Kapite 68

ʼE Hoko Atu Te Fai Akonaki ʼa Sesu ʼi Te ʼAho Fitu

ʼE KEI tou nonofo nei pe ʼi te fitu ʼaho pea ʼe ko te ʼaho fakaʼosi ʼaia ʼo te lafeti ʼo te ʼu Tapenakulo. ʼE fai akonaki Sesu ʼi “te Tānakiʼaga koloā”, ko te faʼahi ʼo te fale lotu, ʼe ʼiloga mai ia ʼe tuʼu ʼi te Potu ʼo te hahaʼi fafine. Ko te potu ʼaia ʼe tuku ai te ʼu kiʼi puha ʼaē ke ʼai kiai te ʼu meʼa ʼofa ʼa te hahaʼi.

ʼI te afiafi fuli, lolotoga te lafeti ʼaia, ko te potu ʼaia ʼe makehe tona mālama. Neʼe fakatuʼu ʼi ai te ʼu pou mālama tuʼu lalahi e fā, ʼo takitahi te ʼu ipu lalahi e fā, ʼe fonu ko te lolo. ʼAki te lolo ʼaē ʼe mū ʼi te ʼu foʼi ipu ʼaia e 16, ʼe feala ai ke mālama ʼo mamaʼo ʼi te pōʼuli. Ko te ʼu palalau ka fai nei e Sesu e lagi nātou fakamanatu kia nātou ʼaia ʼe fagono kia te ia, te ʼu mālama ʼaia. “Ko ʼau ko te mālama ʼo te malamanei, ko tana ʼui age ʼaia. Ko ʼaē ʼe muli mai ia te ʼau ʼe mole toe haʼele anai ia ʼi te fakapōʼuli, kae ʼe ina maʼu anai te mālama ʼo te maʼuli.”

Neʼe tali age e te kau Faliseo: “ ʼE ke fakamoʼoni kia koe totonu; ko tau fakamoʼoni ʼe mole moʼoni.”

Moʼo tali ki te faʼahi ʼaia neʼe tala age e Sesu kia nātou: “Tatau aipe peʼe ʼau fakamoʼoni kia te ʼau totonu, ko taku fakamoʼoni ʼe moʼoni, heʼe ʼau ʼiloʼi te potu neʼe ʼau haʼu mai ai pea mo te potu ʼe ʼau ʼalu kiai. Kae ko koutou, ʼe mole koutou ʼiloʼi peʼe ʼau haʼu maifea pea mo te faʼahi ʼe ʼau ʼalu kiai.” Neʼe ina toe ʼui age: “Neʼe ʼau fakamoʼoni tonu ʼo ʼuhiga mo ʼau, pea ko te Tāmai ʼaē neʼe ina fekauʼi mai ʼau ʼe fakamoʼoni ʼo ʼuhiga mo ʼau.”

“ ʼE ʼifea tau Tāmai?” ko te fehuʼi age ʼaenī ʼa te kau Faliseo.

“ ʼE mole koutou ʼiloʼi ʼau mo taku Tāmai. Heʼe ka na neʼe koutou ʼiloʼi ʼau, ka na ʼaua la ʼe koutou ʼiloʼi foki mo taku Tāmai.” Logope te loto ʼaē ʼo te kau Faliseo ke puke ia Sesu, neʼe mole he tahi neʼe fā kia te ia.

“Ko takue ʼalu, ko te toe ʼui age ʼaia ʼa Sesu. Heʼe ko te faʼahi ʼaē ʼe ʼau ʼalu kiai, ʼe mole feala hakotou ʼōmai kiai.”

ʼI tanatou logo ki te meʼa ʼaia, neʼe feʼekeʼaki fēnei te kau Sutea: “ ʼE fakamate anai koa ia, koia ʼaē ʼe ina ʼui mai ai: ‘Ko te faʼahi ʼaē ʼe ʼau ʼalu kiai, ʼe mole feala hakotou ʼōmai kiai’?”

“Ko koutou ko te hahaʼi ʼo te ʼu fenua ʼo lalo nei, ko te fakamahino age ʼaia ʼa Sesu; ko ʼau, ʼe ʼau kau ʼi te ʼu fenua ʼo ʼoluga. ʼE koutou kau ʼi te mālama ʼaenī; ko ʼau, ʼe mole ʼau kau ʼau ʼi te mālama ʼaenī.” ʼO hoko atu tana palalau: “Heʼe kapau ʼe mole koutou tui ko ʼau ia ia, ʼe koutou mamate anai ʼi ʼakotou agahala.”

ʼE palalau Sesu ʼi henī ʼo ʼuhiga mo tona maʼuli ʼi te lagi pea mo te faʼahi ʼaē ko ia ko te Mesia ʼaē neʼe fakapapauʼi mai, ia Kilisito. Kae neʼe fehuʼi fakamanukinuki fēnei age e te kau Sutea: “Ko ai koe?”

ʼI tanatou fakafisi kia te ia, neʼe ʼui age e Sesu kia nātou: “He koʼe koa ʼe ʼau palalau atu kia koutou?” Kae neʼe ina toe ʼui age: “Ko ia ʼaē neʼe ina fekauʼi mai ʼau ʼe moʼoni pea, ko te ʼu meʼa ʼaē neʼe ʼau logo kiai ʼi ʼo ia, ʼe ʼau fakahā ki te mālama.” ʼOsi ʼaia pea ina tala age: “Ka koutou hiki anai te Foha ʼo te tagata ki ʼoluga, pea ʼe koutou ʼiloʼi ai anai ko ʼau ko ia ʼaia, pea ʼe mole ʼau fai he meʼa ʼaki toku loto faʼifaʼitaliha; kae, ohage ko tona akoʼi mai e te Tāmai kia te ʼau, ʼe ʼau tala atu te ʼu meʼa ʼaia. Pea ko ʼaē neʼe ina fekauʼi mai ʼau ʼe kau mo ʼau; neʼe mole ina tuku tokotahi ʼau, koteʼuhi ʼe ʼau fai tuʼumaʼu te ʼu meʼa ʼaē ʼe loto ia kiai.”

ʼI tanatou logo ki te faʼahi ʼaia, neʼe tokolahi neʼe tui kia te ia. ʼO palalau Sesu kia nātou ʼaia ʼo ʼui maʼana: “Kapau ʼe koutou nonofo ʼi taku folafola, ko koutou ko ʼaku ʼu tisipulo moʼoni, pea ʼe koutou ʼiloʼi ai te moʼoni, pea ko te moʼoni ʼe ina faka ʼāteaina anai koutou.”

“Ko mātou ko te hōloga ʼo Apalahamo, ko te kinau age ʼaia ʼo tona ʼu fili, pea neʼe mole heʼeki mātou kaugana ki he tahi. He koʼe ʼe ke ʼui mai koe: ‘ ʼE koutou liliu anai ʼo ʼāteaina’?”

Logope tanatou tautau nonofo ʼo fakalogo ki te pule ʼa te hahaʼi kehe, ko te kau Sutea ʼe mole nātou ʼiloʼi he tahi pule. Neʼe nātou fakafisi ʼi te fakahigoaʼi ʼo nātou ko te ʼu kaugana. Kae neʼe fakahāhā age e Sesu ko nātou ko te ʼu kaugana moʼoni. Koteā koa te ʼuhiga ʼo te palalau ʼaia? “ ʼE ʼau fakamoʼoni atu, ko te fakamahino age ʼaia ʼa Sesu, ko ʼaē ʼe ina maʼuliʼi te agahala ʼe kaugana ia ki te agahala.”

ʼI tanatou fakafisi ʼaē ʼe mole nātou kaugana ki te agahala, kua nonofo te kau Sutea ʼi he faʼahi fakatupu tuʼutāmaki. “Ko te tagata kaugana ʼe mole nofo tuʼumaʼu ia ʼi te ʼapi, ko te ʼui age ʼaia ʼa Sesu; ko te foha ʼe nofo ai ia ʼo tuʼumaʼu.” ʼE moʼoni, ko te tagata kaugana ʼe mole feala tana ʼui ʼe kau ki te tofiʼa, ʼe feala pe ia ʼi te temi fuli ke kapu ia mai ai. Gata pe ki te foha ʼaē neʼe tupu pe neʼe vaheʼi ʼi te ʼapi ʼaia ʼe nofo ʼi ai “ ʼo tuʼumaʼu”, ko tona ʼuhiga ʼe nofo tuʼumaʼu ia ʼi ai ʼi tona temi maʼuli.

“Kapau ko te Foha ʼe ina faka ʼāteaina koutou, pea ʼe koutou ʼāteaina moʼoni anai”, ko te hoko ʼaia ʼo te palalau ʼa Sesu. Koia, ko te moʼoni ʼaē ʼe ina faka ʼāteaina te ʼu tagata, ʼe ko te moʼoni ʼo ʼuhiga mo te Foha, ia Sesu Kilisito. Ko te sakilifisio ʼo tona maʼuli fakatagata haohaoa ʼe feala, ia ia tokotahi pe, ke ina faka ʼāteaina he tahi mai te agahala ʼaē ʼe ina taki ki te mate. Soane 8:12-36.

▪ ʼE fai akonaki koa Sesu ʼifea ʼi te ʼaho fitu? Koteā te meʼa neʼe hoko ʼi te pōʼuli ʼi te faʼahi ʼaia, pea koteā tona pikipikiga mo te akonaki ʼa Sesu?

▪ Koteā te talanoa ʼa Sesu ʼo ʼuhiga mo tona haʼuʼaga, pea koteā ʼaē ka hā ʼaki mai ai anai ʼo ʼuhiga mo ia?

▪ Koteā te ʼuhiga ʼo te ʼui ʼaē ko te kau Sutea ko te kau kaugana, kae ko te moʼoni fea ʼaē ka ina faka ʼāteaina anai ia nātou?