Kapite 91

Kua Fakatuʼuake Ia Lasalo

KUA kaku mai leva ia Sesu, pea mo nātou fuli ʼaē neʼe kaugā fagona mo ia, ki te falemaka fakamanatu ʼo Lasalo. Neʼe ko he ʼana ia neʼe māpunuʼi tona hūʼaga ʼaki te foʼi maka. “Koutou toʼo te foʼi maka”, ko te ʼui ʼaia ʼa Sesu.

“ ʼAliki, kua lagi mamanu ia, heʼe kua katoa nei ʼona ʼaho e fā”, ko te ʼui age ʼaia ʼa Maleta, ʼaē ʼe mole heʼeki mahino ki te meʼa ʼaē ka fai e Sesu.

Kae tali age Sesu ki ai: “Neʼe mole heʼeki ʼau ʼui atu koa la kia te koe kapau ʼe ke tui, pea ʼe ke mamata anai ki te kolōlia ʼo te ʼAtua?”

Neʼe toʼo ai leva te foʼi maka. ʼOsi ʼaia pea hiki ake te ʼu mata ʼo Sesu pea ina fai te kole ʼaenī: “Tāmai, ʼe ʼau fakafetaʼi kia te koe ʼi tau kua fakaafio mai kia te ʼau. Neʼe ʼau ʼiloʼi pe, ʼe moʼoni, ʼe ke fakaafio tuʼumaʼu aipe kia te ʼau; kae tupu ko te hahaʼi ʼaenī ʼe tutuʼu ʼi henī, koia ʼaē neʼe ʼau palalau ai, koteʼuhi ke nātou tui neʼe ke fekauʼi mai ʼau.” Neʼe faikole Sesu ia muʼa ʼo te hahaʼi ke nātou ʼiloʼi ko te mālohi ʼaē neʼe foaki e te ʼAtua kia ia ʼaē ka ina fai ʼaki te meʼa ʼaē ka hoko. Pea neʼe kalaga ai ʼo leʼolahi: “Lasalo, haʼu ki tuʼa!”

ʼI te lakaga ʼaia neʼe hū mai ai Lasalo ki tuʼa. Ko tona ʼu nima pea mo tona ʼu vaʼe neʼe kei haʼihaʼi, pea ko tona fofoga ʼe kofukofu ʼaki te kie. “Koutou vevete age ia ia pea koutou tuku age ia ia ke ʼalu”, ko te ʼui age ʼaia ʼa Sesu.

ʼI tanatou sisio ki te milakulo ʼaia, neʼe tokolahi ʼi te kau Sutea ʼaē neʼe ʼōmai ʼo fakaloto mālohiʼi ia Malia pea mo Maleta neʼe nātou tui kia Sesu. Kae ko ʼihi ia, neʼe nātou ʼolo ʼo fakamatala te meʼa ʼaē neʼe hoko ki te kau Faliseo. Ko te kau Faliseo pea mo te kau pelepitelo pule neʼe nātou tānaki atu aipe ʼi te temi pe ʼaia te Sanetualio, ʼaē ko te Telepinale lahi ʼo te kau Sutea.

Ko te Sanetualio ʼe kau ai ia Kaifa, te pelepitelo lahi ʼaē neʼe fakanofo ʼi te temi ʼaia, ʼo toe kau ai foki mo te kau Faliseo pea mo te kau Satuseo, mo te ʼu pelepitelo pule pea mo te ʼu pelepitelo lalahi ʼāfea. Pea neʼe nātou lāuga fēnei: “Koteā te meʼa ʼe tonu ke tou fai, heʼe lahi te ʼu fakaʼiloga ʼe fai e te tagata ʼaia? Kapau ʼe tou tuku ia ia ke haga fai feiā aipe, pea ʼe nātou tui fuli anai kia te ia, pea ʼe ʼōmai anai te kau Loma ʼo toʼo totatou potu pea mo totatou puleʼaga.”

Logope tanatou ʼiloʼi ʼaē e “lahi te ʼu fakaʼiloga” ʼe fai e Sesu, neʼe manatu pe te kau takitaki lotu ʼaia ki tonatou tuʼulaga pea mo tanatou pule. Ko te toe liliu ʼa Lasalo ki te maʼuli ʼe ko he toe meʼa fakalainoa ia ki te kau Satuseo, koteʼuhi heʼe mole nātou tui ki te toe tuʼuake.

Ko Kaifa, ʼaē e lagi ko he Satuseo, ko ia ʼe lea ʼi te temi nei: “ ʼE mole koutou ʼiloʼi he meʼa, pea ʼe mole koutou fakakaukauʼi ʼe ko he meʼa ʼe lelei kia koutou ke mate he tagata e tahi maʼa te hahaʼi pea ke ʼaua naʼa fakaʼauha te fenua katoa.”

Neʼe ko te ʼAtua ʼaē neʼe ina ʼeke ia Kaifa ke ina fai te ʼu palalau ʼaia. He neʼe tohi e Soane ki muli age: “Koia ko [Kaifa] neʼe mole ina tala te meʼa ʼaia ʼaki tana manatu pe ʼa ia tokotahi.” Ko te meʼa ia ʼaē neʼe manatu ki ai ia Kaifa, ʼe tonu ke matehi ia Sesu ke ʼaua naʼa ʼāsili age tana faka ʼalunoaʼi tanatou pule pea mo tonatou maʼuhiga ki te hahaʼi ʼaē ʼe nātou maʼu mai tonatou tuʼulaga. Kae, ohage pe ko te meʼa ʼaē neʼe ʼui e Soane, ‘neʼe fakakikite e Kaifa ko te tōfiga ʼo Sesu ko te mate maʼa te fenua, pea ʼe mole gata ʼaki pe te fenua, kae moʼo toe tānaki foki ʼi te logo tahi te ʼu fānau ʼa te ʼAtua ʼaē ʼe mavetevete’. Pea ʼe moʼoni ia, ko te finegalo ʼo te ʼAtua ke mate ia tona ʼAlo ko he totogi ʼo te hahaʼi fuli.

ʼI te temi leva ʼaenī kua lavaʼi e Kaifa te uga ʼo te Sanetualio ke nātou fonofonoʼi te matehi ʼo Sesu. Kae, ʼi tona lagi fakahā age ʼaē ki ai ʼo tanatou fakatuʼutuʼu ʼo ʼuhiga mo ia e Nikotemo, te tagata ʼe kau ʼi te Sanetualio pea ʼe agaʼofa kia ia, neʼe mavae ai Sesu ʼi te koga meʼa ʼaia. Soane 11:38-54.

▪ He koʼe neʼe faikole ia Sesu ia muʼa ʼo te hahaʼi ʼi muʼa ʼo tana fakatuʼuake ia Lasalo?

▪ Koteā te meʼa ʼaē ʼe fai e nātou neʼe mamata ki te fakatuʼuake ʼaia?

▪ Koteā ʼaē ʼe ʼasi mai ai te agakovi ʼonatou ʼaē ʼe kau ʼi te Sanetualio?

▪ Koteā te ʼu manatu ʼa Kaifa, pea koteā te fakakikite ʼaē neʼe uga e te ʼAtua ke ina fai?