Kapite 6
Ko Te Fehuʼi ʼAē ʼe Kau Fuli Kiai Te ʼu Meʼa ʼAē Neʼe Fakatupu
1. (a) Koteā te fehuʼi neʼe lagaʼi e Satana ʼi Eteni? (b) E feafeaʼi te hā ʼo te fehuʼi ʼaia ʼi tana palalau?
ʼI TE agatuʼu ʼaē neʼe hoko ʼi Eteni, neʼe lagaʼi ai te fehuʼi maʼuhiga ʼe kau kiai te ʼu meʼa fuli ʼaē neʼe fakatupu. ʼI tana palalau ʼaē kia Eva, neʼe ʼui age e Satana ko ia mo tonā ʼohoana ʼaē ko Atama, neʼe lahi tonā kākāʼi. Neʼe ina fehuʼi age: “ ʼE moʼoni koa la ia neʼe ʼui e te ʼAtua ke ʼaua naʼa koulua kai ki te ʼakau fuli pe ʼo te ʼōloto?” Neʼe tali age e Eva neʼe ʼui age pe e te ʼAtua ʼo ʼuhiga mo te fuʼu ʼakau e tahi: “ ʼE mole tonu ke koulua kai kiai, kailoa, ʼe mole tonu ke koulua fāfā kiai, naʼa koulua mamate.” ʼAki te ʼu palalau ʼaia neʼe ʼui age e Satana ʼe gutuloi ia Sehova, he neʼe ʼui maʼana, ko te maʼuli ʼo Eva ʼo feiā aipe ki te maʼuli ʼo Atama ʼe mole fakalogo ia ki tanā mulimuli ki te ʼu lao ʼa te ʼAtua. Neʼe ʼui maʼana ko te ʼAtua ʼe ina tapuʼi ia nāua mai te meʼa ʼaē ʼe lelei—te fealagia ʼaē ke nā fakatuʼutuʼu he ʼu lekula ʼi tonā maʼuli. “ ʼE moʼoni ʼe mole koulua mamate anai,” Ko te fakamoʼoni age ʼaia ʼa Satana. “Heʼe ʼiloʼi e te ʼAtua, ko te ʼaho pe ʼaē ʼe koulua kai anai kiai, ʼe ava moʼoni anai ʼo koulua ʼu mata pea ʼe koulua liliu moʼoni ai anai ohage ko te ʼAtua, ʼo ʼiloʼi te meʼa ʼaē ʼe lelei pea mo te meʼa ʼaē ʼe kovi.” (Sen. 3:1-5) Neʼe faigaʼi e Satana ke tui ia Eva ʼe lelei age anai kia ia hana pule faʼitaliha. Neʼe fakafeagai totonu ia ki te maʼua ʼo te ʼAtua ʼaē ke pule ki te ʼu meʼa ʼaē neʼe ina fakatupu pea mo te agaaga ʼo te fai ʼa Tana pule. Ko te fehuʼi ʼaia neʼe lagaʼi, ʼe faka ʼuhiga moʼoni ki te pule faʼitaliha ʼa te ʼAtua ki te malamanei katoa.
2. Koteā te meʼa ʼaē neʼe feala ke puipui ai te ʼuluaki taumatuʼa?
2 Ko tana ʼofa ʼaē kia Sehova neʼe feala ke puipui ai ia Eva. Ko tana fakaʼapaʼapa ki te ʼuhiga pule ʼo tona ʼohoana neʼe toe feala pe foki ke ina tatāʼofi ia ia ke mole ina fai te agakovi ʼaia. Ka neʼe manatu pe ia ki te meʼa ʼaē neʼe ina ʼui ko he fua lelei ʼi te temi pe ʼaia. ʼO tupu ai leva tana holi ki te meʼa ʼaē neʼe tapuʼi. ʼI tona fakahalaʼi mālohi e Satana, neʼe ina maumauʼi ai te lao ʼa te ʼAtua. ʼOsi ʼaia pea ina toho mo Atama ʼi te ala ʼaia. Logope la neʼe mole fakahalaʼi ia ia e te loi ʼa Satana, kae neʼe ina fakahā foki tana mole fakafetaʼi ʼaē ki te ʼofa ʼo te ʼAtua. Neʼe ina meʼa noaʼi te pule ʼa Sehova pea neʼe ina fili leva ke ina muliʼi tona ʼohoana agatuʼu.—Sen. 3: 6; 1 Tim. 2:13, 14.
3. (a) Koteā te tahi fehuʼi ʼe pipiki ki te fakafihi ʼa Satana ki te pule faʼitaliha ʼa Sehova? (b) Ko ai ʼaē ʼe kau ki te fehuʼi ʼaia?
3 Ko te fakafeagai ʼa Satana ki te pule ʼa Sehova neʼe mole gata ʼaki pe ʼi te ʼu meʼa ʼaē neʼe hoko ʼi Eteni. ʼI te iku lelei ʼo tana fakahala, neʼe ina fakafihiʼi te agatonu ʼa ʼihi hahaʼi kia Sehova. Neʼe toe lagaʼi ai mo te lua fehuʼi, ʼaē ʼe ʼi ai tona pikipikiga mo te ʼuluaki fehuʼi. Ko te fakafeagai ʼaia neʼe lahi ʼaupito ʼo kau fakatatau kiai te hōloga ʼo Atama pea mo te foha fakalaumālie ʼa te ʼAtua, ʼo toe kau kiai mo te ʼAlo te ʼuluaki tupu ʼaē neʼe ʼofa ki ai Sehova. ʼI te ʼu ʼaho ʼo Sopo, neʼe ʼui e Satana kapau ʼe kaugana te hahaʼi kia Sehova, ʼe mole nātou fai ʼaki tonatou ʼofa ʼaē kia te ia pea mo tana pule, kae ʼe nātou fai ʼuhi ko tanatou manatu pe ʼaē kia nātou. Neʼe ina ʼui kapau ʼe gaohi koviʼi nātou, pea ʼe nātou fakafisi anai kia te ia koteʼuhi ʼe manatu pe nātou kia nātou. Neʼe tonu koa tana ʼui ʼaia?—Sopo 1:6-12; 2:1-6; Fkhā. 12:10.
E Feafeaʼi Tanatou Tali Ki Te Fehuʼi ʼAia
4. He koʼe ʼe tokolahi te hahaʼi neʼe mole nātou lagolago ki te pule faʼitaliha ʼa Sehova?
4 Neʼe ʼiloʼi e Sehova ʼe ʼi ai anai ʼihi ʼe nātou muliʼi ia Satana ʼi tana agatuʼu. ʼI tona fakahagatonu, ʼi tana fakamāu ʼaē neʼe fai ʼi Eteni, neʼe talanoa ʼo ʼuhiga mo nātou ʼaē ka nātou faʼufaʼu anai te ‘hāko ʼo te gata.’ (Sen. 3:15) Ko te kau Faliseo ʼaē neʼe nātou fakatuʼutuʼu ke matehi ia Sesu, mo Sutasi Isikaliote ʼaē neʼe ina lavakiʼi ia Kilisito neʼe nātou kau ki te hāko ʼaia. Neʼe mole nātou fai pe he hala fakameʼameʼa ka mole nātou ʼiloʼi. Neʼe nātou ʼiloʼi te meʼa ʼaē ʼe totonu, kae neʼe nātou fakafeagai ʼaki tonatou loto katoa kia Sehova pea mo tana ʼu kaugana. Kae ko te tokolahi neʼe mole nātou mulimuli ki te ʼu fakatuʼutuʼu ʼa Sehova koteʼuhi neʼe nātou nonofo ʼi te fakapōʼuli.—Gāue 17:29, 30.
5. (a) ʼO mole hage ko Eva, neʼe feafeaʼi te faka ʼuhiga e te hahaʼi ʼaē neʼe nonofo agatonu kia Sehova ia tana folafola? (b) Neʼe feafeaʼi te fakamoʼoni e Noe tana agatonu, pea e feafeaʼi hatatou muliʼi te faʼifaʼitaki ʼaia?
5 Kae, neʼe ʼi ai te kehekehe ʼo nātou mo te ʼu tagata pea mo te ʼu fafine tui neʼe nātou ʼiloʼi tonatou Tupuʼaga pea mo nātou fakahā tanatou agatonu ki te ʼAtua, pea neʼe nātou fakamoʼoni ko ia ko tonatou Hau. Neʼe nātou tui ki te ʼAtua. Neʼe nātou ʼiloʼi, ʼe fakalogo tonatou maʼuli ki tanatou fagono pea mo tanatou fakalogo ʼaē ki ai. Neʼe kau ia Noe ʼi te ʼu tagata ʼaia. Koia ʼi te temi ʼaē neʼe ʼui age ai e te ʼAtua kia Noe, ko “te fakaʼosi ʼo te kakano fuli kua aʼu mai ki ʼoku muʼa . . . Faʼu koe hau aleka,” neʼe fakalogo ia Noe ki te fakatuʼutuʼu ʼa Sehova. Neʼe lahi te hahaʼi ʼi tona temi, logope la kua fakatokagaʼi nātou, kae neʼe hoko atu pe tanatou fai te ʼu meʼa ʼaē ʼe nātou fai māhani, ohage neʼe mole he meʼa maʼuhiga neʼe ʼamanaki hoko. Kae neʼe faʼu e Noe te toe aleka lahi pea mo ina hoko atu tana faka mafola ki niʼihi te ʼu ala faitotonu ʼo Sehova. Ohage ko tona ʼui e te Tohi-Tapu, “Neʼe fai e Noe te meʼa ʼaia ʼo mulimuli kia meʼa fuli ʼaē neʼe fakatotonu age e te ʼAtua kia ia. Pea neʼe ina fai.”—Sen. 6:13-22; vakaʼi foki mo Hepeleo 11:7 pea mo 2 Petelo 2:5.
6. (a) Koteā te meʼa ʼaē neʼe kehe ai te ʼu tagata agatonu? (b) Neʼe feafeaʼi te fakahā e Sala te ʼu kalitate ʼaia, pea e feafeaʼi hatatou muliʼi te faʼifaʼitaki ʼaia?
6 Neʼe toe makehe te ʼu tagata agatonu ʼaia, ʼuhi ko tanatou fakaʼapaʼapa lahi ki te ʼuhiga pule pea mo tanatou ʼofa kia Sehova. Neʼe mole nātou hage ko Eva ʼaē neʼe mole fakalogo ki te pule ʼo tona ʼohoana. ʼO toe feiā aipe mo Atama neʼe ina meʼa noaʼi te ʼu lao ʼa Sehova. Ko Sala, te ʼohoana ʼo Apalahamo, neʼe ina fakahā te ʼu kalitate matalelei ʼaia. Neʼe mahino kia ia ko Apalahamo ko tona “ ʼaliki,” ʼo mole gata pe ʼi tana palalau kae toe feiā aipe ʼi tona loto. Tahi ʼaē meʼa, neʼe ʼofa ia kia Sehova pea neʼe ina fakahā tana tui. Ohage ko Apalahamo, neʼe “talitali ia ki te kolo [te Puleʼaga ʼo te ʼAtua] ʼaē ʼe ʼi ai tona ʼu fakatafito moʼoni, te kolo ʼaē ko tona tufuga pea mo tona tupuʼaga ko te ʼAtua.”—1 Pe. 3:5, 6; Hep. 11:10-16.
7. (a) Ko te ʼu ʼaluʼaga fea ʼaē neʼe lagolago ai e Moisese te pule faʼitaliha ʼa Sehova? (b) E feafeaʼi hatatou muliʼi te faʼifaʼitaki ʼaia?
7 Hili kiai taʼu e 430 ʼi te ʼosi mavae ʼa Apalahamo ʼi tona fenua, neʼe lagolago ia Moisese ki te pule faʼitaliha ʼa Sehova ʼi tana fakafeagai ʼaē kia Falaone ʼi Esipito. Neʼe mole falala ia Moisese kia ia totonu. Kailoa, neʼe lotolotolua ʼo ʼuhiga mo tana faʼahiga palalau. Kae neʼe fakalogo ia kia Sehova. ʼAki te tokoni ʼa Sehova pea mo tona tēhina ʼaē ko Alone, neʼe liuliuga tana ʼalu ʼaē kia Falaone. Ka neʼe loto fefeka ia Falaone. ʼO toe feiā aipe mo te ʼu foha Iselaele neʼe lahi tanatou fatufatuʼi ia Moisese. Kae, neʼe agatonu ia Moisese ʼo ina fai te ʼu meʼa fuli ʼaē neʼe fakatotonuʼi age e Sehova, pea ʼaki ia ia neʼe fakamavae ia Iselaele mai Esipito.—Ek. 7:6; 12:50, 51.
8. (a) Koteā ʼaē ʼe hā ʼaki mai ai, ko te agatonu ʼaē kia Sehova ʼe mole gata ʼaki pe takita fakalogo ki te ʼu fakatuʼutuʼu ʼaē neʼe tohi e te ʼAtua? (b) E feafeaʼi hatatou mahino lelei ko te taʼi agatonu ʼaia, ʼe tokoni kia tatou ke tou maʼuliʼi ia 1 Soane 2:15?
8 Ko nātou ʼaē neʼe agatonu kia Sehova neʼe mole nātou ʼui ʼe feʼauga pe tanatou muliʼi te ʼu lao ʼa te ʼAtua, mo kapau kua tohi te ʼu lao ʼaia. ʼI te temi ʼaē neʼe faiga ai te ʼohoana ʼo Potifale ke ina fakahalaʼi ia Sosefo ke nā tono, neʼe mole heʼeki ʼi ai he lao neʼe tohi e te ʼAtua ʼo ʼuhiga mo te tapuʼi ʼaē ʼo te tono. Kae, ʼi te mahino ʼa Sosefo ki te fakatuʼutuʼu ʼa Sehova ʼo ʼuhiga mo te nofo ʼohoana ʼaē neʼe fai ʼi Eteni, neʼe ina ʼiloʼi ai ko te fai ʼo he felāveʼi fakasino mo he ʼohoana ʼo he tahi tagata ʼe mole leleiʼia e te ʼAtua. Neʼe mole ina fia ʼahiʼahiʼi peʼe aʼu anai kifea te fakagafua age e te ʼAtua ke ina muliʼi te ʼu aga ʼa te hahaʼi ʼo Esipito. Neʼe lagolago ia ki te ʼu lao ʼa Sehova, ʼo ina metitasioʼi te ʼu faʼahiga aga ʼa te ʼAtua ki te hahaʼi, pea neʼe ina maʼuliʼi te meʼa ʼaē neʼe mahino ki ai ʼe ko te finegalo ʼo te ʼAtua.—Sen. 39:7-12; vakaʼi ia Pesalemo 77:11, 12.
9. Neʼe feafeaʼi tona fakahā tuʼa lahi mai, ko te valoki ʼa te Tevolo ʼi te temi ʼo Sopo ʼe ko te loi ia?
9 Ko nātou ʼaē ʼe nātou ʼiloʼi moʼoni ia Sehova ʼe mole nātou lītuʼa ki ai, tatau aipe, peʼe nātou tau mo he faigataʼaʼia ʼe fakatupu mamahi. Neʼe ʼui e Satana kapau ʼe maumauʼi te ʼu koloā ʼo Sopo pea mo fakahoko ki ai he mamahi fakasino, ʼe ina līaki anai te ʼAtua. Kae neʼe fakahā e Sopo ko te Tevolo ʼe gutuloi, logope la tana mole mahino ki te tupuʼaga ʼo te ʼu mamahi ʼaē neʼe tau mo ia. (Sopo 2:3, 9, 10) ʼI tana faiga ʼaē ke ʼui ʼe moʼoni te ʼu palalau ʼaē neʼe ina fai, neʼe fakaneke e Satana te hau ʼitaʼita ʼo Papiloni ke ina fakamatakuʼi te ʼu tūpulaga Hepeleo e tolu ʼe matehi anai nātou ʼi te gutuʼumu kakaha, mo kapau ʼe mole nātou atolasio, pea mo tulolo ia muʼa ʼo te fakatātā ʼaē neʼe ina fakatuʼu. ʼI tanatou filifili peʼe nātou fakalogo ki te fakatuʼutuʼu ʼa te hau peʼe nātou muliʼi te lao ʼa Sehova ʼaē ʼe ina tapuʼi te atolasio ki te ʼu fakatātā, neʼe fakahā fakalelei age e te ʼu tūpulaga e tolu ki ai ʼe nātou tauhi kia Sehova, tonatou Hau Māʼoluga. Neʼe maʼuhiga ʼaupito kia nātou tanatou agatonu ki te ʼAtua, ʼi tonatou maʼuli.—Tan. 3:14-18.
10. Logope totatou ʼuhiga agahala, ʼe lava feafeaʼi hatatou fakahā ʼo tatatou agatonu moʼoni kia Sehova?
10 Ko tona faka ʼuhiga koa ʼe hoki tou agatonu pe kia Sehova mokā ʼe tou haohaoa, pea ko ʼaē ʼe fai hana hala ʼe mole kau ia ki te kau agatonu? Kailoa! Ko te Tohi-Tapu ʼe ina fakahā fakalelei mai te ʼu hala ʼa Moisese. Neʼe mole leleiʼia e Sehova te ʼu aga ʼaia, ka neʼe mole ina līaki ia Moisese. Logope la neʼe lahi te ʼu faʼahi neʼe liliu ai te kau ʼapositolo ko he ʼu faʼifaʼitakiʼaga lelei, neʼe toe ʼi aipe foki mo tanatou ʼu vaivaiʼaga. Ko te agatonu ʼe ina fakamaʼua he fakalogo tuʼumaʼu ʼe haʼu mai te loto. Kae, ʼe ʼiloʼi e Sehova totatou natula agahala pea ʼe fiafia ia mo kapau ʼe tou tokaga ʼo fai tona finegalo ʼi te ʼu faʼahi kehekehe. Kapau, ʼi totatou ʼuhiga agahala ʼe tou fai he meʼa ʼe kovi, ʼe maʼuhiga ke tou fakahemala fakamalotoloto pea ke tou tokaga ke ʼaua naʼa liliu ko hatatou aga māhani. ʼE tou fakahā ai leva ʼe tou ʼofa moʼoni ki te ʼu meʼa ʼaē ʼe leleiʼia e Sehova pea mo tou fehiʼa ki te ʼu meʼa ʼaē ʼe fehiʼa ia ki ai. ʼAki tatatou tui ki te maʼuhiga ʼo te sakilifisio faifakalelei ʼo Sesu, ʼe feala ke maʼa totatou leʼo ʼo loto ia muʼa ʼo te ʼAtua.—Amosi 5:15; Gāue 3:19; Hep. 9:14.
11. (a) Ko ai ʼi te ʼu tagata neʼe ina fakahā tana pipiki katoa ki te ʼAtua, pea koteā ʼaē neʼe fakamoʼoni e te meʼa ʼaia? (b) Koteā te maʼuhiga ʼo te faʼifaʼitaki ʼaia kia tatou?
11 Kae ʼe feala koa ke tou ʼui ʼe mole feala ki te hahaʼi ke nātou aga faka lotu pea mo nātou pipiki katoa ki te ʼAtua? Ko te tali ki te fehuʼi ʼaia neʼe nofo “ko he misitelio tapu” ʼo laka ia taʼu e 4 000. (1 Tim. 3:16) Logope la neʼe fakatupu haohaoa ia Atama, neʼe mole ina tuku mai he faʼifaʼitaki lelei ʼo ʼuhiga mo te pipiki katoa ʼaē ki te ʼAtua. Kae ko ai ʼaē neʼe feala ke ina fai te faʼahi ʼaia? ʼE mahino ia, ʼe mole ko tona hōloga ʼaē ʼe agahala. Ko Sesu Kilisito tokotahi pe ʼaē neʼe ina fakahā tana pipiki katoa ki te ʼAtua. ʼI te aga ʼa Sesu neʼe ina fakamoʼoni ai, ko Atama ʼaē neʼe ina maʼu te ʼu ʼaluʼaga ʼe lelei ʼaupito, neʼe feala hana nofo agatonu mo kapau neʼe loto kiai. Neʼe mole tonu ke tou tukugakoviʼi te meʼa ʼaē neʼe fakatupu e te ʼAtua. Ko Sesu Kilisito ko te faʼifaʼitaki lelei ʼaia ʼaē ʼe tonu ke tou faiga ke tou mulimuli kiai, ʼo mole gata pe ʼi tatatou fakalogo ki te lao ʼa te ʼAtua, kae ʼo toe feiā ai foki mo tatatou pipiki takitokotahi ʼaē kia Sehova ko te Tuʼi ʼo te ʼAtulaulau.
Koteā Tatatou Tali Takitokotahi?
12. He koʼe ʼe tonu ke tou tokaga tuʼumaʼu ki tatatou aga ʼo ʼuhiga mo te pule faʼitaliha ʼa Sehova?
12 ʼE tou kau takitokotahi ia ʼaho nei ki te fehuʼi lahi ʼaenī ʼaē ʼe kau kiai te malamanei katoa. ʼE mole feala hatatou hāo mai ai. Kapau neʼe tou fakahā fakahagatonu ʼe tou kau kia Sehova, pea ʼe fakatagaʼi tatou e Satana. ʼE ina fakahoko te ʼu faigataʼaʼia kehekehe pea ʼe hoholo anai tana fai ʼaia ʼo aʼu ki te fakaʼosi ʼo te tuʼu ʼo te ʼu faʼahiga meʼa kovi ʼaenī. ʼAua naʼa fakavaivai tatatou tokaga. (1 Pe. 5:8) Ko tatatou aga ʼe ina fakahā peʼe ko ai ʼaē ʼe tou lagolago ki ai ʼi te fehuʼi ʼaē ʼe kau ki ai te malamanei katoa.
13. (a) ʼE haʼu maifea te loi mo te kaihaʼa, ʼaē ʼe maʼua ai ke tou līaki te ʼu aga ʼaia? (b) Koutou tali ki te ʼu fehuʼi ʼo te palakalafe ʼaē ʼe fakahā mai ai te ʼu ʼaluʼaga ʼe feala ai ke tou fia kaihaʼa peʼe ke tou loi. Koutou vakaʼi takitahi te ʼu puani.
13 ʼE mole feala ke tou ʼui, ko te fai ʼo he meʼa ʼe kovi ʼe mole hona kovi, heʼe ko te aga māhani ia ʼo te temi ʼaenī. Ke feala hatatou nonofo agatonu, ʼe maʼua ke tou maʼuliʼi te ʼu ala faitotonu ʼa Sehova ʼi te ʼu faʼahi fuli ʼo totatou maʼuli. Moʼo fakatā te meʼa ʼaia, tou vakaʼi te ʼu puani ʼaenī:
(1) Neʼe fakaʼaogaʼi e Satana te loi moʼo toho ʼo tatatou ʼu ʼuluaki mātuʼa ki te agahala. Neʼe liliu ia ia “ko te tāmai ʼo te loi.” (Soane 8:44)
Ko te ʼu ʼaluʼaga fea ʼaē ʼe loi ai te kau tūpulaga ʼi ʼihi temi ki ʼanatou ʼu mātuʼa? He koʼe ʼe maʼuhiga ke līaki e te kau tūpulaga Kilisitiano te aga ʼaia? (Taag. 6:16-19)
Ko te ʼu fakatau koloā fea ʼaē ʼe feala ke liliu ai he tahi ʼo faʼifaʼitaki ki te “tāmai ʼo te loi” kae ina līaki te ʼAtua ʼo te moʼoni? (Mikea 6:11, 12)
Kapau ʼe tou fai he ʼu meʼa ke leleiʼia tatou ʼe niʼihi kae mole ko he moʼoni, ʼe kovi koa te meʼa ʼaia tatau aipe peʼe mole koviʼia e he tahi? (Pes. 119:163; vakaʼi ia Gāue 5:1-11.)
Kapau neʼe fai e he tahi he agahala mamafa, he koʼe ʼe maʼuhiga ke ʼaua naʼa ina fufū ʼaki te loi? (Taag. 28:13)
(2) ʼI te temi ʼaē neʼe muliʼi ai e Eva pea mo Atama te tokoni ʼa Satana ʼi tana fakaneke ia nāua ke nā fili tonu te meʼa ʼaē ʼe lelei pea mo te meʼa ʼaē ʼe kovi, neʼe nā kamata toʼo ai te meʼa ʼaē ʼe mole ʼa nāua. Neʼe nā liliu ai ko te ʼu hahaʼi kaihaʼa.
ʼE feala koa ke tou faka lākatonuʼi he kaihaʼa kapau ko te tagata kaihaʼa ʼe masiva, peʼe ko ia ʼaē neʼe fai kiai te kaihaʼa ʼe koloaʼia? (Taag. 6:30, 31; 1 Pe. 4:15)
Ko te kaihaʼa ʼe mole faʼa mamafa koa mo kapau ko he agamāhani ʼo te koga meʼa ʼaē ʼe tou maʼuli ai, peʼe ko te meʼa ʼaē neʼe kaihaʼa ʼe mole faʼa maʼuhiga? (Lom. 12:2; Ef. 4:28; Luka 16:10)
14, 15. (a) ʼI te fakaʼosi ʼo te nofo Hau ʼa Kilisito lolotoga taʼu e afe, ko te ʼahiʼahi fea ʼaē ka hoko anai ki te hahaʼi fuli? (b) Koteā te pikipikiga ʼo tatatou aga ʼi te temi ʼaenī mo tatatou fakalaka ʼi te ʼahiʼahi ʼaia?
14 ʼI te lolotoga Hau ʼa Kilisito ia taʼu e afe, ko Satana mo tana kau temonio ʼe fakamaʼu anai nātou ʼi te vanu, ʼo mole toe feala anai hanatou fakahalaʼi te hahaʼi. ʼI meʼa fakafimālie foki! Kae ʼi te ʼosi pe ʼo taʼu e afe, ʼe toe veteki anai nātou ʼi he ki temi siʼisiʼipe. Ko Satana mo nātou ʼaē ʼe nātou muliʼi ia ia, ʼe nātou fakamamahiʼi anai te “kau maʼoniʼoni,” ia nātou ʼaē kua liliu ʼo haohaoa pea mo nofo agatonu. ʼE haʼele anai ia ohage ʼe laga tau ki te “kolo ʼofaina,” ia te Selusalemi Foʼou ʼi te lagi, pea ʼe ina faiga anai ke ina pulihi te faitotonu ʼaē kua ʼosi fakatuʼu e te Selusalemi Foʼou ʼi te kele.—Fkhā. 20:7-10.
15 ʼE mahino papau ia, ohage ko te meʼa neʼe ina fai ki muʼa atu, ʼe toe fakaʼaogaʼi anai e Satana te kākā, ʼo ina fakaʼaogaʼi te manatu pe ʼaē kia kita pea mo te fialahi, moʼo fakaneke ʼo te hahaʼi ke nātou lītuʼa tanatou agatonu kia Sehova. Kapau ʼe tou maʼu ia te pilivilesio ʼaē ko te maʼuli ʼi te temi ʼaia, ʼe feafeaʼi anai tatatou aga? ʼE tuku anai ʼifea totatou loto ʼo ʼuhiga mo te fehuʼi lahi ʼaē ʼe kau ki ai te malamanei katoa? ʼI te temi ʼaia kua liliu fuli te hahaʼi ʼo haohaoa, koia ko nātou ʼaē ka talagataʼa ʼe iku anai nātou ki te fakaʼauha. Ke feala hatatou nofo agatonu ʼi te temi ka haʼu, ʼe maʼuhiga ke tou fakamāhani ʼo tou taupau tuʼumaʼu ʼi te temi nei ia te fakalogo fakalelei pea mo fakavilivili ki te taki ʼaē ʼe foaki mai e Sehova ʼaki tana Folafola peʼe ko tona kautahi! ʼE tou fakahā ai anai ʼe tou fia pipiki fakamalotoloto kia te ia, te Tuʼi ʼo te ʼAtulaulau.
TOE FAKAMANATU
● Koteā te fehuʼi lahi ʼaē ʼe kau fuli kiai te ʼu meʼa ʼaē neʼe fakatupu? He koʼe ʼe tou kau kiai?
● Ko te faʼahi fea ʼaē neʼe fakatalakitupua ai te agatonu ʼa te ʼu tagata mo te ʼu fafine takitokotahi ʼaē ʼe fakahā ʼi te pasina 49?
● He koʼe ʼe maʼuhiga ke tou tokaga ki tatatou aga ʼi te ʼaho fuli ke tou faka maʼuhigaʼi ai ia Sehova?
[Paki]
NEʼE NĀTOU LAGOLAGO KI TE PULE FAʼITALIHA ʼA SEHOVA
Noe
Sala
Moisese
Sosefo
Sopo
ʼE lava feafeaʼi hatatou muliʼi tanatou faʼifaʼitaki?