Kapite 112

ʼE Teuteu Ia Sesu Ki Tana Kau Fakaʼosi Ki Te Pāsikate

KO TE feliatolu ʼaho 11 ʼo Nisani ʼe fakaʼosiʼosi nei. Kua ʼosi te fai akonaki ʼa Sesu ki tana kau ʼapositolo ʼi te moʼuga ʼo Oliveto. ʼI ʼaho leva neʼe lahi ai tana gāue pea mo fakatupu gaʼegaʼe! ʼI te temi nei, ʼi tana lagi liliu ki Petania ke moe ai ʼi te po ʼaia, neʼe ina ʼui age ki tana kau ʼapositolo: “ ʼE koutou ʼiloʼi ʼe kei toe ia ʼaho e lua ki te Pāsikate, pea ʼe tonu ke ʼave te Foha ʼo te tagata ke haʼi ki he pou.”

ʼE hage ia ʼi te ʼala uhu ake ʼo te feliafā ʼaho 12 ʼo Nisani, neʼe nofo ia Sesu mo tana kau ʼapositolo ʼi te faʼahi ʼe tokalelei. ʼI te ʼanāfi, neʼe ina faka lākahalaʼi te kau takitaki lotu ia muʼa ʼo te hahaʼi, pea ʼe ina ʼiloʼi lelei pe ʼe nātou faigaʼi ke nātou matehi ia ia. Ko te tupuʼaga la ʼaia ʼo tana mole hā ʼi te ʼaho ʼaia, heʼe ko tona loto ke ʼaua naʼa tāʼofi e he meʼa tana kau ki te Pāsikate mo tana kau ʼapositolo ʼi te afiafi ka hoko mai.

ʼI te lolotoga ʼo te temi ʼaia, neʼe fakatahitahi te kau pelepitelo pule pea mo te kau tagata ʼāfea ʼo te hahaʼi ʼi te lotoʼā ʼo te pelepitelo lahi, ko Kaifa. ʼI te lave loto kia nātou ʼo te ʼu fakaʼāga ʼaē neʼe fai e Sesu kia nātou ʼi te ʼanāfi, neʼe nātou fonofono ke nātou puke ia ia ʼaki he kākā faiva ke matehi ai. Kae neʼe nātou ʼui fēnei: “ ʼAua naʼa fai ʼi te lolotoga ʼo te ʼaho lahi, koteʼuhi ke ʼaua naʼa malaga he gatutu ʼi te hahaʼi.” ʼE nātou tuʼania te hahaʼi, ʼaē ʼe ʼoʼofa lelei kia Sesu.

ʼI te lolotoga ʼo te fonofono ʼa te kau takitaki lotu ʼaki he agakovi ke matehi ia Sesu, neʼe ʼalu age te ʼaʼahi ʼonatou. Neʼe lahi tonatou punamaʼuli, koteʼuhi he neʼe ko he tahi ʼi te ʼu ʼapositolo ʼa Sesu, ko Sutasi Isikaliote, ia ia ʼaē neʼe fakahū e Satana ki ai te fakakaukau kovi ke ina fakatau tona Pule. Neʼe nātou fiafia ʼi te fehuʼi age ʼa Sutasi kia nātou: “Koteā te meʼa ʼe koutou loto ke koutou foaki mai kia te ʼau, ke ʼau ʼavatu ai ia ia kia koutou?” Neʼe nātou tali fakavilivili atu aipe ʼo nātou totogi age kia ia te ʼu foʼi piesi siliva e 30, ko te totogi ʼaia ʼo te tagata kaugana ʼi te Lao ʼa Moisese. ʼI te temi pe ʼaia, neʼe kumi ai e Sutasi he faigamālie ke ina ʼavage ai ia Sesu kia nātou, ka mole sisio ki ai te hahaʼi.

Ko te ʼaho 13 ʼo Nisani ʼe kamata ʼi te feliafā ʼi te tō ʼo te laʼā. ʼI te kua kaku ʼa Sesu ki Seliko ʼi te feliaono, ko te ono po leva ʼaia pea ko te po fakaʼosi ʼaia ʼo tana nofo ʼi Petania. ʼI te ʼala uhu ake, ʼi te felianima, ʼe tonu anai ke fai te ʼu tokonaki fakaʼosi ki te Pāsikate, ʼaē ʼe kamata anai ʼi te tō ʼo te laʼā. ʼE ko te temi leva ʼaia ʼe tonu ai ke matehi te akeno faka pāsikate pea mo fakamoho katoa. ʼE nātou fai anai te lafeti ʼaia ʼifea, pea ko ai ʼaē ka ina fai anai te ʼu tokonaki ʼaia?

Neʼe mole heʼeki fai age e Sesu he ʼu fakatotonu ʼo ʼuhiga mo te faʼahi ʼaia, e lagi neʼe mole ina loto ia ke ʼiloʼi e Sutasi ʼo fakahā ki te ʼu pelepitelo pule pea mo nātou puke ia ia ʼi te lolotoga ʼo te fai ʼo te Pāsikate. Kae ʼi te temi nei, e lagi ko te felianima hoʼatā, mai Petania neʼe fekauʼi e Sesu ia Petelo pea mo Soane, ʼo ʼui maʼana: “Koulua ʼolo ʼo teuteuʼi maʼa tatou te Pāsikate, koteʼuhi ke tou kai.”

“Kofea ʼaē ʼe ke loto ke ma teuteuʼi ai?” ko tanā fehuʼi age ʼaia.

“Ka koulua hū atu anai ki te kolo, ko tona fakamahino age ʼaia e Sesu, ko te tagata ʼe ina fua te hina kele, kua fonu vai, ʼe fakafetaulaki mai anai kia koulua. Koulua mulimuli ia te ia ʼo aʼu ki te ʼapi ʼaē ka hū anai ki ai. Pea ʼe tonu anai ke koulua ʼui age ki te pule ʼo te ʼapi: ‘Ko te tagata Faiakonaki ʼe ina ʼui atu: “Kofea ia te koga fale tali fagona, ʼaē ʼe feala ai haku kai te Pāsikate mo taku ʼu tisipulo?” ’ Pea ʼe fakahā atu anai e te tagata ʼaia te koga fale ʼi ʼoluga, e lahi, kua ʼosi teuteuʼi. Koulua fai ai te ʼu teuteu.”

Ko te Pule ʼo te ʼapi e lagi ko he tisipulo, pea ʼe nofo fakalogo ia ke kole age e Sesu ke ina fakaʼaogaʼi tona ʼapi ʼo ʼuhiga mo te meʼa makehe ʼaia. Pea, ʼi te kaku ʼa Petelo pea mo Soane ki Selusalemi, neʼe nā maʼu fuli te ʼu meʼa ʼaia ohage pe ko tona tala age e Sesu. Koia, neʼe nā tokaga ai ki te teuteuʼi ʼo te akeno pea ke tokalelei ia meʼa fuli ke faka fealagia ai ki te toko 13, ia Sesu pea mo tana ʼu ʼapositolo e toko 12, ke nātou fakamanatu te Pāsikate. Mateo 26:1-5, 14-19; Maleko 14:1, 2, 10-16; Luka 22:1-13; Ekesote 21:32.

▪ Koteā te meʼa ʼaē ʼe mahalo pe neʼe fai e Sesu ʼi te feliafā, pea koteā tona tupuʼaga?

▪ Koteā te fono ʼaē ʼe fai ʼi te ʼapi ʼo te pelepitelo lahi, pea koteā te tupuʼaga ʼo te ʼalu ʼa Sutasi ki te kau takitaki lotu?

▪ Ko ai ʼaē neʼe fekauʼi e Sesu ki Selusalemi ʼi te felianima, pea koteā tona tupuʼaga?

▪ Koteā te meʼa neʼe maʼu e nāua ʼaē neʼe fekauʼi e Sesu, ʼe ko he tahi ʼaia fakamoʼoni ʼe ina maʼu te ʼu mālohi faka milakulo?