Kapite 113

Ko Te Ako Ki Te Agavaivai ʼi Te Lolotoga ʼo Te Pāsikate Fakaʼosi

ʼO FAI pe ki te ʼu fakatotonu ʼa Sesu, ko Petelo pea mo Soane kua nā kaku ki Selusalemi ke nā fai ai te ʼu teuteu ki te Pāsikate. Neʼe tau atu ia Sesu ʼi te hoʼatā ʼo te ʼaho ʼaia, e lagi neʼe kaku fakatahi mo te toko hogofulu ʼapositolo ʼaē. ʼI te lolotoga ʼo tanatou hihifo mai te moʼuga ʼo Oliveto, kae puli atu te laʼā ʼi te tafaʼaki lagi. Ko te fakaʼosi leva ʼaia ʼi muʼa ʼo tona fakatuʼuake ʼo te sio ʼa Sesu ki te kolo ʼi te ʼaho, mai te moʼuga ʼaia.

Fuafualoa pe ʼaia, pea hū ia Sesu pea mo tana kau ʼapositolo ki te kolo, pea nātou ʼolo ki te ʼapi ʼaē ka nātou fai ai te Pāsikate. Neʼe nātou hake ki te koga fale lahi ʼaē ʼi ʼoluga, ʼaē kua tokalelei ai ia meʼa fuli ke nātou fai ai e nātou ʼāteaina te lafeti ʼaia. Neʼe nofo ia Sesu mo tona lotohoha ki te moʼi lakaga ʼaia, he neʼe ʼui maʼana: “Neʼe ʼau holi lahi ʼaupito ke ʼau kai te Pāsikate ʼaenī mo koutou ʼi muʼa ʼo toku mamahi.”

ʼI te agamāhani ʼo te talatisio ko nātou ʼaē ʼe kau ki te Pāsikate ʼe tonu ke nātou ʼinu he ʼu ipu vino e fā. ʼI tana ʼosi tali te ipu vino ʼi te ʼu ipu ʼaia, e lagi ko tona tolu ʼaia, neʼe fakafetaʼi ia Sesu pea ʼui maʼana: “Koutou toʼo te meʼa ʼaenī pea ke koutou fetukuʼaki ia koutou; heʼe, ʼau tala atu kia koutou, ʼe mole ʼau toe ʼinu anai ki te fua ʼo te vite ʼo aʼu ki te haʼu ʼa te puleʼaga ʼo te ʼAtua.”

ʼI te tahi moʼi lakaga, ʼi te lolotoga ʼo te kai, neʼe tuʼu Sesu ki ʼoluga, ʼo ina tuku kehe tona ʼu kofu tuʼa, kae ina toʼo te kie pea ina fakafonu te pesini ʼaki te vai. ʼI te agamāhani, ko te tagata fai fakaafe ʼaē ʼe tokaga ki te fufulu ʼo te ʼu vaʼe ʼo tana hahaʼi fakaafe. Kae ʼi te fakatahitahi ʼaenī, neʼe mole ʼi ai he tagata fai fakaafe, koia neʼe fai e Sesu totonu te gāue ʼaia. Neʼe feala pe ke fai te gāue ʼaia e he tahi ʼi tana kau ʼapositolo; kae ʼe hage pe neʼe kei ia nātou te nonofo fesiosioʼaki, he neʼe mole he tahi ia nātou neʼe ina fai te gāue ʼaia. Koia neʼe nātou umiuminoa ai ʼi te kamata fufulu ʼaē e Sesu ʼonatou ʼu vaʼe.

ʼI te kaku age ʼa Sesu ki ai, neʼe fakafisi ia Petelo: “Kailoa, ʼe mole ke fufulu anai koe ʼoku vaʼe.”

“Kapau ʼe mole ʼau fufulu koe, pea ʼe mole hou vahe mo ʼau”, ko te tali age ʼaia ʼa Sesu.

Koia neʼe ʼui age ai e Petelo: “ ʼAliki, ke mole gata pe ʼi ʼoku vaʼe, kae ke toe fufulu ai mo ʼoku nima, pea mo toku ʼulu.”

“Ko ʼaē kua ʼosi maʼanu ʼe ʼaoga pe ke fufulu ʼona vaʼe, kae ʼe maʼa tona sino katoa. Pea ko koutou, ʼe koutou maʼa, kae mole ko koutou fuli.” Neʼe ina ʼui age te meʼa ʼaia koteʼuhi ʼe ina ʼiloʼi ʼe teuteu ia Sutasi ke ina fakatau ia ia.

ʼI tana ʼosi fufulu te ʼu vaʼe ʼo tana ʼu ʼapositolo e toko 12, ʼo kau ai mo Sutasi, ia ia ʼaē ka ina fakatau ia ia, neʼe toe ʼai e Sesu tona ʼu kofu tuʼa pea mo takoto ifo ʼi te vaʼe laupapa kai. “ ʼE koutou ʼiloʼi koa la te meʼa ʼaē neʼe ʼau fai kia koutou? ko tana fehuʼi age ʼaia. ʼE koutou fakahigoa ʼau ko te tagata ‘Faiakonaki’ pea mo ‘ ʼAliki’, pea ʼe koutou palalau tonu, heʼe ʼau feiā moʼoni. Koia kapau leva ko ʼau, ʼaē ko te ʼAliki pea mo te tagata Faiakonaki, neʼe ʼau fufulu ʼokotou vaʼe, pea ʼe tonu foki, mo koutou, ke koutou fefufuluʼaki ʼokotou vaʼe. Koteʼuhi neʼe ʼau tuku atu kia koutou te faʼifaʼitaki ke koutou toe fai mo koutou ohage ko te meʼa ʼaē neʼe ʼau fai kia koutou. ʼE ʼau tala moʼoni atu kia koutou: ko he tagata kaugana ʼe mole lahi ake ia ʼi tona pule, peʼe ko he tahi ʼe fekauʼi ʼe mole lahi ake ia ʼi ʼaē ʼe ina fekauʼi. Kapau ʼe koutou ʼiloʼi te ʼu meʼa ʼaia, manuʼia ia koutou mo kapau ʼe koutou fai.”

ʼI ako lelei leva ki te agavaivai! Ko te kau ʼapositolo ʼe mole tonu ke nātou kumi te ʼuluaki nofoʼaga, ʼo ʼui maʼa nātou ʼe nātou maʼuhiga ʼo feala ai ke nātou ʼui ko ʼihi ʼaē ʼe tonu ke kaugana kia nātou. ʼE tonu ke nātou muliʼi te faʼifaʼitaki ʼaē neʼe tuku mai e Sesu, ʼaē ʼe mole ko he fufulu pe ʼo te ʼu vaʼe ohage ko he meʼa ʼe tonu ke fai tuʼumaʼu, kae ko te fia kaugana ka mole fakapulepule, tatau aipe pe ko he gāue faka agavaivai pea mo lave kovi ʼaē ʼe tonu ke fai. Mateo 26:20, 21; Maleko 14:17, 18; Luka 22:14-18; 7:44; Soane 13:1-17.

▪ ʼI te sio ʼa Sesu ki Selusalemi, ʼaia ʼe hū kiai ko te fakamanatu ʼo te Pāsikate, he koʼe ʼe makehe ia te faʼahi ʼaia?

▪ ʼI te lolotoga ʼo te Pāsikate, ko te ipu fea ʼaē neʼe lagi ʼavage e Sesu ki tana ʼu ʼapositolo e toko 12 ʼi te ʼosi ʼo tana fai te tapuaki?

▪ ʼI te temi ʼo Sesu, koteā te gāue ʼe fai e te tagata fai fakaafe ki tana kau fakaafe, pea he koʼe ʼe mole feiā ʼi te fai ʼaē e Sesu te fakamanatu ʼo te Pāsikate mo tana kau ʼapositolo?

▪ Koteā te tupuʼaga ʼaē ʼo te fai e Sesu totonu te gāue faka agavaivai ʼaē ko te fufulu ʼo te ʼu vaʼe ʼo tana kau ʼapositolo?