ʼE Tali Feafeaʼi Anai Ia Sesu Ki Te Fehuʼi ʼAia?

Tokolahi iā nātou ʼaē ʼe tauhi lotu lelei ʼe natou ʼui ʼe tonu ke gāue fakatahi te lotu pea mo te politike. Heʼe ʼi tanatou manatu ʼe feala ke tokoni te lotu ki te fakatokatoka ʼo te ʼu fihifihia ʼo te mālamanei. Kae ki ʼihi, ʼe mole tonu ke fakatahiʼi te lotu pea mo te politike. Kae, koteā takotou manatu ʼo ʼuhiga mo te gāue ʼo te lotu pea mo te politike? ʼE tonu koa ke gāue fakatahi ia te ʼu mālohi ʼaia e lua?

NEʼE ʼui ʼo ʼuhiga mo Sesu Kilisito neʼe “ko te tagata tokotahi ʼaia neʼe malave mālohi ʼana akonaki ki te mālamanei.” Koia, kotou fakakaukauʼi age muʼa mo kapau neʼe feala ke tou lagaʼi ia te fehuʼi ʼaenī: ʼE tonu koa ke fakatahiʼi ia te lotu pea mo te politike? Koteā anai tana tali kiai? ʼI tana kei maʼuli ʼi te kele, neʼe ina tali kiai ʼaki ʼana akonaki mo ʼana gāue. Ohagē lā, ʼi te Akonaki ʼiloa ʼi te Moʼuga, neʼe foaki e Sesu he ʼu fakatotonu ʼe tokoni anai ki ʼana tisipulo ke natou mahino ki te gāue ʼaē ʼe tonu ke natou fai ʼi tonatou fenua. Tou vakaʼi he ʼu manatu ʼo te akonaki maʼuhiga ʼaia.

Ke Malave Ki Te Maʼuli ʼo Te Hahaʼi

Neʼe fakamahino e Sesu ia te aga ʼo tana kau tisipulo ʼi te mālamanei. Neʼe ʼui fēnei ia Sesu: “Ko te masima koutou o te kele. Kae kapau e puli te konakona o te masima, e konakonai anai ia ia aki tea? E aoga pe ia ke li ki fafo pea ke malamalaki e te u tagata. Ko te malama koutou o te malamanei. . . . Ke mu tokotou malama ia mua o te u tagata, o tupu ke natou sisio ki akotou gaue lelei, pea ke natou fakakololia ki takotou tamai ae e nofo i te atu lagi.” (Mateo 5:13-16) He koʼē neʼe fakatatau e Sesu ia tana kau tisipulo ki he māsima pea mo he mālama?

Neʼe ʼui e Sesu ko ʼana tisipulo ʼe ko he māsima maʼa te mālamanei kātoa kae mole maʼa he kiʼi kūtuga pē. ʼE natou hagē ko he mālama maʼa nātou fuli ʼaē ʼe fia kumi fakamālotoloto ia te ʼAtua kae mole ki ʼihi pē. Neʼe fakaʼaogaʼi e Sesu ia te ʼu palalau fakatā ʼaenī moʼo fakahā lelei mai ʼe mole tonu ke māʼuʼuli ʼāteaina ʼana kau tisipulo. He koteā tona tupuʼaga?

ʼI tana fakatatau ʼana tisipulo ki he māsima pea mo he mālama, neʼe fia fakahā e Sesu ia te lelei ʼo ʼanatou gāue ki te hahaʼi. ʼE mole feala ke taupau fualoa he kanoʼi manu mo kapau neʼe mole māsimaʼi. ʼE mole feala ke mālama lelei he koga fale mo kapau ʼe tuʼu mamaʼo ia te mālama. Koia ʼe mahino mai, neʼe mole ʼui e Sesu ki ʼana tisipulo ke natou māʼuʼuli ʼāteaina mai te hahaʼi pea ke mole natou felōgoi mo nātou ʼaē mole kau ki tanatou lotu. Kae, ohagē ko te ʼaoga ʼo te māsimaʼi ʼo he kanoʼi manu peʼe ko te ʼaoga ʼo he mālama mokā fakapōʼuli, ʼe toe ʼaoga te gāue ʼa te kau Kilisitiano ki te maʼuli ʼo te hahaʼi.

“E Mole Natou Kau i Te Malamanei”

Kae ko te ʼu fakatotonu ʼaē neʼe foaki e Sesu ki ʼana tisipulo ʼo ʼuhiga mo tanatou felōgoi mo te hahaʼi fuapē ʼe ina lagaʼi ai ia te fehuʼi maʼuhiga ʼo ʼuhiga mo te aga ʼa te kau Kilisitiano ki te politike. Koteā tona tupuʼaga? ʼI muʼa pē ʼo tana mate, neʼe faikole fēnei ia Sesu ki te ʼAtua ʼo ʼuhiga mo ʼana tisipulo: “E mole au kole atu kia koe ke ke too kehe natou mai te malamanei, kae ke ke taupau natou mai ae e kovi. E mole natou kau i te malamanei, o hage ko au e mole au kau i te malamanei.” (Soane 17:15, 16) Koia, ʼe lava feafeaʼi ki te kau Kilisitiano hanatou mole kau ki te mālamanei kae natou kau ki te faʼufaʼu ʼo te fenua? Ke tou mahino, tou vakaʼi ia te ʼu fehuʼi ʼaenī e tolu:

• Koteā ia te manatu ʼa Sesu ʼo ʼuhiga mo te politike?

• Koteā ʼaē ʼe tonu ke fai e te kau Kilisitiano iā ʼaho nei?

• ʼE malave feafeaʼi ia te ʼu akonaki Fakakilisitiano ki te hahaʼi?