KAPITE 56
Taupau Te Logo Tahi ʼi Te Kokelekasio
Ka tou fakatahi mo ʼotatou tehina mo tuagaʼane, ʼe tou toe logoʼi pe te meʼa ʼae neʼe logoʼi e te Hau ko Tavite: “ʼE ko he meʼa lelei mo fakafimalie te nonofo fakatahi ʼa he ʼu tehina ʼi te logo tahi.” (Pesalemo 133:1) ʼE mole hoʼi maʼu feia pe te logo tahi. Koia, ʼe tonu ke tou gaue fuli ki tona taupau.
1. Kotea ʼae ʼe fakaofoofo ʼi te hahaʼi ʼa te ʼAtua?
Ka ke kau ki he fono ʼi he tahi age fenua, ʼe mole lagi ke mahino anai ki te lea. Kae ʼe ke fiafia mo logoʼi te ʼofa. Kotea tona tupuʼaga? Koteʼuhi ʼe tatau te ʼu tohi ʼae ʼe tou fakaʼaogaʼi moʼo ako te Tohi-Tapu ʼi te malamanei katoa. Pea ʼe tou feʼofaʼofani. Tatau aipe pe ʼe tou maʼuʼuli ʼi fea, kae ʼe tou “vikiʼi fuli ai te huafa ʼo Sehova pea mo tauhi fakatahi kia te ia.”—Sofonia 3:9.
2. Kotea ʼe feala ke ke fai moʼo taupau te logo tahi?
“Ke kotou feʼofamamahiʼaki mo he loto katoa.” (1 Petelo 1:22) ʼE feafeaʼi hau maʼuliʼi te tokoni ʼaeni? ʼAki hau tokagaʼi te ʼu kalitate ʼo ʼihi kae mole ko ʼonatou vaivaiʼaga. ʼAua naʼa ke fakatahi pe mo natou ʼae ʼe tatau te ʼu meʼa ʼe kotou leleiʼia. Kae faiga ke ke feiloʼiʼaki mo te ʼu tehina mo tuagaʼane fuli ʼo ʼihi fenua. Fai ia meʼa fuli ke mole ke fakapalatahi.—Lau ia 1 Petelo 2:17.a
3. Kotea ʼe ke fai anai moka hoko he fihi?
ʼE tou logo tahi kae ʼe tou agahala. ʼI ʼihi temi ʼe tou fakatupu ita peʼe fakamamahiʼi ʼihi. ʼE ui ʼi te Folafola ʼa te ʼAtua “kotou haga . . . fefakamolemoleʼaki. Ohage pe ko te lotolelei ʼa Sehova ke fakamolemole kia koutou, ʼe tonu ke kotou toe fai feia mo koutou.” (Lau ia Kolose 3:13.) ʼE tou fakamamahiʼi tuʼumaʼu ia Sehova kae ʼe lotofakamolemole mai pe. Koia, ʼe ina loto ai ke tou fakamolemole ki ʼotatou tehina mo tuagaʼane. Kapau neʼe ke fakamamahiʼi he tahi, faiga ke ke kumi te tokalelei.—Lau ia Mateo 5:23, 24.b
TA FAKALOLOTO
Ta vakaʼi pe kotea ʼe feala ke tou fai moʼo taupau te logo tahi mo te tokalelei ʼi te kokelekasio.
Kotea ka ke fai moʼo kumi te tokalelei?
4. ʼAua naʼa ke fakapalatahi
ʼE tou loto ke tou ʼoʼofa fuli ki ʼotatou tehina mo tuagaʼane. Kae ʼe mole faigafua tuʼumaʼu hatatou tali lelei he tahi ʼe mole tou fenua tahi. Kotea ʼe feala ke tokoni mai? Lau ia Gaue 10:34, 35, pea fai te ʼu fehuʼi ʼaeni:
ʼE tali e Sehova ia te faʼahiga hahaʼi fuli ke tauhi age kia te ia. ʼE feafeaʼi hau faʼifaʼitakiʼi ia ia ʼi tau faʼahiga manatu ʼo ʼuhiga mo natou ʼae ʼe mole tou fenua tahi?
Kotea te ʼu manatu fakapalatahi ʼe maʼu e te hahaʼi ʼo tou fenua ʼe tonu ke ke liʼaki?
Lau ia 2 Kolonito 6:11-13, pea fai te fehuʼi ʼaeni:
ʼI tau manatu la, ʼe feafeaʼi hau fakaovi ki te ʼu tehina mo tuagaʼane ʼae ʼe kotou fenua tahi?
5. Fakamolemole ʼaki he lotolelei mo kumi te tokalelei
ʼE lotolelei ia Sehova ke fakamolemole mai logo foki la ʼe mole fai hana hala. Lau ia Pesalemo 86:5, pea fai te ʼu fehuʼi ʼaeni:
Kotea ʼe tou ako ʼi heni ʼo ʼuhiga mo te fakamolemole ʼa Sehova?
He koʼe ʼe ke fiafia moka ʼe fakamolemole atu ia Sehova?
Kotea te ʼu aluʼaga ʼe faigataʼa tatatou felogoi lelei ai mo ʼihi?
ʼE tou faʼifaʼitakiʼi feafeaʼi ia Sehova ke tou logo tahi ai mo ʼotatou tehina mo tuagaʼane? Lau ia Taʼaga Lea 19:11, pea fai te fehuʼi ʼaeni:
Ka fai e he tahi he meʼa ke ke ita mo ke mamahi ai, kotea ʼe feala ke ke fai ke mole hoko he tokakovi?
ʼI ʼihi temi ko tatou ʼae ʼe tou fakamamahiʼi ʼihi. Ka hoko te aluʼaga ʼaia, kotea koa ʼe tonu ke tou fai? Vakaʼi te ʼATA VITEO, pea fai te fehuʼi ʼae ʼe hoa mai.
Kotea neʼe fai e te tuagaʼane moʼo kumi te tokalelei?
6. Tokagaʼi tafito te ʼu kalitate ʼo ʼou tehina mo tuagaʼane
Ka tou kamata iloʼi lelei ʼotatou tehina mo tuagaʼane, ʼe tou tokagaʼi ai ʼonatou kalitate mo ʼonatou vaivaiʼaga. ʼE feafeaʼi hatatou tokagaʼi tafito ʼonatou kalitate? Vakaʼi te ʼATA VITEO, pea fai te fehuʼi ʼae ʼe hoa mai.
Kotea ʼae ka tokoni atu ke ke tokagaʼi te ʼu kalitate ʼo ʼou tehina mo tuagaʼane?
ʼE tokagaʼi tafito e Sehova ʼotatou kalitate. Lau ia 2 Koloniko 16:9, ʼuluaki koga, pea fai te fehuʼi ʼaeni:
Kotea ʼe ke logoʼi ʼi tau iloʼi ʼae ʼe tokagaʼi tafito e Sehova ʼotatou kalitate?
ʼE feala ke mole ʼi ai he ʼu meʼa ʼe lelei ʼi he taimani matalelei kae ʼe lahi age tona maʼuhiga. ʼO toe feia pe, ʼe agahala ʼotatou tehina mo tuagaʼane kae ʼe natou maʼuhiga fuli kia Sehova
ʼE UI E ʼIHI: “ ’E tonu muʼa ke haʼu ʼo fai mai hana fakalelei ke feala haku fakamolemole ki ai.”
He koʼe ʼe tonu ke tou fefakamolemoleʼaki ʼaki he lotolelei?
MANATU TAFITO
ʼE feala hau taupau te logo tahi ʼi te kokelekasio ʼo ke fakamolemole gafua mo ʼofa ki ʼou tehina mo tuagaʼane fuli.
Fehuʼi Fakamanatu
ʼE feafeaʼi hau fakaha ʼe mole ke fakapalatahi?
Kotea ʼe ke fai anai moka ʼe ke fihi mo he tehina?
He koʼe ʼe ke fia faʼifaʼitakiʼi ia Sehova ʼo ʼuhiga mo te fakamolemole?
TE TAHI ʼU MANATU
ʼE tokoni mai te faʼifaʼitaki ʼo Sesu ke ʼaua naʼa tou fakamauʼi ʼihi.
ʼE tonu koa ke tou faifakalelei tatau aipe pe ʼe mole ko tatou ʼae ʼe hala?
“Te Faifakalelei ʼe Ko Te Kalavi ʼo Te Tokalelei” (Ko Te Tule Leʼo ʼaho 1 ʼo Novepeli 2002)
Ko te hisitolia ʼo he ʼu tagata ʼe lua neʼe lahilahi ake ʼi he fenua ʼe fehihiʼa te hahaʼi ki te ʼu lanu. Kae neʼe nā iloʼi leva te fakaʼuhiga ʼo te logo tahi moʼoni.
Ko Johny Mo Gideon: Neʼe Nā Fefehiʼaʼaki Ki Muʼa Atu Kaʼe Kua Nā Tau Tehina ʼi Te Temi Nei (6:42)
ʼE feafeaʼi te fakatokatoka ʼo te ʼu fihi ke taupau maʼu te tokalelei ʼi te kokelekasio?
“Ke Tou Fakatokatoka Te ʼu Fihi ʼi Te ʼOfa” (Ko Te Tule Leʼo ʼo Maio 2016)
a ʼI te Fakamahino 6, ʼe fakaha ai pe kotea ʼe feala ke fai e he Kilisitiano ʼe ʼofa ʼi ʼona tehina mo tuagaʼane ke mole natou pikisia ʼi he mahaki.
b ʼI te Fakamahino 7, ʼe talanoa ai pe ʼe feafeaʼi he fakatokatoka he ʼu fihi ʼi te faʼahi fakakoloa peʼe ʼi te lao.