KAPITE 49
Kotea ʼe Feala Ke Ke Fai Ke Fiafia Tou Kiʼi Famili? 1 Koga
ʼE fakaʼamu te ʼu taumatuʼa foʼofoʼou ke tologa tuʼumaʼu tonā fiafia ʼae neʼe nā maʼu ʼi tonā ʼaho ʼohoana. ʼE feala pe ke hoko te faʼahi ʼaia. ʼE iloʼi te faʼahi ʼaia e he ʼu Kilisitiano kua fualoa tanatou ʼohoana pea ʼe natou faiga ke natou maʼuliʼi te ʼu tokoni ʼo te Tohi-Tapu.
1. Kotea te ʼu tokoni ʼi te Tohi-Tapu ki te ʼu tagata ʼohoana?
Neʼe foaki e Sehova ki te tagata ʼohoana ia te tuʼulaga ʼae ko te pule famili. (Lau ia Efeso 5:23.) ʼE ina loto ke toʼo e te tagata ʼohoana he ʼu tonu ʼe fua lelei ki tona famili. ʼE ui ʼi te Tohi-Tapu ki te ʼu tagata ʼohoana: “Kotou haga ʼoʼofa ki ʼokotou ʼohoana.” (Efeso 5:25) Kotea koa tona fakaʼuhiga? Ko he tagata ʼofa ʼe agalelei mo tona ʼohoana tatau aipe pe ʼe nā toko lua peʼe moka hahaʼi. ʼE faiga ke ina puipui ia ia pea ke fiafia pea mo foaki te ʼu meʼa ʼe ʼaoga kia ia. (1 Timoteo 5:8) Kae ʼe maʼuhiga age kia ia tana tokoni ki tona hoa ke nofo ovi tuʼumaʼu kia Sehova. (Mateo 4:4) Ohage la, ʼe feala ke nā faikole mo lau fakatahi te Tohi-Tapu. ʼE tokaga lelei te tagata ki tona ʼohoana he ʼe ina taupau he ʼu felogoi lelei mo Sehova.—Lau ia 1 Petelo 3:7.
2. Kotea te ʼu tokoni ʼi te Tohi-Tapu ki te ʼu fafine ʼohoana?
ʼE ui ʼi te Tohi-Tapu “ʼe tonu ki te fafine ʼohoana ke fakaʼapaʼapa lahi ki tona ʼohoana.” (Efeso 5:33) Kotea tona fakaʼuhiga? ʼE feala ke ina tokagaʼi te ʼu kalitate ʼo tona ʼohoana pea mo ʼana faiga ʼae ke tokaga kia ia mo ʼanā fanau. Pea ʼe fakaʼapaʼapa anai ki ai ʼaki hana lagolago ki ʼana tonu, mo palalau lelei ki ai pea mo vikiʼi ia ia, tatau aipe pe ʼe mole tauhi kia Sehova.
3. ʼE feafeaʼi ki he taumatuʼa hanā fakamalohiʼi tonā maʼuli fakataumatuʼa?
ʼE ui ʼi te Tohi-Tapu ʼo ʼuhiga mo te ʼu taumatuʼa: ‘Kua nā liliu ko he kakano ʼe tahi.’ (Mateo 19:5) Ko tona fakaʼuhiga ʼe tonu ke nā fai ia meʼa fuli ke nā feʼofaʼofani tuʼumaʼu. ʼO feafeaʼi? ʼAki hanā fakatahi tuʼumaʼu, mo fefakahaʼaki ʼanā manatu mo te ʼu meʼa ʼae ʼe nā logoʼi. Pea ʼe nā fai anai ʼaki te ʼofa. ʼE tonu ke ha ʼi tonā maʼuli fakataumatuʼa ʼe nā fakamaʼuhigaʼi ia Sehova. ʼE tonu ke nā tokakaga tafito ke mole nā felogoi tuʼumaʼu mo he tahi ʼe mole ko tona ʼohoana.
TA FAKALOLOTO
Ta vakaʼi he ʼu pelesepeto Fakatohi-tapu ʼe tokoni atu ki te fakamalohiʼi ʼo tokolua maʼuli fakataumatuʼa.
4. ʼU tagata ʼohoana, kotou ʼoʼofa mo tokaga lelei ki ʼokotou hoa
ʼE ui ʼi te Tohi-Tapu “ʼe tonu ki te ʼu tagata ʼohoana ke natou ʼoʼofa ki ʼonatou ʼohoana ohage ko tanatou ʼoʼofa ki ʼonatou sino totonu.” (Efeso 5:28, 29) Kotea tona fakaʼuhiga? Vakaʼi te ʼATA VITEO, pea fai te fehuʼi ʼae ʼe hoa mai.
ʼE fakaha feafeaʼi e he tagata ʼohoana tona ʼofa mo tana tokaga lelei ki tona ʼohoana?
Lau ia Kolose 3:12, pea fai te fehuʼi ʼaeni:
ʼE feafeaʼi ki he tagata ʼohoana hana fakaha te ʼu kalitate ʼaeni ki tona ʼohoana?
5. ʼU fafine ʼohoana, kotou ʼoʼofa mo fakaʼapaʼapa ki ʼokotou hoa
ʼE fakalotomalohiʼi ʼi te Tohi-Tapu ia te fafine ke fakaʼapaʼapa ki tona ʼohoana tatau aipe pe ʼe tauhi kia Sehova peʼe kailoa. Lau ia 1 Petelo 3:1, 2, pea fai te ʼu fehuʼi ʼaeni:
Kapau ʼe mole tauhi tou ʼohoana kia Sehova, ʼe mahino ia ʼe ke fakaʼamu ʼi he ʼaho ke haʼu kia Sehova. ʼI tau manatu la, kotea ʼe feala ke malave anai ki ai? Ke ke faifakamafola tuʼumaʼu koa ki ai peʼe ke lelei tau aga ki ai peʼe ko tona fakaʼapaʼapaʼi? Kotea tona tupuʼaga?
ʼI muʼa ʼo te toʼo e te taumatuʼa he tonu, ʼe lelei ke nā manatu tahi. Kae ʼe feala ke mole manatu tahi te fafine mo te tonu ʼae ʼe toʼo e tona ʼohoana. ʼI te aluʼaga ʼaia, ʼe feala ke fakaha e te fafine ki tona ʼohoana ia tana manatu ʼaki he fakaʼapaʼapa pea mo palalau lelei ki ai. Pea ʼe tonu ke mahino kia ia, neʼe foaki e Sehova ki tona ʼohoana te maʼua ʼae ke ina toʼo he tonu ʼe fua lelei ki tonā kiʼi famili. ʼE fai anai e te fafine ia meʼa fuli ke lagolago ki te tonu ʼo tona ʼohoana. Kapau ʼe fai feia, pea ʼe tokoni anai ki te maʼuli fiafia ʼo te loto fale. Lau ia 1 Petelo 3:3-5, pea fai te fehuʼi ʼaeni:
Kotea ʼe logoʼi e Sehova moka fakaʼapaʼapa he fafine ki tona ʼohoana?
6. Kolua tauʼi te ʼu fihifihia ʼo te nofo ʼohoana
ʼE mole he nofo ʼohoana ʼe haohaoa. Koia ʼe tonu ke gaue fakatahi te tagata mo te fafine ki te fakatokatoka ʼonā fihifihia. Vakaʼi te ʼATA VITEO, pea fai te ʼu fehuʼi ʼae ʼe hoa mai.
ʼE ha feafeaʼi neʼe mole kei fakatahi tuʼumaʼu te taumatuʼa?
Kotea neʼe nā fai moʼo fakamalohiʼi tonā maʼuli fakataumatuʼa?
Lau ia 1 Kolonito 10:24 mo Kolose 3:13. Hili te lau ʼo te ʼu vaega takitahi, fai te fehuʼi ʼaeni:
Kotea anai te ʼu fua ka maʼu e he taumatuʼa moka nā maʼuliʼi te tokoni ʼaeni?
ʼE ui mai ʼi te Tohi-Tapu ke tou fefakamaʼuhigaʼiʼaki. Ka tou fakamaʼuhigaʼi he tahi, ko tona fakaʼuhiga ʼe tou fakaʼapaʼapa mo agalelei ki ai. Lau ia Loma 12:10, pea fai te ʼu fehuʼi ʼaeni:
ʼE tonu koa ke atali te tagata peʼe ko te fafine ke ʼuluaki fakamaʼuhigaʼi ia ia? Kotea tona tupuʼaga?
ʼE UI E ʼIHI: “ʼE mole kei hage ʼamā felogoi taumatuʼa ko te mahani.”
ʼE feafeaʼi hau fakaha age ki ai ʼe feala ke tokoni age te Tohi-Tapu ki tonā maʼuli fakataumatuʼa?
MANATU TAFITO
ʼE feala ke fiafia he taumatuʼa mo kapau ʼe nā feʼofaʼofani, mo fefakaʼapaʼapaʼaki pea mo maʼuliʼi te ʼu pelesepeto ʼa te Tohi-Tapu.
Fehuʼi Fakamanatu
ʼE lava tokoni feafeaʼi he tagata ʼohoana ki te maʼuli fiafia ʼo tonā maʼuli fakataumatuʼa?
ʼE lava tokoni feafeaʼi he fafine ʼohoana ki te maʼuli fiafia ʼo tona maʼuli fakataumatuʼa?
Kapau kua ke ʼohoana, kotea te ʼu pelesepeto ʼe tokoni atu anai moʼo fakamalohiʼi tokolua maʼuli fakataumatuʼa?
TE TAHI ʼU MANATU
He ʼu tokoni ʼaoga ʼe tokoni atu anai ke fiafia tou maʼuli fakafamili.
Ko he hiva mo he ʼata viteo ʼe talanoa ki te fiafia ʼe kita logoʼi moka kita maʼuliʼi te ʼu tokoni ʼa te ʼAtua ʼi te nofo ʼohoana.
Kotea te fakaʼuhiga ʼo takita fakalogo ki te pule ʼae ʼe maʼu e tokita ʼohoana?
ʼE maʼuhiga ʼaupito te tokoni ʼa te Tohi-Tapu ki te nofo ʼohoana.
Neʼe Haofaki e Te Tohi-Tapu Toma Maʼuli Fakataumatuʼa (7:12)