ʼE Maʼuli Te Folafola ʼa Sehova

Ko He ʼu Puani ʼAoga ʼo Te Tohi ʼo Tāʼaga Lea

KO TE Hau ko Salomone ʼo te temi muʼa, neʼe “feala ke ina fai ia te ʼu tāʼaga lea e tolu afe.” (1 Hau 4:32) ʼE feala koa hatatou lau ia tana ʼu palalau fakapotopoto ʼaia? Ei. ʼI te Tohi-Tapu ʼi te tohi ʼo Tāʼaga Lea, ʼaē neʼe fakaʼosi tona tā ʼi te taʼu 717 ʼi muʼa ʼo totatou temi, ʼe tohi ai te ʼu tuʼuga tāʼaga lea ʼa Salomone. ʼE gata pe ko te ʼu kāpite fakamuli e lua, neʼe tohi e ʼihi tagata—ko Akule te foha ʼo Sake pea mo te hau ko Lemuele. Kae ko ʼihi ʼe natou ʼui, ko Lemuele neʼe ko te tahi pe ʼaia higoa ʼo Salomone.

ʼI te tohi ʼo Tāʼaga Lea, ko te ʼu folafola neʼe takitaki e te laumālie maʼoniʼoni, neʼe fai ʼuhi ko faʼahi e lua—“ke ʼiloʼi ia te poto pea mo te fakatonutonu.” (Tāʼaga Lea 1:2) ʼE tokoni mai te ʼu folafola ʼaia ke tou liliu ʼo popoto, ke tou mahino lelei ki he ʼu meʼa pea mo maʼuliʼi te ʼatamai mālama moʼo fakatokatoka te ʼu fihifihia. ʼE toe fakatonutonuʼi tātou e te ʼu tāʼaga lea, pea mo akoʼi tātou ke tou fai te aga ʼaē ʼe lelei. Kapau ʼe tou tokagaʼi te ʼu tāʼaga lea ʼaia pea mo fakaʼaogaʼi te ʼu tokoni ʼaē ʼe tou maʼu ai, ʼe feala anai ke malave ki ʼotatou loto, ke tou maʼuli fiafia, pea mo fua lelei.—Hepeleo 4:12.

‘MAʼU TE POTO PEA MO PUKE TE FAKATONUTONU’

(Tāʼaga Lea 1:1–9:18)

ʼE ʼui fēnei e Salomone: “Ko te poto moʼoni ʼe haga kalaga mālohi ʼi te ala.” (Tāʼaga Lea 1:20) He koʼe ʼe tonu ke tou fakalogo ki tana kalaga mālohi? ʼI te kāpite 2, ʼe tuʼu ai te ʼu tuʼuga tapuakina mo kapau ʼe tou maʼu te poto. ʼI te kāpite 3, ʼe tou maʼu ai te ʼu tokoni ʼo ʼuhiga mo te felogoi ʼaē mo Sehova. ʼE ʼui fēnei e Salomone: “Ko te poto ʼe ko te meʼa ʼaē ʼe maʼuhiga tāfito. Maʼu te poto; pea ʼaki te ʼu meʼa fuli ʼaē ʼe ke maʼu, maʼu mo te ʼatamai. Puke te fakatonutonu; ʼaua naʼa ke tuku age.”—Tāʼaga Lea 4:7, 13.

Koteā ʼaē kā tokoni anai ke tou tekeʼi ia te ʼu aga heʼeʼaoga ʼo te mālamanei? ʼE tali fēnei ia te kāpite 5 ʼo Tāʼaga Lea: Tou gāueʼi te fealagia fakakaukau, pea ke tou ʼiloʼi te mālohi ʼo te ʼu fakahala ʼa te mālamanei. Tou fakatokagaʼi te kua ʼāʼāsili ʼo te ʼu aga heʼeʼaoga. Ko te kāpite 6 ʼe ko te ʼu fakatokaga ʼo ʼuhiga mo te ʼu gāue pea mo te ʼu aga ʼaē ʼe fakatupu kovi ki tatatou felogoi ʼaē mo Sehova. Ko te kāpite 7 ʼe fakamatala ai te ʼu fakahala ʼe fai e he tahi ʼe aga heʼeʼaoga. ʼI te kāpite 8, ʼe fakahāhā lelei ai te maʼuhiga pea mo te ʼaoga ʼo te poto. Ko te kāpite 9, ʼe fakamahino fakaʼosi ai te ʼu tāʼaga lea ʼaē neʼe tou vakaʼi ʼi te ʼu kāpite ki muʼa atu, pea ʼe fakaʼaogaʼi ai te lea fakatātā lelei moʼo uga tātou ke tou haga kumi ia te poto.

Te ʼu Tali Ki Te ʼu Fehuʼi Faka Tohi-Tapu:

1:7; 9:10—ʼE faka ʼuhiga feafeaʼi ia te ʼui ʼaē ko te manavasiʼi kiā Sehova ʼe ko “te kamataʼaga ʼo te ʼatamai mālama” pea mo “te kamataʼaga ʼo te poto”? Kapau ʼe mole tou manavasiʼi kiā Sehova, pea ʼe mole tou maʼu anai ia te ʼatamai mālama, heʼe ko ia te Tupuʼaga ʼo te ʼu meʼa fuli pea ko te Tohi-Tapu ʼe haʼu mai ia te iā. (Loma 1:20; 2 Timoteo 3:16, 17) Ko ia te Matapuna ʼo te ʼatamai mālama moʼoni kātoa. Koia, ʼe tou maʼu ia te ʼatamai mālama mo kapau ʼe tou manavasiʼi ʼaki he aga fakaʼapaʼapa kiā Sehova. ʼE toe ʼui foki ko te manavasiʼi fakaʼatua ʼe ko te kamataʼaga ʼo te poto heʼe mole ʼi ai he poto mo kapau ʼe mole maʼu he ʼatamai mālama. Tahi ʼaē, ko he tahi ʼe mole manavasiʼi kiā Sehova ʼe mole ina lava fakaʼaogaʼi he faʼahiga ʼatamai moʼo fakavikiviki ki te Tupuʼaga.

5:3—He koʼe ʼe fakahigoaʼi he fafine paomutu ko “he fafine matāpule”? Iā Tāʼaga Lea 2:16, 17, ʼe ʼui ai ko he “fafine matāpule” ʼe ko he tahi kua “ina galoʼi te fuakava ʼo tona ʼAtua.” Neʼe ʼui ko he tahi ʼe ko he matāpule, mo kapau neʼe tauhi ki he ʼu ʼatua hala peʼe kua ina meʼa noaʼi te Lao ʼa Moisese, ohage lā ko he fafine paomutu.—Selemia 2:15; 3:13.

7:1, 2—Koteā te faka ʼuhiga ʼo te ʼu kupu “taku ʼu folafola” pea mo “taku ʼu fakatotonu”? ʼO hilifaki ki te ʼu akonaki faka Tohi-Tapu, ko te ʼu folafola pea mo te ʼu fakatotonu ʼaia ʼe faka ʼuhiga ki te ʼu lēkula peʼe ki he ʼu pelesepeto ʼe fai e he ʼu mātuʼa ke maʼuli fiafia te fāmili. ʼE tonu ki te kau tūpulaga ke natou mulimuli ki te ʼu fakatuʼutuʼu ʼaia pea mo te ʼu akonaki faka Tohi-Tapu ʼaē ʼe akoʼi age e tanatou ʼu mātuʼa.

8:30—Ko ai te “tufuga faiva”? ʼE feala pe ke ʼui ko te poto ʼe ko he tufuga faiva. ʼE mole gata pe ʼi te fakamahino, pe koteā te ʼuhiga ʼo te poto, kae neʼe fakatātā te poto e Sesu Kilisito ia te ʼAlo ʼuluaki tupu ʼo te ʼAtua, ʼi tana maʼuli ʼi selo ʼi muʼa ʼo tana tupu tagata. ʼI muʼa mamaʼo atu ʼo tana tupu tagata, neʼe ‘ko ia neʼe faʼu ko te kamataʼaga ʼo te ala ʼo te ʼAtua.’ (Tāʼaga Lea 8:22) ʼI tona ʼuhiga “tufuga faiva” neʼe gāue mālohi mo tana Tāmai lolotoga te fakatupu ʼo meʼa fuli.—Kolose 1:15-17.

9:17—Koteā “te ʼu vai ʼaē neʼe kaihaʼa” pea he koʼe ʼe “huʼa lelei”? Ko te Tohi-Tapu ʼe ina fakatatau te ʼu felāveʼi fakasino ʼaē ʼi te nofo ʼohoana ki he vai mokomoko ʼe ʼohu mai he vai keli, kae ko te ʼu vai ʼaē neʼe kaihaʼa ʼe fakatātā ki te ʼu felāveʼi fakasino heʼeʼaoga ʼaē ʼe fai fakafufū. (Tāʼaga Lea 5:15-17) ʼE hage ko he huʼa vai lelei mokā ʼui ke fai he ʼu felāveʼi fakasino heʼeʼaoga fakafufū.

Te ʼu Puani ʼe Tou Lava Tāʼofi:

1:10-14. Tou tōkakaga naʼa tou fia muli ʼi te ʼu ala ʼa te kau agahala ʼuhi heʼe natou fai ni ʼu fakapapau ʼo ʼuhiga mo he ʼu koloā.

3:3. Tou faka maʼuhigaʼi te lotoʼofa pea mo te agatonu, pea mo fakahā te ʼu kalitātē ʼaia ohage ko he kahoa totogi kovi. ʼE tonu foki ke tou tohi ʼi totatou loto te ʼu kalitātē ʼaia, ke pipiki kiā tātou.

4:18. ʼE tuputupu māmālie ia te ʼatamai mālama fakalaumālie. Kā tou fia nonofo ʼi te mālama fakalaumālie, ʼe tonu ke tou haga agavaivai pea mo agamalū.

5:8. ʼE tonu ke tou fakamamaʼo mai te ʼu fakahala heʼeʼaoga fuli, ʼaē ʼe maʼu ʼi te ʼu musika, ʼi te ʼu fakafiafia, ʼi te Internet, peʼe ʼi te ʼu tohi pea mo te ʼu nusipepa.

5:21. Ko he kaumeʼa ʼo te ʼAtua, ʼe fakafisi anai koa ki tana ʼu felogoi lelei mo te ʼAtua moʼoni ʼuhi pe ko he ʼu kihiʼi lakaga fakafiafia? Kailoa! Kapau ʼe tou fakamoʼoni ko Sehova ʼe sio ki te ʼu ʼaluʼaga fuli ʼo totatou maʼuli pea ʼe tou huʼi maʼua anai kiā ia ʼuhi ko te ʼu aga ʼaē ʼe tou fai, kae ʼe tou lotomālohi anai ʼo taupau he aga ʼe maʼa.

6:1-5. ʼE ko he tokoni lelei ʼe tou maʼu ʼi te ʼu vaega ʼaenī moʼo tekeʼi he “tali maʼua,” peʼe fakafeagai ki he gāue faka paʼaga fakakākā maʼa niʼihi! Kapau ʼe tou fakafuafua neʼe mole lelei hatatou aga, tou foimo ‘fakakolekole ki totatou tatau’ ʼaki he ʼu kolekole pea mo faiga fakamalotoloto ke tou fakatokatoka ia te fihifihia.

6:16-19. Ko te ʼu koga tāfito ʼaia e fitu ʼo te ʼu faʼahi kehekehe ʼo te agakovi. ʼE tonu ke tou fēhihiʼa ki te ʼu aga ʼaia.

6:20-24. Ko te ako ʼo te Tohi-Tapu, ʼe ina lava puipui he tahi mai te ʼu felāveʼi fakasino heʼeʼaoga. ʼE tōkakaga anai te ʼu mātuʼa ʼo foaki ki tanatou fānau ia te taʼi ako ʼaia.

7:4. ʼE tonu ke tou fakatuputupu tatatou manako ki te poto pea mo te ʼatamai.

KO TE ʼU TĀʼAGA LEA MOʼO TAKITAKI ʼO TĀTOU

(Tāʼaga Lea 10:1–29:27)

Ko te ʼu tāʼaga lea ʼa Salomone ʼaē ʼe toe, ʼe ko he ʼu folafola nounou kiā tātou takitokotahi. Kā tou lau ia te ʼu tāʼaga lea ʼe hage ʼe fefakafeagaiʼaki, peʼe tatau, ʼe ko he ʼu fakatā, pea ʼe tou maʼu ai te ʼu ako maʼuhiga ʼo ʼuhiga mo te aga, mo te palalau, pea mo te nātulā.

Mai te kāpite 10 ki te 24, ʼe talanoa tāfito ai ki te maʼuhiga ʼaē ke tou manavasiʼi kiā Sehova ʼaki he aga fakaʼapaʼapa. Ko te ʼu tāʼaga lea ʼo te kāpite 25 ki te 29, neʼe hiki e “te hahaʼi ʼa Esekiasi te hau ʼo Suta.” (Tāʼaga Lea 25:1) Ko te ʼu tāʼaga lea ʼaia ʼe natou akoʼi tāfito mai, ia te maʼua ʼaē ke tou falala kiā Sehova, pea ʼe tou maʼu mo te tahi age ʼu ako maʼuhiga.

Te ʼu Tali Ki Te ʼu Fehuʼi Faka Tohi-Tapu:

10:6, te nota ʼi te lalo pasina—E feafeaʼi te ‘ ʼuʼufi ʼo te agamālohi e te gutu ʼa te kau agakovi’? Lagi ʼe natou ʼuʼufi mokā natou fai he palalau ʼe lelei, kae ʼi tona fakahagatonu ʼe natou ʼuʼufi tanatou ʼu fakatuʼutuʼu kākā moʼo fakamamahiʼi te hahaʼi. Ko tona tahi faka ʼuhiga, ʼi te agamāhani neʼe fehiʼaʼinaʼi te kau agakovi, koia kā fai age he aga ʼe kovi kiā nātou pea neʼe nonofo fakalogologo pe nātou.

10:10—ʼE fakatupu mamahi feafeaʼi ia “ia [ʼaē] ʼe kemo tona mata”? ʼE feala ki “he tagata vale” ke “gutu kākā” heʼe ina fia fufū te ʼu meʼa ʼaē ʼe loto moʼoni kiai, ohage ko te “kemo [ʼo] tona mata.” (Tāʼaga Lea 6:12, 13) Ko te taʼi kākā ʼaia, ʼe liliu ko he meʼa fakatupu lotomamahi ki he tahi.

10:29—E feafeaʼi ia “te ala ʼo Sehova”? ʼE faka ʼuhiga ki te tokaga ʼaē ʼa Sehova ki te mālamanei kae mole faka ʼuhiga ʼi henī ki te faʼahiga maʼuli ʼaē ʼe tonu ke tou fai. ʼE fīmālie te kau faitotonu mokā natou felogoi mo te ʼAtua, kae ʼe fakatupu kovi ki te kau agakovi.

11:31—He koʼe ʼe tonu ke lahi age te fakapale ʼo te kau agakovi ʼi te kau faitotonu? ʼE faka ʼuhiga ʼi henī te fakapale: ki te lahi ʼo te tautea ʼaē kā fai ki te kau agakovi takitokotahi. Kā faihala he tahi ʼe faitotonu, pea ʼe fakatonutonuʼi tana ʼu hala. Kae ko te tagata agakovi ʼaē ʼe agahala mo tona loto faʼitaliha pea ʼe mole fia fakahemala, ʼe lahi tona ia tauteaʼi.

12:23—E feafeaʼi ki he tahi hana “ ʼuʼufi te ʼatamai”? ʼE mole faka ʼuhiga leva ʼe ina ʼuʼufi kātoa ia tona ʼatamai, kae ʼe mole ina fia fakahāhā tona poto.

14:17—E feafeaʼi ia “te fehiʼaʼinaʼi ʼo te tagata ʼaē ʼe poto fakakaukau”? Ko te kupu faka Hepeleo ʼaē neʼe fakaliliu ʼaki te “poto fakakaukau,” ko tona faka ʼuhiga ʼe fakasiosio tonu peʼe fakakaukau kovi. ʼI te agamāhani, ko he tagata ʼe agakovi ʼe fehiʼaʼinaʼi. Kae ʼe toe fehiʼaʼinaʼi foki mo te tagata ʼaē ʼe fakasiosio tonu ʼe ina fakaʼaogaʼi tona ʼu fealagia fakakaukau pea ʼe ina filifili ke “mole kau ki te mālamanei.”—Soane 15:19, MN.

18:19—ʼE faka ʼuhiga feafeaʼi te ʼui ʼaē ko “he tēhina neʼe tou laukovi ki ai ʼe mālohi age ia ʼi he kolo mālohi”? ʼE hage ko he kolo mālohi ʼe teuteu ʼohofi e tona fili ia ia ʼaē ʼe mole ina tali ke fakatō laloʼi tana ʼu pelesepeto. Ko te ʼu fihifihia ʼaē neʼe hoko mo ia ʼaē neʼe agahala age kiā ia, ʼe feala ke liliu ko “te ukamea ʼo te tule ʼe nofoʼi.”

Te ʼu Puani ʼe Tou Lava Tāʼofi:

10:11-14. Ke lotomālohi te hahaʼi ʼaki tatatou ʼu palalau, ke tou fonu ʼi te ʼatamai mālama totonu, pea ke gāue totatou loto ʼaki te ʼofa, pea ke taki e te poto ia tātou mokā tou palalau.

10:19; 12:18; 13:3; 15:28; 17:28. Ke mole lahi fau te ʼu meʼa ʼaē ʼe tou lea kiai, kae ke tou fakakaukau ʼi muʼa ʼo hata palalau.

11:1; 16:11; 20:10, 23. ʼE loto e Sehova ke tou agatonu ʼi tatatou ʼu gāue faka koloā.

11:4. ʼE tou vavale mo kapau ʼe tou kumi koloā kae mole tou fakaʼaogaʼi te temi ʼaia moʼo ako te Tohi-Tapu, mo kau ki te ʼu fono, mo faikole, pea mo fai faka mafola.

13:4. ʼE mole tonu pe ke tou ‘holi’ ki he pilivilesio ʼi te kokelekasio peʼe ʼi te mālama foʼou. ʼE tonu foki ke tou faʼa gāue pea mo faiga fakamalotoloto ʼo maʼuliʼi te ʼu fakamaʼua ʼaē ʼe tuku mai kiā tātou.

13:24; 29:15, 21. Ko he ʼu mātuʼa ʼofa ʼe mole nā fakapelepeleʼi fau anai hanā tamasiʼi neʼe ina fai he meʼa ʼe kovi. Kae ʼe nā foaki anai te tūʼā ʼaē ʼe tāu mo te tamasiʼi, ke ʼaua naʼa liliu te tamasiʼi ki ʼamuli ʼo agakovi age ʼosi.

14:10. ʼE tuʼakoi ia te tokoni ʼaē ʼe lava foaki mai e ʼihi, heʼe ʼi ʼihi temi ʼe mole natou mahino kātoa ki te ʼu meʼa ʼaē ʼe tou mamahi kiai. ʼE tonu pe anai ko Sehova ʼaē kā tou falala ki ai moʼo fakatokatoka totatou ʼu fihifihia.

15:7. ʼI ʼihi temi, ʼe mole tonu anai ke tou fakahā fuli ki he tahi ia te ʼu meʼa ʼaē ʼe tou ʼiloʼi, ohage pe ko he tagata gāue kele ʼe mole ina to fuli anai tana ʼu pulapula ʼi he faʼahi e tahi ʼo te kele. Ko te tagata poto ʼe ina fakahā māmālie ia tona ʼatamai ʼo mulimuli pe ki te ʼu faigamālie.

15:15; 18:14. Kapau ʼe lelei te ʼu meʼa ʼaē ʼe tou manatu kiai, pea ʼe tou fiafia anai māʼiape lā mo te ʼu temi ʼaē ʼe tou tau ai mo ni ʼu faigataʼaʼia.

17:24. ʼE mole tou hage ko “te tagata vale” ʼaē ʼe hēhē pe tona ʼu mata pea mo tona ʼatamai kae mole tokaga ki te ʼu meʼa tāfito ʼo te maʼuli, koia ʼe tonu ai ke tou kumi ia te lotomahino ke feala hatatou agapoto.

23:6-8. ʼAua naʼa tou fai he tali kāiga faka malualoi.

27:21. ʼE tou fakahā anai totatou nātulā moʼoni ʼi te temi ʼaē ʼe laupisiʼi ai tātou. Heʼe kā laupisiʼi tātou kae ʼe tou agavaivai, ʼe tou fakahā aipe tatatou mahino ʼaē ʼe tou tuʼu maʼua kiā Sehova pea ʼe tonu ke tou haga tauhi kiā te ia. ʼE hā tatatou mole agavaivai mokā liliu ia te ʼu fakavikiviki ʼo fakatupu iā tātou te fiatuʼu.

27:23-27. ʼE talanoa ʼi te ʼu vaega ʼaia ki te gāue ʼa te tagata tauhi manu, moʼo fakahā ia te maʼuhiga ʼaē ke tou maʼuli faka feʼauga mai he gāue kinakina. ʼE fakahā lelei ʼi te ʼu vaega ʼaia ia te maʼuhiga ʼaē ke tou falala ki te ʼAtua.a

28:5. Kapau ʼe tou “kumi ia Sehova” ʼi te faikole pea mo te temi ʼaē ʼe tou ako ai tana Folafola, ʼe tou “mahino [ai anai] kiā meʼa fuli” ʼe ʼaoga ke tali ia tatatou tauhi e te ʼAtua.

‘TE ʼU LOGO MAʼUHIGA’

(Tāʼaga Lea 30:1–31:31)

ʼE fakaʼosi te tohi ʼo Tāʼaga lea ʼaki ‘te ʼu logo maʼuhiga’ e lua. (Tāʼaga Lea 30:1; 31:1) ʼAki te fakaʼaogaʼi ʼaē e Akule ia te ʼu lea fakatātā moʼo uga tatatou fakakaukau, ʼe ina fakahā mai ia te mālohi ʼo te loto mānumānu pea mo te faigataʼa ia te ʼiloʼi ʼo te ʼu kākā ʼa he tagata moʼo fakalalata he finemui.b ʼE toe tokoni mai ke tou fakafeagai ki te fia vikiʼi pe ʼo kita totonu pea mo te palalau ʼita.

Neʼe maʼu e Lemuele ia te logo maʼuhiga mai tana faʼē, ko he tokoni maʼuhiga ʼo ʼuhiga mo te fakaʼaogaʼi ʼo te vino pea mo te huʼa kava, pea mo te faifakamāu ʼi te faitotonu. ʼE fakaʼosi fēnei ia te fakamatala ʼo ʼuhiga mo te fafine ʼohoana faʼa gāue: “Foaki age kiā te ia te fua ʼo tona ʼu nima, pea ke vikiʼi ia ia e tana ʼu gāue.”—Tāʼaga Lea 31:31.

ʼE talanoa ʼi te tohi ʼo Tāʼaga lea ke tou maʼu ia te poto, ke tou tali ia te fakatonutonu, ke tou manavasiʼi fakaʼatua, ke tou falala kiā Sehova. ʼE ko he ʼu ako maʼuhiga ʼi te ʼu tāʼaga lea neʼe takitaki e te laumālie maʼoniʼoni! ʼAki te ʼu tokoni fuli ʼaia, tou maʼuliʼi pea ʼe tou maʼu ai anai te fiafia ʼa “te tagata ʼaē ʼe manavasiʼi kiā Sehova.”—Pesalemo 112:1.

[Kiʼi nota]

[Paki ʼo te pasina 12]

Ko Sehova ʼe ko te Matapuna ʼo te ʼatamai mālama moʼoni kātoa

[Paki ʼo te pasina 14]

Koteā te faka ʼuhiga ʼo te ‘fakahā māmālie ʼo te ʼatamai’?