KAPITE 58
Ke Ke Nofo Agatonu Kia Sehova
ʼE mole tuku anai e he Kilisitiano he meʼa ke ina maumauʼi ʼana felogoi lelei mo Sehova. ʼE mahino ia, ʼe ke maʼu te taʼi manatu ʼaia. ʼE maʼuhiga ʼaupito kia Sehova tau agatonu. (Lau ia 1 Koloniko 28:9.) Kotea te ʼu aluʼaga ʼe feala ke ina ʼahiʼahiʼi ai tau nofo agatonu? Pea ʼe feafeaʼi hau tauʼi te ʼu aluʼaga ʼaia?
1. ʼE ʼahiʼahi feafeaʼi e ʼihi tatatou agatonu kia Sehova?
ʼE loto e ʼihi ke tuku tatatou tauhi kia Sehova. ʼE lagi kau ai ia natou ʼae neʼe natou liʼaki te moʼoni pea mo fakamafola ni loi ʼo ʼuhiga mo te kautahi ʼa te ʼAtua. ʼE ko tanatou fakatuʼutuʼu ke maumauʼi tatatou tui. ʼE ui ko natou ʼaia ʼe ko te kau aposita. Pea tahi, ʼe ʼi ai te kau takitaki lotu ʼe natou fakamafola ni manatu hala ʼo ʼuhiga mo tatou. ʼE natou loto ke liʼaki e te kau Kilisitiano ʼae ʼe mole nofo tokaga ia tanatou tauhi kia Sehova. ʼE fakatupu tuʼutamaki kia tatou moka tou palalau mo natou ʼaia peʼe lau ʼanatou manatu ʼi te ʼu tohi peʼe ko tanatou pasina ʼi te neti peʼe sioʼi ʼanatou ʼata viteo. Neʼe ui e Sesu ʼo ʼuhiga mo natou ʼae ʼe natou faigaʼi ke mole tou nofo agatonu: “Kotou tukunoaʼi natou. Ko natou ʼe ko he kau takitaki kivi. Pea kapau ʼe takitaki e he kivi he tahi age kivi pea ʼe nā fetoki anai ki he luo.”—Mateo 15:14.
ʼE feafeaʼi leva ia mo kapau neʼe filifili e he tahi ʼe tou iloʼi lelei peʼe ko he tahi ʼi te famili ke mavae mai ia Sehova? ʼE ko he aluʼaga ia ʼe fakalotomamahi. Kotea tona tupuʼaga? Koteʼuhi ʼe feala pe kia ia ʼaia ke ina ui mai ke tou filifili pe ko ia peʼe ko Sehova. Koia ʼe tonu anai ke tou fakatotonu ke tou nofo agatonu kia Sehova. (Mateo 10:37) Pea ʼe tou fakalogo anai ki te fakatotonu ʼa Sehova ʼae ke mole tou toe fakatahi mo ia ʼaia.—Lau ia 1 Kolonito 5:11.
2. ʼE ha feafeaʼi ʼi ʼatatou tonu pe ʼe tou nofo agatonu?
ʼE tou ʼofa ia Sehova koia ʼe mole tou fia fai ai he meʼa ʼe ʼi ai hona pikipikiga mo te lotu hala. ʼE mole tonu ke ʼi ai he pikipikiga ʼo tatatou gaue fakamalama peʼe ko he meʼa pe ʼe tou fai mo te lotu hala. ʼE fakatokaga fenei tatou e Sehova: “Taku hahaʼi, kotou mavae mai [Papiloni Lahi].”—Apokalipesi 18:2, 4.
TA FAKALOLOTO
Ta vakaʼi pe ʼe feafeaʼi hatatou liʼaki ia meʼa fuli pe ʼe feala ke ina fakavaivaiʼi tatatou nofo agatonu kia Sehova. Pea ʼe ta toe vakaʼi pe kotea te fakaʼuhiga ke tou mavae mai Papiloni Lahi.
3. Tokaga ki te ʼu akonaki hala
Kotea ʼe tonu ke tou fai moka tou logo ʼe palalau kovi he tahi ki te kautahi ʼa Sehova? Lau ia Taʼaga Lea 14:15, pea fai te fehuʼi ʼaeni:
He koʼe ʼe mole tonu ke tou tui ki te ʼu meʼa fuli ʼe tou logo ki ai?
Lau ia 2 Soane 10, pea fai te ʼu fehuʼi ʼaeni:
ʼE tonu ke feafeaʼi tatatou aga ki te kau aposita?
Logo la ʼe mole tou felogoi fakahagatonu mo te kau aposita, kae kotea te ʼu aluʼaga ʼe feala ai ke tou maʼu ʼanatou manatu?
ʼI tau manatu la, kotea ʼe logoʼi anai e Sehova moka tou fakalogo he ʼu palalau kovi ʼe fai e ʼihi ʼo ʼuhiga mo ia pea mo tana kautahi?
4. ʼE fai e he tehina he agahala mamafa
Kapau ʼe tou iloʼi neʼe fai e he tahi ʼo te kokelekasio he agahala mamafa, kotea ʼe tonu ke tou fai? Tou vakaʼi he pelesepeto ʼo te Lao ʼae neʼe foaki e te ʼAtua maʼa te kau Iselaele. Lau ia Levitiko 5:1.
Ohage ko tona ui ʼi te vaega ʼaeni, kapau ʼe tou iloʼi neʼe fai e he tahi he agahala mamafa, ʼe tonu ke tou fakaha ki te kau tagata ʼafeā. Kae ʼi muʼa ʼo te fai ʼo te faʼahi ʼaia, ʼe lelei age ke tou fakalotomalohiʼi ia ia ke ina fakaha e ia totonu tana agahala ki te kau tagata ʼafeā. Kapau ʼe tou fai feia, pea ʼe tou fakaha ai totatou ʼofa ki ai. Kae kapau leva ʼe mole ina fai, ʼe tou fakaha anai tatou ki te kau tagata ʼafeā ʼuhi he ʼe tou fia nofo agatonu kia Sehova. Ka tou fai te faʼahi ʼaia, ʼe tou fakaha feafeaʼi ai totatou ʼofa agatonu . . .
kia Sehova ʼAtua?
kia ia ʼae neʼe agahala?
kia natou ʼo te kokelekasio?
Kapau neʼe fai e he tehina he agahala mamafa, fai ia meʼa fuli ke ke tokoni ki ai
5. Mavae mai Papiloni Lahi
Lau ia Luka 4:8 mo Apokalipesi 18:4, 5, pea tali ki te ʼu fehuʼi ʼaeni:
ʼE kei tuʼu koa toku higoa ʼi te lotu ʼae neʼe au kau ai?
ʼE au kau koa ʼi he kautahi ʼe ʼi ai hona pikipikiga mo he tahi age lotu?
E ʼi ai koa he aluʼaga ʼo taku gaue ʼe lagolago ki te lotu hala?
ʼE kei ʼi ai koa he ʼu aluʼaga ʼo toku maʼuli ʼe tonu ai ke au mavae mai te lotu hala?
Kapau neʼe au io ki he fehuʼi ʼi te fehuʼi ʼaeni, kotea te ʼu fetogi ʼe tonu ke au fai?
ʼI te ʼu aluʼaga fuli ʼaia, ʼe ke toʼo anai he ʼu tonu ʼe ha ai tau nofo agatonu kia Sehova pea mo ke taupau maʼu ai he leʼo ʼo loto ʼe lelei.
Kotea ʼe ke fai anai moka kole atu ke ke foaki he meʼa ʼofa moʼo tokoni ki he kautahi fakalotu?
ʼE UI E ʼIHI: “ʼE tonu ke tou iloʼi te meʼa ʼae ʼe ui e te kau aposita ʼo ʼuhiga mo te kau Fakamoʼoni ʼa Sehova moʼo puipui te moʼoni.”
ʼI tau manatu la, ʼe ko he manatu lelei koa ʼaia? Kotea tona tupuʼaga?
MANATU TAFITO
ʼE tou fia nofo agatonu kia Sehova, koia ʼe mole tou fakatahi mo natou ʼae kua mavae mai ia te ia. Pea ʼe tonu ke tou toe fakamamaʼo mai te lotu hala.
Fehuʼi Fakamanatu
He koʼe ʼe mole tonu ke tou sioʼi, mo lau, peʼe fakalogo te ʼu meʼa ʼae ʼe ui e te kau aposita?
ʼE tonu ke feafeaʼi tatatou aga kia natou ʼae kua mavae mai ia Sehova?
ʼE fakaha feafeaʼi e he Kilisitiano kua mavae mai te lotu hala?
TE TAHI ʼU MANATU
Kotea ʼe tonu ke au fai moka au logo ki he ʼu loi ʼe ui e ʼihi ʼo ʼuhiga mo te kau Fakamoʼoni ʼa Sehova?
“ʼE Moʼoni Koa Mo Katoa Te ʼu Logo ʼAe ʼe Tou Maʼu?” (Ko Te Tule Leʼo ʼo ʼAukusito 2018)
ʼE feafeaʼi hau iloʼi ʼe lagolago te gaue ʼe ke fai ki Papiloni Lahi?
Kotea neʼe fai e ʼihi hahaʼi neʼe fakafeagai mai moʼo fakavaivaiʼi tatatou tui?
Vakaʼi te biographie “Je recherchais Dieu depuis mon enfance,” ʼae ʼe talanoa ai ki te hisitolia ʼo he patele neʼe kau ʼi te lotu Shintoïste pea neʼe mavae mai te lotu ʼaia.
“La Bible transforme des vies” (Ko Te Tule Leʼo [Fakafalani] ʼaho 1 ʼo Sulio 2011)