Kapite 64

Ko He ʼEkenaki Ki Te Fakamolemole

ʼE ʼILOGA mai ia ʼe kei nofo ia Sesu, ʼi te fale ʼaē ʼi Kapenaume mo tana ʼu tisipulo. Ko te ʼosi pe ʼaenī ʼo tana fakamahino age kia nātou te faʼahiga fakatokatoka ʼo te ʼu tokakovi ʼe hoko ia nātou. Neʼe fehuʼi age ai e Petelo: “ ʼAliki, ʼe tuʼa fia anai te feala ʼo toku tēhina ke agahala mai kia te ʼau, pea mo tonu ke ʼau fakamolemole kia te ia?” Kapau neʼe ʼui e te kau takitaki lotu ke fakamolemole ʼo aʼu ki te tuʼa tolu, pea e lagi ʼi te manatu ʼa Petelo ʼe ko he manavaʼofa ia te fakatuʼutuʼu ʼaē ke “kaku ki te tuʼa fitu”.

Kae, ko te manatu ʼaia ke fai te faʼahiga tānaki meʼa ʼaia ʼe kovi. Neʼe fakatonutonuʼi e Sesu ia Petelo ʼo ʼui maʼana: “ ʼE ʼau tala atu kia te koe, ʼe mole kaku ki te tuʼa fitu, kae ki te tuʼa fitugofulu-ma-fitu.” ʼE ina fakahā ai kia Petelo ʼe mole tonu ke ina faka tuʼakoi tana fakamolemole ki tona tēhina.

Moʼo fakamahino age ki tana ʼu tisipulo ko tonatou maʼua ko te fakamolemole, neʼe fakaʼaogaʼi e Sesu te lea fakatātā. Neʼe palalau ia ki te hau ʼe ina fakatokatoka tana ʼu meʼa mo tana ʼu tagata kaugana. Neʼe ʼaumai kia te ia te tagata kaugana ʼe lahi ʼaupito tona maʼua kia te ia, ko tenalio e 60 miliona, pea neʼe mole ʼi ai hana falā moʼo huʼi ʼo tona maʼua. Koia neʼe fakatotonu ai e te hau, ko te fakamatala age ʼaia ʼa Sesu, ke fakatau ia ia, mo tona ʼohoana, mo tana fānau pea mo tana ʼu meʼa fuli, ke feala ai te huʼi ʼo tona maʼua.

ʼI tana logo ki te meʼa ʼaia, neʼe fakatō mapeʼe te tagata kaugana ki te ʼu vaʼe ʼo tona pule pea mo fakakolekole mamahi age: “Ke ke faʼa kātaki kia te ʼau pea ʼe ʼau huʼi fuli atu anai kia te koe.”

ʼI te lave ki tona loto te ʼofa kia te ia, neʼe manavaʼofa leva te pule pea ina fakamolemole tona maʼua lahi ʼaia. Kae, neʼe toe hoko atu te palalau ʼa Sesu, ʼi te ʼosi pe ʼo tana fai te meʼa ʼaia neʼe hū ki tuʼa te tagata kaugana ʼaia pea felāveʼi ia mo te tahi tagata kaugana ʼi tona ʼu kaugā popūla ʼe nofo mo tona maʼua kia te ia ko tenalio e 100 pe. Neʼe fā te tagata ʼaia ki te kia ʼo tona kaugā popūla ʼo teihiʼi pe ke tuʼu ai tana mānava, pea ʼui maʼana: “Huʼi fuli mai tou maʼua.”

Kae neʼe mole maʼu foki e tona kaugā popūla te falā ʼaia. Neʼe tō ki te ʼu vaʼe ʼo te tagata kaugana ʼaia ʼaē ʼe maʼua ki ai, pea ina fakakolekole mamahi age: “Ke ke faʼa kātaki kia te ʼau pea ʼe ʼau huʼi atu anai kia te koe.” ʼI tona kehekehe ʼaē mo tona pule, neʼe mole manavaʼofa te tagata kaugana; koia neʼe ina ʼave ai tona kaugā popūla ʼaia ʼo pilisoniʼi.

ʼI te sisio ʼa ʼihi tagata kaugana ki te meʼa ʼaia, ko te hoko atu ʼaia ʼo te palalau ʼa Sesu, neʼe nātou ʼolo ʼo fakamatala ki tonatou pule. ʼAki te kovi ʼo tona ʼita, neʼe ina pāuiʼi leva te tagata ʼaia. “Tagata kaugana agakovi, ko tana ʼui age ʼaenī, neʼe ʼau fakamolemole katoa atu kia te koe tou maʼua ʼi tau fakakolekole mamahi mai. ʼE mole koa la tonu ia ke ke toe manavaʼofa mo koe ki tou kaugā popūla, ohage pe ko taku manavaʼofa ʼaē kia te koe?” Pea ko tona pule, neʼe ʼita ai, pea ina ʼave ia ia ki te kau leʼo fale pilisoni ʼo kaku ki tana huʼi fuli age tona maʼua.

Neʼe fakaʼosi fēnei te palalau ʼa Sesu: “Koia ʼe toe fai feiā pe anai kia koutou e taku Tāmai ʼaē ʼi selo, mo kapau ʼe mole koutou tahi fakamolemole ʼaki tokotou loto katoa, ki tona tēhina.”

ʼI ʼekenaki taulekaleka leva ki te fakamolemole! Kapau ʼe tou manatuʼi neʼe fakamolemole e te ʼAtua totatou maʼua lahi ʼaupito ʼaē ko te agahala, ko te hala fuli pe ʼa he tahi ʼi ʼotatou ʼu tēhina kilisitiano kia tatou ʼe veliveli ʼaupito age ia. Pea tahi foki, ko Sehova ʼAtua neʼe kua ina fakamolemole mai kia tatou ʼo lauʼi afe tona tuʼa lahi. Ko te meʼa ʼe tautau hoko, ko tatatou mole tokagaʼi pe la te ʼu hala ʼaē ʼe tou fai kia te ia. Koia, ʼe mole feala koa la ia hatatou fakamolemole ki totatou tēhina ʼo tuʼa lahi, tatau aipe peʼe tonu tatatou mamahi ʼaē ki ai? Tou manatuʼi te meʼa ʼaē neʼe palalau kiai ia Sesu ʼi tana Akonaki ʼi te moʼuga: ʼe ‘fakamolemole anai e te ʼAtua ʼatatou ʼu agahala, ohage ko tatatou fakamolemole kia nātou ʼe agahala mai kia tatou’. Mateo 18:21-35; 6:12; Kolose 3:13.

▪ Koteā te meʼa ʼaē neʼe ina uga ia Petelo ke ina fehuʼi pe e tuʼa fia tana fakamolemole ki tona tēhina, pea he koʼe neʼe ʼi tana manatu ʼe ko he manavaʼofa ia mokā ʼe fakamolemole ʼo kaku ki te tuʼa fitu?

▪ Koteā te kehekehe ʼo te aga ʼa te hau ʼi te fakakolekole mamahi age ʼa tana tagata kaugana ke fakamolemole age, pea mo te aga ʼa te tagata kaugana ʼaia ʼi te fakakolekole mamahi age e tona kaugā popūla ki ai?

▪ Koteā te ako ʼe tou maʼu mai ʼi te lea fakatātā ʼa Sesu?