Tou Ako Mai Te Folafola ʼa Te ʼAtua
He Koʼē ʼe Papitema Ia Te Kau Kilisitiano?
ʼI te ʼalatike ʼaenī, ʼe lagaʼi ai te ʼu fehuʼi ʼe feala ke kotou fai pea ʼe fakahā ai ia te ʼu vaega Tohi-Tapu ʼo kotou maʼu ai ʼona tali. ʼE fiafia anai ia te kau Fakamoʼoni ʼa Sehova ʼi te fai palalau mo koutou ʼo tali ki te ʼu fehuʼi ʼaenī.
1. Koteā ia te fakaʼuhiga ʼo te papitema Fakakilisitiano?
Ko te papitema, ʼe ko hatatou kole ke tou maʼu ia he ʼu felōgoi lelei pea mo te ʼAtua. Koia, ʼe tonu ai ke papitema ia he tehina peʼe ko he tuagaʼane, ʼe mole papitema anai ʼi te temi ʼaē kei meamea ai, kae ʼi te temi ʼaē kua lahi ai pea kua feala ke ako ʼo ʼuhiga mo te ʼAtua pea mo liliu ko he tisipulo ʼa Sesu. (Gaue 8:12; 1 Petelo 3:21) ʼE tou liliu ko he tisipulo ʼa Sesu mokā ʼe tou ako pea mo tou maʼuliʼi ia te ʼu meʼa ʼaē neʼe fakatotonu mai e Sesu.—Lau ia Mateo 28:19, 20.
ʼI temi ʼo te kau ʼapositolo ʼa Sesu, tokolahi neʼe natou fai fakavilivili he fakatuʼutuʼu ke natou ako ke natou ʼiloʼi ia te ʼAtua pea mo Sesu. Ohagē lā, ʼi te temi ʼaē neʼe mahino ai te tagata, ko te mate ʼa Sesu neʼe ina fakafealagia ia te haofaki, neʼe liliu atu aipē ʼi te moʼi temi ʼaia ko hana tisipulo. Iā ʼaho nei, tokolahi te hahaʼi ʼaē neʼe natou kumi fakamālotoloto te moʼoni, neʼe natou filifili ke natou liliu ko he ʼu tisipulo ʼa Sesu.—Lau ia Gaue 8:26-31, 35-38.
2. He koʼē neʼe papitema ia Sesu?
Neʼe taʼu 30 ia Sesu ʼi te temi ʼaē neʼe papitemaʼi ai e Soane Patita ʼi te Vaitafe ʼo Solotane. Maʼa Sesu ko te fakaʼuhiga ʼo tona papitema ʼe ko tana fakatuʼutuʼu ʼaē ke ina fai ia te finegalo ʼo te ʼAtua. (Hepeleo 10:7) ʼO kau ki te faʼahi ʼaia, ia tana foaki tona maʼuli ko he sākilifisio maʼa te agahala ʼo te mālamanei. Kae ʼi muʼa ʼo tana hifo mai te lagi ʼo maʼuli ʼi te kele, neʼe haga ʼofa ia Sesu pea mo fakalogo ki tana Tamai, ko Sehova.—Lau ia Maleko 1:9-11; Soane 8:29; 17:5.
3. He koʼē ʼe tonu ki he Kilisitiano ke papitema?
ʼE mole tatau totatou ʼaluʼaga mo ʼaē ʼa Sesu, he neʼe tou tutupu agahala. Kae ʼaki te mate fakasākilifisio ʼo Sesu kua feala ai ke tou felōgoi lelei mo te ʼAtua. (Loma 5:10, 12; 12:1, 2) Kua feala ke tou liliu ko he tahi ʼo tona fāmili. (2 Kolonito 6:18) ʼE tou maʼu feafeaʼi anai ia te pilivilēsio ʼaia? ʼI tatatou foaki ia tātou kiā Sehova ʼi te faikole, ʼo tou fakapapau ke tou fai tona finegalo ʼi totatou maʼuli kātoa. ʼI te hili ʼo te fai ʼo te fakapapau ʼaia, pea ʼe tou fakamoʼoni anai iā muʼa ʼo te kaugamālie ʼaki tatatou papitema.—Lau ia Mateo 16:24; 1 Petelo 4:2.
4. ʼE tou lava teuteu feafeaʼi ki te papitema?
ʼE akoʼi e te kau Fakamoʼoni ʼa Sehova ia te Tohi-Tapu ki he tahi ʼe fia fakaovi ki te ʼAtua. Ko te ako ʼo te Tohi-Tapu pea mo te kau ki te ʼu fono, ʼe ina fakalotomālohiʼi anai ia tokotou ʼofa ʼaē ki te ʼAtua pea mo takotou tui ʼaē kiā te ia. ʼE toe tokoni atu anai ke kotou maʼu he ʼu manatu pea mo he ʼu agamāhani ʼe lelei. Ko te maʼuliʼi ʼo te ʼofa, mo te tui, pea mo ʼihi atu kalitātē ʼe tokoni atu anai ke kotou taupau ia te fakapapau ʼaē neʼe kotou fai ke kotou tauhi kiā Sehova ʼo talu ai.—Lau ia Soane 17:3; Hepeleo 10:24, 25.
Kapau ʼe kotou fia maʼu he tahi ʼu fakamahino, vakaʼi te kāpite 18 ʼo te tohi ʼaenī, Koteā ʼAē ʼe Akoʼi Moʼoni Mai ʼi Te Tohi-Tapu? neʼe tā e te kau Fakamoʼoni ʼa Sehova.