ʼE Tui Koa Ia Te Kau Fakamoʼoni ʼa Sehova Kia Sesu?

ʼE MAʼUHIGA KE KITA TUI KIA SESU

Atonio: Malo Tomi si ʼou maʼuli. ʼE ke lelei pe?

Tomi: ʼIo, malo Atonio si ʼou maʼuli. ʼE lelei ʼosi pe ia.

Atonio: Ko au ʼaeni neʼe au haʼu mo ʼau nusipepa foʼou ʼaeni, Te Tule Leʼo pea mo te Réveillez-vous !

Tomi: Malo pe siʼi ʼofa. Pea ʼe to lelei la tau haʼu, heʼe ʼi ai te faʼahi ʼe au fia fakalavelave atu.

Atonio: Mole kovi ia.

Tomi: Neʼe au faipalalau mo toku kaumeʼa ʼi te fale gaue ʼo ʼuhiga mo te ʼu tohi ʼae ʼe ke tuku mai pea mo te ʼu manatu lelei ʼae ʼe tuʼu ʼi ai. Kaʼe neʼe ina ui mai ke ʼaua naʼa au lau ia te ʼu tohi ʼaia koteʼuhi ʼe mole tui ia te kau Fakamoʼoni ʼa Sehova kia Sesu. ʼE ko tana moʼoni koa?

Atonio: ʼE au fiafia ʼi tau fakalavelave mai ia te faʼahi ʼaia. ʼE lelei tau fehuʼi tonu mai kia au, ke feala haku fakamahino atu tona moʼoni.

Tomi: Neʼe ko taku manatu la ʼaia.

Atonio: ʼE tui ia te kau Fakamoʼoni ʼa Sehova kia Sesu pea ʼe maʼuhiga ke kita tui kia Sesu ke haofaki ai kita.

Tomi: Neʼe au iloʼi pe au ʼe kotou tui kia Sesu, kaʼe ʼi te ui mai e toku kaumeʼa ʼe mole kotou tui kia Sesu, neʼe tupu ai taku fia iloʼi. Pea tahi, neʼe heʼeki ta faipalalau ki te faʼahi ʼaia.

Atonio: ʼE ke moʼoni. ʼE feala la ke au fakaha atu he ʼu vaega Tohi-Tapu ʼe fakaha lelei ai ia te maʼuhiga ʼae ke tou tui kia Sesu? ʼE ko te ʼu vaega ʼae ʼe tautau fakaʼaogaʼi e te kau Fakamoʼoni ʼa Sehova ʼi tanatou faifakamafola.

Tomi: Mole kovi ia, ta fai taua ki ai.

Atonio: ʼE feala ke ta kamata ʼaki te vaega ʼo Soane 14:6. ʼE ko Sesu ʼae ʼe palalau ki he tahi ʼi ʼana apositolo. ʼE ui fenei ʼi te vaega: “Nee ui age leva e Sesu kia ia: Ko au ko te ala, mo te mooni, pea mo te mauli. E mole he tahi e hau ki te Tamai kae ia au pe.” ʼO mulimuli ki te vaega ʼaeni, kapau ʼe tou fia fakaovi ki te Tamai, pea ko ai ʼae ʼe tonu ke tou ʼala ʼaki?

Tomi: ʼAki ia Sesu.

Atonio: ʼE ke tonu. Pea ʼe tui moʼoni ia te kau Fakamoʼoni ʼa Sehova ki te faʼahi ʼaia. Koia, ʼi tau iloʼi leva ia te manatu ʼaeni ʼa te ʼAtua, ka faikole he tahi, pea ʼe tonu ke ina momoli ʼaki ia te huafa ʼo ai?

Tomi: ʼO Sesu.

Atonio: Koia. Ko tona tupuʼaga la ʼae ʼo taku momoli ʼaku faikole ʼaki ia te huafa ʼo Sesu. ʼE toe fai feia mo te kau Fakamoʼoni fuli ʼa Sehova.

Tomi: ʼE lelei foki ke kita mahino ki te faʼahi ʼaia.

Atonio: ʼE feala ke ta vakaʼi ia te tahi vaega, ia Soane 3:16. ʼE maʼuhiga ʼaupito ia te vaega ʼaia heʼe tohi fakanounou ai te ʼu manatu fuli ʼo te ʼu Evaselio, ʼae ʼe fakamatala ai ia te maʼuli pea mo te faifakamafola ʼa Sesu. ʼE feala la ke ke lau ia te vaega ʼaia?

Tomi: ʼIo. “He nee ofa lahi osi te Atua ki te malamanei nee ina foaki ai tona Alo ulutokotahi, o tupu ko he tahi pe e tui kia ia ke aua naa mate ia, kae ke ina mau te mauli heegata.”

Atonio: Malo. Neʼe kua ke logo koa la ki te vaega ʼaeni?

Tomi: ʼEi, koteʼuhi ʼe tautau lau ʼi te misa.

Atonio: Ko he vaega Tohi-Tapu ʼe iloa. Kapau ʼe ta fakasiosio lelei, ʼe ke tokagaʼi neʼe ui e Sesu: ʼE feala ke maʼuʼuli ʼo heʼe gata ia te hahaʼi ʼuhi ko te ʼofa ʼo te ʼAtua. Kaʼe kotea ʼae ʼe tonu ke natou fai?

Tomi: ʼE tonu ke natou tui.

Atonio: Koia. ʼE tonu ke tou tui ki te ʼAlo ʼulutokotahi, ia Sesu Kilisito. Pea ko te manatu ʼae ʼe feala ke tou maʼuʼuli ʼo heʼe gata mo kapau ʼe tou tui kia Sesu, ʼe tuʼu lelei pe ʼi te lua pasina ʼo te nusipepa ʼae neʼe au tuku atu. ʼE ui ʼi heni, ko te nusipepa ʼaeni “ʼe tokoni ki te kau lautohi ke natou tui kia Sesu Kilisito, ʼae neʼe mate ke feala hatatou maʼu ia te maʼuli heʼe gata pea ʼe lolotoga ʼafio nei ko te Hau ʼo te Puleʼaga ʼo te ʼAtua.”

Tomi: Ta ʼe tuʼu lelei pe ʼi heni ʼe tui te kau Fakamoʼoni ʼa Sehova kia Sesu.

Atonio: Koia la ʼaia.

Tomi: Kapau la koia, he ko ʼe ʼe lau e te hahaʼi ʼe mole kotou tui kia Sesu?

Atonio: ʼE lagi lahi ʼona tupuʼaga. ʼI ʼihi temi, ʼe palalau feia te hahaʼi he neʼe natou logo ki te lau e ʼihi ia te faʼahi ʼaia. Peʼe neʼe natou logo mai ʼanatou takitaki lotu.

Tomi: Peʼe lagi lau la e ʼihi ʼe mole kotou tui kia Sesu koteʼuhi ʼe ko koutou ko te kau Fakamoʼoni ʼa Sehova, kaʼe mole ʼa Sesu.

Atonio: ʼE moʼoni, ko te manatu ʼaia ʼa ʼihi.

Tomi: Kaʼe he ko ʼe ʼe kotou palalau tuʼumaʼu ʼo ʼuhiga mo Sehova?

“NEE AU FAKAILOILO KIA NATOU TOU HUAFA”

Atonio: ʼE matou tui ʼe maʼuhiga ia te fakaʼaogaʼi ʼo te huafa ʼo te ʼAtua, ʼae ko Sehova, koteʼuhi neʼe fai e tona ʼAlo totonu, ia Sesu, ia te faʼahi ʼaia. Ta vakaʼi te faikole ʼa Sesu ki tana Tamai, ʼae ʼe tuʼu ia Soane 17:26. ʼE feala la ke ke lau ia te vaega ʼaia?

Tomi: ʼEi. “Pea nee au fakailoilo kia natou tou huafa, pea e au toe fakailoilo anai ia kia natou, koteuhi ke nofo ia natou te ofa ae nee ke ofa ai ia au, pea ke au nofo ia natou.”

Atonio: Malō tau lautohi. ʼE ke tokagaʼi, neʼe ui e Sesu neʼe ina fakaʼiloʼilo ia te huafa ʼo te ʼAtua. ʼI tau manatu la, kotea tona tupuʼaga?

Tomi: ʼE mole au iloʼi leva au.

Atonio: Moʼo tali ki ai, ʼe feala ke ta vakaʼi ia he tahi age vaega, ko Gaue 2:21. ʼE ui fenei ai: “Pea ko ae e fetapa anai ki te huafa o te Aliki, e fakamauli anai ia.” ʼE ha lelei ʼi te vaega ʼaeni ʼe feala ke tou maʼu ia te maʼuli mo kapau ʼe tou fetapa ki te huafa ʼo Sehova. ʼE mahino ia neʼe iloʼi e Sesu ia te manatu ʼaia, kaʼe a koa la?

Tomi: ʼE mahino ia.

Atonio: Koia, neʼe maʼuhiga kia Sesu ke iloʼi pea mo fakaʼaogaʼi e ʼana tisipulo ia te huafa ʼo te ʼAtua heʼe feala ai ke natou maʼu ia te maʼuli. Pea ʼe ko te tahi tupuʼaga la ʼaia ʼo tamatou palalau tuʼumaʼu ʼo ʼuhiga mo Sehova. ʼE maʼuhiga kia matou te fakaʼiloʼilo ʼo te huafa ʼo te ʼAtua pea mo tokoni ki ʼihi ke natou fetapa ki tona huafa.

Tomi: Kaʼe tatau aipe pe fakaʼaogaʼi e te hahaʼi ia te huafa ʼo te ʼAtua peʼe kailoa, ʼe natou iloʼi pe te ʼAtua ʼae ʼe natou faikole ki ai.

Atonio: ʼE lagi ko tanatou manatu ʼaia. Kaʼe ʼe fakaha mai e te ʼAtua tona huafa ke faigafua ai hatatou fakaovi kia te ia.

Tomi: ʼE mole au loko mahino ki tau manatu.

Atonio: Ohage la, neʼe mole ʼaoga ke tou iloʼi ia te higoa ʼo Moisese. Neʼe feala pe ke ui ʼe ko te tagata ʼae neʼe ina vaeluaʼi ia te Tai Kula, peʼe ko te tagata ʼae neʼe foaki age ki ai ia te ʼu Folafola ʼe Hogofulu. ʼO toe feia mo Noe, kotea te ʼaoga ʼo te iloʼi ʼo tona higoa? Neʼe feala pe ke ui ʼe ko te tagata ʼae neʼe ina faʼu ia te aleka pea mo haofaki ai tona famili pea mo te ʼu manu. Neʼe feala ke toe feia mo Sesu Kilisito, neʼe feala pe ke ui neʼe ko ia ʼae neʼe hifo mai selo ʼo mate ʼuhi ko ʼatatou agahala.

Tomi: ʼE moʼoni, neʼe feala pe ia.

Atonio: Kaʼe neʼe loto e te ʼAtua ke tou iloʼi ia te higoa ʼo te ʼu tagata ʼaia. Koteʼuhi ʼe liliu kia tatou ʼo moʼoni te ʼu fakamatala ʼo ʼuhiga mo natou ʼaki te fakaha mai ʼo ʼonatou higoa. Logo la neʼe mole tou felaveʼi mo Moisese, mo Noe pea mo Sesu, kaʼe ʼe liliu te ʼu tagata ʼaia ʼo moʼoni kia tatou.

Tomi: ʼE moʼoni foki, ʼe ko taku hoki logo ʼae ki te faʼahi ʼaia.

Atonio: ʼE ko te tahi tupuʼaga ʼaia ʼo te fakaʼaogaʼi tuʼumaʼu e te kau Fakamoʼoni ʼa Sehova ia te huafa ʼo te ʼAtua. ʼE matou faiga ʼo tokoni ki te hahaʼi ke natou tui ko Sehova ʼe ko he ʼAtua ʼe maʼuli moʼoni, pea ʼe feala hanatou fakaovi kia te ia. ʼE toe maʼuhiga foki kia matou ia Sesu pea mo te meʼa ʼae neʼe ina fai moʼo haofaki ʼo tatou. ʼE feala la ke ta lau ia te tahi vaega ʼe ina fakaha ia te manatu ʼaia?

Tomi: ʼEi.

Atonio: ʼI te kamata ʼo tatā faipalalau, neʼe ta lau ia te vaega ʼo Soane 14:6. ʼE kei ke manatuʼi koa la, neʼe ui ai e Sesu ʼe ko ia “te ala, mo te mooni, pea mo te mauli.” Kaʼe ta vakaʼi te vaega ʼo Soane 14:1. ʼE feala la ke ke lau ia te ʼu palalau neʼe fai e Sesu, ʼi te fakaʼosi ʼo te vaega ʼaeni?

Tomi: ʼIo. ʼE ui fenei ai: “Kotou tui ki te Atua, pea kotou tui kia au.”

Atonio: Malō si au lautohi. ʼI tau manatu la, ko tona fakaʼuhiga koa ke tou filifili ke tou tui kia Sesu peʼe kia Sehova?

Tomi: Koʼena foki neʼe ui e Sesu ke tou tui kia naua tokolua.

Atonio: ʼE ke tonu. Pea ʼe mahino ia ʼe mole gata ʼaki pe tatatou ui ʼae ʼe tou tui ki te ʼAtua pea mo Sesu, kaʼe ʼe tonu ke ha ʼi totatou maʼuli.

Tomi: ʼE moʼoni foki.

Atonio: Kaʼe ʼe lava fakaha feafeaʼi e he tahi tana tui moʼoni ʼae ki te ʼAtua pea mo Sesu? ʼE feala la ke au toe liliu mai ke ta vakaʼi tona tali?a

Tomi: Ta fai taua ki ai.