ʼE Muliʼi Moʼoni Koa e Te Kau Fakamoʼoni ʼa Sehova Ia Kilisito?

ʼE tui papau te kau Fakamoʼoni ʼa Sehova ʼe natou muliʼi moʼoni ia Kilisito. Kotea tona tupuʼaga? ʼUhi ko te ʼu tupuʼaga tafito ʼaeni ʼe tolu: ʼE natou fakatafito ki te Tohi-Tapu te ʼu akonaki ʼe natou tui ki ai, mo te higoa ʼae ʼe natou toʼo pea mo tanatou maʼuli feʼofaʼofani.

1. ʼE fakatafito kitea te ʼu akonaki ʼe natou tui ki ai?

Neʼe ui e Sesu ‘ko te folafola [ʼa te ʼAtua] ʼe ko te moʼoni.’ (Soane 17:17) ʼE faʼifaʼitakiʼi e te kau Fakamoʼoni ʼa Sehova ia Sesu. ʼE natou fakatafito ki te Folafola ʼa Te ʼAtua te ʼu akonaki ʼae ʼe natou tui ki ai. Ohage la, ʼe feala tau vakaʼi te aluʼaga neʼe hoko ʼi te fakaʼosi ʼo te 19 sekulo. ʼI te ʼu taʼu 1870, neʼe ako mo vakavakaʼi fakalelei e he kiʼi kutuga ia te Tohi-Tapu. Neʼe natou fakatafito ki ai ʼanatou akonaki logo la neʼe mole hage ko te ʼu meʼa ʼae neʼe akoʼi ʼi te ʼu ekelesia. Pea neʼe natou kamata fakaha leva ki ʼihi te ʼu moʼoni Fakatohi-tapu ʼaia.a

2. He koʼe ʼe ui ko te kau Fakamoʼoni ʼa Sehova?

ʼE fakahigoaʼi e Sehova ʼana kaugana ko ʼana fakamoni. Kotea tona tupuʼaga? He ʼe natou fakaha te moʼoni ʼo ʼuhiga mo ia. (Hepeleo 11:4–12:1) Ohage la, neʼe ui e Sehova ki tana hahaʼi ʼi te temi muʼa: ‘Ko koutou ko ʼaku fakamoʼoni.’ (Lau ia Esaia 43:10.) ʼE ui ko Sesu ʼe ko “te Fakamoʼoni Agatonu.” (Apokalipesi 1:5) Koia ʼae ʼi te taʼu 1931, ʼe matou toʼo ai te higoa ʼae ko te kau Fakamoʼoni ʼa Sehova. Pea ʼe matou fiafia ʼi te fua ʼo te higoa ʼaia.

3. ʼE natou faʼifaʼitakiʼi feafeaʼi te ʼofa ʼo Sesu?

Neʼe ʼofa mamahi ia Sesu ʼi ʼana tisipulo. Koia neʼe hage pe kia ia ko hona famili. (Lau ia Maleko 3:35.) ʼO toe feia pe, ʼe faʼufaʼu e te kau Fakamoʼoni ʼa Sehova he foʼi famili fakamalamanei ʼe logo tahi. Koia ʼae ʼe matou ui ai ko matou ko he fale tau tehina mo tau tuagaʼane. (Filimone 1, 2) Pea ʼe matou toe fakalogo ki te fakatotonu ʼaeni: “Kotou ʼoʼofa ki te fale tau tehina katoa.” (1 Petelo 2:17) Koia, ʼe lahi te ʼu aluʼaga ʼe fakaha ai e te kau Fakamoʼoni ʼa Sehova te ʼofa ʼaia. Ohage la, ʼe natou tokoni ki ʼonatou tehina mo tuagaʼane ʼi te malamanei katoa.

TA FAKALOLOTO

4. ʼE fakatafito ki te Tohi-Tapu te ʼu akonaki ʼe natou tui ki ai

Neʼe fakakikite e Sehova ʼe tou mahino lelei anai ki te ʼu moʼoni Fakatohi-tapu. Lau ia Taniela 12:4 pea mo te nota, pea fai te fehuʼi ʼaeni:

• Kotea ʼae ka ‘lahi anai’ moka ako e te ʼu kaugana ʼa te ʼAtua te Tohi-Tapu?

Neʼe kau ia Charles Russell ki te kutuga ʼo te kau ako ʼo te Tohi-Tapu. Ta vakaʼi pe neʼe natou ako feafeaʼi ia te Folafola ʼa Te ʼAtua. Vakaʼi te ʼATA VITEO, pea fai te fehuʼi ʼae ʼe hoa mai.

ʼATA VITEO: ʼE Natou Toe Vakaʼi Te ʼu Moʼoni Fakatohi-tapu (7:45)

• Neʼe ako feafeaʼi e te kutuga ʼa Charles Russell ia te Tohi-Tapu?

Kua ke iloʼi koa?

ʼI ʼihi temi, ʼe matou fai he ʼu fetogi ʼi te ʼu akonaki ʼe matou tui ki ai. Kotea tona tupuʼaga? He ʼe fakamahino mamalie e te ʼAtua tana Folafola, ohage pe ko te ha mamalie ʼo te ʼu faʼahi fuli ʼo he fenua moka hopo ake te laʼa. (Lau ia Taʼaga Lea 4:18.) Koia, ʼe mole fetogi ia te Tohi-Tapu, kae ka matou mahino lelei ki ai pea ʼe matou fetogi te meʼa ʼae ʼe matou akoʼi.

5. ʼE matou fakamoʼoni kia Sehova

ʼATA VITEO: ʼE Iloʼi Te Gaue ʼe Tou Fai ʼUhi Ko Te Higoa ʼe Tou Toʼo (2:40)

• He koʼe neʼe filifili lelei te higoa ʼae ko te kau Fakamoʼoni ʼa Sehova?

He koʼe neʼe filifili e Sehova ni hahaʼi ke liliu ko hana kau fakamoʼoni? He ʼe natou fakaha anai ko ia te ʼAtua moʼoni logo la te ʼu loi ʼe fakamafola ʼo ʼuhiga mo ia. Ta vakaʼi he ʼu loi ʼe lua.

ʼE akoʼi e ʼihi lotu ʼe loto e te ʼAtua ke tou atolasio age ʼaki ni fakatata peʼe ko he ʼu pāki. Lau ia Levitiko 26:1, pea fai te ʼu fehuʼi ʼaeni:

• Kotea ʼe ui ʼo ʼuhiga mo te ʼu fakatata? Kotea te manatu ʼa Sehova ʼo ʼuhiga mo te ʼu fakatata ʼaia?

ʼE akoʼi e ʼihi lotu ko Sesu ʼe ko te ʼAtua. Lau ia Soane 20:17, pea fai te ʼu fehuʼi ʼaeni:

• Kotea ʼae ʼe ui ʼo ʼuhiga mo te ʼAtua pea mo Sesu? ʼE nā tatau koa?

• Neʼe fekauʼi e Sehova ʼana Fakamoʼoni ke natou tala te moʼoni ʼo ʼuhiga mo ia pea mo tona ʼAlo. Kotea la ʼe ke logoʼi ʼi tau iloʼi te faʼahi ʼaia?

6. ʼE natou maʼuli feʼofaʼofani

ʼE fakatatau ʼi te Tohi-Tapu te kau Kilisitiano ki te ʼu koga kehekehe ʼo te sino. Lau ia 1 Kolonito 12:25, 26, pea fai te ʼu fehuʼi ʼaeni:

• Kotea ʼe logoʼi e te kau Kilisitiano moʼoni moka mamahi ʼonatou tehina mo tuagaʼane?

• Kotea la ʼe ke tokagaʼi ʼi te kau Fakamoʼoni ʼa Sehova?

Ka tau he kau Fakamoʼoni ʼa Sehova mo he mamahi ʼi he fenua pe, pea ʼe faiga te kau Fakamoʼoni ʼa Sehova ʼi te malamanei katoa ke natou tokoni kia natou. Ohage la ko te aluʼaga ʼaeni, vakaʼi te ʼATA VITEO. Pea fai te fehuʼi ʼae ʼe hoa mai.

ʼATA VITEO: Neʼe To Te Afā Matthew ʼi Haïti (5:29)

• Neʼe fakaha feafeaʼi e te ʼu tehina mo tuagaʼane ʼae ʼe kau ki te selevisi haofaki maʼuli ia tonatou ʼofa?

MANATU TAFITO

Ko te kau Fakamoʼoni ʼa Sehova ʼe ko te ʼu tisipulo moʼoni ʼa Kilisito. ʼE natou faʼufaʼu he foʼi famili fakamalamanei, mo fakatafito ki te Tohi-Tapu te ʼu akonaki ʼe natou tui ki ai pea mo fakaha te moʼoni ʼo ʼuhiga mo Sehova.

Fehuʼi Fakamanatu

• He koʼe ʼe fakahigoaʼi matou ko te kau Fakamoʼoni ʼa Sehova?

• Kotea ʼae ʼe natou fefakahaʼaki?

• ʼI tau manatu la, ko te kau Fakamoʼoni ʼa Sehova ʼe ko he ʼu tisipulo moʼoni koa ʼa Kilisito?

TE TAHI ʼU MANATU

He fakamatala ʼo ʼuhiga mo te hisitolia ʼo te kau Fakamoʼoni ʼa Sehova.

Les Témoins de Jéhovah. La foi en action, 1^re partie : La sortie des ténèbres (1:00:53)

He loi neʼe fakaha e te kau Fakamoʼoni ʼa Sehova.

ʼE Fakakololiaʼi e Te Hahaʼi ʼa Te ʼAtua Tona Huafa (7:08)

He ʼu tali ki he ʼu fehuʼi ʼe lagi neʼe ke fai ʼo ʼuhiga mo te kau Fakamoʼoni ʼa Sehova.

“Fehuʼi ʼe Fai Tuʼumaʼu ʼo ʼUhiga Mo Te Kau Fakamoʼoni ʼa Sehova” (pasina ʼi te jw.org)

Neʼe fehiʼa ia Stephen ki te tahi ʼu lanu, koia neʼe ina fai ni fakapo. Neʼe fetogi tana aga ʼi tana tokagaʼi te aga ʼa te kau Fakamoʼoni ʼa Sehova.

“Neʼe ʼAʼasili Kovi Age Toku Maʼuli” (Ko Te Tule Leʼo ʼaho 1 ʼo Oketopeli 2015)