KAPITE 55
Tokoni Ki Tau Kokelekasio
ʼI te malamanei katoa, ʼe lau ko te toko lauʼi miliona kau Fakamoʼoni ʼa Sehova pea ʼi te ʼu kokelekasio ʼe lau ko te toko lauʼi afe. ʼE natou lotofakafetaʼi ki te ʼu tokoni mo te ʼu ako ʼe natou maʼu. Pea ʼe natou lotolelei ke natou lagolago ki ʼanatou kokelekasio ia aluʼaga kehekehe. ʼE mole ko te aluʼaga koa la ʼaia ʼe ke logoʼi ʼi tau kokelekasio?
1. ʼE feafeaʼi hau fakaʼaogaʼi tou temi mo tou malohi ki tau kokelekasio?
ʼE feala ke tou tokoni fuli ʼi te kokelekasio. Kapau la ʼe ʼi ai he ʼu tehina mo tuagaʼane kua vaivavai mo maʼimoa, ʼe lagi feala hau tokoni kia natou ke natou kau ki te ʼu fono. Peʼe ke tokoni kia natou ki te fai ʼo ʼanatou fakatau peʼe ko te fakamaʼa ʼo tonatou ʼapi. (Lau ia Sakopo 1:27.) ʼE feala ke tou toe kau ki te fakamaʼa peʼe ki te taupau ke lelei ʼotatou Fale Fono. ʼE mole fakamaʼua mai e he tahi ke tou tokoni age. Kae ko totatou ʼofa ki te ʼAtua mo ʼotatou tehina ʼae ʼe ina uga tatou ke tou ‘lotolelei ʼo gaue maʼa natou.’—Pesalemo 110:3.
ʼE ʼi ai ʼihi faigamalie ʼe feala ke maʼu e natou ʼae kua papitema. Kapau ʼe mulimuli te ʼu tehina ki te ʼu fakamaʼua ʼae ʼi te Tohi-Tapu, pea ʼe feala tanatou tokoni ki te kokelekasio. ʼE feala ke natou liliu ko he ʼu tagata faifekau fakaminisitelio, pea ki muli age ko he kau tagata ʼafeā. ʼE feala ki te ʼu tehina mo tuagaʼane ke natou lagolago malohi ki te gaue faifakamafola, ʼo natou liliu ko he ʼu pionie. Pea ʼe lagolago ʼihi kau Fakamoʼoni ki te laga ʼo te ʼu fale fono peʼe olo ʼo maʼuʼuli ʼi he tahi fenua ʼo tokoni ki he kokelekasio.
2. ʼE feafeaʼi hau fakaʼaogaʼi ʼou koloa moʼo tokoni ki te kokelekasio?
ʼE feala ke tou “fakaʼapaʼapa kia Sehova ʼaki [ʼatatou] meʼa lelei tukupau.” (Taʼaga Lea 3:9) Ko he meʼa fakafiafia tatatou foaki he falā peʼe ko he tahi age meʼa moʼo tokoni ki te kokelekasio mo te gaue faifakamafola ʼae ʼi te malamanei katoa. (Lau ia 2 Kolonito 9:7.) ʼE toe fakaʼaogaʼi ʼotatou meʼa ʼofa moka hoko he ʼu tuʼutamaki fakanatula. Tokolahi te kau Fakamoʼoni ʼa Sehova ʼe natou ‘tuku keheʼi tuʼumaʼu he foʼi falā’ ko honatou meʼa ʼofa. (Lau ia 1 Kolonito 16:2.) ʼE natou olo ki tatatou tuʼasila donate.jw.org peʼe ko te ʼu puha meʼa ʼofa ʼae ʼi te ʼu fale fono. Kapau ʼe tou fai te faʼahi ʼaia, ʼe tou fakaha ai totatou ʼofa kia Sehova.
TA FAKALOLOTO
Ta vakaʼi he ʼu aluʼaga ke tou tokoni ai ki te kokelekasio.
3. Tou fakaʼaogaʼi ʼotatou koloa
ʼE ʼofa ia Sehova mo Sesu kia ia ʼae ʼe ina foaki ʼaki te fiafia. ʼI te tahi ʼaho, neʼe tokagaʼi e Sesu he fafine masiva neʼe ina foaki hana meʼa ʼofa. Lau ia Luka 21:1-4, pea fai te ʼu fehuʼi ʼaeni:
ʼE tonu koa ke lahi te meʼa ʼae ʼe tou foaki moʼo fakafiafiaʼi ia Sehova?
Kotea koa ʼae ʼe logoʼi e Sehova mo Sesu moka ʼe tou foaki ʼaki totatou loto katoa?
Kapau ʼe tou fia iloʼi te faʼahiga fakaʼaogaʼi ʼo ʼatatou meʼa ʼofa, vakaʼi te ʼATA VITEO. Pea fai te fehuʼi ʼae ʼe hoa mai.
ʼE tokoni feafeaʼi ʼatatou meʼa ʼofa ki te ʼu kokelekasio ʼo te malamanei katoa?
4. ʼE feala hatatou tokoni
ʼI te temi muʼa, neʼe mole foaki pe e te ʼu kaugana ʼa Sehova he foʼi falā ʼi te toe faʼu ʼo te ʼu fale ʼae ʼe natou fai tanatou tauhi. Kae ʼe natou gaue kinakina ki tona taupau mo tona toe faʼu. Lau ia 2 Koloniko 34:9-11, pea fai te fehuʼi ʼaeni:
Neʼe lagolago feafeaʼi ia te kau Iselaele ki te toe laga ʼo te fale lotu?
Kapau ʼe ke fia sio ki te faʼahiga tokaga lelei ʼa te kau Fakamoʼoni ʼa Sehova ki ʼonatou fale fono, vakaʼi te ʼATA VITEO. Pea fai te ʼu fehuʼi ʼae ʼe hoa mai.
He koʼe ʼe maʼuhiga ke maʼa mo lelei ʼotatou Fale Fono?
ʼE feafeaʼi hau tokoni ki te faʼahi ʼaia?
5. Tokoni ki tau kokelekasio
ʼE fakalotomalohiʼi ʼi te Tohi-Tapu ia te ʼu tehina ke tokaga ki te kokelekasio. Tou talanoa ki he faʼifaʼitaki. Vakaʼi te ʼATA VITEO, pea fai te fehuʼi ʼae ʼe hoa mai.
Neʼe faiga feafeaʼi ia Ryan ke lahi age tana gaue ʼi te kokelekasio?
ʼE fakaha ʼi te Tohi-Tapu te ʼu aluʼaga ʼe tonu ke fai e he tehina ke liliu ko he tagata faifekau fakaminisitelio pea mo tagata ʼafeā. Lau ia 1 Timoteo 3:1-13, pea fai te ʼu fehuʼi ʼaeni:
Kotea te ʼu fakamaʼua ʼe fai ki he tehina ʼe fia liliu ko he tagata faifekau fakaminisitelio peʼe tagata ʼafeā?
Kotea ʼae ʼe fakamaʼua ki tona kiʼi famili?—Vakaʼi te vaega 4 mo 11.
Ko te temi fea ʼe faiga ai te ʼu tehina ke natou maʼuliʼi te ʼu kalitate ʼaia? Pea kotea ʼona fua lelei ki te kokelekasio?
ʼE UI E ʼIHI: “Ko takotou pe koa falā maifea?”
Kotea anai tau tali?
MANATU TAFITO
ʼE fiafia ia Sehova ʼi tana sio mai ʼe tou foaki totatou temi, mo totatou malohi pea mo ʼotatou koloa moʼo lagolago ki te kokelekasio.
Fehuʼi Fakamanatu
ʼE feafeaʼi hatatou fakaʼaogaʼi totatou temi mo malohi moʼo tokoni ki te kokelekasio?
ʼE feafeaʼi hatatou fakaʼaogaʼi ʼotatou koloa moʼo tokoni ki te kokelekasio?
ʼE ke fia tokoni feafeaʼi ki te kokelekasio?
TE TAHI ʼU MANATU
Ia ʼaho nei, ʼe fakamaʼua mai koa e te ʼAtua ke tou foaki te vahe tahi ki te hogofulu ʼi te ʼu meʼa ʼae ʼe tou maʼu.
Te fakaʼuhiga ʼo te ui ʼae ke kita “faiga” ki he gaue ʼi te kokelekasio.
Ko he ʼu faiga ʼe fai e he ʼu Fakamoʼoni moʼo ʼave te ʼu tohi ki ʼonatou tehina mo tuagaʼane.
ʼE totogi koa te ʼu gaue fakalotu ʼa te kau Fakamoʼoni ʼa Sehova?
“ʼE Fakapaʼaga Feafeaʼi Takotou Gaue?” (Alatike ʼi te jw.org)