Kapite 18

ʼE Hifohifo Ia Soane ʼo Veliveli, Kae Tuputupu Ia Sesu ʼo Lahi

ʼI TE ʼosi ʼo te Pāsikate, ʼi te fasiga taʼu mātala ʼo te taʼu 30, neʼe mavae ia Sesu pea mo tana kau tisipulo ʼi Selusalemi. Kae neʼe mole nātou liliu ki tonatou fenua ki Kalilea, neʼe nātou ʼolo ki Sutea, ke nātou fai papitema ai. Kua teitei ʼosi te taʼu katoa ki te fai papitema ʼa Soane Patita, pea ʼe kei ʼi aipe te ʼu tisipulo kei mulimuli ia te ia.

ʼE mole ko Sesu ʼaē ʼe fai papitema, ko tana kau tisipulo, kae ko ia ʼaē ʼe ina takitaki. Ko te papitema ʼaē ʼe nātou fai ʼe tatau pe tona faka ʼuhiga mo te papitema ʼaē ʼe fai e Soane. Ki te kau Sutea ʼaē ʼe nātou tali te papitema ʼaia, ʼe ina fakatātā tanatou fakahemala ki te ʼu agahala ʼaē neʼe nātou fai ki te fuakava ʼo te Lao ʼa te ʼAtua. Kae, ʼi te hili ʼo tona fakatuʼuake, neʼe akoʼi e Sesu ki tana kau tisipulo te fai ʼo te papitema ʼe kehe age tona faka ʼuhiga. ʼIo, ko te papitema faka kilisitiano ia ʼaho nei ʼe ko te fakatātā ia e kita fakahā ai e kita foaki ia kita kia Sehova ʼAtua ke kita tauhi kia te ia.

ʼE tou nonofo nei ʼi te kamata ʼo te minisitelio ʼo Kilisito. Logope tanā tahi gāue, ko Soane pea mo Sesu ʼe nā akonakiʼi pea mo papitemaʼi ia nātou ʼaē ʼe fakahemala. Koia neʼe fuaʼā ai te kau tisipulo ʼa Soane pea neʼe nātou hanu fēnei ai kia Soane ʼo ʼuhiga mo Sesu: “Lapi, (...) koʼeni ia ʼe fai papitema, pea ʼe ʼolo fuli te hahaʼi kia te ia.”

Neʼe mole fuaʼā ia Soane, ka neʼe fiafia ia ʼi te lahi ʼo te hahaʼi ʼaē ʼe ʼolo kia Sesu, pea neʼe loto ia ke toe fiafia mo tana kau tisipulo. Neʼe ina toe fakamanatu age kia nātou te ʼu palalau ʼaenī: “ ʼE koutou fakamoʼoni mai kia te ʼau ia koutou totonu neʼe ʼau ʼui: ʼE mole ko ʼau ko Kilisito, kae: Neʼe fekauʼi mai ʼau ʼi muʼa ʼo Ia na.” Pea neʼe toe hoko atu tana palalau ʼaki te lea fakatātā matalelei ʼaenī: “Ko ia ʼaē ʼe ina maʼu te fafine ʼohoana ko te tagata ʼohoana. Kae ko te kaumeʼa ʼo te tagata ʼohoana, ka tuʼu ʼi ai ʼo fagono kia te ia, ʼe fiafia lahi ia ʼuhi ko te leʼo ʼo te tagata ʼohoana. Ko te fiafia ʼaia, ʼaē ʼe ʼau maʼu, kua katoa ia.”

Ko Soane, ʼaē ko te kaumeʼa ʼo te Tagata ʼohoana, neʼe fiafia ia ʼi muʼa atu kua hili ki ai māhina e ono ʼi tana fakahā tana kau tisipulo kia Sesu. Ko ʼihi ia nātou kua liliu ko he ʼu koga ki ʼamuli ʼo te kalasi ʼo te ʼohoana faka selo ʼo Kilisito, ko te kalasi ʼaia ka faʼufaʼu anai ʼaki te kau kilisitiano ʼaē ʼe fakanofo ʼaki te laumālie. Neʼe loto ia Soane ke liliu tana kau tisipulo ʼaē kei mulimuli ia te ia ko he kau tisipulo ʼa Sesu, heʼe ko tana gāue ko te teuteuʼi ʼo te minisitelio ʼaē ʼe fua lelei ʼo Sesu. Neʼe fakahā age e Soane: “Ko ia ia, ʼe tonu ke tuputupu ʼo lahi, ka kia ʼau ke ʼau hifohifo ʼo veliveli.”

Ko Soane, te tisipulo foʼou ʼa Sesu ʼaē ki muʼa atu, neʼe ko ia ko te tisipulo ʼa Soane Patita, ʼe palalau anai ʼi te temi ki muli age, ki te haʼuʼaga ʼo Sesu pea mo tona tuʼulaga maʼuhiga ʼi te fakamaʼuli ʼaē ʼo te tagata. ʼE ina tohi anai: “Ko ia ʼaē ʼe hifo mai te lagi ʼe māʼoluga age ia ia nātou fuli ʼaē. (...) Ko te Tāmai ʼe ʼofa ki te ʼAlo pea kua ina foaki age ia meʼa fuli ki tona nima. Ko ʼaē ʼe tui ki te ʼAlo ʼe ina maʼu te maʼuli heʼegata; ko ʼaē ʼe talagataʼa ki te ʼAlo ʼe mole sio anai ia ki te maʼuli, kae ko te hāūhāū ʼo te ʼAtua ʼe nofo kia te ia.”

ʼI te ʼosi pe ʼo te ʼu palalau ʼa Soane Patita ʼo ʼuhiga mo te hifohifo ʼaē ki lalo ʼo tana gāue, neʼe fekau ke puke ia ia e te hau ko Helote. Neʼe ʼohoanaʼi e Helote ia Helotiate te ʼohoana ʼo tona tēhina ko Filipo. ʼI te fakahāhā ʼaē e Soane ia muʼa ʼo te hahaʼi tana ʼu gāue, neʼe fekau e Helote ke ʼave ia ia ʼo pilisoniʼi. ʼI te ʼiloʼi ʼaē e Sesu te puke ʼaia, neʼe mavae ia ʼi Sutea mo tana kau tisipulo pea nātou ʼolo ki Kalilea. Soane 3:22-4:3; Gāue 19:4; Mateo 28:19; 2 Kolonito 11:2; Maleko 1:14; 6:17-20.

▪ Koteā te faka ʼuhiga ʼo te papitema ʼaē neʼe fai ʼi tona takitaki e Sesu ʼi muʼa ʼo tona fakatuʼuake ʼi te mate? Pea koteā te faka ʼuhiga ʼo te papitema ʼaē neʼe fai ki muli age ʼi tona ʼosi fakatuʼuake?

▪ Neʼe fakahā feafeaʼi koa e Soane ko te hanu ʼo tana ʼu tisipulo ʼe mole tonu?

▪ He koʼe neʼe ʼave ia Soane ʼo pilisoniʼi?