ki te ʼAtua ʼo kaku ki tona mate, ʼe feala anai ke maʼuli ʼo heʼe gata ia te hahaʼi tokolahi ʼae neʼe natou maʼu he manatu fakasakilifisio ohage ko ia. Koia neʼe ui fenei ai e Sesu: “Ko ʼae ʼe ʼofa ki tona maʼuli, ʼe ina pulihi anai, kaʼe ko ʼae ʼe fehiʼa ki tona maʼuli ʼi te malama ʼaeni ʼe ina taupau anai ki te maʼuli heʼe gata.”—Soane 12:25.

Neʼe mole manatu pe ia Sesu kia ia tokotahi, he neʼe ina ui fenei: “Kapau ʼe fia kaugana he tahi kia te au, ke mulimuli mai ia te au, pea ko te faʼahi ʼae ʼe au ʼi ai, ʼe toe ʼi ai foki anai mo taku kaugana. Kapau ʼe fia kaugana he tahi kia te au, pea ʼe fakamaʼuhigaʼi anai ia ia e te Tamai.” (Soane 12:26) ʼI toe fakapale lahi leva! Ko natou ʼae ʼe fakamaʼuhigaʼi e te Tamai ʼe natou kaugā gaue anai mo Kilisito ʼi te Puleʼaga.

ʼI te fakakaukauʼi e Sesu ia te mamahi lahi mo te mate fakamataku ʼae ka tau anai mo ia, neʼe ina ui fenei: “ ʼE au lotohoha ʼi te temi nei, pea kotea ʼae ke au ui? Tamai, haofaki au mai te hola ʼaeni.” Kaʼe neʼe mole fakaʼuhiga leva neʼe mole fia fakahoko e Sesu te finegalo ʼo te ʼAtua. Neʼe ina hoko atu fenei: “Kaʼe ʼe ko te hola ʼaeni ʼae neʼe tupu ai taku haʼu.” (Soane 12:27) Neʼe tali e Sesu te ʼu fakatuʼutuʼu fuli ʼa te ʼAtua, ʼo kau ai mo tona mate fakasakilifisio.

ʼI tana ʼi te fale lotu, ʼi te Monite ʼaho 10 ʼo Nisani, neʼe palalau ia Sesu ʼo ʼuhiga mo te fakaovi mai ʼo tona mate. ʼI te lotohoha ʼa Sesu naʼa laukoviʼi te ʼAtua, neʼe ina ui fenei: “Tamai, fakakololiaʼi tou huafa.” Pea neʼe ʼi ʼai te leʼo malohi mai te lagi neʼe ina ui fenei: “Neʼe au fakakololiaʼi pea ʼe au toe fakakololiaʼi anai.”—Soane 12:27, 28.

Neʼe feʼekeʼaki e te hahaʼi ʼae neʼe ʼi ai pe neʼe kotea ʼae neʼe natou logo ki ai. Neʼe manatu ʼihi neʼe ʼuʼulu he mana. Neʼe ui fenei e ʼihi age: “Neʼe palalau age he ʼaselo kia ia.” (Soane 12:29) Kaʼe neʼe ko Sehova ia ʼae neʼe palalau! Pea talu mai te kamata e Sesu tana minisitelio, neʼe mole ko te hoki logo ʼae ʼa te hahaʼi ki te leʼo ʼo te ʼAtua.

ʼI te ʼu taʼu ʼe tolu vaelua ki muʼa atu, ʼi te papitema ʼa Sesu, neʼe logo ia Soane Patita ki te ui fenei e te ʼAtua ʼo ʼuhiga mo Sesu: “Ko toku ʼAlo ʼaeni, toku ʼofaina, ʼae ʼe au fiafia ai.” Ki muli age, ʼi te ʼosi ʼo te Pasikate ʼo te taʼu 32 H.T.S., neʼe fetogi ia te agaaga ʼo Sesu ia muʼa ʼo Sakopo, mo Soane pea mo Petelo. Neʼe logo ia natou toko tolu ʼaia ki te ui fenei e te ʼAtua: “Ko toku ʼAlo ʼaeni, toku ʼofaina, ʼae ʼe au fiafia ai. Kotou fakalogo kia te ia.” (Mateo 3:17; 17:5) Kaʼe ʼi te lakaga leva ʼaeni, neʼe logo ia te hahaʼi tokolahi ki te leʼo ʼo Sehova.

Neʼe ui fenei e Sesu: “Neʼe mole logo te leʼo ʼaia ʼuhi ko au, kaʼe ʼuhi ko koutou.” (Soane 12:30) Neʼe ko te fakamoʼoni ʼaia ko Sesu moʼoni te ʼAlo ʼo te ʼAtua, te Mesia ʼae neʼe fakakikite.

Tahi ʼae meʼa, ʼaki te nofo agatonu ʼa Sesu, neʼe fakaha ai pe ʼe tonu ke feafeaʼi te maʼuli ʼo te hahaʼi pea mo fakamoʼoni ai ko Satana te Tevolo, te pule ʼo te malamanei, ʼe tonu ke pulihi. Neʼe ui fenei e Sesu: “ ʼI te temi nei, ʼe fakamauʼi te malama ʼaeni pea ʼe li anai ki tuʼa ia te pule ʼo te malama ʼaeni.” Pea neʼe ina hoko atu fenei: “Pea ka lagaʼi ake anai au, ʼe au taki mai anai kia te au te faʼahiga hahaʼi kehekehe.” (Soane 12:31, 32) Neʼe ha ai ʼaki te mate ʼo Sesu ʼe tapuakinaʼi ai anai te hahaʼi. ʼE ina taki mai anai kia te ia te hahaʼi, ke feala hanatou maʼu te maʼuli heʼe gata.

Moʼo tali ki te palalau ʼa Sesu ʼo ʼuhiga mo tona “lagaʼi ake,” neʼe ui fenei e te hahaʼi: “Neʼe matou logo mai te Lao ʼe nofo ʼo talu ai ia Kilisito. Kaʼe he koʼe ʼe ke ui ʼe tonu ke lagaʼi ake te Foha ʼo te tagata? Ko ai koa ia te Foha ʼo te tagata ʼaia?” (Soane 12:34) Logo la te ʼu fakamoʼoni fuli, ʼo kau ki ai mo tanatou logo ki te leʼo totonu ʼo te ʼAtua, kaʼe tokolahi ia natou neʼe mole natou tui ko Sesu neʼe ko te Foha moʼoni ʼo te tagata, te Mesia ʼae neʼe fakapapauʼi mai.

Ohage ko tana fai ʼi muʼa atu, neʼe fakatatau e Sesu ia ia ki “te malama.” (Soane 8:12; 9:5) Neʼe ina fakalotomalohiʼi fenei ia te hahaʼi: “ ʼE nofo anai te malama mo koutou ʼi he kiʼi temi nounou. Kotou haʼele ʼi takotou kei maʼu te malama, ke ʼaua naʼa puleʼi koutou e te fakapoʼuli. . . . ʼI takotou kei maʼu te malama, kotou tui ki te malama, ke kotou liliu ai ko te ʼu foha ʼo te malama.” (Soane 12:35, 36) Pea neʼe mavae leva Sesu mai ai, he neʼe mole tonu ia ke mate ʼi te ʼaho 10 ʼo Nisani. Neʼe tonu ia ke “lagaʼi ake,” peʼe ke tutuki ki he pou, ʼi te Pasikate ʼo te ʼaho 14 ʼo Nisani.—Kalate 3:13.

Ka tou vakaʼi te minisitelio ʼa Sesu, ʼe ha ai ko te mole tui ʼa te kau Sutea kia te ia neʼe fakahoko ai te lea fakapolofeta. Neʼe fakakikite e Isaia, ʼe fakakiviʼi anai te ʼu mata ʼo te hahaʼi pea ʼe fefeka anai ʼonatou loto, ʼo mole natou maliu anai ke fakamalolo natou. (Esaia 6:10; Soane 12:40) ʼEi, tokolahi te kau Sutea logogataʼa, neʼe mole natou tui ki te ʼu fakamoʼoni ʼae neʼe ko Sesu te tagata ʼae ʼe ina Haofaki natou, te ala ʼae ʼe ina taki ki te maʼuli.

Ko Nikotemo, mo Sosefo mai te kolo ko Alimatea pea mo ʼihi kau pule “neʼe natou tui” kia Sesu. Kaʼe, ʼuhi ko tanatou matataku naʼa fakamavae natou mai te sinakoka peʼe ʼuhi ko tonatou “ ʼoʼofa ki te kololia ʼo te tagata,” neʼe natou fakaha koa tanatou tui ʼaia, peʼe kailoa?—Soane 12:42, 43.

Neʼe fakamahino e Sesu totonu te fakaʼuhiga ʼo te tui kia te ia, ʼo ina ui fenei: “Ko ʼae ʼe tui kia te au, ʼe mole tui pe kia te au kaʼe ʼe toe tui foki kia ia ʼae neʼe ina fekauʼi mai au. Pea ko ʼae ʼe sio kia te au, ʼe toe sio foki kia Ia ʼae neʼe ina fekauʼi mai au.” Neʼe maʼuhiga ʼaupito te ʼu moʼoni ʼae neʼe fakatotonu e te ʼAtua kia Sesu ke ina akoʼi pea mo haga tala ki te hahaʼi, koia neʼe ui fenei e Sesu: “Ko ʼae ʼe mole fakaʼapaʼapa kia te au pea mole ina tali ʼaku folafola, ʼe fakamauʼi anai ia ia ʼi te ʼaho fakamuli ʼo fakatafito ki te folafola ʼae neʼe au tala.”—Soane 12:44, 45, 48.

Pea neʼe fakaʼosi fenei leva e Sesu: “Neʼe mole au palalau ʼi toku loto faʼitaliha, kaʼe ko te Tamai ʼae neʼe ina fekauʼi mai au, neʼe ina foaki mai he fakatotonu ʼo ʼuhiga mo te ʼu meʼa ʼae ʼe tonu ke au palalau pe ki ai. Pea ʼe au iloʼi ko tana fakatotonu ʼe taki ki te maʼuli heʼe gata.” (Soane 12:49, 50) Neʼe iloʼi e Sesu neʼe kua vave pe tana liligi tona taʼataʼa ko he sakilifisio maʼa te hahaʼi ʼae ka tui anai kia te ia.—Loma 5:8, 9.