Kāpite 1

Te Fakahā—Te Ikuʼaga Fakafiafia!

1. ʼE tou ʼiloʼi feafeaʼi ʼe fakaʼamu e te ʼAtua ke tou māʼuʼuli fiafia?

KO TE FAKAHĀ KIĀ SOANE​—ko te tohi fakatalakitupua ʼaenī ʼo te Tohi-Tapu ʼe ina fakamatala ai te ikuʼaga fakafiafia ʼo te ʼu hisitolia ʼo te Tohi-Tapu. He koʼē ʼe tou ʼui ʼe “fakafiafia”? Heʼe ko te Tupuʼaga ʼo te Tohi-Tapu ʼe fakahigoaʼi ko “te ʼAtua fiafia,” ʼaē ʼe ina foaki ia te “logo lelei faka kolōlia” kiā nātou ʼaē ʼe ʼoʼofa kiā te ia. ʼE ina fakaʼamu ke tou māʼuʼuli fiafia mo tātou. Koia, ʼe kamata te tohi ʼo te Fakahā ʼaki te ʼu palalau ʼaenī: “Fiafia ia ia ʼaē ʼe ina lau . . . [ia] te ʼu folafola ʼo te lea faka polofetā ʼaenī.” ʼI tona kāpite fakaʼosi ʼe tou lau fēnei ai: “Fiafia ia ia ʼaē ʼe mulimuli ki te ʼu folafola ʼo te lea faka polofetā ʼo te takaiga tohi ʼaenī.”​—1 Timoteo 1:11; Fakahā 1:3; 22:7.

2. Koteā ʼaē ʼe tonu ke tou fai ke tou maʼu ia te fiafia ʼaki te tokoni ʼa te tohi ʼo te Fakahā?

² E feafeaʼi hatatou maʼu ia te fiafia ʼaki te tokoni ʼa te tohi ʼo te Fakahā? ʼAki hatatou kumikumi fakalelei ke tou ʼiloʼi ia te faka ʼuhiga ʼo te ʼu fakaʼiloga peʼe ko tona ʼu fakamatala fakatātā fakaofoofo, pea mo tou mulimuli kiai. ʼE tou mahino ai ko te maʼuli tokakovi ʼo te tagata kua vave kaku ki hona ikuʼaga fakamataku, ʼi te temi ʼaē kā fakahoko anai e te ʼAtua pea mo Sesu Kilisito te fakamāu ki te tuʼu agakovi ʼo te temi ʼaenī, pea mo nā fetogi ʼaki “te lagi foʼou pea mo te kele foʼou,” ʼo māʼia mo “te mate ʼe pulihi anai ia.” (Fakahā 21:1, 4) ʼE mole tou fia māʼuʼuli fuli koa lā ʼi he mālama foʼou fēia, ʼe maʼu ai ia te fīmālie pea mo te tokalelei moʼoni? ʼE tou kaku anai kiai, mo kapau ʼe tou fakamālohiʼi tatatou tui ʼaki te ako ʼo te Folafola ʼa te ʼAtua, ʼo kau kiai mo te ʼu lea faka polofetā fakaofoofo ʼo te tohi ʼo te Fakahā.

Koteā Koa Ia Te Apokalipesi?

3. Koteā te manatu ʼa te tokolahi ʼo ʼuhiga mo te ʼu kupu Apokalipesi pea mo Halamaketone?

³ ʼE mole toe fakahigoaʼi koa lā ia te tohi ʼo te Fakahā ko te Apokalipesi? ʼE moʼoni, ko te kupu “fakahā” ʼe ko te fakaliliu fakaʼuvea ʼaia ʼo te kupu Faka Keleka apokalupsis. Ko te tokolahi ʼe natou mahino ko te Apokalipesi ʼe ko he tau faka nukeleʼea ʼe ina fakaʼauha anai ia te mālamanei. ʼI te kolo ʼo Texas, ʼi Amelika, ʼaē neʼe lahi ai te faʼu ʼo te ʼu foʼi ʼuluʼi pulu nukeleʼea, neʼe ʼui fēnei e te hahaʼi tauhi lotu: “ ʼE ko tātou anai ʼaē kā ʼuluaki fakaʼauha.” Kae ʼe ʼui ko te kau takitaki lotu ʼo te kolo ʼaia, “kua natou ʼiloʼi papau ʼe hoko moʼoni anai ia Halamaketone, kae kua fakaovi fakavilivili mai, pea ko te tau fakaʼosi ʼa te ʼu mālohi ʼo te lelei pea mo te kovi, ʼaē ʼa te ʼAtua pea mo ʼaē ʼa Satana, ʼe ko he tau faka nukeleʼea anai.”a

4. Koteā te faka ʼuhiga moʼoni ʼo te kupu “apokalipesi,” pea he koʼē ʼe matatonu ke fakahigoaʼi te tohi fakaʼosi ʼo te Tohi-Tapu ko “Te Fakahā”?

⁴ Kae koteā koa ia te apokalipesi? ʼE fakamahino mai ʼi te ʼu tikisionalio ʼe ko “he tuʼutāmaki ʼe ʼamanaki hoko anai ʼi te ʼatulaulau,” kae ko te kupu Faka Keleka apokalupsis ʼe faka ʼuhiga tāfito ia ki he meʼa “neʼe hoki ʼiloʼi” peʼe ki he meʼa “neʼe hoki fakamahino” mai. Koia ʼe matatonu ke fakahigoaʼi te tohi fakaʼosi ʼo te Tohi-Tapu ko “Te Fakahā.” ʼI te tohi ʼaia, ʼe mole ko he fakamatala pē ia ʼo te fakaʼosi ʼo te mālamanei, kae ʼe ko he fakahā ia ʼo te ʼu moʼoni fakaʼatua moʼo fakatupu ʼi ʼotatou loto he ʼamanaki fakafiafia pea mo he tui ʼe mālohi ʼaupitō.

5. (a) Ko ai ʼaē kā fakaʼauha anai ʼi Halamaketone, pea ko ai ʼaē kā hao anai? (b) Koteā te kā haʼu taulekaleka ʼaē kā maʼu anai e te hahaʼi ʼaē kā hao ʼi Halamaketone?

⁵ ʼE moʼoni, ʼe fakamatala ʼi te tohi fakaʼosi ʼo te Tohi-Tapu ko Halamaketone ʼe ko “te tau ʼo te ʼaho lahi ʼo te ʼAtua te Māfimāfi.” (Fakahā 16:14, 16) Kae ʼe mole hagē anai ia ko he tau faka nukeleʼea! Heʼe ko he tau fēia ʼe ina pulihi anai ia te ʼu meʼa maʼuli fuli ʼaē ʼi te kele. Kailoa ia, ko te Folafola ʼa te ʼAtua ʼe tuʼu ai ia te fakamoʼoni fakafiafia ʼaē, ʼe ko te kau agakovi pē, ia te ʼu fili ʼo te ʼAtua, ʼe fakaʼauha anai e te ʼu mālohi ʼaē ʼe pule kiai te ʼAtua. (Pesalemo 37:9, 10; 145:20) Ko he toe hahaʼi tokolahi, ʼe ʼomai mai te ʼu fenua fuli, ʼe natou hao anai mokā hoko ia te fakamāu fakaʼatua ʼaia ʼi Halamaketone. ʼE ko Sesu Kilisito ʼaē kā ina taupau anai pea mo ina taki ia nātou ki te maʼuli heʼegata ʼi te Palatiso ʼi te kele. ʼE kotou fia kau koa ʼi te hahaʼi ʼaia? ʼE ko he meʼa fakafiafia, heʼe fakahā mai ʼi te tohi ʼo te Fakahā, ko te meʼa ʼaia ʼe feala!​—Fakahā 7:9, 14, 17.

Te Fakamahinohino ʼo Te ʼu Meʼa Fakalilo Fakaʼatua

6. ʼI te hoholo ʼo te ʼu taʼu, koteā te ʼu tohi ʼaē neʼe tā e te kau Fakamoʼoni ʼa Sehova moʼo fakamahinohino te tohi ʼo te Fakahā?

⁶ ʼO kamata mai te taʼu 1917, neʼe tā e te Sōsiete Watch Tower te tohi Le mystère de Dieu accompli. Neʼe ko he fakamatalatala ʼo te ʼu vaega takitahi ʼo te ʼu tohi faka Tohi-Tapu ʼa Esekiele pea mo te Fakahā. Pea ʼi te lolotoga hā ʼi te ʼu meʼa ʼaē neʼe hoko ʼi te mālamanei ia te hoko ʼo te ʼu lea faka polofetā ʼo te Tohi-Tapu, ʼi te temi pē ʼaia neʼe teuteuʼi ai tohi e lua moʼo fakamatala ia te kupu tāfito Lumière pea neʼe tufa ʼi te taʼu 1930. ʼI te ʼu tohi ʼaia e lua neʼe toe vakaʼi ai te ako ʼo te tohi ʼo te Fakahā. ʼI te haga ‘mū ʼa te mālama ki te kau faitotonu,’ neʼe tā leva ʼi te taʼu 1963 e te kau Fakamoʼoni ʼa Sehova te tohi e pāsina 704, ko tona kupu tāfito ko “Babylone la Grande est tombée !” Le Royaume de Dieu a commencé son règne ! ʼE fakamahinohino lelei ai ia te hisitolia ʼo te hake ake pea mo te tō ki lalo ʼo Papiloni Lahi, ia te kautahi faka mālamanei ʼo te ʼu lotu hala, pea ʼi te fakaʼosi ʼe vakaʼi ai te ʼu kāpite fakamuli e hiva ʼo te tohi ʼo te Fakahā. ʼI te ‘ ʼāsili mālama ake ʼo te ʼala ʼo te kau faitotonu,’ tāfito ʼo ʼuhiga mo te ʼu gāue ʼaē ʼi te ʼu kōkelekāsio, neʼe fai te tohi e pāsina 414 ʼi te taʼu 1969, “Alors sera consommé le mystère de Dieu,” neʼe ko te sivi ʼaia ʼo te ʼu ʼuluaki kāpite e 13 ʼo te tohi ʼo te Fakahā.​—Pesalemo 97:11; Tāʼaga Lea 4:18.

7. (a) He koʼē koa neʼe tā e te kau Fakamoʼoni ʼa Sehova ia te tohi ʼaenī ʼo te Fakahā? (b) Ko te ʼu faʼahi fea ʼaē kā tokoni anai ki te kau lautohi moʼo ako te tohi ʼaenī?

⁷ He koʼē neʼe tā te tahi tohi ʼo te Fakahā ʼi te temi ʼaenī? ʼE lahi te ʼu meʼa neʼe kua ʼosi fakamatalatala lelei mai, pea neʼe mole feala tona fakaliliu pea mo tona tā ʼi he tahi age ʼu lea. Koia, neʼe mahino mai ʼe ʼaoga ke fai he tohi pē e tahi ʼo ʼuhiga mo te tohi ʼo te Fakahā, ʼi he faʼahiga agaaga ʼe feala moʼoni ai tona tā ʼi he tahi age ʼu lea. Pea tahi, neʼe matou fakaʼaogaʼi ia te faigamālie ʼaia moʼo fakaʼāʼāsili te lelei ʼo te ako ʼaia ʼaki he ʼu palalau fakatā, mo he ʼu pāki pea mo he ʼu fakamatala nounou, ʼe tokoni anai ki te kau lautohi ke nātou mahino lelei ki te maʼuhiga ʼo te lea faka polofetā fakatalakitupua ʼaia.

8. Koteā te tahi tupuʼaga tāfito ʼo te tā ʼo te tohi ʼaenī?

⁸ Ko te tahi tupuʼaga tāfito ʼo te tā ʼo te tohi ʼaenī ko te fia muliʼi ia te mahino ki te moʼoni ʼaē kua maʼu ʼi te temi nei. ʼE folahi e Sehova te mālama ke ʼāʼāsili ake tona mū ki te faka ʼuhiga ʼo tana Folafola, pea ʼe feala ke tou ʼamanaki ʼe tou toe mahino lelei anai ki te tohi ʼo te Fakahā, ʼo fēia aipē mo ʼihi lea faka polofetā, kua mālama lelei lolotoga tatatou fakaovi ki te mamahi lahi. (Mateo 24:21; Fakahā 7:14) Koia ʼe maʼuhiga ai ke tou ʼiloʼi lelei ia te faʼahi ʼaia. Ohagē lā ko te meʼa ʼaē neʼe tohi e te ʼapositolo ko Petelo ʼo ʼuhiga mo te lea faka polofetā fakaʼatua: “ ʼE lelei ke kotou tōkakaga kiai ohagē ko he mālama ʼe mū ʼi he faʼahi fakapōʼuli, ʼo aʼu ki te mafoa ʼo te ʼaho pea mo tuʼu ake he fetuʼu ʼaho, ʼi ʼokotou loto.”​—2 Petelo 1:19.

9. (a) Koteā ʼaē kā fakatupu anai e te ʼAtua ohagē ko tona tuʼu ʼi te tohi ʼo te Fakahā pea mo ʼihi lea faka polofetā? (b) Koteā ia te mālama foʼou, pea ʼe koteā ʼaē ʼe tonu ke tou fai ke feala hatatou māʼuʼuli pea mo hū kiai?

⁹ Ko te tohi ʼo te Fakahā ʼe ina hilifaki tana fakamoʼoni ki te tahi age ʼu lea faka polofetā ʼa te Tohi-Tapu, ʼaē ʼe fakahā ai ko Sehova ʼAtua ʼe ina fakatuʼutuʼu ke ina fakatupu he ʼu lagi foʼou pea mo he kele foʼou. (Isaia 65:17; 66:22; 2 Petelo 3:13; Fakahā 21:1-5) Ko tana logo, ʼe fai tāfito ki te kau Kilisitiano fakanofo, ʼaē neʼe totogi e Sesu ʼaki tona taʼataʼa ke natou liliu ʼo kaugā hau mo ia ʼi te ʼu lagi foʼou. (Fakahā 5:9, 10) Kae ko te logo lelei ʼaia ʼe ina toe fakaloto mālohiʼi anai mo te tui ʼa te ʼu lauʼi miliona hahaʼi ʼaē ʼe natou holi ki te maʼuli heʼegata ʼi te Puleʼaga ʼo Kilisito. ʼE kotou kau koa ʼi te hahaʼi ʼaia? Kapau koia ʼaia pea ko te tohi ʼo te Fakahā ʼe ina fakamālohiʼi anai takotou ʼamanaki ki te maʼuli ʼi te Palatiso, ke kotou kau ki te kele foʼou, ʼaia kā kotou maʼu ai ia te tokalelei lahi mo he fīmālie lahi, mo he mālohi ʼo te sino pea mo te ʼu tuʼuga tapuakina ʼaē kā foaki tuʼumaʼu atu anai e te ʼAtua. (Pesalemo 37:11, 29, 34; 72:1, 7, 8, 16) Kapau ʼe kotou fia māʼuʼuli pea mo hū ki te mālama foʼou, pea ʼe maʼuhiga ʼaupitō ke kotou tōkakaga lelei ki te fakamatalatala fakaofoofo ʼaē ʼe tuʼu ʼi te tohi ʼo te Fakahā ʼo ʼuhiga mo te temi ʼaē ʼe tonu ke ina fakakaku ki tona ikuʼaga ʼaē kua ovi mai.​—Sofonia 2:3; Soane 13:17.

[Kiʼi nota]