Kapite 67

Neʼe Mole Nātou Puke Ia Sesu

ʼI TE lolotoga ʼo te lafeti ʼo te ʼu Tapenakulo, neʼe fekauʼi e te kau takitaki lotu ʼo te kau Sutea te ʼu tagata fekau ke nātou ʼolo ʼo puke ia Sesu. Neʼe mole nono ia Sesu, neʼe haga fai akonaki pe ia ʼi te hahaʼi, ʼo ʼui maʼana: “Kei ʼau nofo mo koutou ʼi he kiʼi temi siʼisiʼipe, ʼi muʼa ʼo taku liliu kia ia ʼaē neʼe ina fekauʼi mai ʼau. ʼE koutou kumi anai ʼau, kae ʼe mole koutou maʼu anai ʼau, pea ko te potu ʼaē ʼe ʼau ʼi ai, ʼe mole feala anai hakotou ʼōmai kiai.”

Ko te kau Sutea, ʼaē ʼe mole mahino ki te ʼu palalau ʼaia, ʼe nātou feʼuiʼaki ia nātou: “Ko te potu fea koa ʼaē ʼe fakatuʼutuʼu ke ʼalu kiai te tagata ʼaenī, ʼaē ʼe mole feala ai ke tou maʼu ia ia? ʼE kua ina fakatotonu koa ia ke ʼalu ki te kau Sutea ʼaē ʼe mavetevete ʼi te kau Keleka pea mo akonakiʼi te kau Keleka? Koteā te ʼuhiga ʼo te palalau ʼaē neʼe ina fai: ‘ ʼE koutou kumi anai ʼau, kae ʼe mole koutou maʼu anai ʼau, pea ko te potu ʼaē ʼe ʼau ʼi ai, ʼe mole feala anai hakotou ʼōmai kiai’?” ʼE talanoa ia Sesu, ki tona mate ʼaē ka hoko mai pea mo tona fakatuʼuake ki te maʼuli ʼi selo, ʼaē ʼe mole feala anai ke muliʼi ai ia ia ʼe tona ʼu fili.

Kua hoko mai te ʼaho fitu pea ko te ʼaho fakaʼosi ʼaia ʼo te lafeti. ʼI te uhu fuli, ʼe liligi e te pelepitelo te vai, neʼe ōhu mai te vai ʼo Siloame, pea ʼe ina liligi ki te tafito ʼo te ʼaletale. ʼI tana lagi fakamanatu ki te hahaʼi te meʼa ʼaia ʼe fai ʼi te uhu fuli, neʼe kalaga fēnei ia Sesu: “Kapau ʼe fia ʼinu he tahi, ke haʼu ia kia te ʼau pea ke ʼinu! Ko ʼaē ʼe tui kia te ʼau, ohage ko tona tala e te Tohi-Tapu: ‘Mai loto ia te ia totonu, ʼe tafe mai ai anai he ʼu liuʼa vai maʼuli.’ ”

ʼIo, ʼe palalau ia Sesu ʼi henī ki te ʼu fua fakatalakitupua ʼo te folahi ʼo te laumālie maʼoniʼoni, ʼaē ka hoko anai ʼi te Penikosite ʼo te taʼu ka hoko mai. Ka kamata anai e te toko 120 tisipulo tonatou minisitelio ki te hahaʼi, ʼe māpuna ai anai te ʼu liuʼa vai maʼuli. Kae, ʼo aʼu ki te temi ʼaia, ʼe mole ʼi ai he laumālie, ko tona faka ʼuhiga ʼaē neʼe mole he tisipulo ʼa Kilisito neʼe kua fakanofo ʼaki te laumālie maʼoniʼoni pea mo pāuiʼi ki te maʼuli ʼi selo.

Ko ʼihi, ʼi te lave ki ʼonatou loto te akonaki ʼa Sesu, neʼe kamata ʼui maʼa nātou: “ ʼE ko ia moʼoni Te Polofeta”, neʼe lagi nātou manatuʼi te polofeta ʼaē ʼe lahi ake ia Moisese ʼaē ʼe tonu ke haʼu. Neʼe ʼui e ʼihi: “Ko ia ko Kilisito.” Kae neʼe ʼi ai ʼihi neʼe nātou kinau: “ ʼE haʼu koa ia Kilisito mai Kalilea? Neʼe mole tala koa la e te Tohi-Tapu ʼe haʼu ia Kilisito mai te hōloga ʼo Tavite, mai Petelehemi, te kolo ʼaē neʼe ʼi ai ia Tavite?”

Kua felogo kehekehe ʼaki te hahaʼi. Ko ʼihi ʼe nātou loto ke puke ia Sesu, kae neʼe mole he tahi neʼe fā ki ai. ʼI te liliu mai ʼa te kau tagata fekau ka neʼe mole nātou ʼaumai ia Sesu, neʼe fehuʼi age e te ʼu pelepitelo pule pea mo te kau Faliseo kia nātou: “He koʼe neʼe mole koutou ʼaumai ia ia?”

“ ʼE mole heʼeki ʼi ai he tahi age tagata kua palalau feiā”, ko tanatou tali age ʼaia.

Neʼe ʼiʼita kovi ai te kau takitaki lotu pea nātou manukinuki ai, mo kiasi, mo fatufatu pea mo tauvele kia nātou. ʼO nātou ʼui fēnei: “ ʼE kua toe kau koa ia mo koutou ʼi te fakahēʼi? ʼE ʼi ai koa la he tahi ia ʼi te kau tagata pule peʼe ko te kau Faliseo ʼe tui kia te ia? Kae ko te hahaʼi ʼaenā ʼaē ʼe mole nātou ʼiloʼi te Lao, ʼe ko te kau malaʼia.”

ʼI tana logo ki te ʼu palalau ʼaia, ko Nikotemo, neʼe ko he Faliseo pea mo he pule ki te kau Sutea (ko tona faka ʼuhiga ʼe kau ʼi te Sanetualio), neʼe lototoʼa ʼo palalau ʼo kau mo Sesu. E lagi ʼe kei koutou manatuʼi, ia taʼu e lua vaelua ki muʼa atu, neʼe ʼalu te tagata ʼaia kia Sesu ʼi te pōʼuli ʼo fakahā ki ai tana tui. ʼI te temi nei, ko ia ʼaenī kua palalau: “Ko tatatou lao ʼe ina fakamāuʼi koa he tagata ka heʼeki fakalogo muʼa ia ia pea mo ʼiloʼi te meʼa ʼaē ʼe ina fai?”

Neʼe toe ʼāsili ai foki te ʼiʼita ʼo te kau Faliseo ʼi tanatou logo ki he tahi ʼonatou ʼe kau mo Sesu. “ ʼE ke toe haʼu koa la koe, mo koe, mai Kalilea? ko tanatou fehuʼi faka kiasi age ʼaia. Vakaʼi pea ke sio ai ʼe mole he polofeta ʼe tupu ake anai mai Kalilea.”

Logope la neʼe mole fakahā e te Tohi-Tapu ʼe haʼu anai he polofeta mai Kalilea, kae neʼe ina fakahā ʼe haʼu ia Kilisito mai te potu fenua ʼaia, ʼaē neʼe ʼui maʼa te Tohi-Tapu, ʼe mamata anai te hahaʼi ʼi te potu fenua ʼaia “ki he mālama lahi ʼe gigila”. Pea tahi, ko Sesu neʼe tupu ʼi Petelehemi pea ʼe haʼu ia mai te hōloga ʼo Tavite. ʼE ʼiloga lelei mai ia ko te kau Faliseo, logope tanatou ʼiloʼi lelei te ʼu faʼahiga meʼa ʼaia, ʼe ko nātou ʼaē neʼe nātou folahi te ʼu manatu hala ʼaia ʼaē neʼe maʼu e te hahaʼi ʼo ʼuhiga mo Sesu. Soane 7:32-52; Isaia 9:1, 2; Mateo 4:13-17.

▪ Koteā te meʼa ʼaē neʼe hoko ʼi te ʼu uhu fuli ʼo te lafeti, pea neʼe feafeaʼi te fakatokagaʼi e Sesu ki te hahaʼi te faʼahi ʼaia?

▪ He koʼe neʼe mole puke Sesu e nātou ʼaē neʼe fekauʼi, pea koteā te aga ʼa te kau takitaki lotu?

▪ Ko ai ia Nikotemo? Koteā tana manatu ʼo ʼuhiga mo Sesu, pea koteā te aga ʼa te tahi kau Faliseo kia ia?

▪ Koteā ʼaē ʼe hā mai ai ko Kilisito ʼe tonu ke haʼu mai Kalilea?