Kapite 72

Neʼe Fekauʼi e Sesu Te Toko 70 Tisipulo

ʼE TOU nonofo nei ʼi te fasiga taʼu fakatōlau ʼo te taʼu 32, ko taʼu katoa e tolu kua hili ki te papitema ʼo Sesu. Ko te hoki ʼosi pe ʼaenī ʼo te kau ʼa Kilisito pea mo tana ʼu tisipulo ki te lafeti ʼo te ʼu Tapenakulo ʼaē neʼe fai ʼi Selusalemi pea, ʼe ʼiloga mai ia ʼe nātou nonofo ʼi te ʼu tafaʼaki ʼo Selusalemi. Koia, lolotoga te ʼu māhina e ono fakaʼosi ʼo tona minisitelio, neʼe tautau nofo ia Sesu ʼi Sutea, peʼe ʼi te tahi atu kauvai ʼo Solotane, ʼi te tisitilike ʼo Pele, ko te telituale ʼaia ʼe tonu foki ke feʼaluʼaki ai.

ʼE moʼoni e talu mai te Pāsikate ʼo te taʼu 30 neʼe kua ʼosi fai faka mafola ia ʼi Sutea lolotoga māhina e valu. Kae ʼi te ʼosi faigaʼi e te kau Sutea ke matehi ia ia ʼi te potu fenua ʼaia ʼi te Pāsikate ʼo te taʼu 31, neʼe teitei fai akonaki ʼāteaina pe ia ia ʼi Kalilea lolotoga te taʼu katoa mo te vaelua. Lolotoga te temi ʼaia, neʼe ina fakatuʼutuʼu he kautahi maʼuhiga ʼo ni kau fai faka mafola kua ako leleiʼi ia nātou ki te faʼahi ʼaia, neʼe mole heʼeki ina fai he meʼa feiā ʼi muʼa atu. Kae ʼi te temi nei, ʼe ina fakatuʼutuʼu he gāue faka mafola fakaʼosi ʼe mālohi ʼi Sutea.

Moʼo kamata ʼo te gāue ʼaia, neʼe fili e Sesu te ʼu tisipulo e toko 70 ʼo ina fekauʼi taki toko lua. ʼO fakakatoa, ko hoa e 35 kau faka mafola ʼo te Puleʼaga ka nātou feʼaluʼaki ʼi te telituale. ʼE nātou ʼolo ʼi muʼa ʼo Sesu ʼi te ʼu kolo fuli pea mo te ʼu potu neʼe kua ina fakatuʼutuʼu ke ʼalu ki ai, pea mo tana lagi kau ʼapositolo.

Neʼe mole ina fekauʼi te kau tisipulo ʼaē e toko 70 ke nātou ʼolo ki te ʼu sinakoka, kae neʼe ʼui age e Sesu ke nātou hū ki te ʼu loto fale: “ ʼI he loto fale ʼe koutou hū kiai, koutou ʼui age muʼa: ‘Ke haʼu te tokalelei ki te ʼapi ʼaenī!’ Pea kapau ʼe ʼi ai he kaumeʼa ʼo te tokalelei, ko takotou tokalelei ʼe hili anai kia te ia.” Koteā koa tanatou logo ʼaia? Neʼe toe ʼui age e Sesu: “Koutou toe ʼui age kia nātou: ‘Ko te puleʼaga ʼo te ʼAtua kua ōvi mai kia koutou.’ ” ʼO ʼuhiga mo te gāue ʼa te kau tisipulo ʼaē e toko 70, ʼe tou lau te meʼa ʼaenī ʼi te tohi Commentaire de Matthew Henry (fakapilitānia): “Ohage pe ko tonatou Pule, ʼi te potu fuli pe ʼe nātou ʼolo ai ʼe nātou fai faka mafola ʼi te ʼu ʼapi.”

Ko te ʼu fakatotonu ʼaē neʼe foaki e Sesu ki tana ʼu tisipulo ʼaē e toko 70 ʼe tatau pe mo ʼaē neʼe ina foaki ki tana ʼu ʼapositolo e toko 12 ʼi he taʼu katoa ki muʼa atu ʼi muʼa ʼo tana fekauʼi nātou ke nātou ʼolo ʼo fai faka mafola ʼi Kalilea. Neʼe mole gata ʼaki pe tana fakatokaga ia nātou ki te fakafeagai ka tau anai mo nātou pea mo teuteuʼi nātou ki te fakahā ʼo te logo ki te hahaʼi, kae ʼe ina toe foaki age foki kia nātou he mālohi moʼo fakamālōlō ʼo te ʼu mahaki. Koia, ka kaku mai anai ʼi ʼonatou tuʼa, ʼe ina maʼu anai he hahaʼi tokolahi ʼe nonofo mo honatou fia felāveʼi fakavilivili mo te Pule ʼo te kau tisipulo ʼaia ʼaē ʼe nātou lavaʼi te fai ʼo te ʼu meʼa fakatalakitupua ʼaia.

Ko te fai faka mafola ʼa te toko 70 pea mo te gāue hoholo ʼa Sesu neʼe nounou pe. Kua vave pe te toe liliu mai ʼa te ʼu hoa fai faka mafola ʼaia e 35 kia Sesu. “ ʼAliki, ko te ʼui fakafiafia ʼaia ʼa te kau tisipulo, māʼia mo te kau temonio kua nātou fakalogo kia mātou mokā mātou fakaʼaogaʼi tou huafa.” ʼE mahino ia neʼe lagi fiafia ia Sesu ʼi tana logo ki te fakamatala ʼo te gāue fakafiafia ʼaia, koia neʼe ina tali fēnei ai: “Neʼe kua ʼau mamata kia Satana kua ʼosi tō ia mai te lagi ohage he ʼuhila. Koʼeni neʼe kua ʼau foaki atu kia koutou he mālohi moʼo malamalaki ʼo te ʼu gata pea mo te ʼu sekolopio.”

ʼE ina ʼiloʼi ʼi te ʼosi ʼo te fakatuʼu ʼo te Puleʼaga ʼo te ʼAtua, ʼi te temi fakaʼosi, ʼe kapu anai Satana pea mo tana ʼu temonio mai te lagi. Kae, ʼi te temi nei, ko te fealagia ʼaē ki he ʼu tagata ke nātou kapu te ʼu temonio ʼe fakapulipuli ʼe fakamālohiʼi ai te tui ʼaē ko te meʼa ʼaia ʼe hoko moʼoni anai; koia ʼaē neʼe palalau ai Sesu ki te kapu ifo ʼo Satana mai te lagi ohage ko he meʼa neʼe kua ʼosi fai. Pea ko te maʼu e te ʼu tisipulo ʼaē e toko 70 te mālohi moʼo malamalaki ʼo te ʼu gata pea mo te ʼu sekolopio, ʼe ko te ʼu palalau fakatātā. Kae, neʼe toe ʼui age e Sesu: “ ʼAua naʼa koutou fakafiafia ʼi te fakalogo atu ʼa te ʼu laumālie kovi kia koutou, kae ke koutou fakafiafia ʼi te kua tohi ʼo tokotou ʼu higoa ʼi te lagi.”

Neʼe fiafia te loto ʼo Sesu pea vikiviki ki tana Tāmai ʼi muʼa ʼo te hahaʼi ʼi tana fakaʼaoga ʼaki te taʼi mālohi ʼaia te ʼu tagata agavaivai ʼaia. Neʼe maliu ia ki tana ʼu tisipulo, ʼo ʼui maʼana: “Manuʼia te ʼu mata ʼaē ʼe sio ki te meʼa ʼaē ʼe koutou sisio kiai! Koteʼuhi ʼe ʼau tala atu kia koutou, e tokolahi te kau polofeta pea mo te ʼu hau neʼe nātou holi ke nātou sisio ki te meʼa ʼaē ʼe koutou sisio kiai, kae neʼe mole nātou sisio kiai, pea mo fagono ki te meʼa ʼaē ʼe koutou fagono kiai, kae neʼe mole nātou fagono kiai.” Luka 10:1-24; Mateo 10:1-42; Fakahā 12:7-12.

▪ Neʼe fai faka mafola ia Sesu ʼifea lolotoga te ʼu taʼu e tolu ʼaē neʼe kamata ai tona minisitelio, pea ko te telituale fea ʼaē neʼe feʼaluʼaki ai lolotoga te ʼu māhina fakaʼosi e ono?

▪ Ko te potu fenua fea ʼaē neʼe fekauʼi e Sesu kiai tana toko 70 tisipulo?

▪ He koʼe neʼe ʼui e Sesu neʼe kua sio ia kia Satana kua ʼosi tō mai te lagi?

▪ Koteā te faka ʼuhiga ʼo te ʼui ʼaē ʼe feala ke malamalaki e te toko 70 tisipulo te ʼu gata pea mo te ʼu sekolopio?