Te Tohi Mai Te Kolesi Pule

“Kua tonu ke kotou liliu ko he kau faiako.” (Hep. 5:12) Fakakaukauʼi age muʼa te aluʼaga ʼaeni: ʼE kole mai e Sehova, ia te Faiako lelei ʼo te ʼatulaulau, kia tatou, ke tou akoʼi ki totatou tatau pe ko ai ia ia! ʼE ko he pilivilesio pea mo he maʼua maʼuhiga te akoʼi ʼo te moʼoni ʼo ʼuhiga mo Sehova, ʼi te famili, mo te kokelekasio, peʼe ʼi te faifakamafola. ʼE feafeaʼi hatatou fakahoko lelei te gaue ʼaia?

ʼE tou maʼu tona tali ʼi te ʼu palalau ʼaeni neʼe tohi e te apositolo ko Paulo kia Timoteo: “Ke ke haga fai fakamalotoloto tau lautohi ia muʼa ʼo te kaugā malie, mo tau faitokoni pea mo tau faiakonaki.” Neʼe toe ui fenei e Paulo: “ ʼI tau fai te faʼahi ʼaia, ʼe ke haofaki anai ia koe totonu pea mo natou ʼae ʼe fagono atu.” (1 Tim. 4:13, 16) Ko te logo ʼae ʼe ke fakaha ʼe ko he haofaki maʼuli. Koia ʼae ʼe maʼuhiga ʼaupito ai ke tou tahi faiga ke hikihiki age tatatou faʼahiga lautohi pea mo faiako. Neʼe fai te kaupepa ʼaeni moʼo tokoni kia koe ʼi te faʼahi ʼaia. Koʼeni tona agaaga:

ʼI te ʼu pasina fuli, ʼe ʼi ai te vaega ʼe fakaha ai he pelesepeto Fakatohi-tapu, peʼe ko he faʼifaʼitaki ʼo te ako

Ko Sehova ʼe ko te “Faiako Lahi.” (Esa. 30:20, MN ) Logo la ʼe tokoni atu te kaupepa ʼaeni ke ke hikihiki tau faiakonaki pea mo tau lautohi, kae ʼaua naʼa galo kia koe ko Sehova ʼe ko te Matapuna ʼo te logo ʼae ʼe tou fakaha pea ʼe ko ia ʼae ʼe ina taki mai te hahaʼi. (Soa. 6:44) Koia ʼae, ʼe tonu ai ke ke faikole tuʼumaʼu kia te ia ʼo kole tona laumalie maʼoniʼoni. Fakaʼaogaʼi tuʼumaʼu tana Folafola. Fakamaʼuhigaʼi ia Sehova, kae mole ko koe. Faiga ke ʼoʼofa kia Sehova ia natou ʼae ʼe fagono atu.

ʼE fakaafe koe ke ke akoʼi ki te hahaʼi ia te logo maʼuhiga. Neʼe heʼeki ʼi ai he logo maʼuhiga feia neʼe tala e te tagata. ʼE matou tui papau, ʼe ke fakahoko lelei anai te gaue ʼaia mo kapau ʼe ke falala “ki te malohi ʼae ʼe foaki e te ʼAtua.”—1 Pet. 4:11.

ʼE matou kaugā gaue mo koe,

Te Kolesi Pule ʼa Te Kau Fakamoʼoni ʼa Sehova